by Midhun HP News | Jun 22, 2025 | Latest News, ജില്ലാ വാർത്ത
തിരുവനന്തപുരം: ആശമാർക്ക് മൂന്നുമാസത്തെ ഓണറേറിയം മുൻകൂറായി അനുവദിച്ച് സംസ്ഥാന സർക്കാർ. ജൂൺ, ജൂലൈ, ഓഗസ്റ്റ് മാസങ്ങളിലെ ഓണറേറിയമാണ് അനുവദിച്ച് ഉത്തരവിറങ്ങിയത്. ആറ് മാസത്തെ തുക മുൻകൂര് അനുവദിക്കണമെന്നാണ് നാഷണൽ ഹെൽത്ത് മിഷൻ സ്റ്റേറ്റ് മിഷൻ ഡയറക്ടര് സര്ക്കാരിനോട് ആവശ്യപ്പെട്ടിരുന്നത്.
സംസ്ഥാനത്തെ 26,125 ആശാവർക്കർമാർക്ക് പ്രതിമാസം 7000 രൂപ വീതം നൽകാനുള്ള 54, 86,25,000 രൂപയാണ് ദേശീയ ഹെൽത്ത് മിഷന് അനുവദിച്ചിട്ടുള്ളത്. ഇതോടെ ജൂൺ ജൂലൈ ഓഗസ്റ്റ് മാസങ്ങളിലെ ഓണറേറിയം മുൻകൂറായി ആശ വർക്കർമാരുടെ കൈകളിലെത്തും. നിലവിൽ കുടിശ്ശികയില്ലാതെയാണ് ആശ വർക്കർമാർക്ക് ഓണറേറിയം ലഭ്യമാകുന്നതെന്ന് സർക്കാർ സൂചിപ്പിച്ചു.
വിപണി ഇടപെടലിനായി സിവിൽ സപ്ലൈസ് കോർപറേഷന് 100 കോടി രൂപ അനുവദിച്ചതായും ധനമന്ത്രി കെ എൻ ബാലഗോപാൽ അറിയിച്ചു. അവശ്യ നിത്യോപയോഗ സാധനങ്ങളുടെ വിലക്കയറ്റം ഒഴിവാക്കാനുള്ള വിവിധ പ്രവർത്തനങ്ങളെ സഹായിക്കാനാണ് തുക ലഭ്യമാക്കുന്നതെന്ന് മന്ത്രി അറിയിച്ചു. 2011-12 മുതൽ 2024– 25 വരെ, 15 വർഷക്കാലം സപ്ലൈകോയുടെ നേരിട്ടുള്ള വിപണി ഇടപെടലിനുള്ള സഹായമായി 7630 കോടി രൂപയാണ് സർക്കാർ നൽകിയത്. അതിൽ 7220 കോടി രൂപയും എൽഡിഎഫ് സർക്കാരുകളാണ് അനുവദിച്ചതെന്ന് മന്ത്രി വ്യക്തമാക്കി.
by Midhun HP News | Jun 22, 2025 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് മഴ മുന്നറിയിപ്പില് മാറ്റം. 11 ജില്ലകളില് കലാവസ്ഥാ വകുപ്പ് യെല്ലോ അലര്ട്ട് പുറപ്പെടുവിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് യെല്ലോ അലര്ട്ടുള്ളത്.
ഒറ്റപ്പെട്ടയിടങ്ങളില് ശക്തമായ മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.തെക്ക് പടിഞ്ഞാറന് ബിഹാറിന് മുകളിലായി ന്യൂനമര്ദ്ദം സ്ഥിതിചെയ്യുന്നു. വടക്ക് കിഴക്കന് രാജസ്ഥാനു മുകളില് ചക്രവാതചുഴി സ്ഥിതിചെയ്യുന്നു. കേരളത്തില് അടുത്ത ദിവസങ്ങളില് മഴ തുടരുമെന്നും മുന്നറിയിപ്പുണ്ട്.
നാളെ മലപ്പുറം, കോഴിക്കോട്, കണ്ണൂര്, കാസര്കോഡ് ജില്ലകളലാണ് യെല്ലോ അലര്ട്ട്. 24 നും മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് യെല്ലോ അലര്ട്ടാണുള്ളത്. 25/06/2025: ആലപ്പുഴ, എറണാകുളം, തൃശൂര്, മലപ്പുറം, കോഴിക്കോട്, കണ്ണൂര്, കാസര്കോഡ്. 26/06/2025: ആലപ്പുഴ, എറണാകുളം, തൃശൂര്, മലപ്പുറം, കോഴിക്കോട്, കണ്ണൂര്, കാസര്കോഡ് എന്നീ ജില്ലകളിലും യെല്ലോ മുന്നറിയിപ്പാണുള്ളത്.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്.
by Midhun HP News | Jun 22, 2025 | Latest News, കേരളം
കോട്ടയം: അധ്യാപക പുനര്നിയമനത്തിന് കൈക്കൂലി വാങ്ങിയ സെക്രട്ടേറിയറ്റ് ജീവനക്കാരന് വിജിലന്സ് പിടിയില്. സെക്രട്ടേറിയറ്റിലെ പൊതുവിദ്യാഭ്യാസ വകുപ്പ് അസിസ്റ്റന്റ് സെക്ഷന് ഓഫിസര് തിരുവനന്തപുരം പള്ളിക്കല് മൂതല സ്വദേശി സുരേഷ് ബാബുവാണ് അറസ്റ്റിലായത്.
കോട്ടയത്തെമൂന്ന് അധ്യാപകരുടെ പുനര്നിയമനത്തിന് ഒന്നരലക്ഷം രൂപയാണ് കൈക്കൂലി വാങ്ങിയത്. കോട്ടയം വിജിലന്സ് യൂണിറ്റാണ് ഇയാളെ അറസ്റ്റ് ചെയ്തത്.കേസില് വടകര സ്വദേശിയും മുന് പ്രധാന അധ്യാപകനും ഏജന്റുമായ വിജയനെ വിജിലന്സ് നേരത്തെ അറസ്റ്റ് ചെയ്തിരുന്നു.
തീക്കോയി സ്കൂളിലെ മൂന്ന് അധ്യാപകരുടെ നിയമനത്തിലാണ് അഴിമതി നടത്തിയത്. ഫയലുകള് ശരിയാക്കിത്തരാമെന്ന് പറഞ്ഞ് പരാതിക്കാരില് നിന്നും ഒന്നര ലക്ഷം രൂപയാണ് പ്രതികള് കൈക്കൂലിയായി വാങ്ങിയത്.
by Midhun HP News | Jun 22, 2025 | Latest News, കായികം
ലണ്ടന്: ഇന്ത്യക്കെതിരായ ഒന്നാം ക്രിക്കറ്റ് ടെസ്റ്റില് ഇംഗ്ലണ്ടിന് തിരിച്ചടി. രണ്ടാം ദിനം സ്റ്റംപെടുക്കുമ്പോള് മൂന്ന് വിക്കറ്റ് നഷ്ടത്തില് 209 റണ്സെന്ന നിലയിലാണ് ഇംഗ്ലണ്ട്. സെഞ്ച്വറി തികച്ച ഒലി പോപ്പിന്റെ ബാറ്റിങ് മികവാണ് ഇംഗ്ലണ്ടിനെ കരകയറ്റുന്നത്. 131 പന്തില് 100 റണ്സെടുത്തു പോപ്പും ഹാരി ബ്രൂക്കു(0)മാണ് ക്രീസില്.
നാല് റണ്സെടുത്ത സാക് ക്രോളിയുടെയും 62 റണ്സടിച്ച ബെന് ഡക്കറ്റിന്റെയും 28 റണ്സെടുത്ത ജോ റൂട്ടിന്റെയും വിക്കറ്റുകളാണ് ഇംഗ്ലണ്ടിന് നഷ്ടമായത്. പേസര് ജസ്പ്രിത് ബുംറയാണ് മൂന്ന് വിക്കറ്റും വീഴ്ത്തിയത്. സ്കോര് 4 റണ്സിലെത്തിയപ്പോള് ഓപ്പണര് സാക് ക്രൗളിയെ പുറത്താക്കി ബുംറ മികച്ച തുടക്കമാണ് ഇന്ത്യക്ക് നല്കിയത്.
ഓപ്പണര് സാക് ക്രൗളിയെ ജസ്പ്രിത് ബുംറ കരുണ് നായരുടെ കൈകളിലെത്തിച്ചു. എന്നാല് രണ്ടാം വിക്കറ്റില് സഹ ഓപ്പണര് ബെന് ഡക്കറ്റും വണ് ഡൗണായി എത്തിയ ഒലി പോപ്പും മികച്ച രീതിയില് ബാറ്റ് വീശിയതോടെ ഇംഗ്ലണ്ട് ട്രാക്കിലായി. ഇരുവരും അര്ധ സെഞ്ച്വറി നേടി മുന്നോട്ടു പോകുന്നതിനിടെയാണ് ബുംറ വീണ്ടും കൊടുങ്കാറ്റായത്. 62 റണ്സെടുത്ത ഡക്കറ്റിനെ ബുംറ ക്ലീന് ബൗള്ഡാക്കി. ഇതോടെ 126 ന് രണ്ട് എന്ന നിലയിലായി ഇംഗ്ലണ്ട്.
സ്റ്റംപെടുക്കാന് ഇരിക്കെ സ്കോര് 206 ല് നില്ക്കെ ജോ റൂട്ടിനെയും ബുംറ മടക്കി. 58 പന്തില് 28 റണ്സാണ് റൂട്ട് നേടിയത്. ഹാരി ബ്രൂക്കിന്റെയും വിക്കറ്റ് കൂടി ബുംറ നേടിയെങ്കിലും നോ ബോളായത് ഇംഗ്ലണ്ടിന് രക്ഷയായി. ഏഴ് വിക്കറ്റ് കൈയിലിരിക്കെ ഇന്ത്യയുടെ ഒന്നാം ഇന്നിങ്സ് സ്കോറിനേക്കാള് 262 റണ്സ് പിന്നിലാണ് ഇംഗ്ലണ്ട് ഇപ്പോള്.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ ഒന്നാം ഇന്നിങ്സില് 471 റണ്സിന് ഓള്ഔട്ടായി. രണ്ടാം ദിവസത്തെ രണ്ടാം സെഷനിലാണ് ഇന്ത്യയുടെ ഇന്നിംങ്സ് അവസാനിച്ചത്. വെറും 41 റണ്സ് കൂട്ടിച്ചേര്ക്കുന്നതിനിടെയാണ് ഇന്ത്യയ്ക്ക് അവസാനത്തെ ഏഴ് വിക്കറ്റുകള് നഷ്ടമായത്.
by Midhun HP News | Jun 22, 2025 | Latest News, ദേശീയ വാർത്ത
ടെഹ്റാന്: അമേരിക്കന് ആക്രമണങ്ങളെ സര്വ്വശക്തിയും ഉപയോഗിച്ച് ചെറുക്കുമെന്ന് ഇറാന്. ആണവ കേന്ദ്രങ്ങളെ ആക്രമിച്ചതിലൂടെ അപകടകരമായ യുദ്ധമാണ് അമേരിക്ക തുടങ്ങിവെച്ചതെന്ന് ഇറാന് വിദേശകാര്യമന്ത്രാലയം വാര്ത്താക്കുറിപ്പില് അഭിപ്രായപ്പെട്ടു. ‘നയതന്ത്ര പ്രക്രിയ തുടരുന്നതിനിടെ, നയതന്ത്രത്തെ വഞ്ചിച്ചത് അമേരിക്കയാണെന്ന് ലോകം മറക്കരുത്. യുഎസിന് ധാര്മികതയില്ലെന്നും ഒരു നിയമങ്ങളും പാലിക്കുന്നില്ലെന്നും ഇറാന് ആരോപിച്ചു.
‘യുഎസ് സൈനിക ആക്രമണത്തിനും ഈ തെമ്മാടി ഭരണകൂടം ചെയ്യുന്ന കുറ്റകൃത്യങ്ങള്ക്കുമെതിരെ എല്ലാ ശക്തിയും ഉപയോഗിച്ച് നിലകൊള്ളാനും രാജ്യത്തിന്റെ സുരക്ഷയും ദേശീയ താല്പ്പര്യങ്ങളും സംരക്ഷിക്കാനും ഇസ്ലാമിക് റിപ്പബ്ലിക് ഓഫ് ഇറാന് അവകാശമുണ്ട്.’ ഇറാന് സര്ക്കാരിന്റെ വക്താവ് പറഞ്ഞു. ഇസ്രയേലിനെ വംശഹത്യ നടത്തുന്നവരെന്നും, നിയമവിരുദ്ധരെന്നുമാണ് ഇറാന് വിദേശകാര്യമന്ത്രാലയം വിശേഷിപ്പിച്ചത്.
യുഎസ് ആക്രമണങ്ങള് യുഎന് ചാര്ട്ടറിന്റെയും അന്താരാഷ്ട്ര നിയമത്തിന്റെയും ലംഘനമാണ്. ‘ഈ ഹീനമായ കൃത്യത്തിന്റെ ഗുരുതരമായ പ്രത്യാഘാതങ്ങള്ക്കും ഭയാനകമായ ഭവിഷ്യത്തുക്കള്ക്കും യുഎസ് സര്ക്കാരിനാണ് പൂര്ണ്ണ ഉത്തരവാദിത്തം. ഇറാന് വിദേശകാര്യമന്ത്രാലയം അഭിപ്രായപ്പെട്ടു. ഇറാന് തങ്ങളുടെ പരമാധികാരം സംരക്ഷിക്കാന് അവകാശമുണ്ടെന്ന് ഇറാന് വിദേശകാര്യമന്ത്രി സയ്യിദ് അബ്ബാസ് അരാഗ്ചി പറഞ്ഞു. യുഎസ് ആക്രമണം രാജ്യാന്തര നിയമങ്ങളുടെ ലംഘനമാണ്. ഇത് ഗുരുതരമായ പ്രത്യാഘാതങ്ങള്ക്ക് വഴിവയ്ക്കുമെന്നും അരാഗ്ചി മുന്നറിയിപ്പ് നല്കി.
ഇറാനിലെ അമേരിക്കൻ നടപടിയെ ഐക്യരാഷ്ട്രസഭ സെക്രട്ടറി ജനറൽ വിമർശിച്ചു. നിലവിൽ സംഘർഷഭരിതമായ മേഖലയെ കൂടുതൽ അപകടകരമായ അവസ്ഥയിലേക്ക് തള്ളിവിടുന്നതാണ് യുഎസ് ആക്രമണമെന്ന് യുഎൻ സെക്രട്ടറി ജനറൽ അന്റോണിയോ ഗുട്ടെറസ് അഭിപ്രായപ്പെട്ടു. ആഗോള സമാധാനത്തിനും സുരക്ഷയ്ക്കും ഗുരുതരമായ ഭീഷണിയാണ് ഉയർത്തുന്നത്. ഈ സംഘർഷം നിയന്ത്രണം വിട്ടുപോകാനുള്ള സാധ്യത വർദ്ധിച്ചുവരികയാണ് . സാധാരണക്കാർക്കും മേഖലയ്ക്കും ലോകത്തിനും വിനാശകരമായ പ്രത്യാഘാതങ്ങൾ ഉണ്ടാക്കും. ഗുട്ടെറസ് മുന്നറിയിപ്പ് നൽകി.
by Midhun HP News | Jun 22, 2025 | Latest News, ജില്ലാ വാർത്ത
ഭാരതീയ വിചാര കേന്ദ്രം ആറ്റിങ്ങൽ സ്ഥാനീയ സമിതിയുടെ ആഭിമുഖ്യത്തിൽ അന്താരാഷ്ട്ര യോഗാദിനത്തോടനുബന്ധിച്ച് സംഘടിപ്പിച്ച പ്രത്യേക യോഗത്തിൽ “ശരീരവും മനസ്സും യോഗയിലൂടെ” എന്ന വിഷയത്തിൽ വിദ്യാ പി നമ്പൂതിരി പ്രബന്ധം അവതരിപ്പിച്ചു.
ഈ തിരക്കേറിയ കാലഘട്ടത്തിൽ ശാരീരികവും മാനസികവുമായ ആരോഗ്യസംരക്ഷണത്തിന് യോഗ നിർണായകമാണെന്ന് വിദ്യാ പി നമ്പൂതിരി പ്രബന്ധത്തിലൂടെ സൂചിപ്പിച്ചു.
കിളിമാനൂർ ടി. ഷാജി ചടങ്ങിന് സ്വാഗതം പറഞ്ഞു. കായിക്കര അശോകൻ അധ്യക്ഷത വഹിച്ചു. ഭാരതീയ വിചാര കേന്ദ്രം ജില്ലാ സെക്രട്ടറി ആർ. ശശീന്ദ്രനും ചടങ്ങിൽ പങ്കെടുത്തു.
വിഷയാവതരണത്തിൽ, അനാരോഗ്യകരമായ ആധുനിക ഭക്ഷണശീലങ്ങളും വിദ്യാഭ്യാസം, തൊഴിൽ തുടങ്ങിയ മേഖലകളിലെ സമ്മർദങ്ങളും ഒരു വ്യക്തിയുടെ ആരോഗ്യത്തെ ബാധിക്കുന്നുവെന്നും, ആ സാഹചര്യത്തിൽ സ്ഥിരമായ യോഗാഭ്യാസം മാനസികവും ശാരീരികവുമായ ആരോഗ്യം കൈവരിക്കാൻ സഹായിക്കുന്നുവെന്നും വിദ്യ വിശദീകരിച്ചു. ശരീരവും മനസ്സും തമ്മിൽ സമത്വം പുലർത്തുമ്പോഴാണ് യഥാർത്ഥ ആരോഗ്യ സംരക്ഷണം സാധ്യമാകുന്നതെന്നും അവർ കൂട്ടിച്ചേർത്തു.
Recent Comments