by Midhun HP News | Feb 23, 2023 | Latest News, കേരളം, ജില്ലാ വാർത്ത
പാലക്കാട്: ഒറ്റപ്പാലത്തെ എയ്ഡഡ് സ്കൂളിലെ നാലു ആണ്കുട്ടികളെ കാണാതായി. വീട്ടില് നിന്ന് ഇറങ്ങിയ എട്ടാം ക്ലാസ് വിദ്യാര്ഥികള് സ്കൂളില് എത്താതിരുന്നതിനെ തുടര്ന്ന് നടത്തിയ അന്വേഷണത്തിലാണ് കാണാതായ കാര്യം സ്ഥിരീകരിച്ചത്. ഒറ്റപ്പാലം റെയില്വേ സ്റ്റേഷനില് നിന്ന് കുട്ടികള് ട്രെയിന് കയറിപ്പോകുന്നത് കണ്ടതായി ദൃക്സാക്ഷികള് പറയുന്നു. കുട്ടികളെ കാണാതായ വിവരത്തിന്റെ അടിസ്ഥാനത്തില് ഒറ്റപ്പാലം പൊലീസാണ് അന്വേഷണം നടത്തുന്നത്.
കുട്ടികള് റെയില്വേ സ്റ്റേഷനിലേക്ക് പോകുന്നത് കണ്ടു എന്ന വിവരത്തിന്റെ അടിസ്ഥാനത്തിലാണ് റെയില്വേ സ്റ്റേഷനില് പരിശോധന നടത്തിയത്. റെയില്വേ സ്റ്റേഷനിലെ സിസിടിവി ദൃശ്യങ്ങള് പരിശോധിച്ചു. അതിനിടെ സ്റ്റേഷനിലുണ്ടായിരുന്ന ചിലരാണ് കുട്ടികള് ട്രെയിനില് കയറിപ്പോകുന്നത് കണ്ടതായി പറഞ്ഞത്. വാളയാറിലേക്കുള്ള ടിക്കറ്റ് എടുത്ത് വാളയാര് ഭാഗത്തേയ്ക്കുള്ള ട്രെയിനില് കയറിപ്പോയെന്നാണ് ദൃക്സാക്ഷികള് പറയുന്നത്.
ഇതിന്റെ അടിസ്ഥാനത്തില് വാളയാര് റെയില്വേ സ്റ്റേഷനില് റെയില്വേ സുരക്ഷാ ഉദ്യോഗസ്ഥര് പരിശോധിച്ചെങ്കിലും കുട്ടികളെ കണ്ടെത്താന് സാധിച്ചില്ല. കുട്ടികള് ട്രെയിന് കയറാതെ, മറ്റെവിടെയെങ്കിലും പോയോ എന്നതടക്കമുള്ള കാര്യങ്ങളും പൊലീസ് അന്വേഷിക്കുന്നുണ്ട്. സ്കൂള് വേഷത്തിലാണ് കുട്ടികള് വീട്ടില് നിന്നിറങ്ങിയത്. ഇനി ബാഗില് മാറാന് വേറെ വസ്ത്രം കരുതിയിരുന്നോ എന്നതടക്കം അന്വേഷിക്കേണ്ടതുണ്ട്.
by Midhun HP News | Feb 23, 2023 | Latest News, കേരളം, ജില്ലാ വാർത്ത
തിരുവനന്തപുരം: സംസ്ഥാനത്ത് ക്ഷേമ പെന്ഷന് വിതരണം നാളെ മുതല് ആരംഭിക്കും. ഒരു മാസത്തെ കുടിശ്ശിക നല്കാന് സര്ക്കാര് ഉത്തരവിറങ്ങി. ഡിസംബറിലെ ക്ഷേമ പെന്ഷനാണ് നല്കുക. സഹകരണ ബാങ്കുകളുടെ കണ്സോര്ഷ്യത്തില് നിന്ന് വായ്പയെടുത്താണ് തുക നല്കുന്നത്.
by Midhun HP News | Feb 23, 2023 | Latest News, കേരളം, ജില്ലാ വാർത്ത
തിരുവനന്തപുരം: ഏഷ്യാനെറ്റിലെ മുതിര്ന്ന മാധ്യമപ്രവര്ത്തകന് വിനു വി. ജോണിനെതിരേ കള്ളക്കേസെടുത്ത് നോട്ടീസ് നൽകിയ കേരള പൊലീസിൻ്റെ നീക്കത്തെ തിരുവനന്തപുരം പ്രസ്ക്ലബ് ശക്തമായി അപലപിക്കുന്നു. ഒരു ഭരണകക്ഷി നേതാവിനെതിരേ വാര്ത്താ അവതരണത്തിനിടയില് പരാമര്ശം നടത്തിയതിനാണ് കഴിഞ്ഞ ഒരു വർഷമായി നടത്തുന്ന ഫാസിസ്റ്റ് സ്വഭാവമുള്ള ഈ വേട്ടയാടല്. രാജ്യവ്യാപക ഹര്ത്താലുമായി ബന്ധപ്പെട്ട് കേരളത്തില് നടന്ന അക്രമങ്ങള്ക്കെതിരായ ചാനല് ചര്ച്ചയ്ക്കിടെ എളമരം കരീം എം.പിക്കെതിരെ നടത്തിയ പരാമര്ശങ്ങളുടെ പേരിലാണ് വിനു വി. ജോണിനെതിരേ കേസെടുത്തതും പ്രതികാര നടപടികള് പോലീസ് തുടരുന്നതും.
മാധ്യമസ്വാതന്ത്ര്യവും പൗരാവകാശവുമൊക്കെ തകര്ക്കുന്ന ഹീനമായ നീക്കമാണ് പോലീസിന്റെ ഭാഗത്ത് നിന്ന് ഉണ്ടായിരിക്കുന്നത്. ഇതിന് തടയിടാൻ ഭരണകൂടം തയ്യാറായില്ലെങ്കിൽ ശക്തമായ പ്രക്ഷോഭത്തിന് മാധ്യമ സമൂഹം നിർബന്ധിതരാകും. ഭരണകക്ഷി നേതാക്കളുടെ താത്പര്യങ്ങള്ക്ക് വഴങ്ങി മാധ്യമ പ്രവര്ത്തകരെ കള്ളക്കേസില് കുടുക്കി നിശബ്ദരാക്കാനുള്ള നീക്കത്തില് നിന്ന് പോലീസും സര്ക്കാരും പിന്മാറണം.
വിനു വി. ജോണിനെതിരായ കള്ളക്കേസ് പിന്വലിക്കാനും മാധ്യമ സ്വാതന്ത്ര്യം ഉയര്ത്തിപ്പിടിക്കാനും സര്ക്കാര് തയ്യാറായില്ലെങ്കില് ശക്തമായ പ്രതിഷേധ പരിപാടികളുമായി മാധ്യമപ്രവര്ത്തകര് മുന്നോട്ടു പോകുമെന്ന് തിരുവനന്തപുരം പ്രസ് ക്ലബ് പ്രസിഡന്റ് എം. രാധാകൃഷ്ണനും സെക്രട്ടറി കെ.എൻ. സാനുവും അറിയിച്ചു.
by Midhun HP News | Feb 23, 2023 | Latest News, കേരളം, ജില്ലാ വാർത്ത
വിളപ്പിൽശാല: സ്കൂട്ടർ യാത്രക്കാരിയെ തടഞ്ഞ് നിറുത്തി ശാരീരികമായി ഉപദ്രവിച്ച കേസിലെ പ്രതിയെ പോലീസ് അറസ്റ്റ് ചെയ്തു. വിളപ്പിൽശാല മലപ്പനംകോട് വച്ച് സ്ക്കൂട്ടർ യാത്രക്കാരിയായ ചെറിയകൊണ്ണി സ്വദേശിനി യുവതിയെ തടഞ്ഞ് നിറുത്തി ശാരീരികമായി ഉപദ്രവിച്ച കേസിലെ പ്രതി അമ്പൂരി, തേക്കുപാറ, കൂട്ടപ്പു ശൂരവക്കാണിക്കുഴിവിള വീട്ടിൽ ഷിൻ്റോ (25) യെയാണ് വിളപ്പിൽശാല പോലീസ് അറസ്റ്റ് ചെയ്തത്.
ഇക്കഴിഞ്ഞ ജനുവരി 5-ാം തീയതി രാത്രി 7.15 മണിയോടെയാണ് കേസിനാസ്പദമായ സംഭവം ഉണ്ടായത്. യുവതി കാട്ടാക്കട കട്ടയ്ക്കോട് ഭാഗത്ത് നിന്നും വിളപ്പിൽശാല ഭാഗത്തേക്ക് ഇരുചക്ര വാഹനത്തിൽ പോകുകയായിരുന്നു. മലപ്പനംകോട് ഇറക്കം ഇറങ്ങി വരുന്ന സമയം ഷിൻ്റോ സ്കൂട്ടറിൽ വന്ന് തടഞ്ഞ് നിറുത്തി ഉപദ്രവിക്കുകയായിരുന്നു. ഈ സമയം മറ്റ് വാഹനങ്ങൾ വരുന്നത് കണ്ട് ഷിൻ്റോ അവിടെ നിന്നും കടന്നു. കൃത്യത്തിനായി ഷിൻ്റോ ഉപയോഗിച്ച വാഹനത്തിൻ്റെ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെപ്പറ്റി പോലീസിന് സൂചന ലഭിക്കുന്നത്. തുടർന്ന് ഒളിവിൽ കഴിഞ്ഞിരുന്ന പ്രതിയെ പോലീസ് പിടികൂടുകയായിരുന്നു.
തിരുവനന്തപുരം റൂറൽ ജില്ലാ പോലീസ് മേധാവി ഡി ശില്പ ഐ പി എസ്സിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ കാട്ടാക്കട ഡിവൈഎസ്പി എസ് അനിൽകുമാറിന്റെ നേതൃത്വത്തിൽ വിളപ്പിൽശാല ഹൗസ് ഓഫീസറായ എൻ സുരേഷ് കുമാർ, എസ് ഐ ആശിഷ് ബൈജു, സി പി ഒ അജിൽ തുടങ്ങിയ പോലീസ് സംഘം ആണ് അന്വേഷണം നടത്തി പ്രതിയെ പിടികൂടിയത്. അറസ്റ്റിലായ പ്രതി പോലീസിനോട് കുറ്റസമ്മതം നടത്തി. ഇയാൾ ഇതേമാതിരിയുള്ള കുറ്റകൃത്യങ്ങളിൽ ഏർപ്പെട്ട് വരുന്നയാളാണോ എന്ന കാര്യത്തിൽ പോലീസ് അന്വേഷണം നടത്തി വരികയാണ്. കാട്ടാക്കട ജുഡീഷ്യൽ ഫസ്റ്റ് ക്ളാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻറ് ചെയ്തു.
by Midhun HP News | Feb 23, 2023 | Latest News, കേരളം, ജില്ലാ വാർത്ത
എംഎൽഎയുടെ പ്രദേശിക വികസന ഫണ്ടിൽ നിന്നും 5,560,000 രൂപ ചിലവിട്ട് നിർമ്മിക്കുന്ന ആറ്റിങ്ങൽ നഗരസഭ പതിനഞ്ചാം വാർഡിലെ അംഗനവാടി റോഡിന്റെയും അയ്യങ്കാളി റോഡിലെ ഓടയുടെയും നിർമ്മാണോദ്ഘാടനം
എംഎൽഎ ഒ.എസ്.അംബിക നിർവ്വഹിച്ചു. പരിപാടിയോട് അനുബന്ധിച്ച് നടന്ന യോഗത്തിൽ നഗരസഭ ചെയർപേഴ്സൺ എസ്.കുമാരി അധ്യക്ഷത വഹിച്ചു. വാർഡ് കൗൺസിലർ എം.താഹിർ സ്വാഗതം പറഞ്ഞു. മുൻ ചെയർമാൻ എം.പ്രദീപ് മുഖ്യപ്രഭാഷണം നടത്തി. സ്റ്റാൻഡിംഗ് കമ്മിറ്റി ചെയർമാൻമാരായ എസ്.ഷീജ, എ.നജാം, കൗൺസിലർമാരായ രാജഗോപാലൻ പോറ്റി, ഒ.പി.ഷീജ, വിഎസ്.നിതിൻ തുടങ്ങിയവർ സംസാരിച്ചു. നവഭാരത് റെസിഡൻസ് അസോസിയേഷൻ പ്രസിഡന്റ് പ്രദീപ്കുമാർ യോഗത്തിന് നന്ദിയും പറഞ്ഞു.
by Midhun HP News | Feb 23, 2023 | Latest News, കേരളം, ജില്ലാ വാർത്ത
തിരുവനന്തപുരം: സമഗ്ര ശിക്ഷ കേരളയില് പാര്ട്ട് ടൈം സ്പെഷ്യലിസ്റ്റ് ടീച്ചര്മാരുടെ വേതനം വര്ധിപ്പിച്ചു. സ്പെഷ്യസ്റ്റ് ടീച്ചര്മാര്ക്ക് നിലവില് വേതനമായി നല്കിയിരുന്നത് 10,000 രൂപയും ആ തുകയുടെ 12% ഇപിഎഫുമായിരുന്നു. ഇത് 13,400 രൂപയായി വര്ധിപ്പിക്കുന്നതിന് തീരുമാനിച്ചു. 13,400 രൂപയുടെ 12% വരുന്ന 1608 രൂപ ഇപിഎഫ് (എംപ്ലോയര് കോണ്ട്രിബ്യൂഷന്) ആയി നല്കാനും തീരുമാനിച്ചു. ശമ്പള വര്ധനവ് മുന്കാല പ്രാബല്യത്തോടെ 2022 നവംബര് മുതല് നടപ്പിലാക്കും.
ഇപ്പോഴുണ്ടായ പ്രതിമാസ വര്ധനവ് 3400 രൂപ 2022 നവംബര്, ഡിസംബര്, 2023 ജനുവരി മാസങ്ങളിലെ കുടിശ്ശികയായി നല്കും. സ്പെഷ്യലിസ്റ്റ് ടീച്ചര്ക്ക് പാര്ട്ട് ടൈം ജീവനക്കാര്ക്ക് അനുവദനീയമായ ലീവും മറ്റ് ആനുകൂല്യങ്ങളും നല്കും. ആഴ്ചയില് 3 ദിവസങ്ങളില് സ്പെഷ്യലിസ്റ്റ് ടീച്ചര്മാര് പരമാവധി 2 സ്കൂളുകളില് പ്രവര്ത്തിക്കണം. മാസത്തില് ഒരു ശനിയാഴ്ച ബന്ധപ്പെട്ട ബിആര്സികളില് പ്ലാന് മീറ്റിങില് പങ്കെടുക്കണം. ടീച്ചര്മാരുടെ മറ്റു വിഷയങ്ങളെക്കുറിച്ച് 3 മാസത്തിനകം പൊതുവിദ്യാഭ്യാസ വകുപ്പ് പ്രിന്സിപ്പല് സെക്രട്ടറി പരിശോധിച്ച് നല്കുന്ന റിപ്പോര്ട്ടിന്റെ അടിസ്ഥാനത്തില് തീരുമാനിക്കും.
Recent Comments