by Midhun HP News | Oct 6, 2026 | Latest News, കായികം
ഷാർജ: ലോക ലെജൻഡ്സ് ചാംപ്യൻഷിപ് മൂന്നാം സീസണിൽ നിന്നു പാകിസ്ഥാൻ പിന്മാറി. ടീമിന് പാകിസ്ഥാൻ ക്രിക്കറ്റ് ബോർഡ് എൻഒസി നൽകാത്തതിനെ തുടർന്നാണ് പിന്മാറ്റം. പാകിസ്ഥാൻ ചാംപ്യൻസ് ടീമിന് എൻഒസി നൽകണമെന്ന് ഉടമ കാമിൽ ഖാൻ അഭ്യർഥിച്ചെങ്കിലും പിസിബി നൽകാൻ സാധിക്കില്ലെന്ന ഉറച്ച നിലപാടിൽ നിന്നു. കഴിഞ്ഞ വർഷം ഇന്ത്യയുമായുണ്ടായ വിവാദങ്ങളുമായി ബന്ധപ്പെട്ട് ചില നിബന്ധനകൾ പിസിബി മുന്നോട്ടുവച്ചിരുന്നു. എന്നാൽ വേൾഡ് ചാംപ്യൻഷിപ് ഓഫ് ലെജൻഡ്സ് (ഡബ്ല്യുസിഎൽ) മാനേജ്‌മെന്റ് ഇത് അംഗീകരിച്ചില്ല. ഇതോടെയാണ് ടീമിനു എൻഒസി നൽകില്ലെന്നു പിസിബി നിലപാടെടുതത്.
പഹൽഗാം ഭീകരാക്രമണത്തിന്റെ പശ്ചാത്തലത്തിൽ കഴിഞ്ഞ സീസണിൽ പാകിസ്ഥാനെതിരെ കളിക്കാൻ ഇന്ത്യൻ ടീം വിസമ്മതിച്ചിരുന്നു. ഇതിൽ ഇന്ത്യൻ ടീം രേഖാമൂലം ഖേദം പ്രകടിപ്പിക്കണമെന്നാണ് പിസിബി മുന്നോട്ടുവച്ച ആവശ്യം. എന്നാൽ ഡബ്ല്യുസിഎൽ ഇതു നിരസിച്ചു. പിന്നാലെ ഷാഹിഫ് അഫ്രീദി ക്യാപ്റ്റനായ ടീമിന് എൻഒസി നൽകില്ലെന്ന് പിസിബി നിലപാട് എടുത്തു. ടൂർണമെന്റിൽ പങ്കെടുക്കാൻ ടീമംഗങ്ങൾ യുഎഇയിൽ എത്തിയിരുന്നു. അതിനിടെയാണ് പിസിബിയുടെ അപ്രതീക്ഷിത തീരുമാനം.
ഒക്ടോബർ 3ന് നടക്കേണ്ടിയിരുന്ന ബംഗ്ലദേശ് ചാംപ്യൻസിനെതിരെയുള്ള പാക്കിസ്ഥാന്റെ ഉദ്ഘാടന മത്സരം സാങ്കേതിക കാരണങ്ങളാൽ മാറ്റിവച്ചിരുന്നു. ഒക്ടോബർ 10നാണ് ഇന്ത്യ ചാംപ്യൻസ്– പാകിസ്ഥാൻ ചാംപ്യൻസ് മത്സരം നിശ്ചയിച്ചിരുന്നത്.
‘എൻഒസി നൽകാൻ വിസമ്മതിച്ച പാകിസ്ഥാൻ ക്രിക്കറ്റ് ബോർഡിന്റെ തീരുമാനം നിലനിൽക്കുന്ന സാഹചര്യത്തിൽ, നിലവിൽ നടക്കുന്ന വേൾഡ് ചാംപ്യൻഷിപ് ഓഫ് ലെജൻഡ്‌സിൽ പങ്കെടുക്കാൻ ടീമിന് കഴിയില്ലെന്ന് പാകിസ്ഥാൻ ചാംപ്യൻസ് ഖേദപൂർവം അറിയിക്കുന്നു. ക്രിക്കറ്റ് ഇതിഹാസങ്ങളുടെ ഈ ആഗോള കൂട്ടായ്മയിൽ പാകിസ്ഥാൻ ചാംപ്യൻസിനെ പ്രതിനിധീകരിക്കാൻ ഞങ്ങളുടെ കളിക്കാർക്ക് അവസരം ലഭിക്കാത്തതിൽ സ്വാഭാവികമായും നിരാശയുണ്ട്.’
‘പിസിബിയുടെ അധികാരത്തെയും അതിന്റെ തീരുമാനത്തെയും ഞങ്ങൾ ബഹുമാനിക്കുന്നു. ഞങ്ങളുടെ കളിക്കാർക്കും പിന്തുണയ്ക്കുന്നവർക്കും ആരാധകർക്കും അവരുടെ ക്ഷമയ്ക്കും സഹിഷ്ണുതയ്ക്കും തുടർച്ചയായ പിന്തുണയ്ക്കും ഞങ്ങൾ ആത്മാർഥമായി നന്ദി പറയുന്നു’– ടീം വ്യക്തമാക്കി.
ഇന്ത്യയും പാകിസ്ഥാനും തമ്മിലുള്ള നയതന്ത്ര ബന്ധം വഷളായതിനെ തുടർന്നാണ് 2025 ജൂലൈ- ഓഗസ്റ്റ് മാസങ്ങളിൽ നടന്ന ഡബ്ല്യുസിഎലിന്റെ ഗ്രൂപ്പ് ഘട്ട മത്സരത്തിൽ പാകിസ്ഥാനെതിരെ കളിക്കാൻ ഇന്ത്യ ചാംപ്യൻസ് വിസമ്മതിച്ചത്. ഇതാണ് തർക്കങ്ങളിലേക്ക് നയിച്ചത്. മത്സരം റദ്ദാക്കുകയും ഇരു ടീമുകൾക്കും ഓരോ പോയിന്റ് വീതം നൽകുകയും ചെയ്തു.
സെമി ഫൈനലിലും ഇന്ത്യ നിലപാട് ആവർത്തിച്ചു. അതോടെ സെമി ഉപേക്ഷിക്കുകയും പാകിസ്ഥാൻ നേരിട്ട് ഫൈനലിലേക്ക് യോഗ്യത നേടുകയും ചെയ്തു. പഹൽഗാം ഭീകരാക്രമണത്തിനു പിന്നാലെ ഇന്ത്യ നടത്തിയ ഓപ്പറേഷൻ സിന്ദൂറിന്റെ പശ്ചാത്തലത്തിലായിരുന്നു ഈ തീരുമാനം.
by Midhun HP News | Oct 6, 2026 | Latest News, കായികം
ലഖ്‌നൗ: ഇന്ത്യയും വെസ്റ്റ് ഇന്‍ഡീസും തമ്മിലുള്ള ടി20 പരമ്പരയ്ക്ക് ഇന്ന് തുടക്കം. വൈകീട്ട് ഏഴ് മുതല്‍ ലഖ്‌നൗവിലെ ഏകന സ്റ്റേഡിയത്തിലാണ് ആദ്യ പോരാട്ടം. ഏകദിന പരമ്പര നേടിയതിന്റെ ആത്മവിശ്വാസത്തിലാണ് ഇന്ത്യ ഇറങ്ങുന്നത്.
5 മത്സരങ്ങളടങ്ങിയ പരമ്പരയിലെ രണ്ടാം പോരാട്ടം ഈ മാസം 9നും മൂന്നാം മത്സരം 11നും അരങ്ങേറും. 14, 17 തീയതികളിലാണ് ശേഷിക്കുന്ന രണ്ട് പോരാട്ടങ്ങള്‍.
ഓപ്പണിങില്‍ ആര് എന്ന കണ്‍ഫ്യൂഷന്‍ തന്നെയാണ് മത്സരത്തിന് മുന്‍പ് പരിശീലകന്‍ ഗൗതം ഗംഭീറിനു മുന്നിലുള്ളത്. മലയാളി താരം സഞ്ജു സാംസണ്‍, വണ്ടര്‍ കിഡ് വൈഭവ് സൂര്യവംശി എന്നിവരില്‍ ആരെ കളിപ്പിക്കും എന്നറിയാനുള്ള കൗതുകം ആരാധകര്‍ക്ക് തുടരാം. ഏഷ്യന്‍ ഗെയിംസില്‍ വൈഭവ് ഓപ്പണറും സഞ്ജു മൂന്നാം സ്ഥാനത്തും കളിച്ചിരുന്നു.
എന്നാല്‍ വിന്‍ഡീസിനെതിരെ രണ്ട് പേരെയും ഒരുമിച്ച് കളിപ്പിക്കാന്‍ സാധ്യതയില്ല. മിന്നും ഫോമിലുള്ള അഭിഷേക് ശര്‍മയെ മാറ്റില്ലെന്നു ഉറപ്പാണ്. അഫ്ഗാനെതിരായ പരമ്പരയില്‍ രണ്ട് അര്‍ധ സെഞ്ച്വറികള്‍ നേടിയ സഞ്ജുവിനു തന്നെയാണ് നിലവില്‍ വൈഭവിനേക്കാള്‍ മുന്‍തൂക്കമുള്ളത്. വൈഭവിനോട് താന്‍ കാര്യങ്ങള്‍ വ്യക്തമായി തന്നെ പറഞ്ഞിട്ടുണ്ടെന്നും ഗംഭീര്‍ കഴിഞ്ഞ ദിവസം വെളിപ്പെടുത്തിയിരുന്നു.
ഇഷാന് കിഷന്‍, തിലക് വര്‍മ എന്നിവര്‍ ഫോമിലാണ്. ഇരുവരുടേയും സാന്നിധ്യം മധ്യനിരയ്ക്ക് കരുത്താകും. പേസ് ഓള്‍ റൗണ്ടര്‍ ശിവം ദുബെയും മികവിലേക്ക് ഉയര്‍ന്നത് ഇന്ത്യക്ക് ആശ്വാസമാണ്.
അതേസമയം പരിചയ സമ്പത്ത് അത്ര ഇല്ലാത്ത ബൗളിങ് നിര ഇന്ത്യക്ക് തലവേദനയാണ്. അര്‍ഷ്ദീപ് സിങിനു കൂട്ടായി 6 മത്സരം കളിച്ച മായങ്ക് യാദവും 3 മത്സരം കളിച്ച പ്രിന്‍സ് യാദവുമാണ് ടീമിലുള്ളത്. അക്ഷര്‍ പട്ടേല്‍, കുല്‍ദീപ് യാദവ് എന്നിവരാണ് സ്പിന്‍ ബൗളിങിന് ചുക്കാന്‍ പിടിക്കുന്നത്. ഏകദിന പരമ്പരയില്‍ മിന്നും ഫോമില്‍ പന്തെറിഞ്ഞാണ് കുല്‍ദീപ് നില്‍ക്കുന്നത്.
ടി20യില്‍ കരുത്തരാണ് വിന്‍ഡീസ്. രണ്ട് തവണ ലോക ചാംപ്യന്‍മാരായ സംഘം. ഷായ് ഹോപ് തന്നെയാണ് നായകന്‍. ഏകദിന പരമ്പരയില്‍ അപാര ബാറ്റിങുമായി കളംവാണ ഹോപിന്റെ ഫോം വിന്‍ഡീസിന് ആത്മവിശ്വാസം വര്‍ധിപ്പിക്കുന്ന ഘടകമാണ്.
റൊമാരിയോ ഷെപ്പേഡ്, റോവ്മാന്‍ പവല്‍, ഷിമ്രോണ്‍ ഹെറ്റ്‌മെയര്‍ എന്നീ പരിചയസമ്പന്നരും ടി20 ഫോര്‍മാറ്റില്‍ ടീമിലുണ്ട്. വെടിക്കെട്ട് ബാറ്റര്‍മാരുടെ സാന്നിധ്യം കരീബിയന്‍ സംഘത്തെ ലോകത്തെ ഏതൊരു ടീമിനും കടുത്ത വെല്ലുവിളി തന്നെയാണ്. ഏകദിന പരമ്പരയിലെ അവസാന പോരാട്ടത്തില്‍ ഇന്ത്യയെ ചെയ്‌സ് ചെയ്ത് വീഴ്ത്തിയതിന്റെ ആത്മവിശ്വാസവും അവര്‍ക്കുണ്ട്.
by Midhun HP News | Oct 5, 2026 | Latest News, കായികം
ചണ്ഡീഗഢ്: വെസ്റ്റ് ഇന്‍ഡീസിനെതിരായ മൂന്നാം ഏകദിനത്തില്‍ 92 റണ്‍സ് നേടി ഇന്ത്യന്‍ വെറ്ററന്‍ ഓപ്പണര്‍ രോഹിത് ശര്‍മ പുതിയ റെക്കോര്‍ഡ് സ്ഥാപിച്ചു. ഏകദിനത്തില്‍ 12,000 റണ്‍സുകള്‍ താണ്ടിയ രോഹിത് ഓപ്പണറെന്ന നിലയില്‍ 10,000 റണ്‍സും പിന്നിട്ടു.
ഓപ്പണറെന്ന നിലയില്‍ ഏകദിന ക്രിക്കറ്റില്‍ അതിവേഗം 10,000 റണ്‍സ് നേടുന്ന താരമായി രോഹിത് മാറി. 202 ഇന്നിങ്‌സുകള്‍ കളിച്ചാണ് രോഹിത് 10,000 താണ്ടിയത്.
ഓപ്പണിങ് ഇറങ്ങി 10,000 റണ്‍സ് നേടുന്ന നാലാമത്തെ താരമായും രോഹിത് തന്റെ പേര് എഴുതി വച്ചു. സച്ചിന്‍ ടെണ്ടുല്‍ക്കര്‍ (15,310 റണ്‍സ്), സനത് ജയസൂര്യ (12,740 റണ്‍സ്), ക്രിസ് ഗെയ്ല്‍ (10,179 റണ്‍സ്) എന്നിവരാണ് എലീറ്റ് പട്ടികയിലെ മറ്റ് മൂന്ന് പേര്.
വിന്‍ഡീസിനെതിരായ പരമ്പരയില്‍ മിന്നും ഫോമിലാണ് രോഹിത് ബാറ്റ് വീശിയത്. രണ്ടാം ഏകദിനത്തില്‍ ഹിറ്റ്മാന്‍ സെഞ്ച്വറി നേടിയിരുന്നു. പിന്നാലെയാണ് മൂന്നാം പോരിലെ സെഞ്ച്വറി വക്കിലെത്തിയ പ്രകടനം.
by Midhun HP News | Oct 3, 2026 | Latest News, കായികം
നഗോയ: ഏഷ്യന്‍ ഗെയിംസില്‍ പുരുഷ ഹോക്കിയില്‍ ഇന്ത്യക്ക് സ്വര്‍ണ നേട്ടം. ഫൈനലില്‍ മലേഷ്യയെ 5-1ന് തകര്‍ത്താണ് ഇന്ത്യയുടെ നേട്ടം. തുടര്‍ച്ചയായ രണ്ടാം തവണയാണ് ഇന്ത്യ ഏഷ്യന്‍ ഗെയിംസില്‍ ഇന്ത്യ സ്വര്‍ണം നേടുന്നത്. ഏഷ്യന്‍ ഗെയിംസ് ഹോക്കിയില്‍ ഇന്ത്യയുടെ അഞ്ചാം സ്വര്‍ണമാണിത്. സ്വര്‍ണത്തോടൊപ്പം ഇന്ത്യക്ക് 2028 ലെ ലോസ് ആഞ്ചലസ് ഒളിമ്പിക്‌സിലേക്ക് നേരിട്ടുള്ള യോഗ്യതയും ലഭിച്ചു.
ഫൈനലില്‍ ഇന്ത്യയുടെ ആക്രമണ മികവാണ് നിര്‍ണായകമായത്. ക്യാപ്റ്റന്‍ ഹര്‍മന്‍പ്രീത് സിങ് രണ്ട് പെനാല്‍റ്റി കോര്‍ണറുകള്‍ ഗോളാക്കി. ജുഗ്രാജ് സിങ്ങും പെനാല്‍റ്റി കോര്‍ണറില്‍ നിന്ന് ഗോള്‍ നേടി ഇന്ത്യയുടെ ലീഡ് ശക്തമാക്കി. ഹാര്‍ദിക് സിങ് പെനാല്‍റ്റി സ്പോട്ടില്‍ നിന്ന് മറ്റൊരു ഗോള്‍ നേടി. തുടര്‍ന്ന് അഭിഷേകും സുഖ്ജീത് സിങ്ങും ചേര്‍ന്ന് ഒരുക്കിയ മനോഹരമായ നീക്കത്തിനൊടുവില്‍ ഷിലാനന്ദ് ലാക്ര ഓപ്പണ്‍ പ്ലേയില്‍ നിന്ന് ഇന്ത്യയുടെ അഞ്ചാം ഗോള്‍ കണ്ടെത്തി.
മത്സരത്തിലുടനീളം ആക്രമണത്തിലും പ്രതിരോധത്തിലും മികവ് പുലര്‍ത്തിയ ഇന്ത്യ മലേഷ്യയ്ക്ക് തിരിച്ചുവരാനുള്ള അവസരം നല്‍കിയില്ല. 5-1ന്റെ ആധികാരിക ജയത്തോടെ ഇന്ത്യ സ്വര്‍ണം ഉറപ്പിക്കുകയായിരുന്നു. ഗെയിംസില്‍ 21 സ്വര്‍ണം, 27 വെള്ളി, 37 വെങ്കലം ഇങ്ങനെയാണ് ഇന്ത്യയുടെ മെഡല്‍ നില. മെഡല്‍ പട്ടികയില്‍ നാലാം സ്ഥാനത്താണ് ഇന്ത്യ എത്തിയത്.
by Midhun HP News | Oct 3, 2026 | Latest News, കായികം
നഗോയ: നഗോയ: ഏഷ്യന്‍ ഗെയിംസില്‍ ഗുസ്തിയില്‍ ഇന്ത്യക്ക് സ്വര്‍ണ നേട്ടം. ഇതോടെ ഗെയിംസില്‍ ഇന്ത്യയുടെ 20-ാം സ്വര്‍ണ നേട്ടത്തിലെത്തി. പുരുഷന്മാരുടെ 57 കിലോ ഫ്രീസ്‌റ്റൈല്‍ വിഭാഗത്തില്‍ അമന്‍ സെഹ്റാവത്താണ് സ്വര്‍ണ മെഡല്‍ നേടിയത്. ഫൈനലില്‍ ഉത്തരകൊറിയയുടെ ഹാന്‍ ചോങ് സോങ്ങിനെ 11-7ന് കീഴടക്കിയാണ് അമന്‍ കിരീടം നേടിയത്.
ആദ്യ ഘട്ടത്തില്‍ തന്നെ അമന്‍ മത്സരത്തില്‍ വ്യക്തമായ നിയന്ത്രണം നേടി. ആദ്യ പീരിയഡ് അവസാനിക്കുമ്പോള്‍ 4-1ന് മുന്നിലായിരുന്നു ഇന്ത്യന്‍ താരം. എന്നാല്‍ പിന്നീട് ഹാന്‍ ചോങ് സോംഗ് ശക്തമായി തിരിച്ചെത്തി. മത്സരം അവസാനിക്കാന്‍ ഒരു മിനിറ്റ് മാത്രം ശേഷിക്കെ സ്‌കോര്‍ 7-6 എന്ന നിലയില്‍ ഉത്തരകൊറിയന്‍ താരം അമനോട് അടുത്തെത്തി.
മത്സരം നിര്‍ണായക ഘട്ടത്തിലേക്ക് കടന്നതോടെ അമന്‍ മികച്ച തന്ത്രവും ആക്രമണവും പുറത്തെടുത്തു. അവസാന നിമിഷങ്ങളില്‍ നിര്‍ണായക ടേക്ക്ഡൗണ്‍ നേടിയ താരം എതിരാളിയെ മാറ്റില്‍ തിരിച്ച് പോയിന്റുകള്‍ സ്വന്തമാക്കി ലീഡ് 10-7 ആയി ഉയര്‍ത്തി. ബസര്‍ മുഴങ്ങുന്നതിന് തൊട്ടുമുമ്പ് ഒരു പോയിന്റ് കൂടി നേടി അമന്‍ 11-7ന്റെ വിജയം ഉറപ്പിക്കുകയായിരുന്നു.
by Midhun HP News | Oct 3, 2026 | Latest News, കായികം
നഗോയ: വനിതകള്‍ക്ക് പിന്നാലെ ഏഷ്യന്‍ ഗെയിംസ് പുരുഷ ടി20 ക്രിക്കറ്റിലും സ്വര്‍ണം നിലനിര്‍ത്തി ഇന്ത്യ. ത്രില്ലര്‍ പോരാട്ടം കണ്ട ഫൈനലില്‍ ബദ്ധവൈരികളായ പാകിസ്ഥാനെ തുരത്തിയാണ് ഇന്ത്യ സ്വര്‍ണം നിലനിര്‍ത്തിയത്. ഇന്ത്യ 19 റണ്‍സിന്റെ വിജയമാണ് പിടിച്ചെടുത്തത്. ടോസ് നേടി ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ 6 വിക്കറ്റ് നഷ്ടത്തില്‍ 211 റണ്‍സ് അടിച്ചെടുത്തു. മറുപടി പറയാനിറങ്ങിയ പാക് ടീമിന് 6 വിക്കറ്റ് നഷ്ടത്തില്‍ 192 റണ്‍സ് എടുക്കാനെ സാധിച്ചുള്ളു. ഗെയിംസില്‍ ഇന്ത്യയുടെ 19ാം സ്വര്‍ണമാണിത്.
212 റണ്‍സ് ലക്ഷ്യത്തിലേക്ക് ബാറ്റെടുത്ത പാകിസ്ഥാനായി ഹസന്‍ നവാസ് അര്‍ധ സെഞ്ച്വറിയുമായി ഇന്ത്യയെ വെല്ലുവിളിച്ച് പൊരുതിയെങ്കിലും അന്തിമ ജയത്തിലേക്ക് ടീമിനെ എത്തിക്കാന്‍ താരത്തിനു സാധിച്ചില്ല. 51 പന്തില്‍ 7 സിക്‌സും 5 ഫോറും സഹിതം ഹസന്‍ നവാസ് 96 റണ്‍സെടുത്തു.
പാകിസ്ഥാനായി മാസ് സദാഖത് മികച്ച രീതിയിലാണ് തുടക്കം നല്‍കിയത്. ക്യാപ്റ്റനും ഓപ്പണറുമായി സാഹിബ്‌സാദ ഫര്‍ഹാന്‍ തപ്പിത്തടഞ്ഞെങ്കിലും മറുഭാഗത്ത് മാസ് സദാഖത്ത് ഫോമിലായിരുന്നു. സ്‌കോര്‍ 33ല്‍ നില്‍ക്ക് ഫര്‍ഹാന്‍ മടങ്ങി. വാഷിങ്ടന്‍ സുന്ദറാണ് ഇന്ത്യക്ക് ആദ്യ വിക്കറ്റ് സമ്മാനിച്ചത്. പിന്നാലെ 36ല്‍ നില്‍ക്കെ ഉസ്മാന്‍ ഖാനെ (3) അക്ഷര്‍ പട്ടേലും പുറത്താക്കി. പവര്‍ പ്ലേ അവസാനിച്ചതിനു പിന്നാലെ സ്‌കോര്‍ 39ല്‍ നില്‍ക്കെ പാകിസ്ഥാന് മൂന്നാം വിക്കറ്റും നഷ്ടമായി. മാസ് സദാഖത്താണ് ഔട്ടായത്. താരം 23 റണ്‍സ് കണ്ടെത്തി.
പിന്നീട് നാലാം വിക്കറ്റില്‍ ഒന്നിച്ച ഹസന്‍ നവാസ്- സയിം അയൂബ് സഖ്യം പോരാട്ടം ഇന്ത്യന്‍ ക്യാംപിലേക്ക് നയിച്ചു. ഇരുവരും ചേര്‍ന്നു 87 റണ്‍സ് ചേര്‍ത്താണ് പിരിഞ്ഞത്. സയിം അയൂബിനെ മടക്കി ശിവം ദുബെയാണ് കളി വീണ്ടും ഇന്ത്യയ്ക്ക് അനുകൂലമാക്കിയത്. താരം 29 റണ്‍സെടുത്തു.
ഇന്ത്യക്കായി അക്ഷര്‍ പട്ടേല്‍, വാഷിങ്ടന്‍ സുന്ദര്‍, ശിവം ദുബെ എന്നിവര്‍ 2 വിക്കറ്റെടുത്തു.
നേരത്തെ അതിവേഗ അര്‍ധ സെഞ്ച്വറിയുമായി കളം വാണ അഭിഷേക് ശര്‍മയുടേയും തിലക് വര്‍മയുടേയും ബാറ്റിങ് കരുത്തിലാണ് ഇന്ത്യ പൊരുതാവുന്ന സ്‌കോര്‍ മുന്നില്‍ വച്ചത്. ബാറ്റിങ് തുടങ്ങിയ ഇന്ത്യക്കായി അഭിഷേക് കത്തും ഫോമിലാണ് തുടക്കം നല്‍കിയത്. അതിവേഗ അര്‍ധ സെഞ്ച്വറിയുമായി അഭിഷേക് കളം അടക്കിവാണു. 20 പന്തില്‍ 6 സിക്‌സും 3 ഫോറും സഹിതം അഭിഷേക് 52 റണ്‍സ് അടിച്ചെടുത്തു. താരത്തിന്റെ മികവില്‍ ഇന്ത്യ പവര്‍പ്ലേയില്‍ തൂക്കിയത് 36 പന്തില്‍ 81 റണ്‍സ്.
സെമിയ്ക്ക് പിന്നാലെ ഫൈനലിലും വൈഭവ് സൂര്യവംശി- അഭിഷേക് ശര്‍മ കൂട്ടുകെട്ടാണ് ഇറങ്ങിയത്. മലയാളി താരം സഞ്ജു സാംസണ്‍ മൂന്നാം സ്ഥാനത്തും ബാറ്റിങിനെത്തി. സ്‌കോര്‍ 28ല്‍ നില്‍ക്കെ ഇന്ത്യക്ക് വൈഭവിനെ നഷ്ടമായി. താരം 9 പന്തില്‍ 2 സിക്‌സുകള്‍ സഹിതം 15 റണ്‍സുമായി മടങ്ങി. പിന്നാലെ ഇറങ്ങിയ സഞ്ജുവിന് തിളങ്ങാനായില്ല. താരം 2 റണ്‍സുമായി പുറത്ത്.
സ്‌കോര്‍ 93ല്‍ നില്‍ക്കെ അഭിഷേകിനെ പുറത്താക്കി ഒടുവില്‍ പാകിസ്ഥാന് ആശ്വാസം കൊണ്ടു. പുറത്താകുമ്പോള്‍ താരം 7 സിക്‌സും 3 ഫോറും സഹിതം വെറും 28 പന്തില്‍ 61 റണ്‍സ് അടിച്ചെടുത്തിരുന്നു.
ഇഷാന് കിഷനാണ് നാലാം വിക്കറ്റായി മടങ്ങിയത്. സെമിയില്‍ ഇന്ത്യയുടെ ടോപ് സ്‌കോററായി മാറിയ ഇഷാന് ഫൈനലില്‍ ആ മികവ് ആര്‍ത്തിക്കാനായില്ല. നല്ല രീതിയില്‍ മുന്നോട്ടു പോകവെ അരാഫത് മിന്‍ഹാസിന്റെ പന്തില്‍ ഇഷാന് ക്ലീന്‍ ബൗള്‍ഡായി. 18 പന്തില്‍ 20 റണ്‍സാണ് താരം നേടിയത്. ഇഷാന് മടങ്ങി അധികം വൈകാതെ ക്യാപ്റ്റന്‍ ശ്രേയസ് അയ്യരും പുറത്തായി. ശ്രേയസ് 21 റണ്‍സാണ് സ്വന്തമാക്കിയത്.
പിന്നീട് ആറാം വിക്കറ്റില്‍ ക്രീസില്‍ ഒന്നിച്ച തിലക് വര്‍മ- ശിവം ദുബെ കൂട്ടുകെട്ടാണ് ഇന്ത്യന്‍ സ്‌കോര്‍ 200 കടത്തിയത്. 195ല്‍ നില്‍ക്കെ ആറാം വിക്കറ്റായി ശിവം ദുബെ മടങ്ങിയെങ്കിലും താരം തിലകിനൊപ്പം 62 റണ്‍സ് ബോര്‍ഡില്‍ ചേര്‍ത്തു. ദുബെ 15 പന്തില്‍ രണ്ട് വീതം സിക്‌സും ഫോറും സഹിതം 27 റണ്‍സെടുത്തു. അതിനിടെ തിലക് വര്‍മ അര്‍ധ സെഞ്ച്വറി നേടി. താരം 22 പന്തില്‍ 4 സിക്‌സും 3 ഫോറും സഹിതം 51 റണ്‍സുമായി പുറത്താകാതെ നിന്നു. കളി തീരുമ്പോള്‍ തിലകിനൊപ്പം അക്ഷര്‍ പട്ടേലും (1) പുറത്താകാതെ തുടര്‍ന്നു.
പാകിസ്ഥാനായി അഹമദ് ദനിയാല്‍, അരാഫത് മിന്‍ഹാസ് എന്നിവര്‍ 2 വീതം വിക്കറ്റുകള്‍ നേടി. സയം അയൂബ്, അബ്രാര്‍ അഹമദ് എന്നിവര്‍ ഓരോ വിക്കറ്റും സ്വന്തമാക്കി.
Recent Comments