by Midhun HP News | Nov 4, 2026 | Latest News, കേരളം
തിരുവനന്തപുരം: കേരള സ്റ്റേറ്റ് ട്രാന്‍സ്‌പോര്‍ട്ട് പ്രോജക്ടിന് (കെഎസ്ടിപി) കീഴില്‍ നടത്തിയ റോഡ് നിര്‍മാണ പദ്ധതിയുമായി ബന്ധപ്പെട്ട് മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ ഉയര്‍ന്ന 2 കോടി രൂപയുടെ കൈക്കൂലി ആരോപണത്തില്‍ അന്വേഷണം നടത്താന്‍ ആഭ്യന്തരമന്ത്രി രമേശ് ചെന്നിത്തല വിജിലന്‍സിന് നിര്‍ദേശം നല്‍കി. രണ്ട് പതിറ്റാണ്ട് മുമ്പ് ഗ്യാനേഷ് കുമാര്‍ കേരളത്തില്‍ സേവനമനുഷ്ഠിച്ചിരുന്ന കാലത്തെ സംഭവത്തിലാണ് ആരോപണം ഉയര്‍ന്നത്. എസ്‌ഐആറുമായി ബന്ധപ്പെട്ട് രാജ്യവ്യാപകമായി ഗ്യാനേഷ് കുമാറിനെതിരെ കോണ്‍ഗ്രസും മറ്റ് പ്രതിപക്ഷ പാര്‍ട്ടികളും പ്രതിഷേധം ശക്തമാക്കുന്നതിനിടെയാണ് പുതിയ നീക്കം.
കൊല്ലം കടയ്ക്കല്‍ ചാടയമംഗലം സ്വദേശിയും കരാറുകാരനുമായ സാജന്‍ വിജിലന്‍സ് ഡയറക്ടര്‍ക്ക് നല്‍കിയ പരാതിയിലാണ് ആരോപണങ്ങള്‍ ഉന്നയിച്ചിട്ടുള്ളത്. കെഎസ്ടിപി പദ്ധതിക്ക് കീഴില്‍ പൂര്‍ത്തിയാക്കിയ പ്രവൃത്തികളുടെ കുടിശ്ശിക തുക അനുവദിക്കുന്നതിനായി അന്നത്തെ പൊതുമരാമത്ത് വകുപ്പ് സെക്രട്ടറിയായിരുന്ന ഗ്യാനേഷ് കുമാര്‍ 2 കോടി രൂപ കോഴ ആവശ്യപ്പെട്ടെന്നാണ് ആരോപണം. എന്‍ജിനീയര്‍മാര്‍ തുക പാസാക്കി നല്‍കിയ 17 കോടി രൂപയുടെ ബില്ലുകളുടെ ചെക്കുകള്‍ ഗ്യാനേഷ് കുമാര്‍ മനപ്പൂര്‍വ്വം തടഞ്ഞുവെച്ചെന്നും, ഇത് മലേഷ്യന്‍ കമ്പനിയായ പതി-ബെലിനും കമ്പനിയുടെ കരാറുകാര്‍ക്കും തൊഴിലാളികള്‍ക്കും വലിയ സാമ്പത്തിക പ്രതിസന്ധി സൃഷ്ടിച്ചെന്നും സാജന്‍ പരാതിയില്‍ പറയുന്നു.
ചോദിച്ച കോഴപ്പണം നല്‍കിയില്ലെങ്കില്‍ ചെക്കുകള്‍ നല്‍കില്ലെന്ന് ജ്ഞാനേഷ് കുമാര്‍ വ്യക്തമാക്കിയതായി കമ്പനിയുടെ പ്രോജക്ട് എന്‍ജിനീയറും മലേഷ്യന്‍ പൗരനുമായ ലീ സീ ബീന്‍ തന്നോട് പറഞ്ഞിരുന്നതായി സാജന്‍ ആരോപിക്കുന്നു. ‘കുറച്ചു തുക നല്‍കി വിഷയം തീര്‍ക്കാന്‍ ഞാന്‍ നിര്‍ദേശിച്ചപ്പോള്‍, കൈക്കൂലി നല്‍കി ചെക്കുകള്‍ കൈപ്പറ്റാന്‍ പതി-ബെല്‍ അധികൃതര്‍ അനുവാദം നല്‍കുന്നില്ലെന്നാണ് അവര്‍ പറഞ്ഞത്’ -സാജന്‍ തന്റെ പരാതിയില്‍ വ്യക്തമാക്കി. കരാറുകാര്‍ക്കും തൊഴിലാളികള്‍ക്കും നല്‍കാനുള്ള തുകയുടെ ഒരു ഭാഗം നല്‍കി തീര്‍ക്കാന്‍ ബംഗളൂരുവിലെ മറ്റൊരു പ്രോജക്ടിന്റെ ഫണ്ടാണ് ലീ ഉപയോഗിച്ചിരുന്നതെന്നും സാജന്‍ അവകാശപ്പെട്ടു. അംഗീകരിച്ച ബില്ലുകള്‍ നല്‍കുന്നതില്‍ വരുത്തിയ കാലതാമസവും കോഴ ആവശ്യപ്പെട്ടതുമാണ് 2006-ല്‍ ലീയുടെ ആത്മഹത്യയിലേക്ക് നയിച്ചതെന്നും പരാതിയില്‍ ആരോപിക്കുന്നുണ്ട്.
ആത്മഹത്യക്കുറിപ്പില്‍ ലീ, ഗ്യാനേഷ് കുമാറിന്റെ പങ്കിനെക്കുറിച്ച് പരാതിപ്പെട്ടിട്ടുണ്ടെന്നും മലേഷ്യയിലുള്ള ലീയുടെ കുടുംബാംഗങ്ങള്‍ ഇക്കാര്യം കമ്പനി ജീവനക്കാരെ അറിയിച്ചിരുന്നതായും പരാതിക്കാരന്‍ പറഞ്ഞു. മുമ്പ് ഈ സംഭവത്തില്‍ വിജിലന്‍സ് നടത്തിയ അന്വേഷണത്തില്‍ തന്നെയോ കോഴ ആവശ്യപ്പെട്ടതിനെക്കുറിച്ച് നേരിട്ട് അറിവുള്ള മറ്റുള്ളവരെയോ ചോദ്യം ചെയ്തിരുന്നില്ലെന്ന് സാജന്‍ ചൂണ്ടിക്കാട്ടി. തെളിവ് നല്‍കുന്നതിനായി ലീയുടെ കുടുംബാംഗങ്ങളെയും കമ്പനിയിലെ മുന്‍ ജീവനക്കാരെയും മറ്റ് സാക്ഷികളെയും ഹാജരാക്കാന്‍ തയ്യാറാണെന്നും അദ്ദേഹം അറിയിച്ചിട്ടുണ്ട്.
പരാതിയുടെ അടിസ്ഥാനത്തില്‍ പ്രാഥമിക അന്വേഷണം നടത്തിയ ശേഷം കേസ് രജിസ്റ്റര്‍ ചെയ്യാന്‍ വിജിലന്‍സ് ആഭ്യന്തര വകുപ്പിന്റെ അനുമതി തേടിയിരുന്നു. നിയമോപദേശം ലഭിച്ച ശേഷമാണ് വിഷയം വിജിലന്‍സ് പരിശോധിക്കാന്‍ മന്ത്രി ഉത്തരവിട്ടത്. കെപിസിസി നേതാവ് മലയിന്‍കീഴ് വേണുഗോപാലിന്റെ പരാതിയെ തുടര്‍ന്ന് ഒക്ടോബര്‍ 4ന് ആഭ്യന്തരമന്ത്രി വിജിലന്‍സ് അന്വേഷണത്തിന് ഉത്തരവിട്ടിരുന്നു. നിലവില്‍ അന്വേഷണം നടത്തുന്ന വിജിലന്‍സ് സംഘം തന്നെയാകും പുതിയ പരാതിയും പരിശോധിക്കുക.
പതി-ബെല്‍ കണ്‍സോര്‍ഷ്യം ഏറ്റെടുത്ത് നടത്തിയ എംസി റോഡ് നവീകരണത്തിലെ അഴിമതി ആരോപണവുമായാണ് ഈ കേസ് ബന്ധപ്പെട്ടിരിക്കുന്നത്. ആ കാലയളവിലാണ് ഗ്യാനേഷ് കുമാര്‍ സംസ്ഥാന പൊതുമരാമത്ത് സെക്രട്ടറിയായി സേവനമനുഷ്ഠിച്ചിരുന്നത്. 2006-ല്‍ ലീയുടെ മരണത്തെത്തുടര്‍ന്ന് വിജിലന്‍സ് അന്വേഷണം ആരംഭിച്ചിരുന്നെങ്കിലും, ആരോപണങ്ങള്‍ തെളിയിക്കപ്പെടാത്തതിനെ തുടര്‍ന്ന് കേസ് അവസാനിപ്പിക്കുകയായിരുന്നു. ആദ്യത്തെ വിജിലന്‍സ് അന്വേഷണത്തില്‍ നിര്‍ണായക വിവരങ്ങള്‍ വിട്ടുപോയിട്ടുണ്ടോ എന്ന കാര്യവും പുതിയ അന്വേഷണത്തില്‍ ഉള്‍പ്പെടുത്തും. അരോപണങ്ങളില്‍ ഗ്യാനേഷ് കുമാര്‍ ഇതുവരെ പ്രതികരിച്ചിട്ടില്ല.
by Midhun HP News | Nov 4, 2026 | Latest News, കേരളം
ന്യൂഡല്‍ഹി: എസ്‌ഐആറിന് ശേഷം പ്രസിദ്ധീകരിച്ച കരട് വോട്ടര്‍ പട്ടികയില്‍ പേരില്ലാത്ത വോട്ടര്‍മാര്‍ക്ക് അന്തിമ വോട്ടര്‍ പട്ടികയില്‍ പേര് ചേര്‍ക്കാന്‍ ‘ഫോം 6’ സമര്‍പ്പിക്കാമെന്ന് തെരഞ്ഞെടുപ്പ് കമ്മീഷന്‍. മുമ്പ് വോട്ടര്‍ പട്ടികയില്‍ ഉണ്ടായിരുന്നവരാണെങ്കിലും അപേക്ഷ നല്‍കാമെന്നും കമ്മീഷന്‍ അറിയിച്ചു. പുതുതായി വോട്ടര്‍പട്ടികയില്‍ പേര് ചേര്‍ക്കുന്നതിന് നല്‍കുന്നതാണ് ഫോം 6. ഇനി ആദ്യമായാണ് വോട്ടര്‍പട്ടികയില്‍ പേര് ചേക്കാന്‍ അപേക്ഷിക്കുന്നതെങ്കില്‍ അതിനായി സത്യവാങ്മൂലം നല്‍കുന്ന ഭാഗവും ഇതിലുണ്ട്. ഇനി തെറ്റായ വിവരമാണ് നല്‍കുന്നതെങ്കില്‍ ജനപ്രാതിനിധ്യ നിയമപ്രകാരം കേസെടുക്കാം.
നേരത്തെ വോട്ടര്‍ പട്ടികയില്‍ പേരുണ്ടായിരുന്ന വോട്ടര്‍മാര്‍, ‘ഫോം 6’-ല്‍ നല്‍കേണ്ടി വരുന്ന സത്യവാങ്മൂലം കാരണം ഇത് സമര്‍പ്പിക്കാന്‍ മടിക്കുന്നതായി കണ്ടെത്തിയതായും എല്ലാ സംസ്ഥാനങ്ങളിലെയും മുഖ്യതെരഞ്ഞെടുപ്പ് കമ്മീഷണര്‍മാര്‍ക്ക് നല്‍കിയ കത്തില്‍ കമ്മീഷന്‍ അറിയിച്ചു. കരട് വോട്ടര്‍ പട്ടികയില്‍ പേരില്ലാത്ത വോട്ടര്‍മാര്‍ക്ക് നിശ്ചിത നടപടിക്രമങ്ങള്‍ പാലിച്ച് അന്തിമ വോട്ടര്‍ പട്ടികയില്‍ പേര് ചേര്‍ക്കുന്നതിനായി ഈ ഫോം സമര്‍പ്പിക്കാമെന്നും കമ്മീഷന്‍ അറിയിച്ചു.
മുമ്പ് വോട്ടര്‍ പട്ടികയില്‍ പേരുണ്ടായിരുന്ന ഒരാള്‍ വീണ്ടും ഈ ഫോം സമര്‍പ്പിച്ചെന്ന കാരണത്താല്‍ നിയമനടപടി സ്വീകരിക്കില്ലെന്നും കമ്മീഷന്‍ വ്യക്തമാക്കി. എന്നാല്‍ വോട്ടര്‍ ഇതിനകം മറ്റൊരു പാര്‍ലമെന്ററി മണ്ഡലത്തിലോ നിയമസഭാ മണ്ഡലത്തിലോ വോട്ടറായി രജിസ്റ്റര്‍ ചെയ്തിട്ടുണ്ടാകാന്‍ പാടില്ല. കൂടാതെ, സമര്‍പ്പിച്ച സത്യപ്രസ്താവന നിയമപരമായ വ്യവസ്ഥകള്‍ക്ക് അനുസൃതവുമായിരിക്കണമെന്നും നിബന്ധനയുണ്ട്.
by Midhun HP News | Nov 4, 2026 | Latest News, കേരളം
തിരുവനന്തപുരം: വനത്തില്‍ പ്ലാസ്റ്റിക് ഉപേക്ഷിക്കുന്നവരില്‍ നിന്ന് 2000 രൂപ പിഴയീടാക്കും. ഡിസംബര്‍ ഒന്നുമുതല്‍ ഇത് നടപ്പാക്കും. ബീറ്റ് ഫോറസ്റ്റ് ഓഫീസര്‍ റാങ്കിലോ അതിനുമുകളിലോ ഉള്ള ഉദ്യോഗസ്ഥര്‍ക്ക് പിഴ ചുമത്താം. പിഴയടയ്ക്കാത്തവരുടെ പേരില്‍ വന്യജീവി സംരക്ഷണ നിയമപ്രകാരം കേസെടുക്കും.
ദേശീയോദ്യാനം, വന്യജീവിസങ്കേതം, കമ്യൂണിറ്റി റിസര്‍വ് ഉള്‍പ്പെടെയുള്ള സംരക്ഷിതപ്രദേശങ്ങളില്‍ പ്ലാസ്റ്റിക്കും മണ്ണില്‍ ലയിക്കാത്ത മാലിന്യവും വലിച്ചെറിയുന്നവര്‍ക്കെതിരെയാണ് നടപടി സ്വീകരിക്കുക. സന്ദര്‍ശകര്‍ ഉപേക്ഷിക്കുന്ന ആഹാരാവശിഷ്ടത്തോടുകൂടിയ പ്ലാസ്റ്റിക് കവറുകളും പാത്രങ്ങളും കഴിക്കുന്നത് വന്യമൃഗങ്ങളുടെയും പക്ഷികളുടെയും ജീവന് ഭീഷണിയാകുന്നുണ്ട്. പ്ലാസ്റ്റിക് മാലിന്യം ആവാസവ്യവസ്ഥയെയും അപകടത്തിലാക്കുന്നുണ്ട്. ഈ പശ്ചാത്തലത്തിലാണ് നടപടി കടുപ്പിച്ചത്.
സന്ദര്‍ശകര്‍ക്കു പുറമേ വനത്തിനുള്ളിലെ ജനവാസമേഖലയിലേക്കും മറ്റാവശ്യങ്ങള്‍ക്കും സംരക്ഷിതപ്രദേശങ്ങളിലൂടെ യാത്രചെയ്യുന്നവര്‍ക്കും നിയമം ബാധകമാണ്. പിഴത്തുക സംരക്ഷിത പ്രദേശം ശുചിയാക്കാന്‍ മാത്രമേ ഉപയോഗിക്കൂ. സംരക്ഷിതപ്രദേശങ്ങളില്‍ ഹരിതചട്ടം നടപ്പാക്കുന്നതിനായി വനംവകുപ്പ് ഉദ്യോഗസ്ഥര്‍, വിഎസ്എസ്-ഇഡിസി പ്രതിനിധികള്‍, തദ്ദേശസ്ഥാപന പ്രതിനിധികള്‍ എന്നിവരുള്‍പ്പെടുന്ന സമിതി രൂപവത്കരിക്കും.
by Midhun HP News | Nov 4, 2026 | Latest News, കേരളം
ന്യൂഡല്‍ഹി: ആഗോള വിപണിയില്‍ എണ്ണവില ഇടിഞ്ഞു. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 102 ഡോളറിലേക്ക് ആണ് താഴ്ന്നത്. അമേരിക്കന്‍ ഇടക്കാല തെരഞ്ഞെടുപ്പ് ഉള്‍പ്പെടെയുള്ള വിഷയങ്ങളാണ് എണ്ണവിലയില്‍ പ്രതിഫലിക്കുന്നത്.
അമേരിക്കയിലെ ഇടക്കാല തെരഞ്ഞെടുപ്പ് പ്രസിഡന്റ് ഡോണള്‍ഡ് ട്രംപിന് നിര്‍ണായകമാണ്. തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിക്ക് തിരിച്ചടി നേരിട്ടാല്‍ യുഎസ് കോണ്‍ഗ്രസില്‍ ട്രംപിന് മേല്‍ക്കൈ നഷ്ടപ്പെടാന്‍ ഇടയാക്കും. അതിനാല്‍ തെരഞ്ഞെടുപ്പ് ഫലമാണ് പ്രധാനമായി നിക്ഷേപകര്‍ ഉറ്റുനോക്കുന്നത്. തെരഞ്ഞെടുപ്പ് ഫലം ഇറാനുമായുള്ള അമേരിക്കയുടെ സമാധാന ചര്‍ച്ചകളെ ഏത് തരത്തില്‍ ബാധിക്കുമെന്ന ആകാംക്ഷയിലാണ് നിക്ഷേപകര്‍.
ഇറാനുമായുള്ള യുദ്ധം അവസാനിപ്പിക്കുന്നതിനുള്ള ചര്‍ച്ചകളില്‍ എന്തെങ്കിലും പുരോഗതി ഉണ്ടാകുമോ എന്ന് വിപണികള്‍ ഉറ്റുനോക്കുകയാണ്. അതിനിടെ തെരഞ്ഞെടുപ്പിന് ശേഷം ആക്രമണങ്ങള്‍ കൂടുതല്‍ രൂക്ഷമാകാതിരിക്കാന്‍ ഖത്തര്‍ മധ്യസ്ഥശ്രമങ്ങള്‍ ശക്തമാക്കിയിട്ടുണ്ട്. എന്നാല്‍ അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കുന്നതിനുള്ള ഒരു കരാറിലെത്തുന്നതില്‍ നിന്ന് ഇരുപക്ഷവും ഇപ്പോഴും വളരെ അകലെയാണെന്നാണ് ഇറാന്‍ അധികൃതര്‍ പറയുന്നത്. ഇറാനെതിരെ ആക്രമണം നടത്താന്‍ അമേരിക്കയ്ക്ക് നിലവില്‍ പദ്ധതികളൊന്നുമില്ലെന്ന് യുഎസ് പ്രസിഡന്റ് ഡോണള്‍ഡ് ട്രംപ് പ്രതികരിച്ചു.
by Midhun HP News | Nov 4, 2026 | Latest News, കേരളം
കല്ലമ്പലം തോട്ടയ്ക്കാട് വാഹനാപകടം ബൈക്ക് യാത്രികന് ഗുരുതര പരിക്ക്. ഇരുചക്രവാഹനം ഓടിച്ച ഏകദേശം 45 വയസ്സോളം പ്രായം വരുന്ന റോബിൻ എന്ന ആളിനാണ് ഗുരുതര പരിക്കേറ്റത്. ഇന്ന് വൈകുന്നേരത്തോടെയായിരുന്നു അപകടം. തോട്ടയ്ക്കാട് തോക്കാലയ്ക്ക് സമീപമാണ് കാറും ഇരുചക്ര വാഹനവും കൂട്ടിയിടിച്ചത്.
ഇടിയുടെ ആഘാതത്തിൽ ബൈക്ക് പൂർണ്ണമായും തകർന്നു. പരിക്കേറ്റ റോബിനെ ഉടൻതന്നെ സമീപത്തെ സ്വകാര്യ ആശുപത്രിയിലേക്ക് മാറ്റി. കടക്കൽ സ്വദേശി റോബിൻ ആണ് പരിക്കേറ്റത്
Recent Comments