by Midhun HP News | Mar 15, 2025 | Latest News, ജില്ലാ വാർത്ത
തിരുവനന്തപുരം: നികുതി കുടിശ്ശിക ഒറ്റത്തവണ നികുതി തീര്പ്പാക്കല് പദ്ധതി വഴി അടച്ചു തീര്ക്കാനുള്ള അവസരവുമായി മോട്ടോര് വാഹനവകുപ്പ്. നിങ്ങളുടെ പഴയ വാഹനത്തിന്മേലുള്ള നികുതി കുടിശ്ശിക തീര്ക്കാന് മാര്ച്ച് 31 വരെ അവസരമുണ്ടെന്ന് മോട്ടോര് വാഹനവകുപ്പ് അറിയിച്ചു. 2020 മാര്ച്ച് 31ന് ശേഷം ടാക്സ് അടയ്ക്കാന് കഴിയാത്ത വാഹനങ്ങള്ക്ക് ഈ സേവനം ഉപയോഗപ്പെടുത്താം.
വാഹനം ഉപയോഗശൂന്യമാകുകയോ വിറ്റു പോയെങ്കിലും നിങ്ങളില് നിന്നും ഉടമസ്ഥത മാറാതിരിക്കുകയോ വാഹനത്തെക്കുറിച്ച് യാതൊരു വിവരവും ഇല്ലാതിരിക്കുകയോ ആണെങ്കില് അവയുടെ നികുതി കുടിശ്ശിക ചുരുങ്ങിയ നിരക്കില് ഒറ്റതവണ പദ്ധതിയിലൂടെ അടച്ച് എന്നെന്നേക്കുമായി ബാധ്യത അവസാനിപ്പിക്കാവുന്നതാണെന്ന് എംവിഡി അറിയിച്ചു. ഒറ്റത്തവണ നികുതി കുടിശ്ശിക തീര്പ്പാക്കല് പദ്ധതിയുടെ കാലാവധി മാര്ച്ച് 31ന് അവസാനിക്കുമെന്നും മോട്ടോര് വാഹനവകുപ്പ് ഓര്മ്മപ്പെടുത്തി. കൂടുതല് വിവരങ്ങള്ക്ക് നിങ്ങളുടെ ആര്ടി ഓഫീസുമായി ബന്ധപ്പെടണമെന്നും എംവിഡി അറിയിച്ചു.
by Midhun HP News | Mar 15, 2025 | Latest News, കേരളം
കൊച്ചി: കളമശേരി പോളിടെക്നിക് കോളജ് ഹോസ്റ്റലിൽ നിന്ന് കഞ്ചാവ് ശേഖരം പിടികൂടിയ സംഭവത്തിൽ രണ്ട് പൂർവ വിദ്യാർഥികൾ കസ്റ്റഡിയിൽ. ഹോസ്റ്റലിൽ കഞ്ചാവ് എത്തിച്ച ആഷിഖ്, ഷാരിൽ എന്നിവരെയാണ് പൊലീസ് പിടികൂടിയത്. കഴിഞ്ഞ വർഷം ക്യാമ്പസിൽ നിന്ന് പഠിച്ചിറങ്ങിയവരാണിവർ. ആഷിഖ് ആണ് കഞ്ചാവ് എത്തിച്ചതെന്ന് പൊലീസ് പറഞ്ഞു. പോളിടെക്നിക്കിൽ നിന്ന് സെമസ്റ്റർ ഔട്ട് ആയ വിദ്യാർഥിയാണ് ആഷിഖ്.
സംഭവത്തിൽ ഇരുവരെയും പൊലീസ് വിശദമായി ചോദ്യം ചെയ്യുകയാണ്. മുൻപ് പിടിയിലായ വിദ്യാർഥികളുടെ മൊഴിയിൽ നിന്നാണ് പൂർവ വിദ്യാർഥികൾക്കെതിരായ തെളിവുകൾ ലഭിച്ചത്. വ്യാഴാഴ്ച വൈകിട്ട് ആറു മണിക്ക് ശേഷമാണ് ആഷിഖ് കഞ്ചാവ് എത്തിച്ചതെന്നാണ് കരുതുന്നത്. ആഷിഖിന് എവിടെ നിന്നാണ് ലഹരി ലഭിച്ചതെന്ന് പൊലീസ് അന്വേഷിക്കും. സെമസ്റ്റര് ഔട്ടായ ശേഷവും ഇയാള് നിരന്തരം ഹോസ്റ്റലില് എത്തിയിരുന്നുവെന്നാണ് വിവരം.
ഇയാള് ലഹരി വിതരണക്കാരനാണോ, സ്ഥിരമായി ഹോസ്റ്റലില് കഞ്ചാവ് എത്തിക്കുന്ന ആളാണോ, എവിടെ നിന്ന് കഞ്ചാവ് ലഭിച്ചു എന്നീ കാര്യങ്ങളിലാണ് പൊലീസ് അന്വേഷണം നടത്തുക. അതേസമയം ഹോസ്റ്റലിലെ വിദ്യാര്ഥികളുടെ ബാങ്ക് അക്കൗണ്ടുകള് പരിശോധിക്കാന് ഒരുങ്ങുകയാണ് പൊലീസ്. ഏതെല്ലാം അക്കൗണ്ടുകളിലേക്ക് പണം വന്നെന്നും പോയെന്നുമുള്ള അന്വേഷമാണ് നടത്തുക. ഇതിലൂടെ ലഹരി വില്പ്പന നടത്തുന്നവരിലേക്ക് എത്താന് സാധിക്കുമെന്നാണ് പൊലീസ് കരുതുന്നത്.
ഹോളി ആഘോഷത്തോട് അനുബന്ധിച്ച് 500 രൂപ മുതലാണ് ലഹരിവില്പ്പന നടത്തിയതെന്നാണ് പൊലീസിന് ലഭിക്കുന്ന വിവരം. ഇതിന്റെ കൂടി അടിസ്ഥാനത്തിലാണ് ബാങ്ക് അക്കൗണ്ടുകളില് പരിശോധന നടത്തുന്നത്. ഇതിന് പുറമേ ഫോണ് രേഖകളും പരിശോധിക്കും. കേസില് സംശയമുള്ള ആളുകളെ വിശദമായി പരിശോധിക്കും.
അറസ്റ്റു ചെയ്ത് ജാമ്യത്തില് വിട്ടയച്ച വിദ്യാര്ഥികളെ ആവശ്യമെങ്കില് വീണ്ടും വിളിച്ചുവരുത്തി ചോദ്യം ചെയ്തേക്കും. കളമശേരി പോളിടെക്നിക് കോളജിലെ പെരിയാർ മെന്സ് ഹോസ്റ്റലില് നിന്ന് കഞ്ചാവ് പിടിച്ചെടുത്ത സംഭവത്തില് രണ്ടു കേസുകളാണ് രജിസ്റ്റര് ചെയ്തത്. കൊല്ലം കുളത്തൂപ്പുഴ ആകാശ് (21), ആലപ്പുഴ കാര്ത്തികപ്പിള്ളി സ്വദേശി ആദിത്യന് (20), കൊല്ലം കരുനാഗപ്പള്ളി സ്വദേശി ആര് അഭിരാജ് (21) എന്നിവരാണ് അറസ്റ്റിലായത്.
by Midhun HP News | Mar 15, 2025 | Latest News, കേരളം
കൊച്ചി: വാടക ഗർഭപാത്രത്തിലൂടെ അമ്മയാകാനുള്ള അവകാശം 51 വയസ് തികയുന്നതിന്റെ തലേന്ന് വരെയുണ്ടെന്ന് ഹൈക്കോടതി. 50 വയസായി എന്നതിന്റെ പേരിൽ ഇതിന് അനുമതി നിഷേധിച്ച സിംഗിൾ ബെഞ്ച് ഉത്തരവ് ചീഫ് ജസ്റ്റിസ് നിതിൻ ജാംദാർ, ജസ്റ്റിസ് എസ് മനു എന്നിവരടങ്ങിയ ഡിവിഷൻ ബെഞ്ച് റദ്ദാക്കി. കണ്ണൂർ സ്വദേശികളായ ദമ്പതിമാരാണ് വാടകഗർഭപാത്രത്തിലൂടെ അമ്മയാകാനുള്ള അനുമതി തേടി ഹൈക്കോടതിയെ സമീപിച്ചത്.
സ്ത്രീകൾക്ക് 23 മുതൽ 50 ഉം പുരുഷന് 26 മുതൽ 55 വയസുമാണ് വാടക ഗർഭധാരണ നിയമപ്രകാരമുള്ള പ്രായപരിധി. സ്ത്രീയുടെ കാര്യത്തിൽ 51 തികയുന്നതിന്റെ തലേന്നു വരെ ഇതിന് സാധ്യതയുണ്ടെന്ന് വ്യക്തമാക്കിയ ഡിവിഷൻ ബെഞ്ച് ഒരാഴ്ചയ്ക്കകം ഹർജിക്കാർക്ക് യോഗ്യത സർട്ടിഫിക്കറ്റ് നൽകാൻ നിർദേശിച്ചു. സ്കൂള് രേഖപ്രകാരം 1974 ജൂണ് 21 ആണ് ഹര്ജിക്കാരിയുടെ ജനനത്തീയതി. അതിനാല് പ്രായപരിധി കഴിഞ്ഞെന്നു വിലയിരുത്തി സറോഗസി ബോര്ഡ് അനുമതി നിഷേധിച്ചു.
ആധാര്, പാസ്പോര്ട്ട്, ഡ്രൈവിങ് ലൈസന്സ് തുടങ്ങിയവയില് ജനനത്തീയതി 1978 ജൂണ് 21 ആണ്. ബോര്ഡ് ഇത് പരിഗണിച്ചില്ല. തുടര്ന്ന് ഹൈക്കോടതി സിംഗിള് ബെഞ്ചിനെ സമീപിച്ചെങ്കിലും അനുകൂല ഉത്തരവുണ്ടായില്ല. തുടര്ന്ന് അപ്പീല് നല്കി. സ്കൂള് രേഖയ്ക്ക് പകരം മറ്റ് ആധികാരിക രേഖ പരിശോധിച്ച് അനുമതി നല്കണമെന്നതടക്കമുള്ള ആവശ്യമാണ് ഉന്നയിച്ചിരുന്നത്. എന്നാല് പ്രായം കണക്കാക്കാന് സ്കൂള് രേഖയെ പരിഗണിക്കാനാകൂവെന്ന് ഡിവിഷന് ബെഞ്ചും വിലയിരുത്തി.
അതേസമയം 51 ആകുന്നതിന് മുന്പുള്ള മുഴുവന് കാലയളവും ഉള്പ്പെടുന്നതാണ് 50 വയസു പരിധിയെന്ന് വിലയിരുത്തി അപ്പീല് അനുവദിച്ചു. നിയമങ്ങളുടെ വ്യാഖ്യാനം ജനങ്ങളുടെ അവകാശങ്ങളെയും ജീവിതത്തെയും നേരിട്ടു ബാധിക്കുന്നതാണെന്നും അത് ദുര്ഗ്രഹമാകേണ്ടതില്ലെന്നും ഡിവിഷന് ബെഞ്ച് അഭിപ്രായപ്പെട്ടു.
by Midhun HP News | Mar 15, 2025 | Latest News, ദേശീയ വാർത്ത
ഫ്ലോറിഡ: ബഹിരാകാശ യാത്രികരായ സുനിത വില്യംസിനെയും ബുച്ച് വിൽമോറിനെയും തിരിച്ചുകൊണ്ടുവരാനുള്ള നാസയും സ്പേസ് എക്സും ചേർന്നു നടത്തിയ ക്രൂ 10 വിക്ഷേപണം വിജയകരം. ഫ്ലോറിഡയിലെ കെന്നഡി സ്പേസ് സെന്ററിൽ നിന്ന് ഫാൽക്കൺ 9 റോക്കറ്റിലാണ് സ്പേസ് എക്സ് ക്രൂ 10 വിക്ഷേപിച്ചത്. നാല് ബഹിരാകാശ സഞ്ചാരികളുമായി ഇന്നലെ വൈകുന്നേരം 7:03 ന് (ഇന്ത്യൻ സമയം ശനിയാഴ്ച പുലർച്ചെ 4:30) ആണ് പേടകം പുറപ്പെട്ടത്. നാളെ രാവിലെ 9 മണിക്ക് ക്രൂ 10 അന്താരാഷ്ട്ര ബഹിരാകാശ നിലയത്തിൽ ഡോക്ക് ചെയ്യും.
നാസയിലെ ആനി മക്ലെയിൻ, നിക്കോൾ അയേഴ്സ്, ജാപ്പനീസ് ബഹിരാകാശ ഏജൻസിയായ ജാക്സയിലെ തകുയ ഒനിഷി, റോസ്കോസ്മോസിന്റെ കിറിൽ പെസ്കോവ് എന്നിവരാണ് സംഘത്തിലുള്ളത്. സുനിത വില്യംസ് ഉള്പ്പെടെയുള്ളവർ മാർച്ച് 19ന് ഭൂമിയിലേക്ക് മടങ്ങും. പുതിയ സഞ്ചാരികളെ സുനിത വില്യംസും സംഘവും സ്വീകരിക്കും.
മാർച്ച് 12 ന് ഫ്ലോറിഡയിൽ നിന്ന് ക്രൂ10 ദൗത്യം നടത്താൻ സ്പേസ് എക്സും നാസയും പദ്ധതിയിട്ടിരുന്നു. എന്നാൽ അവസാന നിമിഷം റോക്കറ്റിൽ സാങ്കേതിക തകരാർ കണ്ടെത്തിയതിനെ തുടർന്ന് ദൗത്യം നീട്ടി വയ്ക്കുകയായിരുന്നു. 9 മാസമായി രാജ്യാന്തര ബഹിരാകാശ സ്റ്റേഷനിൽ (ഐഎസ്എസ്) കുടുങ്ങിക്കിടക്കുകയാണ് സുനിതയും ബുച്ചും.
നാസയും ഇലോൺ മസ്കിന്റെ സ്പേസ് എക്സും ചേര്ന്നുള്ള ദൗത്യമാണ് ക്രൂ10. കഴിഞ്ഞ ജൂൺ അഞ്ചിനായിരുന്നു ബോയിങ് സ്റ്റാർലൈനർ പേടകത്തിൽ സുനിത വില്യംസും, ബുച്ച് വിൽമോറും ബഹിരാകാശ നിലയത്തിലെത്തിയത്.
by Midhun HP News | Mar 15, 2025 | Latest News, കേരളം
`കൊച്ചി: വിദ്യാര്ഥികള്ക്ക് അധ്യാപകര് നല്കുന്ന ചെറിയ ശിക്ഷകള്ക്ക് പോലും ക്രിമിനില് കേസ് എടുക്കുന്ന നടപടിക്കെതിരെ രൂക്ഷവിമര്ശനവുമായി ഹൈക്കോടതി. സ്കൂളിലോ കോളജിലോ ഉണ്ടാകുന്ന ഇത്തരം കാര്യങ്ങളുടെ പേരില് പരാതി ലഭിച്ചാല് അന്വേഷണ ഉദ്യോഗസ്ഥന് പ്രാഥമികാന്വേഷണം നടത്തി കേസില് കഴമ്പുണ്ടോ എന്നു പരിശോധിക്കണമെന്നും പ്രാഥമികാന്വേഷണ സമയത്ത് അധ്യാപകനെ അറസ്റ്റ് ചെയ്യാന് പാടില്ലെന്നും ജസ്റ്റിസ് പിവി കുഞ്ഞികൃഷ്ണന് വ്യക്തമാക്കി. ആറാം ക്ലാസുകാരനെ അധ്യാപകന് വടി കൊണ്ട് തല്ലി എന്നു കാട്ടി പിതാവ് നല്കിയ ഹര്ജിയില് വിഴിഞ്ഞം പൊലീസ് എടുത്ത ക്രിമിനല് കേസിലാണ് ഹൈക്കോടതിയുടെ വിധി. അധ്യാപകന് മുന്കൂര് ജാമ്യം അനുവദിക്കാനും കോടതി ഉത്തരവിട്ടു.
ഇക്കാലത്ത് വിദ്യാര്ഥികളുടെ സ്വഭാവവും അച്ചടക്കവും മറ്റും സംബന്ധിച്ച് എന്തെങ്കിലും നടപടി എടുക്കാന് അധ്യാപകര് ഭയപ്പെടുകയാണെന്നു കോടതി ചൂണ്ടിക്കാട്ടി. ക്രിമിനല് കേസ് വരുമെന്ന ഭയത്തിലാണ് അധ്യാപകര്. മുന്കാലങ്ങളില് അധ്യാപകര് ഏര്പ്പെടുത്തിയിരുന്ന അച്ചടക്ക നടപടികള് വിദ്യാര്ഥികളുടെ ഭാവി മികച്ചതാകാന് ഉപകരിച്ചിരുന്നു. ഒരു വിദ്യാര്ഥിയുടെ ശാരീരികവും മാനസികവും വിദ്യാഭ്യാസപരവുമായ ഉന്നതിയില് അധ്യാപകന്റെ പങ്ക് വലുതാണ്. വിദ്യാര്ഥി സ്കൂളില് പ്രവേശിച്ചു കഴിഞ്ഞാല് അവരുടെ മികച്ച ഭാവിക്കു വേണ്ടി മാതാപിതാക്കള് അധ്യാപകര്ക്ക് എല്ലാ സ്വാതന്ത്ര്യവും നല്കുകയാണ്. അധ്യാപകര് അവരുടെ ഉത്തരവാദിത്തം നിറവേറ്റുമ്പോള് അവിടെ ക്രിമിനല് കേസ് പോലുള്ള ഭീഷണികള് ഉണ്ടാകാന് പാടില്ല. എന്നാല് എല്ലാ അധ്യാപകരുടേയും എല്ലാ പ്രവര്ത്തികളും നല്ലതാണ് എന്നു പറയുന്നില്ല. എന്നാല് ഉപദേശിച്ചതിന്റെ പേരിലോ ചെറിയ ശിക്ഷ നല്കുന്നതിന്റെ പേരിലോ അധ്യാപക സമൂഹമാകെ കേസ് നേരിടേണ്ടി വരുന്ന സ്ഥിതി പാടില്ല എന്നും കോടതി അഭിപ്രായപ്പെട്ടു.
ഇപ്പോള് യുവതലമുറയുടെ സ്വഭാവം ഭയപ്പെടുത്തുന്നതാണെന്നും കോടതി ചൂണ്ടിക്കാട്ടി. അവര് ക്രിമിനല് കേസുകളില് ഉള്പ്പെടുന്നു, ചിലര് ലഹരിക്കും മദ്യത്തിനുമൊക്കെ അടിപ്പെടുന്നു. മുന്പ് ഇങ്ങനെയായിരുന്നില്ല. അധ്യാപകരുടെ നിഴല് പോലും അച്ചടക്കത്തോടെ ഇരിക്കാന് വിദ്യാര്ഥികളെ പ്രേരിപ്പിച്ചിരുന്നു. എന്നാല് ഇന്ന് വിദ്യാര്ഥികള് അധ്യാപകരെ ഭീഷണിപ്പെടുത്തുന്നതും അവരെ കായികമായി ആക്രമിക്കുന്നതും തടഞ്ഞു വയ്ക്കുന്നതുമായ വാര്ത്തകളാണ് വരുന്നത്. പഠിപ്പിക്കുക മാത്രമല്ല അധ്യാപകരുടെ ജോലി, മറിച്ച് അടുത്ത തലമുറയ്ക്ക് പ്രചോദനവും ലക്ഷ്യബോധവും ഉണ്ടാക്കി നല്കല് കൂടിയാണെന്നും കോടതി അഭിപ്രായപ്പെട്ടു.
ഇപ്പോള് യുവതലമുറയുടെ സ്വഭാവം ഭയപ്പെടുത്തുന്നതാണെന്നും കോടതി ചൂണ്ടിക്കാട്ടി. അവര് ക്രിമിനല് കേസുകളില് ഉള്പ്പെടുന്നു, ചിലര് ലഹരിക്കും മദ്യത്തിനുമൊക്കെ അടിപ്പെടുന്നു. മുന്പ് ഇങ്ങനെയായിരുന്നില്ല. അധ്യാപകരുടെ നിഴല് പോലും അച്ചടക്കത്തോടെ ഇരിക്കാന് വിദ്യാര്ഥികളെ പ്രേരിപ്പിച്ചിരുന്നു. എന്നാല് ഇന്ന് വിദ്യാര്ഥികള് അധ്യാപകരെ ഭീഷണിപ്പെടുത്തുന്നതും അവരെ കായികമായി ആക്രമിക്കുന്നതും തടഞ്ഞു വയ്ക്കുന്നതുമായ വാര്ത്തകളാണ് വരുന്നത്. പഠിപ്പിക്കുക മാത്രമല്ല അധ്യാപകരുടെ ജോലി, മറിച്ച് അടുത്ത തലമുറയ്ക്ക് പ്രചോദനവും ലക്ഷ്യബോധവും ഉണ്ടാക്കി നല്കല് കൂടിയാണെന്നും കോടതി അഭിപ്രായപ്പെട്ടു.
Recent Comments