by Midhun HP News | Sep 23, 2026 | Latest News
ഡല്‍ഹി: വോട്ടര്‍പട്ടിക ശുദ്ധീകരണ നടപടികള്‍ക്കിടെ വോട്ടര്‍മാരുടെ പേരുകള്‍ നീക്കം ചെയ്യുന്നതുള്‍പ്പെടെയുള്ള നിരവധി വിഷയങ്ങള്‍ തെരഞ്ഞെടുപ്പ് കമ്മിഷണര്‍മാരായ സുഖ്ബീര്‍ സിങ് സന്ധുവും വിവേക് ജോഷിയും ഉന്നയിച്ചിരുന്നെങ്കിലും, രാജ്യവ്യാപകമായി നടപ്പാക്കുന്ന വോട്ടര്‍പട്ടികയുടെ പ്രത്യേക തീവ്രപരിഷ്‌കരണ (എസ്‌ഐആര്‍) നടപടിയുമായി ബന്ധപ്പെട്ട തീരുമാനങ്ങളില്‍ തെരഞ്ഞെടുപ്പ് കമ്മീഷന്‍ ഏകകണ്ഠമായിരുന്നുവെന്ന് ഉദ്യോഗസ്ഥര്‍. എസ്‌ഐആര്‍ നടപടി പുരോഗമിക്കവേ, 10 മാസത്തിനിടെ തെരഞ്ഞെടുപ്പ് കമ്മീഷന്റെ നടപടികളില്‍ ഇരുവരും 14 തവണ എതിര്‍പ്പ് രേഖപ്പെടുത്തിയെന്ന മാധ്യമ റിപ്പോര്‍ട്ടിന് പിന്നാലെയാണ് ഉദ്യോഗസ്ഥരുടെ പ്രതികരണം.
വോട്ടര്‍പട്ടിക ശുദ്ധീകരണത്തിന്റെയും വോട്ടര്‍ ഡേറ്റാബേസ് കൈകാര്യം ചെയ്യുന്നതിന്റെയും ഭാഗമായി, പേരുകള്‍ നീക്കം ചെയ്യുന്നതുമായി ബന്ധപ്പെട്ട തീരുമാനങ്ങളില്‍ സന്ധുവും ജോഷിയും ആശങ്കകള്‍ ഉന്നയിച്ചിരുന്നുവെന്ന് ഉദ്യോഗസ്ഥര്‍ വ്യക്തമാക്കി. എന്നാല്‍, എസ്‌ഐആര്‍ ഉള്‍പ്പെടെ തെരഞ്ഞെടുപ്പ് കമ്മിഷന്റെ എല്ലാ തീരുമാനങ്ങളും മുഖ്യ തെഞ്ഞെടുപ്പ് കമ്മീഷണറുടെയും മറ്റ് രണ്ട് കമ്മിഷണര്‍മാരുടെയും അംഗീകാരത്തോടെ ഏകകണ്ഠമായാണ് എടുത്തതെന്ന് കമ്മീഷന്‍ വൃത്തങ്ങള്‍ വ്യക്തമാക്കി.
കമ്മീഷന്റെ പ്രവര്‍ത്തനത്തെ നിയന്ത്രിക്കുന്ന നിയമവും സുപ്രീംകോടതി വിധിയും പരമാവധി തീരുമാനങ്ങള്‍ ഏകകണ്ഠമായി എടുക്കണമെന്നാണ് വ്യക്തമാക്കുന്നതെന്ന് ഉദ്യോഗസ്ഥര്‍ പറഞ്ഞു. ആവശ്യമായ സാഹചര്യത്തില്‍ ഭൂരിപക്ഷ അഭിപ്രായം പിന്തുടരണമെന്നും നിയമവ്യവസ്ഥ വ്യക്തമാക്കുന്നതായി അവര്‍ ചൂണ്ടിക്കാട്ടി. മൂന്ന് അംഗങ്ങളുള്ള തെരഞ്ഞെടുപ്പ് കമ്മീഷനില്‍ തന്നെ എസ്‌ഐആര്‍ സംബന്ധിച്ച വിഷയങ്ങളില്‍ സന്ധുവും ജോഷിയും പലതവണ ചോദ്യങ്ങള്‍ ഉന്നയിച്ചിരുന്നുവെന്നാണ് ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തത്.
മൂന്ന് കമ്മിഷണര്‍മാരുടെയും മേല്‍നോട്ടത്തിലാണ് രാജ്യവ്യാപകമായി എസ്‌ഐആര്‍ നടപ്പാക്കുന്നത്. എന്നാല്‍, കഴിഞ്ഞ 10 മാസത്തിനിടെ കുറഞ്ഞത് 14 തവണ ഔദ്യോഗികമായി ഇരുവരും എതിര്‍പ്പ് രേഖപ്പെടുത്തിയെന്നാണ് റിപ്പോര്‍ട്ട്. തങ്ങളുടെ അറിവില്ലാതെ എടുത്ത തീരുമാനങ്ങള്‍ക്കും പുറപ്പെടുവിച്ച ഉത്തരവുകള്‍ക്കുമെതിരെയായിരുന്നു ഈ എതിര്‍പ്പുകള്‍. ഒരേ ദിവസം തന്നെ നാല് തവണ ഇത്തരത്തില്‍ എതിര്‍പ്പ് രേഖപ്പെടുത്തിയതായും റിപ്പോര്‍ട്ടില്‍ പറയുന്നു. എസ്‌ഐആര്‍ നടപടികളിലെ ക്രമക്കേടുകളുടെ പേരിൽ പ്രതിപക്ഷ പാര്‍ട്ടികള്‍ തെരഞ്ഞെടുപ്പ് കമ്മിഷനെ വിമര്‍ശിച്ചിരുന്നു. ബിജെപിയോടും സഖ്യകക്ഷികളോടും രാഷ്ട്രീയമായി യോജിക്കാത്ത വോട്ടര്‍മാരെ ലക്ഷ്യമിട്ടാണ് നടപടിയെന്നായിരുന്നു പ്രതിപക്ഷത്തിന്റെ ആരോപണം.
by Midhun HP News | Sep 23, 2026 | Latest News
കൊച്ചി: കാക്കനാട് ഹോസ്റ്റലിൽ താമസിച്ചിരുന്ന യുവതിയെ ഭർത്താവ് പുറത്തേക്ക് വിളിച്ചുവരുത്തി പെട്രോൾ ഒഴിച്ച് തീകൊളുത്തിയതായി പരാതി. ഗുരുതരമായി പൊള്ളലേറ്റ ആലപ്പുഴ ചാത്തനാട് കൊച്ചുപറമ്പിൽ ജയശ്രീയെ (42) സ്വകാര്യ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് പത്തനംതിട്ട സ്വദേശി അനിൽകുമാറിനെ പൊലീസ് പിടികൂടി. ഇന്നലെ രാത്രി ഒൻപതോടെ എൻജിഒ ക്വാർട്ടേഴ്സിന് സമീപത്തെ അമ്പാടിമൂലയിലുള്ള സ്വകാര്യ ഹോസ്റ്റലിന് മുന്നിലായിരുന്നു സംഭവം. അനിൽ കുമാർ ജയശ്രീയെ ഹോസ്റ്റലിൽനിന്ന് പുറത്തേക്ക് വിളിച്ചുവരുത്തിയ ശേഷം മുഖത്ത് പെപ്പർ സ്പ്രേ പ്രയോഗിക്കുകയും കൈയിൽ കരുതിയിരുന്ന കാനിലെ പെട്രോൾ ശരീരത്തിലും മുഖത്തും ഒഴിച്ച് തീകൊളുത്തുകയും ചെയ്തതായാണ് പൊലീസിന് ലഭിച്ച വിവരം. സ്ഥലത്തുനിന്ന് ഓടി രക്ഷപ്പെടാൻ ശ്രമിച്ച അനിൽകുമാറിനെ നാട്ടുകാർ പിടികൂടി പൊലീസിന് കൈമാറുകയായിരുന്നു. സംഭവത്തിനിടെ അനിൽകുമാറിന്റെ കൈക്കും പൊള്ളലേറ്റിട്ടുണ്ട്.
by Midhun HP News | Sep 23, 2026 | Latest News
കോഴിക്കോട്: നാടക – ചലച്ചിത്ര നടി സാവിത്രി ശ്രീധരന്‍ (83) അന്തരിച്ചു. വാര്‍ധക്യ സഹജമായ അസുഖങ്ങളെ തുടര്‍ന്ന് ചികിത്സയിലായിരുന്നു. കോഴിക്കോട് മാങ്കാവിലെ വീട്ടില്‍ വച്ചായിരുന്നു അന്ത്യം.
2018 ല്‍ സുഡാനി ഫ്രം നൈജീരിയ എന്ന ചിത്രത്തിലൂടെയാണ് അവര്‍ സിനിമാ രംഗത്ത് പ്രശസ്തയായത്. ഈ ചിത്രത്തിന് 66-ാമത് ദേശീയ ചലച്ചിത്ര അവാര്‍ഡുകളില്‍ പ്രത്യേക പരാമര്‍ശം ലഭിച്ചു. വൈറസ് (2019), ഡാകിനി (2018) എന്നിവയാണ് അവരുടെ മറ്റ് പ്രധാന ചിത്രങ്ങള്‍.
വിഖ്യാത നാടകകൃത്ത് കെ ടി മുഹമ്മദിന്‍റെ നിരവധി നാടകങ്ങളില്‍ അഭിനയിച്ചിട്ടുണ്ട്. കലിംഗ, ചിരന്തന തിയറ്റേഴ്സ്, കോഴിക്കോട് സ്റ്റേജ് ഇന്ത്യ തുടങ്ങിയ നാടക ട്രൂപ്പുകളുടെ ഭാഗമായി വേഷമിട്ടിട്ടുണ്ട്.
by Midhun HP News | Sep 23, 2026 | Latest News
ചിറയിൻകീഴ്, കൊച്ചാലുംമൂട്, പുരവൂർ എന്നീ സ്ഥലങ്ങൾ കേന്ദ്രീകരിച്ച് വിലകൂടിയ കേബിൾ വയറുകളും ബിഎസ്എൻഎൽ വക കേബിൾ വയർ ഉൾപ്പെടെ സ്ഥിരമായി മോഷണം നടത്തുന്ന മോഷ്ടാക്കളായ മുഹമ്മദ് ആസിഫ്, മുഹമ്മദ് നവജീഷ് എന്നിവരെ ചിറയിൻകീഴ് പോലീസ് അതിസാഹസികമായി പിടികൂടി.
ഈ സ്ഥലങ്ങളിൽ വർദ്ധിച്ചുവരുന്ന സ്ഥിരം മോഷണങ്ങൾ തടയാൻ ആറ്റിങ്ങൽ ഡിവൈഎസ്പിയുടെ നിർദ്ദേശാനുസരണം ചിറയിൻകീഴ് എസ് എച്ച് ഒ അൻസറിന്റെ നേതൃത്വത്തിലുള്ള പോലീസ് സംഘം വിവിധയിനം സ്കോഡുകൾ രൂപീകരിച്ച് രാത്രികാലങ്ങളിൽ ഈ പ്രദേശങ്ങളുടെ എല്ലാ കോണുകളിലും ജീപ്പ് പെട്രോളിങ്ങും, ബൈക്ക് പെട്രോളിങ്ങും നടത്തിയാണ് പ്രതികളെ പിടികൂടിയത്.
എസ് ഐമാരായ ശ്രീകുമാർ, രാജീവ്, സനൽ, എ എസ് ഐമാരായ നാസർ, ഹാഷിം, പ്രസന്നകുമാർ, സിപിഒമാരായ സിയാദ്, അനൂപ്, അഭിലാഷ്, അരുൺരാജ്, ബിനു എന്നിവരടങ്ങുന്ന സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
by Midhun HP News | Sep 23, 2026 | Latest News
പത്തനംതിട്ട: കൈയിലെ കൊഴുപ്പുനീക്കല്‍ ശസ്ത്രക്രിയയ്ക്ക് പിന്നാലെ ഗുരുതരാവസ്ഥയിലായ യുവതി മരിച്ചു. വെങ്കോട്ട മുണ്ടുകുഴി പുതുപ്പറമ്പില്‍ വിജി വിദ്യ (45) ആണ് മരിച്ചത്. തിരുവല്ലയിലെ സ്വകാര്യ ക്ലിനിക്കില്‍ നടത്തിയ ശസ്ത്രക്രിയയിലുണ്ടായ പിഴവാണ് മരണകാരണമെന്ന് ബന്ധുക്കള്‍ ആരോപിച്ചു. ഇക്കാര്യം ചൂണ്ടിക്കാട്ടി ബന്ധുക്കള്‍ തിരുവല്ലാ പൊലീസില്‍ പരാതി നല്‍കി.
16നാണ് കൈയിലെ കൊഴുപ്പ് നീക്കുന്നതിന് ശസ്ത്രക്രിയ നടത്തിയത്. എന്നാല്‍, ശസ്ത്രക്രിയയ്ക്ക് പിന്നാലെ വിദ്യയുടെ ആരോഗ്യസ്ഥിതി വഷളാവുകയായിരുന്നുവെന്ന് ബന്ധുക്കള്‍ പറയുന്നു. ആരോഗ്യനില ഗുരുതരമായതിനെത്തുടര്‍ന്ന് തിരുവല്ലയിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. തുടര്‍ന്ന് ചികിത്സയിലിരിക്കെ ഇന്നലെ രാത്രിയാണ് മരണം സംഭവിച്ചത്.
ചികിത്സയില്‍ പിഴവ് സംഭവിച്ചിട്ടില്ലെന്നും ശസ്ത്രക്രിയയ്ക്കിടെ വിദ്യയ്ക്ക് ഹൃദയാഘാതം സംഭവിച്ചതിനാലാണ് ആരോഗ്യസ്ഥിതി ഗുരുതരമായതെന്നുമാണ് സ്വകാര്യ ക്ലിനിക്കിന്റെ വിശദീകരണം.
Recent Comments