by Midhun HP News | Jun 22, 2026 | Latest News, കേരളം
കൊച്ചി: കൊച്ചിയില് അങ്കണവാടിയില് മൂന്നര വയസുകാരിക്ക് നേരെ ലൈംഗികാതിക്രമമെന്ന് പരാതി. അങ്കണവാടിയില് സ്ഥിരമായി എത്തിയിരുന്ന ഇരുപതുകാരനെതിരെ എളമക്കര പൊലീസ് കേസെടുത്തു. പോക്സോ വകുപ്പും പൊലീസ് ചുമത്തിയിട്ടുണ്ട്.
എളമക്കര പൊലീസ് സ്റ്റേഷന് പരിധിയില്പ്പെടുന്ന അങ്കണവാടിയിലാണ് സംഭവം. കുട്ടിയെ സ്ഥിരമായി അമ്മയോ അച്ഛനോ ആണ് കൊണ്ടുവിടാറുള്ളത്. അങ്കണവാടിയില് സ്ഥിരമായി എത്തുന്ന 20 കാരനാണ് കുട്ടിയെ ഉപദ്രവിച്ചതെന്നാണ് വീട്ടുകാരുടെ പരാതി.
വീട്ടുകാരുടെ പരാതിയുടെ അടിസ്ഥാനത്തില് പോക്സോ വകുപ്പ് പ്രകാരം എഫ്ഐആര് രജിസ്റ്റര് ചെയ്തിട്ടുണ്ട്. യുവാവ് ഒളിവിലാണെന്ന് പൊലീസ് സൂചിപ്പിച്ചു. ഇയാള്ക്കു വേണ്ടിയുള്ള അന്വേഷണം ഊര്ജ്ജിതമാക്കിയിട്ടുണ്ട്. സംഭവത്തില് വിശദമായ അന്വേഷണം നടത്തിവരികയാണെന്നും പൊലീസ് വ്യക്തമാക്കി.
by Midhun HP News | Jun 22, 2026 | Latest News, കേരളം
കൊച്ചി: കെഎസ്ആർടിസി ഓർഡിനറി ബസുകളിൽ സ്ത്രീകൾക്കും ട്രാൻസ്ജെൻഡർ വ്യക്തികൾക്കുമായി സംസ്ഥാന സർക്കാർ നടപ്പിലാക്കിയ ‘പ്രിയദർശിനി’ സൗജന്യ യാത്രാ പദ്ധതിക്കെതിരെയുള്ള പൊതുതാൽപര്യ ഹർജി ഹൈക്കോടതി തള്ളി. സർക്കാരിന്റെ ഈ ജനക്ഷേമ പദ്ധതിയുമായി മുന്നോട്ടുപോകാമെന്ന് ചീഫ് ജസ്റ്റിസ് സൗമൻ സെൻ, ജസ്റ്റിസ് ശ്യാം കുമാർ വി.എം എന്നിവരടങ്ങിയ ഡിവിഷൻ ബെഞ്ച് തിങ്കളാഴ്ച വ്യക്തമാക്കുകയായിരുന്നു. സർക്കാരിന്റെ ഉത്തരവിൽ ചട്ടലംഘനങ്ങളില്ലെന്ന് കോടതി നിരീക്ഷിച്ചു.
പദ്ധതിയിലൂടെ ലിംഗാടിസ്ഥാനത്തിലുള്ള വിവേചനമാണ് സർക്കാർ നടത്തുന്നതെന്നും ഇത് ഭരണഘടന ഉറപ്പുനൽകുന്ന തുല്യതയ്ക്കുള്ള അവകാശമായ 14, 15 അനുച്ഛേദങ്ങളുടെ ലംഘനമാണെന്നും ചൂണ്ടിക്കാട്ടിയാണ് ഹർജിക്കാരൻ കോടതിയെ സമീപിച്ചിരുന്നത്. സാമ്പത്തിക നില പരിഗണിക്കാതെ എല്ലാ സ്ത്രീകൾക്കും സൗജന്യ അനുമതി നൽകുന്നത് പുരുഷന്മാരോടുള്ള വിവേചനമാണെന്നായിരുന്നു ഹർജിയിലെ പ്രധാന വാദം.
സമ്പന്നരായ ചിലരെ മുൻനിർത്തി പദ്ധതി തകർക്കാനാകില്ല; ഹൈക്കോടതി
എന്നാൽ, സർക്കാരിന്റെ ഉത്തരവിൽ യാതൊരുവിധ നിയമവിരുദ്ധതയോ ചട്ടലംഘനങ്ങളോ കണ്ടെത്താൻ കഴിഞ്ഞിട്ടില്ലെന്ന് ഡിവിഷൻ ബെഞ്ച് വിധിന്യായത്തിൽ ചൂണ്ടിക്കാട്ടി.
സർക്കാർ പുറപ്പെടുവിച്ച ഉത്തരവ് നിലവിലുള്ള നിയമപരമായ മാനദണ്ഡങ്ങൾക്ക് വിരുദ്ധമാണെന്നോ അല്ലെങ്കിൽ അത് നിയമവിരുദ്ധമാണെന്നോ തെളിയിക്കാൻ ഹർജിക്കാരന് സാധിച്ചിട്ടില്ല. അതിനാൽ ഈ പൊതുതാൽപര്യ ഹർജി നിലനിൽക്കില്ല. -ഡിവിഷൻ ബെഞ്ച് വ്യക്തമാക്കി.
കഴിഞ്ഞ വാരം കേസിൽ നടന്ന പ്രാഥമിക വാദത്തിനിടയിൽ, സാമ്പത്തികമായി ഉയർന്ന നിലയിലുള്ള ഏതാനും ഗുണഭോക്താക്കൾ ഈ പദ്ധതി ഉപയോഗിക്കുന്നു എന്ന് കാണിച്ച് ഭൂരിഭാഗം വരുന്ന സാധാരണക്കാർക്ക് പ്രയോജനപ്പെടുന്ന ഒരു സമഗ്ര പദ്ധതിയെ എങ്ങനെ തള്ളിക്കളയാനാകുമെന്ന് കോടതി ചോദിച്ചിരുന്നു. രാജ്യത്തിന്റെ വിവിധ ഭാഗങ്ങളിൽ ഇത്തരത്തിലുള്ള സൗജന്യ യാത്രാ പദ്ധതികൾ നിലവിലുണ്ടെന്നും സ്ത്രീ ശാക്തീകരണത്തിന് വേണ്ടിയുള്ള ഇത്തരം പ്രത്യേക പദ്ധതികൾക്ക് സുപ്രീം കോടതിയുടെ മുൻകാല ഉത്തരവുകളുടെ സംരക്ഷണമുണ്ടെന്നും സംസ്ഥാന സർക്കാർ കോടതിയെ അറിയിച്ചു.
by Midhun HP News | Jun 22, 2026 | Latest News, കേരളം
കൊച്ചി: സംസ്ഥാനത്ത് ഈ വര്ഷം ഇതുവരെ പകര്ച്ചവ്യാധികള് പിടിപെട്ട് മരിച്ചത് 186 പേര്. ജൂണിലെ ആദ്യ 20 ദിവസങ്ങളില് മാത്രം 48 മരണങ്ങളാണ് റിപ്പോര്ട്ട് ചെയ്തത്. മെയ് മാസത്തില് 55 മരണങ്ങളാണ് റിപ്പോര്ട്ട് ചെയ്തത്.
കാലവര്ഷം ആരംഭിച്ചതോടെ ഷിഗെല്ല, ഇന്ഫ്ലുവന്സ, ഡെങ്കിപ്പനി തുടങ്ങിയ രോഗങ്ങള് വര്ദ്ധിച്ചുവരുന്ന സാഹചര്യത്തില് വരും മാസങ്ങളില് സ്ഥിതി കൂടുതല് വഷളായേക്കാമെന്ന് ആരോഗ്യ വിദഗ്ധര് മുന്നറിയിപ്പ് നല്കുന്നു, ഒപ്പം അടിയന്തര പ്രതിരോധ നടപടികള് സ്വീകരിക്കാന് ആവശ്യപ്പെടുകയും ചെയ്യുന്നു.
ഈ വര്ഷം അമീബിക് മസ്തിഷ്ക ജ്വരം മൂലം 34 ജീവനുകളാണ് പൊലിഞ്ഞത്. തൊട്ടുപിന്നാലെ ഹെപ്പറ്റൈറ്റിസ് എ (മഞ്ഞപ്പിത്തം), എലിപ്പനി എന്നിവ യഥാക്രമം 27, 24 മരണങ്ങള്ക്ക് കാരണമായി. 2024-ലും 2023-ലും പകര്ച്ചവ്യാധികള് മൂലം സംസ്ഥാനത്ത് യഥാക്രമം 543, 570 മരണങ്ങളാണ് റിപ്പോര്ട്ട് ചെയ്തത്. ഈ രണ്ട് വര്ഷങ്ങളിലും ഹെപ്പറ്റൈറ്റിസ് എ മൂലം 220-ലധികം മരണങ്ങള് വീതം ഉണ്ടായിരുന്നു. എന്നാല് 2026-ല് ഷിഗെല്ല മരണങ്ങളില് അഭൂതപൂര്വമായ വര്ദ്ധനവാണ് ഉണ്ടായത്, ഇതുവരെ ആറ് പേര് രോഗബാധയെ തുടര്ന്ന് മരണപ്പെട്ടു.
കേരള ആരോഗ്യ ശാസ്ത്ര സര്വ്വകലാശാലയിലെ സ്കൂള് ഓഫ് പബ്ലിക് ഹെല്ത്ത് അസോസിയേറ്റ് പ്രൊഫസറായ ഡോ. അനീഷ് ടി എസ് പറയുന്നത്, എല്ലാ കാലവര്ഷത്തിലും സംസ്ഥാനത്ത് പകര്ച്ചവ്യാധികള് വര്ദ്ധിക്കാറുണ്ടെന്നാണ്. ജൂലൈ മാസത്തില് രോഗബാധിതരുടെ എണ്ണം ഉയരാന് സാധ്യതയുണ്ട്. ഓരോ വര്ഷവും ഉണ്ടാകുന്ന ഈ രോഗബാധയുടെ വര്ദ്ധനവ് മഴയുടെ പാറ്റേണുമായി അടുത്ത ബന്ധമുള്ളതാണ്. ഓഗസ്റ്റില് സംസ്ഥാനത്ത് കൂടുതല് മഴ ലഭിക്കുകയാണെങ്കില്, സെപ്റ്റംബറിലും കൂടുതല് കേസുകള് ഉണ്ടായേക്കാം, അദ്ദേഹം പറഞ്ഞു.
ദശകങ്ങള്ക്ക് മുമ്പ് ഈ കാലയളവില് കൂടുതല് മരണങ്ങള് റിപ്പോര്ട്ട് ചെയ്യപ്പെട്ടിരുന്നതായി ഇന്ത്യന് മെഡിക്കല് അസോസിയേഷന് കേരള റിസര്ച്ച് സെല് കണ്വീനറായ ഡോ. രാജീവ് ജയദേവന് പറയുന്നു. പതിറ്റാണ്ടുകള്ക്ക് മുമ്പ്, പകര്ച്ചവ്യാധികള്, ദാരിദ്ര്യം, കാര്ഷിക മേഖലയിലെ തൊഴില് നഷ്ടം മൂലം ഉണ്ടാകുന്ന പട്ടിണി എന്നിവയൊക്കെ ഈ അവസ്ഥയ്ക്ക് കാരണമായി ചൂണ്ടിക്കാണിക്കപ്പെട്ടിരുന്നു. ജീവിതസാഹചര്യങ്ങള് മെച്ചപ്പെട്ടതോടെ സാമൂഹികമായ ഇത്തരം പ്രശ്നങ്ങള് ഇല്ലാതായി. ഇപ്പോള്, ഈ കാലയളവിലെ മരണങ്ങള്ക്കുള്ള പ്രധാന കാരണം പകര്ച്ചവ്യാധികള് മാത്രമാണ്. കാലവര്ഷം, അന്തരീക്ഷത്തിലെ ഈര്പ്പം, കൃത്യമല്ലാത്ത ശുചിത്വ പരിപാലനം, പ്രത്യേകിച്ച് മലിനജല നിര്മ്മാര്ജ്ജനം എന്നിവയാണ് ഇന്ഫ്ലുവന്സ, ഷിഗെല്ല, ഡെങ്കിപ്പനി, എലിപ്പനി തുടങ്ങിയ രോഗങ്ങള് വര്ദ്ധിക്കാന് കാരണമാകുന്നത്, അദ്ദേഹം പറഞ്ഞു.
ശ്രദ്ധ നല്കേണ്ടത് രോഗബാധ തടയുന്നതില്
രോഗബാധിതരുടെ എണ്ണത്തിലുണ്ടായ വര്ദ്ധനവും കൃത്യമായ പരിശോധനകളും കാരണമാണ് സാധാരണ ഗതിയില് തിരിച്ചറിയപ്പെടാതെ പോകുമായിരുന്ന ഷിഗെല്ല മരണങ്ങള് ഇത്തവണ കൃത്യമായി റിപ്പോര്ട്ട് ചെയ്യാന് സാധിച്ചതെന്ന് ഡോ. രാജീവ് കൂട്ടിച്ചേര്ത്തു. മരണസംഖ്യ കുറയ്ക്കുന്നത് രോഗം പടരുന്നത് തടയുന്നതിനെ ആശ്രയിച്ചാണുള്ളതെന്ന് ഡോ. അനീഷ് പറയുന്നു. രോഗബാധിതരുടെ എണ്ണത്തിന് ആനുപാതികമായാണ് മരണങ്ങളുടെ എണ്ണവും കൂടുന്നത്. അതിനാല് രോഗപ്രതിരോധത്തിനാണ് മുന്ഗണന നല്കേണ്ടത്. ഇതിനായി നമുക്ക് പ്രത്യേക പദ്ധതികള് ആവശ്യമാണ്. കൂടാതെ, രോഗികളുടെ എണ്ണം വര്ദ്ധിക്കുമ്പോള് അത് ആശുപത്രികള്ക്ക് വലിയ ഭാരമാകും. അതുകൊണ്ട് തന്നെ പ്രതിരോധത്തിനാണ് മുന്ഗണനെയെന്നും അദ്ദേഹം പറഞ്ഞു. കാലവര്ഷക്കാലത്ത് സംസ്ഥാനത്ത് പകര്ച്ചവ്യാധികള് പടരുന്നത് തടയുന്നതില് ഫലപ്രദമായ ഇടപെടലുകള്ക്കും ശുചീകരണ പ്രവര്ത്തനങ്ങള്ക്കും വലിയ പങ്കുണ്ടെന്ന് ഡോ. രാജീവ് കൂട്ടിച്ചേര്ത്തു.
by Midhun HP News | Jun 22, 2026 | Latest News, കേരളം
കൊച്ചി: എറണാകുളം വൈപ്പിനില് കപ്പലിന് തീപിടിച്ചു. കൊച്ചി വൈപ്പിനിലെ സ്വകാര്യ ഷിപ്പ് യാര്ഡില് അറ്റകുറ്റപ്പണിക്ക് എത്തിച്ച വിദേശ കപ്പലിനാണ് തീപിടിച്ചത്.
വൈപ്പിന് കാളമുക്കിലെ സ്വകാര്യ ഷിപ്പ് യാര്ഡിലാണ് സംഭവം. പുലര്ച്ചെ കപ്പലിന്റെ മുകള്ഭാഗത്തു നിന്നും തീ ഉയരുന്നത് മത്സ്യത്തൊഴിലാളികളുടെ ശ്രദ്ധയില്പ്പെട്ടത്. ഉടന് തന്നെ വിവരം അധികൃതരെ അറിയിച്ചു.കപ്പലിന്റെ മുകള് ഭാഗത്ത് തീ വ്യാപിച്ചതായാണ് റിപ്പോര്ട്ട്. എന്താണ് തീപിടിത്തത്തിന് കാരണമെന്ന് വ്യക്തമല്ല.
by Midhun HP News | Jun 22, 2026 | Latest News, കേരളം
തിരുവനന്തപുരം: സ്ത്രീ സുരക്ഷാ പെന്ഷന് തുടരണമോയെന്നതില് തീരുമാനമെടുത്തിട്ടില്ലെന്ന് മുഖ്യമന്ത്രി വിഡി സതീശന്. സ്ത്രീ സുരക്ഷാ പെന്ഷന് സാമൂഹ്യ ക്ഷേമ പെന്ഷന്റെ ഭാഗമല്ല. കഴിഞ്ഞ സര്ക്കാര് തെരഞ്ഞെടുപ്പിന് തൊട്ടുമുമ്പ് തുടങ്ങിയതാണ് ഈ പദ്ധതി. സ്ത്രീ സുരക്ഷാ പെന്ഷന് തുടരുന്നതില് സര്ക്കാര് തീരുമാനം എടുത്തിട്ടില്ല. അതേസമയം സാമൂഹ്യ ക്ഷേമ പെന്ഷന് മുടങ്ങാതെ കൊടുക്കുമെന്നും മുഖ്യമന്ത്രി നിയമസഭയില് വ്യക്തമാക്കി.
സാമൂഹ്യ സുരക്ഷാ പെന്ഷന് വിതരണത്തിനുള്ള ഉത്തരവ് നാളെ ഇറങ്ങും. 24-ാം തീയതി മുതല് പെന്ഷന് വിതരണം ആരംഭിക്കുമെന്നും മുഖ്യമന്ത്രി നിയമസഭയില് വ്യക്തമാക്കി. ഇന്ദിരാ ഗ്യാരന്റി പ്രകാരമുള്ള സുപ്രധാന വാഗ്ദാനമായ പെന്ഷന് തുക 3000 ആയി വര്ധിപ്പിക്കുന്നതിനുള്ള നടപടിക്രമങ്ങള് ആരംഭിച്ചതായും വിഡി സതീശന് സഭയെ അറിയിച്ചു. ഗുണഭോക്താക്കളുടെ ലിസ്റ്റ് പരിശോധിക്കും. അനര്ഹര് പട്ടികയില് ഇടംപിടിച്ചിട്ടുണ്ടോയെന്ന് വിശദമായ പരിശോധനയുണ്ടാകുമെന്നും മുഖ്യമന്ത്രി പറഞ്ഞു.
അര്ഹരായ ആളുകള് ഗുണഭോക്തൃ പട്ടികയില് ഉള്പ്പെടാതെ പുറത്ത് നില്ക്കുന്നുണ്ടോയെന്നും പരിശോധിക്കും. ലോസ് ഏഞ്ചല്സിലുള്ളയാള് ഈ മാസം പെന്ഷന് വന്നില്ലെന്ന് പറഞ്ഞതായി ഉദ്യോഗസ്ഥന് പറഞ്ഞുവെന്നും മുഖ്യമന്ത്രി പറഞ്ഞു. എന്നാല്, മകന് വിദേശത്തുള്ളത് കൊണ്ട് അമ്മക്ക് പെന്ഷന് അയോഗ്യത പറയുന്നതില് അര്ത്ഥമുണ്ടോ എന്ന് പ്രതിപക്ഷ നേതാവ് പിണറായി വിജയൻ ചോദിച്ചു. അര്ഹരായവര്ക്ക് കിട്ടാതെ പോകരുതെന്നേ കരുതുന്നുള്ളൂവെന്ന് മുഖ്യമന്ത്രി മറുപടി നല്കി.
യുഡിഎഫ് തെരഞ്ഞെടുപ്പ് വാഗ്ദാനമായ ഉമ്മന്ചാണ്ടി ഇന്ഷുറന്സ് പദ്ധതി നടപ്പാക്കുമെന്നും വിശദമായ ചര്ച്ച ബന്ധപ്പെട്ട വകുപ്പുകള് നടത്തുന്നുണ്ടെന്നും മുഖ്യമന്ത്രി അറിയിച്ചു. 25 ലക്ഷം രൂപ കുടുംബത്തിന് കിട്ടും വിധമാണ് പദ്ധതി ആസൂത്രണം ചെയ്യുന്നതെന്നും അദ്ദേഹം പറഞ്ഞു. ഇന്ദിരാഗാരന്റി പദ്ധതിയില് ഉള്പ്പെട്ട പ്രിയദര്ശിനി സൗജന്യയാത്ര ഒരു മാസത്തിനുള്ളില് സര്ക്കാര് നടപ്പാക്കി. ഒരു ഓര്ഡിനറി ബസു പോലും ഫാസ്റ്റ് ആക്കി മാറ്റിയിട്ടില്ല. എന്നാല് സമൂഹമാധ്യമങ്ങള് വഴി വ്യാപകമായ കള്ളപ്രചാരണമാണ് നടത്തിയത്. അതില് നിയമസഭയില് പ്രതിഷേധം രേഖപ്പെടുത്തുകയാണെന്നും മുഖ്യമന്ത്രി വി ഡി സതീശന് പറഞ്ഞു.
by Midhun HP News | Jun 22, 2026 | Latest News, കേരളം
കൊച്ചി: അമ്മ ഭരണസമിതി രാജിവെച്ചു. ഭരണസമിതിയിലെ 17 പേരും രാജിവയ്ക്കുകയായിരുന്നു. ജോയിന്റ് സെക്രട്ടറിയായ അന്സിബ ഹസന് നേരത്തെ രാജിവെച്ചിരുന്നു.
താരസംഘടനയായ അമ്മയുടെ ജനറല് ബോഡി യോഗത്തില് വന്തര്ക്കം. വിയോജിപ്പിലും തര്ക്കത്തിലും മുങ്ങി വാര്ഷിക റിപ്പോര്ട്ട് പാസാക്കാന് ആയില്ല. വ്യക്തതയില്ലാത്ത കണക്ക് ഉള്പ്പെടുത്തിയ റിപ്പോര്ട്ട് പാസാക്കാന് അനുവദിക്കില്ലെന്ന് നടന് സിദ്ദിഖ്, ഇടവേള ബാബു എന്നിവര് നിലപാട് വ്യക്തമാക്കി. കണക്കുകള് തെറ്റിയ റിപ്പോര്ട്ട് പാസാക്കാന് സാധിക്കില്ലെന്ന് രഞ്ജി പണിക്കരും പറഞ്ഞു. ഒടുവില് വിഷയത്തില് മോഹന്ലാല് നിലപാട് എടുക്കണം എന്ന് ഗണേഷ് കുമാര് ആവശ്യപ്പെടുകയായിരുന്നു. തുടര്ന്ന് യോഗത്തില് വൈകാരികമായാണ് മോഹന്ലാല് സംസാരിച്ചത്. സംഘടനയെ ഒരു തരത്തിലും തകര്ക്കാന് ആര്ക്കും കഴിയില്ല എന്ന് മോഹന്ലാല് പറഞ്ഞു.
റിപ്പോര്ട്ട് അവതരിപ്പിക്കാന് 45 ദിവസം സമയം അനുവദിക്കണമെന്ന് പ്രസിഡന്റ് ശ്വേത മേനോന് പറഞ്ഞു. ഉച്ചയ്ക്ക് ശേഷം റിപ്പോര്ട്ട് പാസാക്കാന് ശ്രമം നടത്തും. സംഘടനയുടെ പേര് ജനങ്ങള്ക്ക് മുന്പില് ചീഞ്ഞളിഞ്ഞെന്നും ഭരണസമിതി പിരിച്ചുവിടണം എന്നും ഒരു വിഭാഗം ആവശ്യപ്പെട്ടു. പേര് ചീത്തയാക്കിയത് സംഘടനക്ക് ഉള്ളില് ഉള്ളവരാണെന്നും അംഗങ്ങള് ആരോപിച്ചു.
അതേസമയം വലിയ യുവതാരനിര തന്നെ യോഗത്തില് നിന്നും വിട്ടുനിന്നു. ആസിഫ് അലി, പൃഥ്വിരാജ്, ടോവിനോ, കുഞ്ചാക്കോ ബോബന്, ജയസൂര്യ, ബേസില് ജോസഫ്, ദുല്ഖര് സല്മാന്, ഉണ്ണി മുകുന്ദന് എന്നിവര് യോഗത്തിനെത്തിയില്ല. പ്രസിഡന്റ്, ജനറല് സെക്രട്ടറി സ്ഥാനങ്ങളിലേക്ക് വനിതകള് എത്തിയശേഷമുള്ള ആദ്യ വാര്ഷിക ജനറല് ബോഡി യോഗമാണ് ഇന്ന് നടക്കുന്നത്. കാക്കനാട് ചിറ്റിലപ്പിള്ളി സ്ക്വയറിലാണ് ജനറല് ബോഡി യോഗം. അമ്മയിലെ ഭാരവാഹികള്ക്കെതിരെ ഗുരുതര ആരോപണങ്ങള് ഉന്നയിക്കുകയും ജോയിന്റ് സെക്രട്ടറി സ്ഥാനം രാജിവെയ്ക്കുകയും ചെയ്ത അന്സിബയ്ക്ക് കാരണം കാണിക്കല് നോട്ടീസ് നല്കിയിരിക്കുകയാണ്. അന്സിബയ്ക്കെതിരെ അച്ചടക്ക നടപടി ഉണ്ടാകുമോയെന്നതില് വ്യക്തതയില്ല. അന്സിബ ഇന്ന് യോഗത്തിനെത്തിയിരുന്നു.
അതിനിടെ ഭരണസമിതിക്കെതിരെ ഒരു വിഭാഗം അവിശ്വാസ പ്രമേയ രേഖ തയ്യാറാക്കിയിരുന്നു നേതൃത്വം സംഘടനയ്ക്ക് അവമതിപ്പുണ്ടാക്കിയെന്നാണ് ആരോപണം. പുതിയ ഭരണസമിതി ഒഴിയണമെന്നും തെറ്റുകള്ക്ക് നിരുപാധികം മാപ്പ് പറയണമെന്നും അവിശ്വാസ പ്രമേയത്തില് ആവശ്യപ്പെടുന്നു. എക്സിക്യൂട്ടിവ് അംഗങ്ങളുടെ വഴക്ക് പറഞ്ഞുതീര്ക്കാനാകില്ലെന്നും പ്രമേയത്തില് പരാമര്ശം ഉണ്ട്. ഇതിനായി ഒരു വിഭാഗം ഒപ്പ് ശേഖരണം നടത്തി. ഭരണസമിതിയിലെ അംഗങ്ങള്ക്കെതിരെ ഉയര്ന്ന ഗുരുതര ആരോപണങ്ങളില് പ്രസിഡന്റ് നിശബ്ദത പാലിച്ചെന്നും വിവാദങ്ങളില് കൃത്യമായ നിലപാടോ നടപടികളോ എടുത്തില്ലെന്നും ആക്ഷേപവും ഉയര്ന്നു.
Recent Comments