by Midhun HP News | Oct 31, 2026 | Latest News, കായികം, ജില്ലാ വാർത്ത
ഓക്ക്‌ലന്‍ഡ്: ന്യൂസിലന്‍ഡിനെതിരായ അഞ്ച് മത്സരങ്ങളടങ്ങിയ ഏകദിന പരമ്പരയ്ക്കുള്ള ആദ്യ മൂന്ന് മത്സരങ്ങളിലേക്കുള്ള ടീമിലും പേസ് ബൗളര്‍ അക്വിബ് നബിയെ ഉള്‍പ്പെടുത്തി. ആദ്യം പ്രഖ്യാപിച്ച ടീമില്‍ താരത്തെ അവസാന രണ്ട് മത്സരങ്ങള്‍ക്കായാണ് ഉള്‍പ്പെടുത്തിയിരുന്നത്. ടീമില്‍ ഉള്‍പ്പെട്ടിരുന്ന പേസര്‍ പ്രസിദ്ധ് കൃഷ്ണ പരിക്കു മാറി ഫിറ്റ്‌നസ് തെളിയിച്ച് തിരിച്ചെത്തുമെന്നു പ്രതീക്ഷിക്കപ്പെട്ടിരുന്നു. എന്നാല്‍ താരം പൂര്‍ണമായി ഫിറ്റ്‌സ് വീണ്ടെടുത്തില്ല. ഇതോടെയാണ് നബിയെ പരമ്പരയില്‍ മൊത്തം നിലനിര്‍ത്താന്‍ തീരുമാനിച്ചത്.
ഹാംസ്ട്രിങ് പരിക്കിനെ തുടര്‍ന്നാണ് പ്രസിദ്ധ് കൃഷ്ണയ്ക്ക് പരമ്പര നഷ്ടമായത്. വെസ്റ്റ് ഇന്‍ഡീസിനെതിരായ പോരാട്ടത്തിനിടെയാണ് പ്രസിദ്ധിനു പരിക്കേല്‍ക്കുന്നത്. കിവികള്‍ക്കെതിരായ പോരാട്ടത്തിനു മുന്‍പ് താരം ഫിറ്റ്‌നസ് വീണ്ടെടുക്കുമെന്ന പ്രതീക്ഷയിലാണ് ടീമില്‍ ഉള്‍പ്പെടുത്തിയത്. എന്നാല്‍ തിരിച്ചു വരവ് വൈകും എന്നു വ്യക്തമായി.
കിവികള്‍ക്കെതിരായ ടെസ്റ്റ് പരമ്പരയ്ക്കു മുന്‍പ് പ്രസിദ്ധ് ഫിറ്റ്‌നസ് വീണ്ടെടുക്കുമെന്നാണ് ഇന്ത്യന്‍ മാനേജ്‌മെന്റ് പ്രതീക്ഷിക്കുന്നത്. ടെസ്റ്റിനു മുന്‍പ് ഇന്ത്യ എ- ന്യൂസിലന്‍ഡ് എ ചതുര്‍ദിന പോരാട്ടത്തിലെ മൂന്നാം മത്സരം നവംബര്‍ 7 മുതല്‍ ആരംഭിക്കും. അതിനു മുന്‍പ് ഫിറ്റ്‌നസ് തെളിയിച്ചാല്‍ ടെസ്റ്റ് പരമ്പരയ്ക്ക് മുന്നോടിയായി പ്രസിദ്ധിനെ ഇന്ത്യ എ ടീമിലുള്‍പ്പെടുത്തി കളത്തിലിറക്കാനും നീക്കമുണ്ട്.
ഇന്ത്യന്‍ ഏകദിന ടീം (ആദ്യ 3 പോരാട്ടങ്ങള്‍): ശുഭ്മാന്‍ ഗില്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്‌ലി, ശ്രേയസ് അയ്യര്‍, കെഎല്‍ രാഹുല്‍, അക്ഷര്‍ പട്ടേല്‍, നമാന്‍ ധിര്‍, അന്‍ഷുല്‍ കാംബോജ്, ഗുര്‍നൂര്‍ ബ്രാര്‍, ഋതുരാജ് ഗെയ്ക്‌വാദ്, അര്‍ഷ്ദീപ് സിങ്, ഇഷാന്‍ കിഷന്‍, മുഹമ്മദ് സിറാജ്, കുല്‍ദീപ് യാദവ്, നിതീഷ് കുമാര്‍ റെഡ്ഡി (ആദ്യ ഏകദിനത്തിന് മാത്രം), അക്വിബ് നബി.
ഇന്ത്യന്‍ ഏകദിന ടീം (അവസാന 2 പോരാട്ടങ്ങള്‍): ശ്രേയസ് അയ്യര്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്‌ലി, തിലക് വര്‍മ, ഇഷാന്‍ കിഷന്‍, അക്ഷര്‍ പട്ടേല്‍, നമാന്‍ ധിര്‍, ഗുര്‍നൂര്‍ ബ്രാര്‍, ഋതുരാജ് ഗെയ്ക്‌വാദ്, അര്‍ഷ്ദീപ് സിങ്, കുമാര്‍ കുശാഗ്ര, മുഹമ്മദ് സിറാജ്, യഷ് ഠാക്കൂര്‍, കുല്‍ദീപ് യാദവ്, അക്വിബ് നബി.
by Midhun HP News | Oct 31, 2026 | Latest News, ദേശീയ വാർത്ത
ടെഹ്റാൻ: ഹോർമുസ് കടലിടുക്കിൽ ഇന്ത്യൻ നാവികർ സഞ്ചരിച്ച എണ്ണക്കപ്പലിനു നേരെ ആക്രമണം. 27 ഇന്ത്യൻ ജീവനക്കാരുമായി പോയ ‘എംടി ലൂയിസ് 1’ എന്ന പനാമ ക്രൂഡ് ഓയിൽ ടാങ്കറിനു നേരെയാണ് ആക്രമണമുണ്ടായതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. വെള്ളിയാഴ്ച നടന്ന ആക്രമണത്തിൽ കപ്പലിലുണ്ടായിരുന്ന 27 ഇന്ത്യൻ നാവികരും പൂർണ്ണ സുരക്ഷിതരാണെന്ന് അധികൃതർ അറിയിച്ചു. ഹോർമുസിൽ പ്രവേശിച്ച എണ്ണക്കപ്പലിന്‍റെ അടിഭാഗത്ത് ചെറിയ ബോട്ടിലെത്തിയ സംഘം രണ്ട് ലിമ്പറ്റ് മൈനുകൾ ഒട്ടിച്ചുവയ്ക്കുകയായിരുന്നു.
സ്ഫോടനത്തെ തുടർന്ന് കപ്പലിന്റെ എഞ്ചിൻ റൂമിൽ തീപിടിക്കുകയും പ്രവർത്തനം താൽക്കാലികമായി നിലയ്ക്കുകയും ചെയ്തു. ജീവനക്കാർ ഉടൻ തീയണച്ചതിനാലാണ് വൻ ദുരന്തം ഒഴിവായതെന്നും റിപ്പോർട്ടുകൾ വ്യക്തമാക്കുന്നു. കടലിൽ എണ്ണച്ചോർച്ചയോ മറ്റ് പരിസ്ഥിതി ആഘാതങ്ങളോ ഉണ്ടായിട്ടില്ലെന്നും കപ്പൽ യാത്ര തുടർന്നുവെന്നും റിപ്പോർട്ടുകൾ വ്യക്തമാക്കുന്നു. ഒമാന്റെ ഖസബിൽ നിന്ന് 46 കിലോമീറ്റർ വടക്കുകിഴക്കായിട്ടാണ് കപ്പലിന് നേരെ ആക്രമണം നടന്നതെന്ന് ബ്രിട്ടീഷ് നാവിക ഏജൻസിയായ യുകെഎംടിഒ വ്യക്തമാക്കി. ഫെബ്രുവരിയിൽ സംഘർഷം ആരംഭിച്ചതിനുശേഷം ഈ തന്ത്രപ്രധാനമായ കടൽപ്പാതയിൽ ആദ്യമായാണ് ലിംപറ്റ് മൈനുകൾ ഉപയോഗിച്ച് ആക്രമണം നടത്തുന്നത്.
കഴിഞ്ഞ ദിവസം രണ്ട് ഇന്ത്യൻ പൗരന്മാരുമായി സഞ്ചരിച്ച ലൈബീരിയൻ പതാക ഘടിപ്പിച്ച ‘എംടി അർസാന’ എന്ന ക്രൂഡ് ഓയിൽ കപ്പലിന് നേരെയും പ്രൊജക്ടൈൽ ആക്രമണം ഉണ്ടായിരുന്നു. ആക്രമണം നടന്ന രണ്ട് കപ്പലുകളിലുമായി ഉള്ള 29 ഇന്ത്യൻ നാവികരും പൂർണ്ണ സുരക്ഷിതരാണെന്നും ആർക്കും പരിക്കേറ്റിട്ടില്ലെന്നും കേന്ദ്ര തുറമുഖ, കപ്പൽ ഗതാഗത മന്ത്രി സർബാനന്ദ സോണോവാൾ സ്ഥിരീകരിച്ചു. സർക്കാർ സാഹചര്യം സൂക്ഷ്മമായി നിരീക്ഷിച്ചു വരികയാണെന്നും മന്ത്രി അറിയിച്ചു.
by Midhun HP News | Oct 31, 2026 | Latest News, ജില്ലാ വാർത്ത
തിരുവനന്തപുരം: സർക്കാർ അനുമതിയില്ലാതെ ബിയർ വൈൻ പാർലറുകൾക്ക് ബാർ അനുമതി നൽകിയതിൽ രണ്ട് എക്സൈസ് ഉദ്യോഗസ്ഥർക്ക് സസ്പെൻഷൻ. എറണാകുളം, പത്തനംതിട്ട എക്സൈസ് ഡപ്യൂട്ടി കമ്മിഷണർമാരായ പി.കെ സതീഷ്, പി.എൽ ഷിബു എന്നിവർക്കെതിരെയാണ് നടപടി.
മദ്യനയ ചർച്ച പൂർത്തിയാകും മുമ്പ് ലൈസൻസ് പുതുക്കി നൽകിയത് ഗുരുതര വീഴ്ചയെന്ന റിപ്പോർട്ടിന്റെ അടിസ്ഥാനത്തിലാണ് നടപടി. വകുപ്പിനോട് അനുമതി തേടിയിരുന്നില്ലെന്നും റിപ്പോർട്ടിലുണ്ട്. എറണാകുളത്ത് രണ്ടും കോട്ടയത്ത് ഒരു ബാറിനുമാണ് ലൈസൻസ് അനുവദിച്ചിരുന്നത്.
2014ൽ ബിയർ, വൈൻ പാർലറായി മാറിയ ടു സ്റ്റാർ ഹോട്ടലുകൾക്കാണ് ലൈസൻസ് അനുവദിച്ചത്. ശ്രേണി ഉയർത്തിയതിന്റെ ഭാഗമായ സ്വാഭാവിക നടപടി എന്നായിരുന്നു ഉദ്യോഗസ്ഥരുടെ വാദം. എന്നാൽ സർക്കാറിന്റെ വരാൻ പോകുന്ന മദ്യനയത്തിൽ പുതിയ ബാറുകൾക്ക് അനുമതി നൽകണോ വേണ്ടയോ എന്ന കാര്യത്തിൽ തീരുമാനമെടുത്തിട്ടില്ല. അതിനു മുമ്പേ അനുമതി നൽകിയതിൽ കടുത്ത അതൃപ്തിലായിരുന്നു എക്സൈസ് മന്ത്രി.
അതേസമയം, സംഭവത്തിൽ വീഴ്ചയില്ലെന്ന് എക്സൈസ് കമ്മിഷണർ എസ്. സാംബശിവ റാവു അറിയിച്ചു. മൂവാറ്റുപുഴയിലെ ഹോട്ടൽ ഗംഗ, എറണാകുളത്തെ ഹോട്ടൽ മേഘ, പാലയിലെ ഹോട്ടൽ മയ്യ തുടങ്ങിയ സ്ഥാപനങ്ങൾക്ക് എഫ്എൽ-3 ലൈസൻസ് പുതുക്കി നൽകിയത് നിയമപരമായ നടപടി മാത്രമാണെന്ന് റിപ്പോർട്ടിൽ ചൂണ്ടിക്കാട്ടുന്നു. ത്രി സ്റ്റാർ പദവിയുണ്ടെന്ന് തെളിഞ്ഞാൽ എക്സൈസ് ഡെപ്യൂട്ടി കമ്മിഷണർമാർക്ക് ലൈസൻസ് പുതുക്കി നൽകാമെന്നും നികുതി വകുപ്പ് അഡീഷണൽ ചീഫ് സെക്രട്ടറിക്ക് അദ്ദേഹം സമർപ്പിച്ച റിപ്പോർട്ടിൽ പറയുന്നു.
പുതിയ മദ്യനയം രൂപീകരിക്കുന്നതിന്റെ അന്തിമ ഘട്ടത്തിൽ നിൽക്കെ, സർക്കാരുമായി ആലോചിക്കാതെ ലൈസൻസ് പുതുക്കിയത് ശരിയായില്ലെന്ന കടുത്ത നിലപാടിലാണ് എക്സൈസ് മന്ത്രി എം. ലിജു. സർക്കാർ നയം അനുസരിച്ചുവേണം ഉദ്യോഗസ്ഥർ പ്രവർത്തിക്കാൻ എന്ന് മന്ത്രി മുന്നറിയിപ്പ് നൽകി.
by Midhun HP News | Oct 31, 2026 | Latest News, ജില്ലാ വാർത്ത
തിരുവനന്തപുരം: ആസൂത്രണ ബോർഡ് പരീക്ഷാ ക്രമക്കേടിൽ പി എസ് സി അഡീഷണൽ സെക്രട്ടറി ആർ ഹരി പിടിയിൽ. എറണാകുളത്ത് നിന്ന് ക്രൈം ബ്രാഞ്ചാണ് പിടികൂടിയത്. കേസിലെ രണ്ടാമത്തെ അറസ്റ്റാണിത്. കേസിൽ ആദ്യ അറസ്റ്റിന് പിന്നാലെ ഹരി ഒളിവിൽ പോയിരുന്നു. ആസൂത്രണ ബോർഡ് പരീക്ഷ മൂല്യനിർണയത്തിന്റെ ചുമതലയുണ്ടായിരുന്ന രണ്ടാമത്തെ ആളായിരുന്നു ആർ ഹരി. ഇയാൾക്കായി അന്വേഷണം നടത്തിവരികയായിരുന്നു. ഇതിനിടെയാണ് പിടിയിലായത്. നേരത്തെ മുൻ ഡെപ്യൂട്ടി സെക്രട്ടറി പി സതീഷ് അറസ്റ്റിലായിരുന്നു.
എഴുത്ത് പരീക്ഷയിൽ കുറഞ്ഞ മാർക്ക് കിട്ടിയ ഉദ്യോഗാർഥിയെ ഒന്നാം റാങ്കിലെത്തിക്കാനായിട്ട് മൂല്യനിർ‌ണയത്തിൽ അട്ടിമറി നടത്തിയത് ആർ ഹരി അടക്കമുള്ളവരാണെന്നാണ് കണ്ടെത്തൽ. മൂല്യനിർണയം നടത്തിയപ്പോൾ 58 മാർക്കിന്റെ 10 ചോദ്യങ്ങൾ ഒഴിവാക്കിയെന്നാണ് എസ്ഐടി കണ്ടെത്തൽ. പിന്നാലെയാണ് പി സതീഷ്, ആർ ഹരി എന്നിവരെ പ്രതി ചേർത്തത്. പി സതീഷ് കഴിഞ്ഞവർഷം സർവീസിൽ നിന്ന് വിരമിച്ചയാളാണ്. ആർ ഹരി ഇപ്പോഴും സർവീസിൽ തുടരുന്നായാളാണ്. പി സതീഷിനെ വൈകാതെ കസ്റ്റഡിയിൽ വാങ്ങും.
വിഷയത്തിൽ കേസെടുത്തതിന് പിന്നാലെ ആർ ഹരിയെ സസ്പെൻഡ് ചെയ്തിരുന്നു. സതീഷിന്റെ വിരമിക്കൽ ആനുകൂല്യം തടയുന്നതടക്കമുള്ള നടപടികളിലേക്ക് സർക്കാർ കടന്നിരുന്നു. കേസിൽ പി.എസ്.സി ചെയർമാൻ എം.ആർ ബൈജുവിനെ അന്വേഷണ സംഘം ചോദ്യം ചെയ്തിരുന്നു. ഇതുവരെ മൂന്ന് അംഗങ്ങളെയാണ് ചോദ്യം ചെയ്തത്. മുഴുവൻ അംഗങ്ങളെയും ചോദ്യം ചെയ്യാനാണ് ക്രൈംബ്രാഞ്ച് നീക്കം.
by Midhun HP News | Oct 31, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില വീണ്ടും കുത്തനെ ഇടിഞ്ഞു. ഇന്ന് പവന് ഒറ്റയടിക്ക് 2480 രൂപയാണ് കുറഞ്ഞത്. ഇന്നലെ 1240 രൂപയാണ് ഇടിഞ്ഞത്. 1,01,840 രൂപയാണ് ഒരു പവന് സ്വര്‍ണത്തിന്റെ പുതിയ വില. ഗ്രാമിന് ആനുപാതികമായി 310 രൂപയാണ് കുറഞ്ഞത്. 12,730 രൂപയാണ് ഒരു ഗ്രാം സ്വര്‍ണത്തിന്റെ വില.
ആഗോള വിപണിയിലെ എണ്ണവിലയും അമേരിക്കയില്‍ പണപ്പെരുപ്പനിരക്ക് ഉയര്‍ന്നതോടെ വീണ്ടും പലിശനിരക്ക് ഉയര്‍ത്തുമെന്ന റിപ്പോര്‍ട്ടുകളുമാണ് സ്വര്‍ണവിലയെ സ്വാധീനിച്ചത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 113 ഡോളറിന് മുകളിലാണ്. അമേരിക്കയില്‍ പണപ്പെരുപ്പം കഴിഞ്ഞമാസം 3.6 ശതമാനമായി ഉയര്‍ന്നിരിക്കുകയാണ്. പണപ്പെരുപ്പം രണ്ടു ശതമാനമായി നിയന്ത്രിക്കുകയാണ് യുഎസ് കേന്ദ്രബാങ്കായ ഫെഡറല്‍ റിസര്‍വിന്റെ ലക്ഷ്യം. ഈ ലക്ഷ്യം നേടാന്‍ ഫെഡറല്‍ റിസര്‍വ് അടിസ്ഥാന പലിശനിരക്ക് കൂട്ടാനുള്ള സാധ്യത 75 ശതമാനത്തിലധികമാണെന്ന് വിപണി വിദഗ്ധര്‍ പറയുന്നു. ഇതോടെ ഡോളറും ബോണ്ട് യീല്‍ഡും കരുത്താര്‍ജ്ജിക്കാനുള്ള സാധ്യതകള്‍ ഉണ്ട്. ഇതാണ് സ്വര്‍ണവില കുത്തനെ ഇടിയാന്‍ കാരണം.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
Recent Comments