ബുര്‍ജ് ഖലീഫയെ പിന്നിലാക്കും; ഒരു കിലോമീറ്ററിലധികം ഉയരം താണ്ടാന്‍ ജിദ്ദ ടവര്‍; 120 നിലകള്‍ പൂര്‍ത്തിയായി

by Midhun HP News | Nov 3, 2026 | Latest News, ദേശീയ വാർത്ത

ജിദ്ദ: ലോകത്തിലെ ഏറ്റവും ഉയരം കൂടിയ കെട്ടിടമെന്ന ലക്ഷ്യത്തിലേക്ക് കുതിക്കുന്ന ജിദ്ദ ടവര്‍ 120 നിലകള്‍ പിന്നിട്ട് മുന്നോട്ട്. ടവറിന്റെ മുന്‍ഭാഗത്തെ ഗ്ലാസ് ക്ലാഡിങ് പാനലുകളുടെ 14 ശതമാനവും സ്ഥാപിച്ചു കഴിഞ്ഞു. നിലവില്‍ മെക്കാനിക്കല്‍, ഇലക്ട്രിക്കല്‍, പ്ലംബിങ് ജോലികളുടെ ആദ്യഘട്ട പ്രവര്‍ത്തനങ്ങള്‍ വേഗത്തില്‍ നടക്കുകയാണെന്ന് കിങ്ഡം ഹോള്‍ഡിങ് കമ്പനി അറിയിച്ചു.

ഒരു കിലോമീറ്ററിലധികം ഉയരത്തില്‍ രൂപകല്‍പന ചെയ്ത ജിദ്ദ ടവര്‍ നിര്‍മാണം പൂര്‍ത്തിയാകുമ്പോള്‍ ദുബൈയിലെ ബുര്‍ജ് ഖലീഫയെക്കാള്‍ 180 മീറ്ററിലധികം ഉയരത്തിലായിരിക്കും ഇത്. ഇരുനൂറിലധികം നിലകളുള്ള ലോകത്തിലെ ആദ്യ കെട്ടിട സമുച്ചയമെന്ന ചരിത്രനേട്ടവും ജിദ്ദ ടവറിനെ കാത്തിരിക്കുന്നു.

ടവറിന്റെ പ്രധാന ആകര്‍ഷണമായ സ്‌കൈ ടെറസിന്റെ സ്റ്റീല്‍ നിര്‍മാണ കരാര്‍ ലഭിച്ച കമ്പനിയും പദ്ധതി പ്രദേശത്ത് പ്രവൃത്തികള്‍ ആരംഭിച്ചിട്ടുണ്ട്. നടപ്പുവര്‍ഷം അവസാനിക്കുന്നതിന് മുന്‍പ് തന്നെ കെട്ടിടത്തിന്റെ ഉയരം 500 മീറ്റര്‍ എത്തുമെന്ന് കിങ്ഡം ഹോള്‍ഡിങ് സിഇഒ തലാല്‍ ഇബ്രാഹിം അല്‍ മൈമന്‍ പറഞ്ഞു.

സൗദി ബിന്‍ലാദിന്‍ ഗ്രൂപ്പുമായി സഹകരിച്ചാണ് നിര്‍മാണം ദ്രുതഗതിയില്‍ മുന്നേറുന്നത്. 2024 ഒക്ടോബറിലാണ് ടവര്‍ പൂര്‍ത്തിയാക്കാനായി സൗദി ബിന്‍ലാദിന്‍ ഗ്രൂപ്പുമായി ജിദ്ദ ഇക്കണോമിക് കമ്പനി (ജെഇസി) ധാരണാപത്രത്തില്‍ ഒപ്പുവെച്ചത്. തുടര്‍ന്ന് 2025 ജനുവരിയില്‍ ഔദ്യോഗികമായി നിര്‍മാണ പ്രവര്‍ത്തനങ്ങളും കോണ്‍ക്രീറ്റിങ്ങും പുനരാരംഭിക്കുകയായിരുന്നു.

720 കോടി റിയാലാണ് ഈ ബൃഹദ് കരാറിന്റെ ആകെ ചെലവ് കണക്കാക്കുന്നത്. പൂര്‍ത്തിയായ നിര്‍മാണ പ്രവര്‍ത്തനങ്ങളുടെ ഭാഗിക തുകയായി ഇതിനകം 110 കോടി റിയാല്‍ നല്‍കിയിട്ടുണ്ട്. 42 മാസമാണ് കരാര്‍ കാലാവധിയായി നിശ്ചയിച്ചിരിക്കുന്നത്.

ഒമാന്‍ തീരത്ത് ചരക്ക് കപ്പലിനു നേരെ ആക്രണം; ഇന്ത്യന്‍ നാവികന്‍ കൊല്ലപ്പെട്ടു

by Midhun HP News | Nov 3, 2026 | Latest News, ദേശീയ വാർത്ത

ഡല്‍ഹി: ഒമാന്‍ തീരത്ത് വെച്ച് ഇന്ത്യന്‍ പതാകയുള്ള ചരക്ക് കപ്പലിനു നേരെ നടന്ന ആക്രമണത്തില്‍ ഒരു ഇന്ത്യന്‍ നാവികന്‍ കൊല്ലപ്പെട്ടു. ഗുജറാത്ത് സ്വദേശിയായ ഗന്ധര്‍ നഹിം അജിജ് എന്നയാളാണ് മരിച്ചത്. ഇന്നലെയാണ് കപ്പലിന് നേരെ ആക്രമണമുണ്ടായത്.

ആക്രമണത്തില്‍ ഒരു നാവികന്‍ കൊല്ലപ്പെട്ടതായും 13 പേരെ രക്ഷപ്പെടുത്തിയതായും കേന്ദ്ര തുറമുഖ, ഷിപ്പിങ് മന്ത്രി സര്‍ബാനന്ദ സോനോവാള്‍ അറിയിച്ചു. രക്ഷപ്പെട്ടവര്‍ക്ക് അടിയന്തര സഹായം ഉറപ്പാക്കുമെന്നും കൊല്ലപ്പെട്ട നാവികന്റെ മൃതദേഹം വേഗത്തില്‍ നാട്ടിലെത്തിക്കുമെന്നും മന്ത്രി അറിയിച്ചു.

അല്‍-ജുസുഫി എന്ന കപ്പലിന് നേരെയാണ് ഇന്നലെ ഒമാന്‍ തീരത്ത് ആക്രമണമുണ്ടായത്. 13 നാവികരെ ഒമാന്‍ കോസ്റ്റ് ഗാര്‍ഡ് രക്ഷിക്കുകയായിരുന്നെന്ന് മന്ത്രി എക്സ് പോസ്റ്റില്‍ പറഞ്ഞു. രക്ഷപ്പെട്ട നാവികരെയും മരിച്ച നാവികന്റെ ഭൗതികശരീരവും എത്രയും വേഗം നാട്ടിലെത്തിക്കുന്നതിനായി ഒമാനിലെ ഇന്ത്യന്‍ എംബസി പ്രാദേശിക അധികൃതരുമായി ബന്ധപ്പെട്ടുവരികയാണെന്ന് മന്ത്രി അറിയിച്ചു.

വിശാഖപട്ടണം എച്ച്‌പിസിഎൽ റിഫൈനറിയിൽ വൻ തീപിടിത്തം

by Midhun HP News | Nov 3, 2026 | Latest News, ദേശീയ വാർത്ത

അമരാവതി: ആന്ധ്രപ്രദേശിലെ വിശാഖപട്ടണത്തുള്ള ഹിന്ദുസ്ഥാൻ പെട്രോളിയം കോർപറേഷൻ ലിമിറ്റഡിന്റെ (എച്ച്‌പിസിഎൽ) റിഫൈനറിയിൽ വൻ തീപിടിത്തം. എണ്ണ ടാങ്കിന് സമീപമാണ് തീ പടർന്നതെന്നാണ് റിപ്പോർട്ടുകൾ. സ്ഫോടനം ഉണ്ടായോ എന്നു അധികൃതർ പരിശോധിച്ചുവരികയാണ്.

ആകാശത്തേക്ക് ഉയർന്ന വലിയ ജ്വാലകളും കറുത്ത പുകയും സമീപവാസികളിൽ വലിയ ആശങ്ക പരത്തി. സമീപത്തെ മൽക്കാപുരം, ശ്രീഹരിപുരം തുടങ്ങിയ വ്യവസായ മേഖലകളിലും തീപിടിത്തം പരിഭ്രാന്തിക്ക് ഇടയാക്കി. അപകടത്തിലേക്ക് നയിച്ചത് എന്താണെന്നു വ്യക്തമായിട്ടില്ല. ആളപായമില്ലെന്നാണ് പുറത്ത് വരുന്ന റിപ്പോർട്ടുകൾ.

സ്ഥിതിഗതികൾ നിയന്ത്രണവിധേയമാക്കാൻ എച്ച്പിസിഎല്ലിന്റെയും അഗ്നിശമന സേനയുടെയും വിവിധ സംഘങ്ങൾ സ്ഥലത്തെത്തിയിട്ടുണ്ട്. തീ ടാങ്കിനുള്ളിൽ തന്നെ ഒതുങ്ങിനിന്നതിനാൽ മറ്റ് ഭാഗങ്ങളിലേക്ക് പടർന്നില്ലെന്ന് വിശാഖപട്ടണം പൊലീസ് കമ്മീഷണർ വ്യക്തമാക്കി. സംഭവത്തെ തുടർന്ന് പ്രദേശത്ത് സുരക്ഷ ശക്തമാക്കുകയും പൊലീസ് സംഘത്തെ വിന്യസിക്കുകയും ചെയ്തു.