by Midhun HP News | Sep 25, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തെ പരിസ്ഥിതി ലോല പ്രദേശ ( ഇഎസ്എ) പട്ടികയില്‍ നിന്നും ജനവാസ മേഖലയെ ഒഴിവാക്കണമെന്ന് സര്‍ക്കാര്‍. പരിസ്ഥിതി ലോല മേഖലാ വിസ്തൃതി കുറയ്ക്കണം. തോട്ടങ്ങളെയും കൃഷി സ്ഥലങ്ങളെയും ജനവാസ മേഖലകളെയും പൂര്‍ണമായും ഒഴിവാക്കിക്കൊണ്ടും, വന മേഖലകളില്‍ മാത്രം ഇഎസ്എ നിര്‍ണയിച്ചുകൊണ്ടും അന്തിമ വിജ്ഞാപനം പുറപ്പെടുവിക്കണമെന്നാണ് സംസ്ഥാന സര്‍ക്കാരിന്റെ ആവശ്യമെന്ന് മന്ത്രി സണ്ണി ജോസഫ് വ്യക്തമാക്കി.
കേരളത്തിന്റെ പരിസ്ഥിതി ലോല മേഖല 9993.7 ചതുരശ്ര കിലോമീറ്ററാണ്. ഇതില്‍ 9,107 ചതുരശ്ര കിലോമീറ്റര്‍ വനമേഖലയും 886.7 ചതുരശ്ര കിലോമീറ്റര്‍ വനേതര മേഖലയുമാണ്. 2014 മുതല്‍ 2026 ജൂലൈ 27 വരെ പ്രസിദ്ധീകരിച്ചിട്ടുള്ള ഏഴു കരട് വിജ്ഞാപനങ്ങളിലും കേരളത്തിന്റെ ഇഎസ്എ, കസ്തൂരിരംഗന്‍ റിപ്പോര്‍ട്ട് പ്രകാരം പ്രസിദ്ധീകരിച്ച 13,108 ച. കി. മി. അല്ലെന്ന് മന്ത്രി പറഞ്ഞു. ഇതില്‍ നിന്നും ഇഎസ്എ 9993 ആക്കി കുറയ്ക്കാന്‍ കേരളത്തിന് ഇതിനോടകം സാധിച്ചിട്ടുണ്ട്.
വനേതര പ്രദേശമെന്ന് വിജ്ഞാപനത്തില്‍ പറയുന്ന 886.7 ചതുരശ്ര കിലോമീറ്റര്‍ കൂടി ഒഴിവായിക്കിട്ടിയാല്‍ കേരളത്തിന്റെ അവശേഷിക്കുന്ന ആശങ്ക പൂര്‍ണമായി പരിഹരിക്കപ്പെടും. ജനവാസമേഖലകളെയും തോട്ടങ്ങളെയും കൃഷിയിടങ്ങളെയും ഒഴിവാക്കണമെന്നാണ് സര്‍ക്കാരിന്റെ വാദം. കേരളത്തിന്റെ ഇഎസ്എ സംസ്ഥാന ജൈവവൈവിധ്യ ബോര്‍ഡിന്റെ വെബ്‌സൈറ്റില്‍ പ്രസിദ്ധീകരിക്കുന്നതാണെന്നും നോട്ടിഫിക്കേഷനില്‍ വ്യക്തമാക്കിയിട്ടുണ്ടെന്നും മന്ത്രി സണ്ണി ജോസഫ് പറഞ്ഞു.
എന്നാല്‍ കേരളത്തിന്റെ ഇഎസ്എ കരട് വിജ്ഞാപനത്തിലുള്ള 9993.7 ചതുരശ്ര കിലോമീറ്ററില്‍ നിന്നും കുറച്ച് 8590.69 ചതുരശ്ര കിലോമീറ്ററായി നിര്‍ണയിക്കണമെന്നാണ് കേരള സര്‍ക്കാര്‍ ആവശ്യം ഉന്നയിക്കുന്നത്. ജനവാസ മേഖകളെയും തോട്ടങ്ങളെയും ഒഴിവാക്കി, വനമേഖലിയല്‍ മാത്രം ഇഎസ്എ നിര്‍ണയിച്ചുകൊണ്ട് അന്തിമ വിജ്ഞാപനം പുറപ്പെടുവിക്കണമെന്നുമാണ് സര്‍ക്കാര്‍ ആവശ്യപ്പെടുന്നത്. ജനങ്ങളുടെ ആശങ്കകള്‍ സര്‍ക്കാര്‍ പരിശോധിച്ചുവെന്നും, പരിഹാര നിര്‍ദേശങ്ങള്‍ കേന്ദ്രസര്‍ക്കാരിനെ അറിയിച്ചുവെന്നും മന്ത്രി സണ്ണി ജോസഫ് കൂട്ടിച്ചേര്‍ത്തു.
കേന്ദ്ര പരിസ്ഥിതി ലോല പ്രദേശങ്ങളായി ( ഇഎസ്എ) കേന്ദ്രത്തിന്റെ ഏഴാമത്തെ കരട് വിജ്ഞാപനത്തില്‍ ഉള്‍പ്പെടുത്തിയ 131 വില്ലേജുകളില്‍ 33 എണ്ണത്തെ ഒഴിവാക്കണമെന്ന നിര്‍ദേശമാണ് കേരളം കേന്ദ്രസര്‍ക്കാരിനെ അറിയിച്ചിട്ടുള്ളത്. കേന്ദ്ര പരിസ്ഥിതി മന്ത്രാലയത്തിന് ഇതുസംബന്ധിച്ച റിപ്പോര്‍ട്ട് സമര്‍പ്പിച്ചിട്ടുണ്ട്. കോട്ടയം ജില്ലയിലെ നാലു വില്ലേജുകള്‍ പൂര്‍ണമായും, ഇടുക്കി ജില്ലയിലെ 51 വില്ലേജുകളില്‍ പകുതിയിലേറെയും ഒഴിവാക്കണമെന്നാണ് നിര്‍ദേശത്തിലുള്ളത്.
by Midhun HP News | Sep 25, 2026 | Latest News, ദേശീയ വാർത്ത
ഡല്‍ഹി: ദീര്‍ഘകാല വൈദ്യുതി കരാര്‍ റദ്ദാക്കിയതിനെതിരെ കേരളസര്‍ക്കാര്‍ സമര്‍പ്പിച്ച ഹര്‍ജി സുപ്രീംകോടതി തിങ്കളാഴ്ച പരിഗണിക്കും. ഹര്‍ജി അടിയന്തരമായി പരിഗണിക്കണമെന്ന കേരളത്തിന്റെ ആവശ്യം കോടതി അംഗീകരിക്കുകയായിരുന്നു. കേരളം അഭിമുഖീകരിക്കുന്ന വലിയ ഊര്‍ജ്ജ പ്രതിസന്ധി ചൂണ്ടിക്കാട്ടിയാണ്, ഹര്‍ജി അടിയന്തരമായി പരിഗണിക്കണമെന്ന് സംസ്ഥാന സര്‍ക്കാര്‍ ആവശ്യപ്പെട്ടത്.
ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് കേരള സര്‍ക്കാരിന്റെ ഹര്‍ജി പരിഗണിക്കുന്നത്. ദീര്‍ഘകാല വൈദ്യുതി കരാര്‍ റദ്ദാക്കിയതിലൂടെ സംസ്ഥാനം വലിയ സാമ്പത്തിക നഷ്ടം നേരിടുന്നു. ഇതുവരെ സംസ്ഥാനത്തിന് 12, 570 കോടി രൂപയുടെ നഷ്ടമുണ്ടായതായും സംസ്ഥാന സര്‍ക്കാര്‍ ഹര്‍ജിയില്‍ ചൂണ്ടിക്കാട്ടുന്നു. കേരളത്തിന് കുറഞ്ഞ വിലയ്ക്ക് വൈദ്യുതി ലഭിക്കുന്നില്ലെന്നും ഹര്‍ജിയില്‍ പറയുന്നു.
വൈദ്യുതി റെഗുലേറ്ററി അപ്പലേറ്റ് ബോഡിയാണ് കരാര്‍ റദ്ദാക്കിയത്. ഇതിനെതിരെ സര്‍ക്കാര്‍ സുപ്രീംകോടതിയില്‍ അപ്പീല്‍ നല്‍കിയിരുന്നു. എന്നാല്‍ അപ്പീലില്‍ സുപ്രീംകോടതി വാദം കേട്ടിരുന്നില്ല. നിലവിലെ വൈദ്യുതി പ്രതിസന്ധിയുടെ പശ്ചാത്തലത്തിലാണ് ഹര്‍ജി അടിയന്തരമായി പരിഗണിക്കണമെന്ന് ആവശ്യപ്പെട്ടത്. മുതിര്‍ന്ന അഭിഭാഷകര്‍ കേരളത്തിന് വേണ്ടി സുപ്രീംകോടതിയില്‍ ഹാജരാകും.
by Midhun HP News | Sep 25, 2026 | Latest News, കേരളം
കൊച്ചി: അനിശ്ചിതത്വങ്ങള്‍ക്കൊടുവില്‍ മഞ്ഞപ്പടയ്ക്ക് പുതിയ ഉടമകള്‍ വരുന്നു. ദുബായ് ആസ്ഥാനമായി പ്രവര്‍ത്തിക്കുന്ന കണ്‍സോര്‍ഷ്യമാണ് കേരള ബ്ലാസ്റ്റേഴ്സിന്റെ പുതിയ മാനേജ്‌മെന്റ് എന്നാണ് റിപ്പോര്‍ട്ട്. തിങ്കളാഴ്ചയ്ക്കുള്ളില്‍ ഇതു സംബന്ധിച്ച പ്രഖ്യാപനം ഉണ്ടായേക്കും.
കണ്‍സോര്‍ഷ്യത്തില്‍ മലയാളികള്‍ ഭാഗമല്ലെന്നാണ് സൂചന. മാനേജ്‌മെന്റ് കൈമാറ്റത്തിന്റെ പേപ്പര്‍ വര്‍ക്കുകള്‍ അവസാനഘട്ടത്തിലാണെന്നാണ് റിപ്പോര്‍ട്ടുകള്‍. ബ്ലാസ്റ്റേഴ്സ് കൊച്ചി വിടുമെന്നും, കോഴിക്കോടോ, മലപ്പുറമോ ഹോം ഗ്രൗണ്ടായി സ്വീകരിക്കും തുടങ്ങിയ വാര്‍ത്തകളും പ്രചരിച്ചിരുന്നു.
എന്നാല്‍ ഈ സീസണിലും കൊച്ചി ജവഹര്‍ലാല്‍ നെഹ്‌റു സ്റ്റേഡിയത്തില്‍ തന്നെ ബ്ലാസ്റ്റേഴ്സ് കളിക്കാനാണ് പുതിയ ഉടമകളും തീരുമാനിച്ചതെന്നാണ് വിവരം. ഒക്ടോബര്‍ പത്താം തീയതിയാണ് ഇക്കൊല്ലത്തെ ഐഎസ്എല്‍ സീസണ്‍ ആരംഭിക്കുന്നത്. മറ്റു ടീമുകളെല്ലാം ഐഎസ്എല്‍ സീസണിനുള്ള മുന്നൊരുക്കങ്ങള്‍ അന്തിമഘട്ടത്തിലാണ്.
ബ്ലാസ്റ്റേഴ്‌സിനായി ഈ സീസണില്‍ കളിക്കേണ്ട താരങ്ങള്‍ സംബന്ധിച്ച് പുതിയ മാനേജ്‌മെന്റിനുള്ളില്‍ ധാരണയായതായി റിപ്പോര്‍ട്ടുണ്ട്. പല താരങ്ങളുമായും മാനേജ്‌മെന്റ് ബന്ധപ്പെട്ടിട്ടുണ്ട്. അഡ്രിയാന്‍ ലൂണയും ടീമില്‍ ഉണ്ടായേക്കുമെന്നാണ് സൂചന. ക്ലബ് ഉടമകള്‍ സംബന്ധിച്ച് ഔദ്യോഗിക പ്രഖ്യാപനം ഉണ്ടാകുന്നതിന് പിന്നാലെ തന്നെ, ടീമിന്റെ പരിശീലനവും ആരംഭിച്ചേക്കും.
കേരള ബ്ലാസ്റ്റേഴ്സിന് പുതിയ നേരത്തെ ഹൈദരാബാദ് അസ്ഥാനമായി പ്രവർത്തിച്ചിരുന്ന നിംഗ്ഗാഡ ഗ്രൂപ്പിൻ്റെ മാഗ്നം സ്പോർട്സായിരുന്നു കേരള ബ്ലാസ്റ്റേഴ്സിൻ്റെ ഉടമസ്ഥവകാശം നേടിയിരുന്നത്. കഴിഞ്ഞ സീസണിൽ സാമ്പത്തികമായി വലിയ പ്രതിസന്ധി നേരിട്ടതോടെയാണ് മാഗ്നം ഗ്രൂപ്പ് കേരള ബ്ലാസ്റ്റേഴ്സിൻ്റെ ഉടമസ്ഥവകാശം കൈമാറാൻ തീരുമാനിച്ചത്. നിഖിൽ ഭരദ്വാജ്, തെലുങ്ക് സിനിമാ താരങ്ങളായ ചിരഞ്ജീവി, അക്കിനേനി നാഗാർജുന അടക്കമുള്ളവരുടെ കൺസോർഷ്യമാണ് ബ്ലാസ്റ്റേഴ്സിന്റെ ഉടമസ്ഥരായി ഉണ്ടായിരുന്നത്.
by Midhun HP News | Sep 25, 2026 | Latest News, കേരളം
യുണൈറ്റഡ് ഫോറം ഓഫ് ബാങ്ക് യൂണിയൻസിന്റെ (UFBU) നേതൃത്വത്തിൽ സെപ്റ്റംബർ 28 മുതൽ 30 വരെ മൂന്ന് ദിവസത്തെ രാജ്യവ്യാപക ബാങ്ക് പണിമുടക്ക് പ്രഖ്യാപിച്ചിരിക്കുന്ന സാഹചര്യത്തിൽ, ഉപഭോക്താക്കൾക്കായി സ്റ്റേറ്റ് ബാങ്ക് ഓഫ് ഇന്ത്യ (SBI) നിർണ്ണായക മുന്നറിയിപ്പ് നൽകി.
പണിമുടക്ക് ദിനങ്ങളിൽ അത്യാവശ്യ ബാങ്കിംഗ് സേവനങ്ങൾ ലഭ്യമാക്കാൻ ബാങ്ക് പരമാവധി ശ്രമിക്കുമെങ്കിലും, ശാഖകൾ വഴിയുള്ള സേവനങ്ങളിൽ തടസ്സങ്ങൾ നേരിടാൻ സാധ്യതയുള്ളതിനാൽ ഇടപാടുകാർ മുൻകൂട്ടി തയ്യാറെടുക്കണമെന്ന് എസ്‌.ബി.ഐ അഭ്യർത്ഥിച്ചു.
ഇടപാടുകാർ ശ്രദ്ധിക്കേണ്ട പ്രധാന കാര്യങ്ങൾ:
മുൻകൂട്ടി പൂർത്തിയാക്കുക: ശാഖകൾ സന്ദർശിച്ച് ചെയ്യേണ്ട പ്രധാനപ്പെട്ട ബാങ്കിംഗ് ഇടപാടുകൾ സെപ്റ്റംബർ 28-ന് മുൻപായി ചെയ്തു തീർക്കുക.
പണ ആവശ്യങ്ങൾക്ക്: പണം പിൻവലിക്കുന്നതിനും നിക്ഷേപിക്കുന്നതിനും എ.ടി.എം (ATM), എ.ഡി.ഡബ്ല്യു.എം (ADWM) മിഷനുകൾ ഉപയോഗിക്കുക.
കസ്റ്റമർ സർവീസ് പോയിന്റുകൾ: പ്രാദേശിക കസ്റ്റമർ സർവീസ് സെന്ററുകളുടെ (CSP) സേവനങ്ങൾ പ്രയോജനപ്പെടുത്തുക.
ഡിജിറ്റൽ ബാങ്കിംഗ്: സാധാരണ ബാങ്കിംഗ് ആവശ്യങ്ങൾക്ക് ഇൻ്റർനെറ്റ് ബാങ്കിംഗ്, യോനോ (YONO) ആപ്പ്, മൊബൈൽ ബാങ്കിംഗ്, യു.പി.ഐ (UPI) തുടങ്ങിയ ഡിജിറ്റൽ മാധ്യമങ്ങൾ ഉപയോഗിക്കുക.
പണിമുടക്ക് മൂലമുണ്ടാകുന്ന തടസ്സങ്ങളിൽ ഖേദിക്കുന്നതായും ഉപഭോക്താക്കളുടെ പൂർണ്ണ സഹകരണം പ്രതീക്ഷിക്കുന്നതായും എസ്‌.ബി.ഐ അറിയിച്ചു.
by Midhun HP News | Sep 25, 2026 | Latest News, കേരളം
കൊച്ചി: എറണാകുളം ജില്ലയിലെ വിവിധ പ്രദേശങ്ങളില്‍ നിന്നായി വന്‍ മയക്കു മരുന്നുവേട്ട. കൊച്ചിയില്‍ രണ്ടിടങ്ങളില്‍ നിന്നായി 305 ഗ്രാം എംഡിഎംഎ പിടികൂടി. അഫ്‌സല്‍, ജസ്‌ന സൂസന്‍, ജൂബി എന്നിവര്‍ പിടിയിലായി. ഇവരില്‍ നിന്നും 198 ഗ്രാം എംഎഡിഎംഎ കണ്ടെടുത്തു.
റെയില്‍വേ സ്‌റ്റേഷന്‍ പരിസരത്തു നിന്നാണ് 107 ഗ്രാം എംഡിഎംഎയുമായി വിഷ്ണു ബി പൈ എന്നയാള്‍ പിടിയിലായത്. ഇതും വില്‍പ്പനയ്ക്കായി എത്തിച്ചതാണെന്നാണ് പൊലീസിന്റെ നിഗമനം. വീണ്ടും കൊച്ചിയില്‍ വ്യാപകമായി ലഹരിയെത്തുന്നു എന്ന രഹസ്യവിവരത്തിന്റെ അടിസ്ഥാനത്തിലായിരുന്നു പൊലീസിന്റെ പരിശോധന.
ആലുവയില്‍ ഹെറോയിനുമായി രണ്ട് ഇതരസംസ്ഥാനക്കാരും പിടിയിലായിട്ടുണ്ട്. അസം സ്വദേശികളായ ജാബിര്‍ അലി, വഹിദുള്‍ ഇസ്ലാം എന്നിവരാണ് പിടിയിലായത്. ഓപ്പറേഷന്‍ തൂഫാനെത്തുടര്‍ന്ന് ഇടയ്ക്ക് മന്ദീഭവിച്ച, ലഹരി വില്‍പ്പന ആലുവയിലും കൊച്ചി കേന്ദ്രീകരിച്ചും വീണ്ടും സജീവമാകുന്നു എന്ന രഹസ്യറിപ്പോര്‍ട്ടുകളുടെ അടിസ്ഥാനത്തില്‍ പൊലീസ് പരിശോധനകള്‍ ഊര്‍ജ്ജിതമാക്കിയിട്ടുണ്ട്.
Recent Comments