ഒളി കാമറ വിവാദം: ചേതന്‍ ശര്‍മ്മ രാജിവെച്ചു

by Midhun HP News | Feb 17, 2023 | Latest News, കേരളം, ജില്ലാ വാർത്ത

മുംബൈ: ഇന്ത്യന്‍ സീനിയര്‍ ക്രിക്കറ്റ് ടീം സെലക്ഷന്‍ കമ്മിറ്റി ചെയര്‍മാന്‍ ചേതന്‍ ശര്‍മ്മ രാജിവെച്ചു. ബിസിസിഐ സെക്രട്ടറി ജയ്ഷായ്ക്ക് രാജിക്കത്ത് നല്‍കി. ചേതന്‍ ശര്‍മ്മയുടെ രാജി സ്വീകരിച്ചതായി ജയ് ഷാ വ്യക്തമാക്കി. ഒരു സ്വകാര്യ ചാനലിന്റെ ഒളിക്യാമറ ഓപ്പറേഷനില്‍, ഇന്ത്യന്‍ ടീമുമായി ബന്ധപ്പെട്ട് ചേതന്‍ ശര്‍മ്മ നടത്തിയ വെളിപ്പെടുത്തലുകള്‍ വിവാദമായിരുന്നു. പൂര്‍ണമായും ഫിറ്റല്ലാത്ത താരങ്ങള്‍ ഉത്തേജക മരുന്ന് കുത്തിവെച്ച് കളിക്കാനിറങ്ങുന്നുവെന്നായിരുന്നു ചേതന്റെ വിവാദ വെളിപ്പെടുത്തല്‍.

വിരാട് കോഹ്‌ലിയും മുന്‍ ബിസിസിഐ പ്രസിഡന്റ് സൗരവ് ഗാംഗുലിയും തമ്മിലുള്ള പോരും, നിലവിലെ ഇന്ത്യന്‍ ടീമില്‍ കോഹ്ലിയും നായകന്‍ രോഹിത് ശര്‍മ്മയും തമ്മിലുള്ള ബന്ധങ്ങളുമടക്കം ചേതന്‍ ശര്‍മ്മ വെളിപ്പെടുത്തിയിരുന്നു. വിരാടും രോഹിതും തമ്മില്‍ പിണക്കങ്ങളില്ലെങ്കിലും, ഇരുവര്‍ക്കുമിടയില്‍ ഈഗോ ക്ലാഷ് ഉണ്ടെന്ന് ചേതന്‍ ശര്‍മ്മ പറഞ്ഞിരുന്നു.

കേരള തീരത്ത് ഇന്ന് രാത്രി വരെ ഉയർന്ന തിരമാലയ്ക്കും കടലാക്രമണത്തിനും സാധ്യത

by Midhun HP News | Feb 17, 2023 | Latest News, കേരളം, ജില്ലാ വാർത്ത

തിരുവനന്തപുരം: കേരള തീരത്ത് ഇന്ന് രാത്രി വരെ ഉയർന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രത്തിന്റെ മുന്നറിയിപ്പ്. 1.4 മുതൽ 2.0 മീറ്റർ വരെ ഉയരത്തിൽ തിരമാലയടിക്കാം. മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം. ബീച്ചിലേയ്ക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണ്ണമായും ഒഴിവാക്കണം. മത്സ്യബന്ധന യാനങ്ങൾ ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കണമെന്നും മുന്നറിയിപ്പുണ്ട്.

സുഹൃത്തുക്കൾ തമ്മിലുണ്ടായ വാക്കുതർക്കത്തിനിടെ യുവാവ് കുത്തേറ്റുമരിച്ചു

by Midhun HP News | Feb 17, 2023 | Latest News, കേരളം, ജില്ലാ വാർത്ത

ആലപ്പുഴ: മാവേലിക്കരയില്‍ സുഹൃത്തുക്കൾ തമ്മിലുണ്ടായ വാക്കുതർക്കത്തിനിടെ യുവാവ് കുത്തേറ്റുമരിച്ചു. മുള്ളികുളങ്ങരയിൽ അൻപൊലി സ്ഥലത്തുണ്ടായ തര്‍ക്കത്തിനിടെ മാവേലിക്കര ഉമ്പർനാട് ചക്കാല കിഴക്കതിൽ സജേഷ് (37) ആണ് കൊല്ലപ്പെട്ടത്. സജേഷ് പെയിന്റിങ് തൊഴിലാളിയാണ്. സജേഷിനെ കൊലപ്പെടുത്തിയ ഉമ്പർനാട് വിഷ്ണു ഭവനം വിനോദ് എന്ന വെട്ടുകത്തി വിനോദ് ഒളിവിലാണ്. തെക്കേക്കര പഞ്ചായത്ത് 19-ാം വാർഡിൽ അശ്വതി ജംഗ്‌ഷന് സമീപം വ്യാഴാഴ്ച രാത്രി 11.30നായിരുന്നു സംഭവം. ഇടത് കൈയുടെ മസിലിൽ കുത്തേറ്റ സജേഷിനെ കോട്ടയം മെഡിക്കൽ കോളജ് ആശുപത്രിയിലേക്കു കൊണ്ടുപോകുന്ന വഴി രക്തം വാർന്നു മരിക്കുകയായിരുന്നു.

സംസ്ഥാനത്ത് ഇന്ന് സ്വർണവില കുറഞ്ഞു

by Midhun HP News | Feb 17, 2023 | Latest News, കേരളം, ജില്ലാ വാർത്ത

തിരുവനന്തപുരം: സംസ്ഥാനത്ത് ഇന്ന് സ്വർണവില കുറഞ്ഞു. തുടർച്ചയായ നാലാം ദിവസമാണ് സ്വർണവില കുറയുന്നത്. ഇന്ന് ഒരു പവൻ സ്വർണത്തിന് 160 രൂപയുടെ ഇടിവുണ്ടായി. നാല് ദിവസംകൊണ്ട് 640 രൂപയാണ് കുറഞ്ഞത്. വിപണിയിൽ ഒരു പവൻ സ്വര്ണത്തിന്റ വിപണി വില 41,440 രൂപയാണ്. ഒരു ഗ്രാം 22 കാരറ്റ് സ്വർണത്തിന്റെ വില ഇന്ന് 20 രൂപ കുറഞ്ഞു. ഇന്നത്തെ വിപണി വില 5180 രൂപയാണ്. ഒരു ഗ്രാം 18 കാരറ്റ് സ്വർണത്തിന്‍റെ വിലയും ഇന്നലെ കുറഞ്ഞു. 35 രൂപയാണ് കുറഞ്ഞത്. ഒരു ഗ്രാം 18 കാരറ്റ് സ്വർണത്തിന്‍റെ വിപണി വില 4265 രൂപയാണ്. വെള്ളിയുടെ വിലയും കുറഞ്ഞു. ഒരു രൂപയാണ് വെള്ളിക്ക് കുറഞ്ഞത്. ഒരു ഗ്രാം വെള്ളിയുടെ വില 71 രൂപയാണ്. അതേസമയം, ഹാൾമാർക്ക് വെള്ളിയുടെ വിലയിൽ മാറ്റമില്ല. ഒരു ഗ്രാം ഹാൾമാർക്ക് വെള്ളിയുടെ വില 90 രൂപയാണ്.

ശിവരാത്രി: ശനി, ഞായര്‍ ദിവസങ്ങളില്‍ കൊച്ചി മെട്രോ സര്‍വീസ് നീട്ടി

by Midhun HP News | Feb 17, 2023 | Latest News, കേരളം, ജില്ലാ വാർത്ത

കൊച്ചി: ശിവരാത്രിയോടനുബന്ധിച്ച് ശനി, ഞായര്‍ ദിവസങ്ങളില്‍ കൊച്ചി മെട്രോ സര്‍വീസ് നീട്ടി. ആലുവയില്‍ ബലിതര്‍പ്പണത്തിന് എത്തുന്നവരുടെ സൗകര്യം കണക്കിലെടുത്താണ് നടപടിയെന്ന് കെഎംആര്‍എല്‍ വാര്‍ത്താക്കുറിപ്പില്‍ അറിയിച്ചു. ആലുവ, എസ്എന്‍ ജംഗ്്ഷന്‍ എന്നിവിടങ്ങളില്‍നിന്ന് ശനി രാത്രി 11.30 വരെ ട്രെയിന്‍ സര്‍വീസ് ഉണ്ടായിരിക്കുന്നതാണ്. രാത്രി 10.30ന് ശേഷം 30 മിനിറ്റ് ഇടവേളകളിലായിരിക്കും സര്‍വീസ്. ഞായറാഴ്ച പുലര്‍ച്ചെ 4.30 മുതല്‍ സര്‍വീസ് തുടങ്ങും. രാവിലെ ഏഴു വരെ 30 മിനിറ്റ് ഇടവിട്ടും ഏഴു മുതല്‍ ഒമ്പതു വരെ 15 മിനിറ്റ് ഇടവിട്ടുമായിരിക്കും സര്‍വീസ്. ഞായറാഴ്ച നടക്കുന്ന യുപിഎസ്സി എന്‍ജിനീയറിങ് കംമ്പയിന്‍ഡ് ജിയോ സയന്റിസ്റ്റ് പരീക്ഷ എഴുതുന്നവര്‍ക്കും പുതുക്കിയ ട്രെയിന്‍ സമയക്രമം ഉപകാരപ്പെടും.

‘അരങ്ങ്’ ഇൻക്ലൂസീവ് തിയേറ്റർ ക്യാമ്പ് നടന്നു

by Midhun HP News | Feb 17, 2023 | Latest News, കേരളം, ജില്ലാ വാർത്ത

അരങ്ങ് ഇൻക്ലൂസീവ് തിയേറ്റർ ക്യാമ്പ് ആറ്റിങ്ങൽ ബിആർസിയുടെ ആഭിമുഖ്യത്തിൽ നടന്നു. രംഗപ്രഭാത് ഡയറക്ടർ കെ എസ് ഗീത ഉദ്ഘാടനം നിർവഹിച്ചു. വിജയകുമാരൻ നമ്പൂതിരി (എ ഇ ഒ ആറ്റിങ്ങൽ) ചടങ്ങിൽ അധ്യക്ഷത വഹിച്ചു. ആറ്റിങ്ങൽ ബി ആർ സി ബിപിസി പി. സജി സ്വാഗതം ആശംസിച്ചു. സീന എസ് എം (സി ആർ സി സി,ബി ആർ സി ആറ്റിങ്ങൽ ) നന്ദി പ്രകാശനത്തോടുകൂടി ഉദ്ഘാടന സെഷൻ അവസാനിക്കുകയും തീയറ്റർ ക്യാമ്പ് സെഷൻ അഭിഷേക് രംഗപ്രഭാതിന്റെ നേതൃത്വത്തിൽ ആരംഭിക്കുകയും ചെയ്തു. ജവാദ് (ഡിപിസി എസ് എസ് കെ തിരുവനന്തപുരം) സന്ദർശിക്കുകയും കുട്ടികളുമായി സംവദിക്കുകയും ചെയ്തു. 8 മണി മുതൽ കുട്ടികൾക്കായി സിനിമ പ്രദർശിപ്പിക്കുകയും 10 മണിക്ക് ഒന്നാം ദിവസത്തെ ക്യാമ്പ് അവസാനിക്കുകയും ചെയ്തു.

രണ്ടാം ദിവസം ആദ്യ സെക്ഷൻ ആരംഭിക്കുകയും അഭിഷേക് നേതൃത്വത്തിൽ ഭാവാഭിനയത്തിന്റെ വിവിധ ഭാവങ്ങൾ ഗ്രൂപ്പുകളായി തിരിച്ച്, സംഗീതത്തിന്റെ അകമ്പടിയോടെ കുട്ടികൾക്ക് പരിശീലനം നൽകി ശേഷം ഓരോ കുട്ടികളുടെയും കഥാപാത്രം നിർണയം നടത്തുകയും സംഭാഷണവും ഭാവ അഭിനയവും ഏകോപിപ്പിച്ചുകൊണ്ടുള്ള പരിശീലനം ഓരോ കുട്ടികൾക്കും നൽകി. തുടർന്ന് ഒരു തീം നൽകുകയും അതുമായി ബന്ധപ്പെട്ട നാടക പരിശീലനം നടത്തുകയും ചെയ്തു. രണ്ടുമണിക്ക് സമാപന സമ്മേളനം ആരംഭിച്ചു. ശ്രീകുമാരൻ (ഡി പി ഓ എസ് എസ് കെ തിരുവനന്തപുരം) അധ്യക്ഷൻ വഹിച്ച യോഗത്തിൽ ആറ്റിങ്ങൽ ബിപിസി ശ്രീ പി സജി സ്വാഗതം ആശംസിച്ചു. വാമനപുരം എംഎൽഎ ഡി കെ മുരളി ഉദ്ഘാടനം ചെയ്തു. എസ് എസ് കെ സ്റ്റേറ്റ് പ്രോജക്ട് ഓഫീസർ ഷൂജ മുഖ്യപ്രഭാഷണം നടത്തി സ്റ്റേറ്റ് പ്രോഗ്രാം ഓഫീസർ രശ്മി ആശംസകൾ അർപ്പിച്ച ചടങ്ങിൽ ആശാലത (സ്പെഷ്യൽ എഡ്യൂക്കേഷൻ) നന്ദി അർപ്പിച്ചു. സമ്മേളനത്തിൽ എംഎൽഎ, പങ്കെടുത്ത കുട്ടികൾക്ക് സർട്ടിഫിക്കറ്റ് നൽകി. രണ്ടുദിവസത്തെ ക്യാമ്പിനെ കുറിച്ചുള്ള അനുഭവം കുട്ടികളും രക്ഷകർത്താക്കളും പങ്കുവെച്ചു. തുടർന്ന് കുട്ടികൾ പഠിച്ച നാടകം അരങ്ങിൽ അവതരിപ്പിച്ചു.