by Midhun HP News | Nov 6, 2025 | Latest News, ദേശീയ വാർത്ത
ബിഹാർ നിയമസഭാ തെരഞ്ഞെടുപ്പിലെ ആദ്യ ഘട്ട വോട്ടെടുപ്പിന് തുടക്കമായി. പതിനെട്ട് ജില്ലകളിലായി 121 മണ്ഡലങ്ങളാണ് ഇന്ന് പോളിംഗ് ബൂത്തിലെത്തുക. രാവിലെ ഏഴുമുതൽ വൈകിട്ട് ആറുവരെയാണ് പോളിംഗ് സുരക്ഷാ ഭീഷണി നേരിടുന്ന രണ്ട് മണ്ഡലങ്ങളിൽ വൈകിട്ട് അഞ്ചിന് വോട്ടെടുപ്പ് അവസാനിക്കും.
മഹാസഖ്യത്തിന്റെ മുഖ്യമന്ത്രി സ്ഥാനാർഥി തേജസ്വി യാദവും നിലവിലെ ഉപമുഖ്യമന്ത്രി സാമ്രാട്ട് ചൗധരി ഉൾപ്പെടെ പ്രമുഖർ ഇന്ന് ജനവിധി തേടുന്നു. അടുത്ത ചൊവ്വാഴ്ചയാണ് രണ്ടാംഘട്ട വോട്ടെടുപ്പ്. പതിനാലിനാണ് വോട്ടണ്ണൽ. കനത്ത സുരക്ഷാ വിന്യാസമാണ് ജനവിധി നടക്കുന്ന 121 നിയമസഭാ മണ്ഡലങ്ങളിൽ ഒരുക്കിയിട്ടുള്ളത്.
അവസാന നിമിഷം രാഹുൽ ഗാന്ധി ഉയർത്തിയ ഹരിയാന വോട്ട് ചോരി ആരോപണം സംസ്ഥാനത്ത് കാര്യമായ ചർച്ചയായിട്ടുണ്ട്. മഹാസഖ്യം തോൽവിയുറപ്പിച്ചതുകൊണ്ടാണ് ആരോപണം എന്ന വാദമുയർത്തിയാണ് ബിജെപിയും ജെഡിയുവും പ്രതിരോധിക്കുന്നത്.
by Midhun HP News | Nov 6, 2025 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തെ തദ്ദേശ സ്ഥാപന അധ്യക്ഷന്മാരുടെ സംവരണ പട്ടിക പ്രസിദ്ധീകരിച്ച് സംസ്ഥാന തെരഞ്ഞെടുപ്പ് കമ്മീഷന്. ആറില് മൂന്ന് കോര്പ്പറേഷനുകളില് വനിതാ സംവരണമാണ്. കൊച്ചി, തൃശൂര്, കണ്ണൂര് കോര്പ്പറേഷനുകളിലാണ് വനിതകള് മേയര് സ്ഥാനത്തെത്തുക. ജില്ലാ പഞ്ചായത്തുകളില് ഏഴിടത്ത് വനിതകള്ക്കും ഒരിടത്ത് പട്ടികജാതി വിഭാഗത്തിനുമാണ് അധ്യക്ഷസ്ഥാനത്തിന് സംവരണമേര്പ്പെടുത്തിയിരിക്കുന്നത്.
തിരുവനന്തപുരം, എറണാകുളം, തൃശൂര്, കോഴിക്കോട്, വയനാട്, പത്തനംതിട്ട, കൊല്ലം, ഇടുക്കി ജില്ലകളിലാണ് സംവരണം. എറണാകുളത്താണ് പട്ടികജാതി വിഭാഗത്തില് നിന്നുളള അംഗത്തിന് സംവരണമേര്പ്പെടുത്തിയിരിക്കുന്നത്. 87 മുന്സിപ്പാലിറ്റികളില് 44 അധ്യക്ഷ സ്ഥാനങ്ങള് വനിതകള്ക്കും ആറെണ്ണം പട്ടികജാതി വിഭാഗത്തില്പ്പെട്ടവര്ക്കും ഒരെണ്ണം പട്ടിക വര്ഗ വിഭാഗത്തില്പ്പെട്ടവര്ക്കുമാണ് സംവരണം ചെയ്തിരിക്കുന്നത്.
പത്തനംതിട്ട : തിരുവല്ല (പട്ടികജാതി സ്ത്രീ), പാലക്കാട്: ഒറ്റപ്പാലം (പട്ടികജാതി സ്ത്രീ), കോഴിക്കോട്: ഫറോക്ക് (പട്ടികജാതി സ്ത്രീ), കൊല്ലം: കരുനാഗപ്പളളി (പട്ടിക ജാതി), ആലപ്പുഴ: കായംകുളം (പട്ടിക ജാതി), കോഴിക്കോട്: കൊയിലാണ്ടി (പട്ടികജാതി) ,വയനാട്: കല്പ്പറ്റ (പട്ടിക വര്ഗം), തിരുവനന്തപുരം: (നെയ്യാറ്റിന്കര സ്ത്രീ), വര്ക്കല (സ്ത്രീ), കൊല്ലം: കൊട്ടാരക്കര (സ്ത്രീ) , പത്തനംതിട്ട: അടൂര് (സ്ത്രീ), പത്തനംതിട്ട (സ്ത്രീ), പന്തളം (സ്ത്രീ), ആലപ്പുഴ: മാവേലിക്കര (സ്ത്രീ), ആലപ്പുഴ (സ്ത്രീ), കോട്ടയം: പാല (സ്ത്രീ) ഇടുക്കി: തൊടുപുഴ (സ്ത്രീ), എറണാകുളം: മുവാറ്റുപുഴ (സ്ത്രീ), കോതമംഗലം (സ്ത്രീ), പെരുമ്പാവൂര്(സ്ത്രീ), ആലുവ (സ്ത്രീ), അങ്കമാലി (സ്ത്രീ), ഏലൂര് (സ്ത്രീ), മരട് (സ്ത്രീ), തൃശൂര്: ചാലക്കുടി (സ്ത്രീ), ഗുരുവായൂര് (സ്ത്രീ), കുന്നംകുളം (സ്ത്രീ) വടക്കാഞ്ചേരി (സ്ത്രീ), പാലക്കാട്: ഷൊര്ണൂര് (സ്ത്രീ), ചെര്പുളശേരി (സ്ത്രീ), മണ്ണാര്ക്കാട് (സ്ത്രീ), മലപ്പുറം: നിലമ്പൂര് (സ്ത്രീ), താനൂര് (സ്ത്രീ), പരപ്പനങ്ങാടി (സ്ത്രീ), വളാഞ്ചേരി (സ്ത്രീ), തിരൂരങ്ങാടി (സ്ത്രീ), കോഴിക്കോട്: പയ്യോളി (സ്ത്രീ), കൊടുവളളി (സ്ത്രീ), മുക്കം(സ്ത്രീ). വയനാട്: സുല്ത്താന് ബത്തേരി (സ്ത്രീ), കണ്ണൂര് : മട്ടന്നൂര് (സ്ത്രീ), പാനൂര് (സ്ത്രീ), ആന്തൂര് (സ്ത്രീ). കാസര്കോട് (സ്ത്രീ) എന്നിങ്ങനെയാണ് വനിതാ സംവരണമുളള തദ്ദേശസ്ഥാപനങ്ങള്.
by Midhun HP News | Nov 6, 2025 | Latest News, ജില്ലാ വാർത്ത
തിരുവനന്തപുരം: കെഎസ്ആര്ടിസിയുടെ ബസ് നിരയില് പുതുചരിത്രം കുറിച്ചുകൊണ്ട്, വോള്വോ 9600 എസ്എല്എക്സ് സീരീസിലെ പുതിയ ബസ് തിരുവനന്തപുരത്ത് പരീക്ഷണയാത്ര നടത്തി. ഗതാഗത വകുപ്പ് മന്ത്രി കെ. ബി. ഗണേഷ് കുമാറാണ് വളയം പിടിച്ചത്.വോള്വോ പുതിയതായി നിര്മ്മിച്ച ഈ മോഡല്, ഒരു ട്രാന്സ്പോര്ട്ട് കോര്പ്പറേഷന് എന്ന നിലയില് ഇന്ത്യയില് ആദ്യമായി ബുക്ക് ചെയ്ത് ഡെലിവറി ലഭിച്ചത് കെഎസ്ആര്ടിസിക്കാണ് എന്നത് അഭിമാനകരമാണെന്ന് മന്ത്രി കെബി ഗണേഷ് കുമാര് പറഞ്ഞു. സ്വകാര്യ വ്യക്തികള് ഈ വണ്ടി വാങ്ങിയിട്ടുണ്ടാകാമെങ്കിലും, ഒരു ട്രാന്സ്പോര്ട്ട് കോര്പ്പറേഷന് ആദ്യമായി ബുക്ക് ചെയ്യുന്നതും ഡെലിവറി എടുക്കുന്നതും കെഎസ്ആര്ടിസിയാണെന്നത് ശ്രദ്ധേയമാണ്. 2002-ല് ആദ്യമായി വോള്വോ ഇന്ത്യയില് വന്നപ്പോഴും ആദ്യത്തെ രണ്ട് ബസുകള് വാങ്ങിയത് കെഎസ്ആര്ടിസി ആയിരുന്നു എന്ന ചരിത്രവും മന്ത്രി ഓര്മ്മിപ്പിച്ചു.
ഇന്ന് ഇന്ത്യയില് കിട്ടാവുന്നതില് ഏറ്റവുമധികം സൗകര്യങ്ങളുള്ള ഒരു വണ്ടിയാണ് കെഎസ്ആര്ടിസി വാങ്ങിയിരിക്കുന്നതെന്നും, വണ്ടിയുടെ സുരക്ഷാ സംവിധാനങ്ങള് വളരെ ഗംഭീരമാണെന്നും മന്ത്രി പറഞ്ഞു. ഒരു നിശ്ചിത ആംഗിളിന് മുകളിലേക്ക് വണ്ടി ചരിഞ്ഞാല് ഉടന് തന്നെ സഡന് ബ്രേക്ക് ചെയ്ത് വാഹനം നിര്ത്താനുള്ള സാങ്കേതികവിദ്യ ഇതിലുണ്ട്. മികച്ച സസ്പെന്ഷന് ഉള്ള സീറ്റാണ് ഡ്രൈവര്ക്ക് ലഭിക്കുന്നത്. കൂടാതെ, കുഴികളിലോ കട്ടറുകളിലോ കയറുമ്പോള് ബസ് ലിഫ്റ്റ് ചെയ്ത് ഉയര്ത്താനുള്ള ലിഫ്റ്റിംഗ് സൗകര്യവും (വേഗത 20 കി.മീ. ആയി പരിമിതപ്പെടുത്തും) ക്യാമറകള് ഉള്പ്പെടെയുള്ള മറ്റ് സാങ്കേതികവിദ്യകളും ലഭ്യമാണ്.
കെ.എസ്.ആര്.ടി.സി. കഴിഞ്ഞ രണ്ട് വര്ഷം കൊണ്ട് കൈവരിച്ച നേട്ടങ്ങളും പരിഷ്കാരങ്ങളും വിശദീകരിക്കുന്ന ഒരു പുസ്തകം മന്ത്രി പ്രകാശനം ചെയ്തു. പുതിയ ബസ് സ്റ്റേഷനുകളുടെ രൂപകല്പന, ഡിജിറ്റല് ടെക്നോളജികളുടെ ഉപയോഗം, മാലിന്യമുക്ത കേരളത്തിന്റെ ഭാഗമായത് തുടങ്ങിയ വിവരങ്ങളെല്ലാം പുസ്തകത്തില് ഉള്പ്പെടുത്തിയിട്ടുണ്ട്.
by Midhun HP News | Nov 6, 2025 | Latest News, ദേശീയ വാർത്ത
മുംബൈ: ദക്ഷിണാഫ്രിക്ക എ ടീമിനെതിരായ ഏകദിന പരമ്പരയ്ക്കുള്ള ഇന്ത്യന് എ ടീമിനെ പ്രഖ്യാപിച്ചു. തിലക് വര്മയാണ് ക്യാപ്റ്റന്. ഋതുരാജ് ഗെയ്ക്വാദ് വൈസ് ക്യാപ്റ്റനാകും. മലയാളി താരം സഞ്ജു സാംസണിനെ ടീമില് ഉള്പ്പെടുത്തിയിട്ടില്ല.
ഇഷാന് കിഷന് ആണ് പ്രധാന വിക്കറ്റ് കീപ്പര്. റിസര്വ് കീപ്പറായി പ്രഭ്സിമ്രന് സിങ്ങിനെയും ടീമില് ഉള്പ്പെടുത്തിയിട്ടുണ്ട്. ഓസ്ട്രേലിയ എയ്ക്കെതിരായ മികച്ച പ്രകടനമാണ് പ്രഭ്സിമ്രന് തുണയായത്. ദക്ഷിണാഫ്രിക്കക്കെതിരായ ടെസ്റ്റ് പരമ്പര ടീമില് നിന്നും ഒഴിവാക്കിയ പ്രസിദ്ധ് കൃഷ്ണയെ ഇന്ത്യന് എ ടീമില് ഉള്പ്പെടുത്തിയിട്ടുണ്ട്.
ഓസ്ട്രേലിയക്കെതിരായ ടി 20 പരമ്പരയില് കളിക്കുന്ന പേസ് ബൗളര്മാരായ അര്ഷ്ദീപ് സിങ്, ഹര്ഷിത് റാണ എന്നിവരും എ ടീമിലുണ്ട്. അഭിഷേക് ശര്മ്മ, റിയാന് പരാഗ് എന്നിവരെയും എ ടീമില് ഉള്പ്പെടുത്തിയിട്ടുണ്ട്. രാജ്കോട്ടില് നവംബര് 13,16, 19 തീയതികളിലാണ് ദക്ഷിണാഫ്രിക്ക എ ടീമിനെതിരായ മത്സരങ്ങള് നടക്കുക.പതിനഞ്ചംഗ ഇന്ത്യ എ ടീം: തിലക് വര്മ (ക്യാപ്റ്റന്), ഋതുരാജ് ഗെയ്ക്വാദ് (വൈസ് ക്യാപ്റ്റന്), അഭിഷേക് ശര്മ, റിയാന് പരാഗ്, ഇഷാന് കിഷന് (വിക്കറ്റ് കീപ്പര്), ആയുഷ് ബദോനി, നിഷാന്ത് സിന്ധു, വിപ്രാജ് നിഗം, മാനവ് സുതാര്, ഹര്ഷിത് റാണ, അര്ഷ്ദീപ് സിങ്, പ്രസിദ്ധ് കൃഷ്ണ, ഖലീല് അഹ്മദ്. പ്രഭ്സിമ്രന് സിങ് (വിക്കറ്റ് കീപ്പര്)
by Midhun HP News | Nov 6, 2025 | Latest News, ജില്ലാ വാർത്ത
ആറ്റിങ്ങൽ: കുടവൂർക്കോണം ഗവൺമെൻ്റ് ഹൈസ്കൂളിൽ ജില്ലാ പഞ്ചായത്ത് ഫണ്ടുപയോഗിച്ച് സജ്ജീകരിക്കുന്ന സയൻസ് ലാബിൻ്റെ നിർമ്മാണോദ്ഘാടനം ജില്ലാ പഞ്ചായത്ത് മെമ്പർ ആർ.സുഭാഷ് നിർവ്വഹിച്ചു. കടയ്ക്കാവൂർ പഞ്ചായത്ത് മെമ്പർ സദാശിവൻപിള്ള അധ്യക്ഷനായിരുന്നു. പി.ടി.എ പ്രസിഡൻ്റ് മുബാറഖ് ഹുസൈൻ, മുൻ അധ്യാപകരായ ജസി, ബിന്ദു, ജ്യോതി, സീനിയർ അസിസ്റ്റൻ്റ് ജോയ്.ജി, സൈജു, നസീർ എന്നിവർ സംസാരിച്ചു. സ്കൂൾ ഹെഡ്മാസ്റ്റർ എസ്. സജികുമാർ സ്വാഗതവും സ്റ്റാഫ് സെക്രട്ടറി ഷെറിൻ എസ് നന്ദിയും പറഞ്ഞു.
by Midhun HP News | Nov 6, 2025 | Latest News, ജില്ലാ വാർത്ത
തിരുവനന്തപുരം: പന്ത്രണ്ട് വര്ഷത്തിലൊരിക്കല് നടക്കുന്ന ഹൈന്ദവ തീര്ഥാടക സംഗമമായ കുംഭമേളയ്ക്ക് കേരളവും വേദിയാകുന്നു. ഹരിദ്വാര്, ഉജ്ജയിന്, നാസിക്, പ്രയാഗ്രാജ് എന്നീ നാല് പ്രധാന കുംഭമേളകള്ക്ക് സമാനമായി മലപ്പുറം തിരുന്നാവായയും തീര്ഥാടക സംഗമ ഭൂമിയാകും. തിരുനാവായ നാവ മുകുന്ദ ക്ഷേത്രത്തിന് മുന്നിലുള്ള ഭാരതപ്പുഴയുടെ തീരത്ത് 2026 ജനുവരി 18 മുതല് ഫെബ്രുവരി 3 വരെ കുംഭമേള അരങ്ങേറുമെന്നാണ് റിപ്പോര്ട്ടുകള്. നവംബര് 23 ന് നിശ്ചയിച്ചിരിക്കുന്ന യോഗത്തില് മേളയുടെ സംഘാടനം ഉള്പ്പെടെയുള്ള പരിപാടികള് ഏകോപിക്കാന് സ്വീകരണ സമിതിക്ക് രൂപം നല്കും.
രാജ്യത്തെ ഏറ്റവും വലിയ സന്യാസ സമൂഹമായ ജുന അഖാരയാണ് കേരളത്തിലെ കുംഭ മേളയ്ക്കും മേല്നോട്ടം വഹിക്കുകയെന്ന് ജുന അഖാരയിലെ മഹാമണ്ഡലേശ്വര് സ്വാമി ആനന്ദവനം ഭാരതി ദ ന്യൂ ഇന്ത്യന് എക്സ്പ്രസിനോട് പ്രതികരിച്ചു. കുംഭമേളയുമായി ബന്ധപ്പെട്ട സാഹചര്യങ്ങള് വിലയിരുത്തുന്നതിനായി സ്വാമി ആനന്ദവനം ബുധനാഴ്ച തിരുനാവായ ക്ഷേത്രത്തില് സന്ദര്ശനം നടത്തുകയും ചെയ്തിരുന്നു. മഹാമണ്ഡലേശ്വര് പദവിയിലെത്തുന്ന മൂന്നാമത്തെ മലയാളികൂടിയാണ് സ്വാമി ആനന്ദവനം ഭാരതി. ക്യാംപസ് രാഷ്ട്രീയത്തില് തൃശ്ശൂരിലെ എസ് എഫ് ഐ നേതാവായിരുന്ന സ്വാമി ആനന്ദവനം ഭാരതി പിന്നീട് സന്യാസം സ്വീകരിക്കുകയായിരുന്നു.
ഉത്തരേന്ത്യയിലെ കുംഭമേളയ്ക്ക് സമാനമായ ഉത്സവത്തിന്റെ പാരമ്പര്യമുള്ള നാടാണ് തിരുന്നാവായ എന്നാണ് സ്വാമി ആനന്ദവനം ഭാരതി പറയുന്നത്. ചേരമാന് പെരുമാളിന്റെ കാലത്ത് തിരുനാവായയില് മഹാ മഖം എന്ന പേരില് ഉത്സവം നടന്നിരുന്നു. ദക്ഷിണേന്ത്യയില് തിരുന്നാവായയ്ക്ക് പുറമെ തമിഴ്നാട്ടിലെ കുംഭകോണത്തും ആചാരമായി മഹാ മഖം നിലനിന്നിരുന്നു. മലയാള മാസത്തിലെ മകം നക്ഷത്രവുമായി ബന്ധപ്പെട്ടാണ് ഈ ചടങ്ങുകള് നടന്നിരുന്നത് എന്നും സ്വാമി പറയുന്നു.
പന്ത്രണ്ട് വര്ഷത്തിലൊരിക്കല് ആയിരുന്നു തിരുന്നാവായയില് മഹാ മഖം നടന്നിരുന്നത്. ഹിന്ദു ധര്മ്മം അനുസരിച്ച് യജ്ഞവും യാഗവുമായിരുന്നു ഈ ഉത്സവകാലത്ത് നടത്തിയിരുന്നത്. പുതിയ രാജാവിനെ തെരഞ്ഞെടുക്കുന്നതും ഈ സമയത്തായിരുന്നു. അവസാനത്തെ പെരുമാളായ സുന്ദരമൂര്ത്തിയുടെ ഭരണത്തിനുശേഷം, ഉത്സവത്തിന്റെ നേതൃത്വം പെരുമ്പടപ്പ് സ്വരൂപത്തിലേക്കും പിന്നീട് വള്ളുവ കോനാതിരിയിലേക്കും മാറി. പിന്നീടാണ് ചടങ്ങിന് ആയോധനരൂപം കൈവന്നതും മാമാങ്കം എന്ന നിലയിലേക്ക് മാറിയത് എന്നും അദ്ദേഹം പറയുന്നു.
തിരുന്നാവായയില് വീണ്ടും മഹാ മഖം ചടങ്ങുകള്ക്ക് തുടക്കം കുറിക്കുന്നതിനായി വര്ഷങ്ങള്ക്ക് മുന്പ് തന്നെ ശ്രമങ്ങള് ആരംഭിച്ചിരുന്നതായും സ്വാമി പറയുന്നു. 2016-ല് ആണ് വീണ്ടും ശ്രമങ്ങള് ആരംഭിച്ചത്. തിരുനാവായ ക്ഷേത്രത്തിലെ പ്രധാന പുരോഹിതന് ഭാരതപ്പുഴയുടെ തീരത്ത് നദീപൂജാ ചടങ്ങുകള് നടത്തിയാണ് ഇതിന്റെ തുടക്കം കുറിച്ചത്. കോവിഡ് കാലത്ത് ഒഴികെ ചടങ്ങുകള് എല്ലാവര്ഷവും തുടരുകയും ചെയ്തു.
2016 ല് ചടങ്ങുകള് ആരംഭിച്ചത് പ്രകാരം 2028 ല് വിപുലമായ മഹാ മഖം (കുംഭമേള) ആഘോഷിക്കാനാണ് ഇപ്പോഴത്തെ തീരുമാനം. ഇതിന് മുന്നോടിയായാണ് 2026 ലെ ചടങ്ങുകള്. അടുത്ത വര്ഷത്തെ ഉത്സവ നടത്തിപ്പുമായി ബന്ധപ്പെട്ട് മലബാര്, തിരുവിതാംകൂര് ദേവസ്വം ബോര്ഡുകളുടെ സഹകരണം ജുന അഖാര തേടും. മറ്റ് അഖാരകളില് നിന്നുള്ള വിശ്വാസികളുടെ പങ്കാളിത്തവും ഉറപ്പാക്കും. കേരളത്തിലെ ആശ്രമങ്ങളും സ്വാമിമാരും മേളയില് പങ്കാളികളാകുമെന്നും സ്വാമി ആനന്ദവനം പറഞ്ഞു.
Recent Comments