by Midhun HP News | Oct 15, 2026 | Latest News, ജില്ലാ വാർത്ത
നവരാത്രി മഹോത്സവത്തെ വരവേൽക്കാൻ ഒരുങ്ങി തിരുവാട്ടുകാവ് ദേവീക്ഷേത്രം. നവരാത്രി മഹോത്സവത്തോടനുബന്ധിച്ച് തിരുവറാട്ട്കാവ് ദേവിക്ഷേത്രത്തിൽ 16-10-2026 വെള്ളിയാഴ്ച മുതൽ 21-10-2026 ബുധനാഴ്ച വരെ വേണി സംഗീത വിദ്യാലയത്തിന്റെ നേതൃത്വത്തിൽ സംഗീതോത്സവം ഉണ്ടായിരിക്കുന്നതാണ്. സംഗീതസന്ധ്യ, നൃത്ത സന്ധ്യ, അരങ്ങേറ്റ പരിപാടികൾ എന്നിവ വൈകുന്നേരം 6 മണി മുതൽ എല്ലാദിവസവും ഉണ്ടായിരിക്കുന്നതാണ്. പൂജവയ്പ്പ് ചടങ്ങിനായും, വിദ്യാരംഭ ചടങ്ങിനായും വിപുലമായ ഒരുക്കങ്ങളാണ് ഇത്തവണ ക്ഷേത്ര ഉപദേശകസമിതിയുടെ നേതൃത്വത്തിൽ ഒരുക്കിയിരിക്കുന്നത്.
by Midhun HP News | Oct 15, 2026 | Latest News, ദേശീയ വാർത്ത
ഡൽഹി: സുപ്രീം കോടതി വളപ്പിലേക്ക് മാർച്ചും പ്രതിഷേധവും നടത്തുകയും ഹർജി നൽകാനായി കൂട്ടത്തോടെ രജിസ്ട്രിയിൽ പ്രവേശിക്കുകയും ചെയ്ത സംഭവത്തിൽ കോൺഗ്രസ് പാർട്ടിക്കും ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കും ഇന്ത്യ മുന്നണിയിലെ പ്രമുഖ നേതാക്കൾക്കും സുപ്രീം കോടതിയുടെ നോട്ടീസ്. ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് ഹർജിയിൽ മറുപടി തേടിയത്. സുപ്രീം കോടതിയിലും ഹൈക്കോടതികളിലും ഇത്തരം രാഷ്ട്രീയ പ്രകടനങ്ങളും മാർച്ചുകളും കർശനമായി നിയന്ത്രിക്കണമെന്ന് ആവശ്യപ്പെട്ട് അഭിഭാഷകരായ ദിഗന്ത് മിശ്ര, ദിവ്യാൻഷ് ബിഷ്ത്, ആശിഷ് ഗോപാൽ ഗാർഗ്, ശ്വേത ഗാർഗ് എന്നിവർ സമർപ്പിച്ച പൊതുതാൽപര്യ ഹർജിയിലാണ് കോടതിയുടെ ഇടപെടൽ.
സുപ്രീം കോടതി പരിസരത്ത് അരങ്ങേറിയ സംഭവങ്ങൾ അംഗീകരിക്കാനാവില്ലെന്നും ഇത്തരത്തിൽ ജുഡീഷ്യറിയെ വിരട്ടാൻ ശ്രമിക്കുന്നത് അനുവദിക്കരുതെന്നും ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ ഗൗരവ് ഭാട്ടിയ വാദിച്ചു. എന്നാൽ, “ആർക്കും ജുഡീഷ്യറിയെ ഭയപ്പെടുത്താൻ കഴിയില്ല” എന്ന് ചീഫ് ജസ്റ്റിസ് സൂര്യ കാന്ത് വ്യക്തമാക്കി. “ഞങ്ങൾ ദന്തഗോപുരങ്ങളിൽ വസിക്കുന്നവരല്ല; അവർ പുറത്ത് എന്താണ് പറയുന്നതെന്നും കോടതിയിൽ എന്താണ് പറയുന്നതെന്നും ഞങ്ങൾക്ക് വ്യക്തമായി അറിയാം” എന്നും ചീഫ് ജസ്റ്റിസ് സൂര്യകാന്ത് കൂട്ടിച്ചേർത്തു.
ഒക്ടോബർ 12-ന് പ്രതിപക്ഷ നേതാക്കൾ സുപ്രീം കോടതിയിലേക്ക് നടത്തിയ മാർച്ചിന് പിന്നാലെ, ചീഫ് ജസ്റ്റിസിനെ വ്യക്തിപരമായി അധിക്ഷേപിച്ച് കേരള പ്രദേശ് കോൺഗ്രസ് കമ്മിറ്റിയുടെ ഔദ്യോഗിക എക്സ് ഹാൻഡിലിൽ വന്ന പോസ്റ്റിനെതിരെ ക്രിമിനൽ കോടതിയലക്ഷ്യ നടപടി വേണമെന്നും ഹർജിക്കാർ ആവശ്യപ്പെട്ടു. എന്നാൽ ഈ ഘട്ടത്തിൽ കോടതിയലക്ഷ്യത്തിന് നോട്ടീസ് അയക്കുന്നില്ലെന്ന് കോടതി വ്യക്തമാക്കി. മറ്റ് ആവശ്യങ്ങളിൽ എതിർകക്ഷികൾ നിലപാട് വ്യക്തമാക്കട്ടെയെന്നും അവരുടെ മറുപടി പരിശോധിച്ച ശേഷം തുടർനടപടികൾ ആലോചിക്കാമെന്നും ബെഞ്ച് അറിയിച്ചു.
by Midhun HP News | Oct 15, 2026 | Latest News, കേരളം
കോഴിക്കോട്: ഉപരാഷ്ട്രപതിയുടെ സന്ദർശനത്തോടനുബന്ധിച്ച് കോഴിക്കോട് നഗരത്തിൽ ഏർപ്പെടുത്തുന്ന സുരക്ഷാ ക്രമീകരണങ്ങളുടെയും ഗതാഗത നിയന്ത്രണങ്ങളുടെയും ഭാഗമായി നാളെ ഉച്ചയ്ക്കുശേഷം കോഴിക്കോട് കോർപ്പറേഷൻ പരിധിയിലെ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർ അവധി പ്രഖ്യാപിച്ചു.
കോർപ്പറേഷൻ പരിധിയിലുള്ള അങ്കണവാടികൾ, മദ്രസകൾ, സിബിഎസ്ഇ , ഐസിഎസ്ഇസ്കൂളുകൾ, പ്രൊഫഷണൽ കോളേജുകൾ ഉൾപ്പെടെയുള്ള എല്ലാത്തരം വിദ്യാഭ്യാസ സ്ഥാപനങ്ങൾക്കും ഉത്തരവ് പ്രകാരമുള്ള അവധി ബാധകമായിരിക്കും. എന്നാൽ, മുൻകൂട്ടി നിശ്ചയിച്ചിട്ടുള്ള പൊതുപരീക്ഷകൾക്കും വിവിധ യൂണിവേഴ്സിറ്റി പരീക്ഷകൾക്കും ഈ അവധി ബാധകമായിരിക്കില്ലെന്നും പരീക്ഷകൾ നിശ്ചയിച്ച സമയത്തുതന്നെ നടക്കുമെന്നും ജില്ലാ കളക്ടർ അറിയിച്ചു.
ഉപരാഷ്ട്രപതിയുടെ വാഹനവ്യൂഹം കടന്നുപോകുന്ന വഴികളിലും നഗരത്തിലെ പ്രധാന പാതകളിലും കർശനമായ ഗതാഗത നിയന്ത്രണം ഏർപ്പെടുത്തിയിട്ടുള്ളതിനാലാണ് വിദ്യാർഥികളുടെയും പൊതുജനങ്ങളുടെയും യാത്ര സുഗമമാക്കുന്നതിനായി ഉച്ചയ്ക്ക് ശേഷം വിദ്യാഭ്യാസ സ്ഥാപനങ്ങൾക്ക് അവധി നൽകിയത്.
by Midhun HP News | Oct 15, 2026 | Latest News, ജില്ലാ വാർത്ത
ആരോഗ്യത്തിന്റെയും ശുചിത്വത്തിന്റെയും പ്രാധാന്യം കുട്ടികളിലേക്ക് എത്തിക്കുന്നതിന്റെ ഭാഗമായി ലോക കൈകഴുകൽ ദിനം ഒക്ടോബർ 15-ന് കീഴാറ്റിങ്ങൽ പ്രാഥമിക ആരോഗ്യ കേന്ദ്രവും ഹെൽത്ത് ക്ലബ്ബും സംയുക്തമായി പെരുംകുളം എ.എം.എൽ.പി സ്കൂളിൽ വിപുലമായ ബോധവത്കരണ പരിപാടി സംഘടിപ്പിച്ചു.
’കൈകഴുകൽ മികച്ച ആരോഗ്യത്തിലേക്കുള്ള വഴി’ എന്ന സന്ദേശമുയർത്തി നടത്തിയ പരിപാടിയിൽ കുട്ടികൾക്ക് കൃത്യമായ രീതിയിൽ കൈകഴുകേണ്ട വിധവും സോപ്പ് ഉപയോഗിക്കേണ്ടതിന്റെ പ്രാധാന്യവും സ്റ്റാഫ് നേഴ്സ് സൗമ്യ ലളിതമായി ക്ലാസെടുത്തു നൽകി. രോഗാണുക്കളെ പ്രതിരോധിക്കുന്നതിൽ കൈകളുടെ ശുചിത്വം എത്രത്തോളം പ്രധാനമാണെന്ന് കുട്ടികൾക്ക് മനസ്സിലാകുന്ന രീതിയിലുള്ള ലളിതമായമാർഗങ്ങളും ബോധവത്കരണവും ഏറെ ശ്രദ്ധേയമായി.
സ്കൂൾ ഹെഡ്മാസ്റ്റർ പ്രവീൺ യോഗത്തിന് നേതൃത്വം നൽകി. അധ്യാപകരായ റീന, കൃഷ്ണരാജ്, ദിലീത്, സനീറ, രജനി എന്നിവർ പരിപാടികൾക്ക് പൂർണ്ണ പിന്തുണയുമായി ഒപ്പമുണ്ടായിരുന്നു. കുട്ടികളിൽ ചെറുപ്പം മുതലേ നല്ല ശീലങ്ങൾ വളർത്തിയെടുക്കാനുള്ള ഈ ആരോഗ്യകരമായ ചുവടുവെപ്പിനെ നാട്ടുകാരും രക്ഷിതാക്കളും അഭിനന്ദിച്ചു.
by Midhun HP News | Oct 15, 2026 | Latest News
തിരുവനന്തപുരം: ദക്ഷിണേന്ത്യയില്‍ തുലാവര്‍ഷമെത്തിയതായി കേന്ദ്ര കാലാവസ്ഥ വകുപ്പ്. ഇതിന്റെ സ്വാധീനഫലമായി കേരളത്തില്‍ വ്യാഴാഴ്ചയും വെള്ളിയാഴ്ചയും പരക്കെ മഴയാണ് കാലാവസ്ഥ വകുപ്പ് പ്രവചിക്കുന്നത്.
ഇന്ന് പത്തനംതിട്ട, കോട്ടയം, എറണാകുളം, ഇടുക്കി ജില്ലകളില്‍ ഒറ്റപ്പെട്ട സ്ഥലങ്ങളില്‍ തീവ്രമഴ മുന്നറിയിപ്പ് ആണ് നല്‍കിയിരിക്കുന്നത്. ജാഗ്രതയുടെ ഭാഗമായി ഈ ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. മറ്റു ജില്ലകളില്‍ ഒറ്റപ്പെട്ട ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി പത്തുജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. വെള്ളിയാഴ്ചയും എല്ലാ ജില്ലകളിലും മഴ മുന്നറിയിപ്പ് ഉണ്ട്. ശക്തമായ മഴ കണക്കിലെടുത്ത് എല്ലാ ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
ശനിയാഴ്ചയോടെ മഴ കുറയുമെന്നാണ് കാലാവസ്ഥ വകുപ്പിന്റെ കണക്കുകൂട്ടല്‍. ശനിയാഴ്ച പത്തനംതിട്ട, ഇടുക്കി, മലപ്പുറം, കോഴിക്കോട് ജില്ലകളില്‍ മാത്രമാണ് ശക്തമായ മഴ മുന്നറിയിപ്പ് ഉള്ളത്.
by Midhun HP News | Oct 15, 2026 | Latest News, ജില്ലാ വാർത്ത
ആറ്റിങ്ങൽ: തിനവിള രാമരച്ചംവിള ശ്രീദുർഗ്ഗാംബിക ക്ഷേത്രത്തിലെ നവരാത്രി മഹോത്സവത്തിന് തുടക്കമായി. നവരാത്രി ദിവസങ്ങളിൽ ക്ഷേത്രത്തിൽ വിശേഷാൽ പൂജകളും വിവിധ ആചാരാനുഷ്ഠാനങ്ങളും കലാപരിപാടികളും സംഘടിപ്പിച്ചിട്ടുണ്ട്.
എല്ലാ ദിവസവും വൈകുന്നേരം അഞ്ചിന് പത്മമിട്ട് ഭഗവതിസേവയോടനുബന്ധിച്ച് വിശേഷാൽ ദേവീപൂജ നടക്കും. തുടർന്ന് സന്ധ്യാദീപാരാധനയും നവരാത്രി പൂജയും ഉണ്ടായിരിക്കും.
വൈകുന്നേരം ഏഴുമുതൽ ശ്രീദുർഗ്ഗാംബിക ക്ഷേത്ര കലാമണ്ഡപത്തിൽ വിവിധ കലാപരിപാടികൾ അരങ്ങേറും. സംഗീതം, നൃത്തം തുടങ്ങി വിവിധ കലാരൂപങ്ങൾ അവതരിപ്പിക്കുന്ന പരിപാടികളിൽ കലാകാരന്മാരും കലാസംഘങ്ങളും പങ്കെടുക്കും.
ഒക്ടോബർ 18 ഞായറാഴ്ച വൈകുന്നേരം ആറിന് പൂജവയ്പ് നടക്കും. ഒക്ടോബർ 21 ബുധനാഴ്ച രാവിലെ 6.30 മുതൽ വിദ്യാരംഭച്ചടങ്ങുകൾ ആരംഭിക്കും. കുട്ടികൾക്ക് ആദ്യാക്ഷരം കുറിക്കുന്നതിനുള്ള സൗകര്യവും ക്ഷേത്രത്തിൽ ഒരുക്കിയിട്ടുണ്ട്.
Recent Comments