by Midhun HP News | Oct 14, 2026 | Latest News, ദേശീയ വാർത്ത
ഡല്‍ഹി: സൗദി അറേബ്യയില്‍ ആക്രമണങ്ങള്‍ ശക്തമായ സാഹചര്യത്തില്‍ സൗദിയിലെ പ്രധാന നഗരങ്ങളിലേക്കും തിരിച്ചുമുള്ള വിമാന സര്‍വീസുകള്‍ ഒക്ടോബര്‍ 17 വരെ റദ്ദാക്കി ഇന്ത്യന്‍ വിമാന കമ്പനികള്‍. ആക്രമണങ്ങളില്‍ ജാഗ്രത പാലിക്കാനും പ്രാദേശിക അധികൃതരുടെ നിര്‍ദ്ദേശങ്ങള്‍ അനുസരിക്കാനും റിയാദിലെ ഇന്ത്യന്‍ എംബസി അഭ്യര്‍ത്ഥിച്ചു.
എയര്‍ ഇന്ത്യ, ഇന്‍ഡിഗോ, എയര്‍ ഇന്ത്യ എക്‌സ്പ്രസ്, ആകാശ എയര്‍ എന്നിവ റിയാദ്, ജിദ്ദ, ദമ്മാം എന്നിവിടങ്ങളിലേക്കുള്ള സര്‍വീസുകള്‍ റദ്ദാക്കിയതായി അറിയിച്ചു. ഇന്‍ഡിഗോ മദീനയിലേക്കുള്ള സര്‍വീസുകളും നിര്‍ത്തിവച്ചിട്ടുണ്ട്. സാഹചര്യങ്ങള്‍ നിരീക്ഷിച്ചുവരികയാണെന്നും, അതത് എയര്‍ലൈനുകളുടെ നയമനുസരിച്ച് ടിക്കറ്റ് തുക തിരികെ നല്‍കുന്നതിനോ യാത്ര പുനഃക്രമീകരിക്കുന്നതിനോ സൗകര്യമൊരുക്കുമെന്നും കമ്പനികള്‍ വ്യക്തമാക്കി.
‘സൗദി അറേബ്യയിലെ നിലവിലെ സാഹചര്യങ്ങള്‍ കണക്കിലെടുത്ത്, റിയാദ്, ദമ്മാം, ജിദ്ദ എന്നിവിടങ്ങളിലേക്കും തിരിച്ചുമുള്ള എല്ലാ എയര്‍ ഇന്ത്യ വിമാനങ്ങളും ഒക്ടോബര്‍ 17 വരെ റദ്ദാക്കിയതായി’ എയര്‍ ഇന്ത്യ അറിയിച്ചു. സാഹചര്യങ്ങള്‍ വിലയിരുത്തിയ ശേഷമേ സര്‍വീസുകള്‍ പുനരാരംഭിക്കുന്നതില്‍ തീരുമാനം എടുക്കാന്‍ കഴിയുവെന്നും അധികൃതര്‍ വ്യക്തമാക്കി.
സൗദി അറേബ്യയിലേക്കും തിരിച്ചും യാത്ര നിശ്ചയിച്ചിരുന്ന യാത്രക്കാര്‍ എയര്‍പോര്‍ട്ടുകളിലേക്ക് പുറപ്പെടുന്നതിന് മുന്‍പായി എയര്‍ലൈനിന്റെ ഔദ്യോഗിക വെബ്സൈറ്റ് സന്ദര്‍ശിച്ച് തങ്ങളുടെ വിമാനങ്ങളുടെ തത്സമയ സ്റ്റാറ്റസ് പരിശോധിക്കേണ്ടതാണ്. വിമാന കമ്പനിയില്‍ നിന്നുള്ള അടിയന്തിര അറിയിപ്പുകളും സമയ മാറ്റങ്ങളും തടസ്സമില്ലാതെ നേരിട്ട് ലഭിക്കുന്നതിനായി തങ്ങളുടെ ഇമെയില്‍ വിലാസവും ഫോണ്‍ നമ്പറും അടക്കമുള്ള കോണ്‍ടാക്റ്റ് വിവരങ്ങള്‍ കൃത്യമായി അപ്‌ഡേറ്റ് ചെയ്തിട്ടുണ്ടെന്ന് യാത്രികര്‍ ഉറപ്പുവരുത്തണമെന്നും അധികൃതര്‍ നിര്‍ദേശിച്ചു.
by Midhun HP News | Oct 14, 2026 | Latest News, ജില്ലാ വാർത്ത
തിരുവനന്തപുരം: ആക്കുളത്ത് ഫ്ളാറ്റിനു മുന്നിലെ റോഡ് ഇടിഞ്ഞുതാണതിനെത്തുടർന്ന് കെട്ടിടത്തിന്റെ സുരക്ഷയിൽ ആശങ്ക. ഈ ഫ്ളാറ്റിൽ താമസിക്കുന്ന അറുപതോളം കുടുംബങ്ങളെ മാറ്റിപ്പാർപ്പിക്കാൻ കളക്ടറുടെ അധ്യക്ഷതയിൽ ചേർന്ന യോഗം തീരുമാനിച്ചു.
ആക്കുളം അലത്തറയിൽ പി.ആർ.എസ്. ഫ്ളാറ്റിന്റെ മുന്നിലെ റോഡ് ചൊവ്വാഴ്ച പുലർച്ചെ മൂന്നുമണിയോടെ വൻശബ്ദത്തോടെ ഇടിഞ്ഞുതാഴുകയായിരുന്നു. പത്ത് മീറ്റർ വീതിയുണ്ടായിരുന്ന റോഡ് ഇടിഞ്ഞ് രണ്ട് മീറ്ററായി കുറഞ്ഞു. ഫ്ളാറ്റിന്റെ സമീപത്തായി സ്കൂൾ കെട്ടിടത്തിനായി നിർമാണം നടക്കുന്നതിനിടെയാണ് അപകടം. സ്കൂളിൽ പുതിയ കെട്ടിടം നിർമിക്കുന്നതിനായി 30 മീറ്ററിലധികം താഴ്ചയിൽ മണ്ണെടുത്തിട്ടുണ്ട്.
ഇതാണ് സമീപ ഭാഗങ്ങളിൽ മണ്ണിടിച്ചിലിനു കാരണമായതെന്ന് ഫ്ലാറ്റിലെ താമസക്കാർ ആരോപിക്കുന്നു. കഴിഞ്ഞ മാർച്ചിലാണ് സ്കൂൾ ഓഫ് ദി ഗുഡ് ഷെപ്പേർഡ്സിൽ പുതിയ കെട്ടിടത്തിന്റെ നിർമാണം ആരംഭിച്ചത്. ഇതിനുശേഷം പല തവണ മണ്ണിടിച്ചിലുണ്ടായി. കുന്നിൻപ്രദേശത്താണ് നിർമാണം നടക്കുന്നത്.
മണ്ണിടിച്ചിൽ ഉണ്ടായപ്പോഴൊക്കെ അപ്പാർട്മെന്റ് ഓണേഴ്‌സ് അസോസിയേഷൻ സ്കൂൾ അധികൃതരെ ആശങ്ക അറിയിച്ചിരുന്നു. മണ്ണിടിച്ചിൽ ആവർത്തിച്ചതോടെ അസോസിയേഷനും സ്കൂൾ അധികൃതരും തമ്മിൽ ധാരണാപത്രം ഉണ്ടാക്കുകയും ഒക്ടോബർ 15-നകം സംരക്ഷണഭിത്തി നിർമിക്കാമെന്ന്‌ അറിയിക്കുകയും ചെയ്തു. ഇതിനിടെയാണ് കഴിഞ്ഞ ദിവസം വീണ്ടും മണ്ണിടിച്ചിലുണ്ടായത്.
സുരക്ഷാജീവനക്കാർ അറിയിച്ചപ്പോഴാണ് മണ്ണിടിച്ചിലുണ്ടായ വിവരം ഫ്ലാറ്റിലെ താമസക്കാർ അറിയുന്നത്. ഇതോടെ പരിഭ്രാന്തിയിലായ താമസക്കാരിൽ ചിലർ ഹോട്ടലുകളിലേക്കും ബന്ധുവീടുകളിലേക്കും മാറി. പത്ത് മീറ്ററോളം വീതിയുണ്ടായിരുന്ന റോഡ് ഇടിഞ്ഞ് രണ്ട് മീറ്ററായി കുറഞ്ഞു.
by Midhun HP News | Oct 14, 2026 | Latest News, ദേശീയ വാർത്ത
ദുബൈ: ഫ്രാന്‍സിലെ ഇന്റര്‍മാര്‍ഷെ സൂപ്പര്‍മാര്‍ക്കറ്റുകളില്‍ സൈബര്‍ ആക്രമണത്തില്‍ യുഎഇയിലും ആശങ്ക. ഫ്രാന്‍സില്‍ റഫ്രിജറേഷന്‍ താപനില 50 ഡിഗ്രി സെല്‍ഷ്യസായി ഉയര്‍ത്തി ടണ്‍ കണക്കിന് ഭക്ഷണ സാധനങ്ങളാണ് ഹാക്കര്‍മാര്‍ നശിപ്പിച്ചത്. വാരാന്ത്യത്തില്‍ സൂപ്പര്‍മാര്‍ക്കറ്റുകള്‍ അടഞ്ഞുകിടക്കുന്ന സമയത്താണ് ഹാക്കര്‍മാര്‍ സിസ്റ്റം നിയന്ത്രണത്തിലാക്കി ഈ കൃത്രിമം കാണിച്ചത്.
റഫ്രിജറേഷന്‍ കണ്‍ട്രോളറുകള്‍ നല്‍കിയ കമ്പനി കാലഹരണപ്പെട്ട ഫേംവെയര്‍ ഉപയോഗിച്ചതായി സ്ഥിരീകരിക്കുന്നു. ചില ഡിവൈസുകള്‍ അപ്ഡേറ്റുകള്‍ സ്വീകരിക്കാന്‍ കഴിയാത്തത്ര പഴയതാണെന്നും കണ്ടെത്തിയിട്ടുണ്ട്. മാനേജ്മെന്റ് ഇന്റര്‍ഫേസുകള്‍ നേരിട്ട് ഇന്റര്‍നെറ്റിനെ അഭിമുഖീകരിക്കരുതെന്ന് ഫ്രാന്‍സിന്റെ സൈബര്‍ ഏജന്‍സി മുന്നറിയിപ്പ് നല്‍കിയിരുന്നു.
ഫ്രാന്‍സിലെ സൈബര്‍ ആക്രമണം യുഎഇക്കും മുന്നറിയിപ്പാണ്. സൂപ്പര്‍മാര്‍ക്കറ്റുകളിലെ ഡിവൈസുകള്‍ സൈബര്‍ സുരക്ഷാ ഉറപ്പാക്കണമെന്നാണ് വിദഗ്ധര്‍ പറയുന്നത്. ഫ്രാന്‍സിലേതിന് സമാനമായ ഉപകരണങ്ങളാണ് യുഎഇയിലെ ഹൈപ്പര്‍മാര്‍ക്കറ്റുകള്‍, കോള്‍ഡ് സ്റ്റോറുകള്‍, ആശുപത്രികള്‍ എന്നിവടങ്ങളിലും ഉപയോഗിക്കുന്നത് എന്നതിനാല്‍ ഇവിടുത്തെ സുരക്ഷാ സംവിധാനങ്ങള്‍ എത്രത്തോളം സുരക്ഷിതമാണെന്ന ചോദ്യം ഉയരുകയാണ്. സാങ്കേതികവിദ്യയും ഇന്റര്‍നെറ്റ് സുരക്ഷാ ആവശ്യകതകളും കോള്‍ഡ് ചെയിനുകളിലേക്കും സൂപ്പര്‍മാര്‍ക്കറ്റുകളിലേക്കും വ്യാപിപ്പിക്കണമെന്ന് വിദഗ്ധരെ ഉദ്ധരിച്ച് ഗള്‍ഫ് ന്യൂസ് റിപ്പോര്‍ട്ട് ചെയ്തു.
by Midhun HP News | Oct 14, 2026 | Latest News, ദേശീയ വാർത്ത
സുൽത്താൻ ബത്തേരി: സൗദി അറേബ്യയിലേക്കുള്ള യാത്രയ്ക്കിടെ ജിദ്ദ വിമാനത്താവളത്തിൽ കാണാതായ മലയാളി നഴ്സ് ഫിലോമിനയെക്കുറിച്ച് (32) യാതൊരു വിവരവുമില്ലാതെ ആശങ്കയോടെ കാത്തിരിക്കുകയാണ് വയനാട്ടിലെ കുടുംബം. ഒന്നരമാസത്തെ അവധി കഴിഞ്ഞ് ജോലിയിൽ തിരികെ പ്രവേശിക്കാനായി റിയാദിലേക്ക് മടങ്ങിയ ഫിലോമിനയെക്കുറിച്ച് അവസാനമായി ലഭിച്ചത് ജിദ്ദ വിമാനത്താവളത്തിൽ തന്നെ തടഞ്ഞുവെച്ചിരിക്കുകയാണെന്ന സന്ദേശം മാത്രമാണ്. ഇതിനുശേഷം യുവതി എവിടെയാണെന്നോ എന്തുസംഭവിച്ചെന്നോ ഉള്ള വിവരങ്ങൾ ലഭ്യമല്ല.
സുൽത്താൻ ബത്തേരി അയ്യങ്കൊല്ലി അനന്ത് നിവാസിൽ രവിയുടെയും സെൽവിയുടെയും മകളായ ഫിലോമിന റിയാദിലെ കിങ് ഫഹദ് ആശുപത്രിയിൽ കഴിഞ്ഞ മൂന്നുവർഷമായി നഴ്സായി ജോലി ചെയ്തുവരികയായിരുന്നു. ഒക്ടോബർ 10-ന് ശനിയാഴ്ച ബെംഗളൂരുവിൽനിന്ന് ഭർത്താവ് ജോണിനോടും കുടുംബത്തോടും യാത്രപറഞ്ഞ് വിമാനം കയറിയ ഫിലോമിന, ജിദ്ദയിലെത്തിയ ശേഷം കുടുംബത്തെ ഫോണിൽ ബന്ധപ്പെട്ടിരുന്നു. തുടർന്ന് ജിദ്ദയിൽനിന്ന് റിയാദിലേക്കുള്ള കണക്ഷൻ വിമാനത്തിൽ യാത്ര തുടരാനിരിക്കെയാണ് യുവതിയെ കാണാതാകുന്നത്.
വിമാനത്താവളത്തിൽ ഇറങ്ങിയ തന്നെ ജീവനക്കാർ തടഞ്ഞുവെച്ചിരിക്കുകയാണെന്നും ബാഗും മറ്റ് സാധനങ്ങളും പരിശോധിച്ച ശേഷം സെക്യൂരിറ്റി ഉദ്യോഗസ്ഥർ പാസ്‌പോർട്ട് വാങ്ങിവെച്ചെന്നുമായിരുന്നു കുടുംബത്തിന് ലഭിച്ച അവസാന സന്ദേശം. തന്റെ ബാഗുകളും സാധനങ്ങളും കൊണ്ടുപോകാൻ മറ്റാരോടെങ്കിലും ഏർപ്പാടാക്കാൻ വിമാനത്താവളത്തിലെ ജീവനക്കാർ ആവശ്യപ്പെട്ടതായും ഫിലോമിന വാട്‌സാപ്പിലൂടെ കുടുംബത്തെ അറിയിച്ചിരുന്നു. ഇതിന് പിന്നാലെ ഫിലോമിനയുടെ മൊബൈൽ ഫോൺ പൂർണ്ണമായും സ്വിച്ച് ഓഫായി.
തുടർന്ന് റിയാദിലെ ആശുപത്രിയിലും താമസസ്ഥലത്തും അന്വേഷിച്ചെങ്കിലും ഫിലോമിന അവിടെ എത്തിയിട്ടില്ലെന്ന മറുപടിയാണ് സഹപ്രവർത്തകർ നൽകിയത്. ജിദ്ദയിൽ വിമാനമിറങ്ങിയ ശേഷം പലതവണ ഫോണിൽ ബന്ധപ്പെടാൻ കുടുംബം ശ്രമിച്ചെങ്കിലും യാതൊരു വിവരവും ലഭിച്ചില്ല. ഫിലോമിനയെക്കുറിച്ചുള്ള വിവരങ്ങളൊന്നും ലഭിക്കാത്തതിൽ കടുത്ത ദുഃഖത്തിലും ആശങ്കയിലുമാണ് ഭർത്താവ് ജോണും നാല് വയസ്സ് മാത്രമുള്ള ഇവരുടെ മകനും. കഴിഞ്ഞ ശനിയാഴ്ചയാണ് ഭാര്യ നാട്ടിൽനിന്ന് പോയതെന്നും അവൾക്ക് എന്താണ് സംഭവിച്ചതെന്ന് തങ്ങൾക്ക് അറിയില്ലെന്നും ജോൺ പറഞ്ഞു. അമ്മയെ കാണാതെ കുഞ്ഞ് നിർത്താതെ കരയുകയാണെന്നും അവനോട് എന്ത് പറയണമെന്ന് അറിയില്ലെന്നും ജോൺ വിതുമ്പലോടെ വ്യക്തമാക്കി.
ഫിലോമിനയെ എത്രയും വേഗം കണ്ടെത്താൻ സഹായം തേടി സൗദി എംബസിയുമായും നോർക്കയുമായും ഇ-മെയിൽ മുഖേന ബന്ധപ്പെട്ടിട്ടുണ്ടെങ്കിലും ഇതുവരെ മറുപടിയൊന്നും ലഭിച്ചിട്ടില്ല. ഈ സാഹചര്യത്തിൽ വിഷയത്തിൽ കേന്ദ്ര–സംസ്ഥാന സർക്കാരുകൾ അടിയന്തരമായി ഇടപെട്ട് ഫിലോമിനയെ കണ്ടെത്താൻ നടപടി സ്വീകരിക്കണമെന്നാണ് കുടുംബത്തിന്റെ ആവശ്യം.
by Midhun HP News | Oct 14, 2026 | Latest News, കേരളം
തിരുവനന്തപുരം: സിഎംആര്‍എല്‍- എക്‌സാലോജിക് കേസില്‍ അന്വേഷണത്തിന് രണ്ട് പ്രത്യേക അന്വേഷണ സംഘങ്ങളെ നിയോഗിച്ച് വിജിലന്‍സ് ഡയറക്ടര്‍. രണ്ട് എസ്പിമാരാകും അന്വേഷണം നടത്തുക. ഡിഐജി തോംസണ്‍ ജോസിനാകും അന്വേഷണ മേല്‍നോട്ട ചുമതല. ഇതുസംബന്ധിച്ച് ഉത്തരവ് പുറത്തിറങ്ങി.
പ്രതിപക്ഷ നേതാവ് പിണറായി വിജയന്‍ ഉള്‍പ്പെട്ട ആദ്യ കേസ് എസ്പി ഇഎല്‍ സുരേഷിന്റെ നേതൃത്വത്തിലുള്ള സംഘമാകും അന്വേഷിക്കുക. മുന്‍മന്ത്രിയുമായ പി എ മുഹമ്മദ് റിയാസ് ഉള്‍പ്പെട്ട കള്ളപ്പണ- ഹവാല ഇടപാടു കേസ് എസ്പി ബാലകൃഷ്ണന്‍ അന്വേഷിക്കും. അഴിമതി തടയല്‍ നിയമപ്രകാരം എടുത്ത രണ്ടു കേസിലും പിണറായി വിജയന്റെ മകള്‍ വീണ രണ്ടാം പ്രതിയാണ്.
കോഴിക്കോടും തിരുവനന്തപുരവും കേന്ദ്രീകരിച്ച് എസ്‌ഐടികള്‍ അന്വേഷണം നടത്തും. സിഎംആര്‍എല്‍ അഴിമതി കേസില്‍ ഹൈക്കോടതി ഉത്തരവിന്റെ അടിസ്ഥാനത്തില്‍ രണ്ട് എഫ്‌ഐആറുകള്‍ വിജിലന്‍സ് രജിസ്റ്റര്‍ ചെയ്തിരുന്നു. അഡി കത്തില്‍ കേസെടുക്കാന്‍ ഉത്തരവിട്ട സിംഗിള്‍ ബെഞ്ച് ഉത്തരവിനെതിരെ പിണറായി വിജയന്‍ നല്‍കിയ ഹര്‍ജിയില്‍ ഡിവിഷന്‍ ബെഞ്ച് അന്വേഷണത്തിന് സ്റ്റേ നല്‍കിയിട്ടില്ല.
by Midhun HP News | Oct 14, 2026 | Latest News, കേരളം
ആറ്റിങ്ങൽ അവനവഞ്ചേരി തച്ചൂർക്കുന്ന് കട്ടാരവിള വീട്ടിൽ കൗസല്യ (88) അന്തരിച്ചു.
ഭർത്താവ്|: സുരേന്ദ്രൻ (പരേതൻ)
മക്കൾ: അനിൽകുമാർ എസ് (റിട്ടയേർഡ് കെ എസ് ആർ ടി സി), സുനിൽകുമാർ എസ്, സുലതകുമാരി എസ്, സന്തോഷ് കുമാർ എസ്
മരുമക്കൾ: ഷീജ എസ്, മഞ്ജു പി, സുകു കെ, രാജലത
മരണാനന്തര ചടങ്ങുകൾ: ഒക്ടോബർ 27 (ചൊവ്വ) പകൽ 11മണിക്ക്
Recent Comments