by Midhun HP News | Oct 15, 2026 | Latest News, കേരളം
കൊച്ചി: എറണാകുളത്ത് 30 കിലോ കഞ്ചാവ് പിടികൂടി. പശ്ചിമ ബംഗാള്‍ മൂര്‍ഷിദാബാദ് സ്വദേശി അബ്ദുള്‍ ഹായ് മൊല്ല പിടിയിലായി. ഇയാളില്‍ നിന്നും പിടിച്ചെടുത്ത കഞ്ചാവിന് വിപണിയില്‍ 50 ലക്ഷം രൂപ വില വരുമെന്ന് പൊലീസ് അധികൃതര്‍ പറഞ്ഞു.
ഒഡീഷയില്‍ നിന്നും വന്‍തോതില്‍ കഞ്ചാവ് കേരളത്തിലെത്തിച്ച്, മലയാളികള്‍ അടക്കമുള്ള സംസ്ഥാനത്തെ ചെറുകിട കഞ്ചാവ് വില്‍പ്പന റാക്കറ്റിന് നല്‍കിയിരുന്ന സംഘത്തിലെ മുഖ്യകണ്ണിയാണ് ഇയാളെന്ന് പൊലീസ് പറയുന്നു. കുറച്ചുകാലമായി ഇയാള്‍ പൊലീസിന്റെ നിരീക്ഷണത്തിലായിരുന്നു.
കഴിഞ്ഞരാത്രി ഒഡീഷയില്‍ നിന്നും വന്‍തോതില്‍ കഞ്ചാവുമായി എത്തിയപ്പോള്‍, റെയില്‍വേ സ്‌റ്റേഷന്‍ പരിസരത്തു നിന്നുമാണ് ഇയാളെ പൊലീസ് കസ്റ്റഡിയിലെടുത്തത്. നാര്‍ക്കോട്ടിക് എസിപി അനന്തലാലിന്റെ നേതൃത്വത്തിലുള്ള സംഘമാണ് ഓപ്പറേഷന്‍ തൂഫാന്റെ ഭാഗമായി ഇയാളെ പിടികൂടുന്നത്.
by Midhun HP News | Oct 15, 2026 | Latest News, കേരളം
തിരുവനന്തപുരം: സംസ്ഥാനത്ത് ഇന്നു വൈകീട്ടോടെ തുലാവര്‍ഷം എത്തുമെന്ന് കാലാവസ്ഥ വകുപ്പ്. ഞായറാഴ്ച വരെ ശക്തമായ മഴയ്ക്ക് സാധ്യതയുണ്ട്. ഇന്ന് നാലു ജില്ലകളില്‍ ഓറഞ്ച് അലര്‍ട്ട് പുറപ്പെടുവിച്ചിട്ടുണ്ട്. പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലാണ് തീവ്രമഴ മുന്നറിയിപ്പുള്ളത്.
സംസ്ഥാനത്തെ എട്ടു ജില്ലകളില്‍ ഇന്ന് യെല്ലോ അലര്‍ട്ടും പുറപ്പെടുവിച്ചിട്ടുണ്ട്. തിരുവനന്തപുരം, കൊല്ലം, ആലപ്പുഴ, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളിലാണ് അതിശക്ത മഴ മുന്നറിയിപ്പുള്ളത്. നാളെ പത്തനംതിട്ട, ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലും യെല്ലോ അലര്‍ട്ടുണ്ട്.
സംസ്ഥാനത്ത് ഒറ്റപ്പെട്ടയിടങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 40 km വരെ വേഗതയില്‍ ശക്തമായ കാറ്റിനും സാധ്യതയുള്ളതായും കേന്ദ്ര കാലാവസ്ഥ വകുപ്പ് അറിയിച്ചു. ഇടിമിന്നല്‍ അപകടകാരികളായതിനാല്‍ ജനങ്ങള്‍ ജാഗ്രത പാലിക്കുക.
മഴ ശക്തമാകുന്ന അവസരങ്ങളില്‍ അത്യാവശ്യമല്ലാത്ത യാത്രകള്‍ പൂര്‍ണമായും ഒഴിവാക്കുക. വെള്ളച്ചാട്ടങ്ങള്‍, ജലാശയങ്ങള്‍, മലയോര മേഖലകള്‍ എന്നിവിടങ്ങളിലേക്കുള്ള വിനോദയാത്രകള്‍ ഒഴിവാക്കേണ്ടതാണ്. ശക്തമായ മഴ പെയ്യുമ്പോള്‍ ഒരു കാരണവശാലും നദികള്‍ മുറിച്ചു കടക്കാനോ, നദികളിലോ ജലാശയങ്ങളിലോ കുളിക്കാനോ മീന്‍പിടിക്കാനോ ഇറങ്ങാന്‍ പാടുള്ളതല്ല.
by Midhun HP News | Oct 14, 2026 | Latest News, ദേശീയ വാർത്ത
മീററ്റ്: മര്‍ച്ചന്റ് നേവി ഉദ്യോഗസ്ഥനായ ഭര്‍ത്താവിനെ കാമുകന്റെ സഹായത്തോടെ കൊലപ്പെടുത്തിയ കേസില്‍ മുസ്‌കാന്‍ റസ്തഗിക്കും സാഹില്‍ ശുക്ലയ്ക്കും വധശിക്ഷ. മീററ്റ് കോടതിയാണ് ഇരുവര്‍ക്കും വധശിക്ഷ വിധിച്ചത്. ഇരുവരും കുറ്റക്കാരാണെന്ന് കോടതി നേരത്തെ കണ്ടെത്തിയിയിരുന്നു. കേസില്‍ മൃതദേഹം ഒളിപ്പിച്ച നീല ഡ്രമ്മാണ് നിര്‍ണായക തെളിവായത്.
2025 മാര്‍ച്ച് നാലിനായിരുന്നു രാജ്യത്തെ നടുക്കിയ കൊലപാതകം നടന്നത്. മുസ്‌കാനും സാഹിലും ചേര്‍ന്ന് സൗരഭിനെ കുത്തിക്കൊലപ്പെടുത്തിയ ശേഷം മൃതദേഹം കഷണങ്ങളാക്കി മുറിച്ചു. തെളിവ് നശിപ്പിക്കുന്നതിനായി ശരീരാവശിഷ്ടങ്ങള്‍ സിമന്റ് നിറച്ച നീല ഡ്രമ്മിലാക്കി ഒളിപ്പിക്കുകയായിരുന്നു.
126 വിചാരണകളുടെയും 22 സാക്ഷി മൊഴികളുടെയും അടിസ്ഥാനത്തിലാണ് ജില്ലാ ജഡ്ജി അരവിന്ദ് കുമാര്‍ മിശ്ര വിധി പ്രസ്താവിച്ചത്. ഇത്തരത്തിലുള്ള കുറ്റകൃത്യങ്ങള്‍ സമൂഹത്തില്‍ ഭയം വളര്‍ത്തുമെന്നും ജഡ്ജി അഭിപ്രായപ്പെട്ടു. രാവിലെ, മുസ്‌കാന്‍ റസ്തഗിയുടെ മാതാപിതാക്കള്‍ കോടതിയില്‍ എത്തിയിരുന്നു. സൗരഭ് രാജ്പുത് വളരെ നല്ല മനുഷ്യനായിരുന്നെന്നും കുറ്റവാളികളെ വധശിക്ഷയ്ക്ക് വിധിച്ചാല്‍ സ്വാഗതം ചെയ്യുമെന്നും പറഞ്ഞിരുന്നു.
കഴിഞ്ഞ വര്‍ഷം ഫെബ്രുവരി 28നാണ് ആറു വയസ്സുള്ള മകളുടെ ജന്മദിനാഘോഷത്തിനു സൗരഭ് രജ്പുത്ത് നാട്ടിലെത്തിയത്. ഇയാളെ കൃത്യമായ ആസൂത്രണത്തിലൂടെ ഭാര്യയും കാമുകനും ചേര്‍ന്നു കൊലപ്പെടുത്തുകയായിരുന്നു. ആദ്യം ഭക്ഷണത്തില്‍ ഉറക്കഗുളിക ചേര്‍ത്ത് നല്‍കി ഇയാളെ അബോധാവസ്ഥയിലാക്കി. പിന്നീട് കത്തികൊണ്ട് കുത്തി കൊലപ്പെടുത്തി 15 കഷ്ണങ്ങളാക്കിയ ശേഷം വീപ്പയിലിട്ട് കോണ്‍ക്രീറ്റ് നിറച്ചു.
സൗരഭിനെ കാണാതായതോടെ ആളുകള്‍ അന്വേഷിച്ചു തുടങ്ങിയപ്പോള്‍ സൗരഭ് മണാലിയില്‍ പോയിരിക്കുകയാണെന്നാണ് ഇവരോട് മുസ്‌കാന്‍ പറഞ്ഞത്. ആര്‍ക്കും സംശയം തോന്നാതിരിക്കാന്‍ സാഹിലിനൊപ്പം മണാലിയില്‍ പോയി ചിത്രങ്ങളെടുത്ത് സൗരഭിന്റെ സമൂഹമാധ്യമ പേജുകളില്‍ പോസ്റ്റ് ചെയ്തു. എന്നാല്‍ സൗരഭിനെ ഫോണിലൂടെ ബന്ധപ്പെടാന്‍ കഴിയാതെ വന്നതോടെ കുടുംബം പൊലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ പൊലീസ് മുസ്‌കാനെയും സാഹിലിനെയും കസ്റ്റഡിയിലെടുത്തു നടത്തിയ ചോദ്യം ചെയ്യലിലാണ് കൊലപാതക വിവരം പുറത്തുവരുന്നത്. മൃതദേഹത്തെ കുറിച്ചു പ്രതികള്‍ നല്‍കിയ വിവരത്തിന്റെ അടിസ്ഥാനത്തില്‍ പൊലീസ് നടത്തിയ തിരച്ചിലില്‍ വീപ്പ കണ്ടെത്തുകയും ശരീരഭാഗങ്ങള്‍ കണ്ടെടുക്കുകയും ചെയ്തു.
2016ല്‍ ആണ് സൗരഭും മുസ്‌കാനും വിവാഹിതരാകുന്നത്. പ്രണയ വിവാഹമായിരുന്നു. മുസ്‌കാനോടൊപ്പം സമയം ചെലവിടുന്നതിനു വേണ്ടി സൗരഭ് മര്‍ച്ചന്റ് നേവിയിലെ ജോലി ഉപേക്ഷിച്ചു. ഇത് സൗരഭിന്റെ വീട്ടില്‍ പ്രശ്‌നമാകുകയും ഇരുവരും വാടകവീട്ടിലേക്ക് മാറുകയുമായിരുന്നു.
by Midhun HP News | Oct 14, 2026 | Latest News, കേരളം
നിങ്ങളുടെ ഫോണിലേക്ക് അപരിചിതമായ ഒരു അന്താരാഷ്ട്ര നമ്പറിൽ നിന്നും ഒരു മിസ് കാൾ വരുന്നു. ഒറ്റ തവണ മാത്രം റിംഗ് ചെയ്ത് കട്ടാകുന്നു. ഈ മിസ് കാൾ ഒരു സൈബർ തട്ടിപ്പ് ആകാം. എന്താണ് മിസ് കാൾ മിസ്ഡ് കോൾ സ്കാം അഥവാ വൺ-റിംഗ് സ്കാം എന്ന് പരിശോധിക്കാം.
തട്ടിപ്പുകാർ കംപ്യുട്ടർ പ്രോഗ്രാമുകൾ ഉപയോഗിച്ച് ആയിരക്കണക്കിന് ആളുകൾക്ക് ഒരേ സമയം മിസ്ഡ് കോളുകൾ വിളിക്കുന്നു. നിങ്ങൾ ഫോൺ എടുക്കുന്നതിന് മുൻപ് തന്നെ അവർ കോൾ കട്ടാകും. ആരാണ് വിളിച്ചതെന്ന് അറിയാൻ നിങ്ങൾ ആ നമ്പറിലേക്ക് തിരിച്ചു വിളിക്കുമ്പോൾ ആണ് തട്ടിപ്പുകാർ നമ്മളെ ചതിക്കുഴിയിൽ വീഴ്ത്തുന്നത്. ഈ നമ്പറുകൾ സാധാരണ നമ്പറുകളല്ല, മറിച്ച് ‘പ്രീമിയം റേറ്റ് നമ്പറുകൾ’ ആയിരിക്കും.
നിങ്ങൾ തിരിച്ചു വിളിക്കുന്ന ഓരോ സെക്കൻഡിനും വലിയൊരു തുക (മിനിറ്റിന് നൂറു കണക്കിന് രൂപ വരെ) നിങ്ങളുടെ മൊബൈൽ ബാലൻസിൽ നിന്ന് നഷ്ടപ്പെടുകയോ അടുത്ത മാസത്തെ ബില്ലിൽ കൂട്ടിച്ചേർക്കപ്പെടുകയോ ചെയ്യും.
നിങ്ങൾ തിരിച്ചു വിളിക്കുമ്പോൾ അവർ കോൾ പെട്ടെന്ന് കട്ട് ചെയ്യില്ല. നിങ്ങളെ ലൈനിൽ നിർത്തി സമയം കളയാനായി ഹോൾഡ് മ്യൂസിക് കേൾപ്പിക്കുകയോ, ലോട്ടറി അടിച്ചിട്ടുണ്ടെന്ന് പറഞ്ഞ് സംസാരിപ്പിക്കുകയോ ചെയ്യും.സമയം കൂടുംതോറും നിങ്ങളുടെ പണം കൂടുതൽ നഷ്ടപ്പെടും. എങ്ങനെ തിരിച്ചറിയാം? പ്ലസ് ചിഹ്നത്തിന് (+) ശേഷം +247 (അസൻഷൻ ഐലൻഡ്), +221 (സെനഗൽ), +252 (സൊമാലിയ), +373 (മൊൽഡോവ) തുടങ്ങിയ അപരിചിതമായ രാജ്യങ്ങളുടെ കോഡുകളുള്ള നമ്പറുകളിൽ നിന്നായിരിക്കും ഇത്തരം കോളുകൾ വരുന്നത്.
by Midhun HP News | Oct 14, 2026 | Latest News, കേരളം
കോഴിക്കോട്: പൈതൃക നെൽവിത്തുകളുടെ കാവലാളായ ചെറുവയല്‍ രാമന്‍ അന്തരിച്ചു. 75 വയസ്സായിരുന്നു. കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെയാണ് അന്ത്യം.കാര്‍ഷിക മേഖലയിലെ സംഭാവന കണക്കിലെടുത്ത് 2023ല്‍ രാജ്യം പത്മശ്രീ നല്‍കി ആദരിച്ചിരുന്നു.
1952 ജൂൺ 6 ന് ജനനം. രണ്ടാമത്തെ വയസ്സുമുതൽ പിതാവിനെ പിരിഞ്ഞ് അമ്മാവനോടൊത്ത് വളർന്നു. ദാരിദ്ര്യം നിറഞ്ഞ കുട്ടിക്കാലം. കമ്മന നവോദയ എൽ. പി. സ്കൂളിൽ അഞ്ചാം ക്ലാസ്സ് വരെ മാത്രം പഠനം. പത്താം വയസ്സുമുതൽ കാർഷിക ജീവിതം.1969 ൽ എംപ്ലോയ്‌മെന്റ് എക്‌ചേഞ്ച് മുഖേന കണ്ണൂർ ഡി.എം.ഒ. ഓഫീസിൽ വാർഡനായി 150 രൂപ ശമ്പളത്തിൽ ജോലി കിട്ടിയെങ്കിലും കൃഷിഭൂമി ഉപേക്ഷിച്ചുപോകാൻ ഇഷ്ടമില്ലാത്തതിനാൽ സർക്കാർ ജോലി വേണ്ടെന്നുവച്ചു. വയനാടിന്റെ നെല്ലച്ഛൻ എന്ന പേരിൽ പ്രശസ്തനായ അദ്ദേഹം, നൂറുവർഷങ്ങൾക്ക് മുൻപ് വയനാട്ടിലുണ്ടായിരുന്ന നൂറിലേറെ നാടൻ നെൽവിത്തിനങ്ങളിൽ മുപ്പതെണ്ണം കൃഷിചെയ്ത് നിലനിർത്തിയിരുന്നു.
കൃഷിക്കുപുറമെ നല്ലൊരു പരിസ്ഥിതി പ്രവർത്തകൻ കൂടിയാണ് രാമൻ. 2011ൽ ഹൈദരാബാദിൽ വച്ചു നടന്ന ജൈവവൈവിധ്യ സംരക്ഷണത്തിനായുള്ള പതിനൊന്ന് രാജ്യങ്ങളുടെ സമ്മേളനത്തിൽ കേരളത്തിലെ കർഷകരെ പ്രതിനിധീകരിച്ചു. 2011ൽ ഹൈദരാബാദിൽവച്ചുനടന്ന ജൈവവൈവിധ്യ സംരക്ഷണത്തിനായുള്ള പതിനൊന്ന് രാജ്യങ്ങളുടെ സമ്മേളനത്തിൽ കേരളത്തിലെ കർഷകരെ പ്രതിനിധീകരിച്ചു. 2016 ലെ ജനിതക സംരക്ഷണ പുരസ്‌കാരം ഉൾപ്പടെ നിരവധി പുരസ്കാരങ്ങളും അദ്ദേഹത്തെ തേടിയെത്തി. 2026-ൽ കാർഷികമേഖലയിലെ സമഗ്ര സംഭാവനയ്ക്ക് മുൻ മുഖ്യമന്ത്രി ഉമ്മൻ ചാണ്ടിയുടെ പേരിൽ സംസ്ഥാന കൃഷി വകുപ്പ് ഏർപ്പെടുത്തിയ പുരസ്‌കാരം ചെറുവയൽ രാമനാണ് ലഭിച്ചത്.
by Midhun HP News | Oct 14, 2026 | Latest News, ജില്ലാ വാർത്ത
കിളിമാനൂർ ശ്രീ പുല്ലയിൽ വീട് ഭഗവതി ക്ഷേത്രത്തിലെ നവരാത്രി പൂജകൾ 2026 ഒക്ടോബർ 18 മുതൽ ഒക്ടോബർ 21 വരെയാണ് നടക്കുക.
18 ന് വൈകുന്നേരം 6 മണി മുതൽ ഗ്രന്ഥ പൂജ
20 ന് വൈകുന്നേരം 6 മണിമുതൽ ആയുധ പൂജ
18,19,20 തീയതികളിൽ 2 നേരം പൂജ
21 ന് രാവിലെ മാത്രം പൂജ
21 ന് രാവിലെ 6.30 മുതൽ വിദ്യാരംഭം
Recent Comments