by Midhun HP News | Sep 14, 2026 | Latest News, കേരളം
കൊച്ചി: സംസ്ഥാനം അതി തീവ്രമായ വൈദ്യുതി പ്രതിസന്ധിയിലൂടെ കടന്നു പോവുമ്പോള്‍ സോളാറിലേക്കു മാറാന്‍ ശ്രമിക്കുന്നവര്‍ക്കു തിരിച്ചടിയായി കെഎസ്ഇബി ട്രാന്‍സ്‌ഫോര്‍മറിന്റെ കപ്പാസിറ്റിയും നെറ്റ് മീറ്ററിന്റെ ലഭ്യതക്കുറവും. സംസ്ഥാനത്ത് പലയിടത്തും ട്രാന്‍സ്‌ഫോര്‍മറിന് കപ്പാസിറ്റി ഇല്ലാത്തതിനാല്‍ ഉപയോക്താക്കള്‍ക്കു സോളാര്‍ പ്ലാന്റ് വയ്ക്കാന്‍ സാധിക്കാത്ത സാഹചര്യമുണ്ട്. സോളാര്‍ പ്ലാന്റ് സ്ഥാപിച്ച അരലക്ഷത്തോളം പേര്‍ നെറ്റ് മീറ്റര്‍ കിട്ടാത്തതിനാല്‍ ഉത്പാദനം തുടങ്ങാനാവാതെയും വലയുന്നു.
വീടുകള്‍ക്കു മുകളില്‍ സൗരോര്‍ജ പ്ലാന്റ് സ്ഥാപിക്കുന്നതിനു സമീപമുള്ള ട്രാന്‍സ്‌ഫോര്‍മറിന്റെ കപ്പാസിറ്റി അനുസരിച്ചാണ് കെഎസ്ഇബി ഫീസിബിലിറ്റി നല്‍കുന്നത്. ഒരു ട്രാന്‍സ്‌ഫോര്‍മറിന്റെ ലോഡ് കപ്പാസിറ്റിയുടെ 90 ശതമാനം കഴിഞ്ഞാല്‍ പുതിയ പ്ലാന്റുകള്‍ക്ക് ഫീസിബിലിറ്റി നല്‍കില്ല. ഇത്തരം ട്രാന്‍സ്‌ഫോര്‍മറുകള്‍ അപ്‌ഗ്രേഡ് ചെയ്യുമെന്ന് സര്‍ക്കാര്‍ നേരത്തെ അറിയിച്ചിരുന്നെങ്കിലും അതിനു നടപടികളായിട്ടില്ല. കൊച്ചി നഗരത്തില്‍ പലയിടത്തും ട്രാന്‍സ്‌ഫോര്‍മര്‍ കപ്പാസിറ്റി 90 ശതമാനത്തിലെത്തിയതിനാല്‍ പുതിയ ഓണ്‍ഗ്രിഡ് സൗരോര്‍ജ പ്ലാന്റുകള്‍ സ്ഥാപിക്കാനാവുന്നില്ലെന്ന് ഉപയോക്താക്കള്‍ പറയുന്നു.
കെഎസ്ഇബിയില്‍നിന്നു ഫീസിബിലിറ്റി വാങ്ങി, വായ്പയെടുത്ത് പ്ലാന്റുകള്‍ സ്ഥാപിച്ച അര ലക്ഷത്തോളം പേരാണ് സംസ്ഥാനത്ത് നെറ്റ് മീറ്ററിനായി കാത്തിരിക്കുന്നത്. കെഎസ്ഇബിയില്‍ നെറ്റ് മീറ്റര്‍ ഇല്ലാത്തതിനാല്‍ പ്രൊസ്യൂമര്‍മാരോട് മീറ്റര്‍ സ്ഥാപിക്കാന്‍ ആവശ്യപ്പെടുകയാണ് അധികൃതര്‍. ഇങ്ങനെ സ്വന്തം നിലയ്ക്ക് സിംഗിള്‍ ഫേസ് നെറ്റ് മീറ്റര്‍ സ്ഥാപിക്കാന്‍ മൂവായിരം മുതല്‍ അയ്യായിരം രൂപ വരെ ചെലവുണ്ട്. ത്രീഫേസിന് ഇത് പതിനായിരത്തിനു മുകളിലാവും.
നെറ്റ് മീറ്റര്‍ സ്ഥാപിച്ചാല്‍ മാത്രമേ ഗ്രിഡിലേക്കു കണക്ട് ചെയ്ത് വൈദ്യുതി ഉത്പാദനം തുടങ്ങാനാവൂ. വായ്പയെടുത്ത് സോളാര്‍ പ്ലാന്റ് സ്ഥ്ാപിച്ചവര്‍ ഇപ്പോള്‍ കെഎസ്ഇബി ബില്ലും ഒപ്പം വായ്പയുടെ മാസ തവണയും അടയ്‌ക്കേണ്ട അവസ്ഥയിലാണ്.
കേന്ദ്ര സര്‍ക്കാരിന്റെ പിഎം സൂര്യഘര്‍ പദ്ധതി പ്രകാരമുള്ള സബ്‌സിഡി ഏതാനും മാസങ്ങള്‍ കൂടിയേ ഉള്ളൂവെന്നതിനാല്‍ പ്ലാന്റുകള്‍ സ്ഥാപിക്കുന്നവരുടെ എണ്ണം കൂടുതലാണ്. ഇതാണ് നെറ്റ് മീറ്ററില്‍ പ്രതിസന്ധി ഉണ്ടാക്കിയതെന്ന് കെഎസ്ഇബി പറയുന്നു. കഴിഞ്ഞ മാസം 82,000 നെറ്റ് മീറ്ററിന് കെഎസ്ഇബി ഓര്‍ഡര്‍ നല്‍കിയിട്ടുണ്ട്. ഇതു ലഭ്യമാവുന്നതോടെ പ്രതിസന്ധിക്കു പരിഹാരമാവുമെന്നാണ് പ്രതീക്ഷിക്കുന്നത്.
by Midhun HP News | Sep 14, 2026 | Latest News, ദേശീയ വാർത്ത
ഗുവാഹത്തി: ഭാര്യയുടെ തലയറുത്തുമാറ്റി ഫ്രിഡ്ജില്‍ സൂക്ഷിച്ച കേസില്‍ അറസ്റ്റിലായ അസം സ്വദേശി പൊലീസ് വാഹത്തില്‍ നിന്ന് ചാടി മരിച്ചു. ഗുവാഹത്തിയില്‍ നിന്നുള്ള രാമാനുജ് ഗോസ്വാമി (30) ആണ് മരിച്ചത്. വൈദ്യപരിശോധനയ്ക്ക് ശേഷം ഗോസ്വാമിയുമായി പൊലീസ് വാഹനം ഹത്തിഗാവ് പൊലീസ് സ്റ്റേഷനിലേക്ക് മടങ്ങുന്നതിനിടെ തിങ്കളാഴ്ച പുലര്‍ച്ചെയാണ് സംഭവം.
ഗുവഹാത്തി മെഡിക്കല്‍ കോളജ് ഹോസ്പിറ്റലില്‍ വൈദ്യപരിശോധന പൂര്‍ത്തിയാക്കി മടങ്ങവെ, നരകാസുര്‍ പഹാര്‍ പ്രദേശത്തിന് സമീപം വെച്ച് ഗോസ്വാമി പൊലീസ് ഉദ്യോഗസ്ഥരെ ആക്രമിക്കുകയും ഓടിക്കൊണ്ടിരുന്ന വാഹനത്തില്‍ നിന്ന് ചാടുകയുമായിരുന്നു. റോഡരികിലെ താഴ്ചയിലേക്ക് വീണ് ഗുരുതര പരിക്കേറ്റ ഇയാളെ ഉടന്‍ തന്നെ ആശുപത്രിയില്‍ എത്തിച്ചെങ്കിലും ഡോക്ടര്‍മാര്‍ മരണം സ്ഥിരീകരിച്ചു.
ഈ മാസം മൂന്നിനാണ് ഗുവാഹത്തിയിലെ ഫ്‌ളാറ്റില്‍ വെച്ച് 25 കാരിയായ ഭാര്യ റിയ താലൂക്ദാറിനെ കൊലപ്പെടുത്തിയ ശേഷം ഗോസ്വാമി തലയറുത്തുമാറ്റിയത്. ഭാര്യയ്ക്ക് മറ്റ് ബന്ധങ്ങളുണ്ടെന്ന സംശയമാണ് കൊലപാതകത്തിന് കാരണമെന്ന് പൊലീസ് പറഞ്ഞു. ഫ്‌ളാറ്റില്‍ നിന്ന് ദുര്‍ഗന്ധം വമിക്കുന്നതായി അയല്‍ക്കാര്‍ പരാതിപ്പെട്ടതിനെ തുടര്‍ന്നാണ് കൊലപാതക വിവരം പുറത്തറിയുന്നത്. തുടര്‍ന്ന് പൊലീസ് നടത്തിയ പരിശോധനയില്‍ ഫ്രിഡ്ജില്‍ കറുത്ത പോളിത്തീന്‍ ബാഗിലാക്കി സൂക്ഷിച്ച നിലയില്‍ യുവതിയുടെ തലയും വിരലുകളും കണ്ടെത്തുകയായിരുന്നു.
ഭാരതീയ ന്യായ സംഹിതയിലെ കൊലപാതകം (സെക്ഷന്‍ 103(1)), തെളിവ് നശിപ്പിക്കല്‍ (സെക്ഷന്‍ 238) എന്നീ വകുപ്പുകള്‍ പ്രകാരമാണ് ഇയാളെ അറസ്റ്റ് ചെയ്തത്. സെപ്റ്റംബര്‍ 6ന് പൊലീസില്‍ കീഴടങ്ങിയ ഇയാള്‍ ഏഴു ദിവസത്തെ പോലീസ് കസ്റ്റഡിയിലായിരുന്നു. കൃത്യം നടക്കുമ്പോള്‍ താന്‍ മദ്യപിച്ചിരുന്നുവെന്ന് ഗോസ്വാമി പൊലീസിനോട് സമ്മതിച്ചിരുന്നു. യുവതിയുടെ കുടുംബത്തിന്റെ പരാതിയും പൊലീസ് അന്വേഷണവും തുടരുന്നതിനിടെയാണ് ഇയാള്‍ മരിച്ചത്.
by Midhun HP News | Sep 14, 2026 | Latest News, കേരളം
പ്രതിയെ വിട്ടയയ്ക്കണമെന്ന് ആവശ്യപ്പെട്ട് തിരുവനന്തപുരം പോത്തൻകോട് പോലീസ് സ്റ്റേഷനിൽ 15 വയസുകാരിയുടെ പരാക്രമം. എസ് ഐയുടെ മുഖത്ത് മർദിച്ചും സ്റ്റേഷനിലേക്ക് കല്ലെറിഞ്ഞും പെൺകുട്ടി പോലീസുകാരെ അരമണിക്കുറോളം മുൾമുനയിൽ നിർത്തി. ഒടുവിൽ രക്ഷിതാക്കളെ വിളിച്ചുവരുത്തി പെൺകുട്ടിയെ മാനസിക ആരോഗ്യ കേന്ദ്രത്തിൽ എത്തിക്കുകയായിരുന്നു. ലഹരിക്ക് അടിമയാണ് പെൺകുട്ടിയെന്നാണ് പോലീസ് സംശയിക്കുന്നത്.
ബുധനാഴ്ച രാത്രി 10ന് ആയിരുന്നു സംഭവം. ബാറിനു സമീപത്തെ റോഡിൽ കറങ്ങിനടന്ന റൗഡി ലിസ്റ്റില്‍പെട്ട 28കാരനെ പോലീസ് പട്രോളിങ് സംഘം പിടികൂടി സ്റ്റേഷനിൽ എത്തിച്ചതിന് പിന്നാലെയാണ് നാടകീയ രംഗങ്ങൾ അരങ്ങേറിയത്. സ്റ്റേഷനിലേക്ക് ഓടി എത്തിയ പെൺകുട്ടി തന്റെ സുഹൃത്തിനെ വിട്ടയക്കണമെന്ന് ആവശ്യപ്പെട്ട് ബഹളം വയ്ക്കുകയായിരുന്നു.
പോലീസ് സ്റ്റേഷനിൽ വനിതാ പോലീസുകാർ ഇല്ലാത്തതിനാൽ പെൺകുട്ടിയെ തടഞ്ഞുവയ്ക്കാൻ കഴിയാതെ വരികയും പെൺകുട്ടി എസ്ഐ അടക്കമുള്ളവരെ മർദിക്കുകയുമായിരുന്നു. സംഘർഷം രൂക്ഷമായതോടെ വട്ടപ്പാറ പോലീസ് സ്റ്റേഷനിൽ നിന്നു വനിതാ പോലീസുകാർ എത്തി പെൺകുട്ടിയെ പിടിച്ചുവച്ച ശേഷം വീട്ടുകാരെ വിളിച്ചുവരുത്തി പുലർച്ചെ 2 മണിയോടെ മാനസികാരോഗ്യ കേന്ദ്രത്തിൽ എത്തിക്കുകയായിരുന്നു.
by Midhun HP News | Sep 14, 2026 | Latest News, കേരളം
സുൽത്താൻ ബത്തേരി: പൊലീസ് സ്റ്റേഷൻ വളപ്പിൽ സൂക്ഷിച്ചിരുന്ന നിരോധിത ലഹരി ഉൽപ്പന്നങ്ങൾ സ്വന്തം ഉദ്യോഗസ്ഥൻ തന്നെ മോഷ്ടിച്ചു കടത്തിയ സംഭവത്തിൽ സീനിയർ സിവിൽ പൊലീസ് ഓഫീസർക്കെതിരെ ക്രിമിനൽ കേസ് രജിസ്റ്റർ ചെയ്തു. സുൽത്താൻ ബത്തേരി പൊലീസ് സ്റ്റേഷനിലെ സീനിയർ സിവിൽ പൊലീസ് ഓഫീസറും വൈത്തിരി സ്വദേശിയുമായ സബിത്തിനെതിരെയാണ് പൊലീസ് സേനയ്ക്ക് തന്നെ നാണക്കേടുണ്ടാക്കിയ സംഭവത്തിൽ കേസെടുത്തത്. അന്തർസംസ്ഥാന അതിർത്തി ചെക്ക്‌പോസ്റ്റിൽ നിന്ന് പിടികൂടി കോടതി ഉത്തരവുപ്രകാരം പൊലീസ് സ്റ്റേഷനിൽ സുരക്ഷിതമായി സൂക്ഷിച്ചിരുന്ന ഏഴ് ചാക്കോളം വരുന്ന നിരോധിത പുകയില ഉൽപ്പന്നങ്ങളാണ് കടത്തിക്കൊണ്ടുപോയത്.
കഴിഞ്ഞ ദിവസം സ്റ്റേഷനിലെ റൈറ്ററും അസിസ്റ്റന്റ് റൈറ്ററും തൊണ്ടിമുതലുകൾ സൂക്ഷിച്ച മുറിയിൽ പരിശോധനയ്ക്കായി എത്തിയപ്പോഴാണ് ലഹരി ചാക്കുകൾ കാണാനില്ലെന്ന വിവരം ആദ്യമായി തിരിച്ചറിയുന്നത്. മുറിയുടെ വാതിലോ പൂട്ടോ ബലപ്രയോഗത്തിലൂടെ തകർത്തതിന്റെ ലക്ഷണങ്ങളൊന്നും അവിടെ ഉണ്ടായിരുന്നില്ല. തുടർന്ന് നടത്തിയ വിശദമായ പരിശോധനയിലാണ് സ്റ്റേഷൻ റൈറ്ററുടെ പക്കലുണ്ടായിരുന്ന യഥാർത്ഥ താക്കോൽ കൈക്കലാക്കി മുറി തുറന്നാണ് പ്രതി മോഷണം നടത്തിയതെന്ന് സ്ഥിരീകരിച്ചത്. ഇതോടെ കൃത്യത്തിന് പിന്നിൽ സ്റ്റേഷനിലെ തന്നെ ആരെങ്കിലും ആയിരിക്കുമെന്ന സംശയത്തിലേക്ക് അന്വേഷണ സംഘം എത്തുകയായിരുന്നു.
സംഭവത്തെ തുടർന്ന് സുൽത്താൻ ബത്തേരി ഡിവൈഎസ്പിയുടെ നേതൃത്വത്തിൽ സ്റ്റേഷൻ വളപ്പിലെയും പരിസരത്തെയും സിസിടിവി നിരീക്ഷണ ദൃശ്യങ്ങൾ കേന്ദ്രീകരിച്ച് സമഗ്ര അന്വേഷണം ആരംഭിച്ചു. പരിശോധനയിൽ രാത്രി സമയത്ത് കാറിലെത്തിയ ഒരാൾ ചാക്കുകൾ വാഹനത്തിൽ കയറ്റി അതിവേഗം കടത്തിക്കൊണ്ടുപോകുന്ന ദൃശ്യങ്ങൾ പൊലീസിന് ലഭിച്ചു. വാഹന വിവരങ്ങളും ദൃശ്യങ്ങളും ശാസ്ത്രീയമായി വിശകലനം ചെയ്തതോടെയാണ് മോഷണത്തിന് പിന്നിൽ പ്രവർത്തിച്ചത് സ്റ്റേഷനിലെ ഉദ്യോഗസ്ഥനായ സബിത്ത് തന്നെയാണെന്ന് അന്വേഷണ സംഘം സ്ഥിരീകരിച്ചത്. സംഭവത്തിന് പിന്നാലെ ഒളിവിൽപ്പോയ പ്രതിക്കായി പൊലീസ് വ്യാപകമായ തെരച്ചിൽ ആരംഭിച്ചിട്ടുണ്ട്. കടത്തിക്കൊണ്ടുപോയ പുകയില ഉൽപ്പന്നങ്ങൾ ലഹരി മാഫിയകൾക്ക് മറിച്ചുവിറ്റതാണോ എന്നതടക്കമുള്ള കാര്യങ്ങളിൽ വ്യക്തത വരുത്താൻ കൂടുതൽ അന്വേഷണം പുരോഗമിക്കുകയാണെന്ന് ഉന്നത പൊലീസ് ഉദ്യോഗസ്ഥർ വ്യക്തമാക്കി.
by Midhun HP News | Sep 14, 2026 | Latest News, കായികം
ലണ്ടൻ: ടെസ്റ്റ് ക്രിക്കറ്റിൽ റെക്കോർഡുകൾ സ്ഥാപിച്ച് മുന്നേറുന്ന ഇംഗ്ലണ്ട് നായകൻ ജോ റൂട്ടിന് മറ്റൊരു അപൂർവ നേട്ടം കൂടി. ടെസ്റ്റ് ക്രിക്കറ്റിന്റെ 147 വർഷത്തെ ചരിത്രത്തിൽ ആദ്യമായി നാലാം ഇന്നിങ്സിൽ 2000 റൺസ് തികയ്ക്കുന്ന ആദ്യ ബാറ്ററെന്ന അപൂർവ നേട്ടമാണ് താരം സ്വന്തമാക്കിയത്. പാകിസ്ഥാനെതിരായ മൂന്നാം ടെസ്റ്റ് പോരാട്ടത്തിന്റെ രണ്ടാം ഇന്നിങ്സിൽ ഇംഗ്ലണ്ടിനായി അർധ സെഞ്ച്വറി നേടി പുറത്താകാതെ നിന്നാണ് റൂട്ട് നേട്ടത്തിലെത്തിയത്. രണ്ടാം ഇന്നിങ്സിൽ ഇംഗ്ലീഷ് നായകൻ 62 റൺസെടുത്തു.
ടെസ്റ്റ് ക്രിക്കറ്റിൽ ഒരു ബാറ്ററെ സംബന്ധിച്ച് നാലാം ഇന്നിങ്സ് ബാറ്റിങ് എന്നത് കനത്ത വെല്ലുവിളിയാണ്. പിച്ച് ബാറ്റിങിനു ഏറ്റവും ദുഷ്കരമാകുന്ന ഘട്ടമായിരിക്കും ഒരു ടെസ്റ്റിന്റെ നാലാം ഇന്നിങ്സ്. ലക്ഷ്യം മുന്നിൽ വച്ചുള്ള ബാറ്റിങാകുമ്പോൾ ഓരോ വിക്കറ്റും നിർണായകമാണ്. അതിന്റെ സമ്മർദ്ദവും ബാറ്റർക്കുണ്ടാകും. എന്നാൽ റൂട്ട് ഈ സമ്മർദ്ദ സാഹചര്യങ്ങളെ കരുത്താക്കി മാറ്റിയാണ് 2000 റൺസെന്ന അപൂർവ നേട്ടം സ്വന്തമാക്കിയത്.
റൂട്ടിന് പിന്നിൽ നേട്ടത്തിലുള്ളവരിൽ ഒരാൾ പോലും 1700 റൺസിന് മുകളിൽ നാലാം ഇന്നിങ്സിൽ റൺസെടുത്തിട്ടില്ലെന്ന പ്രത്യേകതയമുണ്ട്. റൂട്ടിന് നിലവിൽ 2059 റൺസുണ്ട്. സച്ചിന് 1625 റൺസും അലിസ്റ്റർ കുക്കിനും ഗ്രെയിം സ്മിത്തിനും 1611 റൺസ് വീതവും ശിവ്നരയെൻ ചന്ദർ പോളിന് 1580 റൺസുമാണ് നാലാം ഇന്നിങ്സിലുള്ളത്.
ടെസ്റ്റിൽ ഏറ്റവും കൂടുതൽ ഫിഫ്റ്റി
ഇന്ത്യൻ ഇതിഹാസം സച്ചിൻ ടെണ്ടുൽക്കറുടെ മറ്റൊരു ടെസ്റ്റ് റെക്കോർഡ് റൂട്ട് കഴിഞ്ഞ ദിവസം തകർത്തിരുന്നു. ടെസ്റ്റിൽ ഏറ്റവും കൂടുതൽ അർധ സെഞ്ച്വറികൾ നേടുന്ന താരമെന്ന സച്ചിന്റെ റെക്കോർഡാണ് റൂട്ട് സ്വന്തം പേരിലേക്ക് മാറ്റിയത്. പാകിസ്ഥാനെതിരായ രണ്ടാം ഇന്നിങ്സിലെ അർധ സെഞ്ച്വറിക്കു പിന്നാലെയാണ് റെക്കോർഡ് നേട്ടം. ടെസ്റ്റിൽ ഇംഗ്ലീഷ് നായകൻ നേടുന്ന 69ാം അർധ സെഞ്ച്വറിയാണിത്. സച്ചിൻ 68 അർധ സെഞ്ച്വറികളാണ് റെഡ് ബോൾ ക്രിക്കറ്റിൽ സ്വന്തമാക്കിയത്.
എഡ്ജ്ബാസ്റ്റനിൽ നടന്ന മൂന്നാമത്തേയും അവസാനത്തേയും ടെസ്റ്റിൽ ഇംഗ്ലണ്ടിന് 130 റൺസായിരുന്നു ലക്ഷ്യം. ഈ ലക്ഷ്യത്തിലേക്ക് ബാറ്റ് ചെയ്യവേയാണ് റൂട്ട് പുറത്താകാതെ 69 പന്തിൽ 62 റൺസ് അടിച്ചെടുത്തത്. 8 ഫോറുകൾ സഹിതമാണ് അർധ സെഞ്ച്വറി.
1000 റൺസ്
എഡ്ജ്ബാസ്റ്റൻ പിച്ചിൽ 1000 റൺസിലധികം നേടുന്ന ആദ്യ ബാറ്ററെന്ന നേട്ടവും മത്സരത്തിൽ റൂട്ട് സ്വന്തമാക്കി. ഇംഗ്ലണ്ടിലെ നാല് വ്യത്യസ്ത ടെസ്റ്റ് വേദികളിൽ ആയിരം അതിനു മുകളിൽ റൺസ് നേടുന്ന താരമായും റൂട്ട് മാറി. ലോർഡ്സിൽ 2203 റൺസും മാഞ്ചസ്റ്ററിൽ 1128 റൺസും, ഓവലിൽ 1050 റൺസും റൂട്ട് നേടിയിട്ടുണ്ട്. നേരത്തെ ദക്ഷിണാഫ്രിക്കൻ ഇതിഹാസം ജാക്വിസ് കാലിസും ഓസ്ട്രേലിയൻ ഇതിഹാസം റിക്കി പോണ്ടിങും സമാന നേട്ടം സ്വന്തം നാട്ടിലെ പിച്ചുകളിൽ സ്വന്തമാക്കിയിട്ടുണ്ട്.
പാകിസ്ഥാനെതിരായ മൂന്ന് ടെസ്റ്റ് മത്സരങ്ങളടങ്ങിയ പരമ്പര 3-0ത്തിന് ഇംഗ്ലണ്ട് തൂത്തുവാരി. മൂന്നാമത്തേയും അവസാനത്തേയും ടെസ്റ്റില്‍ 8 വിക്കറ്റ് വിജയം സ്വന്തമാക്കിയാണ് ഇംഗ്ലണ്ട് പരമ്പര പിടിച്ചത്. 130 റണ്‍സ് വിജയ ലക്ഷ്യത്തിലേക്ക് ബാറ്റേന്തിയ ആതിഥേയര്‍ 2 വിക്കറ്റ് നഷ്ടത്തില്‍ ലക്ഷ്യത്തിലെത്തി.
Recent Comments