by Midhun HP News | Dec 30, 2024 | Latest News, കേരളം
കൊച്ചി: കൊച്ചി കലൂര് സ്റ്റേഡിയത്തിലെ ഗാലറിയില് നിന്ന് വീണ് ഉമ തോമസ് എംഎല്എയ്ക്ക് പരിക്കേറ്റ സംഭവത്തില് കേസെടുത്ത് പൊലീസ്. നൃത്ത പരിപാടി സംഘടിപ്പിച്ചത് സുരക്ഷാ മാനദണ്ഡങ്ങള് പാലിക്കാതെയാണെന്ന് ചൂണ്ടിക്കാണിച്ച് സംഘാടകര്ക്കെതിരെയാണ് കേസെടുത്തത്. സ്റ്റേജ് നിര്മാണ കരാറുകാര്ക്കെതിരെയും എഫ് ഐ ആര് രജിസ്റ്റര് ചെയ്തു.
കമ്മീഷണറുടെ നേതൃത്വത്തില് പൊലീസ് സ്ഥലം പരിശോധിച്ചിരുന്നു. 12 അടി ഉയരത്തിലാണ് ഗാലറി ക്രമീകരിച്ചത്. 55 അടി നീളമുള്ള സ്റ്റേജില് എട്ടടി വീതിയിലാണ് കസേരകള് ഇടാന് സ്ഥലമൊരുക്കിയത്. ദുര്ബലമായ ക്യൂ ബാരിയേര്സ് ഉപയോഗിച്ചായിരുന്നു മുകളില് കൈവരിയൊരുക്കിയത്. സംഭവത്തില് കേസെടുക്കാന് എഡിജിപി മനോജ് എബ്രഹാം കൊച്ചി പൊലീസ് കമ്മീഷണര്ക്ക് നിര്ദേശം നല്കി. പാലാരിവട്ടം പൊലീസാണ് കേസെടുത്തത്.
ഗുരുതരമായി പരിക്കേറ്റ ഉമ തോമസ് എംഎല്എ അതീവ ഗുരുതരാവസ്ഥയില് അല്ലെന്നും ഐസിയുവിലേക്ക് മാറ്റിയെന്നും ഡോക്ടര്മാര് പറഞ്ഞു. വീഴ്ചയുടെ ആഘാതത്തില് തലയ്ക്കും ശ്വാസകോശത്തിനും പരിക്കേറ്റ എംഎല്എ വിദഗ്ധ ഡോക്ടര്മാരുടെ സാനിധ്യത്തില് 24 മണിക്കൂര് നിരീക്ഷണത്തിലാണ്. അടിയന്തരശസ്ത്രക്രിയ ആവശ്യമില്ലെന്നാണ് ഡോക്ടര്മാര് അറിയിച്ചത്. മൂന്ന് വാരിയെല്ലുകള്ക്ക് പൊട്ടലുണ്ട്. ഇതിനെ തുടര്ന്നാണ് ശ്വാസകോശത്തില് രക്തം കട്ടപിടിച്ചത്. നട്ടെല്ലിനും പരിക്കുണ്ട്. കോട്ടയം മെഡിക്കല് കോളേജ് സൂപ്രണ്ടിന്റെ നേതൃത്വത്തിലുള്ള അഞ്ചംഗ സംഘം ഉള്പ്പെടെയുള്ള വിദഗ്ധ ഡോക്ടര്മാരാണ് ഉമ തോമസിനെ ചികിത്സിക്കുന്നത്.
by Midhun HP News | Dec 30, 2024 | Latest News, ജില്ലാ വാർത്ത
തിരുവനന്തപുരം: എറണാകുളത്ത് നിന്ന് തിരുവനന്തപുരത്തേക്ക് അനുവദിച്ച സ്പെഷ്യല് മെമു സര്വീസ് ഇന്ന് മുതല്. എറണാകുളം ജംഗ്ഷനില് നിന്ന് തിരുവനന്തപുരം നോര്ത്തിലേക്കും (കൊച്ചുവേളി) തിരിച്ചും 12 കോച്ചുകളുള്ള മെമു സര്വീസാണ് റെയില്വെ പ്രഖ്യാപിച്ചത്. ഡിസംബര് 30,31 ജനുവരി ഒന്ന് എന്നീ തീയതികളിലാണ് സര്വീസ്.
രാവിലെ എറണാകുളത്ത് നിന്ന് ആരംഭിച്ച് ഉച്ചയോടെ കൊച്ചുവേളിയിലെത്തുന്ന ട്രെയിന്, വൈകീട്ടോടെ എറണാകുളത്ത് തിരിച്ചെത്തുന്ന രീതിയിലാണ് സര്വീസുകള് ക്രമീകരിച്ചിരിക്കുന്നത്. 06065/06066 എന്നിങ്ങനെയാണ് ട്രെയിന് നമ്പരുകള്.
എറണാകുളം – കൊച്ചുവേളി അണ്റിസര്വ്ഡ് മെമു എക്സ്പ്രസിന് 12 സ്റ്റോപ്പുകളാണുള്ളത്. രാവിലെ 9.10ന് എറണാകുളം ജങ്ഷനില് നിന്ന് ആരംഭിക്കുന്ന സര്വീസ് കോട്ടയം, കൊല്ലം വഴി ഉച്ചയ്ക്ക് 12.45ന് തിരുവനന്തപുരം നോര്ത്തില് എത്തും. മടക്ക യാത്ര 12.55ന് തിരുവനന്തപുരം നോര്ത്ത് സ്റ്റേഷനില് നിന്ന് കൊല്ലം കോട്ടയം വഴി വൈകിട്ട് 4.35ന് എറണാകുളം ജങ്്ഷനില് എത്തും.
12 ജനറല് കോച്ചുകളുള്ള മെമു ട്രെയിനാണ് സ്പെഷ്യല് സര്വീസ് നടത്തുക. വൈക്കം, കോട്ടയം, തിരുവല്ല, ചെങ്ങന്നൂര്, മാവേലിക്കര, കായംകുളം, ഓച്ചിറ, കരുനാഗപ്പള്ളി, ശാസ്താംകോട്ട, കൊല്ലം, പറവൂര്, വര്ക്കല എന്നിവിടങ്ങളിലാണ് ട്രെയിനിന് സ്റ്റോപ്പുകള്. 09:10ന് എറണാകുളത്ത് നിന്ന് പുറപ്പെടുന്ന ട്രെയിന് 09:42 വൈക്കം, 10:06 കോട്ടയം, 10:31 തിരുവല്ല, 10:42 ചെങ്ങന്നൂര്, 10:54 മാവേലിക്കര, 11:03 കായംകുളം, 11:13 ഓച്ചിറ, 11:22 കരുനാഗപ്പള്ളി, 11:32 ശാസ്താംകോട്ട, 11:49 കൊല്ലം, 12:01 പറവൂര്, 12:11 വര്ക്കല സ്റ്റേഷനുകള് പിന്നിട്ടാണ് കൊച്ചുവേളിയിലെത്തുക.
മടക്കയാത്രയില് 12:55ന് കൊച്ചുവേളിയില് നിന്ന് പുറപ്പെടുന്ന ട്രെയിന്, 01:26 വര്ക്കല, 01:32 പറവൂര്, 01:50 കൊല്ലം, 01:59 ശാസ്താംകോട്ട, 02:09 കരുനാഗപ്പള്ളി, 02:18 ഓച്ചിറ, 02:27 കായംകുളം, 02:37 മാവേലിക്കര, 02:49 ചെങ്ങന്നൂര്, 02:58 തിരുവല്ല, 03:25 കോട്ടയം, 03:47 വൈക്കം സ്റ്റേഷനുകള് പിന്നിട്ടാണ് 04:35ന് എറണാകുളം സൗത്തിലെത്തുക.
by Midhun HP News | Dec 30, 2024 | Latest News, കേരളം
പത്തനംതിട്ട: ശബരിമലയില് മകരവിളക്ക് തീര്ത്ഥാടനം ഇന്നു മുതല്. വൈകീട്ട് അഞ്ചുമണിക്ക് തന്ത്രി കണ്ഠര് ബ്രഹ്മദത്തന്റെ സാന്നിധ്യത്തില് മേല്ശാന്തി എസ് അരുണ് കുമാര് നമ്പൂതിരി നട തുറക്കും. മകരവിളക്കു കാലത്തെ പൂജകള് നാളെ പുലര്ച്ചെ മൂന്നുമണിക്ക് തുടങ്ങും.രാത്രി 10 വരെ ദര്ശനത്തിന് സൗകര്യമുണ്ട്. ജനുവരി 14 നാണ് മകരവിളക്ക്. എരുമേലി പേട്ട 11 ന് നടക്കും. പന്തളത്തു നിന്നുള്ള തിരുവാഭരണ ഘോഷയാത്ര 12 ന് പുറപ്പെടും. 13 ന് പമ്പ വിളക്കും സദ്യയും നടക്കും. 14 ന് തിരുവാഭരണ ഘോഷയാത്ര സന്നിധാനത്തെത്തും.
തിരുവാഭരണം അയ്യപ്പവിഗ്രഹത്തില് ചാര്ത്തി ദീപാരാധന നടക്കുമ്പോള് പൊന്നമ്പലമേട്ടില് മകരജ്യോതി തെളിയും. തീര്ത്ഥാടനം പൂര്ത്തിയാക്കി 20 ന് ക്ഷേത്രനട അടയ്ക്കും. തീര്ത്ഥാടകരുടെ തിരക്ക് പരിഗണിച്ച് കരിമല വഴിയുള്ള കാനനപാത തുറന്നിട്ടുണ്ട്.
by Midhun HP News | Dec 29, 2024 | Latest News, ജില്ലാ വാർത്ത
ന്യൂഡൽഹി: 2025 ജനുവരി ഒന്നുമുതൽ റേഷൻ കാർഡ് ഇടപാടുകളിൽ മാറ്റമുണ്ടാകും. ജനുവരി ഒന്നു മുതൽ റേഷൻ വിതരണ സംവിധാനത്തിൽ മാറ്റങ്ങൾ വരുത്തിയതിനൊപ്പം റേഷൻ ഇടപാടിൽ കേന്ദ്ര സർക്കാർ സുപ്രധാന മാറ്റങ്ങളും നിർദേശങ്ങളും വരുത്തിയിട്ടുണ്ട്. എല്ലാ റേഷൻ കാർഡ് ഉടമകളും നിർദേശങ്ങൾ പാലിക്കണം.
റേഷൻ കാർഡ് ഉടമകൾ ഇ കെവൈസി പൂർത്തിയാക്കേണ്ടതുണ്ട്. കൃത്യസമയത്ത് ഇ കെവൈസി പൂർത്തിയാക്കാത്തവരുടെ പേര് റേഷൻ കാർഡ് ലിസ്റ്റിൽ നിന്ന് നീക്കം ചെയ്യും. കേരളം ഉൾപ്പെടെയുള്ള സംസ്ഥാനങ്ങൾ ഇ കെവൈസി അപ്ഡേഷൻ നടപടികളുമായി അതിവേഗം മുന്നോട്ട് പോകുകയാണ്. കേരളത്തിലെ മുൻഗണനാ കാർഡ് അംഗങ്ങളുടെ മസ്റ്ററിങ് നടപടികൾക്കായി സംസ്ഥാന സർക്കാർ സമയപരിധി നീട്ടി നൽകിയിരുന്നു. ഇ കെവൈസി അപ്ഡേഷൻ സമയപരിധി 2024 ഡിസംബർ 31വരെ ദീർഘിപ്പിച്ചതായി ഭക്ഷ്യ പൊതുവിതരണ വകുപ്പ് മന്ത്രി ജിആർ അനിൽ അറിയിച്ചിരുന്നു.
2025 ജനുവരി ഒന്നുമുതൽ റേഷൻ കാർഡ് സ്കീമിന് കീഴിൽ സർക്കാർ പുതിയ നിയമങ്ങൾ നടപ്പിലാക്കും. റേഷൻ വിതരണ സംവിധാനം പൂർണമായും സുതാര്യമാക്കുക എന്നതാണ് ലക്ഷ്യം. റേഷൻ കാർഡ് സൗകര്യങ്ങൾ ദുരുപയോഗം ചെയ്യുന്നത് തടയാനും അർഹരായവരിലേക്ക് മാത്രം റേഷൻ എത്തുകയെന്ന ലക്ഷ്യവും മുൻനിർത്തിയാണ് എല്ലാ റേഷൻ കാർഡ് ഉടമകൾക്കും സർക്കാർ ഇ കെവൈസി നിർബന്ധമാക്കിയത്. വ്യാജ റേഷൻ കാർഡുകൾ ഇല്ലാതാക്കാനുമാകും. റേഷൻ കാർഡ് ഉടമകളുടെ കൃത്യമായ വിവരങ്ങൾ ശേഖരിക്കാൻ സർക്കാരിനാകും. ഈ പ്രക്രിയ രാജ്യത്ത് കൂടുതൽ ഡിജിറ്റൈസേഷൻ നടപടികളെ പ്രോത്സാഹിപ്പിക്കും.
പുതിയ നിയമങ്ങൾ പ്രകാരം മുൻപ് ലഭിച്ചിരുന്ന അതേ അളവിൽ റേഷൻ എല്ലാവർക്കും ലഭ്യമാകില്ല. പുതിയ നിയമമനുസരിച്ച് 2.5 കിലോ അരിയും 2.5 കിലോ ഗോതമ്പും ലഭിക്കും. നേരത്തെ മൂന്ന് കിലോ അരിയും രണ്ട് കിലോ ഗോതമ്പും ലഭിച്ചിരുന്നെങ്കിൽ ഇത് രണ്ട് കിലോ ഗോതമ്പും രണ്ടര കിലോ അരിയുമായി കുറയും.
by Midhun HP News | Dec 29, 2024 | Latest News, ജില്ലാ വാർത്ത
തിരുവനന്തപുരം: ക്ഷേമ പെൻഷൻ തട്ടിപ്പിൽ ഒൻപത് സർക്കാർ ഉദ്യോഗസ്ഥർക്ക് സസ്പെൻഷൻ. വനം വകുപ്പ് ജീവനക്കാരായ ഒന്പത് ഉദ്യോഗസ്ഥരെയാണ് അന്വേഷണ വിധേയമായി സസ്പെൻഡ് ചെയ്തത്.
സാമൂഹ്യ ക്ഷേമ പെന്ഷന് കൈപ്പറ്റിയതായി കണ്ടെത്തിയതോടെയാണ് അവരെ സര്വീസില് നിന്നും അന്വേഷണ വിധേയമായി സസ്പെന്ഡ് ചെയ്യാന് വനം മന്ത്രി എ കെ ശശീന്ദ്രന് ഉത്തരവിട്ടത്. ഒരു എല്ഡി ടൈപിസ്റ്റ്, വാച്ചര്, ഏഴ് പാര്ട്ട ടൈം സ്വീപർമാര് എന്നിവർക്കെതിരെയാണ് നടപടി.
കഴിഞ്ഞ ദിവസമാണ് അനധികൃതമായി പെൻഷൻ കൈപ്പറ്റിയ 29 ജീവനക്കാരെ കൃഷി വകുപ്പ് സസ്പെൻഡ് ചെയ്തിരുന്നു. കൃഷി – റവന്യു, മൃഗസംരക്ഷണ വകുപ്പുകൾക്ക് എന്നിവർക്ക് തൊട്ട് പിന്നാലെയാണ് വനം വകുപ്പും നടപടി സ്വീകരിച്ചിരിക്കുന്നത്. 1458 സർക്കാർ ജീവനക്കാരാണ് അനധികൃതമായി ക്ഷേമ പെൻഷൻ വാങ്ങിയതെന്നാണ് ധനവകുപ്പ് റിപ്പോർട്ട്.
by Midhun HP News | Dec 29, 2024 | Latest News, കേരളം
മുൻ പ്രധാന മന്ത്രിയായിരുന്ന അന്തരിച്ച ഡോ: മൻമോഹൻ സിങിന് അനുശോചനം യോഗം സംഘടിപ്പിച്ചു. മണ്ഡലം പ്രസിഡന്റ് ആർ. എസ്. പ്രശാന്ത് അധ്യക്ഷത വഹിച്ചു. യുഡിഎഫ് നിയോജകമണ്ഡലം ചെയർമാൻ അഡ്വക്കേറ്റ് വി ജയകുമാർ, ഡിസിസി ജനറൽ സെക്രട്ടറി പി ഉണ്ണികൃഷ്ണൻ, മുൻ ബ്ലോക്ക് പ്രസിഡന്റ് ടിപി അംബിരാജ, ബ്ലോക്ക് വൈസ് പ്രസിഡന്റ് പി ജയചന്ദ്രൻ നായർ തുടങ്ങിയവർ സംസാരിച്ചു.
Recent Comments