by Midhun HP News | Oct 24, 2026 | Latest News, ജില്ലാ വാർത്ത
തിരുവനന്തപുരം: സ്‌കൂളുകളിൽ അച്ചടക്കം ഉറപ്പാക്കുന്നതിന്റെ ഭാഗമായി വിദ്യാർഥികളുടെ ബാഗുകൾ പരിശോധിക്കാനും തലമുടി വെട്ടിക്കുന്നത് അടക്കമുള്ള വിഷയങ്ങളിൽ ഇടപെടാനും അധ്യാപകർക്ക് അനുമതി നൽകി സംസ്ഥാന ബാലാവകാശ കമ്മീഷൻ. വിദ്യാർഥികൾക്കിടയിലെ മൊബൈൽ ഫോൺ ഉപയോഗവും ലിപ്സ്റ്റിക് ഉൾപ്പെടെയുള്ള ആഡംബര സൗന്ദര്യവർധക വസ്തുക്കളുടെ അമിത ഉപയോഗവും കർശനമായി തടയണമെന്ന് കമ്മീഷൻ ഉത്തരവിട്ടു.
മുടി നീട്ടിവളർത്തുക, സ്‌കിൻ ഫിറ്റ് പാന്റ്സ്, കമ്മൽ, മോതിരം എന്നിവ ധരിക്കാൻ അനുവദിക്കുക, ബാഗ് പരിശോധനയും ഫോൺ പിടിച്ചെടുക്കലും തടയുക തുടങ്ങിയ ആവശ്യങ്ങൾ ഉന്നയിച്ച് ഒരു കൂട്ടം വിദ്യാർഥികൾ സമർപ്പിച്ച ഹരജി തള്ളിക്കൊണ്ടാണ് കമ്മീഷന്റെ പുതിയ തീരുമാനം. മുടിവെട്ടുന്നത് ഉൾപ്പെടെയുള്ള കാര്യങ്ങൾ സ്കൂൾ അച്ചടക്കത്തിന്റെ ഭാഗമാണെന്നും ഇതിൽ ഏകീകൃത ചട്ടം പാലിക്കണമെന്നും കമ്മീഷൻ വ്യക്തമാക്കി.
കുട്ടികളുടെ അന്തസ്സിന് ക്ഷതമേൽക്കുമെന്ന കാരണത്താൽ മുൻപ് ബാഗ് പരിശോധന കമ്മീഷൻ വിലക്കിയിരുന്നു. എന്നാൽ, ലഹരി ഉപയോഗം അടക്കമുള്ള സംശയകരമായ സാഹചര്യങ്ങളിൽ അധ്യാപകർക്ക് ഇനി ബാഗ് പരിശോധന നടത്താം. അത്യാവശ്യ ഘട്ടങ്ങളിൽ രക്ഷിതാക്കളുടെ അറിവോടെ കൊണ്ടുവരുന്ന ഫോണുകൾ സ്കൂൾ സമയം കഴിയുന്നത് വരെ സ്വിച്ച് ഓഫ് ചെയ്ത് സൂക്ഷിക്കാൻ സൗകര്യമൊരുക്കണം. അച്ചടക്ക ലംഘനങ്ങളും ലഹരി ഉപയോഗവും തടയാൻ അധ്യാപകർക്ക് സാധിക്കാത്ത ഘട്ടങ്ങളിൽ നിയമനടപടികളിലേക്ക് കടക്കാമെന്നും ഉത്തരവിൽ നിർദേശിക്കുന്നു.
by Midhun HP News | Oct 24, 2026 | Latest News, ജില്ലാ വാർത്ത
അഞ്ചുതെങ്ങ് സ്വദേശി സൗദി അറേബ്യയിൽ വച്ച് നിര്യാതനായി. അഞ്ചുതെങ്ങ് അമ്മൻകോവിൽ പിള്ളയ്ക്കവിളാകത്ത് (പുണർതം, വിളക്കാട്ട്കോണം, കിളിമാനൂർ)
അജയകുമാർ (54) (അത്തൻ) ആക്സ്മികമായ അസുഖങ്ങളെ തുടർന്ന് സൗദി അറേബ്യയിൽവച്ച് നിര്യാതനായത്.
ഇന്നലെ രാവിലെയോടെ സൗദിയിലെ താമസസ്ഥലത്തെ മുറിയിൽ മരിച്ച നിലയിൽ കണ്ടെത്തുകയായിരുന്നു. ബിപി കൂടിയതാണ് മരണകാരണമെന്നാണ് പ്രാഥമിക നിഗമനം. സൗദിയിലെ പ്രമുഖ ഡെക്കോർ വർക്ക്‌ കമ്പനിയിലെ ജീവനക്കാരനായിരുന്നു.
അച്ഛൻ : സോമരാജൻ (Late)
അമ്മ : കമലമ്മ (Late)
by Midhun HP News | Oct 24, 2026 | Latest News, ജില്ലാ വാർത്ത
ചിറയിൻകീഴ്: വീട്ടിൽ വിഷം കലർത്തിയ വെള്ളം കുടിച്ച് ഗൃഹനാഥൻ മരിച്ചു.ഇതറിയാതെ അതേ വെള്ളം കുടിച്ച ഭാര്യയെയും മകനെയും ആശുപത്രിയിൽ പ്രവേശിപ്പിച്ചു. ജീവനൊടുക്കിയെന്നാണ് പുറത്തുവരുന്ന വിവരം.
വിനോദ് വിഷം കലർത്തിയ വിവരം അറിയാതെ മുറിയിലുണ്ടായിരുന്ന വെള്ളം ഭാര്യ സിന്ധുവും മകൻ മിഥുനും കുടിക്കുകയായിരുന്നു. തുടർന്ന് ഇരുവരെയും ചികിത്സയ്ക്കായി ചിറയിൻകീഴ് താലൂക്ക് ഹോസ്പിറ്റലിലേക്കും അവിടെ പ്രാഥമിക ചികിത്സ നൽകിയ ശേഷം മെഡിക്കൽ കോളേജ് ആശുപത്രിയിലേക്ക് മാറ്റി.
ചിറയിൻകീഴ് പോലീസ് കേസെടുത്തു അന്വേഷണം ആരംഭിച്ചു.
എന്നാൽ സ്ത്രീയും മകനും കുടിച്ച വെള്ളത്തിൽ വിഷാംശം ഇല്ലെന്നാണ് പ്രാഥമിക അന്വേഷണത്തിൽ കണ്ടെത്തിയത്. ഇതിനെ തുടർന്നാണ് ഇവരെ മെഡിക്കൽ കോളേജിലെ ഒബ്സർവേഷൻ വാർഡിലേക്ക് മാറ്റിയത്.
by Midhun HP News | Oct 24, 2026 | Latest News, ജില്ലാ വാർത്ത
തിരുവനന്തപുരം: ഗവര്‍ണറുടെ ഔദ്യോഗിക വസതിയില്‍ മാംസാഹാരം വിലക്കിയെന്ന വാര്‍ത്ത നിഷേധിച്ച് ലോക്ഭവന്‍. വിലക്ക് എര്‍പ്പെടുത്തിയത് ഗവര്‍ണര്‍ക്ക് ഭക്ഷണം പാകം ചെയ്യുന്ന അടുക്കളയില്‍ മാത്രമാണെന്നും ജീവനക്കാര്‍ക്ക് ഇഷ്ടമുള്ള ഭക്ഷണം കഴിക്കാമെന്നും ലോക്ഭവന്‍ വ്യക്തമാക്കി. ഗവര്‍ണര്‍ ഓം പ്രകാശ് മാഥൂര്‍ ശുദ്ധ വെജിറ്റേറിയന്‍ ആണ്. ആ സാഹചര്യത്തില്‍ ഇനി മുതല്‍ ലോക്ഭവന്‍ അടുക്കളയില്‍ മാംസമോ മത്സ്യമോ പാചകം ചെയ്യേണ്ടതില്ലെന്നായിരുന്നു നിര്‍ദേശം. സമ്പൂര്‍ണമായി മാംസാഹാരം വിലക്കിയെന്ന തരത്തിലുള്ള വാര്‍ത്ത തെറ്റാണെന്നും ലോക്ഭവന്‍ അറിയിച്ചു.
ലോക്ഭവന്റെ അടുക്കളയില്‍നിന്നു ഗവര്‍ണര്‍ക്കും കുറച്ച് പഴ്സനല്‍ സ്റ്റാഫുകള്‍ക്കും മാത്രമാണു ഭക്ഷണം നല്‍കുന്നത്. ബാക്കി ജീവനക്കാര്‍ മുഴുവന്‍ വീടുകളില്‍നിന്നു ഭക്ഷണം കൊണ്ടുവരികയോ പുറത്തുപോയി ഭക്ഷണം കഴിക്കുകയോ ആണ് ചെയ്യുന്നത്. അവര്‍ക്ക് ഭക്ഷണത്തിന് ഒരു തരത്തിലുള്ള നിയന്ത്രണവും ഏര്‍പ്പെടുത്തിയിട്ടില്ലെന്ന് ലോക്ഭവന്‍ വൃത്തങ്ങള്‍ വ്യക്തമാക്കി.
ലോക്ഭവന്റെ അടുക്കളയില്‍ മാംസാഹാരം പാകം ചെയ്യരുതെന്ന കേരള ഗവര്‍ണര്‍ ഓംപ്രകാശ് മാഥൂറിന്റെ നിര്‍ദേശം വിവാദമയിരുന്നു. എഐസിസി ജനറല്‍ സെക്രട്ടറി കെസി വേണുഗോപാല്‍ ഉള്‍പ്പടെ ഇതിനെതിരെ രംഗത്ത് എത്തിയിരുന്നു. ചുമതലയേല്‍ക്കുന്നതിന് മണിക്കൂറുകള്‍ക്കു മുന്‍പേ, കേരളത്തിന്റെ സാമൂഹിക സാഹചര്യം പോലും മനസ്സിലാക്കുന്നതിനുമുന്‍പേ, താന്‍ അധികാരമേല്‍ക്കുന്നതോടെ എല്ലാവരും വെജിറ്റേറിയനാകണമെന്ന ഗവര്‍ണറുടെ നിര്‍ദേശം കടന്ന കൈയായിപ്പോയെന്ന് കെസി വേണുഗോപാല്‍ പറഞ്ഞു.
സമ്മിശ്രമായ ഭക്ഷണസംസ്‌കാരമുള്ള നാടാണ് കേരളമെന്നും അതുകൊണ്ടുതന്നെ വെജിറ്റേറിയനായും നോണ്‍ വെജിറ്റേറിയനായും ഓരോരുത്തര്‍ക്കും ഇവിടെ തുടരാമെന്നും അദ്ദേഹം പറഞ്ഞു. മലയാളികള്‍ ശീലിച്ച ഭക്ഷണരീതിക്ക് വിലക്കേര്‍പ്പെടുത്താനോ ഇനി എന്തു കഴിക്കണമെന്ന് നിര്‍ദേശിക്കാനോ ആരെങ്കിലും ശ്രമിച്ചാല്‍ അത് അംഗീകരിക്കാനാകില്ല. ഭക്ഷണത്തില്‍പ്പോലും ഇടപെട്ട് മലയാളികളുടെ തനതായ ജീവിതരീതികള്‍ ഇല്ലാതാക്കാനുള്ള ഇത്തരം അന്ത്യശാസനങ്ങള്‍ ഭരണഘടന ഉറപ്പുനല്‍കുന്ന മൗലികാവകാശങ്ങളുടെ ലംഘനമാണെന്നും കെ.സി. വേണുഗോപാല്‍ വിമര്‍ശിച്ചു.
by Midhun HP News | Oct 24, 2026 | Latest News, കേരളം
കൊച്ചി: രണ്ടാഴ്ചയ്ക്കിടെ ഏകദേശം 7000 രൂപ ഇടിഞ്ഞ സ്വര്‍ണവിലയില്‍ ഇന്ന് നേരിയ മുന്നേറ്റം. പവന് 80 രൂപയാണ് വര്‍ധിച്ചത്. 1,04,560 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 10 രൂപയാണ് വര്‍ധിച്ചത്. 13,070 രൂപയാണ് ഒരു ഗ്രാം സ്വര്‍ണത്തിന്റെ വില.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില കുതിച്ചു ഉയരുകയാണ്. ബാരലിന് 116 ഡോളര്‍ കടന്നിരിക്കുകയാണ്. ഇതിന്റെ ഫലമായി പണപ്പെരുപ്പ നിരക്ക് കൂടുമെന്നതിനാല്‍ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമെന്ന റിപ്പോര്‍ട്ടുകളാണ് കഴിഞ്ഞ ദിവസങ്ങളില്‍ വിപണിയില്‍ പ്രതിഫലിച്ചത്. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 24, 2026 | Latest News, കേരളം
ക്രൈസ്റ്റ്ചര്‍ച്ച്: ന്യൂസിലന്‍ഡിനെതിരായ ഇന്ത്യയുടെ രണ്ടാം ടി20 ഇന്ന് ഹാഗ്ലി ഓവലില്‍. ഉച്ചയ്ക്ക് 12:30-നാണ് മത്സരം. 226 റണ്‍സിന്റെ റെക്കോര്‍ഡ് ലക്ഷ്യം മറികടന്ന ആവേശം നിലനില്‍ക്കുന്നതിനാല്‍, കഴിഞ്ഞ മത്സരത്തിലെ അതേ ടീമിനെ തന്നെ നിലനിര്‍ത്തണമെന്ന ആവശ്യം ശക്തമാണ്.
ഈ മത്സരത്തില്‍ കീപ്പര്‍ ബാറ്റര്‍ ഇഷാന്‍ കിഷന് കളിക്കില്ലെന്ന് ബിസിസിഐ അറിയിച്ചിട്ടുണ്ട്. ഒന്നാം ടി20 മത്സരത്തിനിടയില്‍ താരത്തിന് വലതു തുടയില്‍ പരിക്കേറ്റതാണ് തിരിച്ചടിയായത്. എന്നാല്‍ ഇഷാന്‍ കിഷന് പരിക്കേറ്റത് വൈഭവിന് പ്ലേയിങ് ഇലവനില്‍ സാധ്യത കൂടി. ഇഷാന്‍ കിഷന് സാധാരണയായി മൂന്നാം നമ്പറിലാണ് ബാറ്റ് ചെയ്യാറുള്ളത്. അദ്ദേഹം പുറത്തായ സാഹചര്യത്തില്‍ ആ സ്ഥാനത്തേക്ക് വൈഭവ് സൂര്യവംശിക്ക് നറുക്കുവീണേക്കാം.
നേരത്തെ, അഭിഷേക് ശര്‍മയും സഞ്ജു സാംസണും മികച്ച ഫോമില്‍ തുടരുന്നതിനാല്‍ വൈഭവ് സൂര്യവംശിക്ക് ഓപ്പണിങ് സ്ഥാനം നല്‍കുന്നതിനെക്കുറിച്ച് നിലവില്‍ ആലോചിക്കുന്നില്ലെന്ന് ഇന്ത്യന്‍ ക്യാപ്റ്റന്‍ ശ്രേയസ് അയ്യരും പരിശീലകന്‍ ഗൗതം ഗംഭീറും വ്യക്തമാക്കിയിരുന്നു.
അതേസമയം നല്ല ബൗണ്‍സ് ലഭിക്കുന്ന ഹാഗ്ലി ഓവലിലെ വിക്കറ്റില്‍ കാറ്റിന്റെ ഗതി കൂടി കണക്കിലെടുത്താകും ഒരു അധിക പേസറെ വേണമണോ രണ്ടാമതൊരു സ്പിന്നറെ വേണമണോ എന്ന് ക്യാപ്റ്റന്‍മാര്‍ തീരുമാനിക്കുക. ഇന്ത്യന്‍ ടി20 ടീം: ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍, വൈഭവ് സൂര്യവംശി, ഇഷാന്‍ കിഷന്, തിലക് വര്‍മ, അക്സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമന്‍ ധിര്‍, പ്രിന്‍സ് യാദവ്, മയങ്ക് യാദവ്, അര്‍ഷ്ദീപ് സിംഗ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.
Recent Comments