by Midhun HP News | Apr 21, 2025 | Latest News, ജില്ലാ വാർത്ത
ആറ്റിങ്ങൽ: 2025 ഏപ്രില് 21ന്, ഉഭയകക്ഷി വ്യാപാര കരാറിനായുള്ള ചര്ച്ചകള് നടക്കുന്നതിനിടയില്, വാന്സ് ഗോ ബാക്ക്! ഇന്ത്യ വില്പ്പനയ്ക്കില്ല എന്ന മുദ്രാവാക്യമുയർത്തി കർഷകസംഘം ആറ്റിങ്ങൽ ഏരിയ കമ്മിറ്റി അമേരിക്കൻ വൈസ് പ്രസിഡൻറ് ജെ.ഡി വാന്സിൻ്റെ കോലം കത്തിച്ച് പ്രതിഷേധം സംഘടിപ്പിച്ചു.
പ്രതിഷേധ പ്രകടനം കർഷകസംഘം ഏരിയ സെക്രട്ടറി സി. ദേവരാജൻ ഉദ്ഘാടനം ചെയ്തു. ഏരിയ കമ്മിറ്റി അംഗങ്ങളായ രാധാകൃഷ്ണകുറുപ്പ്, മോഹനൻ നായർ, കൊച്ചു കൃഷ്ണകുറുപ്പ്, മനോഹരൻ, കൃഷ്ണദാസ്, രാധാകൃഷ്ണൻനായർ, അനുമോദ് തുടങ്ങിയവർ പങ്കെടുത്തു.
by Midhun HP News | Apr 21, 2025 | Latest News, കേരളം
ആലപ്പുഴ: ചലിച്ചിത്ര മേഖലയില് പരിചയക്കാരുണ്ടെന്നും എന്നാല് ലഹരി ഇടപാടില്ലെന്നും ഹൈബ്രിഡ് കഞ്ചാവ് കേസിലെ ഒന്നാം പ്രതി തസ്ലിമ സുല്ത്താന. 2 കോടിയോളം രൂപ വിലവരുന്ന ഹൈബ്രിഡ് കഞ്ചാവ് കേസില് കോടതിയില് ഹാജരാക്കിയപ്പോഴായിരുന്നു തസ്ലീമ മാധ്യമങ്ങളോട് ഇക്കാര്യം പറഞ്ഞത്. അതേസമയം, കഞ്ചാവ് കേസില് മൂന്ന് പ്രതികളെയും ആലപ്പുഴ അഡിഷനല് ജില്ലാ ആന്റ് സെഷന് കോടതി എക്സൈസ് കസ്റ്റഡിയില് വിട്ടു.
24 വരെയാണ് കസ്റ്റഡി കാലാവധി. ഹൈക്കോടതിയില് നിന്നുള്ള അഭിഭാഷകനു വക്കാലത്ത് നല്കാന് തസ്ലിമ അപേക്ഷിച്ചെങ്കിലും വക്കാലത്ത് ഫയല് ചെയ്യാതെ വാദിക്കാനാകില്ലെന്നു കോടതി അറിയിച്ചു. കേസിലെ മൂന്നാം പ്രതിയും തസ്ലിമയുടെ ഭര്ത്താവുമായ സുല്ത്താന് അക്ബര് അലിക്ക് കേസില് ബന്ധമില്ലെന്നു പ്രതിഭാഗം വാദിച്ചു. അക്ബര് അലി ലഹരിവസ്തു വില്ക്കുകയോ വാങ്ങുകയോ കൈവശം വയ്ക്കുകയോ ചെയ്തിട്ടില്ലെന്നും ഒന്നാംപ്രതിയുടെ ഭര്ത്താവ് ആണെന്നതിനാല് മാത്രം തെളിവുകള് ഇല്ലാതെ പ്രതിചേര്ത്തതാണെന്നുമാണ് പ്രതിഭാഗത്തിന്റെ വാദം.
മൂന്നു ദിവസത്തേക്കാണ് കസ്റ്റഡി അനുവദിച്ചിരുന്നതെങ്കിലും ഒന്നാം പ്രതിയെ കോടതിയില് എത്തിക്കാന് വൈകിയതു കാരണം കസ്റ്റഡി സമയം കുറയുന്നതു പ്രോസിക്യൂഷന് ചൂണ്ടിക്കാട്ടി. തുടര്ന്നാണ് 24നു വൈകിട്ട് 4 വരെ കസ്റ്റഡി അനുവദിച്ചത്. മൂന്നു പ്രതികളും ജാമ്യത്തിനു നേരത്തെ അപേക്ഷ സമര്പ്പിച്ചിട്ടുണ്ട്. കസ്റ്റഡി കാലാവധി കഴിഞ്ഞശേഷം ഇതു പരിഗണിക്കും.
ഹൈക്കോടതിയില്നിന്നുള്ള അഭിഭാഷകന് ഒന്നാംപ്രതി തസ്ലിമയ്ക്കും രണ്ടാം പ്രതി ഫിറോസിനും വേണ്ടി വക്കാലത്ത് നല്കിയിരുന്നു. എന്നാല് ഈ അഭിഭാഷകനു വക്കാലത്ത് നല്കുന്നില്ലെന്ന് പ്രതികള് കോടതിയെ അറിയിച്ചു. രണ്ടാം പ്രതിക്കായി ആലപ്പുഴയില് നിന്നുള്ള അഭിഭാഷക ഹാജരായി.
by Midhun HP News | Apr 21, 2025 | Latest News, കേരളം
തിരുവനന്തപുരം: കോഴിക്കോട് സര്ക്കാര് മെഡിക്കല് കോളജില് ഹൃദയം, കരള്, വൃക്ക തുടങ്ങിയ അവയവങ്ങള് മാറ്റിവയ്ക്കുന്നതിന് ഉള്പ്പെടെയുള്ള അത്യാധുനിക ഓപ്പറേഷന് തീയറ്ററുകള് പ്രവര്ത്തനസജ്ജമായി. മെഡിക്കല് കോളജ് സര്ജിക്കല് സൂപ്പര് സ്പെഷ്യാലിറ്റി ബ്ലോക്കിലാണ് 14 ഓപ്പറേഷന് തീയറ്ററുകള് പ്രവര്ത്തനസജ്ജമാക്കിയത്. മെഡിക്കല് കോളജില് കരള് മാറ്റിവയ്ക്കല് ശസ്ത്രക്രിയ യാഥാര്ത്ഥ്യമാക്കുകയാണ് ലക്ഷ്യമെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു.
നിലവില് വൃക്ക മാറ്റിവയ്ക്കല് ശസ്ത്രക്രിയ ഇവിടെ നടക്കുന്നുണ്ട്. സര്ജിക്കല് സൂപ്പര് സ്പെഷ്യാലിറ്റി ബ്ലോക്കില് കാര്ഡിയോ വാസ്കുലാര് സര്ജറി, യൂറോളജി, സര്ജിക്കല് ഗ്യാസ്ട്രോഎന്ട്രോളജി, ന്യൂറോസര്ജറി, പ്ലാസ്റ്റിക് സര്ജറി എന്നീ വിഭാഗങ്ങള്ക്കുള്ള ഓപ്പറേഷന് തീയേറ്ററുകളും തീവ്രപരിചരണ വിഭാഗങ്ങളുമാണ് പുതുതായി പ്രവര്ത്തനമാരംഭിച്ചത്. ഓരോ വിഭാഗത്തിനുമായി 20 ഐസിയു കിടക്കകള് സജ്ജമാക്കി. എമര്ജന്സി മെഡിസിന് വിഭാഗം നേരത്തെ തന്നെ ഈ ബ്ലോക്കില് പ്രവര്ത്തനം തുടങ്ങിയിരുന്നു. 5 സര്ജിക്കല് സൂപ്പര് സ്പെഷ്യാലിറ്റി വിഭാഗങ്ങള്ക്കൊപ്പം അനസ്തേഷ്യ വകുപ്പിന്റെ ഒരു വിഭാഗം കൂടി ഈ ബ്ലോക്കിലേക്ക് മാറ്റി.
ഈ സര്ക്കാരിന്റെ കാലത്ത് സര്ക്കാര് മെഡിക്കല് കോളജുകളില് കോട്ടയം മെഡിക്കല് കോളജിലും തിരുവനന്തപുരം മെഡിക്കല് കോളജിലും കരള് മാറ്റിവയ്ക്കല് ശസ്ത്രക്രിയകള് വിജയകരമായി ആരംഭിച്ചിരുന്നു. തുടര്ന്നാണ് കോഴിക്കോട് മെഡിക്കല് കോളജിലും കരള് മാറ്റിവയ്ക്കല് ശസ്ത്രക്രിയയ്ക്ക് ആവശ്യമായ സജ്ജീകരണങ്ങള് സജ്ജമാക്കാന് നിര്ദേശം നല്കിയത്. ഇതിന്റെ ഭാഗമായാണ് പുതിയ ഓപ്പറേഷന് തീയറ്ററുകളില് അവയവം മാറ്റിവയ്ക്കാനുള്ള സംവിധാനങ്ങള് കൂടിയൊരുക്കിയതെന്നും മന്ത്രി വ്യക്തമാക്കി.
by Midhun HP News | Apr 21, 2025 | Latest News, ദേശീയ വാർത്ത
കൊച്ചി: ഫ്രാന്സിസ് മാര്പാപ്പയുടെ വിയോഗത്തോടെ പുതിയ പരമാധ്യക്ഷനെ തെരഞ്ഞെടുക്കാനുള്ള നടപടികള്ക്ക് ആഗോള കത്തോലിക്കാ സഭ തുടക്കമിടും. ലോകത്തിന്റെ വിവിധ ഭാഗങ്ങളില്നിന്നുള്ള കര്ദിനാള്മാരുടെ പേപ്പല് കോണ്ക്ലേവ് ആണ് പുതിയ മാര്പാപ്പയെ തെരഞ്ഞെടുക്കുക. ദുഃഖാചരണ കാലയളവിനു ശേഷമാവും കോണ്ക്ലേവ് ചേരുക.
വിവിധ രാജ്യങ്ങളില്നിന്നുള്ള 252 കര്ദിനാള്മാരില് 135 പേര്ക്കാണ് പുതിയ മാര്പാപ്പയെ തെരഞ്ഞെടുക്കാനുള്ള കോണ്ക്ലേവില് വോട്ടിങ് അവകാശം. ഇതില് നാലു പേര് ഇന്ത്യയില്നിന്നുള്ളവരാണ്.
സിറോ മലങ്കര സഭ മേജര് ആര്ച്ച്ബിഷപ്പ് കര്ദിനാള് ബസേലിയോസ് ക്ലിമിസ്, വൈദികനായിരിക്കെ നേരിട്ടു കര്ദിനാള് പദവിയിലേക്ക് ഉയര്ത്തപ്പെട്ട ജോര്ജ് ജേക്കബ് കൂവക്കാട്, ഹൈദരാബാദ് മെട്രോപൊളിറ്റന് ആര്ച്ച്ബിഷപ്പ് കര്ദിനാള് ആന്റണി പൂല, ഗോവ മെട്രൊപൊളിറ്റന് ആര്ച്ചബിഷപ്പ് കര്ദിനാള് ഫിലിപ് നേരി അന്റോണിയോ സെബാസ്റ്റിയനോ ഡോ റൊസാരിയോ എന്നിവര്ക്കാണ് പുതിയ മാര്പാപ്പയെ തെരഞ്ഞെടുക്കാനുള്ള നിയോഗം. മേജര്ആര്ച്ച്ബിഷപ്പ് സ്ഥാനം ഒഴിഞ്ഞ കര്ദിനാള് ജോര്ജ് ആലഞ്ചേരിക്ക് 80 വയസ്സു കഴിഞ്ഞതിനാല് സിറോ മലബാര് സഭയ്ക്ക് കോണ്ക്ലേവില് വോട്ടവകാശം ഉണ്ടാവില്ല. കര്ദിനാള് ജോര്ജ് കൂവക്കാട് സിറോ മലബാര് സഭയെ പ്രതിനിധീകരിച്ചല്ല, സെന്റ് അന്റോണിയോ ഡി പഡോവ ഡീക്കന് എന്ന നിലയിലാവും കോണ്ക്ലേവില് പങ്കെടുക്കുക.
കറുത്ത പുകയും വെളുത്ത പുകയും
വത്തിക്കാനിലെ സിസ്റ്റിന് ചാപ്പല് പുകക്കുഴലിലൂടെ വരുന്ന പുകയുടെ നിറമായിരിക്കും പുതിയ പാപ്പയെ തെരഞ്ഞെടുത്തതു സംബന്ധിച്ച് സ്ഥിരീകരണം നല്കുക. കോണ്ക്ലേവ് നടക്കുന്നതിനിടയില് വെളുത്ത പുക പുറത്തുവന്നാല് പുതിയ പാപ്പയെ സംബന്ധിച്ച് കോണ്ക്ലേവില് തീരുമാനമായെന്ന് അര്ഥം; കറുത്ത പുകയെങ്കില് കര്ദിനാള്മാര്ക്ക് യോജിപ്പിലെത്താന് ആയിട്ടില്ലെന്നും.
by Midhun HP News | Apr 21, 2025 | Latest News, ജില്ലാ വാർത്ത
തിരുവനന്തപുരം: ഐബി ഉദ്യോഗസ്ഥയുടെ ആത്മഹത്യയില് സുഹൃത്തും ഐബി ഉദ്യോഗസ്ഥനുമായ സുകാന്തിനെതിരെ നടപടി.ഇയാളെ സര്വ്വീസില് നിന്നും പിരിച്ചുവിട്ടു. സുകാന്ത് കേസില് പ്രതിയായ കാര്യം പൊലീസ് ഇന്റലിജന്സ് ബ്യൂറോയെ അറിയിച്ചിരുന്നു. കേസിന്റെ വിശദാംശങ്ങളടക്കം പരിശോധിച്ച ശേഷമാണ് രഹസ്യാന്വേഷണ ബ്യൂറോയുടെ നടപടി.
തിരുവനന്തപുരം വിമാനത്താവളത്തില് നിന്നും ജോലി ചെയ്തിറങ്ങി ശേഷമാണ് ഐബി ഉദ്യോഗസ്ഥ ട്രെയിനിനു മുന്നില് ചാടി മരിക്കുന്നത്. സഹപ്രവര്ത്തകനും സുഹൃത്തുമായിരുന്ന സുകാന്തുമായി പെണ്കുട്ടി അടുപ്പത്തിലായിരുന്നു. സാമ്പത്തിക മായും ശാരീരമായും ചൂഷണം ചെയ്ത ശേഷം വിവാഹ ബന്ധത്തില് നിന്നും സുകാന്ത് പിന്മാറിയതിന്റെ മാനസിക വിഷമനത്തിലാണ് യുവതി ആത്മഹത്യ ചെയ്തതെന്നാണ് പൊലിസ് കേസ്. മരിക്കുന്നതിന് മുമ്പും പെണ്കുട്ടി സുകാന്തിനോടാണ് സംസാരിച്ചതായി പൊലീസ് കണ്ടെത്തിയിരുന്നു. പെണ്കുട്ടി ഗര്ഫഭഛിത്രം നടത്തിയതിനുള്ള തെളിവുകളും ഇവര് തമ്മിലുള്ള വാട്സ് ആപ്പ് ചാറ്റും ഉള്പ്പെടെ പൊലിസിന് ലഭിച്ചിരുന്നു.
മകളുടെ അക്കൗണ്ടില് നിന്നും സുകാന്തിന്റെ അക്കൗണ്ടിലേക്ക് പണം കൈമാറിയ വിവരം ബന്ധുക്കള് വെളിപ്പെടുത്തിയതോടെയാണ് പൊലീസ് സുകാന്തിനെതിരെ അന്വേഷണം ശക്തമാക്കിയത്. പിന്നാലെ സുകാന്ത് ഹൈക്കോടതിയില് മുന്കൂര് ജാമ്യാപേക്ഷ നല്കിയിരുന്നു.
by Midhun HP News | Apr 21, 2025 | Latest News, ദേശീയ വാർത്ത
ന്യൂഡല്ഹി: 2024-25 വര്ഷത്തേക്കുള്ള താരങ്ങളുടെ കരാര് പുറത്തുവിട്ട് ബിസിസിഐ. മലയാളി താരം സഞ്ജു സാംസണ് ഉള്പ്പെടെ 34 താരങ്ങളാണ് പട്ടികയില് ഇടം പിടിച്ചിരിക്കുന്നത്. കഴിഞ്ഞ സീസണില് കരാറിന് പുറത്തായിരുന്ന ശ്രേയസ് അയ്യര്, ഇഷാന് കിഷന് എന്നിവരെ വീണ്ടും വാര്ഷിക കരാറില് ഉള്പ്പെടുത്തിയിട്ടുണ്ട്.
എപ്ലസ് വിഭാഗത്തില് രോഹിത് ശര്മ, വിരാട് കോഹ്ലി, ജസ്പ്രീത് ബുംറ, രവീന്ദ്ര ജഡേജ എന്നിവര് തുടരും. ഏഴ് കോടി രൂപയാണ് ഈ വിഭാഗത്തിലുള്ളവര്ക്ക് വാര്ഷിക പ്രതിഫലമായി ലഭിക്കുക. അഞ്ച് കോടി രൂപ വാര്ഷിക പ്രതിഫലം ലഭിക്കുന്ന എ വിഭാഗത്തില് മുഹമ്മദ് സിറാജ്, കെഎല് രാഹുല്, ശുഭ്മാന് ഗില്, ഹര്ദിക് പാണ്ഡ്യ, മുഹമ്മദ് ഷമി, ഋഷഭ് പന്ത് എന്നിവര് ഇടം നേടി. കഴിഞ്ഞ സീസണില് ബി ഗ്രേഡ് കരാറിലായിരുന്നു പന്ത്.
മൂന്ന് കോടി രൂപ വാര്ഷിക പ്രതിഫലം ലഭിക്കുന്ന ഗ്രൂപ്പ് ബിയില് സൂര്യകുമാര് യാദവ്, കുല്ദീപ് യാദവ്, അക്ഷര് പട്ടേല്, യശസ്വി ജയ്സ്വാള്, ശ്രേയസ് അയ്യര് എന്നിവരാണുള്ളത്. ഗ്രേഡ് സിയില് റിങ്കു സിങ്, തിലക് വര്മ, ഋതുരാജ് ഗെയ്ക്വാദ്, രവി ബിഷ്ണോയി, വാഷിങ്ടണ് സുന്ദര്, മുകേഷ് കുമാര്, സഞ്ജു സാംസണ്, അര്ഷദീപ് സിങ്, പ്രസിദ് കൃഷ്ണി, രജത് പടിധാര്, ധ്രുവ് ജുറൈല്, സര്ഫറാസ് ഖാന്, നിതീഷ് കുമാര് റെഡ്ഡി, ഇഷന് കിഷന്, അഭിഷേക് ശര്മ, ആകാശ് ദീപ്, വരുണ് ചക്രവര്ത്തി, ഹര്ഷിത് റാണ എന്നിവര് ഇടം പിടിച്ചു. ഗ്രൂപ്പ് സി വിഭാഗത്തില് ഉള്പ്പെട്ട താരങ്ങള്ക്ക് വര്ഷത്തില് 1 കോടി രൂപയാണ് പ്രതിഫലം ലഭിക്കുക. ഒരു വര്ഷത്തില് കുറഞ്ഞത് മൂന്ന് ടെസ്റ്റ് മല്സരങ്ങളോ എട്ട് ഏകദിനങ്ങളോ അല്ലെങ്കില് 10 ട്വന്റി20 മത്സരങ്ങളോ കളിച്ച താരങ്ങളെയാണ് കരാറിനായി പരിഗണിക്കുന്നത്.
Recent Comments