by Midhun HP News | Oct 12, 2026 | Latest News, കേരളം
ഇടുക്കി: വിനോദസഞ്ചാര കേന്ദ്രമായ മൂന്നാറിലെ രൂക്ഷമായ ഗതാഗതക്കുരുക്കിന് ശാശ്വത പരിഹാരം കാണാനുള്ള നീക്കങ്ങൾക്ക് കനത്ത തിരിച്ചടി. ടൗണിൽ വാഹന പാർക്കിങ് കേന്ദ്രം സ്ഥാപിക്കുന്നതിനായി വിട്ടുനൽകാൻ മൂന്നാർ വില്ലേജ് പരിധിയിൽ സർക്കാർ റവന്യൂ ഭൂമി ലഭ്യമല്ലെന്ന് റവന്യൂ വകുപ്പ് റിപ്പോർട്ട് നൽകി. ഇതോടെ, വിനോദസഞ്ചാരികളുടെയും നാട്ടുകാരുടെയും വലിയ ദുരിതത്തിന് അറുതിവരുത്താൻ മൂന്നാർ ഗ്രാമപഞ്ചായത്ത് ലക്ഷ്യമിട്ട അത്യാധുനിക മൾട്ടിലെവൽ പാർക്കിങ് സമുച്ചയ നിർമ്മാണം അനിശ്ചിതത്വത്തിലായി.
ട്രാഫിക് അഡ്വൈസറി കമ്മിറ്റി തീരുമാനങ്ങളുടെ അടിസ്ഥാനത്തിൽ പാർക്കിങ് കേന്ദ്രത്തിനായി അനുയോജ്യമായ ഭൂമി അനുവദിക്കണമെന്ന് ആവശ്യപ്പെട്ട് പഞ്ചായത്ത് നൽകിയ അപേക്ഷയിലാണ് ദേവികുളം തഹസിൽദാർ പഞ്ചായത്ത് പ്രസിഡന്റിനും ജില്ലാ കലക്ടർക്കും റിപ്പോർട്ട് കൈമാറിയത്. പഞ്ചായത്ത് പ്രസിഡന്റിന്റെ ആവശ്യപ്രകാരം മൂന്നാർ വില്ലേജ് ഓഫീസർ നടത്തിയ ഫീൽഡ് പരിശോധനയിൽ വില്ലേജ് പരിധിയിൽ റവന്യൂ ഭൂമി ലഭ്യമല്ലെന്ന് വ്യക്തമായതായി കത്തിൽ ചൂണ്ടിക്കാട്ടുന്നു. നിലവിലെ സാഹചര്യത്തിൽ സ്വകാര്യ തേയില കമ്പനിയായ കണ്ണൻ ദേവൻ ഹിൽസ് പ്ലാന്റേഷൻസിന്റെ കൈവശമുള്ള ഭൂമി വിട്ടുനൽകുന്നതിന് സർക്കാർ തലത്തിൽ നയപരമായ തീരുമാനം ഉണ്ടാകണമെന്നും തഹസിൽദാർ വ്യക്തമാക്കി.
വർഷം മുഴുവൻ ലക്ഷക്കണക്കിന് ആഭ്യന്തര-വിദേശ സഞ്ചാരികൾ എത്തുന്ന മൂന്നാറിൽ ഇടുങ്ങിയ റോഡുകളും മതിയായ പാർക്കിങ് സൗകര്യങ്ങളുടെ അഭാവവുമാണ് ഗതാഗതക്കുരുക്ക് രൂക്ഷമാക്കുന്നത്. റോഡരികിലെ അനധികൃത പാർക്കിങ് വാഹന ഗതാഗതത്തെ സാരമായി ബാധിക്കുകയും ആംബുലൻസ് അടക്കമുള്ള അടിയന്തര സർവീസുകൾ പോലും വഴിയിൽ കുടുങ്ങുന്ന അവസ്ഥ സൃഷ്ടിക്കുകയും ചെയ്യുന്നു. നീലക്കുറിഞ്ഞി സീസൺ കൂടി സജീവമായതോടെ സഞ്ചാരികളുടെ തിരക്ക് പലമടങ്ങ് വർദ്ധിച്ചിരിക്കുകയാണ്. പാർക്കിങ് സംവിധാനങ്ങൾ വിപുലീകരിക്കാതെ ഏർപ്പെടുത്തുന്ന ട്രാഫിക് നിയന്ത്രണങ്ങൾക്ക് താൽക്കാലിക ആശ്വാസം മാത്രമേ നൽകാൻ കഴിയൂ എന്ന് ടൂറിസം മേഖലയിലുള്ളവരും ചൂണ്ടിക്കാട്ടുന്നു.
മൾട്ടിലെവൽ പാർക്കിങ് കേന്ദ്രത്തിന് റവന്യൂ ഭൂമി ലഭ്യമാക്കണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നൽകിയിരുന്നതായി ഗ്രാമപഞ്ചായത്ത് പ്രസിഡന്റ് വിജയകുമാർ വ്യക്തമാക്കി. മുഖ്യമന്ത്രിയുടെ നിർദ്ദേശപ്രകാരം റിപ്പോർട്ട് തേടിയപ്പോഴാണ് റവന്യൂ ഭൂമി ലഭ്യമല്ലെന്ന വിവരം തഹസിൽദാർ അറിയിച്ചത്. ഇനി കെഡിഎച്ച്പിയുമായി ചർച്ച നടത്തി സർക്കാർ തലത്തിൽ ഭൂമി വിട്ടുനൽകാനുള്ള തീരുമാനമെടുത്താൽ മാത്രമേ പഞ്ചായത്തിന് പാർക്കിങ് സമുച്ചയ പദ്ധതിയുമായി മുന്നോട്ടുപോകാൻ കഴിയൂ എന്നും അദ്ദേഹം കൂട്ടിച്ചേർത്തു.
by Midhun HP News | Oct 12, 2026 | Latest News, കേരളം
കൊച്ചി: അന്തര്‍വാഹിനികളില്‍ നിന്നുള്ള ആക്രമണങ്ങള്‍ കണ്ടെത്തുന്നതിനും പ്രതിരോധിക്കുന്നതിനുമായി നാവിക സേനയില്‍ മംഗ്രോള്‍ എത്തുന്നു. നാവികസേനയുടെ പുതിയ സബ്മറൈന്‍ വാര്‍ഫെയര്‍ ഷാലോ വാട്ടര്‍ ക്രാഫ്റ്റ് ആണ് മംഗ്രോള്‍. ആഴം കുറഞ്ഞ ജലാശയങ്ങളിലെ വെള്ളത്തിനടിയിലുള്ള ഭീഷണികള്‍ കണ്ടെത്തുന്നതിനും പ്രതിരോധിക്കുന്നതിനുമായി പ്രത്യേകമായി രൂപകല്പന ചെയ്തവയാണിവ.
ഇന്ത്യന്‍ നാവികസേനയ്ക്കായി കൊച്ചി കപ്പല്‍ശാല നിര്‍മിക്കുന്ന എട്ട് ആന്റി-സബ്മറൈന്‍ വാര്‍ഫെയര്‍ ഷാലോ വാട്ടര്‍ ക്രാഫ്റ്റുകളില്‍ മൂന്നാമത്തെ കപ്പലാണ് മംഗ്രോള്‍.മുംബൈയിലെ നേവല്‍ ഡോക്ക്യാര്‍ഡില്‍ മംഗ്രോള്‍ ഇന്ന് കമ്മീഷന്‍ ചെയ്യും. വലിയ യുദ്ധക്കപ്പലുകള്‍ പ്രവര്‍ത്തന പരിമിതികള്‍ നേരിടുന്ന തീരദേശ ജലത്തില്‍ സമുദ്ര പട്രോളിങ് വിമാനങ്ങള്‍, ഹെലികോപ്ടറുകള്‍, മറ്റ് യുദ്ധക്കപ്പലുകള്‍ എന്നിവയ്‌ക്കൊപ്പം അന്തര്‍വാഹിനി ഭീഷണികള്‍ കണ്ടെത്തുന്നതിനും പ്രതിരോധിക്കുന്നതിനും കഴിയുന്നതാണ് മംഗ്രോളിന്റെ വലിയ സവിശേഷത.
ഗുജറാത്തിലെ ജുനാഗഡ് ജില്ലയിലെ തീരദേശ പട്ടണവും മത്സ്യബന്ധന തുറമുഖവുമായ മംഗ്രോളിന്റെ പേരിലുള്ള ഈ കപ്പല്‍ നേരത്തേ ഇന്ത്യന്‍ നാവികസേനയില്‍ സേവനമനുഷ്ഠിച്ച ഐഎന്‍എസ് മംഗ്രോളിന്റെ പിന്‍ഗാമിയാണ്. 80 ശതമാനത്തിലധികം തദ്ദേശീയമായി നിര്‍മിച്ച മംഗ്രോളിന്റെ വരവ് യുദ്ധക്കപ്പല്‍ രൂപകല്പന, നിര്‍മാണം, നൂതന ആയുധങ്ങളുടെയും സെന്‍സറുകളുടെയും സംയോജനം എന്നിവയില്‍ ഇന്ത്യയുടെ കരുത്ത് എടുത്തുകാണിക്കുന്നതാണ്.
അന്തര്‍വാഹിനി വിരുദ്ധ പോരാട്ടങ്ങള്‍ക്ക് പുറമേ കടലിനടിയിലെ നിരീക്ഷണം, മൈനുകള്‍ വിന്യസിക്കല്‍, കുറഞ്ഞ തീവ്രതയുള്ള മറ്റ് സമുദ്ര സുരക്ഷാ പ്രവര്‍ത്തനങ്ങള്‍ എന്നിവയ്ക്കും മംഗ്രോള്‍ ഉപയോഗിക്കാനാകും. ആധുനിക ആയുധങ്ങളും സെന്‍സറുകളും സജ്ജീകരിച്ചിരിക്കുന്ന മംഗ്രോള്‍ വരുന്നത് ഇന്ത്യന്‍ നാവികസേനയുടെ അന്തര്‍വാഹിനിവിരുദ്ധ യുദ്ധശേഷികളെ ശക്തിപ്പെടുത്തും.
by Midhun HP News | Oct 12, 2026 | Latest News, കേരളം
കോട്ടയം: കോട്ടയത്ത് അച്ഛനെ മകന്‍ തലയ്ക്ക് അടിച്ചു കൊലപ്പെടുത്തി. കോട്ടയം മണിമലയിലാണ് സംഭവം. റാന്നി മക്കപ്പുഴ സ്വദേശി സന്തോഷ് ആണ് മരിച്ചത്. മകന്‍ സച്ചു സന്തോഷിനെ പൊലീസ് അറസ്റ്റ് ചെയ്തു.
ശനിയാഴ്ച വൈകീട്ടാണ് സംഭവം. സന്തോഷിന്റെ ഭാര്യയും രണ്ടുമക്കളും ഭാര്യമാതാവും മാത്രമാണ് മണിമലയിലെ വീട്ടില്‍ താമസിക്കുന്നത്. വല്ലപ്പോഴും എത്തുമ്പോള്‍ മദ്യപിച്ച് ഭാര്യയുമായും മക്കളുമായും വഴക്കുണ്ടാക്കുന്നത് പതിവാണെന്ന് നാട്ടുകാര്‍ പറയുന്നു.
ശനിയാഴ്ച മദ്യപിച്ചെത്തിയ സന്തോഷ് ഭാര്യയുമായി വഴക്കുണ്ടാക്കി. ഇതുകണ്ട ഇളയമകന്‍ സച്ചു കാപ്പിക്കമ്പ് എടുത്ത് സന്തോഷിന്റെ തലയ്ക്ക് അടിച്ചു. അടിയേറ്റു ചോരയില്‍ കുളിച്ചു കിടന്ന സന്തോഷിനെ നാട്ടുകാര്‍ വിവരം അറിയിച്ചതിനെത്തുടര്‍ന്ന് പൊലീസ് എത്തിയാണ് ആശുപത്രിയിലെത്തിച്ചത്.
by Midhun HP News | Oct 12, 2026 | Latest News, കേരളം
തിരുവനന്തപുരം: സംസ്ഥാനത്ത് മുന്‍ഗണനാ വിഭാഗത്തില്‍ തുടരാന്‍ അര്‍ഹതയില്ലാതെ, റേഷന്‍ കാര്‍ഡുകള്‍ കൈവശം വച്ചിരിക്കുന്നവര്‍ക്കു പിഴയോ മറ്റു ശിക്ഷാനടപടികളോ കൂടാതെ കാര്‍ഡ് സറണ്ടര്‍ ചെയ്യുന്നതിനു രണ്ടു മാസത്തെ സാവകാശം അനുവദിച്ചു.
നിയമാനുസൃതമായി ഉള്‍പ്പെട്ട ശേഷം, ജീവിത സാഹചര്യങ്ങളില്‍ വന്ന മാറ്റംമൂലം അര്‍ഹത നഷ്ടപ്പെട്ടിട്ടും ആനുകൂല്യങ്ങള്‍ കൈപ്പറ്റുന്ന വര്‍ക്ക് ഒഴിവാകാം.
ഇത്തരക്കാര്‍ പട്ടികയില്‍ തുടരുന്നതു യഥാര്‍ഥ കുടുംബങ്ങള്‍ക്കു ലഭിക്കേണ്ട ആനുകൂല്യങ്ങള്‍ പരിമിതപ്പെടുത്തുമെന്നു പൊതുവിതരണ ഉപഭോക്തൃകാര്യ കമ്മിഷണര്‍ സര്‍ക്കാരിനു റിപ്പോര്‍ട്ട് നല്‍കിയതിന്റെ അടിസ്ഥാനത്തിലാണു നടപടി.
by Midhun HP News | Oct 11, 2026 | Latest News, കേരളം
കൊല്ലം: പാര്‍ക്കിന്‍സണ്‍സ് രോഗം ബാധിച്ച 64കാരനെ മരിച്ച നിലയില്‍ കണ്ടെത്തിയ സംഭവം കൊലപാതകമെന്ന് പൊലീസ്. കേസില്‍ ഭാര്യയെ പൊലീസ് അറസ്റ്റ് ചെയ്തു. ശാസ്താംകോട്ട പോരുവഴി ചാത്താകുളം ജിജി ഭവനില്‍ ജോസ് ഡാനിയേല്‍ (അലക്‌സ് 64) കൊല്ലപ്പെട്ട സംഭവത്തിലാണ് ഭാര്യ മറിയാമ്മ ജോസിനെ (59) കഴിഞ്ഞ ദിവസം ചെന്നൈയില്‍ നിന്ന് പൊലീസ് അറസ്റ്റ് ചെയ്തത്.
കഴിഞ്ഞ 20നു രാവിലെയാണ് ജോസിനെ മരിച്ച നിലയില്‍ മറിയാമ്മ ഭരണിക്കാവിലെ സ്വകാര്യ ആശുപത്രിയില്‍ എത്തിക്കുന്നത്. ആത്മഹത്യ ചെയ്‌തെന്നാണ് ആശുപത്രിയിലും ബന്ധുക്കളോടും ഭാര്യ പറഞ്ഞതെന്ന് പൊലീസ് പറയുന്നു. എന്നാല്‍ കഴുത്തിലെ പാടുകളിലും ശരീരത്തിലെ ചെറിയ മുറിവുകളിലും അസ്വാഭാവികത തോന്നിയ ഡോക്ടര്‍ പൊലീസിനെ വിവരമറിയിച്ചു. പാരിപ്പള്ളി മെഡിക്കല്‍ കോളജ് ആശുപത്രിയില്‍ മൃതദേഹ പരിശോധന നടത്തിയ ശേഷം ഇടവക പള്ളിയില്‍ സംസ്‌കരിച്ചു. മൃതദേഹ പരിശോധനയുടെയും ഫൊറന്‍സിക് പരിശോധനയുടെയും ഫലങ്ങള്‍ പുറത്തുവന്നതോടെയാണ് കൊലപാതകമാണെന്ന് തെളിഞ്ഞതെന്നും പൊലീസ് പറയുന്നു.
ജോസും മറിയാമ്മയും മാത്രമാണ് ചാത്താകുളത്തെ വീട്ടിലുണ്ടായിരുന്നത്. കഴുത്തില്‍ പ്ലാസ്റ്റിക് ചരട് മുറുക്കി കൊലപ്പെടുത്തിയ ശേഷം, ജോസ് ആത്മഹത്യ ചെയ്‌തെന്നു മറിയാമ്മ ബന്ധുക്കളെ വിളിച്ച് വിവരം അറിയിക്കുകയായിരുന്നു എന്നും പൊലീസ് പറയുന്നു. സംസ്‌കാരത്തിനു ശേഷം പൊലീസ് നടപടി ഭയന്നു മറിയാമ്മ ചെന്നൈയിലേക്ക് പോയി. അവിടെ മകന്റെ സുഹൃത്തിന്റെ സ്ഥാപനത്തില്‍ കഴിയുകയായിരുന്നു. ഫോണ്‍ രേഖകള്‍ പരിശോധിച്ച് സ്ഥലത്തെത്തിയ പൊലീസ് സംഘം മറിയാമ്മയെ അറസ്റ്റ് ചെയ്തു നാട്ടിലെത്തിച്ചു.
അടൂര്‍ തുവയൂര്‍ ആനമുക്ക് സ്വദേശിയായ ജോസ് രണ്ട് വര്‍ഷമായി പാര്‍ക്കിന്‍സണ്‍സ് രോഗബാധിതനാണ്. ഭര്‍ത്താവിനെ പരിചരിക്കുന്നതില്‍ മറിയാമ്മ നേരിട്ട ബുദ്ധിമുട്ടുകളും ഇവര്‍ തമ്മിലുള്ള പ്രശ്‌നങ്ങളുമാണ് കൊലപാതകത്തിലേക്ക് നയിച്ചതെന്നും പൊലീസ് പറയുന്നു.
by Midhun HP News | Oct 11, 2026 | Latest News, കേരളം
തിരുവനന്തപുരം: ബംഗാള്‍ ഉള്‍ക്കടലില്‍ ചൊവ്വാഴ്ചയോടെ ന്യൂനമര്‍ദ്ദ സാധ്യത. ഇതിന്റെ സ്വാധീനഫലമായി ബുധനാഴ്ച വരെ നേരിയതോ മിതമായതോ ആയ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
മലാക്ക കടലിടുക്കിന് മുകളില്‍ ചക്രവാതച്ചുഴി സ്ഥിതി ചെയ്യുന്നുണ്ട്. ഈ ചക്രവാതച്ചുഴി ഞായറാഴ്ചയോടെ ആന്‍ഡമാന്‍ കടലില്‍ പ്രവേശിക്കുകയും തുടര്‍ന്ന് ചൊവ്വാഴ്ചയോടെ ന്യൂനമര്‍ദ്ദമായി ശക്തിപ്രാപിക്കുമെന്നാണ് കാലാവസ്ഥ വകുപ്പിന്റെ പ്രവചനം.
ഈ ദിവസങ്ങളില്‍ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 40-50 കിലോമീറ്റര്‍ വേഗത്തില്‍ ശക്തമായ കാറ്റിനും സാധ്യതയുള്ളതിനാല്‍ ജാഗ്രത പാലിക്കണമെന്നും മുന്നറിയിപ്പില്‍ പറയുന്നു. മന്നാര്‍ ഉള്‍ക്കടലിനും അതിനോട് ചേര്‍ന്ന തെക്കന്‍ തമിഴ്‌നാട് തീരപ്രദേശത്തിനും മുകളിലായി സമുദ്രനിരപ്പില്‍ നിന്ന് 0.9 കിലോമീറ്റര്‍ ഉയരത്തില്‍ മറ്റൊരു ചക്രവാതച്ചുഴി സ്ഥിതി ചെയ്യുന്നുണ്ട്. ഈ ചക്രവാതച്ചുഴിയില്‍ നിന്ന് മധ്യവടക്കന്‍ മഹാരാഷ്ട്രയിലേക്ക് നീളുന്ന ന്യൂനമര്‍ദ്ദ പാത്തി ഉള്‍നാടന്‍ തമിഴ്‌നാട്, ഉള്‍നാടന്‍ കര്‍ണാടക എന്നിവിടങ്ങളിലൂടെ കടന്നുപോകുന്നതായും കാലാവസ്ഥ വകുപ്പിന്റെ മുന്നറിയിപ്പില്‍ പറയുന്നു.
Recent Comments