by Midhun HP News | Sep 25, 2026 | Latest News, കേരളം
മഞ്ജു വാര്യർക്കെതിരെ ആരോപണങ്ങൾ ഉന്നയിച്ചുകൊണ്ട് സമരം തുടരുന്ന സംവിധായകൻ സനൽകുമാർ ശശിധരനെ വിമർശിച്ച് നടി മല്ലിക സുകുമാരൻ. സംഭവത്തിൽ മഞ്ജു എടുത്ത നീക്കത്തെ മല്ലിക സുകുമാരൻ അഭിനന്ദിക്കുകയും ചെയ്തു. എങ്ങനെയെങ്കിലുമൊക്കെ ജന മധ്യത്തിലൊരു സംസാര വിഷയമാകാനാണ് ഇതൊക്കെ ചെയ്യുന്നതെന്നും നടി പറഞ്ഞു.
വെറൈറ്റി മീഡിയ എന്ന യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു മല്ലിക സുകുമാരൻ. കഴിഞ്ഞ ദിവസമാണ് സനൽകുമാർ ശശിധരനെതിരെ മഞ്ജു വാര്യർ മാനനഷ്ടക്കേസ് നൽകിയത്. നിരന്തരമായി തന്നെ അപമാനിക്കുന്ന തരത്തിലുള്ള പോസ്റ്റുകളും പരാമർശങ്ങളും അപവാദപ്രചരണവും നടത്തുന്നെന്ന് ചൂണ്ടിക്കാട്ടി എറണാകുളം മുൻസിഫ് കോടതിയിലാണ് മഞ്ജു വാര്യർ മാനനഷ്ടക്കേസ് ഫയൽ ചെയ്തത്.
“മഞ്ജു വാര്യർ പ്രതികരിക്കണം എന്നൊരു സംഭവം കണ്ടു. എന്തോന്ന് പ്രതികരിക്കണം. അന്തസുള്ള പിള്ളേര് മിണ്ടാതിരിക്കുക. ഒരുത്തൻ കിടന്ന് എന്തോ വിചിത്ര സ്വഭാവമുള്ളവനായി പോയി, ഏതാണ്ടൊക്കെ പറയുന്നു, എടുക്കുന്നു. എവിടെയായിരുന്നു ഇയാള് ? . അതൊന്നും അനുവദിച്ചു കൊടുക്കരുത്. അവിടെയൊക്കെയാണ് ഞാൻ ഈ ജുഡീഷ്യറിയെ ബഹുമാനിക്കുന്നത്. വേറൊന്നും കൊണ്ടല്ല.
എന്തോ ആകട്ടെ. കല്യാണം കഴിഞ്ഞ് അവരുടെ മകൾ ഒരു ഡോക്ടറായി, എല്ലാമായി. ഇത്രയും കാലമില്ലാത്ത പോലെ വായ കെട്ടിവച്ചിരിക്കുകയാണെന്നൊക്കെ പറഞ്ഞ് ഒരുത്തൻ സെക്രട്ടറിയേറ്റിന് മുന്നിൽ ചെന്ന് നാല് ബൊമ്മയെടുത്ത് വച്ചിരിക്കുകയാണ്. ഞങ്ങൾക്ക് വേണേൽ സ്റ്റാച്യു റോഡ് മൊത്തം വയ്ക്കാനുള്ള അവാർഡുകൾ എന്റെ വീട്ടിലിരിപ്പുണ്ട്.
എങ്ങനെയെങ്കിലുമൊക്കെ ജന മധ്യത്തിലൊരു സംസാര വിഷയമാകാനാണ് ഇതൊക്കെ. ഇവൻ മാന്യനാണെങ്കിൽ ഇങ്ങനെയൊക്കെ കാണിക്കുമോ ?. സെക്രട്ടറിയേറ്റ് നടയിലൊക്കെ പോയി ഇരുന്നിട്ട്. എനിക്കറിയാൻ മേലാഞ്ഞിട്ട് ഞാൻ ചോദിക്കുവാ. അങ്ങനെയാണെങ്കിൽ എനിക്ക് ആരെയെങ്കിലുമൊക്കെ കുറിച്ച് എന്തെല്ലാം പറയാം.
സത്യങ്ങളെന്തെല്ലാം നമ്മുടെയൊക്കെ മനസിൽ കിടക്കുന്നു. നമ്മാളാരെങ്കിലും എന്തെങ്കിലും പറയാറുണ്ടോ ?. എന്തിനാ. ഓരോരുത്തർ കുടുംബമായിട്ട് കഴിയുന്നു. നമ്മളെ പറഞ്ഞോട്ടേ. അവരവരുടെ കുടുംബവുമായി സമാധാനമായിട്ട് കഴിയട്ടേ, മക്കളും മരുമക്കളും കൊച്ചുമക്കളുമൊക്കെയായിട്ട്. മിണ്ടാതിരിക്കുക. ഒരുപക്ഷേ നമ്മളോട് ദേഷ്യം തോന്നിയാൽ, തോന്നിക്കോട്ടേ.
അതിലൊന്നും നമുക്ക് വിരോധമില്ല. പക്ഷേ, അറിഞ്ഞു കൊണ്ട് ഒരു കുടുംബത്തെ വേദനിപ്പിക്കുക എന്ന് പറയുന്നതൊന്നും ഒരു ദൈവത്തിന്റെ മുൻപിലും മാപ്പ് കിട്ടുന്ന പരിപാടിയല്ല. അപ്പോൾ, അങ്ങനെയുള്ളവർ നിരന്തരം മാനസിക പ്രശ്നങ്ങൾ അനുഭവിച്ചു കൊണ്ടിരിക്കും. അതിലൊന്നായിരിക്കും ഇത്. അതിന്റെ ഇടയ്ക്ക് ചില ആർട്ടിസ്റ്റുകൾ, ഇത് പ്രതികരിക്കേണ്ടതാണ്, ഇങ്ങനെ നിശബ്ദയായിട്ട് ഇരിക്കേണ്ടതാണ് എന്നൊക്കെ പറഞ്ഞു വന്നു.
എന്തൊരു വൃത്തിക്കെട്ട കാര്യത്തിനാണ് ഇതൊക്കെ. മിടുക്കി, എനിക്ക് മഞ്ജു വാര്യരെ കണ്ടാൽ ഒന്ന് കെട്ടിപിടിച്ച് അഭിനന്ദിക്കണമെന്നുണ്ട്. മിടുക്കി, അവൾ കേസ് കൊടുത്തു. എനിക്ക് ജൂഡീഷ്യറിയോട് ഒന്നേ പറയാനുള്ളൂ, ഞങ്ങൾക്കെല്ലാം ആശ്രയമെന്ന് പറയുന്നത് ഇവിടുത്തെ നിയമവ്യവസ്ഥിതിയാണ്. അതിനകത്ത് നിന്നുകൊണ്ട് തെറ്റുകാരൻ ആരായാലും ശിക്ഷിക്കപ്പെടണം.
തെറ്റ് ചെയ്തില്ലെങ്കിൽ അരുത്. പക്ഷേ അത് ചുമ്മാ പറയരുത്. അത് സാധാരണക്കാർക്ക് ബോധ്യമാകണം. കൃത്യമായിട്ടുള്ള ശിക്ഷാവിധികൾ നടപ്പിലാക്കിയെങ്കിലേ വരും തലമുറക്കെങ്കിലും ഒരു പേടി വരുകയുള്ളൂ. പേടി വന്നെങ്കിൽ അല്ലേ തെറ്റുകൾ കുറയുകയുള്ളൂ”. – മല്ലിക സുകുമാരൻ പറഞ്ഞു.
by Midhun HP News | Sep 25, 2026 | Latest News, കേരളം
കൊച്ചി: കൊച്ചി നഗരത്തിലെ ഗതാഗതത്തിരക്കേറിയ റോഡുകള്‍ക്ക് പകരം, യാത്രക്കാര്‍ക്കും വിനോദസഞ്ചാരികള്‍ക്കും ഫോര്‍ട്ട് കൊച്ചിയില്‍ നിന്നും മഹാരാജാസ് കോളജിലേക്കും തിരിച്ചും റോപ് വേയിലൂടെ സഞ്ചരിക്കാന്‍ സാധിച്ചാലോ?. അത്തരമൊരു നിര്‍ദേശവുമായി രംഗത്തെത്തിയിരിക്കുകയാണ് ഡല്‍ഹി മെട്രോ മാനേജിങ് ഡയറക്ടറായ മെട്രോമാന്‍ ഇ ശ്രീധരന്‍. കെഎംആര്‍എല്‍ മാനേജിങ് ഡയറക്ടര്‍ക്ക് അയച്ച കത്തിലാണ് ആര്‍ബന്‍ റോപ് വേ സംവിധാനം കൊച്ചിക്ക് ആവശ്യമാണെന്ന് ഇ ശ്രീധരന്‍ വ്യക്തമാക്കിയത്.
കൊച്ചി നഗരത്തിന്റെ ഭാവി പൊതുഗതാഗത സംവിധാനങ്ങളെക്കുറിച്ച് ആലോചിക്കുമ്പോള്‍, ഗതാഗതക്കുരുക്കുകളില്‍ നിന്നും രക്ഷപ്പെടാന്‍ ഫോര്‍ട്ട് കൊച്ചിയില്‍ നിന്ന് മട്ടാഞ്ചേരിയും വില്ലിംഗ്ടണ്‍ ഐലന്‍ഡും വഴി മഹാരാജാസ് കോളജിലേക്ക് ഒരു ‘അര്‍ബന്‍ റോപ് വേ’ സ്ഥാപിക്കണമെന്ന ആശയമാണ് ഇ. ശ്രീധരന്‍ മുന്നോട്ടുവെച്ചിട്ടുള്ളത്. കെഎംആര്‍എല്‍ മാനേജിങ് ഡയറക്ടര്‍ക്ക് വ്യാഴാഴ്ചയാണ് ഇ ശ്രീധരന്‍ ഇക്കാര്യം ചൂണ്ടിക്കാട്ടി കത്തയച്ചത്.
‘മണിക്കൂറില്‍ 5,000 മുതല്‍ 6,000 വരെ യാത്രക്കാര്‍ക്ക് സഞ്ചരിക്കാന്‍ കഴിയുമെന്നതും, മെട്രോ സംവിധാനം സ്ഥാപിക്കാന്‍ ആവശ്യമായ വീതി റോഡുകള്‍ക്കില്ല എന്നതും അര്‍ബന്‍ റോപ് വേകളെ കൂടുതല്‍ അനുയോജ്യമായ മാര്‍ഗ്ഗമാക്കി മാറ്റുന്നു.’ കത്തില്‍ ഇ ശ്രീധരന്‍ അഭിപ്രായപ്പെട്ടു. മെട്രോ സംവിധാനത്തിനുള്ള ചെലവിന്റെ മൂന്നിലൊന്ന് തുക മാത്രമേ റോപ് വേ സംവിധാനത്തിന് ആവശ്യമായി വരൂ എന്നും അദ്ദേഹം കൂട്ടിച്ചേര്‍ത്തു.
ബൊളീവിയ, മെക്‌സിക്കോ എന്നിവിടങ്ങളിലെയും അടുത്തിടെ പൂര്‍ത്തിയായ വാരണാസിയിലെയും റോപ് വേ സംവിധാനങ്ങളെ ഉദാഹരണമായി കത്തില്‍ ചൂണ്ടിക്കാട്ടിയിട്ടുണ്ട്. ഇത്തരം സംവിധാനങ്ങള്‍ വിജയകരമാണെന്ന് തെളിയിക്കപ്പെട്ടിട്ടുണ്ടെന്ന് അദ്ദേഹം പറഞ്ഞു.
കൊച്ചിയില്‍ മൂന്നാമതൊരു മെട്രോ ലൈന്‍ സ്ഥാപിക്കുന്നതിനെക്കുറിച്ച് തീരുമാനമെടുക്കുന്നതിന് മുന്‍പ്, വാരണാസിയിലെ റോപ് വേ സംവിധാനം നേരിട്ട് കണ്ട് പഠിക്കാന്‍ കെഎംആര്‍എല്‍-ന്റെ സാങ്കേതിക വിഭാഗം ഡയറക്ടറെ അങ്ങോട്ടേക്ക് അയക്കണമെന്ന് ശ്രീധരന്‍ നിര്‍ദ്ദേശിച്ചു. ബൊളീവിയയിലും മെക്‌സിക്കോയിലും സമാനമായ സന്ദര്‍ശനങ്ങള്‍ നടത്തണമെന്നും അദ്ദേഹം ശുപാര്‍ശ ചെയ്തു.
നെടുമ്പാശ്ശേരി വഴി ആലുവ-അങ്കമാലി മെട്രോ പാത നീട്ടാനുള്ള നിര്‍ദ്ദേശത്തോട് ശ്രീധരന്‍ വിയോജിക്കുന്നു. ഈ പദ്ധതി അഭികാമ്യമല്ല എന്നാണ് ശ്രീധരന്‍ അഭിപ്രായപ്പെട്ടത്. വിമാനത്താവളത്തെ ബന്ധിപ്പിക്കാന്‍ മറ്റ് റെയില്‍ സംവിധാനങ്ങള്‍ കൂടി ആസൂത്രണം ചെയ്തിട്ടുള്ളതിനാല്‍, മെട്രോ പാത നീട്ടുന്നത് യാത്രക്കാരുടെ എണ്ണത്തിന്റെ കാര്യത്തില്‍ വലിയ വെല്ലുവിളി നേരിട്ടേക്കാം. പകരം, ദേശീയപാത ബൈപാസിലൂടെ അരൂരില്‍ നിന്ന് ഇടപ്പള്ളി വഴി വരാപ്പുഴയിലേക്ക് ഒരു എലിവേറ്റഡ് മെട്രോ ലൈന്‍ സ്ഥാപിക്കുന്ന കാര്യം പരിഗണിക്കണമെന്ന് ഇ ശ്രീധരന്‍ കെഎംആര്‍എല്ലിനോട് നിര്‍ദ്ദേശിച്ചു.
നെടുമ്പാശ്ശേരി വിമാനത്താവളത്തില്‍ ദക്ഷിണ റെയില്‍വേ ആരംഭിക്കുന്ന പുതിയ റെയില്‍വേ സ്റ്റേഷനും, തൃപ്പൂണിത്തുറയില്‍ നിന്നും പാലാരിവട്ടത്ത് നിന്നും വിമാനത്താവളത്തിലേക്ക് ഡല്‍ഹി മെട്രോ റെയില്‍ കോര്‍പ്പറേഷന്‍ (DMRC) നിര്‍ദ്ദേശിച്ചിട്ടുള്ള അതിവേഗ റെയില്‍ പാതയും ശ്രീധരന്‍ കത്തില്‍ ചൂണ്ടിക്കാട്ടി. അതിവേഗ പാതയില്‍ യാത്രയ്ക്ക് 10 മിനിറ്റ് സമയം മാത്രമേ എടുക്കൂ. ഏകദേശം 100 രൂപയായിരിക്കും യാത്രാക്കൂലി. ഈ രണ്ട് അധിക സൗകര്യങ്ങളും നിലവില്‍ വന്നാല്‍ മെട്രോ പാതയില്‍ യാത്രക്കാര്‍ ഉണ്ടാകില്ല എന്നതാണ്, ആലുവ-അങ്കമാലി മെട്രോ നീട്ടല്‍ അനാവശ്യമാണെന്ന് പറയുന്നതിനുള്ള കാരണമായി ശ്രീധരന്‍ ചൂണ്ടിക്കാട്ടുന്നത്.
വിമാനത്താവളത്തിലേക്കുള്ള മെട്രോ കണക്റ്റിവിറ്റിയുടെ സാമ്പത്തിക ലാഭക്ഷമതയെക്കുറിച്ചും ശ്രീധരന്‍ ആശങ്ക പ്രകടിപ്പിച്ചു. 60,000-ത്തിലധികം യാത്രക്കാര്‍ ഉണ്ടായിരുന്നിട്ടും, വിമാനത്താവളം ബന്ധിപ്പിച്ചുകൊണ്ടുള്ള മെട്രോ പാത പ്രവര്‍ത്തന ലാഭം നേടിയിരുന്നില്ലെന്ന്, ഡിഎംആര്‍സിയിലെ പ്രവര്‍ത്തന അനുഭവം ചൂണ്ടിക്കാട്ടി ശ്രീധരന്‍ പറയുന്നു.
‘സിവില്‍, ട്രാക്ക് ജോലികള്‍ക്കുള്ള മുഴുവന്‍ തുകയും DMRC ആണ് വഹിച്ചിരുന്നത്; ട്രെയിനുകള്‍ (റോളിംഗ് സ്റ്റോക്ക്), സിഗ്‌നലിംഗ്-ടെലികോം (S&T), ഓവര്‍ഹെഡ് ഇലക്ട്രിഫിക്കേഷന്‍ (OHE) എന്നിവയ്ക്കുള്ള ചെലവ് മാത്രമാണ് ഓപ്പറേറ്റര്‍ വഹിച്ചത്. എന്നിട്ടും ഡിഎംആര്‍സിക്ക് പ്രവര്‍ത്തന ലാഭം നേടാനായില്ല. അതുകൊണ്ടു തന്നെ വിമാനത്താവളത്തിലേക്കുള്ള മെട്രോ പാത നീട്ടല്‍ കെഎംആര്‍എല്ലിന് വലിയ സാമ്പത്തിക ബാധ്യതയായിരിക്കും.’ ശ്രീധരന്‍ പറഞ്ഞു.
പകരം, കൊച്ചിയുടെ മൂന്നാമത്തെ മെട്രോ പാതയായി, ദേശീയപാത ബൈപ്പാസ് വഴി അരൂരില്‍ നിന്ന് ഇടപ്പള്ളിയിലൂടെ വരാപ്പുഴയിലേക്ക് ഉയര പാതയിലുള്ള (elevated) ഒരു മെട്രോ ഇടനാഴി നിര്‍മ്മിക്കണമെന്ന് ശ്രീധരന്‍ നിര്‍ദ്ദേശിച്ചു. ഈ കത്തിന്റെ പകര്‍പ്പ് ഇ ശ്രീധരന്‍ ഗതാഗത വകുപ്പ് സെക്രട്ടറിക്കും അയച്ചിട്ടുണ്ട്.
by Midhun HP News | Sep 25, 2026 | Latest News, കേരളം
തൃശൂര്‍: ഗുരുവായൂര്‍ ക്ഷേത്ര ദര്‍ശനത്തിനുള്ള ഒക്ടോബര്‍ മാസത്തെ വെര്‍ച്വല്‍ ക്യൂ ബുക്കിങ് ഇന്നു മുതല്‍ നടത്താം. ബുക്കിങ് ഇന്ന് രാവിലെ 10 മണി മുതല്‍ ആരംഭിക്കുമെന്ന് ദേവസ്വം അധികൃതര്‍ അറിയിച്ചു. ചൊവ്വ, വ്യാഴം, ശനി ദിവസങ്ങളില്‍ ദിവസം 2400 പേര്‍ക്കാണ് വെര്‍ച്വല്‍ ക്യൂ സൗജന്യമായി ബുക്ക് ചെയ്യാന്‍ അവസരമുള്ളത്.
ഒറ്റപ്രാവശ്യം ബുക്ക് ചെയ്യുമ്പോള്‍ പരമാവധി 6 പേരുടെ വിവരങ്ങള്‍ ചേര്‍ക്കാം. ഒരു സ്ലോട്ടില്‍ 300 പേര്‍ വീതം എട്ടു സ്ലോട്ടുകളില്‍ ഭക്തരെ പ്രവേശിപ്പിക്കും. രാവിലെ 7 മുതല്‍ ഉച്ചയ്ക്ക് ഒരു മണി വരെ ആറു സ്ലോട്ടുകളും, വൈകീട്ട് 4 നും 5 നും രണ്ടു സ്ലോട്ടുകളുമാണുള്ളത്.
വെര്‍ച്വല്‍ ക്യൂ ഉള്ള ദിവസങ്ങളില്‍ സാധാരണ ക്യൂ നിന്നുള്ള ദര്‍ശനവും മുതിര്‍ന്ന പൗരന്മാര്‍ക്കുള്ള പ്രത്യേക ദര്‍ശനവും നെയ് വിളക്ക് ബുക്ക് ചെയ്തുള്ള ദര്‍ശനവും ഉണ്ടാകും. ഗുരുവായൂര്‍ ദേവസ്വത്തിന്റെ guruvayurdevaswom.in എന്ന വെബ്‌സൈറ്റിലാണ് ബുക്ക് ചെയ്യേണ്ടത്. വെബ്സൈറ്റിലെ ‘ഫ്രീ ദർശൻ’ വിഭാഗത്തിലൂടെ ഓൺലൈൻ ബുക്കിങ് സൗകര്യം ലഭ്യമാണ്.
by Midhun HP News | Sep 25, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ നേരിയ വര്‍ധന. ഇന്ന് പവന് 120 രൂപയാണ് കൂടിയത്. 1,12,080 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 15 രൂപയാണ് കൂടിയത്. 14,010 രൂപയാണ് ഒരു ഗ്രാം സ്വര്‍ണത്തിന്റെ വില.
ഡോളര്‍ ശക്തിയാര്‍ജിച്ചതും പണപ്പെരുപ്പനിരക്ക് കുറയ്ക്കാന്‍ യുഎസ് ഫെഡറല്‍ റിസര്‍വ് പലിശനിരക്ക് കൂട്ടിയതും അമേരിക്കന്‍ സമ്പദ് വ്യവസ്ഥ ഉണര്‍വിലാണ് എന്ന റിപ്പോര്‍ട്ടുകളും എണ്ണവിലയിലെ മാറ്റങ്ങളുമാണ് സ്വര്‍ണവിലയില്‍ പ്രതിഫലിക്കുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Sep 25, 2026 | Latest News, കേരളം
തിരുവനന്തപുരം: ചരിത്രത്തിലെ ഏറ്റവും ഉയർന്ന തുകയായ 30 കോടി രൂപ ഒന്നാം സമ്മാനമായി നൽകുന്ന തിരുവോണം ബമ്പർ ഭാഗ്യക്കുറി 2026-ന്റെ നറുക്കെടുപ്പ് നാളെ തിരുവനന്തപുരം ഗോർഖി ഭവനിൽ നടക്കും. ഉച്ചയ്ക്ക് 1.30-ന് നടക്കുന്ന പ്രൗഢഗംഭീരമായ ചടങ്ങിൽ ആരോഗ്യ, ദേവസ്വം വകുപ്പ് മന്ത്രി കെ. മുരളീധരൻ നറുക്കെടുപ്പ് ഉദ്ഘാടനം ചെയ്യും. അതോടൊപ്പം ഈ വർഷത്തെ പൂജ ബമ്പർ 2026 ഭാഗ്യക്കുറി ടിക്കറ്റിന്റെ ഔദ്യോഗിക പ്രകാശനവും മന്ത്രി നിർവ്വഹിക്കും.
സംസ്ഥാന ഭാഗ്യക്കുറി വകുപ്പിന്റെ ചരിത്രത്തിൽ ആദ്യമായാണ് ഒന്നാം സമ്മാനത്തുക 30 കോടി രൂപയായി ഉയർത്തിയത്. ഈ റെക്കോർഡ് സമ്മാനത്തുക ജനങ്ങൾക്കിടയിൽ വലിയ തരംഗമാണ് സൃഷ്ടിച്ചത്. തിരുവോണം ബമ്പറിനായി ആകെ അച്ചടിച്ച 90 ലക്ഷം ടിക്കറ്റുകളിൽ 89.85 ലക്ഷം ടിക്കറ്റുകളും ഇതിനകം വിറ്റഴിഞ്ഞു കഴിഞ്ഞു. അവശേഷിക്കുന്ന വിരലിലെണ്ണാവുന്ന ടിക്കറ്റുകൾ കൂടി ഇന്നത്തോടെ പൂർണ്ണമായും വിറ്റുതീരുമെന്നാണ് അധികൃതർ വ്യക്തമാക്കുന്നത്.
ഗോർഖി ഭവനിൽ നടക്കുന്ന ചടങ്ങിൽ ഭാഗ്യക്കുറി വകുപ്പ് ഡയറക്ടർ അഞ്ജു കെ.എസ്. അധ്യക്ഷത വഹിക്കും. കാട്ടാക്കട എംഎൽഎ എം.ആർ. ബൈജു, നികുതി വകുപ്പ് അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ, നികുതി വകുപ്പ് സ്പെഷ്യൽ സെക്രട്ടറി എൻ. പ്രശാന്ത് എന്നിവർ വിശിഷ്ടാതിഥികളായി സംസാരിക്കും. ചടങ്ങിൽ ഭാഗ്യക്കുറി വകുപ്പ് ജോയിന്റ് ഡയറക്ടർ ഷാജു പി.എ. സ്വാഗതവും ജോയിന്റ് ഡയറക്ടർ അനിൽകുമാർ കെ.എസ്. കൃതജ്ഞതയും രേഖപ്പെടുത്തും. ഒന്നാം സമ്മാനം നേടുന്ന കോടീശ്വരൻ ആരാണെന്ന ആകാംക്ഷയിലാണ് ഭാഗ്യാന്വേഷികൾ.
by Midhun HP News | Sep 24, 2026 | Latest News, കേരളം
കൊച്ചി: അര്‍ജന്റീന ഫുട്‌ബോള്‍ ഇതിഹാസം മെസിയെ കേരളത്തില്‍ കൊണ്ടുവരാമെന്ന പേരിലെ തട്ടിപ്പ് കേസില്‍ റെയ്ഡിനിടെ പിടിച്ചെടുത്ത ഡോളര്‍ തിരികെ വേണമെന്ന ആവശ്യവുമായി റിപ്പോര്‍ട്ടര്‍ ടി വി മാനേജിങ് എഡിറ്റര്‍ ആന്റോ അഗസ്റ്റിന്‍. ആവശ്യവുമായി കോടതിയെ സമീപിക്കാനാണ് നീക്കം. എന്നാല്‍ ഈ ഡോളര്‍ ഇപ്പോള്‍ തിരികെ നല്‍കാനാകില്ലെന്ന നിലപാടിലാണ് പ്രത്യേക അന്വേഷണസംഘം. ഡോളര്‍ കണ്ടെത്തിയതില്‍ ഉള്‍പ്പെടെ വിശദമായ പരിശോധനകള്‍ വേണ്ടിവരുമെന്നാണ് എസ്‌ഐടിയുടെ വിശദീകരണം.
റിപ്പോര്‍ട്ടര്‍ ടിവിയുടെ ആസ്ഥാനം റെയ്ഡ് ചെയ്തപ്പോഴാണ് 6300 ഡോളറോളം അന്വേഷണസംഘം കണ്ടെടുത്തത്. ഡോളര്‍ സംബന്ധിച്ച് എന്‍ഫോഴ്‌സ്‌മെന്റ് ഡയറക്ടറേറ്റിനും ആദായനികുതി വകുപ്പിനും അന്വേഷണസംഘം റിപ്പോര്‍ട്ടും നല്‍കിയിരുന്നു. ഇതിന്റെ പരിശോധനകള്‍ അടക്കം നടന്നുകൊണ്ടിരിക്കെ ഡോളര്‍ തിരികെ നല്‍കാനാകില്ലെന്നാണ് എസ്‌ഐടി റിപ്പോര്‍ട്ട് പറയുന്നത്. ഡോളറിന്റെ സോഴ്‌സും പരിശോധിച്ച് വരികയാണ്. ഇത് എവിടെ നിന്ന് വന്നു എന്നതിന് ഇതുവരെ ഉത്തരം ലഭിച്ചിട്ടില്ല.
മെസിയെ കേരളത്തിലെത്തിക്കാമെന്ന പേരില്‍ തട്ടിപ്പ് നടത്തിയ കേസിലെ ആന്റോ അഗസ്റ്റിന്റെ മുന്‍കൂര്‍ ജാമ്യപേക്ഷ എറണാകുളം പ്രിന്‍സിപ്പല്‍ സെഷന്‍സ് കോടതി ഇന്ന് പരിഗണിക്കും. കേസില്‍ ഒന്നാം പ്രതിയാണ് ആന്റോ അഗസ്റ്റിന്‍. റെയ്ഡിന് പിന്നാലെ ആന്റോയേ ചോദ്യം ചെയ്യാന്‍ എസ്‌ഐടി തയ്യാറെടുക്കുന്നതിനിടയിലാണ് മുന്‍കൂര്‍ ജാമ്യപേക്ഷയുമായി ഹൈക്കോടതിയെ സമീപിച്ചത്. റിപ്പോര്‍ട്ടര്‍ ബ്രോഡ് കാസ്റ്റിങ് കമ്പനിയാണ് കേസിലെ രണ്ടാം പ്രതി.
Recent Comments