by Midhun HP News | Oct 5, 2024 | Latest News, ദേശീയ വാർത്ത
ലബനനിൽ വ്യോമാക്രമണം കടുപ്പിച്ച് ഇസ്രയേൽ. വടക്കൻ ലബനനിലുണ്ടായ മിസൈൽ ആക്രമണത്തിൽ ഹമാസ് സായുധ വിഭാഗം നേതാവ് സയീദ് അത്തല്ല കൊല്ലപ്പെട്ടു. ഇസ്രയേൽ ആക്രമണങ്ങളിൽ കൊല്ലപ്പെട്ടവരുടെ എണ്ണം 2000 കടന്നു.
വടക്കൻ ലെബനൻ നഗരമായ ട്രിപ്പോളിയിലെ പലസ്തീൻ അഭയാർത്ഥി ക്യാമ്പിലുണ്ടായ ആക്രമണത്തിലാണ് ഹമാസ് സായുധ വിഭാഗം തലവനായ സയീദ് അത്തല്ല കൊല്ലപ്പെട്ടത്. അത്തല്ലയുടെ മൂന്ന് കുടുംബാംഗങ്ങളും കൊല്ലപ്പെട്ടതായി റിപ്പോട്ടുണ്ട്. ബെയ്റൂത്തിന്റെ തെക്കൻ പ്രദേശങ്ങളിൽ തുടർച്ചയായ സ്ഫോടനങ്ങൾ ഉണ്ടായി. ഗ്രാമപ്രദേശങ്ങളിൽ നിന്ന് ജനങ്ങളെ ഒഴിപ്പിക്കാൻ ഇസ്രായേൽ സൈന്യം നിർദേശം നൽകിയതിന് പിന്നാലെയാണിത് . ഗസയിലെ നുസ്രത്ത് അഭയാർത്ഥി ക്യാംപിലുണ്ടായ ഇസ്രയേൽ ആക്രമണത്തിൽ 7 പേർ കൊല്ലപ്പെട്ടു.
ഇതിനിടെ ലബനനിൽ യുഎസ് പൗരൻ കൊല്ലപ്പെട്ടെന്ന വാർത്ത അമേരിക്ക സ്ഥിരീകരിച്ചു. സംഘർഷം രൂക്ഷമായതിനെത്തുടർന്ന് ഐക്യരാഷ്ട്ര സംഘടന സമാധാന സേനാംഗങ്ങൾ തെക്കൻ ലെബനനിൽ നിലയുറപ്പിച്ചു, ഇസ്രായേലിനും ലെബനനുമിടയിൽ സമാധാനം പുനസ്ഥാപിക്കുന്നതിനുള്ള ശ്രമം തുടരുകയാണ്. സ്ഥിതിഗതികൾ ചർച്ചചെയ്യുന്നതിന് ഇറാൻ വിദേശകാര്യ മന്ത്രി അബ്ബാസ് അറാഖി സിറിയൻ തലസ്ഥാനമായ ഡമാസ്കസിൽ എത്തി.
അതിനിടെ തെക്കൻ ഇസ്രായേലിലെ ഐൻ ഹാഷ്ലോഷയിലും കിസുഫിലും മുന്നറിയിപ്പ് സൈറൻ നൽകി. ഇറാൻ പരമോന്നത നേതാവ് ആയത്തുല്ല അലി ഖാംനയിയുടെ പ്രഭാഷണത്തിന് പിന്നാലെ ഇറാൻ റോക്കറ്റ് ആക്രമണം നടത്തിയതിൽ പ്രകോപിതരായാണ് ഇസ്രായേൽ വ്യോമാക്രമണം വീണ്ടും കടുപ്പിച്ചത്. ആക്രമണങ്ങളിൽ നിന്ന് പിന്മാറില്ലെന്ന ഉറച്ച നിലപാടിലാണ് ഇറാൻ.
by Midhun HP News | Oct 5, 2024 | Latest News, ദേശീയ വാർത്ത
സന: യെമനിലെ ഹൂതി കേന്ദ്രങ്ങളിൽ അമേരിക്കയുടെ അതിശക്തമായ ആക്രമണം. യുദ്ധക്കപ്പലുകളും വിമാനങ്ങളും പങ്കെടുത്ത ആക്രമണത്തിൽ 15 ഹൂതി കേന്ദ്രങ്ങൾ തകർത്തെന്ന് അമേരിക്കൻ സൈനിക വക്താവ് വ്യക്തമാക്കി. ചെങ്കടലിൽ എണ്ണക്കപ്പൽ തകർക്കുന്ന ദൃശ്യങ്ങൾ ഹൂതികൾ പുറത്തുവിട്ടതിന് പിന്നാലെയാണ് അമേരിക്ക തിരിച്ചടിച്ചത്.
ചരക്കു കപ്പലുകൾ ആക്രമിച്ചുകൊണ്ട് ആഗോള സാമ്പത്തിക വ്യവസ്ഥയെ തന്നെ തകിടം മറിക്കാനുള്ള ഹൂതികളുടെ നീക്കത്തിനുള്ള മറുപടിയായാണ് അമേരിക്കയുടെ ആക്രമണം. ആയുധ സംഭരണ കേന്ദ്രങ്ങളടക്കം 15 ഹൂതി കേന്ദ്രങ്ങൾ തകർത്തുവെന്നാണ് സൈനിക വക്താവ് വ്യക്തമാക്കി. കഴിഞ്ഞ ആറു മാസത്തിനിടെ നൂറിലേറെ ചരക്കു കപ്പലുകൾക്ക് നേരെയാണ് ഹൂതികൾ ആക്രമണം നടത്തിയത്. കഴിഞ്ഞ ദിവസം ഹൂതി കേന്ദ്രങ്ങൾക്ക് നേരെ ഇസ്രയേലും ആക്രമണം നടത്തിയിരുന്നു. ഇതിന് തൊട്ടുപിന്നാലെയാണ് കടുത്ത ആക്രമണം അമേരിക്കയുടെ ഭാഗത്ത് നിന്നുണ്ടായത്.
അതേസമയം, ലെബനനിൽ ഇസ്രയേൽ നടത്തുന്ന ആക്രമണങ്ങൾ തുടരുകയാണ്. ഇന്നലെ രാത്രിയും ബെയ്റൂട്ടിലടക്കം വിവിധ കേന്ദ്രങ്ങളിൽ ഇസ്രയേൽ ആക്രമണം നടത്തി. വ്യോമാക്രമണത്തിൽ കൊല്ലപ്പെട്ടവരുടെ എണ്ണം 2000 കടന്നു. ബെയ്റൂട്ടിൽനിന്ന് 50 കിലോമീറ്റർ അകലെ ലബനൻ–സിറിയ അതിർത്തിയിലെ തിരക്കേറിയ മസ്നാ ബോർഡർ ക്രോസിങ് ഇസ്രയേൽ ബോംബിട്ടു തകർത്തു. സിറിയയിൽനിന്ന് ഹിസ്ബുല്ലയ്ക്ക് ആയുധങ്ങളെത്തിച്ചിരുന്ന ഇവിടത്തെ തുരങ്കം തകർത്തെന്ന് ഇസ്രയേൽ പറഞ്ഞു. ലബനോണിലെ തുടർച്ചയായ ആക്രമണങ്ങൾക്ക് പിന്നാലെ എണ്ണ സംഭരണ ശാലകൾക്ക് നേരെ ആക്രമണമുണ്ടാകുമെന്ന ഭീതിയിൽ അന്താരാഷ്ട്ര വിപണിയിൽ എണ്ണ വില കുതിക്കുകയാണ്. ക്രൂഡ് ഓയിൽ വില അഞ്ച് ശതമാനമാണ് ഇന്നലെ മാത്രം വർധിച്ചത്.
by liji HP News | Oct 4, 2024 | Latest News, ദേശീയ വാർത്ത
ന്യൂഡല്ഹി: ഡല്ഹി മുന് മുഖ്യമന്ത്രിയും ആം ആദ്മി പാര്ട്ടി നേതാവുമായ അരവിന്ദ് കെജരിവാള് മുഖ്യമന്ത്രിയുടെ വസതി ഒഴിഞ്ഞു. ഫിറോസ്ഷാ റോഡിലുള്ള പഞ്ചാബ് രാജ്യസഭാ എംപി അശോക് മിത്തലിന്റെ ബംഗ്ലാവിലേക്കാണ് താമസം മാറിയത്. മുഖ്യമന്ത്രി സ്ഥാനം രാജിവച്ച സാഹചര്യത്തിലാണ് വസതി ഒഴിഞ്ഞത്.
വസതി ഒഴിയുന്നതിന് മുന്പായി കെജരിവാള് എല്ലാവര്ക്കും ഹസ്തദാനം നല്കിയ ശേഷം പിതാവും മാതാവും ഭാര്യയും ഒത്ത് കാറില് മടങ്ങി. നവരാത്രി ഉത്സവ ഉത്സവ വേളയില് ഔദ്യോഗിക വസതി ഒഴിയുമെന്ന് കെജരിവാള് പറഞ്ഞിരുന്നു. ഡല്ഹി മദ്യനയക്കേസില് ജാമ്യം ലഭിച്ചതിനെ തുടര്ന്ന് കഴിഞ്ഞ മാസമാണ് കെജരിവാള് ഡല്ഹി മുഖ്യമന്ത്രി സ്ഥാനം ഒഴിഞ്ഞത്. ഡല്ഹി നിയമസഭാ തെരഞ്ഞെടുപ്പിന് ഏതാനും മാസങ്ങള് മാത്രമാണ് ഇനിയുള്ളത്. ‘സത്യസന്ധനാണെന്ന് തോന്നുവെങ്കില് എനിക്ക് വോട്ട് ചെയ്യു. തെരഞ്ഞെടുപ്പിന് ശേഷം ഞാന് മുഖ്യമന്ത്രിയാവാം. ഞാന് സത്യസന്ധനല്ലെങ്കില് വോട്ട് ചെയ്യേണ്ട. എന്റെ സത്യസന്ധതയ്ക്ക് നിങ്ങള് തരുന്ന സര്ട്ടിഫിക്കറ്റാണ് ഓരോ വോട്ടും’ കെജരിവാള് പറഞ്ഞിരുന്നു.
കെജരിവാള് മണ്ഡലത്തില് താമസിക്കുന്നതു ഗുണം ചെയ്യുമെന്നാണ് ആംആദ്മി പാര്ട്ടി കണക്കൂകുട്ടുന്നത്. എഎപി എംഎല്എമാരും കൗണ്സിലര്മാരും തൊഴിലാളികളും സാധാരണക്കാരും ഉള്പ്പെടെ നിരവധിപ്പേര് മുന് മുഖ്യമന്ത്രിക്ക് താമസ സൗകര്യം വാഗ്ദാനം രംഗത്തെത്തിയിരുന്നു. മദ്യനയ അഴിമതിക്കേസുമായി ബന്ധപ്പെട്ട് ആറുമാസത്തോളം കെജരിവാള് തിഹാര് ജയിലിലായിരുന്നു. ബിജെപിയുടെ രാഷ്ട്രീയ പകപോക്കലാണെന്ന് ആരോപിച്ച് കെജരിവാളും പാര്ട്ടി പ്രവര്ത്തകരും രംഗത്തെത്തിയിരുന്നു.
by Midhun HP News | Oct 4, 2024 | Latest News, ദേശീയ വാർത്ത
ഡല്ഹി: ഉപഭോക്താക്കള്ക്ക് മെച്ചപ്പെട്ട സേവനം നല്കുന്നതിന് തുടര്ച്ചയായി പുതിയ ഫീച്ചറുകള് അവതരിപ്പിച്ച് വരികയാണ് വാട്സ്ആപ്പ്. ഇക്കൂട്ടത്തില് പുതിയതായി സ്റ്റാറ്റസ് അപ്ഡേറ്റ്സില് വാട്സ്ആപ്പ് അവതരിപ്പിച്ച ഫീച്ചറാണ് ടാഗിങ്. കൂട്ടുകാരുമായും കുടുംബാംഗങ്ങളുമായി എളുപ്പം കണക്ട് ചെയ്യാന് ഉപയോക്താവിനെ സഹായിക്കുന്ന വഴിയാണ് വാട്്സആപ്പ് സ്റ്റാറ്റസ്. ഇതുമായി ബന്ധപ്പെട്ടാണ് പുതിയ ഫീച്ചര് വാട്സ്ആപ്പ് കൊണ്ടുവന്നത്. ഉപയോക്താക്കള്ക്ക് ഇപ്പോള് മറ്റുള്ളവരുടെ സ്റ്റാറ്റസ് ലൈക്ക് ചെയ്യാനും ഷെയര് ചെയ്യാനും കഴിയും. സ്റ്റാറ്റസ് അപ്ഡേറ്റുകളില് ഉപയോക്താക്കള്ക്ക് അവരുടെ കോണ്ടാക്റ്റുകളെ സ്വകാര്യമായി മെന്ഷന് ചെയ്യാനും മറ്റുള്ളവരെ ടാഗ് ചെയ്യാനും കഴിയുന്ന തരത്തിലാണ് പുതിയ ഫീച്ചര്.
പലപ്പോഴും മറ്റുള്ളവരുടെ സ്റ്റാറ്റസ് അപ്ഡേറ്റുകള് എല്ലാം കാണാന് ഉപയോക്താക്കള്ക്ക് കഴിയണമെന്നില്ല. ഏറ്റവും അടുത്ത ആളുകള് സ്റ്റാറ്റസ് കാണുന്നുവെന്ന് ഉറപ്പാക്കാന് സഹായിക്കുന്നതാണ് പുതിയ ഫീച്ചര്. അവരെ സ്വകാര്യമായി മെന്ഷന് ചെയ്ത് ടാഗ് ചെയ്ത് അവര് സ്റ്റാറ്റസ് കണ്ടു എന്ന് ഉറപ്പാക്കുന്നതാണ് ഈ ഫീച്ചറിന്റെ രീതി. ഈ സ്റ്റാറ്റസ് അപ്ഡേറ്റ് കൂടുതല് ആളുകളിലേക്ക് എത്തിക്കാന് ഏറ്റവും അടുത്ത ആളുകള് വീണ്ടും ഷെയര് ചെയ്യുന്നുണ്ടെന്ന് ഉറപ്പാക്കാനും ഇതുവഴി സാധിക്കും.
ഇതിന് പുറമേയാണ് സ്റ്റാറ്റസ് ലൈക്ക് ഫീച്ചര്. മറ്റ് പ്ലാറ്റ്ഫോമുകളിലേതിന് സമാനമാണ് ഇതിന്റെ പ്രവര്ത്തനം. ബട്ടണിന്റെ ഒറ്റ ടാപ്പിലൂടെ, ഉപയോക്താക്കള്ക്ക് അവരുടെ കോണ്ടാക്റ്റുകളുടെ സ്റ്റാറ്റസ് അപ്ഡേറ്റുകള് ലൈക്ക് ചെയ്യാന് കഴിയും. സ്റ്റാറ്റസ് ലൈക്കുകള് സ്വകാര്യമാണ്. നിങ്ങള് ലൈക്ക് ചെയ്ത വ്യക്തിക്ക് മാത്രമേ അവ വ്യൂവേഴ്സ് ലിസ്റ്റില് കാണാനാകൂ എന്നും വാട്സ്ആപ്പ് വ്യക്തമാക്കി.
by Midhun HP News | Oct 3, 2024 | Latest News, ദേശീയ വാർത്ത
ബംഗളൂരു: കര്ണാടകയില് കേക്കില് കാന്സറിന് കാരണമാകുന്ന നിരവധി ചേരുവകള് കണ്ടെത്തി. 12 കേക്ക് സാമ്പിളുകളിലാണ് ആരോഗ്യത്തിന് ദോഷകരമായ ഘടകങ്ങള് കണ്ടെത്തിയത്. ഇതിന് പിന്നാലെ കേക്കുമായി ബന്ധപ്പെട്ട് ആരോഗ്യത്തിന് ഉണ്ടാവാന് ഇടയുള്ള അപകട സാധ്യതകള് മുന്നിര്ത്തി കര്ണാടക സര്ക്കാര് മുന്നറിയിപ്പ് നല്കി.
അടുത്തിടെ കോട്ടണ് മിഠായിയിലും ഗോബി മഞ്ചൂരിയനിലും കൃത്രിമ ഭക്ഷ്യ നിറങ്ങള് ചേര്ക്കുന്നത് കര്ണാടക സര്ക്കാര് നിരോധിച്ചിരുന്നു. ഇതിന് പിന്നാലെയാണ് കേക്കുമായി ബന്ധപ്പെട്ട് പുതിയ മാര്ഗനിര്ദേശം നല്കിയത്. ബംഗളൂരുവിലെ ബേക്കറികളില് നിന്ന് ശേഖരിച്ച 12 കേക്ക് സാമ്പിളുകളില് കാന്സറിന് കാരണമാകുന്ന നിരവധി പദാര്ത്ഥങ്ങള് കണ്ടെത്തിയതായി കര്ണാടക ഭക്ഷ്യസുരക്ഷാ ഗുണനിലവാര വകുപ്പ് പ്രസ്താവനയില് പറഞ്ഞു.
സംസ്ഥാന സര്ക്കാര് വിവിധ ബേക്കറികളില് നിന്ന് ശേഖരിച്ച 235 കേക്ക് സാമ്പിളുകളില് 223 എണ്ണം സുരക്ഷിതമാണെന്ന് കണ്ടെത്തി. 12 എണ്ണത്തില് മാത്രമാണ് അപകടകരമായ തോതില് കൃത്രിമ കളറിങ് അടങ്ങിയിരിക്കുന്നത്.
ചുവന്ന വെല്വെറ്റ്, ബ്ലാക്ക് ഫോറസ്റ്റ് തുടങ്ങിയ ജനപ്രിയ കേക്ക് ഇനങ്ങളില് ഇത്തരം കൃത്രിമ കളറിങ് ചേര്ക്കുന്നത് ആരോഗ്യ പ്രശ്നങ്ങള് ഉണ്ടാക്കുമെന്ന് കര്ണാടക ഭക്ഷ്യസുരക്ഷാ വകുപ്പ് പറഞ്ഞു. അല്ലുറ റെഡ്, സണ്സെറ്റ് യെല്ലോ എഫ്സിഎഫ്, പോണ്സോ 4ആര്, ടാര്ട്രാസൈന്, കാര്മോയ്സിന് തുടങ്ങിയ കൃത്രിമ നിറങ്ങള് കേക്കുകളില് ഉപയോഗിക്കുന്നതിനെതിരെയാണ് മുന്നറിയിപ്പ് നല്കിയത്. സുരക്ഷാ മാനദണ്ഡങ്ങള് പാലിക്കാന് ബേക്കറികള്ക്ക് സര്ക്കാര് നിര്ദ്ദേശം നല്കിയിട്ടുണ്ട്. കൃത്രിമ നിറങ്ങളുടെ ഉയര്ന്ന ഉപയോഗം കാന്സര് സാധ്യത വര്ദ്ധിപ്പിക്കുക മാത്രമല്ല മാനസികവും ശാരീരികവുമായ ആരോഗ്യത്തെ ദോഷകരമായി ബാധിക്കുമെന്നും കര്ണാടക ഭക്ഷ്യസുരക്ഷാ ഗുണനിലവാര വകുപ്പ് പ്രസ്താവനയില് പറഞ്ഞു.
by Midhun HP News | Oct 2, 2024 | Latest News, ദേശീയ വാർത്ത
ബെയ്റൂട്ട്: ഹിസ്ബുല്ലയുമായുള്ള ഏറ്റുമുട്ടലില് എട്ട് ഇസ്രയേല് സൈനികര് കൊല്ലപ്പെട്ടു. ഇസ്രയേല് സൈന്യത്തെ ഉദ്ധരിച്ച് ബിബിസി റിപ്പോര്ട്ട് ചെയ്തു. തെക്കന് ലെബനാനില് നടന്ന ഏറ്റുമുട്ടലിലാണ് ഇസ്രയേലി സൈനികര് കൊല്ലപ്പെട്ടത്. 7 സൈനികര്ക്ക് പരിക്കേറ്റതായും റിപ്പോര്ട്ടുണ്ട്.
കൊല്ലപ്പെട്ടവരില് മൂന്ന് പേര് ഇഗോസ് യൂണിറ്റില് നിന്നുള്ളവരാണെന്ന് ഇസ്രയേല് സൈന്യം അറിയിച്ചു. നേരത്തെ ഇതേ യൂണിറ്റില് നിന്നുള്ള ഓരാള് മരിച്ചതായി സൈന്യം അറിയിച്ചിരുന്നു. ലെബനനില് അധിനിവേശം ആരംഭിച്ചതിന് ശേഷം കൊല്ലപ്പെടുന്ന എട്ട് ഇസ്രയേല് സൈനികര് കൊല്ലപ്പെട്ടതായാണ് റിപ്പോര്ട്ട്.
തെക്കന് ലെബനാനിലെ ഗ്രാമത്തില് ഒരു കെട്ടിടത്തിനകത്ത് ഹിസ്ബുല്ല പോരാളികളുമായി ഏറ്റുമുട്ടല് ഉണ്ടായതായും പരിക്കേറ്റ സൈനികരെ ചികിത്സിക്കാന് മെഡിക്കല് സംഘത്തോട് അങ്ങോട്ട് എത്താന് ആവശ്യപ്പെട്ടതായും ഇസ്രായേല് സൈനിക റേഡിയോ റിപ്പോര്ട്ട് ചെയ്തു.
ഇസ്രയേലിലേക്ക് മിസൈലാക്രമണം നടത്തിയ പശ്ചാത്തലത്തില് ഇറാന് കനത്ത തിരിച്ചടി നല്കാന് ഇസ്രയേല് തയ്യാറെടുക്കുകയാണ്. ഇറാന്റെ തന്ത്രപ്രധാന കേന്ദ്രങ്ങളില് ഇസ്രയേല് ആക്രമണത്തിന് ഒരുങ്ങുന്നതായാണ് റിപ്പോര്ട്ട്. ആണവോര്ജ കേന്ദ്രങ്ങളില്പ്പോലും ആക്രമണം നടന്നേക്കാമെന്ന് ഇസ്രായേലി മാധ്യമങ്ങള് റിപ്പോര്ട്ട് ചെയ്യുന്നു.
Recent Comments