by Midhun HP News | Oct 3, 2022 | Latest News, കേരളം, ജില്ലാ വാർത്ത
തിരുവനന്തപുരം: സിപിഐ സംസ്ഥാന കൗണ്‍സിലിലേക്കുള്ള അംഗങ്ങളുടെ തെരഞ്ഞെടുപ്പില്‍ സി ദിവാകരന് തിരിച്ചടി. 75 വയസ്സെന്ന ഉയര്‍ന്ന പ്രായപരിധി നടപ്പാക്കാന്‍ തലസ്ഥാന ജില്ല കമ്മറ്റി തീരുമാനിച്ചതോടെയാണിത്. തിരുവനന്തപുരത്ത് നിന്നുള്ള സംസ്താന കൗണ്‍സില്‍ അംഗങ്ങളുടെ പട്ടികിയില്‍ നിന്ന് അദ്ദേഹത്തെ ഒഴിവാക്കി. സംസ്ഥാന കൗൺസിൽ പ്രതിനിധികളായി 101 പേരെ തിരഞ്ഞെടുക്കാനാണ് തീരുമാനിച്ചിരിക്കുന്നത്. മുൻപത്തെ സംസ്ഥാന കൗൺസിലിനെ അപേക്ഷിച്ച് അഞ്ച് അംഗങ്ങൾ ഇക്കുറി അധികമുണ്ട്. ജില്ലാ കമ്മിറ്റികൾ യോഗം ചേർന്ന് സംസ്ഥാന കൗൺസിലിലേക്ക് അംഗങ്ങളെ തീരുമാനിക്കുകയാണ് ചെയ്യുന്നത്. സംസ്ഥാന കൗൺസിലിലേക്ക് എത്തുന്നവരുടെ എണ്ണത്തിന്റെ ബലാബലം നോക്കിയാവും സെക്രട്ടറി സ്ഥാനത്തേക്ക് മൽസരത്തിന് ഇറങ്ങണോ എന്ന് കാനം വിരുദ്ധ വിഭാഗം തീരുമാനിക്കുക. അതിനാൽ സെക്രട്ടറി സ്ഥാനത്തേക്ക് മത്സരമുണ്ടാകുമോയെന്നത് സംസ്ഥാന കൗൺസിലിലെ അംഗബലമാണ് തീരുമാനിക്കുക.
സിപിഐ സംസ്ഥാന സമ്മേളനം ഇന്ന് സമാപിക്കും. അതിനിടെ പാർട്ടിയിൽ മേധാവിത്വം ഉറപ്പിച്ച് കാനം രാജേന്ദ്രൻ പക്ഷം മുന്നോട്ട് പോവുകയാണ്. സി ദിവാകരനും കെ ഇ ഇസ്മയിലിനും എതിരെ സമ്മേളത്തിൽ ഉയർന്ന രൂക്ഷ വിമർശനം വിമത നീക്കങ്ങൾ പ്രതിസന്ധിയിലാക്കി. സംസ്ഥാന സെക്രട്ടറി സ്ഥാനത്തേക്ക് മൂന്നാം ഊഴത്തിന് ഇറങ്ങുന്ന കാനം രാജേന്ദ്രന് മത്സരം നേരിടേണ്ടി വരുമോയെന്ന കാര്യത്തിൽ അവ്യക്തത തുടരുന്നുണ്ട്. പരസ്യ പ്രതികരണം നടത്തിയ നേതാക്കൾക്കെതിരെ നടപടി വേണമെന്ന് ഇതിനകം ആവശ്യം ശക്തമായിട്ടുണ്ട്.
by Midhun HP News | Oct 3, 2022 | Latest News, കേരളം, ജില്ലാ വാർത്ത
കൊച്ചി: കുപ്രസിദ്ധ മോഷ്ടാവ് മരിയാര്‍ പൂതം പിടിയിലായി. എറണാകുളം നോര്‍ത്ത് പൊലീസാണ് അറസ്റ്റ് ചെയ്തത്. മോഷണശ്രമത്തിനിടെ നാട്ടുകാരാണ് ഇയാളെ പിടികൂടി പൊലീസില്‍ ഏല്‍പ്പിച്ചത്. ഇന്നു പുലര്‍ച്ചെ നോര്‍ത്ത് പൊലീസ് സ്റ്റേഷന്‍ പരിധിയിലെ ഒരു വീട്ടില്‍ മോഷണത്തിന് കയറിയപ്പോഴാണ് പിടിയിലായത്. രാത്രി ശബ്ദം കേട്ട് ഉണര്‍ന്ന വീട്ടുകാരന്‍ മോഷ്ടാവിനെ കണ്ടു.
തുടര്‍ന്ന് മരിയാര്‍പൂതവും വീട്ടുകാരനും തമ്മില്‍ മല്‍പ്പിടുത്തമുണ്ടായി. ഇതിനിടെ മരിയാര്‍പൂതം കയ്യിലിരുന്ന വാക്കത്തി കൊണ്ട് വീട്ടുകാരനെ വെട്ടി. തലയ്ക്ക് സാരമായി പരിക്കേറ്റു. ഇതിനിടെ ബഹളം കേട്ട് അയല്‍വാസികള്‍ ഓടിക്കൂടി മരിയാര്‍പൂതത്തെ പിടിച്ചുകെട്ടി. പൊലീസിനെ വിളിച്ചുവരുത്തി മോഷ്ടാവിനെ കൈമാറുകയായിരുന്നു. കൊച്ചിയില്‍ നിരവധി മോഷണക്കേസുകളില്‍ പ്രതിയാണ് മരിയാര്‍ പൂതം.
by Midhun HP News | Oct 3, 2022 | Latest News, കേരളം, ജില്ലാ വാർത്ത
കണിയാപുരം: പൊതുസമൂഹത്തിന് ഭീതി ഉയർത്തി ലഹരി എന്ന വിപത്തിന് എതിരെ ജാഗ്രതാ സമിതി ഒരു മാസം നീണ്ടു നിൽക്കുന്ന പ്രചരണ പരിപാടികൾക്ക് തുടക്കമിട്ടു. കേരള പോലീസിന്റെ യോദ്ധാവ്, എക്സൈസ് വകുപ്പിന്റെ വിമുക്തി, തിരുവനന്തപുരം ആർ.സി.സി.യുടെ കമ്മ്യൂണിറ്റി ഓങ്കോളജി വകുപ്പുകളുടെ സഹകരണത്തോടെയാണ് ജാഗ്രതാ സമിതി പദ്ധതി നടപ്പിലാക്കുന്നത്. ബോധവൽക്കരണ ക്ലാസ്സുകൾ,
കൂട്ടയോട്ടം, ബൈക്ക് റാലി, സെമിനാറുകൾ, കലാസാഹിത്യ മത്സരങ്ങൾ എന്നിവ ഇതിന്റെ ഭാഗമായി നടക്കും. ഗാന്ധി ജയന്തി ദിനമായ ഒക്ടോബർ 2 ന് പദ്ധതിക്ക് തുടക്കം കുറിച്ചു. ജില്ലാതല ഉദ്ഘാടനം കണിയാപുരം പള്ളിനട നിബ്റാസുൽ ഇസ്ലാം ആഡിറ്റോറിയത്തിൽ ജാഗ്രതാ സമിതി ചെയർമാൻ എം.എ.ലത്തീഫ് നിർവഹിച്ചു.
തിരുവനന്തപുരം ആർ.സി.സി.കമ്മ്യൂണിറ്റി ഓങ്കോളജി ഡിവിഷൻ അഡീഷണൽ പ്രൊഫസർ ഡോ. ആർ.ജയകൃഷ്ണൻ, എക്സൈസ് ഇൻസ്പെക്ടർ എസ്.സുധീഷ് കൃഷ്ണ എന്നിവർ ക്ലാസ്സെടുത്തു. കണിയാപുരം മുസ്ലീം ജമാഅത്ത് ചീഫ് ഇമാം അൻവരുദ്ദീൻ അൻവരി, ജമാ അത്ത് പ്രസിഡന്റ് എസ്. അബ്ദുൽ ഖരീം, എൻ.എച്ചു.എം മദ്രസ്സ പ്രസിഡന്റ് ഷഫീഖ്, വാഫി കോളേജ് പ്രിൻസിപ്പൽ അൻസർ ബാഖവി, എൻ.എസ്.എസ് കരയോഗം പ്രസിഡൻ്റ് കൃഷ്ണപിള്ള, അസിസ്റ്റൻ്റ് ഇമാം നസീം ഫൈസി, ബി.അനസ്, ജാഗ്രത സമിതി ഭാരവാഹികളായി ബിനു, ജെ.സലിം, എം.എസ്.നിസാം, സുബൈർ വടക്കതിൽ എന്നിവർ സംസാരിച്ചു.
by Midhun HP News | Oct 3, 2022 | Latest News, കേരളം, ജില്ലാ വാർത്ത
കേരള പ്രദേശ് സ്കൂൾ ടീച്ചേഴ്സ് അസോസിയേഷൻ അക്കാദമിക് കൗൺസിലിന്‍റെ നേതൃത്വത്തിൽ നടത്തുന്ന സ്വദേശ് മെഗാ ക്വിസ് 2022 ആറ്റിങ്ങൽ ഉപജില്ലാ തല മത്സരങ്ങൾ ആറ്റിങ്ങൽ ഗവൺമെൻറ് ബോയ്സ് ഹയർ സെക്കൻഡറി സ്കൂളിൽ നടന്നു. വിവിധ വിഭാഗങ്ങളിലായി നൂറിൽ പരം വിദ്യാർത്ഥികൾ മത്സരത്തിൽ പങ്കെടുത്തു. കെ.പി.എസ്.റ്റി.എ സംസ്ഥാന എക്സിക്യൂട്ടീവ് കമ്മിറ്റി അംഗം ആർ. ശ്രീകുമാർ, ജില്ലാ സെക്രട്ടറി എൻ.സാബു, വി.വിനോദ്, ഒ.ബി ഷാബു, സി.എസ്. വിനോദ്, പി.രാജേഷ്, എസ്.ശ്രീജിത്ത്, രാകേന്ദു എന്നിവർ നേതൃത്വം നൽകി.
എൽ.പി. വിഭാഗം (ഡയറ്റ്, ആറ്റിങ്ങൽ) ഒന്നാം സ്ഥാനം: ട്രിക്കേ ലെജന്റ്
രണ്ടാം സ്ഥാനം: ജെ.ഹരിനന്ദ് (ഗവ. യു.പി.എസ്, വെഞ്ഞാറമൂട്)
മൂന്നാം സ്ഥാനം: അർപ്പിത വിനോദ് (ഗവ.എൽ.പി.എസ്. ഇളമ്പ)
യു.പി. വിഭാഗം
ഒന്നാം സ്ഥാനം: ഗൗതം ആർ.നായർ (ഗവ. യു.പി.എസ്. ആലന്തറ)
രണ്ടാം സ്ഥാനം: കൃപ ആർ.എസ് (ടൗൺ യു.പി.എസ്, ആറ്റിങ്ങൽ)
മൂന്നാം സ്ഥാനം: സാധിക.ഡി.എസ്. (ജി.എച്ച്.എച്ച്.എസ്. ഇളമ്പ)
ഹൈസ്ക്കൂൾ വിഭാഗം ഒന്നാം സ്ഥാനം: നിള റിജു (ജി.എച്ച്.എച്ച്.എസ്. ഇളമ്പ)
രണ്ടാം സ്ഥാനം: വൈഷ്ണവ് ദേവ്. എസ്. (ജി.എം.ബി.എച്ച്.എച്ച്.എസ്. ആറ്റിങ്ങൽ)
മൂന്നാം സ്ഥാനം: ശിവനന്ദ സോണി (ജി.ജി.എച്ച്.എച്ച്.എസ്.ആറ്റിങ്ങൽ)
ഹയർസെക്കൻഡറി വിഭാഗം
ഒന്നാം സ്ഥാനം: ശ്രീന.എസ്.എസ്. (ജി.ജി.എച്ച്.എച്ച്.എസ്.ആറ്റിങ്ങൽ)
രണ്ടാം സ്ഥാനം: അമൽ. എ.എം (ജി.എം.ബി.എച്ച്.എച്ച്.എസ്. ആറ്റിങ്ങൽ)
മൂന്നാം സ്ഥാനം: അശ്വിൻ.വി.ജെ.(ജി.എച്ച്.എച്ച്.എസ്. വെഞ്ഞാറമൂട്)
by Midhun HP News | Oct 3, 2022 | Latest News, കേരളം, ജില്ലാ വാർത്ത
മുംബൈ: ദക്ഷിണാഫ്രിക്കക്കെതിരായ ഏകദിന പരമ്പരയ്ക്കുള്ള ഇന്ത്യന്‍ ടീമിനെ പ്രഖ്യാപിച്ചു. സഞ്ജു സാംസണ്‍ ടീമില്‍ ഇടംപിടിച്ചു. ശിഖര്‍ ധവാനാണ് ഇന്ത്യന്‍ ടീം നായകന്‍. മറുനാടന്‍ മലയാളിയായ ശ്രേയസ്സ് അയ്യരാണ് ടീമിന്റെ ഉപനായകന്‍. സഞ്ജുവിന് പുറമേ വിക്കറ്റ് കീപ്പറായി യുവതാരം ഇഷാന്‍ കിഷനും ടീമിലുണ്ട്. 16 അംഗ ടീമിനെയാണ് ബിസിസിഐ പ്രഖ്യാപിച്ചിരിക്കുന്നത്. ഇന്ത്യയുടെ ട്വന്റി 20 ലോകകപ്പ് ടീമില്‍ ഉള്‍പ്പെട്ട ആരും തന്നെ ഏകദിന പരമ്പരയ്ക്കുള്ള ടീമിലില്ല.
ട്വന്റി20 ലോകകപ്പിനായി ഒക്ടോബര്‍ ആറിന് ഓസ്‌ട്രേലിയയിലേക്കു പോകും. ഈ സാഹചര്യത്തിലാണ് ഇന്ത്യ യുവനിരയെ കളത്തിലിറക്കുന്നത്. ഒക്ടോബര്‍ ആറിന് ലക്‌നൗവിലാണ് ആദ്യ ഏകദിനം. ഒമ്പതിന് റാഞ്ചിയില്‍ രണ്ടാം മത്സരവും 11ന് ഡല്‍ഹിയില്‍ മൂന്നാം ഏകദിനവും നടക്കും.
ഇന്ത്യൻ ടീം: ശിഖർ ധവാൻ(ക്യാപ്റ്റൻ), ശ്രേയസ് അയ്യർ(വൈസ് ക്യാപ്റ്റൻ), ഋതുരാജ് ഗെയ്ക്വാദ്, ശുഭ്മാൻ ഗിൽ, രജത് പട്ടീദാർ, രാഹുൽ ത്രിപാഠി, ഇഷാൻ കിഷാൻ( വിക്കറ്റ് കീപ്പർ), സഞ്ജു സാംസൺ(വിക്കറ്റ് കീപ്പർ), ഷഹ്ബാസ് അഹമദ്, ശാർദുൽ ഠാക്കൂർ, കുൽദീപ് യാദവ്, രവി ബിഷ്ണോയി, മുകേഷ് കുമാർ, ആവേഷ് ഖാൻ, മുഹമ്മദ് സിറാജ്, ദീപക് ചാഹർ.
by Midhun HP News | Oct 3, 2022 | Latest News, കേരളം, ജില്ലാ വാർത്ത
ദുബായ്: അറ്റ്ലസ് ഗ്രൂപ്പ്‌ ചെയർമാൻ അറ്റ്ലസ് രാമചന്ദ്രന് അന്തരിച്ചു. പ്രവാസി വ്യാപാരിയും ചലച്ചിത്ര നിര്‍മാതാവുമായ രാമചന്ദ്രന് 80 വയസായിരുന്നു. ഹൃദയാഘാതത്തെ തുടർന്ന് ഞായറാഴ്ച രാത്രിയാണ് മരണം. ശനിയാഴ്ച രാത്രി നെഞ്ചുവേദന അനുഭവപ്പെട്ടതിനെ തുടര്‍ന്നാണ് അദ്ദേഹത്തെ ദുബായ് ആസ്റ്റര്‍ മന്‍ഖൂള്‍ ആശുപത്രിയില്‍ പ്രവേശിപ്പിച്ചത്. ഏറെനാളായി വാര്‍ധക്യസഹജമായ അസുഖങ്ങള്‍ അദ്ദേഹത്തെ അലട്ടിയിരുന്നു. എങ്കിലും പുതിയ ബിസിനസ് സംരംഭങ്ങള്‍ ആരംഭിക്കാനുള്ള തയ്യാറെടുപ്പിലായിരുന്നു അദ്ദേഹം. കഴിഞ്ഞ ഓഗസ്റ്റില്‍ ദുബായിലെ വസതിയില്‍ സുഹൃത്തുക്കളും ബന്ധുക്കളും ചേര്‍ന്നാണ് എണ്‍പതാം പിറന്നാള്‍ ആഘോഷിച്ചത്. അന്ത്യകർമ്മങ്ങൾ തിങ്കളാഴ്ച വൈകീട്ട് ദുബായിൽ നടക്കും.
ജനകോടികളുടെ വിശ്വസ്ത സ്ഥാപനം എന്ന പരസ്യവാക്കിലൂടെയാണ് അറ്റ്ലസ് രാമചന്ദ്രൻ മലയാളികളുടെ മനസിൽ ഇടം പിടിക്കുന്നത്. തൊട്ടതെല്ലാം പൊന്നാക്കിയ സ്വര്‍ണാഭരണ വ്യവസായി എന്ന നിലയില്‍ സുപ്രസിദ്ധനായിരുന്നു എം എം രാമചന്ദ്രന്. എന്നാൽ അതിനിടെ കടക്കെണിയിൽപ്പെട്ടതാണ് അദ്ദേഹത്തിന്റെ ജീവിതം മാറ്റിയത്. വിവിധ ബാങ്കുകളില്‍ നിന്നായി എടുത്ത 55 കോടിയിലേറെ ദിര്‍ഹത്തിന്‍റെ വായ്പ തിരിച്ചടയ്ക്കുന്നതില്‍ വീഴ്ച വന്നതിനേത്തുടര്‍ന്ന് 2015 ഓഗസ്റ്റില്‍ അറസ്റ്റിലായിരുന്നു. ദുബായ് കോടതി അറ്റ്ലസ് രാമചന്ദ്രന് മൂന്ന് വര്‍ഷത്തെ തടവ് ശിക്ഷ വിധിച്ചിരുന്നു. പ്രവാസികള്‍ക്കിടയിലെ മികച്ച സാംസ്കാരിക പ്രവര്‍ത്തകന്‍ കൂടിയായിരുന്നു അദ്ദേഹം. വൈശാലി വസ്തുഹാര സുകൃതം തുടങ്ങിയ സിനിമകൾ നിർമിച്ചു. അറബിക്കഥ, ഹരിഹർനഗർ ഉൾപ്പെടെ ഏതാനും സിനിമകളിലും അഭിനയിച്ചിട്ടുണ്ട്. തൃശൂര്‍ മുല്ലശ്ശേരി മധുക്കര സ്വദേശിയാണ്.
Recent Comments