റിട്ടേണ്‍ സമര്‍പ്പിക്കാത്തവര്‍ മറക്കല്ലേ!; ഇനി ഒരു ദിവസം മാത്രം

by Midhun HP News | Dec 30, 2022 | Latest News, കേരളം, ജില്ലാ വാർത്ത

ന്യൂഡല്‍ഹി: ഈ വര്‍ഷം അവസാനിക്കാന്‍ ഇനി മണിക്കൂറുകള്‍ മാത്രമാണ് അവശേഷിക്കുന്നത്. നികുതിദായകരെ സംബന്ധിച്ച് 2021-22 സാമ്പത്തിക വര്‍ഷത്തെ വൈകിയതും പുതുക്കിയതുമായ ആദായ നികുതി റിട്ടേണുകള്‍ ഫയല്‍ ചെയ്യാനുണ്ടെങ്കില്‍ അത് ഫയല്‍ ചെയ്യാനുള്ള അവസാന തീയതി ഡിസംബര്‍ 31 ആണ്.

കഴിഞ്ഞ സാമ്പത്തിക വര്‍ഷത്തെ റിട്ടേണ്‍ സമര്‍പ്പിക്കുന്നതിനുള്ള അവസാന തീയതി ജൂലൈ 31 ആയിരുന്നു. ഇക്കായലളവില്‍ ആദായനികുതി റിട്ടേണ്‍ ഫയല്‍ ചെയ്തിട്ടില്ലാത്ത ഒരാള്‍ക്ക് ഡിസംബര്‍ 31 നോ അതിനുമുമ്പോ വൈകിയുള്ള ഐ ടി ആര്‍ ഫയല്‍ ചെയ്യാന്‍ അവസരമുണ്ട്. നികുതി റിട്ടേണ്‍ ഫോമിലെ ആദായനികുതി നിയമത്തിലെ 139 (4) വകുപ്പ് തെരഞ്ഞെടുത്ത് വേണം വൈകിയുള്ള ഐ ടി ആര്‍ ഫയല്‍ ചെയ്യേണ്ടത്.

അതുപോലെ, യഥാര്‍ത്ഥ ആദായ നികുതി റിട്ടേണ്‍ ഫയല്‍ ചെയ്യുമ്പോള്‍ എന്തെങ്കിലും തെറ്റ് സംഭവിച്ചിട്ടുണ്ടെങ്കില്‍, പുതുക്കിയ ആദായ നികുതി റിട്ടേണ്‍ ഫയല്‍ ചെയ്തുകൊണ്ട് നികുതിദായകന് അത് തിരുത്താനുള്ള അവസരമുണ്ട്. ഇതിനുള്ള അവസാന തീയതിയും ഡിസംബര്‍ 31 ആണ്. ആദായനികുതി നിയമത്തിലെ 139 (5) വകുപ്പ് പ്രകാരമാണ് പുതുക്കിയ ആദായ നികുതി റിട്ടേണ്‍ ഫയല്‍ ചെയ്യേണ്ടത്. റിട്ടേണ്‍ ഫോമില്‍ 139 (5) വകുപ്പ് തെരഞ്ഞെടുത്ത് വേണം നടപടികള്‍ പൂര്‍ത്തിയാക്കേണ്ടത്.

സ്റ്റുഡന്റ് പോലീസ് കേഡറ്റുകളുടെ ക്യാമ്പ് ആരംഭിച്ചു.

by Midhun HP News | Dec 30, 2022 | Latest News, കേരളം, ജില്ലാ വാർത്ത

അവനവഞ്ചേരി ഗവ. ഹൈസ്കൂളിലെ സ്റ്റുഡന്റ് പോലീസ് കേഡറ്റുകളുടെ ക്രിസ്തുമസ് അവധിക്കാല ക്യാമ്പ് ആരംഭിച്ചു. സുസ്ഥിര വികസനം, സുരക്ഷിത ജീവിതം എന്ന വിഷയവുമായി ബന്ധപ്പെട്ട് മൂന്നു ദിവസങ്ങളായി നടക്കുന്ന ക്യാമ്പ് ആറ്റിങ്ങൽ നഗരസഭ ചെയർപെഴ്സൺ അഡ്വ.എസ്.കുമാരി ഉദ്ഘാടനം ചെയ്തു. സ്കൂൾ പി.റ്റി.എ. പ്രസിഡന്റ് റ്റി.എൽ. പ്രഭൻ അദ്ധ്യക്ഷത വഹിച്ച യോഗത്തിൽ എസ്.എം.സി. ചെയർമാൻ കെ.ശ്രീകുമാർ, ഹെഡ്മാസ്റ്റർ ജി.എൽ. നിമി, അധ്യാപരായ എൻ.സാബു, കെ. ജയിംസ്, എസ്. ശാരിക എന്നിവർ സംബന്ധിച്ചു. വിവിധ സെഷനുകളിലായി ബോധവൽകരണ ക്ലാസുകൾ, കായിക പരിശീലനം, പ്രായോഗിക പരിശീലനങ്ങൾ എന്നിവ നടക്കും.

മതസമന്വയ തീർഥാടന പദയാത്രയ്ക്കു പെരുങ്ങുഴി മുസ്ളീം ജമാഅത്ത് വരവേൽപ്പ് നൽകി.

by Midhun HP News | Dec 30, 2022 | Latest News, കേരളം, ജില്ലാ വാർത്ത

ശ്രീനാരായണ ഗുരുദേവൻ പ്രതിഷ്ഠാകർമം നിർവഹിച്ച കുളത്തൂർ കോലത്തുകര ശിവക്ഷേത്രസന്നിധിയിൽ നിന്നു ശിവഗിരിയിലേക്കു പുറപ്പെട്ട മതസമന്വയ തീർഥാടന പദയാത്രയ്ക്കു പെരുങ്ങുഴി മുസ്ളീം ജമാഅത്ത് അങ്കണത്തിൽ സ്നേഹോഷ്മള വരവേൽപ്പ്. മതാതീത മാനവീകത സമൂഹത്തിനു മുൻപാകെ മഹദ് സന്ദേശങ്ങളിലൂടെ പകർന്നു നൽകിയ മഹാഗുരുവിൻ്റെ മണ്ണിലേക്കുള്ള തീർഥയാത്രയ്ക്കു മതത്തിൻ്റെ അതിരുകൾ ഭേദിച്ചു ജമാഅത്ത് ഭാരവാഹികൾ നൽകിയ സ്വീകരണം മതസൗഹാർദ്ദത്തിൻ്റെ സുന്ദര മുഹൂർത്തമായി.

ഗുരുദേവ വിഗ്രഹവും വഹിച്ചു രഥഘോഷയാത്രയായെത്തിയ 500 ൽപ്പരം പീതവസ്ത്രധാരികളായ ഗുരുവിശ്വാസികളെ ജമാഅത്ത് പ്രസിഡൻ്റ് ഇ.അബ്ദുൽ അസീസ്, സെക്രട്ടറി എ.അബ്ദുൽ ഹക്കീം എന്നിവർ ജമാഅത്ത് കവാടത്തിൽ പദയാത്ര ക്യാപ്ടൻ പീത ഷാൾ അണിയിച്ചു സ്വാഗതമോതി. വൈസ് പ്രസിഡൻ്റ് യു.അഷ്റഫ് ,ജോ. സെക്രട്ടറിമാരായ എ.എസ്.സുഹൈൽ, ഇ.ഷാജഹാൻ, ട്രഷറർ എം.നസീർ, ഭരണ സമിതി അംഗങ്ങളായ എസ്.റാമി, എ.സമീർ ,എ.ഷാഫി, എം.എ.ഹുസൈൻ, എച്ച്.ഹസീം മുഹമ്മദ് എന്നിവരുടെ സംഘം പദയാത്ര സംഘത്തിനു ലഘുഭക്ഷണവും ശീതളപാനീയങ്ങളും നൽകി എതിരേറ്റു.

എസ്എൻഡിപി യോഗം ചിറയിൻകീഴ് യൂണിയൻ വൈസ് പ്രസിഡൻ്റ് പ്രദീപ് സഭവിള, സെക്രട്ടറി ശ്രീകുമാർ പെരുങ്ങുഴി, യോഗം ഡയറക്ടർ അഴൂർബിജു, കൗൺസിലർ സി. കൃത്തി ദാസ്, ഗുരുക്ഷേത്രസമിതി ജില്ലാ പ്രസിഡൻ്റ് ബൈജു തോന്നയ്ക്കൽ, എസ്എൻ ട്രസ്റ്റ് ബോർഡ് അംഗങ്ങളായ കെ.രഘുനാഥൻ, കെ.പുഷ്കരൻ ,എസ്എൻഡിപിശാഖാ യോഗം ഭാരവാഹികളായ സന്തോഷ് നാലുമുക്ക്, ജി.സാംബശിവൻ, എൻ.അജിത്ത്, ഗുരുക്ഷേത്ര സെക്രട്ടറി ആർ.ഷിബു, ട്രഷറർ ഷിജോസ് ബാബു തുടങ്ങിയവരും സ്വീകരണ ചടങ്ങിൽ പങ്കെടുത്തു.

കുളത്തൂരിൽ നിന്നുള്ള മാനവമൈത്രി പദയാത്രയ്ക്കു ചിറയിൻ കീഴിൽ ഇടഞ്ഞുംമൂല, പെരുങ്ങുഴി, കാറ്റാടിമുക്ക് ജംക്ഷൻ, അഴൂർ, മഞ്ചാടിമൂട്, കടകം എന്നിവിടങ്ങളിൽ എസ്എൻഡിപി ശാഖാ യോഗങ്ങൾ, ഗുരുമന്ദിരങ്ങൾ എന്നിവയുടെ നേതൃത്വത്തിൽ ഭക്തി നിർഭരമായ സ്വീകരണങ്ങൾ നൽകി.

ചിറയിൻകീഴ് ശാർക്കര ഗുരുക്ഷേത്രസന്നിധിയിലെത്തിയ പദയാത്ര സംഘത്തെ ചിറയിൻകീഴ് എസ്എൻഡിപി യൂണിയൻ പ്രസിഡൻ്റ് സി.വിഷ്ണു ഭക്തൻ, ഗുരുക്ഷേത്രസമിതി പ്രസിഡൻ്റ് ഡോ.ബി.സീരപാണി എന്നിവർ ചേർന്നു ഹാരാർപ്പണം നടത്തി സ്വീകരിച്ചു. തുടർന്നു ശിവഗിരി തീർഥാടന ചിറയിൻകീഴ് പഞ്ചായത്ത് കമ്മിറ്റിയുടെ നേതൃത്വത്തിൽ പദയാത്രികർക്കു ശാർക്കരയിൽ സമൂഹസദ്യയും നൽകി.

തിരുവനന്തപുരം കോർപറേഷനിലെ സമരം ഒത്തുതീർന്നു

by Midhun HP News | Dec 30, 2022 | Latest News, കേരളം, ജില്ലാ വാർത്ത

തിരുവനന്തപുരം : കോർപ്പറേഷനിലെ കത്ത് വിവാദത്തിൽ പ്രതിപക്ഷം നടത്തി വരുന്ന സമരം തീർക്കാൻ ധാരണ. തദ്ദേശസ്വയംഭരണ വകുപ്പ് മന്ത്രി എം ബി രാജേഷുമായി കക്ഷി നേതാക്കൾ നടത്തിയ സമവായ ചർച്ചയ്ക്കൊടുവിലാണ് തീരുമാനം. അന്വേഷണം അതിന്റെ വഴിക്ക് നടക്കും. ഡി ആർ അനിലിനെ സ്റ്റാന്റിംഗ് കമ്മിറ്റി ചെയർമാൻ സ്ഥാനത്ത് നിന്ന് ഒഴിവാക്കും. കത്ത് എഴുതിയ കാര്യം ഡി ആർ അനിൽ സമ്മതിച്ചിട്ടുണ്ട്. ഭരണപരമായ കാര്യങ്ങളിൽ ഉയർന്ന ആക്ഷേപം പ്രത്യേകം പരിശോധിക്കും.

ആരോഗ്യകരമായ ചർച്ചയാണ് നടന്നതെന്ന് ബിജെപി നേതാവ് വി വി രാജേഷ്. മേയറുടെ രാജി ആവശ്യം കോടതി തീരുമാനത്തിന് അനുസരിച്ച് നടക്കും. നഗരസഭയിലെ ദൈനം ദിന പ്രതിഷേധം അവസാനിപ്പിക്കുന്നുവെന്നും വി വി രാജേഷ് അറിയിച്ചു. സമരം അവസാനിപ്പിക്കുന്നുവെന്ന് യുഡിഎഫും വ്യക്തമാക്കി. മൊത്തം അഴിമതിക്കെതിരെയായിരുന്നു സമരമെന്ന് പാലോട് രവി പറഞ്ഞു. ഇതോടെ തിരുവനന്തപുരം നഗരസഭയിൽ കഴിഞ്ഞ 56 ദിവസമായി തുടരുന്ന സമരമാണ് അവസാനിക്കുന്നത്.

ഒന്നര വയസ്സുകാരന് ഇരുപതോളം തെരുവുനായ്ക്കള്‍ ചേർന്നുള്ള ആക്രമണത്തിൽ ഗുരുതര പരിക്ക്

by Midhun HP News | Dec 30, 2022 | Latest News, കേരളം, ജില്ലാ വാർത്ത

കൊല്ലം: തെരുവുനായയുടെ ആക്രമണത്തില്‍ ഒന്നര വയസ്സുകാരന് ഗുരുതര പരിക്ക്. മയ്യനാട്ടെ രാജേഷ്-ആതിര ദമ്പതികളുടെ മകന്‍ അര്‍ണവിനാണ് തെരുവുനായയുടെ ആക്രമണത്തില്‍ പരിക്കേറ്റത്. ശരീരമാസകലം പരിക്കേറ്റ കുട്ടിയെ കൊല്ലം ജില്ലാ ആശുപത്രിയില്‍ പ്രവേശിപ്പിച്ചു.

വെള്ളിയാഴ്ച ഉച്ചയ്ക്ക് ഒരുമണിയോടെയാണ് സംഭവം. വീടിന്റെ മുറ്റത്തിരുന്ന് കളിക്കുമ്പോഴാണ് കുട്ടിയുടെ നേര്‍ക്ക് തെരുവുനായയുടെ ആക്രമണം ഉണ്ടായത്. ഈ സമയം കുട്ടിയുടെ മുത്തശ്ശി മാത്രമേ വീട്ടില്‍ ഉണ്ടായിരുന്നുള്ളൂ. കരച്ചില്‍ കേട്ട് നോക്കുമ്പോള്‍ ഇരുപതോളം തെരുവുനായകള്‍ ചേര്‍ന്ന് കുട്ടിയെ
കടിച്ചു പറിക്കുകയായിരുന്നു. തുടര്‍ന്ന് ഇവര്‍ മരക്കഷണം ഉപയോഗിച്ച് തെരുവുനായകളെ അടിച്ചോടിച്ച് കുട്ടിയെ രക്ഷിച്ചു.

കൊല്ലം ജില്ലാ ആശുപത്രിയില്‍ പേവിഷബാധയ്‌ക്കെതിരായ വാക്‌സിനടക്കമുള്ള ചികിത്സ കുട്ടിക്ക് നല്‍കുന്നുണ്ട്. ആവശ്യമെങ്കില്‍ കുട്ടിയെ തിരുവനന്തപുരത്തെ ആശുപത്രിയിലേക്ക് മാറ്റും.