by Midhun HP News | Sep 16, 2026 | Latest News, കേരളം
കൊച്ചി: മാത്യു കുഴല്‍നാടന്‍ എംഎല്‍എയുടെ നിര്‍മ്മാണത്തിലിരുന്ന വീട്ടില്‍നിന്ന് ഇലക്ട്രിക് വയറുകള്‍ മോഷ്ടിച്ച കേസില്‍ പ്രതി പിടിയില്‍. മുര്‍ഷിദാബാദ് സ്വദേശി ബിഷ്ണു മണ്ഡലാണ് പിടിയിലായത്. സംഭവത്തില്‍ കൂടുതല്‍ പേര്‍ക്ക് പങ്കുണ്ടോ എന്ന് അന്വേഷിച്ചു വരികയാണെന്ന് പൊലീസ് സൂചിപ്പിച്ചു.
പൈങ്ങോട്ടൂര്‍ ആയങ്കരയിലെ വീട്ടില്‍ ഞായറാഴ്ചയായിരുന്നു മോഷണം നടന്നത്. സംഭവ സമയത്ത് വീട്ടുകാരോ തൊഴിലാളികളോ സ്ഥലത്തുണ്ടായിരുന്നില്ല. വീടിന്റെ നിര്‍മ്മാണ ആവശ്യങ്ങള്‍ക്കായി എത്തിച്ചിരുന്ന ഇലക്ട്രിക് വയറുകളാണ് പ്രതി മോഷ്ടിച്ചത്. പ്രതി എത്തുന്നതിന്റെ സിസിടിവി ദൃശ്യങ്ങള്‍ പുറത്തു വന്നിരുന്നു.
50,000 രൂപയുടെ നഷ്ടം സംഭവിച്ചതായി മാത്യു കുഴല്‍നാടന്‍ എംഎല്‍എ പറഞ്ഞു. വിരലടയാള വിദഗ്ധര്‍, ശാസ്ത്രീയ പരിശോധക സംഘം എന്നിവര്‍ സ്ഥലത്തെത്തി പരിശോധന നടത്തിയിരുന്നു. പിടിയിലായ ബിഷ്ണു മണ്ഡല്‍ മുന്‍പും കവര്‍ച്ച കേസുകളില്‍ പ്രതിയാണെന്ന് പൊലീസ് വ്യക്തമാക്കി.
by Midhun HP News | Sep 16, 2026 | Latest News, കേരളം
തിരുവനന്തപുരം: മുഖ്യമന്ത്രി രണ്ടാം വിവാഹം നടത്തിയെന്ന വ്യാജരേഖയില്‍ പൊലീസ് കേസ് എടുക്കും. കോണ്‍ഗ്രസ് നേതാവ് രാജു പി നായര്‍ ഡിജിപിക്ക് നല്‍കിയ പരാതിയുടെ അടിസ്ഥാനത്തിലാണ് നടപടി. തിരുവനന്തപുരം സിറ്റി പൊലീസ് കമ്മീഷണര്‍ക്കാണ് നിര്‍ദേശം നല്‍കിയത്. വിവാഹ സര്‍ട്ടിഫിക്കറ്റ് കിട്ടിയെന്ന് ആന്റോ അഗസ്റ്റിന്‍ നേരത്തെ അവകാശപ്പെട്ടിരുന്നു.
മുഖ്യമന്ത്രിക്ക് എതിരെ വ്യാജരേഖകള്‍ ഉണ്ടാക്കി സര്‍ക്കാരിനെ അട്ടിമറിക്കാന്‍ ശ്രമിച്ചുവെന്നാണ് പരാതി. ആന്റോ അഗസ്റ്റിന്റെ കൈവശമുള്ള രേഖകള്‍ പിടിച്ചെടുക്കണമെന്നും പരാതിയില്‍ ആവശ്യപ്പെട്ടു. വ്യാജരേഖ ചമച്ച് കളവായ ആരോപണങ്ങളുന്നയിക്കുന്നത് സംശുദ്ധമായ രാഷ്ട്രീയജീവിതം നയിക്കുന്ന വിഡി സതീശന്റെ വ്യക്തിത്വത്തെ കളങ്കപ്പെടുത്തി മാനഹാനി വരുത്തുകയെന്ന ലക്ഷ്യത്തോടെയാണ്. സംഭവത്തിന് പിന്നിലെ ഗൂഢാലോചന അന്വേഷിക്കണമെന്നും യുവാക്കളെ കണ്ടെത്തണമെന്നും അഗസ്റ്റിന്റെ കൈവശമുണ്ടെന്ന് പറയപ്പെടുന്ന രേഖകള്‍ കണ്ടെടുക്കണമെന്നും ഡിജിപിക്ക് അയച്ച പരാതിയില്‍ ആവശ്യപ്പെടുന്നു.
ദിവസങ്ങള്‍ക്ക് മുന്‍പാണ് ആന്റോ അഗസ്റ്റിന്‍ ഒരു ചടങ്ങില്‍വച്ച് വെളിപ്പെടുത്തല്‍ നടത്തിയത്. മുഖ്യമന്ത്രി രണ്ടാം വിവാഹം രജിസ്റ്റര്‍ ചെയ്തതിന്റെ രേഖകള്‍ രണ്ട് യുവാക്കള്‍ കൊണ്ടുവന്നുവെന്നും കോടികള്‍ വിലമതിക്കുന്ന വാര്‍ത്തയായിരുന്നു അതെന്നുമായിരുന്നു ആന്റോയുടെ പരാമര്‍ശം. വിഡി സതീശന്റെ രണ്ടാം കല്യാണവുമായി ബന്ധപ്പെട്ട ചോദ്യത്തിനൊന്നും തന്റെ കൈയില്‍ മറുപടിയില്ലെന്ന് ആന്റോ അഗസ്റ്റിന്‍ മാധ്യമങ്ങളോടും പറഞ്ഞിരുന്നു. ‘മെസി വിവാദത്തിലെ എല്ലാ അന്വേഷണത്തിലും സഹകരിക്കും. അല്ലാതെ ഞങ്ങള്‍ക്ക് ആരാണ് വാര്‍ത്ത ചോര്‍ത്തി തരുന്നത്? എങ്ങനെയാണ് വാര്‍ത്ത ചെയ്യുന്നത്? കോണ്‍ഗ്രസില്‍ നിങ്ങളെ ആരെല്ലാം സപ്പോര്‍ട്ട് ചെയ്യുന്നുണ്ട്? എന്ന ചോദ്യങ്ങള്‍ക്ക് ഞങ്ങളുടെ കൈയില്‍ മറുപടിയില്ല. സത്യസന്ധമായ അന്വേഷണമാണ് നടത്തുന്നതെങ്കില്‍ ഈ നാടകത്തിന്റെ ആവശ്യമില്ല’- എന്നായിരുന്നു ആന്റോ അഗസ്റ്റിന്‍ മാധ്യമങ്ങളോട് പറഞ്ഞത്.
by Midhun HP News | Sep 16, 2026 | Latest News, കേരളം
കേരള അബ്കാരി നിയമപ്രകാരം ഒരാള്‍ക്ക് വീടുകളിലോ കൈവശമോ വയ്ക്കാവുന്ന മദ്യത്തിന്റെ അളവിന് വ്യക്തമായ പരിധിയുണ്ട്. അനുവദനീയമായ അളവില്‍ കൂടുതല്‍ മദ്യം കൈവശം വയ്ക്കുന്നത് ജാമ്യമില്ലാത്ത കുറ്റമാണ്. ലൈസന്‍സില്ലാതെ ഒരാള്‍ക്ക് വ്യക്തിഗത ആവശ്യത്തിനായി കൈവശം വയ്ക്കാവുന്ന മദ്യത്തിന്റെ പരിധി എക്‌സൈസ് വകുപ്പ് നിര്‍ണ്ണയിച്ചിട്ടുണ്ട്.
അനുവദനീയമായ മദ്യത്തിന്റെ അളവ്
ഇന്ത്യന്‍ നിര്‍മ്മിത വിദേശ മദ്യം (IMFL): 3 ലിറ്റര്‍
ബിയര്‍ (Beer): 3.5 ലിറ്റര്‍
വൈന്‍ (Wine): 3.5 ലിറ്റര്‍
കള്ള് (Toddy): 2.5 ലിറ്റര്‍
വിദേശ നിര്‍മ്മിത വിദേശ മദ്യം (FMFL): 2.5 ലിറ്റര്‍
ഒന്നില്‍ കൂടുതല്‍ ഇനം മദ്യങ്ങള്‍ കൈവശമുണ്ടെങ്കിലും ഓരോ ഇനത്തിന്റെയും പരമാവധി പരിധി ലംഘിക്കാന്‍ പാടില്ല.
ലംഘിച്ചാല്‍ ശിക്ഷ
അബ്കാരി നിയമത്തിലെ വിവിധ വകുപ്പുകള്‍ പ്രകാരം നിയമവിരുദ്ധമായി മദ്യം കൈവശം വയ്ക്കുന്നതിനും കടത്തുന്നതിനും കടുത്ത ശിക്ഷകളാണ് വ്യവസ്ഥ ചെയ്തിട്ടുള്ളത്. അനുവദനീയമായ അളവില്‍ കൂടുതല്‍ മദ്യം കൈവശം വയ്ക്കുകയോ വ്യാജ/ നികുതി വെട്ടിച്ച മദ്യം സൂക്ഷിക്കുകയോ ചെയ്യുന്നത് ജാമ്യമില്ലാത്ത കുറ്റമാണ്.
അനുവദനീയമായതില്‍ കൂടുതല്‍ അളവ് മദ്യം കൈവശം വയ്ക്കുകയോ കടത്തുകയോ ചെയ്യുന്നത് 10,000 രൂപ വരെ പിഴ അല്ലെങ്കില്‍ തടവുശിക്ഷ
നിയമവിരുദ്ധമായി മദ്യം ഇറക്കുമതി ചെയ്യുക, കയറ്റുമതി ചെയ്യുക, അനധികൃതമായി മദ്യം സൂക്ഷിക്കല്‍, കടത്തല്‍, അല്ലെങ്കില്‍ വില്‍പന ലക്ഷ്യമിട്ടുള്ള ശേഖരണം -10 വര്‍ഷം വരെ തടവും 1 ലക്ഷം രൂപ വരെ പിഴയും
ഇത്തരം കുറ്റകൃത്യങ്ങൾക്ക് ഉപയോഗിക്കുന്ന മദ്യം, പാത്രങ്ങൾ, നിർമ്മാണ സാമഗ്രികൾ, കടത്താൻ ഉപയോഗിച്ച വാഹനങ്ങൾ എന്നിവ കണ്ടുകെട്ടാൻ നിയമപ്രകാരം നടപടിയെടുക്കാം
ലൈസന്‍സില്ലാതെ മദ്യം വില്‍ക്കുകയോ വില്‍ക്കാന്‍ ശ്രമിക്കുകയോ ചെയ്യുന്നത് – 10 വര്‍ഷം വരെ തടവും 1 ലക്ഷം രൂപ വരെ പിഴയും
ശ്രദ്ധിക്കേണ്ട മറ്റ് കാര്യങ്ങള്‍
യാത്ര ചെയ്യുമ്പോള്‍: മറ്റ് സംസ്ഥാനങ്ങളില്‍ നിന്ന് വ്യക്തിഗത ആവശ്യത്തിനായി പോലും മദ്യം ലൈസന്‍സില്ലാതെ കേരളത്തിലേക്ക് കൊണ്ടുവരുന്നത് വകുപ്പ് 55(a) പ്രകാരം ഗുരുതര കുറ്റമാണ്.
സെയില്‍സ് ടാക്‌സ് / എക്‌സൈസ് പാസ്: ഔദ്യോഗിക ബെവ്‌കോ (BEVCO) ഔട്ട്ലെറ്റുകളില്‍ നിന്നോ കണ്‍സ്യൂമര്‍ഫെഡില്‍ നിന്നോ വാങ്ങുന്ന മദ്യത്തിന്റെ രസീത് കൈവശം വയ്ക്കുന്നത് നിയമപരമായ തെളിവാണ്. ഈ മദ്യങ്ങളെല്ലാം ബെവ്‌കോ വഴിയോ കണ്‍സ്യൂമര്‍ഫെഡ് വഴിയോ നിയമപരമായി വാങ്ങിയതാണെന്ന ബില്ലും കൈവശമുണ്ടായിരിക്കണം).
കേരളത്തില്‍ വീടുകളില്‍ സ്വന്തമായി ‘മിനി ബാര്‍’ അല്ലെങ്കില്‍ ‘ഹോം ബാര്‍’ സ്ഥാപിക്കുന്നതിന് അബ്കാരി നിയമത്തില്‍ ലൈസന്‍സ് വ്യവസ്ഥയില്ല. വീടുകളില്‍ മദ്യം സൂക്ഷിക്കുന്നതും ഉപയോഗിക്കുന്നതും മേല്‍പ്പറഞ്ഞ വ്യക്തിഗത പരിധിക്കുള്ളില്‍ മാത്രമായിരിക്കണം.
എന്നാല്‍ താഴെ പറയുന്ന ആവശ്യങ്ങള്‍ക്ക് പ്രത്യേക അനുമതികള്‍ (Permits/Licenses) ലഭ്യമാണ്.
താല്‍ക്കാലിക ബാര്‍ അനുമതി: വീടുകളിലോ ഓഡിറ്റോറിയങ്ങളിലോ നടക്കുന്ന വിവാഹം, ജന്മദിനാഘോഷങ്ങള്‍ തുടങ്ങിയ ചടങ്ങുകളില്‍ അതിഥികള്‍ക്ക് മദ്യം വിളമ്പണമെങ്കില്‍ എക്‌സൈസ് വകുപ്പില്‍ നിന്ന് താല്‍ക്കാലിക പെര്‍മിറ്റ് എടുക്കാം. ഇതിനായി നിശ്ചിത ഫീസ് അടച്ച് സര്‍ക്കിള്‍ എക്‌സൈസ് ഓഫീസില്‍ മുന്‍കൂട്ടി അപേക്ഷ നല്‍കണം.
ഹോട്ടലുകളിലെ മിനി ബാര്‍ (L-3/FL-3 Licenses): 3 സ്റ്റാറിന് മുകളിലുള്ള ഹോട്ടലുകളിലെ ഗസ്റ്റ് റൂമുകളില്‍ മിനി ബാര്‍ സ്ഥാപിക്കുന്നതിന് ലിക്കര്‍ ലൈസന്‍സുകള്‍ നല്‍കുന്നുണ്ട്. എന്നാല്‍ ഇത് വീടുകള്‍ക്ക് ബാധകമല്ല.
by Midhun HP News | Sep 16, 2026 | Latest News, കേരളം
തിരുവനന്തപുരം: തിരുവനന്തപുരത്ത് മൃഗശാല സ്ഥിതി ചെയ്യുന്ന സ്ഥലം മാഡിസൺ സ്ക്വയർ പോലെയോ പ്രാഗിലെ സ്ക്വയർ പോലെയോ അതിമനോഹരമായ ഒരു സ്ക്വയറാക്കി മാറ്റണമെന്ന നിർദേശവുമായി മുഖ്യമന്ത്രി വിഡി സതീശൻ. തലസ്ഥാന നഗരത്തിലേക്ക് എത്തുന്ന ആളുകൾ ചുരുങ്ങിയത് നാലു ദിവസമെങ്കിലും ഇവിടെ തങ്ങുന്ന സ്ഥിതിവിശേഷമുണ്ടാകണം. ആളുകളെ ആകർഷിക്കുന്ന പ്രധാന കേന്ദ്രമായി ഈ സ്ഥലത്തെ മാറ്റിയെടുക്കണം. ഇവിടെ സ്ഥിതി ചെയ്യുന്ന മൃഗശാല വനത്തോട് ചേർന്നുള്ള സ്ഥലത്തേക്ക് മാറ്റണമെന്നാണ് തന്റെ നിർദേശമെന്നും മുഖ്യമന്ത്രി വിഡി സതീശൻ അഭിപ്രായപ്പെട്ടു.
‘റീഇമാജിനിങ് കേരള’ പരിപാടിയുടെ ഉദ്ഘാടനച്ചടങ്ങിൽ സംസാരിക്കുകയായിരുന്നു മുഖ്യമന്ത്രി. തിരുവനന്തപുരം നഗരത്തിൽ പ്രവർത്തിക്കുന്ന മൃഗശാല അവിടെത്തന്നെ നിലനിർത്തേണ്ടതുണ്ടോയെന്ന് ചിന്തിക്കണം. അത് നെയ്യാറിലേക്കോ മറ്റോ മാറ്റിസ്ഥാപിക്കുകയാണ് വേണ്ടത്. മൃഗശാല നിലവിൽ നഗരമധ്യത്തിൽ പ്രവർത്തിക്കുന്നത് മൃഗങ്ങളോട് കാണിക്കുന്ന ക്രൂരതയാണ്. ഓരോ മൃഗത്തിനും അവരുടേതായ സ്വാഭാവിക വാസസ്ഥലമുണ്ട്. അതിനാൽ നെയ്യാർ പോലെയോ അല്ലെങ്കിൽ അതുപോലെയുള്ള മറ്റ് വനമേഖലകളിലേക്കോ മൃഗശാല മാറ്റുകയാണ് വേണ്ടതെന്നും മുഖ്യമന്ത്രി അഭിപ്രായപ്പെട്ടു.
തലസ്ഥാന നഗരത്തിലേക്ക് എത്തുന്ന ആളുകൾക്കുള്ള പ്രധാന കേന്ദ്രമായി ഈ സ്ഥലം മാറണം. തന്റെ സ്വപ്ന പദ്ധതിയാണിത്. ബജറ്റിൽ ഉൾപ്പെടാത്ത ഈ ആഗ്രഹം ആദ്യമായാണ് പൊതു ജനസമക്ഷം തുറന്നുപറയുന്നതെന്നും മുഖ്യമന്ത്രി കൂട്ടിച്ചേർത്തു. കേരള മോഡല്‍ എന്നൊക്കെ പറഞ്ഞ്, നമ്മള്‍ ഇപ്പോഴും പഴയ പ്രതാപത്തില്‍ ജീവിക്കുകയാണെന്ന് വിഡി സതീശന്‍ പറഞ്ഞു.
അതില്‍ നിന്നൊക്കെ മാറ്റം ഉണ്ടാകണം. ലോകം മാറുകയാണ്. വിജ്ഞാന വിപ്ലവം നടക്കുകയാണ്. ഫ്യൂച്ചര്‍ ടെക്‌നോളജീസ് പലസ്ഥലത്തും കീഴടക്കുകയാണ്. സര്‍ക്കാര്‍ പരമ്പരാഗത വഴിയിലൂടെ സഞ്ചരിച്ചാല്‍ വണ്ടി പോകും മുമ്പോട്ട്, പക്ഷെ വണ്ടി എവിടെയെങ്കിലും പോയി ഇടിച്ചു നില്‍ക്കുമെന്നും മുഖ്യമന്ത്രി വ്യക്തമാക്കി.
by Midhun HP News | Sep 16, 2026 | Latest News, കേരളം
കാസര്‍കോട്: ഭാര്യയുടെ മൃതദേഹത്തിനരികെ നാമം ജപിച്ചുകൊണ്ടിരിക്കെ ഭര്‍ത്താവും മരിച്ചു. മണിക്കൂറുകളുടെ ഇടവേളയില്‍ ദേവീഭാഗവത സപ്താഹ യജ്ഞാചാര്യനും പാഠകം കലാകാരനുമായ പുതുപ്പള്ളി ഇരവിനല്ലൂര്‍ കരിവേലി ഇല്ലത്ത് എന്‍ ദേവദത്തന് നമ്പൂതിരി (88), ഭാര്യ ഗിരിജാദേവി അന്തര്‍ജനം (75) എന്നിവരാണു മരിച്ചത്. ഗിരിജാദേവിയുടെ മൃതദേഹത്തിനരികെ നാമം ജപിച്ച് കൊണ്ടിരിക്കെ ദേവദത്തന് ദേഹാസ്വാസ്ഥ്യം അനുഭവപ്പെടുകയായിരുന്നു.
ഇവരുടെ മകനും കാസര്‍കോട് ഗവ. ഗേള്‍സ് വിഎച്ച്എസ്എസ് അധ്യാപകനുമായ സതീഷ് ഡി കരിവേലിയുടെ വിദ്യാനഗര്‍ പാറക്കട്ടയിലെ വീട്ടിലാണു സംഭവം. ഗിരിജാദേവി അന്തര്‍ജനം 14നു രാത്രി 11.30ന് ആണു മരിച്ചത്. ഭാര്യയുടെ വിയോഗം ഇന്നലെ രാവിലെ എട്ടോടെയാണു ദേവദത്തനെ അറിയിച്ചത്.
തുടര്‍ന്നു ഭാര്യയുടെ മൃതദേഹത്തിനരികെ ഇരുന്നു നാമം ജപിക്കുന്നതിനിടെ ദേവദത്തന് ദേഹാസ്വാസ്ഥ്യമുണ്ടായി. കാസര്‍കോട്ടെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. സംസ്‌കാരം സ്വവസതിയായ ഇരവിനല്ലൂര്‍ കരിവേലി ഇല്ലം വളപ്പില്‍ നടത്തി.
by Midhun HP News | Sep 16, 2026 | Latest News, കേരളം
നടൻ മനോജ് കെ ജയന്റെയും നടി ഉർവശിയുടെയും മകൾ തേജലക്ഷ്മി (കുഞ്ഞാറ്റ) വെള്ളിത്തിരയിലേക്ക്. ശ്രീനാഥ് ഭാസി നായകനായെത്തുന്ന പ്രിയതമൻ എന്ന ചിത്രത്തിലാണ് തേജലക്ഷ്മി നായികയാകുന്നത്. ശ്രേയനിധി ക്രിയേഷൻസ് അവതരിപ്പിക്കുന്ന ചിത്രത്തിന്റെ സംവിധാനം റിജീ പ്രഭാകരൻ നിർവഹിക്കുന്നു. സുനിൽകുമാർ എസ്, മുനീർ അറയ്ക്കൽ എന്നിവർ ചേർന്നാണ് ചിത്രം നിർമ്മിക്കുന്നത്.
കൃഷ്ണ പൂജപ്പുരയാണ് ചിത്രത്തിൻ്റെ രചന നിർവ്വഹിക്കുന്നത്. ചിത്രത്തിന്റെ ടൈറ്റിൽ പോസ്റ്റർ ഇതിനോടകം ശ്രദ്ധ നേടിയിട്ടുണ്ട്. ആശുപത്രി പശ്ചാത്തലത്തിലുള്ള ദൃശ്യങ്ങളാണ് പോസ്റ്ററിൽ പ്രധാനമായും അവതരിപ്പിച്ചിരിക്കുന്നത്. ഇതോടെ ‘പ്രിയതമൻ’ പറയുന്ന കഥയെക്കുറിച്ചുള്ള ആകാംക്ഷയും വർധിച്ചിട്ടുണ്ട്. പ്രദീപ് നായർ ഛായാഗ്രഹണം നിർവഹിക്കുന്നു.
സനു ഭാസ്കർ കഥ, ഹാരിസൺ സഹസംവിധാനം, സിയാൻ ശ്രീകാന്ത് എഡിറ്റിങ് എന്നിവ കൈകാര്യം ചെയ്യുന്നു. സംഗീതം രമേഷ് നാരായണനും ബിജിബാലും ചേർന്ന് ഒരുക്കുന്നു. അർഫാൻ എസ്. കർമ കലാസംവിധാനവും ഹരി വെഞ്ഞാറമൂട് പ്രൊഡക്ഷൻ കൺട്രോളറായും പ്രവർത്തിക്കുന്നു.
റഫീഖ് അഹമ്മദും മനു മഞ്ജിത്തും ഗാനരചന നിർവഹിക്കുന്നു. റോണി റാഫേൽ പശ്ചാത്തലസംഗീതം ഒരുക്കുന്നു. സുഭാഷ് എളമ്പാൽ ചീഫ് അസോസിയേറ്റ് ഡയറക്ടറും ഇന്ദ്രജയൻ അസോസിയേറ്റ് ഡയറക്ടറുമാണ്. പട്ടണം ഷാ മേക്കപ്പ് ആർട്ടിസ്റ്റായും അരോമൽ ആർ കാസ്റ്റിങ് ഡയറക്ടറായും അക്ഷയ് പ്രകാശ് പി ആർ ഒയായും മാർക്കറ്റിംഗ് അഖിൽ വിഷ്ണു വി എസും, പബ്ലിസിറ്റി ഡിസൈൻസ് മമിജോ എന്നിവരും പ്രവർത്തിക്കുന്നു.
അതേസമയം, ഉർവശി നായികയായി എത്തിയ ‘ആശ’ മികച്ച പ്രേക്ഷക പ്രതികരണത്തോടെ തിയറ്ററുകളിൽ മുന്നേറുന്ന ഘട്ടത്തിലാണ് മകളായ തേജലക്ഷ്മിയുടെ പുതിയ ചിത്രമായ ‘പ്രിയതമൻ’ ചിത്രീകരണം ആരംഭിക്കുന്നത്. സഫർ സനൽ സംവിധാനം ചെയ്ത ‘ആശ’ സെപ്റ്റംബർ 11നാണ് ആഗോള റിലീസായി എത്തിയത്. ചിത്രത്തിലെ ഉർവശിയുടെ പ്രകടനത്തിന് മികച്ച പ്രതികരണമാണ് ലഭിക്കുന്നത്.
മാതാപിതാക്കളായ ഉർവശിയുടെയും മനോജ് കെ. ജയന്റെയും അഭിനയപാരമ്പര്യം പിന്തുടർന്ന് സിനിമയിലെത്തിയ തേജലക്ഷ്മിക്ക് ‘പ്രിയതമൻ’ ഏറെ ശ്രദ്ധ നേടുന്ന ചിത്രമാകുമെന്നാണ് പ്രതീക്ഷ. ശ്രീനാഥ് ഭാസിയുമായുള്ള താരജോഡിയും റിജീ പ്രഭാകരന്റെ സംവിധാനവും കൃഷ്ണ പൂജപ്പുരയുടെ രചനയും ചേർന്ന് ചിത്രത്തെക്കുറിച്ചുള്ള പ്രതീക്ഷ ഉയർത്തുകയാണ്.
Recent Comments