by Midhun HP News | Sep 16, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ ചാഞ്ചാട്ടം തുടരുന്നു. ഇന്ന് പവന് 200 രൂപയാണ് വര്‍ധിച്ചത്. 1,12,520 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 25 രൂപയാണ് കൂടിയത്. 14,065 രൂപയാണ് ഒരു ഗ്രാം സ്വര്‍ണത്തിന്റെ വില.
പശ്ചിമേഷ്യന്‍ സംഘര്‍ഷത്തെ തുടര്‍ന്ന് ഉയര്‍ന്നു നില്‍ക്കുന്ന എണ്ണവില അടക്കമുള്ള ഘടകങ്ങളാണ് സ്വര്‍ണവിലയെ സ്വാധീനിക്കുന്നത്. ഇത് പണപ്പെരുപ്പനിരക്ക് ഉയരാന്‍ കാരണമാകുമെന്നതിനാല്‍ പലിനിരക്ക് വര്‍ധിപ്പിക്കാന്‍ അമേരിക്കന്‍ കേന്ദ്രബാങ്ക് തയ്യാറായേക്കുമെന്ന റിപ്പോര്‍ട്ടുകളും സ്വര്‍ണവിലയില്‍ പ്രതിഫലിക്കുന്നുണ്ട്. പലിശനിരക്ക് ഉയര്‍ത്തുന്നത് സ്വര്‍ണത്തിന്റെ ആകര്‍ഷണം കുറയ്ക്കാന്‍ ഇടയാക്കുമെന്നാണ് വിപണി വിദഗ്ധരുടെ വിലയിരുത്തല്‍. ഇതിന് പുറമേ അമേരിക്കന്‍ ട്രഷറി ബോണ്ട് യീല്‍ഡ് വര്‍ധിച്ചതും ഡോളര്‍ ശക്തിയാര്‍ജിച്ചതും സ്വര്‍ണവിലയെ സ്വാധീനിക്കുന്നുണ്ട്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Sep 15, 2026 | Latest News, കേരളം
തിരുവനന്തപുരം: സംസ്ഥാനത്ത് അതിരൂക്ഷമായി തുടരുന്ന വൈദ്യുതി പ്രതിസന്ധിക്ക് താൽക്കാലിക ആശ്വാസമായി ഹിമാചൽ പ്രദേശ് സർക്കാരിൽ നിന്ന് കേരളത്തിലേക്ക് 250 മെഗാവാട്ട് വൈദ്യുതി ലഭിക്കും. എഐസിസി ജനറൽ സെക്രട്ടറി കെ.സി. വേണുഗോപാൽ എംപി ഹിമാചൽ പ്രദേശ് മുഖ്യമന്ത്രിയുമായി നടത്തിയ ഉന്നതതല ചർച്ചകളെ തുടർന്നാണ് അനുകൂല തീരുമാനം ഉണ്ടായത്. നേരത്തെ തമിഴ്‌നാടിന് നൽകാൻ നിശ്ചയിച്ചിരുന്ന വൈദ്യുതി വിഹിതത്തിൽ നിന്ന് ഒരു ഭാഗം വെട്ടിച്ചുരുക്കിയാണ് കേരളത്തിന് കൈമാറാൻ ധാരണയായിട്ടുള്ളത്.
എൻടിപിസിയിൽ നിന്ന് അമിത നിരക്ക് നൽകി ഉടനടി വൈദ്യുതി വാങ്ങില്ലെന്ന് മന്ത്രി സണ്ണി ജോസഫ് വ്യക്തമാക്കി. യൂണിറ്റിന് 30 രൂപ വരെ നൽകി വൈദ്യുതി വാങ്ങാനുള്ള സർക്കാർ നിർദ്ദേശം ഉണ്ടായിരുന്നെങ്കിലും, സർചാർജ് ഇനത്തിൽ വൻ തുക ജനങ്ങളിൽ നിന്ന് ഈടാക്കേണ്ടി വരുമെന്ന തിരിച്ചറിവിലാണ് കെഎസ്ഇബിയും സർക്കാരും ഈ നീക്കത്തിൽ നിന്ന് പിന്മാറിയത്. കൂടിയ വിലയ്ക്ക് വൈദ്യുതി വാങ്ങുന്നത് പൊതുജനങ്ങൾക്ക് താങ്ങാനാവാത്ത സാമ്പത്തിക ബാധ്യതയുണ്ടാക്കുമെന്നും മന്ത്രി ചൂണ്ടിക്കാട്ടി. കേന്ദ്ര വിഹിതവും പവർ എക്സ്ചേഞ്ചിൽ നിന്നുമുള്ള വൈദ്യുതിയുമായി 240 മെഗാവാട്ട് അധികമായി സംസ്ഥാനത്ത് ലഭിച്ചു തുടങ്ങിയത് വലിയ ആശ്വാസമാണെന്നും മന്ത്രി കൂട്ടിച്ചേർത്തു.
സംസ്ഥാനത്ത് നിലവിൽ ഏകദേശം 700 മെഗാവാട്ടിന്റെ വൈദ്യുതി കുറവാണ് കെഎസ്ഇബി കണക്കാക്കുന്നത്. കേന്ദ്രവിഹിതം ഉൾപ്പെടെ 240 മെഗാവാട്ട് ലഭ്യമായി തുടങ്ങിയ സാഹചര്യത്തിൽ രാത്രികാലങ്ങളിൽ ഏർപ്പെടുത്തിവരുന്ന ലോഡ് നിയന്ത്രണത്തിന് നേരിയ ഇളവ് ലഭിച്ചേക്കും. എന്നിരുന്നാലും നിയന്ത്രണങ്ങൾ പൂർണ്ണമായി ഒഴിവാക്കാനാകില്ലെന്ന വിലയിരുത്തലിലാണ് അധികൃതർ.
വൈദ്യുതി നിയന്ത്രണമില്ലാതിരുന്ന ഞായറാഴ്ചയെ അപേക്ഷിച്ച് തിങ്കളാഴ്ചത്തെ സംസ്ഥാനത്തെ വൈദ്യുതി ഉപഭോഗം 94.45 ദശലക്ഷം യൂണിറ്റായി കുതിച്ചുയർന്നു. തിങ്കളാഴ്ച രാത്രിയിലെ വൈദ്യുതി ആവശ്യകത 4,829 മെഗാവാട്ടായിരുന്നു. ഹിമാചൽ പ്രദേശിൽ നിന്നുള്ള 250 മെഗാവാട്ട് കൂടി എത്തുന്നതോടെ സംസ്ഥാനത്തെ വൈദ്യുതി ക്ഷാമത്തിന് വലിയ പരിഹാരമാകുമെന്നാണ് പ്രതീക്ഷിക്കുന്നത്.
by Midhun HP News | Sep 15, 2026 | Latest News, കേരളം
വരിക്കാര്‍ക്ക് തങ്ങളുടെ പെന്‍ഷന്‍ അക്കൗണ്ടില്‍ നിക്ഷേപിച്ചിരിക്കുന്ന തുകയുടെ ഒരു ഭാഗം ആശുപത്രി ചെലവുകള്‍ക്ക് കൂടി ഉപയോഗിക്കാന്‍ കഴിയുന്ന തരത്തില്‍ വിഭാവനം ചെയ്തിരിക്കുന്ന പദ്ധതിയാണ് എന്‍പിഎസ് സ്വാസ്ഥ്യ. പെന്‍ഷന്‍ ഫണ്ട് റെഗുലേറ്ററി ആന്റ് ഡെവലപ്പ്‌മെന്റ് അതോറിറ്റി രൂപം നല്‍കിയ ഈ പദ്ധതി ഉടന്‍ തന്നെ പ്രാബല്യത്തില്‍ വരുമെന്നാണ് റിപ്പോര്‍ട്ടുകള്‍ പറയുന്നത്.
പെന്‍ഷന്‍ അക്കൗണ്ടില്‍ സമാഹരിച്ച തുകയുടെ ഒരു ഭാഗം ആശുപത്രി ചികിത്സാ ചെലവുകള്‍ക്കായി ഉപയോഗിക്കുന്നതിനുള്ള സംവിധാനം വരിക്കാര്‍ക്ക് നല്‍കാനാണ് എന്‍പിഎസ് സ്വാസ്ഥ്യ വികസിപ്പിച്ചത്. ഇതിനോടൊപ്പം ഒരു ടോപ്പ് അപ്പ് ഇന്‍ഷുറന്‍സ് സൗകര്യവും ഉണ്ടാകും. ഇത് ബാക്കി വരുന്ന ആശുപത്രി ചെലവുകള്‍ കവര്‍ ചെയ്യാന്‍ സഹായിക്കും. ഈ സ്‌കീം വഴി പെന്‍ഷന്‍ അക്കൗണ്ടില്‍ മാറ്റിവെച്ചിരിക്കുന്ന തുക ഉപയോഗിച്ച് ആശുപത്രി ചെലവുകളുടെ ഒരു ഭാഗം അടയ്ക്കാന്‍ വരിക്കാര്‍ക്ക് സാധിക്കും.
ബാക്കി തുക അനുബന്ധ ടോപ്പ്-അപ്പ് ഇന്‍ഷുറന്‍സ് വഴി ലഭ്യമാക്കും. തുടക്കത്തില്‍ അടയ്ക്കുന്ന സംഭാവനയുടെ ഏകദേശം എട്ടു മുതല്‍ 10 ഇരട്ടി വരെയാകാം ടോപ്പ് – അപ്പ് ഇന്‍ഷുറന്‍സ് കവര്‍. അന്തിമ മാര്‍ഗനിര്‍ദേശങ്ങള്‍ പുറത്തുവരുന്നതോടെ മാത്രമേ ഈ സ്‌കീം സംബന്ധിച്ച് കൂടുതല്‍ വിശദാംശങ്ങള്‍ അറിയാന്‍ സാധിക്കൂ. ഇന്‍ഷുറന്‍സ് കമ്പനികളുമായി ചേര്‍ന്ന് എല്ലാ പെന്‍ഷന്‍ ഫണ്ടുകള്‍ക്ക് ആരോഗ്യ ഇന്‍ഷുറന്‍സ് പരിരക്ഷ ഉറപ്പുവരുത്താനാണ് അതോറിറ്റി ലക്ഷ്യമിടുന്നത്. റിട്ടയര്‍മെന്റ് കാലത്തേയ്ക്ക് സമ്പാദ്യം കണ്ടെത്തുന്നതിനുള്ള ഒരു പദ്ധതിയാണ് എന്‍പിഎസ്. എന്‍പിഎസ് സ്വാസ്ഥ്യ വരുന്നതോടെ പെന്‍ഷന്‍ സമ്പാദ്യത്തിന്റെ ഒരു ഭാഗം ഇന്‍ഷുറന്‍സ് പരിരക്ഷയോടെയുള്ള ചികിത്സാ ആവശ്യങ്ങള്‍ക്ക് ഉപയോഗിക്കാന്‍ സാധിക്കും.
by Midhun HP News | Sep 15, 2026 | Latest News, കേരളം
കാഞ്ഞങ്ങാട്: കെഎസ്ആർടിസി ബസിന്റെ അടിത്തട്ട് തകർന്ന് യാത്രക്കാരിക്ക് ഗുരുതര പരിക്ക്. ഓട്ടത്തിനിടയിൽ ടയർ പൊട്ടിത്തെറിച്ചതിനെ തുടർന്ന് പ്ലാറ്റ്‌ഫോം തകരുകയും യാത്രക്കാരിയുടെ കാൽ ഇതിനുള്ളിൽ കുടുങ്ങുകയുമായിരുന്നു. നീലേശ്വരം അഴിത്തല ബോട്ട് ജെട്ടിക്ക് സമീപത്തെ മത്സ്യത്തൊഴിലാളി മുഹമ്മദ്കുഞ്ഞിയുടെ മകൾ കുഞ്ഞായിഷയ്ക്കാണ് (39) ഗുരുതരമായി പരിക്കേറ്റത്. യുവതിയുടെ ഇടതുകാലിന്റെ എല്ലിന് കാര്യമായ പൊട്ടലേറ്റിട്ടുണ്ട്.
കഴിഞ്ഞ ദിവസം വൈകിട്ട് പയ്യന്നൂരിൽ നിന്ന് കാഞ്ഞങ്ങാട്ടേക്ക് സർവ്വീസ് നടത്തുകയായിരുന്ന കെഎസ്ആർടിസി പ്രിയദർശിനി ബസിലാണ് അപകടം നടന്നത്. ബസ് പടന്നക്കാട് ഐങ്ങോത്ത് പിന്നിട്ട ഉടൻ വലിയ ശബ്ദത്തോടെ പിൻചക്രങ്ങളിലൊന്ന് പൊട്ടിത്തെറിക്കുകയായിരുന്നു.പൊട്ടിത്തെറിയുടെ ആഘാതത്തിൽ സീറ്റുകൾക്ക് താഴെയുള്ള ബസിന്റെ പ്ലാറ്റ്‌ഫോം പാളി തകർന്ന് ഉള്ളിലേക്ക് തുളച്ചുകയറി. ഇതേതുടർന്ന് കുഞ്ഞായിഷയുടെ ഇടതുകാൽ പ്ലാറ്റ്‌ഫോമിലെ വിടവിലേക്ക് വലിഞ്ഞ് കുടുങ്ങിപ്പോവുകയുമായിരുന്നു. സഹയാത്രികരും ബസ് ജീവനക്കാരും ചേർന്ന് ഏറെ പണിപ്പെട്ടാണ് കമ്പികൾക്കിടയിൽ കുടുങ്ങിയ യുവതിയുടെ കാൽ പുറത്തെടുത്തത്. പരിശോധനയിൽ ഇടതുകാലിന്റെ എല്ലിന് കാര്യമായ ഒടിവുണ്ടായതായി ഡോക്ടർമാർ സ്ഥിരീകരിച്ചു.
by Midhun HP News | Sep 15, 2026 | Latest News, കേരളം
കോഴിക്കോട്: മാസപ്പടി കേസുമായി ബന്ധപ്പെട്ട് ഇഡിയുടെ കത്തിലെ വിശദാംശങ്ങള്‍ ഇപ്പോള്‍ വാര്‍ത്തയായി പുറത്തുവന്നതിന് പിന്നില്‍ ബോധപൂര്‍വ്വം വ്യക്തിപരമായി മോശമാക്കാനുള്ള ശ്രമമെന്ന് സിപിഎം നേതാവ് പി എ മുഹമ്മദ് റിയാസ്. തെളിവുകള്‍ പ്രധാനപ്പെട്ടതെങ്കില്‍ ഇങ്ങനെ പുറത്തുവിടുമോ? ഇന്നത്തെ ദിവസം എന്തിന് തെരഞ്ഞെടുത്തു? മെയ് 27ന് കിട്ടിയ കൈപ്പടയാണ്. ഇന്ന് വിപുലീകൃത സംസ്ഥാന കമ്മിറ്റി വിജയകരമായി പൂര്‍ത്തീകരിച്ച് ലക്ഷങ്ങള്‍ പങ്കെടുക്കുന്ന റാലി നടക്കാന്‍ പോകുകയാണ്. ഇന്ന് ഇതിന് തെരഞ്ഞെടുത്തത് മറ്റു ഉദ്ദേശത്തോടെയെന്നും മുഹമ്മദ് റിയാസ് മാധ്യമങ്ങളോട് പറഞ്ഞു.
‘നേരത്തെ ഹവാലയുമായി എന്നെ കണക്ട് ചെയ്യാനുള്ള ശ്രമം പൊളിഞ്ഞിരുന്നു. ഇപ്പോള്‍ പുതിയ കഥ രംഗത്തിറക്കിയിരിക്കുകയാണ്. ബേപ്പൂര്‍ മണ്ഡലത്തിന്റെ വികസനവുമായി ബന്ധപ്പെട്ട് രൂപീകരിച്ച ഒരു ഗ്രൂപ്പുമായി ബന്ധപ്പെട്ടാണ് ആരോപണം. നമ്മള്‍ ബേപ്പൂര്‍ എന്നാണ് ഗ്രൂപ്പിന്റെ പേര്. ഈ ഗ്രൂപ്പ് ഹവാല ഇടപാടിന് വേണ്ടിയുള്ള ഗ്രൂപ്പ് ആണ് എന്നാണ് ഇഡി ചോര്‍ത്തി കൊടുത്ത വാര്‍ത്തയില്‍ ഉള്ളത്. നമ്മള്‍ ബേപ്പൂരില്‍ സമസ്ത മേഖലയിലെ ജനങ്ങളും മാധ്യമപ്രവര്‍ത്തകരും ഉണ്ട്. ആ ഗ്രൂപ്പ് പരിശോധിക്കാം. ചാറ്റുകള്‍ പരിശോധിക്കാം. ഇഡിയുടെ നടപടിയെ നിയമപരമായി നേരിടും’- മുഹമ്മദ് റിയാസ് പറഞ്ഞു.
‘ചെറിയ കാര്യങ്ങള്‍ക്ക് മറുപടി പറയേണ്ട എന്നാണ് എനിക്ക് കിട്ടിയിട്ടുള്ളൂ നിയമോപദേശം. എന്നാല്‍ ചിലത് പറയാതെ പോയാല്‍ ശരിയാവില്ല എന്ന് തോന്നി. ഹവാല പണമാണെന്ന് വീണ അഡ്മിറ്റ് ചെയ്തു എന്നാണ് പറയുന്നത്. ഇത് ശുദ്ധ അസംബന്ധമാണ്. ഫ്യൂച്ചര്‍ ബിസിനസ് ആരംഭിക്കുന്നതുമായി ബന്ധപ്പെട്ട് എഴുതിയിട്ടുള്ള കാര്യങ്ങളാണ്. എഴുതിയിട്ടുള്ള ആളുകളുമായി ചര്‍ച്ച പോലും ചെയ്തിട്ടില്ല.കള്ളപ്പണവുമായി യാതൊരു ബന്ധവുമില്ല. ബോധപൂര്‍വ്വം മോശമാക്കാനുള്ള ശ്രമമാണ് നടക്കുന്നത്. ആ പേരുകളിലുള്ളവരുടെ വീടുകളിലും ഓഫീസുകളിലും റെയ്ഡ് ചെയ്തു. അവരാരും കള്ളപ്പണമാണ് എന്ന് പറഞ്ഞിട്ടില്ല. ഫ്യൂച്ചര്‍ ബിസിനസുമായി ബന്ധപ്പെട്ട് കടലാസില്‍ എഴുതിയതാണ് റെഡ് ബുക്ക് എന്ന നിലയില്‍ അവതരിപ്പിച്ചിട്ടുള്ളത്. വീണയ്ക്ക് ഹവാല ഇടപാട് ഉണ്ട് എന്ന തരത്തില്‍ വ്യാപകമായി പ്രചാരണം നടത്തി. മൂന്ന് തവണ വീണയെ ചോദ്യം ചെയ്തു. ഈ ചോദ്യംചെയ്യലില്‍ എവിടെയും ഹവാലയുമായി ബന്ധപ്പെട്ട് ഒരു ചോദ്യം പോലും ചോദിച്ചിട്ടില്ല’- മുഹമ്മദ് റിയാസ് കൂട്ടിച്ചേര്‍ത്തു.
by Midhun HP News | Sep 15, 2026 | Latest News, കേരളം
കൊച്ചി: സിനിമ തിയറ്ററുകളില്‍ തിങ്കള്‍ മുതല്‍ വ്യാഴം വരെ പോപ്കോണ് 99 രൂപയ്ക്ക് ലഭ്യമാക്കുമെന്ന് മള്‍ട്ടിപ്ലക്സ് തിയേറ്റര്‍ മാനേജ്മെന്റുകള്‍ അറിയിച്ചു. തിയേറ്ററുകളിലെ കഫേകളില്‍ ഭക്ഷണപാനീയങ്ങള്‍ക്ക് അന്യായവില ഈടാക്കുന്നതിനെതിരെ എറണാകുളത്തെ പ്രമുഖ തിയേറ്ററുകളില്‍ ഭക്ഷ്യ-സിവില്‍ സപ്ലൈസ്, ലീഗല്‍ മെട്രോളജി, ഭക്ഷ്യസുരക്ഷാ വകുപ്പുകള്‍ സംയുക്തമായി നടത്തിയ മിന്നല്‍ പരിശോധനയെത്തുടര്‍ന്നാണ് തീരുമാനം. തിങ്കള്‍ മുതല്‍ വ്യാഴം വരെ തിയറ്ററുകളില്‍ പോപ്കോണ് 99 രൂപയ്ക്കു ലഭിക്കുന്നതിനു പുറമെ, സിനിമാ ടിക്കറ്റുകളും കുറഞ്ഞ നിരക്കില്‍ നല്‍കും.
വിലവിവരപ്പട്ടിക നിര്‍ദ്ദിഷ്ട രീതിയില്‍ പ്രദര്‍ശിപ്പിക്കാത്തതിനും അളവില്‍ കുറവുനല്‍കിയതിനും 3 കഫേകള്‍ക്കെതിരെ കേസെടുത്തു. മള്‍ട്ടിപ്ലക്സുകളില്‍ പോപ്കോണും ശീതളപാനീയങ്ങളും പൊതുവിപണി വിലയേക്കാള്‍ 5 ഇരട്ടിയും സാധാരണ തിയറ്ററുകളില്‍ 2 ഇരട്ടിയും അധികവില ഈടാക്കുന്നതായി പരിശോധനയില്‍ കണ്ടെത്തി. പലയിടത്തും ക്യുആര്‍ കോഡ് സ്‌കാന്‍ ചെയ്താല്‍ മാത്രം കാണുന്ന രീതിയിലാണ് വിലവിവരങ്ങള്‍ നല്‍കിയിരുന്നത്. വരുംദിവസങ്ങളില്‍ ജില്ലയിലെ കൂടുതല്‍ തിയറ്ററുകളില്‍ പരിശോധന ശക്തമാക്കുമെന്ന് ഉദ്യോഗസ്ഥര്‍ അറിയിച്ചു.
രാവിലെ 11-ന് ആരംഭിച്ച പരിശോധന വൈകിട്ട് 4 വരെ നീണ്ടു. ജില്ലാ സപ്ലൈ ഓഫിസര്‍ വിആര്‍ ഷാജി, ലീഗല്‍ മെട്രോളജി ഡപ്യൂട്ടി കണ്‍ട്രോളര്‍ എന്‍സി. സന്തോഷ് അസിസ്റ്റന്റ് കണ്‍ട്രോളര്‍ കെബി വേണു, താലൂക്ക് സപ്ലൈ ഓഫിസര്‍ മറീന ജോണ്‍ എന്നിവരുടെ നേതൃത്വത്തിലാണ് പരിശോധന നടന്നത്.
Recent Comments