by Midhun HP News | Oct 15, 2026 | Latest News, കേരളം
കൊച്ചി: നെടുമ്പാശേരി മിനി കൂപ്പര്‍ അപകടത്തില്‍ മൂന്നുപേര്‍ മരിച്ച കേസിലെ പ്രതി സുഹൈല്‍ സജീവ് മുടി പറ്റെവെട്ടി പുതിയ മേക്കോവറില്‍. കോടതിയില്‍ ഹാജരാക്കാന്‍ കൊണ്ടുവന്നപ്പോള്‍, പ്രതി തലമുടി പറ്റെ വെട്ടി തിരിച്ചറിയാന്‍ പോലും സാധിക്കാത്ത രീതിയിലായിരുന്നു. കാക്കനാട്ടെ ബോസ്റ്റല്‍ സ്‌കൂളില്‍ നിന്നാണ് സുഹൈലിനെ കോടതിയില്‍ ഹാജരാക്കിയത്.
മുടി വെട്ടാന്‍ ആരും നിര്‍ബന്ധിച്ചിട്ടില്ലെന്നും, താന്‍ സ്വയം വെട്ടിയതാണെന്നും സുഹൈല്‍ വ്യക്തമാക്കിയതായി ബോസ്റ്റല്‍ സ്‌കൂള്‍ അധികൃതര്‍ അറിയിച്ചു. അന്തേവാസികള്‍ക്ക് പൊതുവായ ഉപയോഗത്തിനായി നല്‍കിയിട്ടുള്ള ട്രിമ്മര്‍ ഉപയോഗിച്ചാണ് സുഹൈല്‍ മുടി വടിച്ചത്. രൂപത്തിലും ശരീരഭാഷയിലും വന്ന മാറ്റം മൂലം ഒറ്റനോട്ടത്തില്‍ സുഹൈലിനെ ആര്‍ക്കും പെട്ടെന്ന് തിരിച്ചറിയാന്‍ കഴിഞ്ഞിരുന്നില്ല.
നെടുമ്പാശേരി വാഹനാപകടക്കേസിലെ പ്രധാന പ്രതി സുഹൈല്‍ സജീവിനെതിരെ കുറ്റകരമായ നരഹത്യ വകുപ്പാണ് ചുമത്തിയിട്ടുള്ളത്. പത്തൊന്‍പതുകാരനായ പ്രതി സുഹൈല്‍ സജീവിനു മദ്യം നല്‍കിയ ബാറുകളുടെ ലൈസന്‍സ് എക്‌സൈസ് വകുപ്പ് സസ്പെന്‍ഡ് ചെയ്തിട്ടുണ്ട്. 23 വയസില്‍ താഴെ പ്രായമുള്ള പ്രതിക്ക് മദ്യം നല്‍കിയതിന്റെ പേരിലാണ് നടപടി. സുഹൈലും കൂട്ടുകാരും മൂന്ന് ബാറുകളില്‍ നിന്നും മദ്യപിച്ചതായി അന്വേഷണത്തില്‍ കണ്ടെത്തിയിരുന്നു.
by Midhun HP News | Oct 15, 2026 | Latest News, സിനിമ
‘ബെത്‌ലഹേം കുടുംബ യൂണിറ്റി’ലൂടെ വീണ്ടും പ്രേക്ഷക മനം കവർന്നിരിക്കുകയാണ് നടി മമിത ബൈജു. ഇപ്പോഴിതാ മമിതയെ പ്രശംസിച്ച് രംഗത്തെത്തിയിരിക്കുകയാണ് നടൻ എസ് ജെ സൂര്യ. ‘നടിപ്പ് അറക്കി’ എന്നാണ് മമിതയെ സൂര്യ വിശേഷിപ്പിച്ചത്. ‘നടിപ്പ് അറക്കൻ’ എന്നാണ് തമിഴ് ഇൻഡസ്ട്രി എസ് ജെ സൂര്യയെ വിശേഷിപ്പിക്കുന്നത്.
‘നടിപ്പ് അറക്കിയായ’ ഒരു നടിയുടെ പേര് പറയാൻ പറഞ്ഞാൽ ആരുടെ പേര് പറയുമെന്ന അവതാരകന്റെ ചോദ്യത്തിനു മറുപടിയായാണ് എസ് ജെ സൂര്യ, മമിതയുടെ പേര് പറഞ്ഞത്. ഇന്ത്യഗ്ലിറ്റ്സ് എന്ന യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു താരം. ‘നടിപ്പ് അറക്കൻ’ എന്ന വിശേഷണത്തിന് അർഹനാണ് താങ്കൾ. ‘നടിപ്പ് അറക്കി’യായി നിങ്ങൾ ആരുടെ പേര് പറയും ? എന്നാണ് അവതാരകൻ ചോദിച്ചത്.
“ഈ അടുത്തായി നമ്മുടെ മമിത ബൈജു, ഭയങ്കരമായ അഭിനയം കാഴ്ചവയ്ക്കുന്നു. നോർത്തിൽ ആണെങ്കിൽ ആലിയ ഭട്ട്”. – എന്നായിരുന്നു നടന്റെ മറുപടി. അതേസമയം മലയാളത്തിൽ മാത്രമല്ല, തമിഴിലും തിളങ്ങി നിൽക്കുകയാണ് മമിത ഇപ്പോൾ. വിജയ്‌യുടെ സഹോദരിയായി ‘ജന നായകനി’ലും സൂര്യയുടെ നായികയായി ‘വിശ്വനാഥ് ആൻഡ് സൺസി’ലും മമിത എത്തിയിരുന്നു.
അതേസമയം നെൽസൺ ദിലീപ് കുമാർ സംവിധാനം ചെയ്ത ‘ജയിലർ 2’ ആണ് എസ് ജെ സൂര്യയുടേതായി ഇപ്പോൾ തിയറ്ററുകളിലെത്തിയിരിക്കുന്ന ചിത്രം. ബോധി എന്ന കഥാപാത്രമായാണ് എസ് ജെ സൂര്യ ചിത്രത്തിലെത്തിയത്.
by Midhun HP News | Oct 15, 2026 | Latest News, ദേശീയ വാർത്ത
നെടുങ്കണ്ടം: വിനോദസഞ്ചാരികളുടെ ജീവന് വൻ ഭീഷണിയുയർത്തുന്ന ഇടുക്കി നെടുങ്കണ്ടം തൂവൽ വെള്ളച്ചാട്ടത്തിൽ പൊതുജനങ്ങൾക്കും സഞ്ചാരികൾക്കും പ്രവേശന വിലക്കേർപ്പെടുത്തി. കഴിഞ്ഞ ദിവസം അരുവിയിൽ യുവാവ് മുങ്ങിമരിച്ച സാഹചര്യത്തിൽ ജില്ലാ ദുരന്തനിവാരണ അതോറിറ്റി ചെയർമാൻ കൂടിയായ ജില്ലാ കളക്ടർ ഡോ. ദിനേശ് ചെറുവാട്ടാണ് ഇതുസംബന്ധിച്ച ഉത്തരവ് പുറത്തിറക്കിയത്.
വെള്ളച്ചാട്ടത്തിന് സമീപം ആവശ്യമായ സുരക്ഷാ സംവിധാനങ്ങൾ ഇല്ലാത്തതിനാൽ പൊതുജനങ്ങളുടെ പ്രവേശനം പൂർണ്ണമായും നിരോധിക്കണമെന്ന് കാണിച്ച് ഉടുമ്പൻചോല തഹസിൽദാർ നൽകിയ റിപ്പോർട്ടിന്റെ അടിസ്ഥാനത്തിലാണ് കളക്ടറുടെ അടിയന്തര നടപടി. വെള്ളച്ചാട്ടത്തിലെ അടിയൊഴുക്കിന്റെ ശക്തി, അപ്രതീക്ഷിതമായ ആഴം, പാറക്കെട്ടുകളുടെ സ്വഭാവം, വെള്ളത്തിനടിയിലെ അപകടക്കെണികൾ എന്നിവ സന്ദർശകർക്ക് തിരിച്ചറിയാൻ സാധിക്കുന്നില്ല. മുന്നറിയിപ്പ് ബോർഡുകളോ, പ്രവേശന നിയന്ത്രണ സംവിധാനങ്ങളോ, അപകടസാധ്യതയുള്ള ഭാഗങ്ങളിലേക്ക് ആളുകൾ പോകുന്നത് തടയാനുള്ള വേലികളോ നിലവിൽ പ്രദേശത്തില്ല. ഇത്തരമൊരു സാഹചര്യത്തിൽ ആളുകൾ പ്രവേശിക്കുന്നത് കൂടുതൽ ജീവഹാനിക്ക് ഇടയാക്കുമെന്നായിരുന്നു തഹസിൽദാറുടെ റിപ്പോർട്ട്.
ഇതിന്റെ വെളിച്ചത്തിൽ തൂവൽ വെള്ളച്ചാട്ടത്തിലേക്കും അപകടസാധ്യതയുള്ള പരിസരപ്രദേശങ്ങളിലേക്കും പ്രവേശിക്കുന്നതും, അരുവിയിൽ ഇറങ്ങുന്നതും കുളിക്കുന്നതും പൂർണ്ണമായി നിരോധിച്ചു. കഴിഞ്ഞയാഴ്ച അപകടത്തിൽപ്പെട്ട അശ്വിൻ ഉൾപ്പെടെ ഇതുവരെ 13-ലധികം ആളുകളാണ് തൂവൽ അരുവിയിലെ അപകടച്ചുഴികളിൽപ്പെട്ട് ജീവൻ നഷ്ടപ്പെട്ടത്. നിരോധനം ലംഘിച്ച് പ്രദേശത്തേക്ക് കടക്കുന്നവർക്കെതിരെ ദുരന്തനിവാരണ നിയമപ്രകാരം കർശന നടപടി സ്വീകരിക്കുമെന്നും അധികൃതർ വ്യക്തമാക്കി.
by Midhun HP News | Oct 15, 2026 | Latest News, കേരളം
കൊച്ചി: അനധികൃത സ്വത്ത് സമ്പാദന കേസിൽ മുൻ ഡിജിപി ടോമിൻ ജെ. തച്ചങ്കരിക്ക് ലഭിച്ച തടവുശിക്ഷ കേരള ഹൈക്കോടതി മരവിപ്പിച്ചു. കോട്ടയം വിജിലൻസ് പ്രത്യേക കോടതി വിധിച്ച ശിക്ഷാവിധിക്കെതിരെ തച്ചങ്കരി നൽകിയ അപ്പീൽ ഹർജി പരിഗണിച്ചാണ് ജസ്റ്റിസ് എ. ബദറുദ്ദീന്റെ ഇടക്കാല ഉത്തരവ്.
കോട്ടയം എൻക്വയറി കമ്മീഷണർ ആൻഡ് വിജിലൻസ് സ്പെഷ്യൽ ജഡ്ജി അഴിമതി നിരോധന നിയമത്തിലെ 13(2), 13(1)(e) വകുപ്പുകൾ പ്രകാരം തച്ചങ്കരി കുറ്റക്കാരനാണെന്ന് കണ്ടെത്തുകയും നാല് വർഷം തടവും 30.84 ലക്ഷം രൂപ പിഴയും ശിക്ഷ വിധിക്കുകയുമായിരുന്നു. തെളിവുകളുടെയും ആനുകൂല്യങ്ങളുടെയും അടിസ്ഥാനത്തിൽ സാധ്യമായ എല്ലാ ഇളവുകളും നൽകിയ ശേഷവും അദ്ദേഹത്തിന്റെ കൈവശമുള്ളത് വരുമാനത്തിന്റെ 52.33 ശതമാനത്തോളം വരുന്ന അനധികൃത സ്വത്താണെന്നായിരുന്നു വിജിലൻസ് കോടതിയുടെ കണ്ടെത്തൽ.
വിജിലൻസ് കോടതിയുടെ വിധി ചോദ്യം ചെയ്തും ശിക്ഷ മരവിപ്പിച്ച് ജാമ്യം അനുവദിക്കണമെന്ന് ആവശ്യപ്പെട്ടുമാണ് തച്ചങ്കരി ഹൈക്കോടതിയെ സമീപിച്ചത്. തച്ചങ്കരിക്ക് വേണ്ടി ഹാജരായ മുതിർന്ന അഭിഭാഷകൻ രാമൻ ബി. പിള്ളയുടെയും പ്രോസിക്യൂഷന്റെയും വിശദമായ വാദങ്ങൾ കഴിഞ്ഞ മാസം കേട്ട കോടതി, വിധി പറയാനായി മാറ്റിവെക്കുകയായിരുന്നു.
by Midhun HP News | Oct 15, 2026 | Latest News, കേരളം
കൊച്ചി: സിഎംആര്‍എല്‍- എക്‌സാലോജിക് അഴിമതിക്കേസില്‍ പ്രതിപക്ഷ നേതാവ് പിണറായി വിജയന് തിരിച്ചടി. സിംഗിള്‍ ബെഞ്ച് ഉത്തരവിനെതിരെ അപ്പീല്‍ നല്‍കാന്‍ അനുമതി തേടി പിണറായി വിജയന് അടക്കമുള്ളവര്‍ നല്‍കിയ ഹര്‍ജി ഹൈക്കോടതി ഡിവിഷൻ ബെഞ്ച് തള്ളി. നിയമപരമായി എഫ്ഐആർ ഇട്ട സാഹചര്യത്തിൽ അപ്പീൽ അനുമതി അനുവദിക്കില്ലെന്ന് ഹൈക്കോടതി വ്യക്തമാക്കി. പിണറായി വിജയന് പുറമെ, മകള്‍ ടി വീണ, ഭര്‍ത്താവും മുന്‍ മന്ത്രിയുമായ പി എ മുഹമ്മദ് റിയാസ് തുടങ്ങിയവരാണ് ഹര്‍ജി നൽകിയത്.
ജസ്റ്റിസുമാരായ കെ നടരാജന്‍, ജോണ്‍സണ്‍ ജോണ്‍ എന്നിവരടങ്ങിയ ഡിവിഷന്‍ ബെഞ്ചാണ് വിധി പറഞ്ഞത്. സിംഗിള്‍ ബെഞ്ച് പരിഗണിച്ച ഹര്‍ജിയില്‍ പിണറായി വിജയന് അടക്കമുള്ളവര്‍ കക്ഷിയല്ലാത്തതിനാല്‍ ഫയലില്‍ സ്വീകരിക്കണമെങ്കില്‍ ഡിവിഷന്‍ ബെഞ്ചിന്റെ തീരുമാനം ഉണ്ടാകണം. ഹര്‍ജിയില്‍ സംസ്ഥാന സര്‍ക്കാര്‍, ഇഡി, സിംഗിള്‍ ബെഞ്ചിലെ ഹര്‍ജിക്കാരന്‍ എന്നിവരെ ഡിവിഷന്‍ ബെഞ്ച് വിശദമായി കേട്ടിരുന്നു.
സംസ്ഥാന സര്‍ക്കാര്‍ തീരുമാനിച്ച പ്രാഥമികാന്വേഷണത്തിനായുള്ള എസ്‌ഐടി റദ്ദാക്കി, ഇഡി നല്‍കിയ കത്തില്‍ വിജിലന്‍സ് എഫ്‌ഐആര്‍ രജിസ്റ്റര്‍ ചെയ്ത് അന്വേഷിക്കാനാണ് സിംഗിള്‍ ബെഞ്ച് ഉത്തരവിട്ടത്. കെഎം ഷാജഹാനാണ് സിംഗിള്‍ ബെഞ്ചില്‍ ഹര്‍ജി നല്‍കിയത്. സിഎംആര്‍എല്‍ ഇടപാടില്‍ വിജിലന്‍സ് രണ്ട് എഫ്‌ഐആറുകളാണ് രജിസ്റ്റര്‍ ചെയ്തത്. അഴിമതി തടയല്‍ നിയമപ്രകാരമാണ് പിണറായിക്കെതിരെ കേസെടുത്തിട്ടുള്ളത്.
പിണറായിക്കും റിയാസിനുമെതിരേ കേസെടുത്ത് ഇ ഡി
അതിനിടെ സിഎംആർഎൽ-എക്‌സാലോജിക് ഇടപാട് കേസിൽ മുൻ മുഖ്യമന്ത്രി പിണറായി വിജയൻ, മുഹമ്മദ് റിയാസ് എന്നിവർക്കെതിരേ എൻഫോഴ്‌സ്‌മെന്റ് ഡയറക്ടറേറ്റ് കേസെടുത്തു. വിജിലൻസ് എഫ്‌ഐആറിന്റെ ചുവട് പിടിച്ച് രണ്ട് ഇസിഐആർ രജിസ്റ്റർ ചെയ്തു. കള്ളപ്പണം വെളുപ്പിക്കൽ നിരോധന നിയമപ്രകാരമാണ് കേസ്. അഴിമതി, ഹവാല ആരോപണങ്ങളിൽ നേരത്തേ വിജിലൻസ് കേസെടുത്തിരുന്നു. ഇതിന് പിന്നാലെയാണ് ഇ ഡിയും കേസെടുത്തിരിക്കുന്നത്.
by Midhun HP News | Oct 15, 2026 | Latest News, ജില്ലാ വാർത്ത
തിരുവനന്തപുരം: ചിറയിന്‍കീഴ് എംഎല്‍എ രമ്യ ഹരിദാസിന്റെ പിഎ വിമല്‍ രാജിവെച്ചു. വ്യക്തിപരമായ കാരണങ്ങളാലാണ് രാജിവെച്ചതെന്നാണ് ഔദ്യോഗിക വിശദീകരണം. രാജിക്കത്ത് നിയമസഭ സെക്രട്ടറിക്ക് കൈമാറിയിട്ടുണ്ട്.
എന്നാല്‍ രമ്യ ഹരിദാസ് എംഎല്‍എയുമായുള്ള അഭിപ്രായഭിന്നതയാണ് രാജിക്ക് കാരണമെന്നാണ് സൂചന. തദ്ദേശ വകുപ്പില്‍ നിന്നും ഡെപ്യൂട്ടേഷനിലാണ് വിമല്‍ രമ്യ ഹരിദാസിന്റെ പിഎ ആയി എത്തുന്നത്. സര്‍വീസ് സംഘടനാ രംഗത്ത് പ്രമുഖനാണ്.
ചിറയിന്‍ കീഴില്‍ അടുത്തിടെ രമ്യ ഹരിദാസ് ഉള്‍പ്പെടെ കോണ്‍ഗ്രസ് നേതാക്കളുടെ കയ്യാങ്കളി പാര്‍ട്ടിക്ക് വലിയ നാണക്കേട് ഉണ്ടാക്കിയിരുന്നു. തുടര്‍ന്ന് ഉപതെരഞ്ഞെടുപ്പില്‍ രണ്ട് സീറ്റുകളില്‍ കോണ്‍ഗ്രസ് പരാജയപ്പെടുകയും ചെയ്തു. കഴിഞ്ഞദിവസം ചിറയിന്‍കീഴില്‍ കെഎസ്ആര്‍ടിസി ബസ് ഫ്‌ലാഗ് ഓഫ് മന്ത്രി ബിന്ദുകൃഷ്ണയുടെ ഭര്‍ത്താവ് നിര്‍വഹിച്ചതും വിവാദത്തിലായിരുന്നു.
Recent Comments