by Midhun HP News | Sep 28, 2026 | Latest News
തിരുവനന്തപുരം: നിയമസഭ കയ്യാങ്കളിക്കേസിന്റെ വിചാരണ നവംബര്‍ മൂന്നിന് ആരംഭിക്കും. തിരുവനന്തപുരം ചീഫ് ജുഡീഷ്യല്‍ മജിസ്‌ട്രേറ്റ് കോടതിയിലാണ് വിചാരണ നടക്കുക. കയ്യാങ്കളി നടന്ന് 11 വര്‍ഷത്തിന് ശേഷമാണ് വിചാരണ ആരംഭിക്കുന്നത്. കേസിലെ ഒന്നാം സാക്ഷിയും നിയമസഭ സെക്രട്ടറിയുമായിരുന്ന ശാര്‍ങ്ഗധരനെ കോടതി വിസ്തരിക്കും.
കൂടാതെ ദൃശ്യങ്ങള്‍ പകര്‍ത്തിയ ആള്‍, ഡിവിആര്‍ പകര്‍ത്തിയ എഞ്ചിനീയര്‍ എന്നിവരെയും വിസ്തരിക്കും. കേസിന്റെ സ്‌പെഷല്‍ പബ്ലിക് പ്രോസിക്യൂട്ടറായി അഡ്വ. സന്തോഷ് കുമാറിനെ സര്‍ക്കാര്‍ നിയമിച്ചിരുന്നു. നിയമസഭ കയ്യാങ്കളിക്കേസില്‍, കഴിഞ്ഞ സര്‍ക്കാരിന്റെ കാലത്ത് വിചാരണ തടയാന്‍ പ്രതികള്‍ സുപ്രീംകോടതി വരെ സമീപിച്ചിരുന്നു. കേസ് റദ്ദാക്കണമെന്ന ആവശ്യം തള്ളിയ സുപ്രീംകോടതി, വിചാരണ നേരിടാന്‍ ഉത്തരവിടുകയായിരുന്നു.
മുന്‍ യുഡിഎഫ് സര്‍ക്കാരിന്റെ കാലത്താണ്, കേരള നിയമസഭയ്ക്ക് നാണക്കേടായ കയ്യാങ്കളി ഉണ്ടാകുന്നത്. 2015 മാര്‍ച്ച് 13ന് അന്നത്തെ ധനകാര്യമന്ത്രി കെ എം മാണി ബജറ്റ് അവതരിപ്പിക്കുന്നത് തടയാന്‍ എല്‍ഡിഎഫ് എംഎഎല്‍മാര്‍ നടത്തിയ പ്രതിഷേധവും തുടര്‍ന്നുണ്ടായ കയ്യാങ്കളിയുമാണ് കേരളത്തിന് നാണക്കേടായി മാറിയത്. പൊതുമുതല്‍ നശിപ്പിച്ചു എന്നതടക്കമുള്ള കുറ്റങ്ങളാണ് പ്രതികളായ ഇടതുപക്ഷ എംഎല്‍എമാര്‍ക്കെതിരെ ചുമത്തിയിട്ടുള്ളത്.
സ്പീക്കറുടെ വേദിയിൽ അതിക്രമിച്ചുകയറി കസേര, കംപ്യൂട്ടറുകൾ, മൈക്ക്, ഇലക്ട്രോണിക് പാനലുകൾ എന്നിവ തകർത്ത് 2,20,093 രൂപയുടെ പൊതുമുതൽ നശിപ്പിച്ചെന്നാണ് കേസ്. മുൻമന്ത്രിമാരായ വി ശിവൻകുട്ടി, കെ ടി ജലീൽ, ഇ.പി.ജയരാജൻ, കെ അജിത്, കെ കുഞ്ഞഹമ്മദ് മാസ്റ്റർ, സി കെ സദാശിവന്‍ എന്നിവരാണ് കേസിലെ പ്രതികൾ. ഇതിൽ കെ അജിത് സിപിഐയിൽ നിന്നും ബിജെപിയിലേക്ക് മാറിയിരുന്നു. കേസ് പിൻവലിക്കാനുള്ള എൽഡിഎഫ് സർക്കാരിന്റെ അപ്പീൽ 2021 ജൂലൈയിലാണ് സുപ്രീം കോടതി തള്ളിയത്.
by Midhun HP News | Sep 28, 2026 | Latest News
തിരുവനന്തപുരം: അന്താരാഷ്ട്ര ഏകദിന ക്രിക്കറ്റില്‍ ഇന്നലെ സൂപ്പര്‍ സണ്‍ഡേയായിരുന്നു. 3 വ്യത്യസ്ത സ്‌റ്റേഡിയങ്ങളില്‍ അരങ്ങേറിയ 3 ഏകദിന പോരാട്ടങ്ങളില്‍ പിറന്നത് 6 സെഞ്ച്വറികള്‍! ഇതില്‍ മൂന്നെണ്ണം തിരുവനന്തപുരം കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തിലാണെങ്കില്‍ രണ്ടെണ്ണം അങ്ങകലെ ദക്ഷിണാഫ്രിക്കയിലെ ജൊഹന്നാസ്ബര്‍ഗില്‍. ഒന്ന് ലണ്ടനിലും.
ഇന്ത്യ- വെസ്റ്റ് ഇന്‍ഡീസ്, ദക്ഷിണാഫ്രിക്ക- ഓസ്‌ട്രേലിയ, ഇംഗ്ലണ്ട്- ശ്രീലങ്ക പോരാട്ടങ്ങളിലാണ് 6 സെഞ്ച്വറികള്‍ കണ്ടത്. വെസ്റ്റ് ഇന്‍ഡീസിന്റെ ജസ്റ്റിന്‍ ഗ്രീവ്‌സ് കന്നി ഏകദിന സെഞ്ച്വറി അടിച്ചപ്പോള്‍ പിന്നാലെ ബാറ്റെടുത്ത ഇന്ത്യക്കായി ഇതിഹാസ താരം വിരാട് കോഹ്‌ലി 55ാം സെഞ്ച്വറി തൂക്കി. ഇന്ത്യന്‍ ക്യാപ്റ്റന്‍ ശുഭ്മന്‍ ഗില്ലാണ് ശതകം നേടിയ മറ്റൊരു താരം. ഗില്ലിന്റെ പത്താം ഏകദിന സെഞ്ച്വറിയാണ് കാര്യവട്ടത്ത് പിറന്നത്.
ഓസ്‌ട്രേലിയക്കെതിരായ പോരാട്ടത്തില്‍ ദക്ഷിണാഫ്രിക്കയുടെ ഡേവിഡ് മില്ലറും ക്യാപ്റ്റന്‍ ടെംബ ബവുമയുമാണ് സെഞ്ച്വറി സ്വന്തമാക്കിയത്. ഓസ്‌ട്രേലിയന്‍ ഓപ്പണര്‍മാരായ ട്രാവിസ് ഹെഡിനും ക്യാപ്റ്റന്‍ മിച്ചല്‍ മാര്‍ഷിനും 16 റണ്‍സിലാണ് സെഞ്ച്വറി നഷ്ടമായത്. ഇരുവരും ഈ മത്സരത്തില്‍ 84 റണ്‍സ് വീതമാണ് അടിച്ചത്.
ഇംഗ്ലണ്ട് ഓപ്പണര്‍ ടോം ബാന്‍ഡന്‍ ആണ് ശതകം കടന്ന മറ്റൊരു താരം. താരത്തിന്റെ കന്നി ഏകദിന സെഞ്ച്വറി കൂടിയാണിത്.
കാര്യവട്ടത്ത് ഇന്ത്യ- വിന്‍ഡീസ് ബാറ്റര്‍മാര്‍ ചേര്‍ന്നു 595 റണ്‍സാണ് മൊത്തം അടിച്ചത്. ജൊഹന്നാസ് ബര്‍ഗില്‍ ദക്ഷിണാഫ്രിക്ക- ഓസ്‌ട്രേലിയ ബാറ്റര്‍മാര്‍ ചേര്‍ന്ന് 666 റണ്‍സും ബോര്‍ഡില്‍ ചേര്‍ത്തു. ഇംഗ്ലണ്ട് ശ്രീലങ്ക പോരാട്ടത്തില്‍ ഇംഗ്ലണ്ട് 355 റണ്‍സ് അടിച്ചു. എന്നാല്‍ ശ്രീലങ്കയ്ക്ക് 132 റണ്‍സ് മാത്രമാണ് നേടായനായത്. ഈ മത്സരത്തില്‍ 487 റണ്‍സാണ് മൊത്തം പിറന്നത്.
ജസ്റ്റിന്‍ ഗ്രീവ്‌സ്
ഇന്ത്യക്കെതിരായ പോരാട്ടത്തില്‍ ടോസ് നഷ്ടപ്പെട്ട് ബാറ്റിങിനു ഇറങ്ങിയ വിന്‍ഡീസിനായി ഓപ്പണര്‍മാര്‍ മികച്ച തുടക്കമാണ് നല്‍കിയത്. ജസ്റ്റിന്‍ ഗ്രീവ്‌സ് തന്റെ കന്നി സെഞ്ച്വറിയുമായി പോരാട്ടം ഇന്ത്യന്‍ ക്യാംപിലേക്ക് നയിച്ചു. താരം 108 പന്തില്‍ 12 ഫോറുകള്‍ സഹിതം 101 റണ്‍സെടുത്തു. വിന്‍ഡീസ് 295 റണ്‍സാണ് ഇന്ത്യയ്ക്ക് മുന്നില്‍ ലക്ഷ്യം വച്ചത്.
ശുഭ്മന്‍ ഗില്‍
296 റണ്‍സ് വിജയ ലക്ഷ്യത്തിലേക്ക് ബാറ്റേന്തിയ ഇന്ത്യക്കായി ഗില്‍- രോഹിത് ശര്‍മ ഓപ്പണിങ് മികച്ച തുടക്കമാണ് നല്‍കിയത്. രോഹിത് 32 റണ്‍സില്‍ പുറത്തായെങ്കിലും ഒരറ്റത്ത് പിടിച്ചു നിന്ന ഗില്‍ 108 പന്തില്‍ 13 ഫോറും ഒരു സിക്‌സും സഹിതം 110 റണ്‍സെടുത്താണ് മടങ്ങിയത്.
വിരാട് കോഹ്‌ലി
ഇന്ത്യന്‍ ജയം അനായാസമാക്കിയ സെഞ്ച്വറിയാണ് കോഹ്‌ലി കാര്യവട്ടത്ത് അടിച്ചത്. വെറും 88 പന്തില്‍ 9 സിക്‌സും 11 ഫോറും സഹിതം 139 റണ്‍സുമായി കോഹ്‌ലി പുറത്താകാതെ നിന്നു. ഒപ്പം ഏകദിനത്തില്‍ അതിവേഗം 15,000 റണ്‍സ് നേടുന്ന താരമെന്ന റെക്കോര്‍ഡും ഇന്ത്യന്‍ ഇതിഹാസം സ്വന്തമാക്കി. അവസാന രണ്ട് പന്തുകളും സിക്‌സര്‍ പറത്തി കോഹ്‌ലി ഇന്ത്യയെ ജയത്തിലെത്തിച്ചു.
ടെംബ ബവുമ
ഓസ്‌ട്രേലിയക്കെതിരായ രണ്ടാം ഏകദിനത്തില്‍ പ്രോട്ടീസ് അടിച്ചെടുത്തത് 9 വിക്കറ്റ് നഷ്ടത്തില്‍ 365 റണ്‍സെന്ന കൂറ്റന്‍ സ്‌കോര്‍. ക്യാപ്റ്റന്‍ ടെംബ ബവുമ കരിയറിലെ ആറാം ഏകദിന സെഞ്ച്വറി തൂക്കി ഒരറ്റത്ത് നിന്നു. താരം 116 പന്തില്‍ 10 ഫോറും 2 സിക്‌സും സഹിതം 103 റണ്‍സടിച്ചു.
ഡേവിഡ് മില്ലര്‍
ഒരറ്റത്ത് ബവുമ ചെറുത്തു നിന്നപ്പോള്‍ അഞ്ചാമനായി എത്തിയ മില്ലര്‍ തല്ലിത്തകര്‍ക്കാനുള്ള മൂഡിലായിരുന്നു. താരം 93 പന്തില്‍ 12 ഫോറും 9 സിക്‌സും സഹിതം 142 റണ്‍സെടുത്തു. താരത്തിന്റെ എട്ടാം ഏകദിന സെഞ്ച്വറിയാണ് ജൊഹന്നാസ്ബര്‍ഗില്‍ പിറന്നത്. മത്സരത്തില്‍ കൂറ്റന്‍ സ്‌കോര്‍ പിന്തുടര്‍ന്ന ഓസ്‌ട്രേലിയ പൊരുതി വീണു. അവരുടെ പോരാട്ടം 333 റണ്‍സില്‍ അവസാനിച്ചു. ദക്ഷിണാഫ്രിക്ക 32 റണ്‍സിന് മത്സരം ജയിക്കുകയും ചെയ്തു. ജയത്തോടെ 3 മത്സരങ്ങളടങ്ങിയ പരമ്പര പ്രോട്ടീസ് 2-0ത്തിന് ഉറപ്പിക്കുകയും ചെയ്തു.
ടോം ബാന്‍ഡന്‍
ശ്രീലങ്കക്കെതിരെ 105 പന്തില്‍ 16 ഫോറും 5 സിക്‌സും തൂക്കി 126 റണ്‍സടിച്ചാണ് ബാന്‍ഡന്‍ കന്നി ഏകദിന സെഞ്ച്വറിയില്‍ എത്തിയത്. താരത്തിന്റെ മികവില്‍ ഇംഗ്ലണ്ട് 355 റണ്‍സ് ബോര്‍ഡില്‍ ചേര്‍ക്കുകയും ചെയ്തു. എന്നാല്‍ ലങ്കന്‍ പോരാട്ടം വെറും 29.1 ഓവറില്‍ 132 റണ്‍സില്‍ അവസാനിച്ചു. ഇംഗ്ലണ്ടിന് 223 റണ്‍സിന്റെ കൂറ്റന്‍ ജയം.
by Midhun HP News | Sep 28, 2026 | Latest News
തിരുവനന്തപുരം: അയൽ സംസ്ഥാനങ്ങളിലെ മഴക്കെടുതി വിളവെടുപ്പിനെയും വരവിനെയും ബാധിച്ചതോടെ സംസ്ഥാനത്ത് പച്ചക്കറി വില കുതിച്ചു ഉയരുന്നു. ബീൻസ്, പയർ, ചെറിയ ഉള്ളി എന്നിവയുടെ വില കിലോയ്ക്ക് നൂറ് രൂപ കടന്നു. വെളുത്തുള്ളിയ്ക്ക് മാർക്കറ്റിൽ കിലോയ്ക്ക് 220 രൂപയായി.
ബീൻസ് കിലോയ്ക്ക് 120 രൂപയാണ് വില. പയറിനും വില വർധിച്ചിട്ടുണ്ട്. 140 രൂപയിലേക്ക് എത്തിയിരിക്കുകയാണ് പയർ വില. ചെറിയ ഉള്ളിയുടെ വില നൂറു രൂപയിൽ എത്തിയിരിക്കുകയാണ്. ബീൻസിന് 30 രൂപയും പയറിന് 40 രൂപയും ചെറിയ ഉള്ളിക്ക് 40 രൂപയുമാണ് കിലോയ്ക്ക് കൂടിയത്. സവാള, തക്കാളി, പച്ചമുളക്, ഉരുളക്കിഴങ്ങ് എന്നി മറ്റു പച്ചക്കറികളുടെ ചില്ലറ വില വലിയ മാറ്റമില്ലാതെ തുടരുകയാണ്. വരുംദിവസങ്ങളിൽ ഉരുളക്കിഴങ്ങിനും വില കൂടാൻ സാധ്യതയുണ്ടെന്നാണ് വിലയിരുത്തൽ.
അയൽ സംസ്ഥാനങ്ങളിലെ മഴക്കെടുതിയും വെള്ളപ്പൊക്കവും പച്ചക്കറികളുടെ വിളവെടുപ്പിനെയും വരവിനെയും കാര്യമായി ബാധിച്ചിട്ടുണ്ട്. ഇതാണ് വില വർധനയ്ക്കുള്ള പ്രധാന കാരണമെന്ന് വ്യാപാരികൾ പറയുന്നു. പച്ചക്കറികളുടെ ലഭ്യത കുറഞ്ഞതോടെ വില വർധന രൂക്ഷമാവുകയായിരുന്നു. സംസ്ഥാനത്തെ വിപണികളിലേക്ക് എത്തുന്ന പച്ചക്കറികളിൽ വലിയൊരു പങ്കും ഇതരസംസ്ഥാനങ്ങളിൽ നിന്നാണ്. ഇവയുടെ വരവ് കുറയുന്നത് വിലയിൽ ഇനിയും മാറ്റം വരാൻ ഇടയാക്കിയേക്കും. ഓണത്തിന് പിന്നാലെ പച്ചക്കറി വില അനിയന്ത്രിതമായി ഉയർന്നിരുന്നു. പിന്നീട് കുറഞ്ഞ വിലയാണ് ഒരിടവേളയ്ക്ക് ശേഷം വീണ്ടും വർധിച്ചത്.
by Midhun HP News | Sep 28, 2026 | Latest News
ചണ്ഡീഗഢ്: പഞ്ചാബിലെ ലവ്‌ലി പ്രൊഫഷണല്‍ യൂണിവേഴ്‌സിറ്റിയിലെ വിദ്യാർഥി പ്രതിഷേധം അക്രമാസക്തമായതിനെ തുടർന്ന് സർവകലാശാല അടച്ചിടാൻ തീരുമാനം. 10 ദിവസത്തേക്ക് ആണ് സർവകലാശാല അടച്ചത്. കഴിഞ്ഞ ദിവസം വിദ്യാർഥികളും പൊലീസും തമ്മിലുണ്ടായ ഏറ്റുമുട്ടലിൽ നിരവധി പേർക്ക് പരിക്കേറ്റിരുന്നു. അക്രമങ്ങളെ തുടർന്ന് സർവകലാശാലയുടെ സുരക്ഷ കേന്ദ്ര സേന ഏറ്റെടുത്തിട്ടുണ്ട്.
സർവകലാശാലയിലെ ഗേൾസ് ഹോസ്റ്റലിൽ വെച്ച് ലൈംഗികാതിക്രമത്തിന് ഇരയായെന്ന പരാതി അവഗണിച്ചതിനെ തുടർന്ന് വിദ്യാർത്ഥിനി ആത്മഹത്യ ചെയ്തെന്ന് ആരോപിച്ചാണ് പ്രതിഷേധം ആരംഭിച്ചത്.
ശനിയാഴ്ച രാത്രി ക്യാംപസിൽ സംഘര്‍ഷാവസ്ഥ ഉടലെടുത്തതിന് പിന്നാലെ വിദ്യാര്‍ഥികള്‍ ദേശീയപാത ഉപരോധിക്കുകയും സര്‍വകലാശാലാ കെട്ടിടങ്ങള്‍ക്കും മറ്റ് സ്ഥാപനങ്ങള്‍ക്ക് കേടുപാടുകൾ വരുത്തുകയും ചെയ്തു. ഞായറാഴ്ച വിദ്യാര്‍ഥി പ്രതിനിധികളുമായും സര്‍വകലാശാലാ അധികൃതരുമായും പൊലീസ് നടത്തിയ ചര്‍ച്ചയും വിജയം കണ്ടില്ല.
വിദ്യാർഥികൾ ദേശീയപാത ഉപരോധിച്ചതാണ് പൊലീസുമായുള്ള സംഘർഷം രൂക്ഷമാക്കിയത്. രണ്ട് പൊലീസ് ജീപ്പുകളും നിരവധി വാഹനങ്ങളും അഗ്നിക്കിരയാക്കി. ഇതിനിടെ ആയുധങ്ങളുമായി പുറത്തുനിന്നെത്തിയ ആളുകൾ പെൺകുട്ടികളുടെ ഹോസ്റ്റലിലേക്ക് കയറി. ഇവർ പെൺകുട്ടികളെ ആക്രമിക്കുകയും ലാപ്ടോപ്പുകൾ അടക്കമുള്ളവ കൈക്കലാക്കുകയും ചെയ്തു എന്ന് വിദ്യാർഥികൾ പറയുന്നു. വിദ്യാർഥികളുടെ ആരോപണത്തിൽ പൊലീസ് അന്വേഷണം ആരംഭിച്ചിട്ടുണ്ട്.
by Midhun HP News | Sep 28, 2026 | Latest News
പോസ്റ്റ് ഓഫീസിന്റെ ജനപ്രിയ ലഘു സമ്പാദ്യ പദ്ധതിയാണ് ടൈം ഡെപ്പോസിറ്റ് സ്‌കീം. ബാങ്ക് എഫ്ഡിയുമായി താരതമ്യം ചെയ്യുമ്പോള്‍ കൂടുതല്‍ മെച്ചപ്പെട്ട റിട്ടേണ്‍ ആണ് ഇത് നല്‍കുന്നത്. ടൈം ഡെപ്പോസിറ്റില്‍ മൂന്ന് വര്‍ഷ കാലാവധി ലക്ഷ്യമിട്ടാണ് നിക്ഷേപിക്കുന്നതെങ്കില്‍ 7.1 ശതമാനം പലിശയാണ് ലഭിക്കുക. അഞ്ചുവര്‍ഷത്തേയ്ക്ക് നിക്ഷേപിക്കുകയാണെങ്കില്‍ 7.5 ശതമാനം പലിശയാണ് ലഭിക്കുക. ജൂലൈ- സെപ്റ്റംബര്‍ പാദത്തിലെ പലിശനിരക്ക് ആണ് ഇത്. ഓരോ മൂന്ന് മാസം കൂടുമ്പോഴും കേന്ദ്രസര്‍ക്കാര്‍ പലിശനിരക്ക് നിര്‍ണയിക്കാറുണ്ട്.
മൂന്ന് വര്‍ഷത്തേയ്ക്ക്
മൂന്ന് വര്‍ഷത്തേയ്ക്ക് അഞ്ചുലക്ഷം രൂപ നിക്ഷേപിക്കുകയാണെങ്കില്‍ വര്‍ഷംതോറും 36,456 രൂപയാണ് ലഭിക്കുക. അതായത് മൂന്ന് വര്‍ഷം കഴിഞ്ഞാല്‍ പലിശയിനത്തില്‍ മാത്രം 1,09,369 രൂപയാണ് ലഭിക്കുക. അങ്ങനെയെങ്കില്‍ മൊത്തത്തില്‍ 6,09,369 രൂപയാണ് മൂന്ന് വര്‍ഷം കഴിഞ്ഞാല്‍ കൈയില്‍ കിട്ടുക.
അഞ്ചുവര്‍ഷത്തേയ്ക്ക്
ഇനി അഞ്ചുവര്‍ഷത്തേയ്ക്കാണ് നിക്ഷേപിക്കുന്നതെങ്കില്‍ കാലാവധി കഴിഞ്ഞാല്‍ പലിശയിനത്തില്‍ മാത്രം 192,840 രൂപയാണ് ലഭിക്കുക. അതായത് അഞ്ചുവര്‍ഷം കഴിഞ്ഞാല്‍ ഏകദേശം ഏഴു ലക്ഷത്തോളം രൂപയാണ് കൈയില്‍ കിട്ടുക.
Recent Comments