by Midhun HP News | Sep 8, 2026 | Latest News, ജില്ലാ വാർത്ത
തിരുവനന്തപുരം: ലഹരിമരുന്നുമായി നിയമ വിദ്യാര്‍ഥി പിടിയില്‍. എംഡിഎംഎ വില്‍പ്പന നടത്തുന്നതിനിടെയാണ് നിയമ വിദ്യാര്‍ഥിയായ, മലയം സ്വദേശി ജിനേഷ് വിജയനെ എക്‌സൈസ് പിടികൂടിയത്.
ഇയാളില്‍ നിന്നും 4.5 ഗ്രാം എംഡിഎംഎ പിടിച്ചെടുത്തു. ആളുകളെ തെറ്റിദ്ധരിപ്പിക്കുന്നതിനും പൊലീസിന്റെയും എക്‌സൈസിന്റെയും പരിശോധനകളില്‍ നിന്ന് രക്ഷപ്പെടാനുമായി വെളുത്ത ഷര്‍ട്ടും കറുത്ത പാന്റും ധരിച്ചായിരുന്നു ഇയാള്‍ ലഹരിക്കച്ചവടം നടത്തിയിരുന്നത്.
നാട്ടുകാരോടും പൊലീസിനോടും താന്‍ അഭിഭാഷകനാണെന്നാണ് ജിനേഷ് പറഞ്ഞിരുന്നത്. ഇയാള്‍ക്ക് എവിടെ നിന്നാണ് ലഹരി ലഭിച്ചത്, മറ്റ് വിദ്യാര്‍ഥികളോ സംഘങ്ങളോ പിന്നിലുണ്ടോ തുടങ്ങിയ കാര്യങ്ങള്‍ അന്വേഷിച്ചു വരികയാണെന്ന് എക്‌സൈസ് ഉദ്യോഗസ്ഥര്‍ വ്യക്തമാക്കി.
by Midhun HP News | Sep 8, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് ചൂട് കൂടുന്ന സാഹചര്യത്തില്‍ ജാഗ്രതാ നിര്‍ദേശങ്ങളുമായി സംസ്ഥാന ദുരന്ത നിവാരണ അതോറിറ്റി. കേരളത്തില്‍ ഇന്നും നാളെയും ഉയര്‍ന്ന താപനില ഉയരാന്‍ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഉയര്‍ന്ന ചൂട് സൂര്യാഘാതം, സൂര്യാതപം, നിര്‍ജലീകരണം തുടങ്ങി നിരവധി ഗുരുതരമായ ആരോഗ്യപ്രശ്‌നങ്ങള്‍ക്ക് കാരണമാകുമെന്നും മുന്നറിയിപ്പില്‍ പറയുന്നു.
പകല്‍ 11 മുതല്‍ 3 വരെയുള്ള സമയത്ത് നേരിട്ട് ശരീരത്തില്‍ കൂടുതല്‍ സമയം തുടര്‍ച്ചയായി സൂര്യപ്രകാശം ഏല്‍ക്കുന്നത് ഒഴിവാക്കുക.
ദാഹമില്ലെങ്കിലും വെള്ളം കുടിക്കുന്നത് തുടരുക. പരമാവധി ശുദ്ധജലം കുടിക്കുക.
നിര്‍ജലീകരണമുണ്ടാക്കുന്ന മദ്യം, കാപ്പി, ചായ, കാര്‍ബണേറ്റഡ് സോഫ്റ്റ് ഡ്രിങ്കുകള്‍ തുടങ്ങിയ പാനീയങ്ങള്‍ പകല്‍ സമയത്ത് ഒഴിവാക്കുക.
അയഞ്ഞ, ഇളം നിറത്തിലുള്ള കോട്ടണ്‍ വസ്ത്രങ്ങള്‍ ധരിക്കുക.
പുറത്തിറങ്ങുമ്പോള്‍ ചെരുപ്പ് ധരിക്കുക. കുടയോ തൊപ്പിയോ ഉപയോഗിക്കുന്നത് നല്ലതായിരിക്കും.
പഴങ്ങളും പച്ചക്കറികളും ധാരാളമായി കഴിക്കുക. ഒആര്‍എസ് ലായനി, സംഭാരം തുടങ്ങിയവയുടെ ഉപയോഗം പ്രോത്സാഹിപ്പിക്കുക.
മാര്‍ക്കറ്റുകള്‍, കെട്ടിടങ്ങള്‍, മാലിന്യശേഖരണ- നിക്ഷേപ കേന്ദ്രങ്ങള്‍ (ഡംപിംഗ് യാര്‍ഡ്) തുടങ്ങിയ ഇടങ്ങളില്‍ തീപിടുത്തമുണ്ടാകാനും വ്യാപിക്കാനുമുള്ള സാധ്യത കൂടുതലാണ്. ഫയര്‍ ഓഡിറ്റ് നടത്തുകയും കൃത്യമായ സുരക്ഷാ മുന്‍കരുതല്‍ സ്വീകരിക്കുകയും വേണം. ഇവയോട് ചേര്‍ന്ന് താമസിക്കുന്നവരും സ്ഥാപനങ്ങള്‍ നടത്തുന്നവരും പ്രത്യേകം ജാഗ്രത പാലിക്കണം.
ചൂട് അധികരിക്കുന്ന സാഹചര്യത്തില്‍ കാട്ടുതീ വ്യാപിക്കാന്‍ സാധ്യതയുണ്ട്. വനമേഖലയോടു ചേര്‍ന്ന് താമസിക്കുന്നവരും വിനോദ സഞ്ചാരികളും പ്രത്യേകം ജാഗ്രത പാലിക്കണം.
കാട്ടുതീ ഉണ്ടാകാനുള്ള സാഹചര്യങ്ങള്‍ ഒഴിവാക്കണം. വനം വകുപ്പിന്റെ നിര്‍ദേശങ്ങള്‍ കര്‍ശനമായി പാലിക്കണം.
വിദ്യാഭ്യാസ സ്ഥാപനങ്ങളില്‍ വിദ്യാര്‍ഥികള്‍ക്ക് ശുദ്ധമായ കുടിവെള്ളവും ക്ലാസ്സ് മുറികളില്‍ വായു സഞ്ചാരവും ഉറപ്പാക്കേണ്ടതാണ്.
പരീക്ഷാക്കാലമായാല്‍ പരീക്ഷാഹാളുകളിലും ജലലഭ്യത ഉറപ്പാക്കണം.
വിദ്യാര്‍ഥികളുടെ കാര്യത്തില്‍ സ്‌കൂള്‍ അധികൃതരും രക്ഷിതാക്കളും പ്രത്യേകശ്രദ്ധ പുലര്‍ത്തണം.
കുട്ടികള്‍ക്ക് കൂടുതല്‍ വെയിലേല്‍ക്കുന്ന അസംബ്ലികളും മറ്റ് പരിപാടികളും ഒഴിവാക്കുകയോ സമയക്രമീകരണം നടത്തുകയോ ചെയ്യണം.
കുട്ടികളെ വിനോദ സഞ്ചാരത്തിന് കൊണ്ടുപോകുന്ന സ്‌കൂളുകള്‍ രാവിലെ 11 മുതല്‍ ഉച്ചകഴിഞ്ഞു മൂന്നു വരെ കുട്ടികള്‍ക്ക് നേരിട്ട് ചൂട് ഏല്‍ക്കുന്നില്ല എന്ന് ഉറപ്പ് വരുത്തണം.
അങ്കണവാടി കുട്ടികള്‍ക്ക് ചൂട് എല്‍ക്കുന്നില്ലെന്ന് ഉറപ്പാക്കാന്‍ തദ്ദേശ സ്ഥാപന അധികൃതരും അങ്കണവാടി ജീവനക്കാരും പ്രത്യേകം ശ്രദ്ധിക്കണം.
കിടപ്പു രോഗികള്‍, പ്രായമായവര്‍, ഗര്‍ഭിണികള്‍, കുട്ടികള്‍, ഭിന്നശേഷിക്കാര്‍, മറ്റ് രോഗങ്ങള്‍ മൂലം അവശത അനുഭവിക്കുന്നവര്‍ തുടങ്ങിയവര്‍ക്ക് രാവിലെ 11 മുതല്‍ ഉച്ചകഴിഞ്ഞ് മൂന്നു വരെ നേരിട്ട് സൂര്യപ്രകാശം ഏല്‍ക്കാതിരിക്കാന്‍ പ്രത്യേകം ശ്രദ്ധിക്കണം.
ഇരുചക്ര വാഹനങ്ങളില്‍ ഓണ്‍ലൈന്‍ ഭക്ഷണ വിതരണം നടത്തുന്നവര്‍ ഉച്ച സമയത്ത് (113) സുരക്ഷിതരാണെന്ന് അതത് സ്ഥാപനങ്ങള്‍ ഉറപ്പുവരുത്തണം. അവര്‍ക്കു ചൂട് ഏല്‍ക്കാത്ത രീതിയില്‍ വസ്ത്രം ധരിക്കാന്‍ അവര്‍ക്ക് നിര്‍ദേശം നല്‍കുകയും, ആവശ്യമെങ്കില്‍ യാത്രക്കിടയില്‍ അല്പസമയം വിശ്രമിക്കാന്‍ അനുവാദം നല്‍കുകയും വേണം.
മാധ്യമപ്രവര്‍ത്തകരും പൊലീസ് ഉദ്യോഗസ്ഥരും ഈ സമയത്ത് (രാവിലെ 11 മുതല്‍ ഉച്ചകഴിഞ്ഞ് മൂന്നു വരെ) കുടകള്‍ ഉപയോഗിക്കുകയും നേരിട്ട് വെയില്‍ ഏല്‍ക്കാതിരിക്കാന്‍ ശ്രദ്ധിക്കുകയും ചെയ്യണം.
ജോലിയില്‍ ഏര്‍പ്പെട്ടിരിക്കുന്ന ഉദ്യോഗസ്ഥര്‍ക്ക് കുടിവെള്ളം നല്‍കി നിര്‍ജലീകരണം തടയുവാന്‍ സഹായിക്കണം.
പൊതുപരിപാടികള്‍, സമ്മേളനങ്ങള്‍ എന്നിവ നടത്തുമ്പോള്‍ പങ്കെടുക്കുന്നവര്‍ക്ക് ആവശ്യമായ കുടിവെള്ളം, തണല്‍ എന്നിവ സംഘാടകര്‍ ഉറപ്പുവരുത്തണം. രാവിലെ 11 മുതല്‍ ഉച്ചകഴിഞ്ഞ് മൂന്നു വരെ കഴിവതും സമ്മേളനങ്ങള്‍ ഒഴിവാക്കുക.
യാത്രകളില്‍ ആവശ്യത്തിന് വിശ്രമം എടുക്കുക. വെള്ളം കയ്യില്‍ കരുതുക.
നിര്‍മാണത്തൊഴിലാളികള്‍, കര്‍ഷകത്തൊഴിലാളികള്‍, വഴിയോരക്കച്ചവടക്കാര്‍, മറ്റ് കഠിന ജോലികളില്‍ ഏര്‍പ്പെടുന്നവര്‍ എന്നിവര്‍ ജോലി സമയം ക്രമീകരിക്കുക. ജോലിയില്‍ ആവശ്യമായ വിശ്രമം ഉറപ്പാക്കുക.
ഉച്ചവെയിലില്‍ കന്നുകാലികളെ മേയാന്‍ വിടുന്നതും മറ്റു വളര്‍ത്തുമൃഗങ്ങളെ വെയിലത്ത് കെട്ടിയിടുന്നതും ഒഴിവാക്കണം. മൃഗങ്ങള്‍ക്കും പക്ഷികള്‍ക്കും ജല ലഭ്യത ഉറപ്പാക്കണം.
കുട്ടികളെയോ വളര്‍ത്തുമൃഗങ്ങളെയോ പാര്‍ക്ക് ചെയ്ത വാഹനങ്ങളില്‍ ഇരുത്തി പോകാന്‍ പാടില്ല.
വെള്ളം പാഴാക്കാതെ ഉപയോഗിക്കാനും മഴ ലഭിക്കുമ്പോള്‍ പരമാവധി സംഭരിക്കാനം നടപടി സ്വീകരിക്കണം.
നിര്‍ജലീകരണം തടയാന്‍ കുടിവെള്ളം എപ്പോഴും കയ്യില്‍ കരുതുക.
അസ്വസ്ഥത അനുഭവപ്പെട്ടാല്‍ ഉടന്‍ വിശ്രമിക്കുകയും വൈദ്യസഹായം തേടുകയും ചെയ്യുക.
കാലാവസ്ഥ വകുപ്പിന്റെയും ദുരന്ത നിവാരണ അതോറിറ്റിയുടെയും ഔദ്യോഗിക മുന്നറിയിപ്പുകള്‍ ശ്രദ്ധിക്കുകയും അനുസരിക്കുകയും ചെയ്യുക.
by Midhun HP News | Sep 8, 2026 | Latest News, ദേശീയ വാർത്ത
വിമാനങ്ങളെ വെല്ലുന്ന വേഗത! മണിക്കൂറില്‍ 600 കി.മീ വേഗതയുള്ള മഗ്ലേവ് ട്രെയിനുകളുമായി ചൈനയും ജപ്പാനും; കാന്തിക ശക്തിയാല്‍ പൊങ്ങിപ്പായുന്ന ട്രെയിനുകള്‍ വിമാന യാത്രയ്ക്കു വേണ്ടിവരുന്ന സമയത്തിന് തുല്യമായി നഗരങ്ങളെ തമ്മില്‍ ബന്ധിപ്പിക്കും; ഏഷ്യയില്‍ അതിവേഗ യാത്രാ വിപ്ലവത്തിന് വഴിതുറക്കുന്നു
വാണിജ്യ വിമാനങ്ങളോട് കിടപിടിക്കുന്ന വേഗതയുമായി കരമാര്‍ഗ്ഗമുള്ള യാത്രാ രംഗത്ത് വന്‍ വിപ്ലവത്തിനൊരുങ്ങി ചൈനയും ജപ്പാനും. മണിക്കൂറില്‍ 600 കിലോമീറ്ററിലധികം (370 മൈല്‍) വേഗതയില്‍ പായുന്ന കാന്തിക ബലത്തില്‍ ഓടുന്ന ‘മഗ്ലേവ്’ (Maglev) ട്രെയിനുകള്‍ യാഥാര്‍ത്ഥ്യമാക്കിക്കൊണ്ട് വ്യോമയാന മേഖലയ്ക്ക് കടുത്ത വെല്ലുവിളി ഉയര്‍ത്തുകയാണ് ഈ ഇരു ഏഷ്യന്‍ വന്‍ശക്തികളും.
സാധാരണ പാസഞ്ചര്‍ വിമാനങ്ങള്‍ മണിക്കൂറില്‍ ശരാശരി 885 കിലോമീറ്റര്‍ വേഗതയില്‍ സര്‍വീസ് നടത്തുമ്പോള്‍, ട്രാക്കില്‍ ഘര്‍ഷണമില്ലാതെ കാന്തിക ശക്തിയാല്‍ പൊങ്ങിപ്പായുന്ന ഈ ട്രെയിനുകള്‍ വിമാന യാത്രയ്ക്കു വേണ്ടിവരുന്ന സമയത്തിന് തുല്യമായി നഗരങ്ങളെ തമ്മില്‍ ബന്ധിപ്പിക്കും. ചൈനയിലെ ബീജിങ് – ഷാങ്ഹായ് റൂട്ടില്‍ ഈ മഗ്ലേവ് ട്രെയിനുകള്‍ സര്‍വീസ് ആരംഭിക്കുന്നതോടെ നിലവിലെ 4 മണിക്കൂര്‍ യാത്രാ സമയം വെറും 2.5 മണിക്കൂറായി ചുരുങ്ങും. വിമാനത്താവളങ്ങളിലെ സുരക്ഷാ പരിശോധനകളും ബോര്‍ഡിങ് സമയവും കണക്കിലെടുക്കുമ്പോള്‍ യാത്രക്കാര്‍ക്ക് വിമാനത്തേക്കാള്‍ വേഗത്തില്‍ ലക്ഷ്യസ്ഥാനത്തെത്താന്‍ ഈ ട്രെയിനുകള്‍ വഴി സാധിക്കും.
ചൈനയിലെ സ്റ്റേറ്റ് പിന്തുണയുള്ള ‘സി.ആര്‍.ആര്‍.സി’ നിര്‍മ്മിച്ച മഗ്ലേവ് ട്രെയിന്‍ പ്രോട്ടോടൈപ്പ് ഇലക്ട്രോമാഗ്‌നറ്റിക് സസ്പെന്‍ഷന്‍ സാങ്കേതികവിദ്യയിലാണ് പ്രവര്‍ത്തിക്കുന്നത്. ട്രാക്കില്‍ തൊടാതെ മില്ലീമീറ്ററുകള്‍ ഉയര്‍ന്നു മാത്രം സഞ്ചരിക്കുന്നതിനാല്‍ യന്ത്രഭാഗങ്ങള്‍ തമ്മിലുള്ള കൂട്ടിയുരുമ്മല്‍ വഴി വേഗത കുറയില്ല. തുരങ്കങ്ങളില്‍ അതിവേഗത്തില്‍ പ്രവേശിക്കുമ്പോള്‍ ഉണ്ടാകുന്ന വായു സമ്മര്‍ദ്ദവും ശബ്ദവും കുറയ്ക്കാനുള്ള അത്യാധുനിക എയറോഡൈനാമിക് സംവിധാനങ്ങളും ചൈനീസ് എഞ്ചിനീയര്‍മാര്‍ ഇതിനായി വികസിപ്പിച്ചിട്ടുണ്ട്.
മറുഭാഗത്ത്, ഷിന്‍കാന്‍സന്‍ ബുള്ളറ്റ് ട്രെയിനുകളുടെ പാരമ്പര്യമുള്ള ജപ്പാന്‍ ‘ചുവോ ഷിന്‍കാന്‍സന്‍’ ലൈനിലൂടെയാണ് ഇതിന് മറുപടി നല്‍കുന്നത്. സൂപ്പര്‍കണ്ടക്റ്റിങ് കാന്തിക സാങ്കേതികവിദ്യയില്‍ പ്രവര്‍ത്തിക്കുന്ന ജപ്പാന്റെ പരീക്ഷണ ട്രെയിനുകള്‍ മണിക്കൂറില്‍ 603 കിലോമീറ്റര്‍ വേഗത കൈവരിച്ച് ലോക റെക്കോര്‍ഡ് സൃഷ്ടിച്ചിരുന്നു. ടോക്കിയോ, നഗോയ, ഒസാക്ക എന്നീ നഗരങ്ങളെ ബന്ധിപ്പിക്കുന്ന ഈ പാത യാഥാര്‍ത്ഥ്യമാകുന്നതോടെ ടോക്കിയോയില്‍നിന്ന് നഗോയയിലേക്കുള്ള യാത്രാസമയം വെറും 40 മിനിറ്റായി കുറയും.
വന്‍ നിര്‍മ്മാണച്ചെലവും ഉയര്‍ന്ന വൈദ്യുതി ഉപഭോഗവും കാരണം പതിറ്റാണ്ടുകളായി പരീക്ഷണ ഘട്ടത്തില്‍ ഒതുങ്ങിനിന്ന മഗ്ലേവ് സാങ്കേതികവിദ്യയെ, ആഭ്യന്തര വ്യോമയാന മേഖലയിലെ തിരക്ക് കുറയ്ക്കാനും കാര്‍ബണ്‍ പുറന്തള്ളല്‍ പരിമിതപ്പെടുത്താനുമുള്ള പ്രധാന ആയുധമായാണ് ഇരുരാജ്യങ്ങളും കാണുന്നത്. പരീക്ഷണ പാതകളില്‍നിന്ന് പ്രധാന ഗതാഗത ശൃംഖലകളിലേക്ക് ഈ ട്രെയിനുകള്‍ കടന്നുവരുന്നതോടെ, ഭാവിയില്‍ അതിവേഗ യാത്രാരംഗത്ത് വന്‍ മാറ്റങ്ങള്‍ക്കാകും ലോകം സാക്ഷ്യം വഹിക്കുക.
by Midhun HP News | Sep 8, 2026 | Latest News, ദേശീയ വാർത്ത
റിയാദ്: സൗദി അറേബ്യയിലെ തെക്കന്‍ പ്രവിശ്യകളിലെ ഹൂതി ആക്രമണത്തില്‍ പ്രവാസികള്‍ അടക്കം 73 പേര്‍ക്ക് പരിക്കേറ്റു. സൗദിയിലെ അബഹ, ഖമീസ് മുഷൈത്ത്, ജിസാന്‍, നജ്റാന്‍ എന്നിവിടങ്ങളിലെ ജനവാസ മേഖലകള്‍ക്കും സാമ്പത്തിക സ്ഥാപനങ്ങള്‍ക്കും നേരെയാണ് ആക്രമണമുണ്ടായത്.
ഗുരുതരമായ സാഹചര്യമാണെന്നും സൗദിയുടെ പരമാധികാരത്തിന്മേലുള്ള നഗ്‌നമായ ലംഘനമാണെന്നും സൗദി സഖ്യസേനാ വക്താവ് മേജര്‍ ജനറല്‍ തുര്‍ക്കി അല്‍ മാലികി പറഞ്ഞു. രാജ്യത്തെ പൗരന്മാര്‍ക്കും താമസക്കാര്‍ക്കും ഭീഷണിയുയര്‍ത്തുന്ന ഇത്തരം നീക്കങ്ങള്‍ക്കെതിരെ ശക്തമായ തിരിച്ചടി നല്‍കുമെന്നും ആക്രമണത്തിന്റെ ഉറവിടങ്ങള്‍ ഇല്ലാതാക്കാന്‍ ആവശ്യമായ സൈനിക നടപടികള്‍ സ്വീകരിക്കുമെന്നും അദ്ദേഹം മുന്നറിയിപ്പ് നല്‍കി.
യമന്‍ സര്‍ക്കാരും ഹൂതികളും തമ്മിലുള്ള വെടിനിര്‍ത്തല്‍ ധാരണകള്‍ തകര്‍ന്നതിന് പിന്നാലെ മേഖലയില്‍ സംഘര്‍ഷം രൂക്ഷമായിരിക്കുകയാണ്. ജൂലൈയില്‍ സൗദിക്കെതിരെ നാവിക ഉപരോധം പ്രഖ്യാപിച്ച ഹൂതികള്‍, ചെങ്കടലില്‍ സൗദി കപ്പലുകള്‍ക്ക് നേരെയും ആക്രമണം നടത്തിയിരുന്നു. അതേസമയം, യമനിലെ അല്‍ ജോഫ് പ്രവിശ്യയിലുള്ള തടവുകേന്ദ്രത്തിന് നേരെ സൗദി സഖ്യസേന നടത്തിയ വ്യോമാക്രമണത്തില്‍ കുട്ടിയടക്കം ഏഴുപേര്‍ കൊല്ലപ്പെട്ടതായി ഹൂതികള്‍ ആരോപിച്ചു.
by Midhun HP News | Sep 8, 2026 | Latest News, കേരളം
പയ്യന്നൂർ: ബൈക്ക് അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന സിപിഎം നേതാവും വ്യാപാരിയുമായ കെ. സതീശൻ (56) അന്തരിച്ചു. സിപിഎം ആലപ്പടമ്പ് വെസ്റ്റ് ലോക്കൽ കമ്മിറ്റി അംഗവും കാങ്കോൽ ടൗണിലെ ആകാശ് എന്റർപ്രൈസസ് ഉടമയുമാണ്.
കഴിഞ്ഞ ശനിയാഴ്ച ഉച്ചയ്ക്ക് രണ്ടിന് കാങ്കോലിലെ വ്യാപാര സ്ഥാപനത്തിൽ നിന്ന് സ്വാമിമുക്കിലെ വീട്ടിലേക്ക് ബൈക്കിൽ പോകുന്നതിനിടെ പാപ്പാരട്ടയിൽ വെച്ചായിരുന്നു അപകടം. ഗുരുതരമായി പരിക്കേറ്റ അദ്ദേഹത്തെ ഉടൻ തന്നെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. നിലവിൽ പയ്യന്നൂർ സഹകരണ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം ബുധനാഴ്ച രാവിലെ സംസ്കരിക്കും.
കർഷക തൊഴിലാളി യൂണിയൻ (കെഎസ്കെടിയു) ആലപ്പടമ്പ് വെസ്റ്റ് വില്ലേജ് സെക്രട്ടറി, കക്കിരിയാട് ആയുർവേദ വിഷ ചികിത്സാലയം സൊസൈറ്റി സെക്രട്ടറി, വാർഡ് വികസന സമിതി കൺവീനർ എന്നീ നിലകളിൽ സജീവമായി പ്രവർത്തിച്ചുവരികയായിരുന്നു. പരേതനായ കൊഴുമ്മൽ ഗോവിന്ദൻ നമ്പ്യാരുടെയും കൈപ്രത്ത് കല്യാണി അമ്മയുടെയും മകനാണ്.
ഭാര്യ: ശ്രീവിദ്യ (അധ്യാപിക, വലിയചാൽ ഗവൺമെന്റ് എൽപി സ്കൂൾ).
Recent Comments