by Midhun HP News | Oct 13, 2026 | Latest News, കേരളം
ന്യുഡല്‍ഹി: ആറ് സംസ്ഥാനങ്ങളില്‍ പുതിയ ഗവര്‍ണര്‍മാരെ നിയമിച്ചു. സിക്കിം ഗവര്‍ണറായ ഓം പ്രകാശ് മാഥൂറിനെ കേരള ഗവര്‍ണറായും നിലവിലെ കേരള ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കറെ തമിഴ്നാട് ഗവര്‍ണറായും രാഷ്ട്രപതി നിയമിച്ചു.
ബ്രിജ് റാം മോഹന്‍ ഒഡീഷ ഗവര്‍ണറാകും. ഡോ, സുധ യാദവിനെ കര്‍ണാടക ഗവര്‍ണറായും സിക്കിം ഗവര്‍ണറായി ദുഷ്യന്ത് ഗൗതമിനെ നിയമിച്ചു.
രാജസ്ഥാന്‍ സ്വദേശിയായ ഓം പ്രകാശ് ബിജെപി സംസ്ഥാന പ്രസിഡന്റായും പ്രവര്‍ത്തിച്ചിരുന്നു. ബിജെപിയുടേയും ആർഎസ്എസ്സിൻ്റെയും മുതിർന്ന നേതാവാണ് ഓം പ്രകാശ് മാഥുര്‍. പ്രധാനമന്ത്രി നരേന്ദ്രമോദിയുടെ ഏറ്റവും അടുത്ത വിശ്വസ്തരിൽ ഒരാൾ കൂടിയാണ്. മോദി മുഖ്യമന്ത്രി ആയിരുന്നപ്പോൾ ഗുജറാത്തിൻ്റെ ചുമതലയുള്ള ബിജെപി നേതാവ് അയിരുന്നു ഓപി മാഥുർ. ഏറെക്കാലം ആർഎസ്എസ് പ്രചാരകനായിരുന്നു. അതിനുശേഷമാണ് ബിജെപിയിൽ എത്തിയത്.
2025 ജനുവരി രണ്ടിനാണ് രാജേന്ദ്ര അര്‍ലേക്കര്‍ കേരള ഗവര്‍ണറായി അധികാരമേറ്റത്. കേരള ഗവര്‍ണറായിരുന്ന ആരിഫ് ഖാനെ ബിഹാര്‍ ഗവര്‍ണറാക്കിയതോടെയാണ് ബിഹാര്‍ ഗവര്‍ണറായ അര്‍ലേക്കറെ കേരള ഗവര്‍ണറായി നിയമിച്ചത്. ഭാരതാംബ ചിത്രത്തെ ചൊല്ലിയും വന്ദേമാതരത്തെ ചൊല്ലി സംസ്ഥാന സര്‍ക്കാരും ഗവര്‍ണറും തമ്മില്‍ പലപ്പോഴായി കൊമ്പുകോര്‍ത്തിരുന്നു.
by Midhun HP News | Oct 13, 2026 | Latest News, കേരളം
തിരുവനന്തപുരം: അടുത്ത മൂന്നു ദിവസത്തിനുള്ളില്‍ തെക്കേ ഇന്ത്യയില്‍ വടക്കുകിഴക്കന്‍ മണ്‍സൂണ്‍ ( തുലാവര്‍ഷം) ആരംഭിച്ചേക്കുമെന്ന് കാലാവസ്ഥ വകുപ്പ്. രണ്ടു ദിവസത്തിനുള്ളില്‍ തെക്കുപടിഞ്ഞാറന്‍ മണ്‍സൂണ്‍ രാജ്യത്തി നിന്നും പിന്‍വാങ്ങും. ബംഗാള്‍ ഉള്‍ക്കടലിലെ ന്യൂനമര്‍ദ്ദ സാഹചര്യവും കേരളത്തില്‍ മഴ ശക്തമാക്കുമെന്ന് കാലാവസ്ഥ വകുപ്പ് വിലയിരുത്തുന്നു.
മന്നാര്‍ ഉള്‍ക്കടലിലും അതിനോട് ചേര്‍ന്ന തെക്കന്‍ തമിഴ്നാട് തീരത്തും, സമുദ്രനിരപ്പില്‍ നിന്ന് 0.9 കി.മീ. ഉയരത്തില്‍ ചക്രവാതച്ചുഴി തുടരുന്നു. തെക്കന്‍ ആന്‍ഡമാന്‍ കടലിലും സമീപ പ്രദേശങ്ങളിലും മുകളിലായി ചക്രവാതച്ചുഴി തുടരുന്നു. ഈ ചക്രവാതച്ചുഴിയുടെ സ്വാധീനഫലമായി ഇന്ന് തെക്കുകിഴക്കന്‍ ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെടാന്‍ സാധ്യതയുണ്ട്.
ഈ സാഹചര്യത്തില്‍ കേരളത്തില്‍ ഒക്ടോബര്‍ 16 വരെയുള്ള ദിവസങ്ങളില്‍ ഒറ്റപ്പെട്ട മഴയ്ക്ക് സാധ്യത. ഒക്ടോബര്‍ 15,16 തീയതികളില്‍ ശക്തമായ മഴയ്ക്കും സാധ്യതയുണ്ട്. ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 30-40 കി.മീ. വരെ വേഗതയില്‍ ശക്തമായ കാറ്റിനും സാധ്യതയുള്ളതായി കാലാവസ്ഥ വകുപ്പ് അറിയിച്ചു. വ്യാഴം, വെള്ളി ദിവസങ്ങളില്‍ കേരളത്തില്‍ പല ജില്ലകളിലും യെല്ലോ അലര്‍ട്ട് പുറപ്പെടുവിച്ചിട്ടുണ്ട്.
by Midhun HP News | Oct 12, 2026 | Latest News, കേരളം
തിരുവനന്തപുരം: അടുത്ത 23 ദിവസത്തിനുള്ളില്‍, രാജ്യത്തിന്റെ ശേഷിക്കുന്ന ഭാഗങ്ങളില്‍ നിന്നും തെക്കുപടിഞ്ഞാറന്‍ മണ്‍സൂണ്‍ പിന്‍വാങ്ങുമെന്ന് കേന്ദ്ര കാലാവസ്ഥാ വകുപ്പ്. ഒപ്പം തെക്കേ ഇന്ത്യയില്‍ വടക്കുകിഴക്കന്‍ മണ്‍സൂണ്‍(തുലാവര്‍ഷം) മഴ ആരംഭിക്കുന്നതിനും സാധ്യതയുണ്ട്. മന്നാര്‍ ഉള്‍ക്കടലിലും അതിനോട് ചേര്‍ന്ന തെക്കന്‍ തമിഴ്നാട് തീരത്തും, സമുദ്രനിരപ്പില്‍ നിന്ന് 0.9 കി.മീ. ഉയരത്തില്‍ ചക്രവാതച്ചുഴി തുടരുന്നു.
ബംഗാള്‍ ഉള്‍ക്കടലില്‍ ന്യൂന മര്‍ദ്ദ സാധ്യത, തെക്കന്‍ ആന്‍ഡമാന്‍ കടലിലും സമീപ പ്രദേശങ്ങളിലും മുകളിലായി ചക്രവാതച്ചുഴി തുടരുന്നു. ഈ ചക്രവാതച്ചുഴിയുടെ സ്വാധീനഫലമായി ഒക്ടോബര്‍ 13-ഓടെ തെക്കുകിഴക്കന്‍ ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെടാന്‍ സാധ്യത.
കേരളത്തില്‍ 2026 ഒക്ടോബര്‍ 12 മുതല്‍ 16 വരെയുള്ള ദിവസങ്ങളില്‍ നേരിയതോ മിതമായതോ ആയ മഴയ്ക്ക് സാധ്യത. ഒക്ടോബര്‍ 15,16 തീയതികളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത. ഒക്ടോബര്‍ 12 കേരളത്തിലെ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 3040 കി.മീ. വരെ വേഗതയില്‍ ശക്തമായ കാറ്റിനും സാധ്യത. ഒക്ടോബര്‍ 13, 14തീയതികളില്‍ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്ക് സാധ്യത.ഒക്ടോബര്‍ 15, 16 തീയതികളില്‍ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 4050 കി.മീ. വരെ വേഗതയില്‍ ശക്തമായ കാറ്റിനും സാധ്യതയുണ്ടെന്നും മുന്നറിയിപ്പ്.
by Midhun HP News | Oct 12, 2026 | Latest News, കേരളം
പയ്യന്നൂർ: മോഷ്ടിച്ച ബൈക്കുമായി യാത്ര ചെയ്യുന്നതിനിടെ പൊലീസുകാരനോട് വഴി ചോദിച്ച ഇതരസംസ്ഥാന തൊഴിലാളി പിടിയിലായി. വ്യാഴാഴ്ച രാത്രി എട്ട് മണിയോടെ വെള്ളൂർ കൊട്ടണച്ചേരി ക്ഷേത്രത്തിന് സമീപത്തുവെച്ചാണ് സംഭവം. കാസർകോട്ടെ പൊലീസുകാരനായ പെരളം സ്വദേശി സുനീഷിനോടാണ് ബൈക്കിലെത്തിയ യുവാവ് ഹിന്ദിയിൽ കാഞ്ഞങ്ങാട്ടേക്കുള്ള വഴിയും ദൂരവും ചോദിച്ചത്.
യുവാവിന് വഴി പറഞ്ഞുകൊടുക്കുന്നതിനിടെ സുനീഷ് ബൈക്കിന്റെ നമ്പർ ശ്രദ്ധിച്ചിരുന്നു. വഴി ചോദിച്ച ശേഷം യുവാവ് ബൈക്കോടിച്ച് പോയെങ്കിലും, ഹിന്ദിയിലുള്ള സംസാരത്തിലും അപരിചിതമായ പെരുമാറ്റത്തിലും പന്തികേട് തോന്നിയ സുനീഷ് ബൈക്കിന്റെ നമ്പർ കാസർകോട് കൺട്രോൾ റൂമിലുള്ള രജനീഷ് എന്ന പൊലീസുകാരന് കൈമാറി പരിശോധിക്കാൻ ആവശ്യപ്പെട്ടു. തുടർന്ന് നടത്തിയ വിവരശേഖരണത്തിലാണ് രണ്ട് ദിവസം മുൻപ് വടകരയിൽ നിന്ന് മോഷണം പോയ ബൈക്കാണിതെന്ന് വ്യക്തമായത്.
വാഹനം മോഷണമുതലാണെന്ന് സ്ഥിരീകരിച്ചതോടെ സുനീഷ് സ്വന്തം ബൈക്കിൽ യുവാവിനെ അതിവേഗം പിന്തുടരുകയായിരുന്നു. തുടർന്ന് ചെറുവത്തൂരിൽ വെച്ച് ഇയാളെ തടഞ്ഞുനിർത്തി സാഹസികമായി പിടികൂടി. വിവരമറിഞ്ഞ് സ്ഥലത്തെത്തിയ ചന്തേര പൊലീസ് പ്രതിയെ കസ്റ്റഡിയിലെടുത്ത് കേസ് രജിസ്റ്റർ ചെയ്ത വടകര പൊലീസിന് കൈമാറി.
by Midhun HP News | Oct 12, 2026 | Latest News, കേരളം
കൊച്ചി: നെടുമ്പാശ്ശേരിയില്‍ കാര്‍ ഇടിച്ചു മൂന്നു പേര്‍ മരിച്ച സംഭവത്തില്‍, അപകടമുണ്ടാക്കിയ മിനി കൂപ്പറില്‍ പ്രതി സുഹൈലിനെ കൂടാതെ മറ്റു മൂന്നുപേര്‍ കൂടി ഉണ്ടായിരുന്നതായി പൊലീസ്. സുഹൈല്‍, നിനവ് എന്നിവരെ ഇന്നലെ പൊലീസ് അറസ്റ്റ് ചെയ്തിരുന്നു. ഇവർക്കൊപ്പമുണ്ടായിരുന്ന രണ്ടുപേരെ കൂടി പൊലീസ് കസ്റ്റഡിയിലെടുത്തിട്ടുണ്ട്. അമീര്‍, ജോയല്‍ എന്നിവരാണ് പിടിയിലായത്. അപകടമുണ്ടായതിനു പിന്നാലെ മറ്റൊരു കാറില്‍ ഇവര്‍ രക്ഷപ്പെടുകയായിരുന്നു.
മദ്യപിച്ച് അമിത വേഗതയില്‍ കാര്‍ ഓടിച്ചത് തടയാത്തതിന് ഇവര്‍ക്കെതിരെ പ്രേരണാക്കുറ്റം ചുമത്തുമെന്ന് പൊലീസ് സൂചിപ്പിച്ചു. കാര്‍ ഓടിച്ചത് 100 കിലോമീറ്ററിലേറെ വേഗതയിലായിരുന്നുവെന്ന് സുഹൈല്‍ പൊലീസിന് മൊഴി നല്‍കി. അപകട സമയത്തെ വാഹനത്തിന്റെ വേഗം നിര്‍ണയിക്കാനായി പൊലീസ് ശാസ്ത്രീയ പരിശോധന നടത്തും. പ്രതി സുഹൈലിന്റെ ഡ്രൈവിങ് ലൈസന്‍സ് റദ്ദാക്കാന്‍ മോട്ടോര്‍ വാഹന വകുപ്പ് നടപടി തുടങ്ങി.
പത്തൊമ്പതുകാരനായ പ്രതി സുഹൈൽ സജീവ് മൂന്നു ബാറുകളിൽ കയറി മദ്യപിച്ച ശേഷമാണ് അമിതവേഗതയിൽ വാഹനം ഓടിച്ചിരുന്നതെന്ന് പൊലീസ് കണ്ടെത്തിയിട്ടുണ്ട്. മദ്യത്തിന് പുറമെ, സുഹൈൽ മറ്റ് ലഹരിവസ്തുക്കൾ ഉപയോഗിച്ചിരുന്നോയെന്നും പൊലീസ് പരിശോധിക്കുന്നുണ്ട്. അപകടത്തിന്റെ കൂടുതൽ സിസിടിവി ദൃശ്യങ്ങൾ കണ്ടെത്താനുള്ള ശ്രമവും തുടരുകയാണ്. സുഹൈലിനെ കസ്റ്റഡിയിൽ വാങ്ങി ചോദ്യം ചെയ്യുന്നതിനുള്ള നടപടികളും പൊലീസ് ആരംഭിച്ചിട്ടുണ്ട്. കാറിലുണ്ടായിരുന്ന മറ്റുള്ളവരുടെ പങ്കും അന്വേഷണപരിധിയിലുണ്ട്.
അതിനിടെ, പ്രതി സുഹൈല്‍ സജീവ് മദ്യപിച്ച ബാറുകള്‍ക്കെതിരെ എക്‌സൈസ് കേസെടുത്തു. 19 വയസ്സുള്ളയാള്‍ക്ക് മദ്യം നല്‍കിയതിനാണ് കേസെടുത്തത്. കടവന്ത്ര ദിയ റീജന്‍സി, പാലാരിവട്ടം മണ്‍സൂണ്‍ എംപ്രസ്, നെടുമ്പാശ്ശേരി മാരിയറ്റ് എന്നീ ബാറുകള്‍ക്കെതിരെയാണ് കേസെടുത്തിട്ടുള്ളത്. ബാര്‍ ലൈസന്‍സ് റദ്ദാക്കുകയോ, കനത്ത പിഴ ചുമത്തുകയോ ചെയ്‌തേക്കും. ബാര്‍ ഉടമകള്‍ക്കെതിരെ കേസെടുക്കുന്നതുള്‍പ്പെടെയുള്ള നടപടികള്‍ സ്വീകരിക്കാന്‍ എക്‌സൈസ് കമ്മീഷണര്‍ക്കും എറണാകുളം എക്‌സൈസ് ജോയിന്റ് കമ്മീഷണര്‍ക്കും മന്ത്രി നിര്‍ദേശം നല്‍കിയിട്ടുണ്ട്.
ഞായറാഴ്ച പുലർച്ചെ രണ്ടുമണിയോടെയായിരുന്നു അപകടം. നെടുമ്പാശ്ശേരി വിമാനത്താവളത്തിന് സമീപത്തെ ചായക്കടയിൽ നിന്ന് ചായ കുടിച്ചശേഷം അത്താണി ഭാഗത്തേക്ക് സ്കൂട്ടറിൽ പോകുകയായിരുന്ന ഇജാസ്, ഗോപിക, ദേവിക എന്നിവരാണ് മരിച്ചത്. അമിതവേഗത്തിലെത്തിയ മിനി കൂപ്പർ സ്കൂട്ടറിന് പിന്നിൽ ഇടിക്കുകയായിരുന്നു. അപകടത്തിൽ മൂവരും മരിച്ചു. മരിച്ച മൂന്നുപേരും തൃക്കാക്കരയിലെ സുക്കോയ ക്രാഫ്റ്റ് ഷോപ്പിലെ ജീവനക്കാരായിരുന്നു. പാർട് ടൈം ജോലിക്കൊപ്പം കൊച്ചിയിലെ വിവിധ സ്ഥാപനങ്ങളിൽ ഉപരിപഠനം നടത്തിവരികയായിരുന്നു മൂവരും.
by Midhun HP News | Oct 12, 2026 | Latest News, കേരളം
ഇടുക്കി: വിനോദസഞ്ചാര കേന്ദ്രമായ മൂന്നാറിലെ രൂക്ഷമായ ഗതാഗതക്കുരുക്കിന് ശാശ്വത പരിഹാരം കാണാനുള്ള നീക്കങ്ങൾക്ക് കനത്ത തിരിച്ചടി. ടൗണിൽ വാഹന പാർക്കിങ് കേന്ദ്രം സ്ഥാപിക്കുന്നതിനായി വിട്ടുനൽകാൻ മൂന്നാർ വില്ലേജ് പരിധിയിൽ സർക്കാർ റവന്യൂ ഭൂമി ലഭ്യമല്ലെന്ന് റവന്യൂ വകുപ്പ് റിപ്പോർട്ട് നൽകി. ഇതോടെ, വിനോദസഞ്ചാരികളുടെയും നാട്ടുകാരുടെയും വലിയ ദുരിതത്തിന് അറുതിവരുത്താൻ മൂന്നാർ ഗ്രാമപഞ്ചായത്ത് ലക്ഷ്യമിട്ട അത്യാധുനിക മൾട്ടിലെവൽ പാർക്കിങ് സമുച്ചയ നിർമ്മാണം അനിശ്ചിതത്വത്തിലായി.
ട്രാഫിക് അഡ്വൈസറി കമ്മിറ്റി തീരുമാനങ്ങളുടെ അടിസ്ഥാനത്തിൽ പാർക്കിങ് കേന്ദ്രത്തിനായി അനുയോജ്യമായ ഭൂമി അനുവദിക്കണമെന്ന് ആവശ്യപ്പെട്ട് പഞ്ചായത്ത് നൽകിയ അപേക്ഷയിലാണ് ദേവികുളം തഹസിൽദാർ പഞ്ചായത്ത് പ്രസിഡന്റിനും ജില്ലാ കലക്ടർക്കും റിപ്പോർട്ട് കൈമാറിയത്. പഞ്ചായത്ത് പ്രസിഡന്റിന്റെ ആവശ്യപ്രകാരം മൂന്നാർ വില്ലേജ് ഓഫീസർ നടത്തിയ ഫീൽഡ് പരിശോധനയിൽ വില്ലേജ് പരിധിയിൽ റവന്യൂ ഭൂമി ലഭ്യമല്ലെന്ന് വ്യക്തമായതായി കത്തിൽ ചൂണ്ടിക്കാട്ടുന്നു. നിലവിലെ സാഹചര്യത്തിൽ സ്വകാര്യ തേയില കമ്പനിയായ കണ്ണൻ ദേവൻ ഹിൽസ് പ്ലാന്റേഷൻസിന്റെ കൈവശമുള്ള ഭൂമി വിട്ടുനൽകുന്നതിന് സർക്കാർ തലത്തിൽ നയപരമായ തീരുമാനം ഉണ്ടാകണമെന്നും തഹസിൽദാർ വ്യക്തമാക്കി.
വർഷം മുഴുവൻ ലക്ഷക്കണക്കിന് ആഭ്യന്തര-വിദേശ സഞ്ചാരികൾ എത്തുന്ന മൂന്നാറിൽ ഇടുങ്ങിയ റോഡുകളും മതിയായ പാർക്കിങ് സൗകര്യങ്ങളുടെ അഭാവവുമാണ് ഗതാഗതക്കുരുക്ക് രൂക്ഷമാക്കുന്നത്. റോഡരികിലെ അനധികൃത പാർക്കിങ് വാഹന ഗതാഗതത്തെ സാരമായി ബാധിക്കുകയും ആംബുലൻസ് അടക്കമുള്ള അടിയന്തര സർവീസുകൾ പോലും വഴിയിൽ കുടുങ്ങുന്ന അവസ്ഥ സൃഷ്ടിക്കുകയും ചെയ്യുന്നു. നീലക്കുറിഞ്ഞി സീസൺ കൂടി സജീവമായതോടെ സഞ്ചാരികളുടെ തിരക്ക് പലമടങ്ങ് വർദ്ധിച്ചിരിക്കുകയാണ്. പാർക്കിങ് സംവിധാനങ്ങൾ വിപുലീകരിക്കാതെ ഏർപ്പെടുത്തുന്ന ട്രാഫിക് നിയന്ത്രണങ്ങൾക്ക് താൽക്കാലിക ആശ്വാസം മാത്രമേ നൽകാൻ കഴിയൂ എന്ന് ടൂറിസം മേഖലയിലുള്ളവരും ചൂണ്ടിക്കാട്ടുന്നു.
മൾട്ടിലെവൽ പാർക്കിങ് കേന്ദ്രത്തിന് റവന്യൂ ഭൂമി ലഭ്യമാക്കണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നൽകിയിരുന്നതായി ഗ്രാമപഞ്ചായത്ത് പ്രസിഡന്റ് വിജയകുമാർ വ്യക്തമാക്കി. മുഖ്യമന്ത്രിയുടെ നിർദ്ദേശപ്രകാരം റിപ്പോർട്ട് തേടിയപ്പോഴാണ് റവന്യൂ ഭൂമി ലഭ്യമല്ലെന്ന വിവരം തഹസിൽദാർ അറിയിച്ചത്. ഇനി കെഡിഎച്ച്പിയുമായി ചർച്ച നടത്തി സർക്കാർ തലത്തിൽ ഭൂമി വിട്ടുനൽകാനുള്ള തീരുമാനമെടുത്താൽ മാത്രമേ പഞ്ചായത്തിന് പാർക്കിങ് സമുച്ചയ പദ്ധതിയുമായി മുന്നോട്ടുപോകാൻ കഴിയൂ എന്നും അദ്ദേഹം കൂട്ടിച്ചേർത്തു.
Recent Comments