by Midhun HP News | Oct 6, 2026 | Latest News, ദേശീയ വാർത്ത
മുംബൈ: ഇന്ത്യന്‍ വനിതാ ക്രിക്കറ്റ് ടീമിന്റെ ക്യാപ്റ്റന്‍ സ്ഥാനം ഹര്‍മന്‍പ്രീത് കൗര്‍ ഒഴിഞ്ഞു. മൂന്ന് ഫോര്‍മാറ്റിലെ ക്യാപ്റ്റന്‍ സ്ഥാനവും ഒഴിയുന്നതായി വ്യക്തമാക്കിയാണ് 37കാരിയുടെ അപ്രതീക്ഷിത പ്രഖ്യാപനം. ഇന്‍സ്റ്റഗ്രാം പേജില്‍ പോസ്റ്റ് ചെയ്ത കുറിപ്പിലാണ് താരം നായക സ്ഥാനം ഒഴിയുന്നതായി വ്യക്തമാക്കിയത്. ക്യാപ്റ്റന്‍ സ്ഥാനം മാത്രമാണ് ഒഴിയുന്നതെന്നും കളിക്കാരിയെന്ന നിലയില്‍ ടീമില്‍ തുടരുമെന്നും അവര്‍ വ്യക്തമാക്കി.
2016ലാണ് ഹര്‍മന്‍പ്രീത് ഇന്ത്യയുടെ ടി20 ക്യാപ്റ്റനാകുന്നത്. 10 വര്‍ഷത്തോളം ആസ്ഥാനത്ത് തുടരുകയാണ്. 2022ല്‍ അവര്‍ ഏകദിനത്തിലും 2023ല്‍ ടെസ്റ്റ് ഫോര്‍മാറ്റിലും ക്യാപ്റ്റന്‍ സ്ഥാനം ഏറ്റെടുത്തു.
ഇന്ത്യന്‍ വനിതാ ക്യാപ്റ്റനെന്ന നിലയില്‍ ഒരിക്കലും മായ്ക്കാന്‍ സാധിക്കാത്ത തരത്തില്‍ തന്റെ പേര് എഴുതി വച്ചാണ് അവര്‍ പടിയിറങ്ങുന്നത്. ഇന്ത്യന്‍ വനിതാ ടീമിന് ചരിത്രത്തിലാദ്യമായി ഏകദിന ലോകകപ്പ് കിരീടം സമ്മാനിച്ച ക്യാപ്റ്റന്‍ എന്ന അവിസ്മരണീയ നേട്ടം ഹര്‍മന്‍പ്രീതിന് അവകാശപ്പെട്ടതാണ്. 2025 നവംബറിലാണ് ഇന്ത്യ കന്നി വനിതാ ഏകദിന ലോകകപ്പ് കിരീടം സ്വന്തമാക്കിയത്. ഏഷ്യന്‍ ഗെയിംസില്‍ തുടരെ രണ്ട് എഡിഷനുകളില്‍ ഇന്ത്യ സ്വര്‍ണം നേടിയതും ഹര്‍മന്‍പ്രീതിന്റെ കീഴില്‍ തന്നെ.
ഇന്‍സ്റ്റയില്‍ പങ്കിട്ട കുറിപ്പ്
‘ഇന്ത്യന്‍ വനിതാ ക്രിക്കറ്റ് ടീമിന്റെ മൂന്ന് ഫോര്‍മാറ്റിലെയും ക്യാപ്റ്റന്‍ സ്ഥാനത്തു നിന്ന് ഞാന്‍ പടിയിറങ്ങുകയാണ്. എളുപ്പം എടുത്ത തീരുമാനമല്ല ഇത്. ഒരുപാട് വര്‍ഷത്തെ ഓര്‍മകളും വികാരങ്ങളും ത്യാഗങ്ങളും ജീവിതകാലം എന്നോടൊപ്പം നില്‍ക്കുന്ന നിമിഷങ്ങളും ഇതിലുണ്ട്.
ഈ ടീമിനും ഇന്ത്യന്‍ വനിതാ ക്രിക്കറ്റിനും എന്നാലാവുന്നത് എല്ലാം ഞാന്‍ നല്‍കി. എന്റെ രക്തവും വിയര്‍പ്പും സമയവും. പലപ്പോഴും സ്വന്തം കളിയുടേയും വ്യക്തിപരമായ ആഗ്രഹങ്ങളുടേയും ഒരു ഭാഗം തന്നെയും ഞാന്‍ ടീമിനായി നല്‍കി. ടീം ആണ് മുന്നില്‍ എന്നു വിശ്വസിച്ചതിനാല്‍ എന്റെ വ്യക്തിഗത പ്രകടനവും വളര്‍ച്ചയും സ്വകാര്യ ആഗ്രഹങ്ങളും എല്ലാം മാറ്റിവയ്‌ക്കേണ്ടി വന്നു.
ക്യാപ്റ്റന്‍ എന്ന നിലയില്‍ ബുദ്ധിമുട്ടേറിയ പല തീരുമാനങ്ങളും എനിക്ക് എടുക്കേണ്ടി വന്നിട്ടുണ്ട്. എല്ലായ്‌പ്പോഴും ആളുകള്‍ക്ക് മനലാകാതിരുന്ന, എളുപ്പമല്ലാത്ത, ചിലപ്പോഴൊക്കെ വ്യക്തിപരമായ നഷ്ടങ്ങള്‍ വരുത്തിവച്ച തീരുമാനങ്ങള്‍. എന്നാല്‍ ഞാന്‍ എടുത്ത ഒരോ തീരുമാനത്തിനു പിന്നിലും ഒറ്റ ലക്ഷ്യം മാത്രമായിരുന്നു. ഈ ടീമിനെ കൂടുതല്‍ മികച്ചതാക്കുക. ഒപ്പം മറ്റ് കളിക്കാര്‍ക്ക് വളരാനും കഴിവുകളില്‍ വിശ്വാസിക്കാനും അവരുടെ ഏറ്റവും മികച്ച പ്രകടനം പുറത്തെടുക്കാനുമുള്ള അവസരം ഒരുക്കുക.
വലിയ തിരിച്ചടികള്‍ നിറഞ്ഞ നിമിഷങ്ങള്‍, ഹൃദയവേദനകള്‍, വിമര്‍ശനങ്ങള്‍, സംശയങ്ങള്‍, ഒന്നും അനുകൂലമായി വരാത്ത ദിവസങ്ങള്‍ തുടങ്ങി നിരവധി കാര്യങ്ങളെ ഞാന്‍ ക്യാപ്റ്റനെന്ന നിലയില്‍ നേരിട്ടു. അതേപോലെ തന്നെ സന്തോഷകരമായ ഒട്ടേറെ നിമിഷങ്ങള്‍, വിജയങ്ങള്‍, ആഘോഷങ്ങള്‍, നമ്മുടെ രാജ്യത്തെ പ്രതിനിധീകരിക്കുന്നതിന്റെ അഭിമാനം, ഓരോ ത്യാഗവും ഫലവത്തായ നിമിഷങ്ങള്‍.’
‘നിറഞ്ഞ വികാരങ്ങളോടെയാണ് ഞാന്‍ സ്ഥാനമൊഴിയുന്നത്. ഒപ്പം മനസിന് വലിയ സമാധാനവുമുണ്ട്. കാരണം എന്റെ ടീം ഇപ്പോള്‍ വളരെ മികച്ച നിലയിലാണെന്നു ഞാന്‍ ആത്മാര്‍ഥമായി വിശ്വസിക്കുന്നു. കഴിവുള്ള, വ്യക്തതയുള്ള, ആത്മവിശ്വാസമുള്ള, വരുംകാലത്ത് ഏറെ പ്രതീക്ഷ നല്‍കുന്ന ഒരു ടീം. അവരുടെ കളിയും വളര്‍ച്ചയും കാണാനും അതിന്റെ ഭാഗമാകാനും ഞാന്‍ ആവേശത്തോടെ കാത്തിരിക്കുന്നു.
എന്റെ കടമ ഞാന്‍ നിര്‍വഹിച്ചു എന്നാണ് തോന്നുന്നത്. ഈ ടീമിനായി എനിക്കുള്ളതെല്ലാം ഞാന്‍ നല്‍കി. അഭിമാനത്തോടെയാണ് ഈ ഉത്തരവാദിത്വം ഞാന്‍ ചുമലിലേറ്റിയത്. ഇന്ത്യന്‍ വനിതാ ക്രിക്കറ്റിനെ നയിക്കാന്‍ ഭാഗ്യം കിട്ടിയതില്‍ ഞാന്‍ കൃതജ്ഞതയുള്ളവളായിരിക്കും.
ഇപ്പോള്‍ മറ്റൊരു അധ്യായത്തിന്റെ പുതിയ താള്‍ മറിക്കാനുള്ള സമയമായിരിക്കുന്നു. ക്യാപ്റ്റന്‍സി അവസാനിച്ചേക്കാം. എന്നാല്‍ ഇന്ത്യന്‍ ക്രിക്കറ്റിനോടുള്ള എന്റെ സ്‌നേഹം അവസാനിക്കില്ല. നല്ല സമയത്തും പ്രയാസകരമായ ഘട്ടങ്ങളിലും എനിക്കൊപ്പം ഉറച്ചു നിന്ന എല്ലാ സഹ താരങ്ങള്‍ക്കും സപ്പോര്‍ട്ട് സ്റ്റാഫുകള്‍ക്കും മാനേജ്‌മെന്റിനും ബിസിസിഐ കുടുംബാംഗങ്ങള്‍ക്കും ഓരോ ആരാധകനും നന്ദി.
രക്തം, വിയര്‍പ്പ്, ത്യാഗം, അഭിമാനം എന്റേതെല്ലാം ഞാന്‍ നല്‍കി. കളിയോടുള്ള സ്‌നേഹത്താല്‍ വീണ്ടും കളിക്കാന്‍ ഞാന്‍ ഒരുക്കമാണ്. ക്യാപ്റ്റന്‍സി അവസാനിക്കുന്നു. യാത്ര തുടരുന്നു.’
by Midhun HP News | Oct 6, 2026 | Latest News, ദേശീയ വാർത്ത
ഡല്‍ഹി: മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ രാജിവയ്ക്കണമെന്നാവശ്യപ്പെട്ട് ഇന്ത്യ സഖ്യത്തിന്റെ നേതൃത്വത്തില്‍ തെരഞ്ഞെടുപ്പ് കമ്മീഷന്‍ ഓഫീസിലേക്ക് നടത്തിയ മാര്‍ച്ച് പൊലീസ് തടഞ്ഞു. ആകാശവാണി ഓഫീസിന് മുന്നില്‍ വച്ചാണ് മാര്‍ച്ച് തടഞ്ഞത്. തുടര്‍ന്ന് റോഡില്‍ കുത്തിയിരുന്ന് പ്രതിഷേധിക്കുകയാണ് രാഹുല്‍ ഗാന്ധി ഉള്‍പ്പടെയുള്ള നേതാക്കളും പ്രവര്‍ത്തകരും. പ്രതിപക്ഷ പ്രതിഷേധത്തില്‍ ബിജെഡിയും പങ്കെടുക്കുന്നു.
തെരഞ്ഞെടുപ്പ് കമ്മീഷന്‍ ഓഫീസിന് സമീപത്തേക്ക് കടത്തിവിടില്ലെന്ന് ഡല്‍ഹി പൊലീസ് പറഞ്ഞു. പ്രതിപക്ഷ പ്രതിഷേധം തടഞ്ഞതോടെ പ്രവര്‍ത്തകരും പൊലീസും തമ്മില്‍ ഉന്തുംതള്ളുമുണ്ടായിരുന്നു. എസ്പി പ്രവര്‍ത്തകര്‍ ബാരിക്കേഡിന് മുകളില്‍ കയറി ഇരുന്ന പ്രതിഷേധിച്ചു. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പ്രതിപക്ഷ നേതാവ് രാഹുല്‍ ഗാന്ധി, പ്രിയങ്ക ഗാന്ധി, അഖിലേഷ് യാദവ് തുടങ്ങി ഇന്ത്യ സഖ്യ എംപിമാര്‍ പ്രതിഷേധ മാര്‍ച്ചില്‍ പങ്കെടുക്കുന്നുണ്ട്.
3,000ലധികം പൊലീസ് ഉദ്യോഗസ്ഥരെ പ്രദേശത്ത് വിന്യസിച്ചിട്ടുണ്ട്. പുരുഷന്മാരുടെ 27 കമ്പനികളും വനിതകളുടെ 4 കമ്പനികളും ഉള്‍പ്പെടെയുള്ള വന്‍ പൊലീസ് വ്യൂഹത്തെയാണ് സുരക്ഷയ്ക്കായി രംഗത്തിറക്കിയത്. പാര്‍ലമെന്റ് പരിസരം, പാര്‍ലമെന്റ് സ്ട്രീറ്റ് റൗണ്ട് എബൗട്ട്, തെരഞ്ഞെടുപ്പ് കമ്മിഷന്‍ കവാടങ്ങള്‍ തുടങ്ങിയ പ്രധാന ഇടങ്ങളിലെല്ലാം സുരക്ഷ ശക്തമാക്കി. ഓണ്‍-ഗ്രൗണ്ട് സുരക്ഷാ മേല്‍നോട്ടം വഹിക്കുന്നതിനായി മുതിര്‍ന്ന പൊലീസ് ഉദ്യോഗസ്ഥര്‍ യൂണിഫോമില്‍ ക്യാമറകള്‍ ഘടിപ്പിച്ചാണ് ചുമതലകള്‍ നിര്‍വഹിക്കുന്നത്.
ഇലക്ഷന്‍ കമ്മീഷനിലുള്ള പൊതുജനങ്ങളുടെ വിശ്വാസം ഗ്യാനേഷ് കുമാര്‍ തകര്‍ത്തതായി കോണ്‍ഗ്രസ് എംപിമാര്‍ ആരോപിച്ചു. തെരഞ്ഞെടുപ്പ് കമ്മീഷനെ ഓര്‍ത്ത് രാജ്യം മുഴുവന്‍ വിശ്വസിക്കുകയും അഭിമാനിക്കുകയും ചെയ്തിരുന്നു. ഇതിന്റെ നിഷ്പക്ഷതയെക്കുറിച്ച് ഒരിക്കലും ചോദ്യങ്ങള്‍ ഉയര്‍ന്നിരുന്നില്ല. എന്നാല്‍ ഗ്യാനേഷ് കുമാര്‍ ആ വിശ്വാസം തകര്‍ത്തെന്നും പ്രതിപക്ഷ എംപിമാര്‍ പറഞ്ഞു. പ്രതിപക്ഷം ഗ്യാനേഷ് കുമാറിനോട് ചോദിക്കുമ്പോള്‍ അതിന് മറുപടി നല്‍കുന്നത് ബിജെപി നേതാക്കളാണെന്നും എംപിമാര്‍ ആരോപിച്ചു.
by Midhun HP News | Oct 6, 2026 | Latest News, ദേശീയ വാർത്ത
ഡല്‍ഹി: ജെമിനെ ഉപയോക്താക്കള്‍ പുതിയ നിയന്ത്രണങ്ങള്‍ ഏര്‍പ്പെടുത്താന്‍ ഗൂഗിള്‍. ജെമിനെ മോഡലുകള്‍ ഉപയോഗിക്കുന്ന രീതിയിലാണ് മാറ്റങ്ങള്‍ കൊണ്ടുവരുന്നത്. ഇനിമുതല്‍ ലഭ്യമായ മോഡലുകള്‍ ഉപയോക്താവിന്റെ വ്യക്തിഗത അക്കൗണ്ടുമായി ബന്ധിപ്പിച്ചിട്ടുള്ള എഐ പ്ലാനിനെ ആശ്രയിച്ചിരിക്കും. ഒക്ടോബര് മുതല്‍ ഈ മാറ്റങ്ങള്‍ ഘട്ടംഘട്ടമായി നടപ്പിലാക്കിത്തുടങ്ങും.
സൗജന്യമായി ജെമിനെ ഉപയോഗിക്കുന്നവര്‍ക്ക് ഒക്ടോബര് 9 മുതല്‍ ‘ഫ്‌ലാഷ്-ലൈറ്റ്’ മോഡല്‍ മാത്രമാകും ലഭ്യമാകുക. നിലവില്‍ സൗജന്യ ഉപയോക്താക്കള്‍ക്ക് ലഭിക്കുന്ന ‘ഫ്‌ലാഷ്’, ‘പ്രോ’ മോഡലുകള്‍ ഉപയോഗിക്കാനാകില്ല.
എഐ പ്ലസ് വരിക്കാര്‍ക്ക് ഫ്‌ലാഷ്-ലൈറ്റ്, ഫ്‌ലാഷ് എന്നിവ തുടര്‍ന്നും ലഭിക്കുമെങ്കിലും പ്രോ മോഡല്‍ ലഭിക്കില്ല. ഉയര്‍ന്ന നിരക്കില്‍ ലഭിക്കുന്ന എഐ പ്രോ, എഐ അള്‍ട്രാ പ്ലാനുകളില്‍ ഫ്‌ലാഷ്-ലൈറ്റ്, ഫ്‌ലാഷ്, പ്രോ എന്നിവ തുടര്‍ന്നും ലഭ്യമാകും.
സൗജന്യ വരിക്കാര്‍ക്കും ജെമിനി ഉപയോഗിക്കുന്നവര്‍ക്കും ‘എഐ പ്ലസ്’ വരിക്കാര്‍ക്കുമാണ് ഇതില്‍ ഏറ്റവും വലിയ മാറ്റം അനുഭവപ്പെടുക. പുതിയ മോഡല്‍ ഘടനയനുസരിച്ച് ഇരു വിഭാഗങ്ങളുടെയും ഉപയോഗരീതിയില്‍ മാറ്റങ്ങള്‍ വരുമെന്നതാണ് ഇതിന് കാരണം. പുതിയ മാറ്റങ്ങള്‍ എപ്പോള്‍ പ്രാബല്യത്തില്‍ വരുമെന്ന് വ്യക്തമാക്കുന്ന ഇമെയില്‍ ഈ ഉപയോക്താക്കള്‍ക്ക് ലഭിക്കുമെന്നാണ് ഗൂഗിള്‍ വ്യക്തമാക്കുന്നത്.
by Midhun HP News | Oct 6, 2026 | Latest News, കായികം
ഷാർജ: ലോക ലെജൻഡ്സ് ചാംപ്യൻഷിപ് മൂന്നാം സീസണിൽ നിന്നു പാകിസ്ഥാൻ പിന്മാറി. ടീമിന് പാകിസ്ഥാൻ ക്രിക്കറ്റ് ബോർഡ് എൻഒസി നൽകാത്തതിനെ തുടർന്നാണ് പിന്മാറ്റം. പാകിസ്ഥാൻ ചാംപ്യൻസ് ടീമിന് എൻഒസി നൽകണമെന്ന് ഉടമ കാമിൽ ഖാൻ അഭ്യർഥിച്ചെങ്കിലും പിസിബി നൽകാൻ സാധിക്കില്ലെന്ന ഉറച്ച നിലപാടിൽ നിന്നു. കഴിഞ്ഞ വർഷം ഇന്ത്യയുമായുണ്ടായ വിവാദങ്ങളുമായി ബന്ധപ്പെട്ട് ചില നിബന്ധനകൾ പിസിബി മുന്നോട്ടുവച്ചിരുന്നു. എന്നാൽ വേൾഡ് ചാംപ്യൻഷിപ് ഓഫ് ലെജൻഡ്സ് (ഡബ്ല്യുസിഎൽ) മാനേജ്‌മെന്റ് ഇത് അംഗീകരിച്ചില്ല. ഇതോടെയാണ് ടീമിനു എൻഒസി നൽകില്ലെന്നു പിസിബി നിലപാടെടുതത്.
പഹൽഗാം ഭീകരാക്രമണത്തിന്റെ പശ്ചാത്തലത്തിൽ കഴിഞ്ഞ സീസണിൽ പാകിസ്ഥാനെതിരെ കളിക്കാൻ ഇന്ത്യൻ ടീം വിസമ്മതിച്ചിരുന്നു. ഇതിൽ ഇന്ത്യൻ ടീം രേഖാമൂലം ഖേദം പ്രകടിപ്പിക്കണമെന്നാണ് പിസിബി മുന്നോട്ടുവച്ച ആവശ്യം. എന്നാൽ ഡബ്ല്യുസിഎൽ ഇതു നിരസിച്ചു. പിന്നാലെ ഷാഹിഫ് അഫ്രീദി ക്യാപ്റ്റനായ ടീമിന് എൻഒസി നൽകില്ലെന്ന് പിസിബി നിലപാട് എടുത്തു. ടൂർണമെന്റിൽ പങ്കെടുക്കാൻ ടീമംഗങ്ങൾ യുഎഇയിൽ എത്തിയിരുന്നു. അതിനിടെയാണ് പിസിബിയുടെ അപ്രതീക്ഷിത തീരുമാനം.
ഒക്ടോബർ 3ന് നടക്കേണ്ടിയിരുന്ന ബംഗ്ലദേശ് ചാംപ്യൻസിനെതിരെയുള്ള പാക്കിസ്ഥാന്റെ ഉദ്ഘാടന മത്സരം സാങ്കേതിക കാരണങ്ങളാൽ മാറ്റിവച്ചിരുന്നു. ഒക്ടോബർ 10നാണ് ഇന്ത്യ ചാംപ്യൻസ്– പാകിസ്ഥാൻ ചാംപ്യൻസ് മത്സരം നിശ്ചയിച്ചിരുന്നത്.
‘എൻഒസി നൽകാൻ വിസമ്മതിച്ച പാകിസ്ഥാൻ ക്രിക്കറ്റ് ബോർഡിന്റെ തീരുമാനം നിലനിൽക്കുന്ന സാഹചര്യത്തിൽ, നിലവിൽ നടക്കുന്ന വേൾഡ് ചാംപ്യൻഷിപ് ഓഫ് ലെജൻഡ്‌സിൽ പങ്കെടുക്കാൻ ടീമിന് കഴിയില്ലെന്ന് പാകിസ്ഥാൻ ചാംപ്യൻസ് ഖേദപൂർവം അറിയിക്കുന്നു. ക്രിക്കറ്റ് ഇതിഹാസങ്ങളുടെ ഈ ആഗോള കൂട്ടായ്മയിൽ പാകിസ്ഥാൻ ചാംപ്യൻസിനെ പ്രതിനിധീകരിക്കാൻ ഞങ്ങളുടെ കളിക്കാർക്ക് അവസരം ലഭിക്കാത്തതിൽ സ്വാഭാവികമായും നിരാശയുണ്ട്.’
‘പിസിബിയുടെ അധികാരത്തെയും അതിന്റെ തീരുമാനത്തെയും ഞങ്ങൾ ബഹുമാനിക്കുന്നു. ഞങ്ങളുടെ കളിക്കാർക്കും പിന്തുണയ്ക്കുന്നവർക്കും ആരാധകർക്കും അവരുടെ ക്ഷമയ്ക്കും സഹിഷ്ണുതയ്ക്കും തുടർച്ചയായ പിന്തുണയ്ക്കും ഞങ്ങൾ ആത്മാർഥമായി നന്ദി പറയുന്നു’– ടീം വ്യക്തമാക്കി.
ഇന്ത്യയും പാകിസ്ഥാനും തമ്മിലുള്ള നയതന്ത്ര ബന്ധം വഷളായതിനെ തുടർന്നാണ് 2025 ജൂലൈ- ഓഗസ്റ്റ് മാസങ്ങളിൽ നടന്ന ഡബ്ല്യുസിഎലിന്റെ ഗ്രൂപ്പ് ഘട്ട മത്സരത്തിൽ പാകിസ്ഥാനെതിരെ കളിക്കാൻ ഇന്ത്യ ചാംപ്യൻസ് വിസമ്മതിച്ചത്. ഇതാണ് തർക്കങ്ങളിലേക്ക് നയിച്ചത്. മത്സരം റദ്ദാക്കുകയും ഇരു ടീമുകൾക്കും ഓരോ പോയിന്റ് വീതം നൽകുകയും ചെയ്തു.
സെമി ഫൈനലിലും ഇന്ത്യ നിലപാട് ആവർത്തിച്ചു. അതോടെ സെമി ഉപേക്ഷിക്കുകയും പാകിസ്ഥാൻ നേരിട്ട് ഫൈനലിലേക്ക് യോഗ്യത നേടുകയും ചെയ്തു. പഹൽഗാം ഭീകരാക്രമണത്തിനു പിന്നാലെ ഇന്ത്യ നടത്തിയ ഓപ്പറേഷൻ സിന്ദൂറിന്റെ പശ്ചാത്തലത്തിലായിരുന്നു ഈ തീരുമാനം.
by Midhun HP News | Oct 6, 2026 | Latest News, ദേശീയ വാർത്ത
ഡല്‍ഹി: 2001 ഒക്ടോബറില്‍ ഗുജറാത്ത് മുഖ്യമന്ത്രിയായി തുടങ്ങിയ നരേന്ദ്ര മോദി നാളെ (ഒക്ടോബര് ഏഴ്) ഭരണരംഗത്ത് 25 വര്‍ഷം പൂര്‍ത്തിയാക്കുകയാണ്. ഒരുമാസം നീണ്ടുനില്‍ക്കുന്ന സേവാ സങ്കല്‍പ് അഭിയാന്‍ പരിപാടിയിലൂടെയാണ് ബിജെപി ഇത് ആഘോഷമാക്കുന്നത്. മോദിയുടെ ജന്മസ്ഥലമായ ഭട്‌നഗറിനെയും അദ്ദേഹത്തിന്റെ പാര്‍ലമെന്റ് മണ്ഡലമായ വാരണാസിയെയും ബന്ധിപ്പിച്ചുകൊണ്ട് വിവിധ പരിപാടികളും ജനസമ്പര്‍ക്ക പരിപാടികളും ഇതിന്റെ ഭാഗമായി സംഘടിപ്പിച്ചിട്ടുണ്ട്.
2001 ഒക്ടോബര് ഏഴിനാണ് മോദി ഗുജറാത്ത് മുഖ്യമന്ത്രിയാകുന്നത്. 2014ല്‍ ദേശീയ രാഷ്ട്രീയഭൂമികയിലേക്ക് കളംമാറുന്നതുവരെ ഏകദേശം 13 വര്‍ഷത്തോളം അദ്ദേഹം ഗുജറാത്ത് മുഖ്യമന്ത്രിയായിരുന്നു. തുടര്‍ന്ന് മൂന്ന് തവണയായി ഇന്ത്യയുടെ പ്രധാനമന്ത്രി പദത്തിലും അദ്ദേഹം സേവനം അനുഷ്ഠിച്ചു വരുന്നു.
അപ്രതീക്ഷിതമായാണ് നരേന്ദ്രമോദി ഗുജറാത്ത് മുഖ്യമന്ത്രിയാകുന്നത്. ആ വര്‍ഷം ജനുവരിയിലുണ്ടായ വന്‍ ഭൂകമ്പത്തെത്തുടര്‍ന്ന് തകര്‍ന്നടിഞ്ഞ ഗുജറാത്തിനെ പുനര്‍നിര്‍മിക്കുക എന്ന വലിയ ഉത്തരവാദിത്തമാണ് അന്ന് അദ്ദേഹത്തിന് മുന്നിലുണ്ടായിരുന്നത്. അത് വിജയകരമായി പൂര്‍ത്തിയാക്കാന്‍ മോദിക്ക് കഴിഞ്ഞു. മുഖ്യമന്ത്രിയായി ചുമതലയേറ്റതിന് ശേഷം നടന്ന 2002-ലെ നിയമസഭാ തെരഞ്ഞെടുപ്പ് അദ്ദേഹത്തിന്റെ രാഷ്ട്രീയ ജീവിതത്തിലെ കടുത്ത അഗ്‌നിപരീക്ഷയായിരുന്നു.
ഗോധ്രാ സംഭവങ്ങളെത്തുടര്‍ന്നുള്ള കലാപങ്ങളുടെ പശ്ചാത്തലത്തില്‍ നടന്ന തെരഞ്ഞെടുപ്പില്‍ ബിജെപി 182-ല്‍ 127 സീറ്റുകള്‍ നേടി വിജയിച്ചു. മോദി തന്റെ ആദ്യ പൂര്‍ണ കാലാവധിയിലേക്ക് മുഖ്യമന്ത്രിയായി അധികാരമേറ്റു. പാര്‍ട്ടിനേതാവ് എന്ന നിലയില്‍ നിന്ന് ജനപ്രിയനായ ഒരു രാഷ്ട്രീയ നേതാവിലേക്കുള്ള അദ്ദേഹത്തിന്റെ വളര്‍ച്ചയായിരുന്നു ഇത്. അടിസ്ഥാന സൗകര്യങ്ങള്‍, നിക്ഷേപം, ജലസേചനം എന്നിവയ്ക്ക് മുന്‍ഗണന നല്‍കിയ അദ്ദേഹത്തിന്റെ ഭരണശൈലി ‘ഗുജറാത്ത് മോഡല്‍’ എന്ന പേരില്‍ അറിയപ്പെട്ടു.
2013ല്‍ ബിജെപി നരേന്ദ്രമോദിയെ പ്രധാനമന്ത്രി സ്ഥാനാര്‍ത്ഥിയായി പ്രഖ്യാപിച്ചു. വികസന നായകനായും ശക്തമായ ഭരണാധികാരിയായും അദ്ദേഹത്തെ അവതരിപ്പിച്ചുകൊണ്ടുള്ള തെരഞ്ഞെടുപ്പ് പ്രചാരണമാണ് പാര്‍ട്ടി നടത്തിയത്. ഒരു വര്‍ഷത്തിനുശേഷം നടന്ന ലോക്സഭാ തെരഞ്ഞെടുപ്പില്‍ ബിജെപി 282 സീറ്റുകള്‍ നേടി.
2014 മെയ് 26ന് നരേന്ദ്ര മോദി രാജ്യത്തിന്റെ പ്രധാനമന്ത്രിയായി സത്യപ്രതിജ്ഞ ചെയ്തു അധികാരമേറ്റു. ചെങ്കോട്ടയില്‍ നടത്തിയ ആദ്യ സ്വാതന്ത്ര്യദിന പ്രസംഗത്തില്‍ താന്‍ രാജ്യത്തിന്റെ ‘പ്രധാന സേവകന്‍’ ആണെന്ന് അദ്ദേഹം പ്രഖ്യാപിച്ചു. സ്വച്ഛ് ഭാരത് മിഷന്‍, ജന്‍ ധന്‍ യോജന, മേക്ക് ഇന്‍ ഇന്ത്യ തുടങ്ങിയ നിരവധി പദ്ധതികള്‍ക്ക് അദ്ദേഹത്തിന്റെ ആദ്യ സര്‍ക്കാര്‍ തുടക്കമിട്ടു.
2017ല്‍ അവതരിപ്പിച്ച ചരക്ക് സേവന നികുതി, ഭൂരിഭാഗം പരോക്ഷ നികുതികളെയും ഒരു ഏകീകൃത ദേശീയ ചട്ടക്കൂടിലേക്ക് കൊണ്ടുവന്നു. ഏറ്റവും കൂടുതല്‍ ചര്‍ച്ച ചെയ്യപ്പെട്ടതായിരുന്നു 2016-ലെ നോട്ടുനിരോധനം. ഉന്നത മൂല്യമുള്ള കറന്‍സി നോട്ടുകള്‍ വിപണിയില്‍ നിന്ന് പിന്‍വലിച്ച സംഭവമായിരുന്നു ഇത്. ഇത്തരം നോട്ടുകള്‍ പിന്‍വലിക്കുന്നതോടുകൂടി രാജ്യത്ത് കള്ളപ്പണം ഒഴുകുന്നത് തടയിടാനാകുമെന്നും, തീവ്രവാദപ്രവര്‍ത്തനങ്ങളെയും മയക്കുമരുന്ന് കച്ചവടങ്ങളെയും ഇല്ലാതാക്കാനാകുമെന്നുമായിരുന്നു കേന്ദ്രസര്‍ക്കാര്‍ വാദം.
2016ലെ ഉറി ആക്രമണത്തിന് ശേഷം ഇന്ത്യ അതിര്‍ത്തി കടന്നുള്ള സര്‍ജിക്കല്‍ സ്‌ട്രൈക്ക് പ്രഖ്യാപിച്ചു. 2019-ലെ പുല്‍വാമ ആക്രമണത്തിന് ശേഷം ബാലാക്കോട്ടില്‍ ഇന്ത്യ വ്യോമാക്രമണം നടത്തി. 2025-ല്‍ പഹല്‍ഗാം ഭീകരാക്രമണത്തെത്തുടര്‍ന്ന് സര്‍ക്കാര്‍ ‘ഓപ്പറേഷന്‍ സിന്ദൂര്‍’ പ്രഖ്യാപിച്ചു. അതിര്‍ത്തി കടന്നുള്ള ഭീകരവാദത്തിനെതിരെ ശക്തമായ മറുപടി സര്‍ക്കാരിന്റെ ഭാഗത്തുനിന്നുണ്ടായി. രണ്ടാം മോദി സര്‍ക്കാരിന്റെ ഏറ്റവും വലിയ രാഷ്ട്രീയ തീരുമാനങ്ങളില്‍ ഒന്നായിരുന്നു ജമ്മു കശ്മീരിന്റെ പ്രത്യേക പദവി നല്‍കുന്ന ആര്‍ട്ടിക്കിള്‍ 370 റദ്ദാക്കിയത്. ബിജെപിയുടെ ദീര്‍ഘകാലമായുള്ള പ്രഖ്യാപനമായിരുന്നു ഇത്. ഈ തീരുമാനം രാജ്യത്തിനകത്തും പുറത്തും വലിയ ചര്‍ച്ചകള്‍ക്കും നിയമപോരാട്ടങ്ങള്‍ക്കും വഴിവെച്ചു.
മോദി സര്‍ക്കാരിന്റെ ഭരണകാലം നേരിട്ട ഏറ്റവും വലിയ വെല്ലുവിളിയായിരുന്നു കോവിഡ് മഹാമാരി. രാജ്യവ്യാപകമായ ലോക്ക്ഡൗണും തുടര്‍ന്ന് ലോകത്തിലെ ഏറ്റവും വലിയ വാക്‌സിനേഷന്‍ യജ്ഞങ്ങളിലൊന്നും സര്‍ക്കാര്‍ വിജയകരമായി നടപ്പിലാക്കി. 2024ലെ ലോക്സഭാ തെരഞ്ഞെടുപ്പില്‍ ബിജെപിക്ക് ഒറ്റയ്ക്ക് കേവലഭൂരിപക്ഷം ലഭിച്ചില്ലെങ്കിലും സഖ്യകക്ഷികളുടെ പിന്തുയില്‍ എന്‍ഡിഎ സര്‍ക്കാര്‍ അധികാരത്തില്‍ തുടര്‍ന്നു. ഇന്ത്യയുടെ പ്രഥമ പ്രധാനമന്ത്രിയായിരുന്നു ജവഹര്‍ലാല്‍ നെഹ്റുവിന് ശേഷം തുടര്‍ച്ചയായി മൂന്നാം തവണയും പ്രധാനമന്ത്രി പദത്തിലെത്തുന്ന രണ്ടാമത്തെ വ്യക്തിയായി നരേന്ദ്ര മോദി മാറി.
by Midhun HP News | Oct 6, 2026 | Latest News, ദേശീയ വാർത്ത
ദുബൈ: യുഎഇയില്‍ സ്‌കൂള്‍ പരിസരത്ത് ഫോട്ടോയും വിഡിയോയും എടുക്കുന്നതില്‍ മാതാപിതാക്കള്‍ക്ക് കര്‍ശന വിലക്ക്. കുട്ടികളുടെ സ്വകാര്യതയും സുരക്ഷയും മുന്‍നിര്‍ത്തി ദുബൈയിലെയും ഷാര്‍ജയിലെയും പ്രമുഖ സ്‌കൂളുകളാണ് മാതാപിതാക്കള്‍ക്കും സന്ദര്‍ശകര്‍ക്കും പുതിയ മാര്‍ഗനിര്‍ദ്ദേശം നല്‍കി സര്‍ക്കുലര്‍ അയച്ചിരിക്കുന്നത്.
സ്‌കൂള്‍ ക്യാംപസിനുള്ളില്‍ വെച്ച് വിദ്യാര്‍ഥികളുടെ ഫോട്ടോയോ വിഡിയോയോ എടുക്കരുതെന്നും, അനുവാദമില്ലാതെ മറ്റ് കുട്ടികള്‍ ഉള്‍പ്പെടുന്ന ചിത്രങ്ങള്‍ വാട്‌സാപ്പ് ഗ്രൂപ്പുകളിലോ സോഷ്യല്‍ മീഡിയയിലോ മറ്റ് ഡിജിറ്റല്‍ പ്ലാറ്റ്ഫോമുകളിലോ പങ്കുവെക്കരുതെന്നുമാണ് മാതാപിതാക്കള്‍ക്കും സന്ദര്‍ശകര്‍ക്കും സ്‌കൂളുകള്‍ നിര്‍ദ്ദേശം നല്‍കിയത്.
യുഎഇയിലെ സ്വകാര്യത സംരക്ഷണ നിയമങ്ങള്‍ക്കും അടുത്തിടെ പുറത്തിറക്കിയ നിര്‍ദ്ദേശങ്ങള്‍ക്കും വിധേയമായാണ് ഈ നടപടി. ക്ലാസ് മുറികള്‍, കൊറിഡോറുകള്‍, കളിസ്ഥലങ്ങള്‍, അസംബ്ലി, കുട്ടികളെ സ്‌കൂളില്‍ ഇറക്കുന്നതും തിരികെ കൊണ്ടുപോകുന്നതുമായ സ്ഥലങ്ങള്‍ തുടങ്ങിയവിടങ്ങളിലെല്ലാം ഈ വിലക്ക് ബാധകമാണ്. മറ്റു കുട്ടികളുടെയോ അധ്യാപകരുടെയോ ജീവനക്കാരുടെയോ ചിത്രങ്ങള്‍ അനുമതിയില്ലാതെ പകര്‍ത്തുമ്പോഴുണ്ടാകുന്ന സ്വകാര്യതാ ലംഘനം തടയുകയാണ് സ്‌കൂള്‍ അധികൃതരുടെ ലക്ഷ്യം.
സ്‌കൂള്‍ പരിസരത്ത് കുട്ടികളുടെ അനുവാദമില്ലാതെ ഫോട്ടോയോ വിഡിയോയോ എടുക്കുന്ന മാതാപിതാക്കള്‍ക്ക് യുഎഇ സ്വകാര്യതാ നിയമങ്ങള്‍ പ്രകാരം 500,000 ദിര്‍ഹം വരെ പിഴ ലഭിച്ചേക്കാം. അധികൃതര്‍ക്ക് പരാതി നല്‍കുകയും നടപടി കുറ്റകരമാണെന്ന് കണ്ടെത്തുകയും ചെയ്താല്‍ മാത്രമാണ് ഈ നടപടി നേരിടേണ്ടി വരിക. യുഎഇ സൈബര്‍ കുറ്റകൃത്യ നിയമത്തിലെ ആര്‍ട്ടിക്കിള്‍ 44 പ്രകാരം, ഒരു കുട്ടിയുടെ സ്വകാര്യത ലംഘിക്കുന്ന രീതിയില്‍ ചിത്രം പകര്‍ത്തുകയോ പങ്കുവെക്കുകയോ ചെയ്താല്‍ മാതാപിതാക്കള്‍ക്കോ സന്ദര്‍ശകര്‍ക്കോ കുറഞ്ഞത് ആറ് മാസം തടവോ, 150,000 മുതല്‍ 500,000 ദിര്‍ഹം വരെ പിഴയോ, അല്ലെങ്കില്‍ ഇവ രണ്ടും കൂടിയോ ലഭിക്കാമെന്നും നിയമവിദഗ്ധര്‍ പറയുന്നു.
Recent Comments