by Midhun HP News | Nov 3, 2026 | Latest News, ദേശീയ വാർത്ത
അബുദാബി: ബിഗ് ടിക്കറ്റില്‍ ഒക്ടോബര്‍ അവസാന ആഴ്ചയിലെ നാല് ഇ-ഡ്രോ വിജയികളില്‍ മൂന്നു മലയാളികള്‍. പരസ്യ മേഖലയില്‍ ജോലി നോക്കുന്ന അനീഷ് രവീന്ദ്രദാസ് ആണ് ഒരു മലയാളി വിജയി. 18 വര്‍ഷമായി ദുബൈയിലാണ്. സുഹൃത്തുക്കളായ 10 പേര്‍ക്കൊപ്പമാണ് അദ്ദേഹം ബിഗ് ടിക്കറ്റ് എടുക്കാറുള്ളത്.
ഇത്തവണ അദ്ദേഹത്തിന്റെ സംഘം പ്രൊമോഷന്‍ പ്രയോജനപ്പെടുത്തിയാണ് ടിക്കറ്റ് എടുത്തത്. രണ്ട് ടിക്കറ്റുകള്‍ വാങ്ങിയപ്പോള്‍ അവര്‍ക്ക് നാല് ടിക്കറ്റുകള്‍ ലഭിച്ചു. സുഹൃത്താണ് സമ്മാനാര്‍ഹമായ ടിക്കറ്റ് എടുത്തതെന്ന് അനീഷ് പറഞ്ഞു. അയാളുടെ മകന്റെ ജനനത്തീയതി വച്ചുള്ള ടിക്കറ്റാണ് എടുത്തത്. സമ്മാനത്തുക തുല്യമായി വീതിക്കാനാണ് സംഘത്തിന്റെ തീരുമാനം.
സമ്മാനം നേടിയ രണ്ടാമത്തെ മലയാളി മുഹമ്മദ് അഷ്‌റഫ് മുണ്ടക്കൈ ഷംസുവാണ്. ഷാര്‍ജയിലാണ് 14 വര്‍ഷമായി അദ്ദേഹം താമസിക്കുന്നത്. സ്‌കൂള്‍ ബസ് ഡ്രൈവറായി ജോലി നോക്കുന്നു. മൂന്നു വര്‍ഷം മുന്‍പാണ് ബിഗ് ടിക്കറ്റില്‍ ആദ്യമായി പങ്കെടുത്തതെന്ന് അദ്ദേഹം പറയുന്നു. ആറ് സുഹൃത്തുക്കള്‍ക്കൊപ്പമാണ് ടിക്കറ്റ് എടുത്തത്. റാന്‍ഡമായി എടുത്ത ടിക്കറ്റിലൂടെയാണ് ഇത്തവണ ഭാഗ്യം വന്നത്.
മൂന്നാമത്തെ മലയാളിയായ വിജയി 52 വയസ്സുകാരനായ രാജേഷ് ഗോപാലന്‍ ആണ്. കുടുംബത്തോടൊപ്പം 30 വര്‍ഷമായി അദ്ദേഹം റാസ് അല്‍ ഖൈമയിലാണ് ജീവിക്കുന്നത്. ആദ്യമായി ബിഗ് ടിക്കറ്റ് കളിച്ച അദ്ദേഹം ഒരു കസിന്റെ കൂടെയാണ് ടിക്കറ്റ് എടുത്തത്. ഭാര്യയാണ് നമ്പര്‍ തെരഞ്ഞെടുത്തതെന്ന് രാജേഷ് പറയുന്നു. ഒക്ടോബര്‍ അവസാന ആഴ്ച്ചയിലെ ഇ-ഡ്രോയില്‍ വിജയിച്ച അവസാനത്തെ വിജയി ഒമാനില്‍ നിന്നുള്ള യൂസഫ് ആണ്. ആറ് വര്‍ഷമായി അദ്ദേഹം ബിഗ് ടിക്കറ്റില്‍ പങ്കെടുക്കുന്നുണ്ട്. സ്വന്തമായാണ് അദ്ദേഹം ടിക്കറ്റ് എടുക്കാറ്. യാത്ര ചെയ്യുമ്പോള്‍ 10-15 ടിക്കറ്റുകള്‍ എടുക്കുന്നതാണ് തന്റെ ശീലമെന്ന് അദ്ദേഹം പറയുന്നു.
നവംബറില്‍ വിജയിക്കാന്‍ ഒരുപാട് അവസരങ്ങളുണ്ട്. ഗ്രാന്‍ഡ് പ്രൈസ് 25 മില്യണ്‍ ദിര്‍ഹമാണ്. കൂടാതെ അഞ്ച് പേര്‍ക്ക് 100,000 ദിര്‍ഹം വീതം സമാശ്വാസ സമ്മാനങ്ങള്‍. കൂടാതെ വീക്കിലി ക്യാഷ് റിവാര്‍ഡുകള്‍, ഡ്രീം കാര്‍ ഡ്രോകള്‍, ബിഗ് സ്പിന്‍ മത്സരവും നടക്കും. ബിഗ് സ്പിന്‍ മത്സരത്തില്‍ പങ്കെടുക്കാന്‍ അവസരം ലഭിക്കുന്ന മൂന്നു പേരെ ഡിസംബര്‍ 3-ന് നടക്കുന്ന ഡ്രോയില്‍ അറിയാം. ഇവര്‍ക്ക് ജനുവരി 3-ന് ബിഗ് സ്പിന്‍ കളിക്കാം. 1 മില്യണ്‍ ദിര്‍ഹം വരെ സമ്മാനം നേടാനാണ് അവസരം.
by Midhun HP News | Nov 3, 2026 | Latest News, ദേശീയ വാർത്ത
ചെന്നൈ: മലയാള സിനിമയിലെ സീനിയർ മേക്കപ്പ്മാൻ പാണ്ഡ്യൻ ( 74 ) അന്തരിച്ചു. ചെന്നൈ വിരുഗമ്പാക്കത്തുള്ള വസതിയിൽ വച്ചായിരുന്നു അന്ത്യം. മലയാളം, തമിഴ്, തെലുഗു, കന്നഡ എന്നീ ഭാഷകളിലായി അഞ്ഞൂറോളം ചിത്രങ്ങളിൽ മേക്കപ്പ്മാനായി പ്രവർത്തിച്ചിട്ടുണ്ട്. എൻ.ടി രാമറാവു, എസ്.വി. രംഗറാവു, കൃഷ്ണ, രജനികാന്ത്, കമൽഹാസൻ, മമ്മൂട്ടി, മോഹൻലാൽ തുടങ്ങി ഒട്ടേറെ താര നായകന്മാർക്ക് കഥാപാത്രങ്ങളെ ഒരുക്കിയ പാണ്ഡ്യൻ 2001 ൽ മധുരനൊമ്പരക്കാറ്റ് എന്ന ചിത്രത്തിലൂടെ മികച്ച മേക്കപ്പ് ആർട്ടിസ്റ്റിനുള്ള കേരള സംസ്ഥാന അവാർഡ് നേടിയിട്ടുണ്ട്. സത്യൻ അന്തിക്കാട് – മോഹൻലാൽ ടീമിന്റെ ഹൃദയപൂർവമാണ് അവസാന ചിത്രം.
by Midhun HP News | Nov 3, 2026 | Latest News, കായികം
ക്രൈസ്റ്റ്ചർച്ച്: ന്യൂസിലൻഡിനെതിരായ ടെസ്റ്റ് പരമ്പരയ്ക്കൊരുങ്ങുന്ന ഇന്ത്യക്ക് ആശ്വാസം. ഓപ്പണർ യശസ്വി ജയ്സ്വാൾ ഫോമിലേക്ക് തിരിച്ചെത്തി. ന്യൂസിലൻഡ് എ ടീമിനെതിരായ പോരാട്ടത്തിൽ താരം കിടിലൻ സെഞ്ച്വറിയുമായി കളം വാണു.
രണ്ടാം അനൗദ്യോഗിക ടെസ്റ്റിന്റെ രണ്ടാം ഇന്നിങ്‌സിലാണ് യശസ്വി ശതകം കുറിച്ച് ഗംഭീര തിരിച്ചുവരവ് നടത്തിയത്. സമനിലയിൽ അവസാനിച്ച മത്സരത്തിൽ 162 പന്തിൽ 155 റൺസുമായി യശസ്വി പുറത്താകാതെ നിന്നു. 15 ഫോറും അഞ്ച് സിക്‌സും സഹിതമായിരുന്നു ബാറ്റിങ്.
കഴിഞ്ഞ മത്സരങ്ങളിൽ 17, 5, 0 എന്നിങ്ങനെയായിരുന്നു താരത്തിന്റെ സ്‌കോറുകൾ. താരത്തിന്റെ തുടരെയുള്ള പരാജയങ്ങൾ ഇന്ത്യക്കും ആശങ്കയുണ്ടാക്കുന്നതായിരുന്നു. നിർണായക സമയത്ത് ഫോമിലേക്ക് മടങ്ങിയെത്താൻ ഇന്ത്യൻ ടെസ്റ്റ് ഓപ്പണർ സാധിച്ചു. മത്സരത്തിൽ ഡീൻ ഫോക്‌സ്‌ക്രോഫ്റ്റിനെ സിക്‌സറിലേക്ക് പായിച്ചാണ് യശസ്വി സെഞ്ച്വറി പൂർത്തിയാക്കിയത്.
ജൂണിൽ അഫ്ഗാനിസ്ഥാനെതിരായ ഏകദിനത്തിൽ സെഞ്ച്വറി നേടിയതിനു ശേഷം യശസ്വി മോശം ഫോമിലൂടെയാണ് കടന്നുപോയത്. എട്ട് ഇന്നിങ്‌സുകളിൽ നിന്ന് രണ്ട് ഡക്കുകൾ ഉൾപ്പെടെ 160 റൺസ് മാത്രമാണ് താരത്തിനു ആ സമയത്ത് നേടാനായത്. ഇതോടെ താരത്തിന്റെ ടീമിലെ സ്ഥാനം വരെ ചോദ്യം ചെയ്യപ്പെട്ടു.
രണ്ടാം അനൗദ്യോഗിക ടെസ്റ്റിന്റെ ആദ്യ ഇന്നിങ്‌സിൽ ഫ്രേസർ ഷീറ്റിന്റെ പന്തിൽ എൽബിഡബ്ല്യു ആയി യശസ്വി പൂജ്യത്തിന് പുറത്തായതോടെ ആശങ്കകൾ വീണ്ടും ശക്തമായി. എന്നാൽ രണ്ടാം ഇന്നിങ്‌സിൽ യശസ്വി തന്റെ സ്വതസിദ്ധ ശൈലിയിൽ ബാറ്റ് വീശി ആത്മവിശ്വാസം വീണ്ടെടുത്തു.
by Midhun HP News | Nov 3, 2026 | Latest News, ജില്ലാ വാർത്ത
തിരുവനന്തപുരം: ശ്രീകാര്യത്ത് 17കാരൻ അഭിരാമിന്റെ കൊലപാതകത്തിൽ വൻവഴിത്തിരിവ്. കൊല ചെയ്യാനുദ്ദേശിച്ചത് അഭിരാമിനെ അല്ലെന്ന് പ്രതിയുടെ മൊഴി. ലക്ഷ്യമിട്ടത് അഭിരാമിന്റെ മറ്റൊരു സുഹൃത്തിനെ ആയിരുന്നുവെന്നും സുഹൃത്തിനെ വിളിച്ചുവരുത്താൻ വേണ്ടി അഭിരാമിനെ ഉപയോഗിക്കാൻ തീരുമാനിച്ചെന്നുമാണ് പ്രതിയുടെ മൊഴി.
എന്നാൽ തർക്കത്തിനിടെ കൊലപാതകം നടന്നു എന്ന മൊഴിയാണ് പുറത്തുവരുന്നത്. ശ്രീകാര്യം പൊലീസ് സ്റ്റേഷനിൽ വെച്ച് കമ്മീഷണറുടെ നേതൃത്വത്തിൽ നടത്തിയ വിശദമായ ചോദ്യം ചെയ്യലിലാണ് വൻ ട്വിസ്റ്റുണ്ടായിരിക്കുന്നത്. ഇന്നലെ വൈകിട്ട് പ്രതിയെ പിടികൂടിയെങ്കിലും പ്രാഥമികമായി ചോദ്യം ചെയ്ത് അച്ഛനൊപ്പം വിട്ടയച്ചിരുന്നു. ഇന്ന് ഉച്ചയ്ക്ക് വീണ്ടും വിളിച്ചുവരുത്തി ചോദ്യം ചെയ്തപ്പോഴാണ് കൊലപാതകം നടത്തിയെന്നും മൃതദേഹം പറമ്പിൽ ഉപേക്ഷിച്ചെന്നും പ്രതി മൊഴി നൽകിയത്. തുടർന്ന് മൃതദേഹം കണ്ടെത്തുകയും പ്രതിയെ സംഭവ സ്ഥലത്ത് എത്തിച്ച് തെളിവെടുക്കുകയും ചെയ്തത്.
അഭിരാം ഇൻസ്റ്റഗ്രാം വഴി നിരന്തരം മെസേജ് അയച്ച് ശല്യപ്പെടുത്തിയിരുന്നുവെന്നും ഇക്കാര്യം ആൺസുഹൃത്തിനോട് പെൺകുട്ടി പരാതി പറഞ്ഞതായും തുടർന്ന് അഭിരാമിനെ വിളിച്ചുവരുത്തി കൊലപ്പെടുത്തി എന്നുമായിരുന്നു പ്രതി ആദ്യം നൽകിയ മൊഴി. എന്നാൽ ഇപ്പോഴത്തെ മൊഴി, അഭിരാമല്ല, അഭിരാമിന്റെ മറ്റൊരു സുഹൃത്താണ് പെൺകുട്ടിയോട് ഇത്തരത്തിൽ മോശമായി പെരുമാറിയത് എന്നാണ്.
അയാളെ വിളിച്ചുവരുത്താൻ വേണ്ടി അഭിരാമിനെ ഉപയോഗിക്കാനായിരുന്നു തീരുമാനം. അതിനായിട്ടാണ് അഭിരാമിനെ വിളിച്ചു വരുത്തിയത്. തുടർന്ന് ഇവർ തമ്മിലുണ്ടായ തർക്കം കൊലപാതകത്തിലെത്തിയെന്നാണ് പ്രതി പറയുന്നത്. എന്നാൽ മൊഴി വിശദമായി പരിശോധിക്കുമെന്നാണ് പൊലീസിന്റെ പ്രതികരണം.
ഇന്ന് വൈകുന്നേരത്തോടെയാണ് അഭിരാമിന്റെ മൃതദേഹം ചാക്കിൽ കെട്ടിയ നിലയിൽ പൊലീസ് കണ്ടെത്തുന്നത്. കേസിൽ മൂന്ന് പേരാണ് ഇപ്പോള്‍ പൊലീസ് കസ്റ്റഡിയിലുള്ളത്. പ്രായപൂര്‍ത്തിയാകാത്ത ആണ്‍കുട്ടിയും പെണ്‍കുട്ടിയും ഉമര്‍ എന്നയാളുമാണ് കസ്റ്റഡിയിൽ.
by Midhun HP News | Nov 3, 2026 | Latest News, ദേശീയ വാർത്ത
ജിദ്ദ: ലോകത്തിലെ ഏറ്റവും ഉയരം കൂടിയ കെട്ടിടമെന്ന ലക്ഷ്യത്തിലേക്ക് കുതിക്കുന്ന ജിദ്ദ ടവര്‍ 120 നിലകള്‍ പിന്നിട്ട് മുന്നോട്ട്. ടവറിന്റെ മുന്‍ഭാഗത്തെ ഗ്ലാസ് ക്ലാഡിങ് പാനലുകളുടെ 14 ശതമാനവും സ്ഥാപിച്ചു കഴിഞ്ഞു. നിലവില്‍ മെക്കാനിക്കല്‍, ഇലക്ട്രിക്കല്‍, പ്ലംബിങ് ജോലികളുടെ ആദ്യഘട്ട പ്രവര്‍ത്തനങ്ങള്‍ വേഗത്തില്‍ നടക്കുകയാണെന്ന് കിങ്ഡം ഹോള്‍ഡിങ് കമ്പനി അറിയിച്ചു.
ഒരു കിലോമീറ്ററിലധികം ഉയരത്തില്‍ രൂപകല്‍പന ചെയ്ത ജിദ്ദ ടവര്‍ നിര്‍മാണം പൂര്‍ത്തിയാകുമ്പോള്‍ ദുബൈയിലെ ബുര്‍ജ് ഖലീഫയെക്കാള്‍ 180 മീറ്ററിലധികം ഉയരത്തിലായിരിക്കും ഇത്. ഇരുനൂറിലധികം നിലകളുള്ള ലോകത്തിലെ ആദ്യ കെട്ടിട സമുച്ചയമെന്ന ചരിത്രനേട്ടവും ജിദ്ദ ടവറിനെ കാത്തിരിക്കുന്നു.
ടവറിന്റെ പ്രധാന ആകര്‍ഷണമായ സ്‌കൈ ടെറസിന്റെ സ്റ്റീല്‍ നിര്‍മാണ കരാര്‍ ലഭിച്ച കമ്പനിയും പദ്ധതി പ്രദേശത്ത് പ്രവൃത്തികള്‍ ആരംഭിച്ചിട്ടുണ്ട്. നടപ്പുവര്‍ഷം അവസാനിക്കുന്നതിന് മുന്‍പ് തന്നെ കെട്ടിടത്തിന്റെ ഉയരം 500 മീറ്റര്‍ എത്തുമെന്ന് കിങ്ഡം ഹോള്‍ഡിങ് സിഇഒ തലാല്‍ ഇബ്രാഹിം അല്‍ മൈമന്‍ പറഞ്ഞു.
സൗദി ബിന്‍ലാദിന്‍ ഗ്രൂപ്പുമായി സഹകരിച്ചാണ് നിര്‍മാണം ദ്രുതഗതിയില്‍ മുന്നേറുന്നത്. 2024 ഒക്ടോബറിലാണ് ടവര്‍ പൂര്‍ത്തിയാക്കാനായി സൗദി ബിന്‍ലാദിന്‍ ഗ്രൂപ്പുമായി ജിദ്ദ ഇക്കണോമിക് കമ്പനി (ജെഇസി) ധാരണാപത്രത്തില്‍ ഒപ്പുവെച്ചത്. തുടര്‍ന്ന് 2025 ജനുവരിയില്‍ ഔദ്യോഗികമായി നിര്‍മാണ പ്രവര്‍ത്തനങ്ങളും കോണ്‍ക്രീറ്റിങ്ങും പുനരാരംഭിക്കുകയായിരുന്നു.
720 കോടി റിയാലാണ് ഈ ബൃഹദ് കരാറിന്റെ ആകെ ചെലവ് കണക്കാക്കുന്നത്. പൂര്‍ത്തിയായ നിര്‍മാണ പ്രവര്‍ത്തനങ്ങളുടെ ഭാഗിക തുകയായി ഇതിനകം 110 കോടി റിയാല്‍ നല്‍കിയിട്ടുണ്ട്. 42 മാസമാണ് കരാര്‍ കാലാവധിയായി നിശ്ചയിച്ചിരിക്കുന്നത്.
Recent Comments