by Midhun HP News | Oct 29, 2026 | Latest News, കേരളം
കോഴിക്കോട്: കായികമേളയിലെ ഭക്ഷണത്തില്‍ പുഴുവുണ്ടെന്ന പ്രചാരണം ചിലര്‍ ബോധപൂര്‍വം നടത്തിയതെന്ന് വിദ്യാഭ്യാസ മന്ത്രി എന്‍. ഷംസുദ്ദീന്‍. സര്‍ക്കാര്‍ മാറിയെന്നത് കൊണ്ട് എല്ലാത്തിലും പ്രശ്‌നമുണ്ടെന്ന് വരുത്തിത്തീര്‍ക്കാന്‍ ശ്രമിക്കുകയാണ്. പഴയ സിനിമകളിലെ നമ്പറാണ് ഇറക്കിയത്. ഇത്തരം വാര്‍ത്ത സൃഷ്ടിക്കാന്‍ ചില മാധ്യമങ്ങളും മുന്‍പന്തിയിലുണ്ട്. ഇതിന്റെ ഗൂഢാലോചന പുറത്തുകൊണ്ടുവരണം. പിടിയിലായ അധ്യാപകനെതിരെ വകുപ്പുതല നടപടിയുണ്ടാകുമെന്നും മന്ത്രി കൂട്ടിച്ചേര്‍ത്തു.
കായികമേളയിലെ ഭക്ഷണത്തില്‍ നിന്ന് പുഴുവിനെ ലഭിച്ചെന്ന് വ്യാജ പ്രചാരണം നടത്തിയ അധ്യാപകന്‍ അറസ്റ്റിലായതിന് പിന്നാലെയാണ് പ്രതികരണം. എറണാകുളം ശാലേം വിഎച്ച്എസിലെ അധ്യാപകനാണ് അറസ്റ്റിലായ ജിജോ ജെയിംസ്.
അറസ്റ്റിലായ അധ്യാപകനെതിരെ തുടര്‍ നടപടികളുണ്ടാകുമെന്ന് മന്ത്രി പറഞ്ഞു. നടന്ന കാര്യങ്ങള്‍ ഒറ്റക്ക് ചെയ്യുന്നതല്ല. സാമൂഹ്യ വിരുദ്ധ പ്രവര്‍ത്തനമാണ്. വളരെ പ്രതീക്ഷയോടുകൂടി മാസങ്ങളും വര്‍ഷങ്ങളും എടുത്ത് പരിശീലനം ചെയ്ത് വരുന്ന കുട്ടികളുടെ കായികമേള കുഴപ്പത്തിലാക്കാന്‍ ശ്രമിക്കുന്നയാള്‍ സാമൂഹ്യ വിരുദ്ധനാണ്. ഈ ഒരുതരം മോശപ്പെട്ട മാനസികാവസ്ഥക്ക് മാറ്റം വരണം.
സര്‍ക്കാര്‍ മാറിയപ്പോള്‍ എല്ലാത്തിലും പ്രശ്‌നങ്ങള്‍ ഉണ്ടാക്കാന്‍ ശ്രമിക്കുകയാണ്. ഇനി എന്തെങ്കിലും വീഴ്ചകള്‍ ഉണ്ടെങ്കില്‍ അത് ചൂണ്ടിക്കാണിക്കുന്നതില്‍ ഞങ്ങള്‍ ആരും എതിരല്ല. ഇന്നലെ നടന്നത് പഴയ സിനിമകളിലെ നമ്പറാണ്. ഭക്ഷണമൊക്കെ കഴിച്ച് അവസാനം പോക്കറ്റില്‍ കൊണ്ടുപോകുന്ന എന്തെങ്കിലും ഒരു സാധനം അതിലിട്ട് പരാതിപ്പെടുന്ന രീതി. എത്ര നീചമായ പ്രവൃത്തിയാണിത്. മാധ്യമങ്ങളില്‍ ചിലരും ഇതിന് കൂട്ടുനില്‍ക്കുന്നു. വാര്‍ത്തകള്‍ സൃഷ്ടിക്കാന്‍ ശ്രമം നടക്കുന്നു. പ്രതിയുടെ കൂടെ രണ്ട് ചാനലുകാര്‍ ഉണ്ടായിരുന്നു. അവര്‍ മാത്രം എങ്ങനെ അവിടെയെത്തി. ഇതിന്റെ പിന്നിലെ ഗൂഢാലോചന അന്വേഷിച്ച് പുറത്തുകൊണ്ടുവരണം -മന്ത്രി പറഞ്ഞു. അധ്യാപകനെതിരെ വകുപ്പുതല നടപടിയുണ്ടാകുമെന്നും വ്യക്തമാക്കി.
സംസ്ഥാന സ്‌കൂള്‍ കായികമേളയില്‍ വിതരണം ചെയ്ത ഭക്ഷണത്തില്‍ പുഴുവുണ്ടെന്ന തരത്തില്‍ വ്യാജ പ്രചാരണം നടത്തിയ സംഭവത്തില്‍ എറണാകുളം ശാലേം വിഎച്ച്എസിലെ അധ്യാപകന്‍ പെരുമ്പാവൂര്‍ സ്വദേശി ജിജോ ജെയിംസ് (35) ആണ് കുന്ദമംഗലം പൊലീസിന്റെ പിടിയിലായത്. കോഴിക്കോട്ട് നടന്നുകൊണ്ടിരിക്കുന്ന സംസ്ഥാന സ്‌കൂള്‍ കായികമേളയുടെ പ്രതിച്ഛായ തകര്‍ക്കാന്‍ ബോധപൂര്‍വമായ ഗൂഢാലോചന നടന്നുവെന്ന സംഘാടകരുടെയും മന്ത്രിയുടേയും പരാതിയുടെ അടിസ്ഥാനത്തിലാണ് നടപടി.
by Midhun HP News | Oct 29, 2026 | Latest News, കേരളം
തിരുവനന്തപുരം: പി എസ് സി നിയമന തട്ടിപ്പില്‍ ആദ്യ അറസ്റ്റിനു പിന്നാലെ ക്രമക്കേടില്‍ പ്രതിയായ അഡീഷനല്‍ സെക്രട്ടറി ആര്‍ ഹരി ഒളിവില്‍ പോയി. ഇദ്ദേഹത്തിനായി ക്രൈംബ്രാഞ്ച് സംഘം അന്വേഷണം ഊര്‍ജ്ജിതമാക്കി. ഒളിവിലുള്ള ഇയാള്‍ സംസ്ഥാനം വിട്ടേക്കാമെന്ന് അന്വേഷണ സംഘം കരുതുന്നു.
ഇന്നലെ ചോദ്യം ചെയ്യാന്‍ വിളിപ്പിച്ച പി എസ് സി ചെയര്‍മാനെ വീണ്ടും ചോദ്യം ചെയ്യുന്ന കാര്യത്തില്‍ മൊഴികള്‍ പരിശോധിച്ച ശേഷമാകും തീരുമാനം. ക്രൈം ബ്രാഞ്ച് രജിസ്റ്റര്‍ ചെയ്തിട്ടുള്ള മറ്റ് പരീക്ഷ ക്രമക്കേടുകള്‍ സംബന്ധിച്ചും അന്വേഷണം നടന്ന് വരുകയാണ്.
ക്രമക്കേട് നടന്ന ആസൂത്രണബോര്‍ഡ് പരീക്ഷയുടെ മൂല്യനിര്‍ണ്ണയ ചുമതലയുണ്ടായിരുന്ന മുന്‍ ഡെപ്യൂട്ടി സെക്രട്ടറി പി സതീഷിനെയാണ് ഇന്നലെ ക്രൈം ബ്രാഞ്ച് അറസ്റ്റ് ചെയ്തത്. ഹൈക്കോടതി നിലപാട് കടുപ്പിച്ചതോടെയാണ് എസ് ഐ ടി കേസില്‍ ആദ്യത്തെ അറസ്റ്റ് നടത്തിയത്. കോഴിക്കോട്ടെ വീട്ടില്‍ നിന്നാണ് സതീഷിനെ അറസ്റ്റ് ചെയ്തത്.
ആസൂത്രണ ബോര്‍ഡ് നിയമനപരീക്ഷയുടെ മൂല്യനിര്‍ണ്ണയ ചുമതല സതീഷിനും ആര്‍ ഹരിക്കും ആയിരുന്നു. സതീഷ് കഴിഞ്ഞ വര്‍ഷം വിരമിച്ചിരുന്നു. ഉദ്യോഗാര്‍ഥികളുടെ ഉത്തരക്കടലാസുകള്‍ ഓണ്‍ സ്‌കീന്‍ വഴിയായിരുന്നു മൂല്യനിര്‍ണ്ണയം നടത്തിയത്. ഇതിലാണ് 58 മാര്‍ക്കിന്റെ 10 ചോദ്യങ്ങള്‍ ഒഴിവാക്കിയത്.
ഇതില്‍ ഗുരുതര വീഴ്ച കണ്ടെത്തിയതിനാണ് ഇരുവരെയും പ്രതി ചേര്‍ത്തത്. എഴുത്തുപരീക്ഷയില്‍ കുറഞ്ഞ മാര്‍ക്ക് കിട്ടിയ അരുണ്‍ ജെ പ്രതാപ് എന്ന ഉദ്യോഗാര്‍ഥിയെ ഒന്നാം റാങ്കുകാരനാക്കാന്‍ മൂല്യനിര്‍ണയത്തില്‍ ഉദ്യോഗസ്ഥര്‍ അട്ടിമറി നടത്തിയത് ഉന്നത സ്വാധീനം കൊണ്ടെന്ന് വ്യക്തമാകുന്ന രേഖകകള്‍ അന്വേഷണ സംഘത്തിനും ലഭിച്ചിട്ടുണ്ട്. ഈ ആരോപണത്തിനു പിന്നാലെയാണ് മറ്റുക്രമക്കേടുകളും പുറത്തുവന്നത്.
by Midhun HP News | Oct 29, 2026 | Latest News, കേരളം
ശബരിമല തീർഥാടനത്തിന് ഒന്നിച്ച് യാത്ര പ്ലാൻ ചെയ്യുന്ന നാട്ടിലെ കൂട്ടായ്മകൾക്കും ക്ഷേത്ര സമിതികൾക്കും വലിയൊരു ആശ്വാസവാർത്തയാണിത്. ഇനി ബസ് സ്റ്റാൻഡിൽ പോയി വരിനിന്ന് കഷ്ടപ്പെടേണ്ടതില്ല!
45 പേരുണ്ടെങ്കിൽ നിങ്ങൾ പറയുന്ന സ്ഥലത്ത്—അത് വീട്ടുപടിക്കലോ നാട്ടിലെ ക്ഷേത്രപരിസരത്തോ എവിടെയുമാകട്ടെ—കെ എസ് ആർ ടി സി ബസ് നേരിട്ടെത്തി ആളെക്കയറ്റി പമ്പയിലെത്തിക്കും.
നിലയ്ക്കലിൽ ഇറങ്ങി വേറെ വണ്ടി മാറിക്കയറേണ്ട ടെൻഷനില്ലാതെ നേരെ പമ്പയിലേക്ക് പോകാമെന്നതും, തിരിച്ചു വരുമ്പോൾ നിങ്ങളെ കാത്തു അതെ ബസ് തന്നെ ഉണ്ടായിരിക്കും എന്നതാണ് ഇതിന്റെ ഏറ്റവും വലിയ പ്രത്യേകത.
കൂടുതൽ വിവരങ്ങൾക്ക്
9809494954, 9567604434, 9048516389
by Midhun HP News | Oct 29, 2026 | Latest News, ജില്ലാ വാർത്ത
പ്രഭാകരൻ സംസ്ഥാന ഫൗണ്ടേഷൻ ഏർപ്പെടുത്തിയ പ്രഭാകരൻ മാസ്റ്റർ സ്മാരക അവാർഡിന് കേരളാകൗമുദി ലേഖകൻ സതീഷ് കണ്ണങ്കര അർഹനായി. പ്രമുഖ കാഥികൻ പ്രൊഫ. ചിറക്കര സലിംകുമാർ, എഴുത്തുകാരൻ കരവാരം കെ. അനിരുദ്ധൻ, കവി സന്തോഷ് പുന്നയ്ക്കൽ എന്നിവരടങ്ങുന്ന ജഡ്ജംഗ് കമ്മിറ്റി ആണ് സതീഷ് കണ്ണങ്കരയെ അവാർഡിന് തിരഞ്ഞെടുത്തത്.
പ്രഭാകരൻ മാസ്റ്ററുടെ ചിത്രം ആലേഖനം ചെയ്ത മൊമെന്റോയും പ്രശംസാ പത്രവും അടങ്ങുന്നതാണ് അവാർഡ്. നവംബർ 10 ന് കടയ്ക്കാവൂരിൽ വച്ച് അവാർഡ് സമ്മാനിക്കുമെന്ന് പ്രഭാകരൻ ഫൗണ്ടേഷൻ സംസ്ഥാന സെക്രട്ടറി പാലച്ചിറ അജിത് കുമാർ അറിയിച്ചു.
by Midhun HP News | Oct 29, 2026 | Latest News, ജില്ലാ വാർത്ത
തിരുവനന്തപുരം: തിരുവനന്തപുരം മണ്‍വിളയില്‍ വീടിന് തീപിടിച്ച് ഗുരുതരമായി പൊള്ളലേറ്റ യുവാവ് മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെ മരണമടഞ്ഞ സംഭവത്തിന് പിന്നില്‍ ചുരുളഴിയാത്ത ദുരൂഹത. മണ്‍വിള സ്വദേശി സുജിത്ത് (38) ആണ് ദാരുണമായി മരണത്തിന് കീഴടങ്ങിയത്. സംഭവത്തില്‍ സുജിത്തിന്റെ വീട് പൂര്‍ണ്ണമായും കത്തിനശിച്ച നിലയിലാണ്.
ബുധനാഴ്ച ഉച്ചകഴിഞ്ഞ് 2.15 ഓടെയായിരുന്നു നാടിനെ നടുക്കിയ ഈ ദാരുണ സംഭവം അരങ്ങേറിയത്. വീടിനുള്ളില്‍ സിഗരറ്റ് കത്തിച്ചപ്പോള്‍ വീണ ചെറിയൊരു തീപ്പൊരിയാണ് വലിയ ദുരന്തത്തിന് കാരണമായതെന്നാണ് പുറത്തുവരുന്ന പ്രാഥമിക വിവരം.
എന്നാല്‍, കേവലം ഒരു സിഗരറ്റ് തീപ്പൊരിയില്‍ നിന്ന് ഇത്രയും വലിയൊരു വീട് മുഴുവന്‍ നിമിഷനേരം കൊണ്ട് കത്തിച്ചാമ്പലായി മാറി എന്ന വാദം തികച്ചും അവിശ്വസനീയവും അസ്വാഭാവികവുമാണെന്നാണ് നാട്ടുകാരുടെയും പൊലീസിന്റെയും നിഗമനം. ഈ ‘സിഗരറ്റ് തിയറി’ തികഞ്ഞ സംശയങ്ങള്‍ക്ക് ഇടനല്‍കിയിരിക്കുകയാണ്.
അടച്ചിട്ട വീടിന്റെ ഒരു മുറിയിലാണ് ആദ്യം തീയും പുകയും ഉയര്‍ന്നത്. തീ പെട്ടെന്ന് പടര്‍ന്നുപിടിക്കുന്നത് കണ്ട് ജീവരക്ഷാര്‍ത്ഥം സുജിത്ത് ശുചിമുറിയിലേക്ക് ഓടിക്കയറുകയായിരുന്നു.
എന്നാല്‍ നിമിഷങ്ങള്‍ക്കകം തീ വീടിന്റെ മറ്റു ഭാഗങ്ങളിലേക്കും അതിവേഗം ആളിപ്പടര്‍ന്നു. ശുചിമുറിക്കുള്ളില്‍ കുടുങ്ങിപ്പോയ സുജിത്തിന് സമയബന്ധിതമായി പുറത്തിറങ്ങാന്‍ സാധിക്കാതെ വരികയും ഗുരുതരമായി പൊള്ളലേല്‍ക്കുകയും ചെയ്യുകയായിരുന്നു.
നാട്ടുകാര്‍ നല്‍കിയ വിവരത്തിന്റെ അടിസ്ഥാനത്തില്‍ കഴക്കൂട്ടത്തു നിന്നും അഗ്‌നിരക്ഷാ സേന ഉടന്‍ സ്ഥലത്തെത്തി തീയണച്ചാണ് സുജിത്തിനെ പുറത്തെടുത്തത്. തുടര്‍ന്ന് അതീവ ഗുരുതരാവസ്ഥയില്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.
സാധാരണ ഒരു സിഗരറ്റ് കത്തുമ്പോള്‍ ഉണ്ടാകുന്ന തീപ്പൊരി കൊണ്ട് ഇത്ര പെട്ടെന്ന് ഒരു വീട് മുഴുവന്‍ കത്തിനശിക്കില്ലെന്നിരിക്കെ, ഈ തിയറിക്ക് പിന്നിലെ യാഥാര്‍ത്ഥ്യമെന്തെന്നാണ് വിദഗ്ദ്ധരും ചോദ്യം ചെയ്യുന്നത്.
വീടിനുള്ളില്‍ പെട്രോളോ മറ്റ് എളുപ്പത്തില്‍ തീപിടിക്കുന്ന ഏതെങ്കിലും അപകടകരമായ രാസവസ്തുക്കളോ സൂക്ഷിച്ചിരുന്നോ എന്ന സംശയം ഇതിനിടയില്‍ ശക്തമായിട്ടുണ്ട്. ഏതെങ്കിലും തരത്തിലുള്ള അട്ടിമറിയോ അതോ മറ്റെന്തെങ്കിലും കാര്യങ്ങളോ ഇതിന് പിന്നിലുണ്ടോയെന്ന് സമഗ്രമായി പരിശോധിക്കേണ്ടതുണ്ട്.
അപകടകരമായ രീതിയില്‍ തീ അത്ര വേഗത്തില്‍ പടര്‍ന്നുപിടിക്കാന്‍ സുജിത്തിന്റെ മുറിയില്‍ അന്ന് എന്താണ് ഉണ്ടായിരുന്നത് എന്ന കാര്യത്തില്‍ ഇതുവരെയും വ്യക്തത വന്നിട്ടില്ല. സംഭവത്തിലെ ദുരൂഹത നീക്കുന്നതിനായി പൊലീസ് വിശദമായ അന്വേഷണത്തിന് തയ്യാറെടുക്കുകയാണ്.
മൃതദേഹം ഇന്‍ക്വസ്റ്റ് നടപടികള്‍ക്കും പോസ്റ്റ്മോര്‍ട്ടത്തിനും ശേഷം ബന്ധുക്കള്‍ക്ക് വിട്ടുനല്‍കും. ശാസ്ത്രീയ തെളിവുകള്‍ ശേഖരിക്കുന്നതിന്റെ ഭാഗമായി ഫോറന്‍സിക് വിദഗ്ദ്ധരും വിരലടയാള വിദഗ്ദ്ധരും സ്ഥലത്തെത്തി പരിശോധന നടത്തുമെന്നും പൊലീസ് അറിയിച്ചു. പോസ്റ്റ്മോര്‍ട്ടം റിപ്പോര്‍ട്ടും ഫോറന്‍സിക് ഫലവും പുറത്തുവന്നാല്‍ മാത്രമേ ഈ അസ്വാഭാവിക മരണത്തിന് പിന്നിലെ യഥാര്‍ത്ഥ കാരണം പുറത്തുവരികയുള്ളൂ.
Recent Comments