‘അവയവമാറ്റ ഇൻസ്റ്റിറ്റ്യൂട്ട് എൽഡിഎഫ് ഉദ്ഘാടനം ചെയ്തത്; സതീശന്റേത് വെറും തമാശ’: വീണാ ജോർജ്

by Midhun HP News | Oct 6, 2026 | Latest News, കേരളം

പത്തനംതിട്ട: മുഖ്യമന്ത്രി വി ഡി സതീശൻ അടുത്തിടെ പ്രഖ്യാപിച്ച കേരള ഇൻസ്റ്റിറ്റ്യൂട്ട് ഓഫ് ഓർഗൻ ആൻഡ് ടിഷ്യൂ ട്രാൻസ്പ്ലാന്റ് കഴിഞ്ഞ എൽഡിഎഫ് സർക്കാരിന്റെ കാലത്തുതന്നെ ഉദ്ഘാടനം ചെയ്യപ്പെട്ട പദ്ധതിയാണെന്ന് മുൻ ആരോഗ്യമന്ത്രി വീണാ ജോർജ്. കോഴിക്കോട് 30 മാസത്തിനകം അവയവമാറ്റ ഇൻസ്റ്റിറ്റ്യൂട്ട് സ്ഥാപിക്കുമെന്ന മുഖ്യമന്ത്രിയുടെ പ്രഖ്യാപനം വാർത്തകളിൽ കണ്ടപ്പോൾ വലിയ തമാശയായാണ് തനിക്ക് തോന്നിയതെന്ന് ഒരു അഭിമുഖത്തിൽ അവർ പ്രതികരിച്ചു.

ഇത് കഴിഞ്ഞ സർക്കാരിന്റെ സ്വപ്ന പദ്ധതികളിൽ ഒന്നായിരുന്നുവെന്ന് വീണാ ജോർജ് ചൂണ്ടിക്കാട്ടി. അന്നത്തെ മുഖ്യമന്ത്രി പിണറായി വിജയൻ 2026 ഫെബ്രുവരി 7-നാണ് പദ്ധതിയുടെ നിർമ്മാണോദ്ഘാടനം നിർവ്വഹിച്ചത്. 2022-23 കാലഘട്ടത്തിൽ തന്നെ ഈ പദ്ധതിയുടെ ആവശ്യകത സർക്കാർ ചർച്ച ചെയ്യുകയും കോഴിക്കോട് ചേവായൂരിൽ ഇതിനായി സ്ഥലം കണ്ടെത്തുകയും ചെയ്തിരുന്നു. കിഫ്ബി (KIIFB) വഴി നടപ്പിലാക്കാൻ ലക്ഷ്യമിട്ട് ഏകദേശം 643 കോടി രൂപയുടെ ഭരണാനുമതിയും അന്ന് നൽകിയിരുന്നതാണെന്ന് മുൻ മന്ത്രി വ്യക്തമാക്കി. ടാറ്റാ ഗ്രൂപ്പുമായി ബന്ധപ്പെടുത്തി കപ്പൽ നിർമ്മാണ പദ്ധതി മുൻപ് ഇത്തരത്തിൽ മുഖ്യമന്ത്രി പ്രഖ്യാപിച്ചതുപോലെയാണിതെന്നും അവർ പരിഹസിച്ചു.

ചേവായൂർ ഗോൾഫ് ലിങ്ക് റോഡിലെ 20 ഏക്കറിൽ 271 കോടി രൂപ ചെലവിൽ അത്യാധുനിക സൗകര്യങ്ങളോടെ 350 കിടക്കകളും 10 ഓപ്പറേഷൻ തിയേറ്ററുകളുമുള്ള അവയവമാറ്റ ആശുപത്രി സമുച്ചയം നിർമ്മിക്കുമെന്നായിരുന്നു മുഖ്യമന്ത്രി വി.ഡി. സതീശൻ അറിയിച്ചിരുന്നത്. ഇവിടെത്തന്നെ 35 കോടി രൂപ ചെലവിൽ ത്വക്ക് രോഗാശുപത്രി നിർമ്മിക്കുമെന്നും, എല്ലാ അവയവമാറ്റ സേവനങ്ങളും ഒരു കുടക്കീഴിലാക്കി ചെലവ് മൂന്നിലൊന്നായി കുറയ്ക്കുമെന്നും അദ്ദേഹം പറഞ്ഞിരുന്നു.

എന്നാൽ സ്വന്തം കെട്ടിടം പൂർത്തിയാകുന്നതുവരെ ഇൻസ്റ്റിറ്റ്യൂട്ടിന്റെ പ്രാഥമിക പ്രവർത്തനങ്ങൾ നടത്തുന്നതിനായി കോഴിക്കോട് ഗവൺമെന്റ് മെഡിക്കൽ കോളേജിൽ സ്ഥലം കണ്ടെത്തുകയും, സ്പെഷ്യൽ ഓഫീസറെ നിയമിക്കുകയും, 60 തസ്തികകൾ സൃഷ്ടിക്കുകയും ചെയ്തത് എൽഡിഎഫ് സർക്കാരാണെന്ന് വീണാ ജോർജ് വ്യക്തമാക്കി. സ്ഥാപനം എങ്ങനെ പ്രവർത്തിക്കണമെന്നതിനെക്കുറിച്ച് കൃത്യമായ മാർഗ്ഗരേഖയും അന്ന് തയ്യാറാക്കിയിരുന്നു. സംസ്ഥാനത്തിന് മുതൽക്കൂട്ടാകുന്ന 643 കോടി രൂപയുടെ ഈ ബൃഹദ് പദ്ധതിയെ വെറും 271 കോടി രൂപയിലേക്ക് വെട്ടിച്ചുരുക്കരുതെന്നും അവർ ആവശ്യപ്പെട്ടു.

ആത്മഹത്യാ ശ്രമത്തിനിടെ കയർ പൊട്ടി വീണ് യുവാവിന് ദാരുണാന്ത്യം

by Midhun HP News | Oct 6, 2026 | Latest News, കേരളം

കണ്ണൂർ വെള്ളാട് ആശാൻകവല തലക്കല്ലിൽ ആത്മഹത്യാ ശ്രമത്തിനിടെ കയർ പൊട്ടി താഴെ വീണ് യുവാവ് മരണപ്പെട്ടു. തലക്കൽ സ്വദേശിയായ സി.ബി. റിജുവാണ് ദാരുണമായി മരണപ്പെട്ടത്. കഴിഞ്ഞ ദിവസമാണ് നാടിനെ നടുക്കിയ സംഭവം നടന്നത്.
​
വീട്ടിനുള്ളിൽ തൂങ്ങി മരിക്കാൻ ശ്രമിക്കുന്നതിനിടെ അപ്രതീക്ഷിതമായി കയർ പൊട്ടി നിലത്തേക്ക് വീഴുകയായിരുന്നു. വീഴ്ചയിൽ ഗുരുതരമായി പരിക്കേറ്റ റിജു സംഭവസ്ഥലത്തുതന്നെ മരണപ്പെട്ടു.

​കഴിഞ്ഞ ശനിയാഴ്ച റിജുവിനെതിരെ മോഷണക്കേസിൽ പോലീസ് കേസെടുത്തിരുന്നു. കേസിലകപ്പെട്ടതിലുള്ള കടുത്ത മാനസിക വിഷമവും സമൂഹത്തെ നേരിടാനുള്ള ഭയവുമാണ് ഈ ഘട്ടത്തിലേക്ക് നയിച്ചതെന്നാണ് പ്രാഥമിക നിഗമനം. സംഭവത്തിൽ പോലീസ് കൂടുതൽ അന്വേഷണം ആരംഭിച്ചിട്ടുണ്ട്.

വിമൻ ഓൺ ദി മൂവ് ആൻഡ് മെൻസ്ട്രൽ നീഡ്’പദ്ധതിക്ക് ഇന്ന് തുടക്കം

by Midhun HP News | Oct 6, 2026 | Latest News, കേരളം

തിരുവനന്തപുരം: ഹിറ്റായ പ്രിയദർശിനി പദ്ധതിക്ക് ശേഷം വീണ്ടും സ്ത്രീ സൗഹൃദ പദ്ധതിയുമായി സംസ്ഥാന സർക്കാർ. ആർത്തവ സമയത്ത് സ്ത്രീകളുടെയും പെൺകുട്ടികളുടെയും യാത്രകൾ സുഗമമാക്കുന്ന വനിതാ-ശിശു വികസന വകുപ്പ് നടപ്പിലാക്കുന്ന ‘വിമൻ ഓൺ ദി മൂവ് ആൻഡ് മെൻസ്ട്രൽ നീഡ്’ പദ്ധതിക്ക് ഇന്ന് തുടക്കം.

കെ.എസ്.ആർ.ടി.സി ടെർമിനലുകൾ മറ്റ് പൊതുസ്ഥലങ്ങൾ എന്നിവിടങ്ങളിൽ സാനിറ്ററി നാപ്കിൻ വെൻഡിംഗ് മെഷീനുകളും ഇൻസിനേറ്ററുകളും സ്ഥാപിക്കുന്ന പദ്ധതിയാണിത്. വൈകിട്ട് 5ന് തമ്പാനൂർ കെ.എസ്.ആർ.ടി.സി ബസ് ടെർമിനലിൽ മന്ത്രി ബിന്ദു കൃഷ്ണ ഉദ്ഘാടനം നിർവഹിക്കും. മന്ത്രി സി.പി ജോൺ അദ്ധ്യക്ഷത വഹിക്കും. മേയർ വി.വി രാജേഷ് പങ്കെടുക്കും.

യാത്രാവേളയിൽ സ്ത്രീകൾക്ക് കുറഞ്ഞ നിരക്കിൽ സാനിറ്ററി നാപ്കിനുകൾ ലഭ്യമാക്കുകയും ഉപയോഗശേഷം പരിസ്ഥിതി സൗഹൃദമായി സംസ്കരിക്കുന്നതിന് ഇൻസിനറേറ്റർ സൗകര്യം ഒരുക്കുകയുമാണ് പദ്ധതിയുടെ ലക്ഷ്യം. ഒരു പാക്കറ്റിൽ മൂന്ന് സാനിറ്ററി നാപ്കിനുകൾ ഉണ്ടായിരിക്കും.

10 രൂപയാണ് വില. എച്ച്.എൽ.എല്ലിന്റെ സഹകരണത്തോടെയാണ് പദ്ധതി നടപ്പാക്കുന്നത്. ആദ്യഘട്ടത്തില്‍ 14 ബസ് ടെര്‍മിനലുകളിലാണ് വെന്‍ഡിങ് മെഷീന്‍ സ്ഥാപിക്കുക. ഇതിനുശേഷം കൂടുതല്‍ ഡിപ്പോകളിലേക്ക് പദ്ധതി വ്യാപിപ്പിക്കും. സര്‍ക്കാരിന്റെ നൂറുദിന കര്‍മ പദ്ധതിയുടെ ഭാഗമായാണ് തീരുമാനം.