by Midhun HP News | Oct 24, 2026 | Latest News, കേരളം
കൊച്ചി: രണ്ടാഴ്ചയ്ക്കിടെ ഏകദേശം 7000 രൂപ ഇടിഞ്ഞ സ്വര്‍ണവിലയില്‍ ഇന്ന് നേരിയ മുന്നേറ്റം. പവന് 80 രൂപയാണ് വര്‍ധിച്ചത്. 1,04,560 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 10 രൂപയാണ് വര്‍ധിച്ചത്. 13,070 രൂപയാണ് ഒരു ഗ്രാം സ്വര്‍ണത്തിന്റെ വില.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില കുതിച്ചു ഉയരുകയാണ്. ബാരലിന് 116 ഡോളര്‍ കടന്നിരിക്കുകയാണ്. ഇതിന്റെ ഫലമായി പണപ്പെരുപ്പ നിരക്ക് കൂടുമെന്നതിനാല്‍ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമെന്ന റിപ്പോര്‍ട്ടുകളാണ് കഴിഞ്ഞ ദിവസങ്ങളില്‍ വിപണിയില്‍ പ്രതിഫലിച്ചത്. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 24, 2026 | Latest News, കേരളം
ക്രൈസ്റ്റ്ചര്‍ച്ച്: ന്യൂസിലന്‍ഡിനെതിരായ ഇന്ത്യയുടെ രണ്ടാം ടി20 ഇന്ന് ഹാഗ്ലി ഓവലില്‍. ഉച്ചയ്ക്ക് 12:30-നാണ് മത്സരം. 226 റണ്‍സിന്റെ റെക്കോര്‍ഡ് ലക്ഷ്യം മറികടന്ന ആവേശം നിലനില്‍ക്കുന്നതിനാല്‍, കഴിഞ്ഞ മത്സരത്തിലെ അതേ ടീമിനെ തന്നെ നിലനിര്‍ത്തണമെന്ന ആവശ്യം ശക്തമാണ്.
ഈ മത്സരത്തില്‍ കീപ്പര്‍ ബാറ്റര്‍ ഇഷാന്‍ കിഷന് കളിക്കില്ലെന്ന് ബിസിസിഐ അറിയിച്ചിട്ടുണ്ട്. ഒന്നാം ടി20 മത്സരത്തിനിടയില്‍ താരത്തിന് വലതു തുടയില്‍ പരിക്കേറ്റതാണ് തിരിച്ചടിയായത്. എന്നാല്‍ ഇഷാന്‍ കിഷന് പരിക്കേറ്റത് വൈഭവിന് പ്ലേയിങ് ഇലവനില്‍ സാധ്യത കൂടി. ഇഷാന്‍ കിഷന് സാധാരണയായി മൂന്നാം നമ്പറിലാണ് ബാറ്റ് ചെയ്യാറുള്ളത്. അദ്ദേഹം പുറത്തായ സാഹചര്യത്തില്‍ ആ സ്ഥാനത്തേക്ക് വൈഭവ് സൂര്യവംശിക്ക് നറുക്കുവീണേക്കാം.
നേരത്തെ, അഭിഷേക് ശര്‍മയും സഞ്ജു സാംസണും മികച്ച ഫോമില്‍ തുടരുന്നതിനാല്‍ വൈഭവ് സൂര്യവംശിക്ക് ഓപ്പണിങ് സ്ഥാനം നല്‍കുന്നതിനെക്കുറിച്ച് നിലവില്‍ ആലോചിക്കുന്നില്ലെന്ന് ഇന്ത്യന്‍ ക്യാപ്റ്റന്‍ ശ്രേയസ് അയ്യരും പരിശീലകന്‍ ഗൗതം ഗംഭീറും വ്യക്തമാക്കിയിരുന്നു.
അതേസമയം നല്ല ബൗണ്‍സ് ലഭിക്കുന്ന ഹാഗ്ലി ഓവലിലെ വിക്കറ്റില്‍ കാറ്റിന്റെ ഗതി കൂടി കണക്കിലെടുത്താകും ഒരു അധിക പേസറെ വേണമണോ രണ്ടാമതൊരു സ്പിന്നറെ വേണമണോ എന്ന് ക്യാപ്റ്റന്‍മാര്‍ തീരുമാനിക്കുക. ഇന്ത്യന്‍ ടി20 ടീം: ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍, വൈഭവ് സൂര്യവംശി, ഇഷാന്‍ കിഷന്, തിലക് വര്‍മ, അക്സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമന്‍ ധിര്‍, പ്രിന്‍സ് യാദവ്, മയങ്ക് യാദവ്, അര്‍ഷ്ദീപ് സിംഗ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.
by Midhun HP News | Oct 24, 2026 | Latest News, കേരളം
പത്തനംതിട്ട: ശബരിമല മില്‍മ നെയ്യ് ക്രമക്കേടില്‍ ആദ്യ അറസ്റ്റ്. ട്രാന്‍സ്പോര്‍ട് കരാറുകാരന്‍ എസ്എസ് ബിനു ആണ് പിടിയില്‍ ആയിരിക്കുന്നത്. സന്നിധാനത്തേക്കുള്ള മില്‍മ നെയ്യ് മറിച്ച് വിറ്റ കേസിലാണ് നടപടി. ഇടപാടില്‍ ദേവസ്വം ബോര്‍ഡിന് രണ്ടര കോടി നഷ്ടം ഉണ്ടായിയെന്നാണ് കണ്ടെത്തല്‍.
ശബരിമലയില്‍ മില്‍മക്ക് പകരം വില കുറഞ്ഞ നെയ്യ് എത്തിച്ചെന്നാണ് കണ്ടെത്തല്‍. ശബരിമലയിലേക്ക് കൊണ്ടുപോയ നെയ്യ് വഴിമധ്യേ മറിച്ചുവിറ്റുവെന്ന് നേരത്തെ കണ്ടെത്തിയിരുന്നു. തമിഴ്‌നാട്ടിലെ രണ്ട് എജന്‍സികള്‍ക്കാണ് നെയ്യ് മറിച്ചുവിറ്റത്. ശ്രീ വെങ്കിടേശ്വര ട്രേഡേഴ്‌സ്, ലിയോ ട്രേഡേഴ്‌സ് എന്നീ ഏജന്‍സികള്‍ക്കാണ് മറിച്ചുവിറ്റത്.
2025-ലെ മകരവിളക്ക് കാലയളവില്‍ പുറത്ത് നിന്നും നെയ്യ് വാങ്ങാനുള്ള തീരുമാനം 2024ലാണ് ബോര്‍ഡ് സ്വീകരിക്കുന്നത്. ഇതിനായി വിളിച്ച ടെന്‍ഡറില്‍ ആറ് സ്ഥാപനങ്ങള്‍ പങ്കാളികളായി. ഈ നടപടിക്രമങ്ങള്‍ പുരോഗമിക്കുന്നതിനിടെ ടെന്‍ഡര്‍ റദ്ദാക്കി കരാര്‍ മില്‍മയ്ക്ക് നല്‍കി. ടെന്‍ഡറില്‍ പങ്കെടുത്ത തമിഴ്നാട്ടില്‍ നിന്നുള്ള സ്ഥാപനം ഒരു ലിറ്റര്‍ നെയ്യ്ക്ക് 369 രൂപ കോട്ട് ചെയ്തപ്പോള്‍ മില്‍മയില്‍ നിന്നും വാങ്ങുന്നതിന് ലിറ്ററിന് 510 രൂപയാണ് ചെലവാക്കിയത്. ഇത്തരത്തില്‍ 1.65 ലക്ഷം ലിറ്റര്‍ നെയ്യ് മില്‍മയില്‍ നിന്നും വാങ്ങിയതിലൂടെ ബോര്‍ഡിന് 2.27 കോടി രൂപയുടെ നഷ്ടമുണ്ടായെന്നായിരുന്നു ദേവസ്വം വിജിലന്‍സ് നടത്തിയ അന്വേഷണത്തിലെ കണ്ടെത്തല്‍.
by Midhun HP News | Oct 24, 2026 | Latest News, ജില്ലാ വാർത്ത
തിരുവനന്തപുരം: കെഎസ്ആര്‍ടിസിക്ക് ടിക്കറ്റ് വരുമാനത്തില്‍ നേട്ടം. ടിക്കറ്റ് വില്‍പ്പനയില്‍ വ്യാഴാഴ്ച (ഒക്ടോബര്‍ 22) 10.64 കോടി രൂപയുടെ വരുമാനമാണ് കോര്പറേഷന് സ്വന്തമാക്കിയത്. ശബരിമല സീസണ്‍ ഒഴികെയുള്ള ദിവസങ്ങളിലെ ടിക്കറ്റ് വരുമാനത്തില്‍ കെഎസ്ആര്‍ടിസിക്ക് രണ്ടാമത്തെ വലിയ നേട്ടമാണ്.
ഇതില്‍ പ്രിയദര്‍ശിനി സര്‍വീസുകളുടെ വരുമാനം മാറ്റിയാലും മറ്റ് സര്‍വീസുകളില്‍ നിന്നായി മാത്രം 7.33 കോടി രൂപ നേടാന്‍ കോര്പറേഷന് കഴിഞ്ഞു. ഉത്സവ സീസണുകള്‍ ഫലപ്രദമായി ഉപയോഗപ്പെടുത്തിയതാണ് ഈ വലിയ വരുമാനത്തിന് കാരണമായത്. വെറ്റ് ലീസ് ബസുകള്‍ കൂടി ഉള്‍പ്പെടുത്തിക്കൊണ്ട് അന്തര്‍സംസ്ഥാന സര്‍വീസുകള്‍ പരമാവധി ഓപ്പറേറ്റ് ചെയ്യാന്‍ കഴിഞ്ഞു. ഇതിലൂടെയാണ് ശരാശരി 5.77 കോടി രൂപയായിരുന്ന പ്രിയദര്‍ശിനി ഇതര സര്‍വീസുകളുടെ വരുമാനം 7.33 കോടിയിലേക്ക് ഉയര്‍ന്നത്.
കഴിഞ്ഞ വര്‍ഷം ഇതേ പൂജാ അവധിക്കാലത്തിന് ശേഷമുള്ള സമാന ദിവസത്തില്‍ 9.41 കോടി രൂപയായിരുന്നു ആകെയുള്ള ടിക്കറ്റ് വരുമാനം. ഇക്കുറി ടിക്കറ്റ് വില്‍പ്പനയില്‍ 1.24 കോടി രൂപയിലധികം വര്‍ധനവ് ഉണ്ടായിട്ടുണ്ട്. പ്രിയദര്‍ശിനി സര്‍വീസുകളെ മാറ്റി നിര്‍ത്തിയാലും മികച്ച വരുമാനം നേടാനായത് സാധാരണ സര്‍വീസുകളിലുള്‍പ്പെടെ കെഎസ്ആര്‍ടിസി നടത്തിയ ചിട്ടയായ പ്രവര്‍ത്തനങ്ങളുടെ നേട്ടമായാണ് കോര്പറേഷന് വിലയിരുത്തുന്നത്.
വ്യാഴാഴ്ച 4,612 ബസുകള്‍ ഉപയോഗിച്ച് 16.02 ലക്ഷം കിലോമീറ്ററാണ് കെഎസ്ആര്‍ടിസി സര്‍വീസ് നടത്തിയത്. ഒരു കിലോമീറ്ററിന് ലഭിച്ച ശരാശരി വരുമാനം കഴിഞ്ഞ വര്‍ഷത്തെ 58.80 രൂപയില്‍ നിന്ന് 66.44 രൂപയായി ഉയര്‍ന്നു. അതുപോലെ ഒരു ബസില്‍ നിന്നുള്ള ശരാശരി വരുമാനവും 20,094 രൂപയില്‍ നിന്ന് 23,215 രൂപയായി വര്‍ധിച്ചു.
ഒറ്റ ദിവസം കൊണ്ട് 30.61 ലക്ഷം യാത്രക്കാരാണ് കെഎസ്ആര്‍ടിസി ബസുകളെ ആശ്രയിച്ചത്. യാത്രക്കാരുടെ ആവശ്യകത മനസ്സിലാക്കി കൂടുതല്‍ സര്‍വീസുകള്‍ ക്രമീകരിക്കാനും, ലഭ്യമായ ബസുകള്‍ കാര്യക്ഷമമായി ഉപയോഗിച്ച് വരുമാനം വര്‍ധിപ്പിക്കാനുമുള്ള പ്രവര്‍ത്തനങ്ങളുമായി മുന്നോട്ടുപോകാനാണ് കോര്‍പറേഷന്റെ തീരുമാനം.
by Midhun HP News | Oct 24, 2026 | Latest News, ജില്ലാ വാർത്ത
തിരുവനന്തപുരം: ബംഗാള്‍ ഉള്‍ക്കടലില്‍ ചുഴലിക്കാറ്റിന് സാധ്യത. തെക്കുകിഴക്കൻ ബംഗാൾ ഉൾക്കടലിലും സമീപ മധ്യകിഴക്കൻ ബംഗാൾ ഉൾക്കടലിലുമായി പുതിയ ന്യൂനമർദ്ദം രൂപപ്പെട്ടു. ശനിയാഴ്ട തീവ്ര ന്യൂനമർദ്ദമായി ശക്തിപ്രാപിക്കാനും തുടർന്ന് പടിഞ്ഞാറ്-വടക്കുപടിഞ്ഞാറൻ ദിശയിൽ നീങ്ങി ഒക്ടോബർ 25-ന് അതിതീവ്ര ന്യൂനമർദ്ദമായി ശക്തിപ്രാപിക്കാനും ഒക്ടോബർ 26-ന് രാവിലെ മധ്യപടിഞ്ഞാറൻ ബംഗാൾ ഉൾക്കടലിൽ ചുഴലിക്കാറ്റായി മാറാനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
ബംഗ്ലാദേശ് നിര്‍ദേശിച്ച അര്‍ണബ് എന്നാണ് ചുഴലിക്കാറ്റിന് പേര് നല്‍കിയത്. ചുഴലിക്കാറ്റ് കേരളത്തെ ബാധിക്കില്ല. ഒഡിഷ, ആന്ധ്ര സംസ്ഥാനങ്ങള്‍ക്ക് കേന്ദ്ര കാലാവസ്ഥ വകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്.നിലവില്‍ ഇരട്ട ന്യൂനമര്‍ദ്ദത്തിന്റെ സ്വാധീനഫലമായി സംസ്ഥാനത്ത് തിങ്കളാഴ്ച വരെ ഒറ്റപ്പെട്ട സ്ഥലങ്ങളില്‍ തീവ്രവും ശക്തവുമായ മഴയാണ് കാലാവസ്ഥ വകുപ്പ് പ്രവചിക്കുന്നത്. ഞായറാഴ്ച വരെ എല്ലാ ജില്ലകളിലും കേന്ദ്ര കാലാവസ്ഥ വകുപ്പ് മഴ മുന്നറിയിപ്പ് നല്‍കിയിട്ടുണ്ട്.
ശനിയാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം ജില്ലകളിലും നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും തീവ്രമഴ കണക്കിലെടുത്ത് ഓറഞ്ച് അലര്‍ട്ട് പ്രഖ്യാപിച്ചു. ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില്‍ 115.6 mm മുതല്‍ 204.4 mm വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
ഇന്ന് കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ഞായര്‍: കണ്ണൂര്‍, കാസര്‍കോട്, ജില്ലകളിലും തിങ്കള്‍ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും യെല്ലോ അലര്‍ട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
മത്സ്യത്തൊഴിലാളി ജാഗ്രത നിർദേശം
കേരള – കർണാടക – ലക്ഷദ്വീപ് തീരങ്ങളിൽ 26/10/2026 വരെ മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.
26/10/2026 വരെ കേരള – കർണാടക – ലക്ഷദ്വീപ് തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
കള്ളക്കടൽ ജാഗ്രത നിർദേശം
കള്ളക്കടൽ പ്രതിഭാസത്തിന്റെ ഭാഗമായി തിരുവനന്തപുരം (കാപ്പിൽ മുതൽ പൊഴിയൂർ വരെ) ജില്ലയിലെ തീരങ്ങളിൽ 24/10/2026 രാത്രി 11.30 വരെ 0.8 മുതൽ 1.4 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കള്ളക്കടൽ പ്രതിഭാസത്തിന്റെ ഭാഗമായി കന്യാകുമാരി തീരത്ത് 24/10/2026 വൈകുന്നേരം 05.30 വരെ 0.9 മുതൽ 1.4 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക.
by Midhun HP News | Oct 23, 2026 | Latest News, കേരളം
കൊച്ചി: നെടുമ്പാശേരിയില്‍ മൂന്നു പേരെ കാറിടിച്ചു കൊലപ്പെടുത്തിയ സംഭവത്തില്‍ മുഖ്യപ്രതി സുഹൈല്‍ സജീവ് കാറോടിച്ചിരുന്നത് 160 കിലോമീറ്റര്‍വരെ വേഗതയിലായിരുന്നു എന്ന് കണ്ടെത്തല്‍. അപകടത്തിനു ശേഷം പൊലീസിനോട് താന്‍ 120 കിലോ മീറ്റര്‍ വേഗതയിലായിരുന്നു കാറോടിച്ചത് എന്നാണ് സുഹൈല്‍ മൊഴി നല്‍കിയിരുന്നത്. എന്നാല്‍ സിസിടിവി ദൃശ്യങ്ങളും കാറിലുണ്ടായിരുന്ന സുഹൃത്തുക്കള്‍ അപകട സമയത്ത് പകര്‍ത്തിയ ദൃശ്യങ്ങളും പരിശോധിച്ചതോടെയാണ് 160 കി.മീ. വേഗതയിലാണ് കാര്‍ ഓടിച്ചതെന്ന് വ്യക്തമായത്.
എയര്‍പോര്‍ട്ട് റോഡിലെ ക്യാമറകള്‍ പരിശോധിച്ചതില്‍ നിന്നും വെറും 11 സെക്കന്റുകൊണ്ടാണ് കാര്‍ അരക്കിലോമീറ്റര്‍ ദൂരം പിന്നിട്ടതെന്നും കണ്ടെത്തി. അതേസമയം, അപകടത്തിന്റെ ദൃശ്യങ്ങള്‍ ഫോണില്‍ ഉണ്ടായിരുന്നോ എന്ന കാര്യം പൊലീസ് സ്ഥിരീകരിച്ചിട്ടില്ല. പ്രദേശത്തുള്ള അന്‍പതോളം സിസിടിവി ദൃശ്യങ്ങള്‍ പരിശോധിച്ചും വാഹനത്തിന്റെ വേഗം കണക്കാക്കാന്‍ പൊലീസ് ശ്രമിക്കുന്നുണ്ട്. കാറിന് മറ്റ് സാങ്കേതിക തകരാറുകള്‍ ഒന്നും ഉണ്ടായിരുന്നില്ലെന്ന് മോട്ടോര്‍ വാഹന വകുപ്പ് സ്ഥിരീകരിച്ചിട്ടുണ്ട്. കൂടാതെ കാറിന്റെ കൃത്യമായ വേഗതാ പരിശോധനയ്ക്കായി ‘ഇവന്റ് ഡാറ്റാ റെക്കോര്‍ഡര്‍’ (EDR) ജര്‍മനിയിലെ ബിഎംഡബ്യൂ ആസ്ഥാനത്തേക്ക് പൊലീസ് അയിച്ചിരിക്കുകയാണ്.
ഈ മാസം 11ന് പുലര്‍ച്ചെ 1.41നാണ് കാര്‍ സ്‌കൂട്ടറില്‍ ഇടിക്കുന്നത്. 1.40 മുതല്‍ 1.41 വരെയുള്ള 60 സെക്കന്റ് സമയത്ത് വാഹനത്തിന്റെ വേഗം മണിക്കൂറില്‍ 140 കിലോമീറ്ററില്‍ നിന്ന് 160 വരെ എത്തിയിട്ടുണ്ടെന്നാണ് ലഭിച്ച ദൃശ്യങ്ങള്‍ പരിശോധിച്ച് പൊലീസ് അനുമാനിക്കുന്നത്. കൂട്ടുപ്രതികളായ നിനവ്, ജോയല്‍, അമീര്‍ എന്നിവരുടെ മൊബൈല്‍ ഫോണുകളും അന്വേഷണസംഘം പരിശോധിച്ചുവരികയാണ്. ഇതിലൊരു ഫോണില്‍ നിന്നാണ് അപകട ദിവസമുണ്ടായ മരണപ്പാച്ചില്‍ ചിത്രീകരിച്ചിരിക്കുന്നത് പൊലീസിന് ലഭിച്ചത്. മാത്രമല്ല, അപകടമുണ്ടാകുന്നതിന് മുന്‍പ് ഇതേ റോഡിലൂടെ ഇവര്‍ കാര്‍ അമിതവേഗതയില്‍ ഓടിച്ചിരുന്നു എന്നും പൊലീസ് കണ്ടെത്തിയിട്ടുണ്ട്.
പ്രതികളുടെ ജാമ്യാപേക്ഷ പരിഗണിക്കവേ, മജിസ്‌ട്രേറ്റാണ് കൃത്യമായ വേഗത എത്രയെന്ന് അന്വേഷണോദ്യഗസ്ഥനോട് ചോദിച്ചത്. തുടര്‍ന്നാണ് ഇഡിആര്‍ പരിശോധിക്കാനായി ജര്‍മനിയിലേക്ക് അയച്ച കാര്യം വ്യക്തമാക്കിയത്. ഇഡിആറിനൊപ്പം മറ്റ് തെളിവുകളും കൂടി സമാഹരിക്കുകയാണ് പൊലീസ്. ജാമ്യാപേക്ഷ സെഷന്‍സ് കോടതി വീണ്ടും പരിഗണിക്കുമ്പോള്‍ വാഹനത്തിന്റെ വേഗത സംബന്ധിച്ച കാര്യങ്ങളും പൊലീസ് അറിയിക്കും.
Recent Comments