മേലാറ്റിങ്ങലിൽ വീട്ടിൽ സ്ഫോടക വസ്തു എറിഞ്ഞ് ബസ് അടിച്ച് തകർത്ത കേസിലെ പ്രതികൾ അറസ്റ്റിൽ

by Midhun HP News | Jan 5, 2025 | Latest News, ജില്ലാ വാർത്ത

ആറ്റിങ്ങൽ മേലാറ്റിങ്ങലിൽ വീട്ടിൽ സ്ഫോടക വസ്തു എറിഞ്ഞ് ബസ് അടിച്ച് തകർത്ത കേസിൽ ആർ എസ് എസ് പ്രവർത്തകർ അറസ്റ്റിൽ. ഇക്കഴിഞ്ഞ ജനുവരി 1 ന് ആലംകോട് മേലാറ്റിങ്ങൽ ശിവക്ഷേത്രത്തിന് സമീപം കാർത്തികയിൽ ശ്രീജിത്തിൻ്റെ വീട്ടിൽ സ്ഫോടക വസ്തു എറിഞ്ഞ് വീടിനും ബസിനും 1,25,000 രൂപയുടെ നാശനഷ്ടം വരുത്തിയ കേസിലെ പ്രതികളാണ് അറസ്റ്റിലായത്.

ആറ്റിങ്ങൽ ചെറുന്നിയൂർ അയന്തി ജംഗ്ഷനു സമീപം പുന്നവിള വീട്ടിൽ സജു( 25), മാമം പറക്കാട്ടു വീട്ടിൽ ഉണ്ണി എന്നു വിളിക്കുന്ന അലിൻ കുമാർ (35), ഒറ്റൂർ മൂങ്ങോട് പേരേറ്റിൽ ചന്ദനക്കാട്ടിൽ വീട്ടിൽ ജിഷ്ണു ജിത്ത്(30) എന്നിവരാണ് പോലീസ് ിടിയിലായത്. സിസിടിവി ദൃശ്യങ്ങളും മൊബൈൽ ഫോൺ കോളുകളും കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് പ്രതികളെ പിടികൂടാൻ കഴിഞ്ഞത്.

ആറ്റിങ്ങൽ പോലീസ് സ്റ്റേഷൻ ഇൻസ്പെക്ടർ ഗോപകുമാർ.ജി, എസ്ഐ ജിഷ്ണു, എഎസ്ഐ മാരായ രാധാകൃഷ്ണൻ, ഉണ്ണിരാജ്, എസ്. സി. പി. ഒ ശരത് കുമാർ, നിധിൻ, അനൂപ് എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്. അറസ്റ്റ് ചെയ്ത പ്രതികളെ കോടതിയിൽ ഹാജരാക്കി റിമാന്റ് ചെയ്തു.

കേരള സ്കൂൾ കലോത്സവം : അറബിക് സെമിനാർ നാളെ

by Midhun HP News | Jan 5, 2025 | Latest News, ജില്ലാ വാർത്ത

തിരുവനന്തപുരം: 63-ാമത് സംസ്ഥാന സ്കൂൾ കലോത്സവത്തിന്റെ ഭാഗമായി സംഘടിപ്പിക്കുന്ന അറബി ഭാഷാ സെമിനാർ നാളെ (തിങ്കൾ) രാവിലെ 10 മണിക്ക് തൈക്കാട് ശിശുക്ഷേമ ഹാളിൽ പൊതു വിദ്യാഭ്യാസ വകുപ്പ് മന്ത്രി വി. ശിവൻകുട്ടി ഉദ്ഘാടനം ചെയ്യും. അറബിക് കലോത്സവം ചെയർപേഴ്സൺ ഷാജിത നാസർ അദ്ധ്യക്ഷത വഹിക്കുന്ന ഉദ്ഘാടന സെഷനിൽ മേയർ ആര്യ രാജേന്ദ്രൻ മുഖ്യാതിഥിയായി പങ്കെടുക്കും. അഡ്വ.ആൻ്റണി രാജു എം.എൽ., ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാർ, ഡെപ്യൂട്ടി മേയർ പി.കെ. രാജു, പൊതുവിദ്യാഭ്യാസ ഡയറക്ടർ ഷാനവാസ് ഐ.എ.എസ്, അറബിക് കലോത്സവ കൺവീനർ റഷീദ് മദനി, വിവിധ അധ്യാപക സംഘടനാ പ്രതിനിധികൾ തുടങ്ങിയവർ പങ്കെടുക്കും.

തുടർന്ന് നടക്കുന്ന സംസ്ഥാന അറബിക് സെമിനാറിൽ പുളിക്കൽ മദീനത്തുൽ ഉലൂം അറബിക് കോളേജ് അസി.പ്രൊഫസർ ഡോ. സാബിർ നവാസ് വിഷയം അവതരിപ്പിച്ചു സംസാരിക്കും. സംസ്ഥാന അറബിക് സ്പെഷ്യൽ ഓഫീസർ ഹാരിസ് ടി. പി. മോഡറേറ്റർ ആയിരിക്കും. സെമിനാറിൻറെ സമാപനത്തിൽ ഭാഷാ പണ്ഡിതരെ ആദരിക്കും.

ആറ്റിങ്ങൽ എംപ്ലോയ്മെന്റ് എക്സ്ചേഞ്ചിന്റെ കരിയർ ഗൈഡൻസ് തൊഴിൽമേള സംഘടിപ്പിച്ചു

by Midhun HP News | Jan 5, 2025 | Latest News, ജില്ലാ വാർത്ത

ആറ്റിങ്ങൽ നഗരസഭാ സാക്ഷരതാമിഷൻ പത്താം തരം തുല്യത 17-ാം ബാച്ച് , +2 തുല്യതാ 7-ാം ബാച്ചിലെയും വിജയികളെ അനുമോദിക്കുന്ന വിജയോൽസവവും സാക്ഷരതാ മിഷൻ പഠിതാക്കൾക്കായി ആറ്റിങ്ങൽ എംപ്ലോയ്മെന്റ് എക്സ്ചേഞ്ചിന്റെ കരിയർ ഗൈഡൻസ് തൊഴിൽമേളയും ആറ്റിങ്ങൽ നഗരസഭാ ചെയർ പേഴ്സൺ അഡ്വ. എസ് കുമാരി ഉദ്ഘാടനം ചെയ്തു.

വിദ്യാഭ്യാസ സ്റ്റാന്റിംഗ് കമ്മിറ്റി ചെയർ പേഴ്സൺ ഗിരിജ ടീച്ചർ അധ്യക്ഷയായിരുന്നു. വികസന സ്റ്റാന്റിംഗ് കമ്മിറ്റി ചെയർ പേഴ്സൺ ഷീജ.എസ്, വാർഡ് കൗൺസിലർ ബിനു, എംപ്ലോയ്മെന്റ് കരിയർ ഗൈഡൻസ് ഓഫീസർ ഷമീർ, സെന്റർ കോ-ഓഡിനേറ്റർമാരായ മിനിരേഖ.ജി ആർ, ബിന്ദു. കെ ആർ, അദ്ധ്യാപകരായ മുഹമ്മദ് ഷാഫി, ഷൈനി, അരുണ, ജിൻഷ, ദിവ്യ, സൻസ, ശ്രുതി, ഷിജു പ്രേരക്മാരായ ഹരികുമാർ, ശോഭ തുടങ്ങിയവരും പൂർവ്വ വിദ്യാർത്ഥികളും പങ്കെടുത്തു.

നാഷണൽ പോസ്റ്റൽ & ആർ. എം. എസ് പെന്ഷനേഴ്സ് അസോസിയേഷൻ സംസ്ഥാന സമ്മേളനം നടന്നു

by Midhun HP News | Jan 5, 2025 | Latest News, ജില്ലാ വാർത്ത

നാഷണൽ പോസ്റ്റൽ & ആർ. എം. എസ് പെന്ഷനേഴ്സ് അസോസിയേഷൻ സംസ്ഥാന സമ്മേളനം ആറ്റിങ്ങൽ ഭജന മഠം ഹാളിൽ പീതാമ്പരകുറുപ്പ് മുൻ എം. പി ഉദ്ഘാടനം ചെയ്തു. പുല്ലമ്പാറ പൂക്കുഞ്ഞു, ഡോ. വി. എസ് അജിത് കുമാർ, ആനക്കുഴി ഷാനവാസ്‌ എന്നിവർ പങ്കെടുത്തു.

സുമനസുകളുടെ കനിവ് തേടുന്നു

by Midhun HP News | Jan 5, 2025 | Latest News, ജില്ലാ വാർത്ത

മഞ്ഞപിത്തം രോഗബാധിതനായി ആന്തരിക അവയവങ്ങളുടെ പ്രവർത്തനത്തെ സാരമായി ബാധിച്ച് കിംസ് ഹോസ്പിറ്റലിൽ എംഐസിയുവിൽ പ്രവേശിപ്പിച്ചിരിക്കുന്ന ഊരുപൊയ്ക സ്വദേശിയായ കൃഷ്ണകുമാറിന് ഒരു ദിവസം 60,000 രൂപയ്ക്ക് മുകളിലാണ് ചികിത്സ ചിലവ് വേണ്ടി വരുന്നത്. സാമ്പത്തികമായി പിന്നോക്കം നിൽക്കുന്ന ഈ കുടുംബത്തിനെ സഹായിക്കാൻ താല്പര്യമുള്ളവർ താഴെക്കാണുന്ന നമ്പറിൽ ബന്ധപ്പെടാവുന്നതാണ്.
മൊബൈൽ നമ്പർ: 70 34 26 40 24