by Midhun HP News | Oct 31, 2026 | Latest News, ജില്ലാ വാർത്ത
തിരുവനന്തപുരം: ബംഗാള്‍ ഉള്‍ക്കടലില്‍ വീണ്ടും ചുഴലിക്കാറ്റ് മുന്നറിയിപ്പ്. തെക്കു കിഴക്കന്‍ ബംഗാള്‍ ഉള്‍ക്കടലിനും ആന്‍ഡമാന്‍-നിക്കോബാര്‍ ദ്വീപുകള്‍ക്കും ആന്‍ഡമാന്‍ കടലിനും മുകളിലായി ശക്തികൂടിയ ന്യൂനമര്‍ദം സ്ഥിതി ചെയ്യുന്നുണ്ട്. അടുത്ത ആറു മണിക്കൂറിനകം ഇത് തീവ്ര ന്യൂനമര്‍ദമായി ശക്തിപ്രാപിക്കാന്‍ സാധ്യതയെന്നും തുടര്‍ന്നുള്ള 24 മണിക്കൂറിനുള്ളില്‍ ഇത് വീണ്ടും ശക്തിപ്രാപിച്ച് ചുഴലിക്കാറ്റായി മാറിയേക്കുമെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കി.
തുടര്‍ന്ന് പടിഞ്ഞാറ്-വടക്കുപടിഞ്ഞാറ് ദിശയില്‍ നീങ്ങി തിങ്കളാഴ്ച വൈകുന്നേരത്തോടെ മധ്യ-പടിഞ്ഞാറന്‍ ബംഗാള്‍ ഉള്‍ക്കടലില്‍ ആന്ധ്രാപ്രദേശ് തീരത്തിന് സമീപം എത്താന്‍ സാധ്യതയുണ്ട്. അതിശക്തമായ ചുഴലിക്കാറ്റായ ‘അര്‍ണബി’-ന്റെ ശേഷിപ്പ് തെക്കുകിഴക്കന്‍ ഉത്തര്‍പ്രദേശിനും സമീപപ്രദേശങ്ങള്‍ക്കും മുകളിലായി ന്യൂനമര്‍ദമായി സ്ഥിതിചെയ്യുന്നുണ്ട്. തെക്കന്‍ മഹാരാഷ്ട്ര തീരത്തിനും സമീപപ്രദേശങ്ങള്‍ക്കും മുകളിലായി ചക്രവാതചുഴിയും നിലനില്‍ക്കുന്നുണ്ട്. തെക്കന്‍ കേരള-കര്‍ണാടക തീരത്തിന് സമീപമുള്ള തെക്കുകിഴക്കന്‍ അറബിക്കടലില്‍ നിന്ന് തെക്കന്‍ മഹാരാഷ്ട്ര തീരത്തിന് സമീപമുള്ള ഉയര്‍ന്ന ചക്രവാതചുഴിയിലേക്ക് ഒരു ന്യൂനമര്‍ദ പാത്തിയും സ്ഥിതി ചെയ്യുന്നുണ്ട്.
ഇതിന്റെയെല്ലാം സ്വാധീനഫലമായി സംസ്ഥാനത്ത് ഞായറാഴ്ച മുതല്‍ ബുധനാഴ്ച വരെ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു. മഴയ്‌ക്കൊപ്പം ഇടിമിന്നലിനും മണിക്കൂറില്‍ 30-40 കിലോമീറ്റര്‍ വേഗത്തില്‍ ശക്തമായ കാറ്റിനും സാധ്യതയുണ്ട്. ഞായറാഴ്ച പത്തനംതിട്ട, കോട്ടയം, ഇടുക്കി ജില്ലകളിലും തിങ്കളാഴ്ച ഇടുക്കി, പാലക്കാട്, മലപ്പുറം, വയനാട് ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
by Midhun HP News | Oct 31, 2026 | Latest News, ദേശീയ വാർത്ത
ബംഗളൂരു: ബംഗളൂരുവിലെ പഞ്ചനക്ഷത്ര ഹോട്ടലിലെ സ്വിമ്മിങ് പൂളില്‍ നിന്ന് വൈദ്യുതാഘാതമേറ്റ് രണ്ട് വിദേശ പൗരന്മാര്‍ മരിച്ചു. രണ്ട് പേര്‍ക്ക് പരിക്കേറ്റിട്ടുണ്ട്. നഗരത്തിലെ ‘കോണ്‍റാഡ്’ എന്ന പഞ്ചനക്ഷത്ര ഹോട്ടലിലാണ് സംഭവം. ഹോട്ടലില്‍ താമസിച്ചിരുന്ന ജര്‍മ്മന്‍, സ്ലോവാക്യന്‍ പൗരന്മാരാണ് മരിച്ചത്.
ജര്‍മ്മന്‍ പൗരനും ലുഫ്താന്‍സ എയര്‍ലൈന്‍സിലെ ജീവനക്കാരനുമായ അലക്‌സാണ്ടര്‍ മാക്‌സിമിലിയന്‍ തീസ് (57), സ്ലൊവാക്യന്‍ പൗരനും ഐബിഎം പ്രോജക്ട് മാനേജരുമായ ജൂറാജ് ഹോര്‍വാത് (45) എന്നിവരാണ് മരിച്ചത്. വിദേശികളെ രക്ഷിക്കാന്‍ ശ്രമിക്കുന്നതിനിടെ പൂളിലെ ജീവനക്കാരനായ ഇന്ത്യക്കാരനും അമേരിക്കന്‍ പൗരനും പരിക്കേറ്റിട്ടുണ്ട്. പരിക്കേറ്റ ഇരുവരെയും മണിപ്പാല്‍ ആശുപത്രിയിലേക്ക് മാറ്റി.
ഇന്നലെ വൈകുന്നേരം നീന്താനായി ഹോട്ടലിന്റെ മൂന്നാം നിലയിലുള്ള സ്വിമ്മിങ് പൂളില്‍ ഇറങ്ങിയപ്പോഴാണ് അപകടം സംഭവിച്ചത്. അലക്‌സാണ്ടറുടെ ഭാര്യ സില്‍വിയ പൊലീസില്‍ പരാതി നല്‍കിയതോടെയാണ് സംഭവം പുറത്തറിഞ്ഞത്. ഇരുവരും സ്വിമ്മിങ് പൂളില്‍ വൈദ്യുതാഘാതമേറ്റ് വെള്ളത്തില്‍ മുങ്ങിമരിച്ചുവെന്നാണ് പരാതിയില്‍ പറയുന്നത്. നീന്തല്‍ക്കുളം കൃത്യമായി പരിപാലിക്കുന്നതില്‍ കോണ്‍റാഡ് ഹോട്ടല്‍ മാനേജ്മെന്റ് വരുത്തിയ അശ്രദ്ധ മൂലമാണ് മരണം സംഭവിച്ചതെന്ന പരാതിയില്‍ പൊലീസ് കേസെടുത്തു.
by Midhun HP News | Oct 31, 2026 | Latest News, ജില്ലാ വാർത്ത
തിരുവനന്തപുരം: കേരള പിഎസ് സി നടത്തിയ അസിസ്റ്റന്റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ നിയമന പരീക്ഷയിലെ 45 ചോദ്യങ്ങള്‍ ഓണ്‍ലൈന്‍ സ്റ്റഡി മെറ്റീരിയല്‍ ഹാന്‍ഡ് ബുക്കില്‍ നിന്ന് അതേപടി പകര്‍ത്തിയതെന്ന് ക്രൈംബ്രാഞ്ച് കണ്ടെത്തല്‍. പിഎസ് സി നടത്തിയ പരീക്ഷകളിലെ ക്രമക്കേടുകളെ കുറിച്ച് നടന്നുവരുന്ന അന്വേഷണത്തിന്റെ ഭാഗമായാണ് ഇത് കണ്ടെത്തിയത്. വിഷയത്തില്‍ പുതിയൊരു കേസ് കൂടി രജിസ്റ്റര്‍ ചെയ്തതായി ഉദ്യോഗസ്ഥര്‍ അറിയിച്ചു.
പെരുമ്പാവൂര്‍ സ്വദേശിയായ രാഹുല്‍ രാജ് നല്‍കിയ പരാതിയുടെ അടിസ്ഥാനത്തില്‍ തിരിച്ചറിയാത്ത പിഎസ് സി ഉദ്യോഗസ്ഥര്‍ക്കെതിരെയാണ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചത്. നിശ്ചിത ശാരീരിക യോഗ്യതകളില്ലാത്ത ഉദ്യോഗാര്‍ഥികളെ ഉള്‍പ്പെടുത്തിയതും അപേക്ഷ സമര്‍പ്പിക്കാനുള്ള അവസാന തീയതിക്ക് മുമ്പായി, നിയമന വിജ്ഞാപനത്തില്‍ പറഞ്ഞിട്ടുള്ള യോഗ്യതകള്‍ക്ക് പുറമേ മറ്റു രണ്ടു കോഴ്‌സുകളെ കൂടി യോഗ്യതയായി കൂട്ടിച്ചേര്‍ത്തതും അടക്കമുള്ള ക്രമക്കേടുകള്‍ നടന്നതായും എഫ്‌ഐആറില്‍ പറയുന്നു. പരീക്ഷയിലെ 45 ചോദ്യങ്ങള്‍ സ്‌കാംവേദ ഓണ്‍ലൈന്‍ സ്റ്റഡി മെറ്റീരിയല്‍സ്, സാന്‍ഫൗണ്ട്രി ഡോട്ട് കോം തുടങ്ങിയ ഓണ്‍ലൈന്‍ പഠന പ്ലാറ്റ്‌ഫോമുകളില്‍ നിന്ന് അതേപടി പകര്‍ത്തിയതാണെന്നും എഫ്‌ഐആറില്‍ പറയുന്നു.
ഈ ക്രമക്കേടുകള്‍ കാരണം 2024 സെപ്റ്റംബര്‍ രണ്ടിന് പ്രസിദ്ധീകരിച്ച റാങ്ക് ലിസ്റ്റില്‍ യോഗ്യതയില്ലാത്ത ഉദ്യോഗാര്‍ഥികള്‍ ഉള്‍പ്പെടുകയും അതുവഴി അര്‍ഹരായ ഉദ്യോഗാര്‍ഥികള്‍ക്ക് ലഭിക്കേണ്ടിയിരുന്ന അവസരം നഷ്ടമായതായും എഫ്‌ഐആറില്‍ ചൂണ്ടിക്കാണിക്കുന്നു. ഭാരതീയ ന്യായ സംഹിതയിലെയും അഴിമതി തടയല്‍ നിയമത്തിലെയും വിവിധ വകുപ്പുകള്‍ പ്രകാരമാണ് കേസ് രജിസ്റ്റര്‍ ചെയ്തത്.
പിഎസ്‌സി ചെയര്‍മാനെ പ്രതി ചേര്‍ത്തു
അതിനിടെ ഫിഷറീസ് എക്സ്റ്റന്‍ഷന്‍ ഓഫിസര്‍ നിയമന ക്രമക്കേടില്‍ പിഎസ്‌സി ചെയര്‍മാന്‍ എംആര്‍ ബൈജുവിനെ പ്രതി ചേര്‍ത്തു. ഒക്ടോബര്‍ 28ന് രജിസ്റ്റര്‍ ചെയ്ത കേസില്‍ 2022 നവംബര്‍ 28ന് പ്രസിദ്ധീകരിച്ചതും 2025 നവംബര്‍ 28 വരെ കാലാവധിയുള്ളതുമായ റാങ്ക് ലിസ്റ്റില്‍ ക്രമക്കേടുകള്‍ നടന്നതായി ക്രൈംബ്രാഞ്ച് ആരോപിക്കുന്നു. സേവ് യൂണിവേഴ്‌സിറ്റി പ്രവര്‍ത്തകനായ ശശി കുമാറിന്റെ പരാതിയിലാണ് അന്വേഷണം നടക്കുന്നത്.
ചെയര്‍മാന്റെ അറിവോടെ ചില ഉദ്യോഗസ്ഥര്‍ ചോദ്യ പേപ്പര്‍ ചോര്‍ത്തി ഫിഷറീസ് സര്‍വകലാശാലയിലെ സിപിഎം അനുഭാവികളായ ഉദ്യോഗാര്‍ഥികള്‍ക്ക് ജോലി നേടാന്‍ സഹായിച്ചുവെന്നാണ് ശശികുമാറിന്റെ മൊഴി. മൊഴിയുടെ അടിസ്ഥാനത്തിലാണ് നിലവില്‍ ചെയര്‍മാനെ പ്രതിചേര്‍ത്തിട്ടുള്ളത്.
പരീക്ഷയില്‍ ആദ്യ നൂറ് റാങ്കില്‍ പെട്ടവരെല്ലാം ഫിഷറീസ് സര്‍വകലാശാലയില്‍ പഠിച്ചവരാണ്. കേരളത്തിനു പുറത്തു നിന്നുള്ള മറ്റ് യൂണിവേഴ്‌സിറ്റികളില്‍ നിന്ന് പഠിച്ചിറങ്ങിയവര്‍ക്ക് ഉയര്‍ന്ന റാങ്ക് ലഭിച്ചില്ല. ചോദ്യ പേപ്പര്‍ ചോര്‍ത്തി നല്‍കി അട്ടിമറി നടത്തിയെന്നാണ് പരാതിയിലുള്ളത്. പിഎസ്‌സിക്കെതിരെ നടക്കുന്ന മൂന്ന് അന്വേഷണങ്ങളില്‍ രണ്ടാമത്തെ കേസിലാണ് ചെയര്‍മാനെതിരെ കേസെടുത്തിരിക്കുന്നത്.
by Midhun HP News | Oct 31, 2026 | Latest News, കേരളം
കണ്ണൂര്‍: ഞെകളി കൊട്ടാളം കുന്നിലെ റബ്ബര്‍ എസ്റ്റേറ്റില്‍ മനുഷ്യന്റെ അസ്ഥിക്കൂടം കണ്ടെത്തി. ചിതറിക്കിടക്കുന്ന നിലയിലായിരുന്നു അസ്ഥിക്കൂടം. കുത്തനെയുള്ള കുന്നിന്‍ പ്രദേശത്തെ ഏക്കറുകണക്കിന് വരുന്ന തോട്ടത്തില്‍ കാട് തെളിക്കാന്‍ എത്തിയ തൊഴിലാളികളാണ് രാവിലെ അസ്ഥികൂടം കണ്ടെത്തിയത്.
കടന്നപ്പളളി പടിഞ്ഞാറെക്കര ഷമീ മാസ് വീട്ടില്‍ പി. അബുബക്കറിന്റെ ഉടമസ്ഥതയിലുളളതാണ് എസ്റ്റേറ്റ്. ഇന്നലെ രാവിലെ 11.30 ന് എസ്റ്റേറ്റിലെത്തിയ അബുബക്കര്‍ പൊലീസിനെ വിവരം അറിയിച്ചു. പെരിങ്ങോം എസ്. ഐ. കെ. ഖദീജയുടെ നേതൃത്വത്തില്‍ പൊലിസ് അന്വേഷണം ആരംഭിച്ചു.
മരത്തില്‍ ഒരു തുണി തുങ്ങിക്കിടക്കുന്ന നിലയില്‍ കണ്ടെത്തിയതിനാല്‍ തുങ്ങിമരിച്ചതായിക്കൊമെന്ന് കരുതുന്നു. അസ്ഥികള്‍ക്ക് വര്‍ഷങ്ങളുടെ പഴക്കമുണ്ട്. പെരിങ്ങോം പൊലീസും കണ്ണൂരില്‍ നിന്ന് ഫൊറന്‍സിക് വിഭാഗവും സ്ഥലത്തെത്തി വിശദപരിശോധനയ്ക്കായി അസ്ഥികൂടം ശേഖരിച്ചു. അടുത്ത കാലത്ത് സമീപ പ്രദേശങ്ങളില്‍ നിന്നും കാണാതായവരുടെ വിവരങ്ങള്‍ ശേഖരിച്ച് മരിച്ചയാളെ തിരിച്ചറിയാനുള്ള ശ്രമത്തിലാണ് പൊലിസ്.
by Midhun HP News | Oct 31, 2026 | Latest News, കേരളം
പാലക്കാട്: പാലക്കാട് പതിനാറുകാരന്റെ കുത്തേറ്റ് ചികിത്സയിലായിരുന്ന മുത്തശ്ശന്‍ മരിച്ചു. കാവശ്ശേരി വാഴക്കച്ചിറ സ്വദേശി സുലൈമാന് (65) ആണ് മരിച്ചത്. 19ന് കാവശ്ശേരിയിലെ വീട്ടില്‍വെച്ച് വൈകിട്ട് ഏഴുമണിയോടെയായിരുന്നു സംഭവം.
സുലൈമാന്റെ മകളുടെ മകനായ 16കാരന്‍ 10 വയസ്സുള്ള സഹോദരിയുമായുള്ള തര്‍ക്കത്തിനിടെ കത്തികൊണ്ട് കുത്താന്‍ ശ്രമിച്ചപ്പോള്‍ തടഞ്ഞപ്പോഴാണ് സുലൈമാന് കുത്തേറ്റത്. നെഞ്ചിനും കഴുത്തിനും വയറിനുമാണ് കുത്തേറ്റത്. രണ്ടുപേരെയും ആലത്തൂരിലെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും സുലൈമാന്റെ നില ഗുരുതരമായതിനെ തുടര്‍ന്ന് തൃശൂര്‍ മെഡിക്കല്‍ കോളജിലേക്ക് മാറ്റിയിരുന്നു.
ചികിത്സ തുടരുന്നതിനിടെ ഇന്നലെ രാത്രിയാണ് സുലൈമാന് മരിച്ചത്. സഹോദരി അപകടനില തരണം ചെയ്തു. സംഭവശേഷം ഒളിവില്‍ പോയ പ്രതിയെ പിന്നീട് പൊലീസ് പിടികൂടി ജുവനൈല്‍ ഹോമിലാക്കി. പ്രതിയുടെ മറ്റു പശ്ചാത്തലങ്ങളെ കുറിച്ച് പൊലീസ് അന്വേഷിച്ചുവരികയാണ്.
Recent Comments