by Midhun HP News | Sep 23, 2026 | Latest News
മലയാള സിനിമയുടെ കാരണവർ നടൻ മധുവിന് ഇന്ന് 93-ാം പിറന്നാൾ. ആറു പതിറ്റാണ്ടിലേറെ നീണ്ട സിനിമാ ജീവിതത്തിൽ നായകനായും സ്വഭാവനടനായും വില്ലനായും സംവിധായകനായും നിർമാതാവായും മധു മലയാള സിനിമയിൽ തന്റേതായൊരു അധ്യായം എഴുതിച്ചേർത്തു. 1933 സെപ്റ്റംബർ 23ന് തിരുവനന്തപുരത്ത് ജനിച്ച മാധവൻ നായരാണ് പിന്നീട് മലയാളികൾക്ക് പ്രിയപ്പെട്ട മധുവായത്.
ഇപ്പോഴിതാ മധുവിന് പിറന്നാൾ ആശംസകൾ നേർന്നിരിക്കുകയാണ് നടൻ മമ്മൂട്ടി. മധുവിന്റെ വലിയ ആരാധകൻ കൂടിയാണ് മമ്മൂട്ടി. ‘ഹാപ്പി ബർത്ത് ഡേ മൈ സൂപ്പർ സ്റ്റാർ’- എന്നാണ് മധുവിനൊപ്പമുള്ള ചിത്രം പങ്കുവച്ച് മമ്മൂട്ടി കുറിച്ചിരിക്കുന്നത്. മമ്മൂട്ടിയോടുള്ള സ്നേഹത്തെക്കുറിച്ച് അഭിമുഖങ്ങളിലുൾപ്പെടെ മധു വാചാലനാകാറുണ്ട്.
ഞാനിപ്പോഴും മധു സാറിന്റെ ആരാധകനാണ്. അദ്ദേഹമാണ് എന്റെ സൂപ്പർ സ്റ്റാർ എന്ന് മമ്മൂട്ടിയും പറയാറുണ്ട്. സിനിമാ പ്രവർത്തകരും ആരാധകരുമടക്കം നിരവധി പേരാണ് പിറന്നാൾ ആശംസകൾ നേരുന്നത്. സിനിമയോടുള്ള അടങ്ങാത്ത അഭിനിവേശമാണ് കോളജ് അധ്യാപകന്റെ റോളില്‍ നിന്നും മധുവിനെ സ്‌കൂള്‍ ഓഫ് ഡ്രാമയിലെത്തിച്ചത്.
നസീറും സത്യനും വെള്ളിത്തിരയില്‍ നിറ‍ഞ്ഞു നിന്നിരുന്ന സമയത്തായിരുന്നു മധുവിന്റെയും സിനിമയിലേക്കുള്ള രംഗപ്രവേശം. എംഎന്‍ പിഷാരടി സംവിധാനം ചെയ്ത നിണമണിഞ്ഞ കാല്‍പ്പാടുകളായിരുന്നു ആദ്യ ചിത്രം. പന്ത്രണ്ടോളം സിനിമകള്‍ സംവിധാനം ചെയ്ത മധു പതിനാറോളം ചിത്രങ്ങള്‍ നിര്‍മിക്കുകയും ചെയ്തു.
by Midhun HP News | Sep 23, 2026 | Latest News
നഗോയ: ഒളിംപിക്‌സ് വെള്ളി മെഡല്‍, ലോക ചാമ്പ്യന്‍ഷിപ്പ് വിജയം, കോമണ്‍വെല്‍ത്ത് ഗെയിംസ് സ്വര്‍ണങ്ങള്‍… ഇന്ത്യയുടെ വെയ്റ്റ്ലിഫ്റ്റിങ് ഇതിഹാസം മീരാഭായ് ചാനുവിന്റെ കരിയറില്‍ ഇതുവരെ ഒരു കുറവുണ്ടായിരുന്നു – ഏഷ്യന്‍ ഗെയിംസ് മെഡല്‍. വര്‍ഷങ്ങളായി ബാക്കിയായിരുന്ന ആ അപൂര്‍ണ്ണതയ്ക്ക് ഒടുവില്‍ ജപ്പാനിലെ നഗോയയില്‍ വിരാമമായിരിക്കുന്നു.
വനിതകളുടെ 49 കിലോഗ്രാം വിഭാഗത്തില്‍ വെള്ളി മെഡല്‍ സ്വന്തമാക്കിയാണ് ചാനു തന്റെ മേജര്‍ മെഡല്‍ ശേഖരണം പൂര്‍ത്തിയാക്കിയത്. അതോടൊപ്പം, 1998ല്‍ ബാങ്കോക്കില്‍ കര്‍ണം മല്ലേശ്വരി വെള്ളി നേടിയ ശേഷം ഏഷ്യന്‍ ഗെയിംസില്‍ വെയ്റ്റ്ലിഫ്റ്റിങ് മെഡല്‍ നേടുന്ന ആദ്യ ഇന്ത്യന്‍ താരമെന്ന ചരിത്രനേട്ടവും ഈ മുപ്പത്തിരണ്ടുകാരി സ്വന്തമാക്കി.
മത്സരരംഗത്തുണ്ടായിരുന്ന ഏഴ് വെയ്റ്റ്ലിഫ്റ്റര്‍മാരില്‍ ഏറ്റവും പ്രായം കൂടിയ താരമായ മീരാഭായ് ചാനു, ബുധനാഴ്ച നടന്ന മത്സരത്തില്‍ ആകെ 198 കിലോഗ്രാം ഭാരം ഉയര്‍ത്തിയാണ് വെള്ളി മെഡല്‍ സ്വന്തമാക്കിയത്. സ്‌നാച്ചില്‍ 87 കിലോഗ്രാമും ക്ലീന്‍ ആന്‍ഡ് ജെര്‍ക്കില്‍ 111 കിലോഗ്രാമും ആണ് താരം വിജയകരമായി ഉയര്‍ത്തിയത്. ലോക റെക്കോര്‍ഡോടെ ഉത്തരകൊറിയയുടെ റി സോങ്-ഗം ആണ് ഈ വിഭാഗത്തില്‍ തുടര്‍ച്ചയായ മൂന്നാം തവണയും സ്വര്‍ണം നേടിയത്. ഇന്തോനേഷ്യയുടെ വിജയാന ലുലുക് ദിയാനി ട്രി ആകെ 191 കിലോഗ്രാം (സ്‌നാച്ച് 87, ക്ലീന്‍ ആന്‍ഡ് ജെര്‍ക്ക് 103) ഉയര്‍ത്തി വെങ്കല മെഡലും സ്വന്തമാക്കി.
പൂര്‍ണ്ണതയില്ലാത്ത കരിയറിലും മീരാഭായ് ചാനുവിനെ എക്കാലത്തും അടയാളപ്പെടുത്തിയത് പതറാത്ത പോരാട്ടവീര്യമാണ്. 2016 റിയോ ഒളിമ്പിക്‌സില്‍ ഒരു ലിഫ്റ്റ് പോലും വിജയകരമായി പൂര്‍ത്തിയാക്കാന്‍ കഴിയാതെ കണ്ണീരോടെ മടങ്ങേണ്ടി വന്ന താരമാണ് ചാനു. എന്നാല്‍ അഞ്ച് വര്‍ഷത്തിന് ശേഷം ടോക്യോയില്‍ ശക്തമായ തിരിച്ചുവരവ് നടത്തി വെള്ളി മെഡല്‍ സ്വന്തമാക്കി. തുടര്‍ന്ന് ഹാങ്ചൗ ഏഷ്യന്‍ ഗെയിംസിലും മെഡല്‍ പ്രതീക്ഷയോടെയെത്തിയെങ്കിലും നാലാം സ്ഥാനംകൊണ്ട് തൃപ്തിപ്പെടേണ്ടി വന്നു. മൂന്ന് വര്‍ഷത്തിന് ശേഷം നഗോയയില്‍ തിരിച്ചെത്തിയപ്പോള്‍ ചാനു തന്റെ ലക്ഷ്യം പിടിച്ചടക്കുക തന്നെ ചെയ്തു.
by Midhun HP News | Sep 23, 2026 | Latest News
ചെന്നൈ: നടിയും തന്റെ സഹോദരിയുമായ രാധക്കെതിരെ ഗുരുതര ആരോപണങ്ങളുമായി നടി അംബിക. കഴിഞ്ഞ ദിവസം അംബികയ്ക്കെതിരെ രാധ സാമ്പത്തിക തട്ടിപ്പ് പരാതി നൽകിയിരുന്നു. ഇതിന് പിന്നാലെയാണ് വിശദീകരണവുമായി അംബിക മാധ്യമങ്ങൾക്ക് മുന്നിലെത്തിയത്.
ചെക്ക് തട്ടിപ്പുമായി ബന്ധപ്പെട്ട് സഹോദരി ഉന്നയിക്കുന്ന ആരോപണങ്ങൾ വസ്‌തുത വിരുദ്ധമാണെന്നും എല്ലാ കാര്യങ്ങളും സൂക്ഷ്‌മതയോടെ ചെയ്യുന്ന സഹോദരി ഒപ്പിട്ട ചെക്ക് അലക്ഷ്യമായി കളഞ്ഞുവെന്ന് പറയുന്നത് വിശ്വിസിക്കാൻ സാധിക്കുന്നില്ലെന്നും അംബികയും സഹോദരനും പറഞ്ഞു. എആർഎസ് ഗാർഡനിൽനിന്ന് തന്റെ പേരിന്റെ അക്ഷരം മാറ്റിയത് തന്നെ അറിയിച്ചിട്ടില്ലെന്നും അംബിക പറഞ്ഞു.
ചെക്ക് കേസിൽ രാധയ്ക്കെതിരെ നിയമ നടപടിക്ക് ഒരുങ്ങുമ്പോഴാണ് അവർ പരാതിയുമായി എത്തിയതെന്ന് അംബിക പറഞ്ഞു. രാധയുടെ ഭർത്താവാണ് നീക്കങ്ങൾക്ക് പിന്നിലെന്നും കോടികൾ വിലമതിക്കുന്ന ചെന്നൈയിലെ എആർഎസ് ഗാർഡൻസ് തട്ടിയെടുക്കാൻ ശ്രമം നടക്കുന്നുണ്ടെന്നും അംബിക കൂട്ടിച്ചേർത്തു. തനിക്കു കൂടി അവകാശപ്പെട്ട ഭൂമിയാണത്.
എആർഎസ് എന്ന പേരുമാറ്റി പുതിയ പേരിട്ടത് വളരെ വിഷമിപ്പിച്ചു. വീടും ഓഡിറ്റോറിയവും എല്ലാം ഹോട്ടൽ ആക്കാനാണ് രാധയും കുടുംബവും ശ്രമിക്കുന്നത്. നിയമപരമായി കാര്യങ്ങൾ ചെയ്യുന്നതിനാലാണ് ആരെയും ഇക്കാര്യം അറിയിക്കാത്തത്. വീട്ടിലെ കാര്യങ്ങൾ വീട്ടിൽ ഒതുക്കി തീർക്കാൻ ശ്രമിച്ചപ്പോഴാണ് രാധ ആരോപണവുമായി എത്തിയത്.
ചെക്ക് ബൗൺസ് ആയ താനാണ് പരാതി നൽകേണ്ടത്. അതിനു പകരം ചെക്ക് നൽകിയ രാധയാണോ പരാതിപ്പെടേണ്ടതെന്ന് അംബിക ചോദിച്ചു. മുൻകൂട്ടി പ്ലാൻ ചെയ്താണ് രാധ തനിക്ക് ചെക്ക് തന്നത്. ഒരു സഹോദരി അങ്ങനെ ചെയ്യാമോ ?. ഒന്നര വർഷമായി കോടികളുടെ ചെക്ക് ആരെങ്കിലും സൂക്ഷിക്കുമോ ?. ഇങ്ങനെ ചെയ്യുമ്പോൾ തന്നോട് ഒരു വാക്ക് പറയാമായിരുന്നു എന്നും വിതുമ്പലോടെ അംബിക പറഞ്ഞു.
എന്റെ ജീവിതത്തിൽ ഇങ്ങനെയൊരു പ്രസ് മീറ്റ് നടത്തേണ്ടി വരുമെന്ന് ഞാൻ വിചാരിച്ചിട്ടേയില്ല. ഒരിക്കലും വിചാരിക്കാത്ത ഒരു വിഷയം ഇപ്പോൾ നടന്നിരിക്കുകയാണ് ഒരു രണ്ട് മൂന്ന് ദിവസം മുൻപായി. എന്റെ സഹോദരി എന്റെ പേരിൽ ഒരു പരാതി നൽകിയിരിക്കുന്നു. അവർ പരാതി കൊടുത്തത് ശരിയാണോ, അവർ പറയുന്നതിൽ എന്തെങ്കിലും ശരിയുണ്ടോ എന്നൊക്കെ ഒരുപാട് പേർ ചോദിച്ചിരുന്നു.
പൈസയുടെ കാര്യത്തിൽ പല കണക്കുകളാണ് പുറത്തുവന്നിരിക്കുന്നത്. 43, 45, 46 കോടിയൊക്കെയാണ് പല മാധ്യമങ്ങളിലും അവർ പറയുന്നത്. അത് എങ്ങനെയാണെന്ന് എനിക്കറിയില്ല. ജിഎസ്ടിയും ചേർത്താണോ എന്നറിയില്ല. അതുകൊണ്ട് പൈസയുടെ കാര്യത്തിൽ ഒരു സംശയമുണ്ട്. 97 കോടിയാണ് മൊത്തം. അവർ എന്തിന് അങ്ങനെ ചെയ്യണമെന്ന് ഒരുപാട് പേർക്ക് സംശയമുണ്ട്.
by Midhun HP News | Sep 23, 2026 | Latest News
മുംബൈ: ആഗോള വിപണിയിലെ നേട്ടത്തിന്റെ ചുവടുപിടിച്ച് വ്യാപാരത്തിന്റെ തുടക്കത്തില്‍ ഇന്ത്യന്‍ ഓഹരി വിപണിയില്‍ മുന്നേറ്റം. ബിഎസ്ഇ സെന്‍സെക്‌സ് 200ലധികം പോയിന്റ് ആണ് മുന്നേറിയത്. നിഫ്റ്റി 23,400 എന്ന സൈക്കോളജിക്കല്‍ ലെവലിന് മുകളിലാണ്. അതിനിടെ ഡോളറിനെതിരെ രൂപയുടെ മൂല്യവും നേട്ടം ഉണ്ടാക്കി.
ഏഷ്യന്‍ വിപണിയില്‍ ടെക് ഓഹരികള്‍ തുടര്‍ച്ചയായ ആറാം ദിവസവും നേട്ടത്തിന്റെ പാതയിലാണ്. പശ്ചിമേഷ്യന്‍ സംഘര്‍ഷത്തിന് അയവ് വരുമെന്ന പ്രതീക്ഷയില്‍ മിഡില്‍ ഈസ്റ്റില്‍ നിന്നുള്ള എണ്ണവിതരണം ഉയര്‍ന്നിട്ടുണ്ട്. ഇതിനെ തുടര്‍ന്ന് ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് നൂറ് ഡോളറില്‍ താഴെ എത്തിനില്‍ക്കുകയാണ്. ഇതെല്ലാമാണ് ഇന്ത്യന്‍ ഓഹരി വിപണിയില്‍ പ്രതിഫലിച്ചത്. ബജാജ് ഫിനാന്‍സ്, ജെഎസ്ഡബ്ല്യൂ സ്റ്റീല്‍, ഹിന്‍ഡാല്‍കോ, ടാറ്റ സ്റ്റീല്‍ ഓഹരികളാണ് പ്രധാനമായി നേട്ടം ഉണ്ടാക്കുന്നത്. അതേസമയം ടിസിഎസ്, വിപ്രോ, കോള്‍ ഇന്ത്യ, ഇന്‍ഫോസിസ് ഓഹരികള്‍ നഷ്ടത്തിലാണ്.
ഡോളറിനെതിരെ അഞ്ചു പൈസയുടെ നേട്ടത്തോടെ 95.57ലേക്കാണ് രൂപ ഉയര്‍ന്നത്. എണ്ണവില കുറഞ്ഞത് അടക്കമുള്ള ഘടകങ്ങളാണ് രൂപയ്ക്ക് കരുത്തായത്. ആഗോള വിപണിയില്‍ എണ്ണവില കുറയുന്നത് ഇറക്കുമതി ചെലവ് കുറയാന്‍ ഇടയാക്കുമെന്ന പ്രതീക്ഷയാണ് രൂപയില്‍ പ്രതിഫലിച്ചത്.
by Midhun HP News | Sep 23, 2026 | Latest News
കൊല്ലം: നീണ്ടകരയില്‍ വള്ളം മറിഞ്ഞ് കടലില്‍ കാണാതായ ഗൗതം കൃഷ്ണയുടെ അന്ത്യകര്‍മ്മങ്ങള്‍ വീട്ടില്‍ നടത്തി. മൃതദേഹം ലഭിക്കാത്തതിനെത്തുടര്‍ന്ന്, മകന്റെ രൂപം തടിയില്‍ തീര്‍ത്താണ് അമ്മ രേഷ്മ അന്ത്യകര്‍മ്മങ്ങള്‍ നടത്തിയത്. രേഷ്മയുടെ ഭര്‍ത്താവും അച്ഛനും കടലില്‍ വള്ളം മറിഞ്ഞുണ്ടായ അപകടത്തില്‍ മരിച്ചിരുന്നു.
അന്ത്യകര്‍മ്മങ്ങള്‍ പൂര്‍ത്തിയാക്കി തടിയില്‍ കൊത്തിയെടുത്ത രൂപം ചിതയില്‍ ദഹിപ്പിച്ചു. മത്സ്യബന്ധനത്തിനിടെ വള്ളം മറിഞ്ഞ് ഗൗതം കൃഷ്ണയെ കടലില്‍ കാണാതായിട്ട് 55 ദിവസം പിന്നിട്ടു. മകന്‍ മടങ്ങി വരുമെന്ന പ്രതീക്ഷ അസ്തമിച്ചതോടെയാണ് അമ്മ രേഷ്മ, മകന്‍ മരിച്ചതായി കണക്കാക്കി അന്ത്യ കര്‍മ്മങ്ങള്‍ നടത്തിയത്.
കടലില്‍ കാണാതായ മകനെ കണ്ടെത്തുന്നതില്‍ അധികാരികള്‍ പുലര്‍ത്തുന്ന നിസ്സംഗതയ്‌ക്കെതിരെ രേഷ്മ പൊലീസ് സ്റ്റേഷനിലെത്തി പ്രതിഷേധിച്ചിരുന്നു. തുടര്‍ന്ന് മുഖ്യമന്ത്രിയും കേന്ദ്രമന്ത്രി സുരേഷ് ഗോപിയും അടക്കം വിഷയത്തില്‍ ഇടപെടുകയും, പിന്നീട് ഊര്‍ജ്ജിതമായ തിരച്ചില്‍ നടത്തുകയും ചെയ്തിരുന്നു. എന്നാല്‍ മൃതദേഹം കണ്ടെത്താനായിരുന്നില്ല.
Recent Comments