by Midhun HP News | Oct 26, 2026 | Latest News, ജില്ലാ വാർത്ത
ആറ്റിങ്ങൽ : ആറ്റിങ്ങലിൽ പോലീസ് ഉദ്യോഗസ്ഥനെ ഭാര്യ വീട്ടിൽ തൂങ്ങി മരിച്ച നിലയിൽ കണ്ടെത്തി. പോത്തൻകോട് സ്വദേശിയും വിജിലൻസ് ആൻഡ് ആന്റി കറപ്ഷൻസ് ബ്യൂറോ മരുതുംകുഴി ഇൻസ്പെക്ടറും ആയിരുന്ന ബിനീഷ് ലാൽ ( 50 ) ആണ് മരണപ്പെട്ടത്. ഭാര്യ വീടായ ഊരുപോയ്ക ബി എസ് ഭവനിൽ വീട്ടിലെ ഫാനിലാണ് തൂങ്ങി നിന്നത്. പോസ്റ്റ്മോർട്ടം നടപടികൾക്കായി മൃതദേഹം മെഡിക്കൽ കോളേജ് ആശുപത്രിയിലേക്ക് മാറ്റി. കുറ്റാന്വേഷണ മികവിനുള്ള 2025-ലെ കേന്ദ്ര ആഭ്യന്തരമന്ത്രിയുടെ ‘കേന്ദ്രീയ ഗൃഹമന്ത്രി ദക്ഷത പദക്’ മെഡൽ നേടിയിരുന്നു. അഞ്ചുതെങ്ങ് പോലീസ് സ്റ്റേഷൻ എസ്.എച്ച്.ഒ ആയി സേവനമനുഷ്ഠിച്ചിട്ടുണ്ട്.
കാട്ടാക്കടയിലും ഇൻസ്പെക്ട‌റായി പ്രവർത്തിച്ചിട്ടുണ്ട്. അഞ്ചുതെങ്ങിലെ പ്രമുഖമായ ചില ക്രമിനൽ, അസ്വാഭാവിക മരണക്കേസുകളിൽ അദ്ദേഹം അന്വേഷണത്തിന് നേതൃത്വം നൽകിയിട്ടുണ്ട്.
ഭാര്യ ദിവ്യ ആറ്റിങ്ങൽ സബ് കോടതിയിലെ ജീവനക്കാരിയാണ്. 12 വയസ്സായ ആൺകുട്ടിയും 8 വയസ്സായ പെൺകുട്ടിയും ഉണ്ട്. ആറ്റിങ്ങൽ പോലീസ് സ്ഥലത്തെത്തി തുടർനടപടികൾ സ്വീകരിച്ചുവരുന്നു.
by Midhun HP News | Oct 26, 2026 | Latest News, ജില്ലാ വാർത്ത
പ്രിയദർശിനി പദ്ധതി നടപ്പിലാക്കിയ റൂട്ടുകളിൽ സർവീസ് നടത്തുന്ന സ്വകാര്യ ബസുകൾക്ക് ഡിസൽ അടിക്കാനും തൊഴിലാളികൾക്ക് മാന്യമായ വേതനം നൽകാനുമുള്ള ദിവസ വരുമാനം ലഭിക്കാതെ സ്വകാര്യബസ് വ്യവസായ മേഖല സാമ്പത്തികമായി തകർന്നു കൊണ്ടിരിക്കുകയാണെന്ന് ബസ് ഓപറേറ്റേഴ്സ് ഫെഡറേഷൻ. ഒരു ലിറ്റർ ഡീസലിന് എട്ട് രൂപയും സർവീസിനാവശ്യമായ സ്പെയർ പാർട്സ്, ടയർ, ഓയിൽ, ചേസിസ്, ബോഡി മെറ്റീരിയൽസ് മുതലായവക്ക് വലിയ വില വർദ്ധനവും വന്ന സാഹചര്യത്തിലാണ് പ്രിയദർശിനി പദ്ധതി നടപ്പിലാക്കിയത്.
അത് പോലെ വിദ്യാർത്ഥികളുടെ മിനിമം ടിക്കറ്റ് നിരക്ക് പതിനാലു വർഷം മുമ്പ് നിശ്ചയിച്ച ഒരു രൂപ എന്നതും വർദ്ധനവ് വരുത്താതെ ഇപ്പോഴും തുടരുകയാണ്. ഈ സാഹചര്യത്തിൽ സ്വകാര്യ ബസ് വ്യവസായത്തെ സംരക്ഷിക്കണമെന്നാവശ്യപ്പെട്ട് ബസ് ഓപറേറ്റേഴ്സ് ഫെഡറേഷൻ സംസ്ഥാന പ്രസിഡണ്ട് കെ.കെ. തോമസ്, വൈസ് പ്രസിഡണ്ട് ശരണ്യ മനോജ് എന്നിവർ ഒക്ടോബർ 27 മുതൽ തിരുവനന്തപുരം സെക്ടറിയേറ്റ് നടയിൽ ആവശ്യങ്ങൾ നേടിയെടുക്കുന്നത് വരെ അനിശ്ചിത കാല നിരാഹാര സമരം അനുഷ്ഠിക്കുകയാണ്
1 പ്രിയദർശിനി പദ്ധതി കാരണം ദുരിതമനുഭവിക്കുന്ന സ്വകാര്യ ബസ് വ്യവസായത്തെ സംരക്ഷിക്കുക
2 പത്മകുമാർ കമ്മീഷൻ റിപ്പോർട്ട് എത്രയും പെട്ടെന്ന് നടപ്പിലാക്കുക.
3 വിദ്യാർത്ഥികളുടെ ടിക്കറ്റ് നിരക്ക് ഉൾപ്പെടെ ബസ് ചാർജ് വർദ്ധിപ്പിക്കുക
4 RT ഓഫീസുമായി ബന്ധപ്പെട്ട് നിയമപരമായി ലഭിക്കേണ്ട സർവീസ് തടസ്സവാദങ്ങളില്ലാതെ ലഭ്യമാക്കുക
മുതലായ അടിയന്തിര ആവശ്യങ്ങൾ ഉന്നയിച്ചു കൊണ്ടാണ് ഫെഡറേഷൻ നേതാക്കൾ നിരാഹാരസമരം നടത്തുന്നത്.
കലക്ട്രേറ്റു മാർച്ച്, പ്രതിഷേധ കൺവെൻഷൻ, സെക്രട്ടറിയേറ്റ് മാർച്ച് മുതലായ പ്രക്ഷോഭ സമരങ്ങൾ നടത്തിയതിന് ശേഷവും സർക്കാരിന്റെ ഭാഗത്ത് നിന്ന് യാതൊരു അനുകൂല നടപടിയും ഉണ്ടാവാത്ത സാഹചര്യത്തിലാണ് നിരാഹാര സമരം നടത്താൻ ഫെഡറേഷൻ നിർബന്ധിതമായത്.
by Midhun HP News | Oct 26, 2026 | Latest News, കേരളം
തൃശ്ശൂര്‍ ചേലക്കരയില്‍ റിട്ട. എസ്‌ഐ ഷോക്കേറ്റ് മരിച്ചു. വെങ്ങാനല്ലൂര്‍ സ്വദേശി ജോയ് (56) ആണ് മരിച്ചത്. ഇന്നലെ രാത്രി 8 മണിയോടെ ആയിരുന്നു അപകടം. വീട്ടിലെത്താത്തതിനെത്തുടര്‍ന്ന് ബന്ധുക്കള്‍ നടത്തിയ തെരച്ചിലിലാണ് മൃതദേഹം കണ്ടെത്തിയത്. വീടിന് അടുത്ത പാടത്ത് വെച്ചായിരുന്നു സംഭവം. പാടത്ത് സ്ഥാപിച്ച സോളാര്‍ വേലിയില്‍ നിന്നും ഷോക്കേറ്റത് ആകാമെന്നാണ് പ്രാഥമിക നിഗമനം.
പാടത്ത് അനക്കം ഇല്ലാതെ കിടക്കുന്നത് കണ്ട ഭാര്യ നാട്ടുകാരെ വിവരമറിയിക്കുകയായിരുന്നു. ഉടന്‍ നാട്ടുകാര്‍ ചേര്‍ന്ന് ചേലക്കരയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം ചേലക്കര സ്വകാര്യ ആശുപത്രി മോര്‍ച്ചറിയില്‍. ചേലക്കര പൊലീസ് അന്വേഷണം ആരംഭിച്ചു. സംസ്‌കാരം പോസ്റ്റുമോര്‍ട്ടത്തിനുശേഷം. അമ്മ: മേരി. ഭാര്യ: ഷിജി. മക്കള്‍: യവന, യുവ. സഹോദരങ്ങള്‍: ബാബു, സണ്ണി, ലീന.
by Midhun HP News | Oct 26, 2026 | Latest News, കേരളം
കൊച്ചി: സിഎംആര്‍എല്‍- എക്‌സാലോജിക് കേസില്‍ പ്രതിപക്ഷ നേതാവ് പിണറായി വിജയന്‍ നല്‍കിയ അപ്പീല്‍ ഹൈക്കോടതി ഇന്ന് പരിഗണിക്കും. ജസ്റ്റിസ് കെ നടരാജന്‍ അധ്യക്ഷനായ ബെഞ്ചാണ് ഹര്‍ജി പരിഗണിക്കുന്നത്. ഇഡിയുടെ കത്തിന്റെ അടിസ്ഥാനത്തില്‍ എഫ്‌ഐആര്‍ രജിസ്റ്റര്‍ ചെയ്ത് അന്വേഷിക്കണമെന്ന സിംഗിള്‍ ബെഞ്ച് ഉത്തരവിനെതിരെയാണ് പിണറായി വിജയന്‍, മകള്‍ ടി വീണ, ഭര്‍ത്താവും മുന്‍മന്ത്രിയുമായ പി എ മുഹമ്മദ് റിയാസ് തുടങ്ങിയവരാണ് അപ്പീല്‍ നല്‍കിയിട്ടുള്ളത്.
തന്റെ ഭാഗം കേള്‍ക്കാതെയാണ് സിംഗിള്‍ ബെഞ്ച് വിധി പ്രസ്താവിച്ചതെന്ന് ചൂണ്ടിക്കാട്ടി പിണറായി വിജയനും വീണയും ഹൈക്കോടതി ഡിവിഷന്‍ ബെഞ്ചിന് സമീപിച്ചു. എന്നാല്‍ ഡിവിഷന്‍ ബെഞ്ച് ഹര്‍ജി തള്ളി. തുടര്‍ന്ന് പിണറായിയും വീണയും മുഹമ്മദ് റിയാസും സുപ്രീംകോടതിയെ സമീപിച്ചു. സിംഗിള്‍ ബെഞ്ച് ഉത്തരവ് ഒരാഴ്ചത്തേക്ക് സ്റ്റേ ചെയ്ത സുപ്രീംകോടതി, പിണറായിയുടെ അപ്പീല്‍ വീണ്ടും പരിഗണിക്കാന്‍ ഉത്തരവിടുകയായിരുന്നു.
കേസിലെ വിജിലന്‍സ് അന്വേഷണം 10 ദിവസത്തേക്ക് തടയുകയും ചെയ്തിട്ടുണ്ട്. പിണറായി വിജയന്‍, മകള്‍ ടി. വീണ, മരുമകന്‍ പിഎ മുഹമ്മദ് റിയാസ് എന്നിവര്‍ക്ക് പുറമെ, പി. നിഖില്‍ കെ. വാരിസ്, ഷൈജല്‍, എം നന്ദുലാല്‍ എന്നിവരാണ് അപ്പീല്‍ നല്‍കിയിട്ടുള്ളത്. സിംഗിള്‍ ബെഞ്ച് ഉത്തരവ് പൂര്‍ണമായി റദ്ദാക്കണമെന്നാണ് ഹര്‍ജിയിലെ ആവശ്യം. സുപ്രീംകോടതി ഉത്തരവ് ഹര്‍ജിക്കാര്‍ ഹൈക്കോടതിയില്‍ ഹാജരാക്കിയിരുന്നു. നേരത്തെ വാദം കേട്ട ജസ്റ്റിസുമാരായ കെ നടരാജന്‍, ജോണ്‍സണ്‍ ജോണ്‍ എന്നിവരുടെ ബെഞ്ചാണ് ഹര്‍ജി വീണ്ടും കേള്‍ക്കുന്നത്.
2017 മുതല്‍ 2019 വരെയുള്ള കാലയളവില്‍ വീണയുടെ ഉടമസ്ഥതയിലുള്ള എക്‌സാലോജിക് സൊല്യൂഷന്‍സ് എന്ന കമ്പനിക്ക് സര്‍വീസ് ലീഗല്‍ എഗ്രിമെന്റ് വഴി പ്രതിമാസം മൂന്ന് ലക്ഷത്തിലധികം രൂപ സിഎംആര്‍എല്‍ നല്‍കിയിരുന്നതായി ഇഡി കണ്ടെത്തിയിരുന്നു. ഇതിനുപുറമെ, ഐടി – മാര്‍ക്കറ്റിങ് കണ്‍സള്‍ട്ടന്‍സി പ്രതിഫലമെന്ന നിലയില്‍ ഇതേ കാലയളവില്‍ വീണയ്ക്കും തുക ലഭിച്ചിരുന്നു. ആകെ 3.28 കോടി രൂപയുടെ ഇടപാടാണ് നടന്നത്. ഇഡിയുടെ കത്തിന്റെ അടിസ്ഥാനത്തില്‍ വിജിലന്‍സ് രണ്ട് എഫ്‌ഐആറുകള്‍ രജിസ്റ്റര്‍ ചെയ്തിട്ടുണ്ട്.
by Midhun HP News | Oct 26, 2026 | Latest News, കേരളം
തിരുവനന്തപുരം: ഈ മാസത്തെ ക്ഷേമ പെന്ഷന് / ക്ഷേമ നിധി ബോര്‍ഡ് പെന്ഷന് വിതരണം ഇന്ന് (തിങ്കളാഴ്ച) ആരംഭിക്കും. പെന്ഷന് വിതരണം ഒക്ടോബര്‍ 26 മുതല്‍ ആരംഭിക്കുകയും നവംബര്‍ അഞ്ചിനകം പൂര്‍ത്തിയാക്കുകയും ചെയ്യും. ഇതിനായി 1081 കോടി രൂപ അനുവദിച്ചതായി സംസ്ഥാന സര്‍ക്കാര്‍ അറിയിച്ചു. ക്ഷേമ പെന്ഷന് നല്‍കാന്‍ 961.64 കോടി രൂപയാണ് അനുവദിച്ചത്.
ക്ഷേമനിധി ബോര്‍ഡ് പെന്ഷന് 119.47 കോടി രൂപയുമാണ് അനുവദിച്ചതെന്നും സര്‍ക്കാര്‍ അറിയിച്ചു. ധനകാര്യ (എസ്എഫ് സി-ബി) വകുപ്പ് പുറപ്പെടുവിച്ച രണ്ടു പ്രത്യേക ഉത്തരവുകളിലൂടെയാണ് തുക അനുവദിച്ചിട്ടുള്ളത്. സാമൂഹ്യ സുരക്ഷാ പെന്ഷന് 52,09,617 ഗുണഭോക്താക്കള്‍ക്കായി 961.64 കോടി രൂപ അനുവദിച്ചു.
ക്ഷേമനിധി ബോര്‍ഡ് പെന്ഷന് സര്‍ക്കാറിന്റെ ധനസഹായത്തോടെ പെന്ഷന് നല്‍കുന്ന 16 ക്ഷേമനിധി ബോര്‍ഡുകളിലെ 6,05,415 ഗുണഭോക്താക്കള്‍ക്കായി 119.46 കോടി രൂപയാണ് അനുവദിച്ചത്. സാമൂഹ്യ സുരക്ഷാ പെന്ഷന് ഗുണഭോക്താക്കളില്‍ 29,67,142 ആളുകള്‍ക്ക് ബാങ്ക് അക്കൗണ്ടുകളിലേക്ക് നേരിട്ട് തുക എത്തും. ഇതിനായി 541,38,82,747 രൂപ അനുവദിച്ചു. 22,42,475 പേര്‍ക്ക് പ്രാഥമിക സഹകരണ സംഘങ്ങള്‍ വഴി വീടുകളില്‍ പണമായി തുക എത്തിച്ചു നല്‍കും.
ഇതിനു പുറമേ, ദേശീയ സാമൂഹ്യ സഹായ പദ്ധതിയില്‍ ഉള്‍പ്പെടുന്ന ഇന്ദിരാഗാന്ധി ദേശീയ വാര്‍ധക്യകാല, ഭിന്നശേഷി, വിധവാ പെന്‍ഷനുകളിലെ 8,46,456 ഗുണഭോക്താക്കള്‍ക്കുള്ള ഒക്ടോബര്‍ മാസത്തെ വിഹിതമായി 24,76,10,400 തുകയും ഉള്‍പ്പെടുത്തിയിട്ടുണ്ട്. വിതരണം ചെയ്യാതെ ശേഷിക്കുന്ന തുക നവംബര്‍ 16നകം കേരള സ്റ്റേറ്റ് സോഷ്യല്‍ സെക്യൂരിറ്റി പെന്ഷന് ലിമിറ്റഡിന്റെ അക്കൗണ്ടിലേക്ക് തിരിച്ചടക്കേണ്ടതാണെന്ന് അധികൃതര്‍ അറിയിച്ചു.
Recent Comments