by Midhun HP News | Dec 5, 2024 | Latest News, കേരളം
കൊല്ലം: കേരള സംസ്ഥാന ഭാഗ്യക്കുറി വകുപ്പിന്റെ പൂജാ ബംപറിന്റെ ഒന്നാം സമ്മാനം കൊല്ലം കരുനാഗപ്പള്ളി സ്വദേശി ദിനേശ് കുമാറിന്. 12 കോടിയുടെ ഒന്നാം സമ്മാനമാണു ദിനേശിനു കിട്ടിയത്. നികുതികൾ പിടിച്ചശേഷം 6.18 കോടി രൂപയാണു ദിനേശിനു കയ്യിൽ കിട്ടുക. കൊല്ലം ജയകുമാര് ലോട്ടറീസ് എടുത്ത പത്ത് ടിക്കറ്റില് ഒന്നിനാണ് ഒന്നാം സമ്മാനം ലഭിച്ചതെന്ന് ദിനേശ് കുമാര് മാധ്യമങ്ങളോട് പറഞ്ഞു.
മുന്പ് ഇവിടെ നിന്ന് ടിക്കറ്റ് എടുത്തിരുന്നു. അപ്പോഴൊക്കെ ചെറിയ സമ്മാനം ലഭിച്ചിരുന്നു. ഇതാദ്യമായാണ് ഇത്രയും വലിയ തുക സമ്മാനമായി ലഭിക്കുന്നതെന്ന് ദിനേശ് കുമാര് പറഞ്ഞു. ലോട്ടറി അടിച്ചതറിഞ്ഞ് ഇന്നലെ ഉറങ്ങാന് കഴിഞ്ഞില്ല. ഇന്നാണ് ഒന്നാം സമ്മാനം ലഭിച്ച കാര്യം വീട്ടുകാരെ അറിയിച്ചത്. ലോട്ടറി തുക ബാങ്കില് നിക്ഷേപിക്കാനാണ് ആഗ്രഹിക്കുന്നതെന്നും അദ്ദേഹം പറഞ്ഞു. ഭാര്യക്കും രണ്ടുമക്കള്ക്കുമൊപ്പമാണ് ദിനേശ്, ജയകുമാര് ലോട്ടറി സെന്ററിലെത്തിയത്. മാലയിട്ട് ബൊക്ക നല്കി പൊന്നാടയണിയിച്ചാണ് ദിനേശിനെ ലോട്ടറി സെന്ററിലുള്ളവര് സ്വീകരിച്ചത്. തലപ്പാവും അദ്ദേഹത്തെ അണിയിച്ചു.
കൊല്ലം ജയകുമാര് ലോട്ടറീസ് വിറ്റ JC 325526 എന്ന ടിക്കറ്റിനാണ് ഒന്നാം സമ്മാനം. രണ്ടാം സമ്മാനം JA 378749, JB 939547, JC 616613, JD 211004, JE 584418 എന്നീ ടിക്കറ്റുകള്ക്ക്. ഗോര്ക്കി ഭവനില് വച്ചാണ് നറുക്കെടുപ്പ് നടക്കുന്നത്.
അഞ്ച് പരമ്പരകള്ക്ക് ഒരു കോടി വീതമാണ് രണ്ടാം സമ്മാനം. ഓരോ പരമ്പരകള്ക്കും രണ്ടു വീതം പത്ത് ലക്ഷമാണ് മൂന്നാം സമ്മാനം. കൂടാതെ 5000, 1000, 500, 300 രൂപയുടെ മറ്റ് നിരവധി സമ്മാനങ്ങളുമുണ്ട്.
by Midhun HP News | Dec 5, 2024 | Latest News, ജില്ലാ വാർത്ത
തിരുവനന്തപുരം: സ്മാര്ട്ട് സിറ്റി പദ്ധതിയില് നിന്നും പിന്മാറിയ ടീകോമിന് നഷ്ടപരിഹാരം നല്കാനുള്ള മന്ത്രിസഭാ തീരുമാനം കരാറിന് വിരുദ്ധം. 2007 ലെ കരാര് അനുസരിച്ച് പദ്ധതി പരാജയപ്പെട്ടാല് നഷ്ടപരിഹാരം ഈടാക്കേണ്ടത് ടീകോം കമ്പനിയില് നിന്നാണ്. എന്നാല് പദ്ധതിയില് നിന്നും പിന്മാറുന്ന ടീകോമിന് നഷ്ടപരിഹാരത്തുക അടക്കം നല്കാനാണ് സംസ്ഥാന മന്ത്രിസഭായോഗം തീരുമാനിച്ചത്. മന്ത്രിസഭായോഗ തീരുമാനം കരാറിന് വിരുദ്ധമാണെന്നാണ് രേഖകൾ വ്യക്തമാക്കുന്നത്.
വി എസ് അച്യുതാനന്ദന് സര്ക്കാരിന്റെ ഒന്നാം വാര്ഷികദിനത്തിലാണ് കൊച്ചിയിലെ സ്മാര്ട്ടി സിറ്റി പദ്ധതിക്കായി സര്ക്കാര് ടീകോമുമായി കരാര് ഒപ്പുവെച്ചത്. ഈ പദ്ധതിയുടെ കാര്യത്തിലും തൊഴില് വാഗ്ദാനത്തിന്റെ കാര്യത്തിലും ടീകോം വീഴ്ച വരുത്തിയാല് നഷ്ടപരിഹാരം ഈടാക്കാന് വ്യവസ്ഥയുണ്ടായിരുന്നു. ഈ വ്യവസ്ഥ നിലനില്ക്കെയാണ്, കെട്ടിട നിര്മാണത്തിന് അടക്കം പദ്ധതിയില് ടീ കോം മുടക്കിയ തുക എത്രയെന്ന് വിലയിരുത്തി അവര്ക്ക് നഷ്ടപരിഹാരം നല്കാന് ധാരണയായത്. നഷ്ടപരിഹാര തുകയും പിന്മാറ്റനയവും തീരുമാനിക്കാനായി ഒരു കമ്മിറ്റിയെയും മന്ത്രിസഭായോഗം തീരുമാനിച്ചിട്ടുണ്ട്. ആ കമ്മിറ്റിയില് ടീകോമിന്റെ അന്നത്തെ സിഇഒ ആയിരുന്ന ബാജു ജോര്ജിനെ ഉള്പ്പെടുത്തിയിട്ടുമുണ്ട്. നഷ്ടപരിഹാരം നല്കുന്നത് ഉള്പ്പെടെ നയ തീരുമാനം എടുക്കാന് ചീഫ് സെക്രട്ടറി അധ്യക്ഷയായ സമിതി രൂപീകരിച്ചു. കൊച്ചി സ്മാര്ട്ട് സിറ്റി പദ്ധതിക്കായി ടീക്കോമിന് നല്കിയ ഭൂമി തിരിച്ചു പിടിക്കാന് മന്ത്രിസഭാ തീരുമാനിച്ചിട്ടുണ്ട്. 246 ഏക്കര് ഭൂമിയാണ് തിരിച്ചു പിടിക്കുന്നത്.
കാക്കനാട് ഇന്ഫോ പാര്ക്കിനോട് ചേര്ന്ന് ഐടി ടൗണ്ഷിപ്പ് നിര്മ്മിക്കുക എന്നതായിരുന്നു 2011 ല് ഒപ്പിട്ട പദ്ധതിയിലൂടെ ലക്ഷ്യമിട്ടത്. എന്നാല് പത്തുവര്ഷത്തിലേറെയായിട്ടും ദുബായ് ഹോള്ഡിങ്സ് കൊച്ചിയില് കാര്യമായ നിക്ഷേപം നടത്തുകയോ, കരാര് പ്രകാരമുള്ള തൊഴിലവസരങ്ങള് സൃഷ്ടിക്കുകയോ ചെയ്തില്ല. പദ്ധതിയിൽ നിന്നും പിന്മാറുന്നതായി ടീകോം സർക്കാരിനെ അറിയിക്കുകയായിരുന്നു. ഇതേത്തുടർന്നാണ് പദ്ധതിയിൽ നിന്നും ടീകോമിനെ ഒഴിവാക്കാൻ സർക്കാർ തീരുമാനിച്ചത്. ടീകോമിന് നഷ്ടപരിഹാരം നൽകാനുളള നീക്കത്തിൽ ദുരൂഹത ആരോപിച്ച് പ്രതിപക്ഷ നേതാവ് വിഡി സതീശനും കോൺഗ്രസ് നേതാവ് രമേശ് ചെന്നിത്തലയും രംഗത്തെത്തിയിട്ടുണ്ട്.
by Midhun HP News | Dec 5, 2024 | Latest News, കേരളം
തൃശൂര്: തൃശൂര് പാലപ്പള്ളിയില് സെപ്റ്റിക് ടാങ്കില് വീണ കാട്ടാനക്കുട്ടി ചരിഞ്ഞു. നാട്ടുകാരും വനംവകുപ്പ് ഉദ്യോഗസ്ഥരും ചേര്ന്ന് മൂന്ന് മണിക്കൂറിലേറെ നേരം രക്ഷാപ്രവര്ത്തനം നടത്തിയെങ്കിലും ദൗത്യം വിഫലമായി.
ഇന്നു രാവിലെ എട്ടോടെയാണ് ഉപയോഗശൂന്യമായി കിടന്ന സെപ്ടിക് ടാങ്കില് കാട്ടാനക്കുട്ടി വീണത്. കണ്ടെത്തിയ നാട്ടുകാര് വിവരം വനംവകുപ്പിനെ അറിയിച്ചു. കുട്ടിയാനയുടെ ശരീരത്തേക്ക് മണ്ണ് ഇടിഞ്ഞുവീണതിനാല് എഴുന്നേല്ക്കാന് കഴിയാത്ത അവസ്ഥയിലായിരുന്നു.
ജെസിബി ഉപയോഗിച്ച് കുഴിയുടെ വീതീ കൂട്ടാന് ശ്രമിച്ചും ജെസിബിയില് ചവിട്ടി കയറാന് ആനയ്ക്ക് വഴിയൊരുക്കാന് ശ്രമിച്ചും രക്ഷാദൗത്യം മുന്നോട്ടുപോയെങ്കിലും ഫലമുണ്ടായില്ല. പത്തുമിനിറ്റിലേറെയായി ആന അനക്കമില്ലാതെ കിടക്കുന്നതുകണ്ട് വനംവകുപ്പ് ഉദ്യോഗസ്ഥര് പരിശോധിച്ചപ്പോഴാണ് ആന ചരിഞ്ഞതായി സ്ഥിരീകരിച്ചത്.
by Midhun HP News | Dec 5, 2024 | Latest News, കേരളം
ആലപ്പുഴ: ഭാര്യ വീട്ടിലെത്തിയ യുവാവിനെ ക്രൂരമായി മര്ദിച്ച് കൊലപ്പെടുത്തി സംഭവത്തില് എഴ് വയസുകാരിയായ മകളുടെ നിര്ണായക മൊഴി പുറത്ത്. അമ്മ ആതിര അച്ഛനെ തടിക്കഷണം കൊണ്ട് തലയ്ക്കടിക്കുന്നത് കണ്ടുവെന്നാണ് കുട്ടി പൊലീസിനോട് പറഞ്ഞത്. കായംകുളം പെരുമ്പള്ളി പുത്തന്പറമ്പില് നടരാജന്-ബീന ദമ്പതികളുടെ ഏക മകനായിരുന്ന വിഷ്ണുവാണ് കൊല്ലപ്പെട്ടത്. മരണകാരണം തലയ്ക്കേറ്റ ക്ഷതമാണെന്ന് നേരത്തെ പോസ്റ്റുമോര്ട്ടത്തില് കണ്ടെത്തിയിരുന്നു. ഇതോെടെയാണ് ഭാര്യ ആതിരയെ പൊലീസ് ഒന്നാം പ്രതിയാക്കിയത്. ആതിരയുടെ പിതൃസഹോദരങ്ങളായ ബാബുരാജ് (54), പത്മന് (41), പൊടിമോന് (50) എന്നിവരും പ്രതിപട്ടികയിലുണ്ട്. തൃക്കുന്നപ്പുഴ പൊലീസാണ് സംഭവത്തില് കേസെടുത്തിരിക്കുന്നത്.
മകളുടെ കണ്മുന്നില് വെച്ചായിരുന്നു കൊലപാതകം. ഒന്നര വര്ഷക്കാലമായി പിണങ്ങി താമസിക്കുകയായിരുന്നു വിഷ്ണുവും ഭാര്യ ആതിരയും. കുട്ടിയെ ധാരണപ്രകാരം പരസ്പരം മാറിമാറിയാണ് നോക്കിയിരുന്നത്. ഇതുപ്രകാരം മകളെ തിരിച്ചേല്പ്പിക്കാന് ഭാര്യവീട്ടിലെത്തിയപ്പോഴായിരുന്നു സംഭവം. എന്നാല് മകള് അച്ഛനൊപ്പം പോകണമെന്ന് വാശിപിടിച്ച മകളെ ആതിര അടിച്ചു.
ഇതേച്ചൊല്ലി ആതിരയും വിഷ്ണുവും തമ്മില് തര്ക്കമുണ്ടായി. ഇതിനിടെ വിഷ്ണു ആതിരയെ അടിച്ചു. ഇത് ശ്രദ്ധയില്പ്പെട്ടതോടെ പിതൃസഹോദരന്മാര് ഉള്പ്പെടെയുള്ളവര് സംഘം ചേര്ന്ന് വിഷ്ണുവിനെ മര്ദിക്കുകയായിരുന്നുവെന്നും ബോധരഹിതനായി കിടന്ന വിഷ്ണുവിനെ കായംകുളം താലൂക്ക് ആശുപത്രിയിലെത്തിക്കുകയായിരുന്നുവെന്നുമുള്ള വിവരമാണ് നേരത്തെ പുറത്ത് വന്നിരുന്നത്. ആശുപത്രിയിൽ എത്തിച്ചെങ്കിലും വിഷ്ണു മരിക്കുകയുമായിരുന്നു.
by Midhun HP News | Dec 5, 2024 | Latest News, ദേശീയ വാർത്ത
ന്യൂഡല്ഹി: കേന്ദ്രസായുധ സേനയില് ഒഴിഞ്ഞുകിടക്കുന്നത് ഒരു ലക്ഷത്തിലധികം തസ്തികകളെന്ന് കേന്ദ്രസര്ക്കാര്. ആഭ്യന്തര സഹമന്ത്രി നിത്യാനന്ദ് റായ് ആണ് ഇത് സംബന്ധിച്ച കണക്ക് രാജ്യസഭയെ അറിയിച്ചത്. ഒഴിവുകള് നികത്താന് സര്ക്കാര് നടപടികള് സ്വീകരിച്ചുവരികയാണെന്നും മന്ത്രി പറഞ്ഞു.
കേന്ദ്ര ആഭ്യന്തര മന്ത്രാലയത്തിന്റെ കണക്കുകള് പ്രകാരം ഒക്ടോബര് 30 വരെ സിഎപിഎഫിലും അസം റൈഫിള്സിലുമായി മൊത്തം 9,48,204 ഉദ്യോഗസ്ഥര് ഉണ്ടായിരുന്നു. എന്നാല് കഴിഞ്ഞ അഞ്ച് വര്ഷത്തിനിടെ ഈ രണ്ട് വിഭാഗത്തിലായി 71,231 പുതിയ തസ്തികകള് ഒഴിവ് വന്നതായി മന്ത്രി പറഞ്ഞു. ഒഴിവുകള് നികത്താന് സര്ക്കാര് നടപടികള് സ്വീകരിച്ചുവരികയാണെന്നും നിത്യാനന്ദ് റായ് രാജ്യസഭയില് പറഞ്ഞു.
വിരമിക്കല്, രാജി, സ്ഥാനക്കയറ്റം, മരണം, പുതിയ തസ്തികകള് തുടങ്ങിയ കാരണങ്ങളാലാണ് പുതിയ ഒഴിവുകള് ഉണ്ടായിട്ടുള്ളത്. ആകെ 1,00,204 തസ്തികകളാണ് ഒഴിഞ്ഞുകിടക്കുന്നത്. സിഎപിഎഫിലും അസം റൈഫിള്സിലുമായി 33,730 ഒഴിവുകളും സിആര്പിഎഫില് 31,782, ബിഎസ്എഫില് 12,808, ഐടിബിപി 9,861, എസ്എസ്ബിയില് 8,646, എആറില് 3,377 എന്നിങ്ങനെയാണ് ഒഴിവുകള്.
by Midhun HP News | Dec 5, 2024 | Latest News, കേരളം
ആലപ്പുഴ: അഞ്ച് മെഡിക്കല് വിദ്യാര്ത്ഥികളുടെ മരണത്തിനിടയാക്കിയ കളര്കോട് വാഹനാപകടത്തില് വാഹന ഉടമയ്ക്കെതിരെ നടപടിയെടുക്കും. വാഹനം നല്കിയത് വാടകയ്ക്ക് തന്നെയാണെന്ന് വ്യക്തമായി. അപകട സമയത്ത് വാഹനം ഓടിച്ചിരുന്ന ഗൗരി ശങ്കര് വാഹന ഉടമയായ ഷാമില് ഖാന് 1,000 രൂപ ഗൂഗിള് പേ ചെയ്തുകൊടുത്തതിന്റെ തെളിവ് പൊലീസ് ശേഖരിച്ചു.
വിദ്യാര്ത്ഥികളുമായുള്ള പരിചയത്തിന്റെ പുറത്താണ് വാഹനം വിട്ടുനല്കിയതെന്നും വാടക വാങ്ങിയിരുന്നില്ലെന്നുമാണ് തുടക്കം മുതല് ഷാമില് ഖാന് പറഞ്ഞിരുന്നത്. വാഹനം വാടകയ്ക്ക് നല്കുന്നതിനുള്ള ലൈസന്സും ഷാമില് ഖാന് ഇല്ല. ഈ സാഹചര്യത്തിലാണ് മോട്ടോര് വാഹനവകുപ്പ് നടപടിക്കൊരുങ്ങുന്നത്. ഷാമില് ഖാന്റെ മൊഴി നേരത്തെ ആര്ടിഒ രേഖപ്പെടുത്തിയിരുന്നു. നോട്ടീസ് നല്കി വിളിച്ചുവരുത്തിയ ശേഷം മൊഴിരേഖപ്പെടുത്തുകയായിരുന്നു.
‘മരിച്ച മുഹമ്മദ് ജബ്ബാര് സെക്കന്ഡ് ഹാന്ഡ് ബൈക്കാവശ്യപ്പെട്ട് വിളിക്കുമായിരുന്നു. ആ പരിചയത്തിന്റെ പേരിലാണ് കാര് ചോദിച്ചത്. ഒഴിവുദിവസം കിട്ടിയെന്നും സിനിമയ്ക്ക് പോകാനാണെന്നുമാണ് കുട്ടികള് പറഞ്ഞത്. ആദ്യം കാര് നല്കാന് വിസമ്മതിച്ചു. എന്നാല് മുഹമ്മദ് ജബ്ബാറിന്റെ സഹോദരനുമായി സംസാരിച്ച ശേഷം കാര് നല്കുകയായിരുന്നു. ആറുപേര് ഉണ്ടാകുമെന്നാണ് തന്നോട് പറഞ്ഞത്. പതിനൊന്ന് പേര് ഉണ്ടായിരുന്നെന്ന് അറിയില്ലായിരുന്നു’, എന്നാണ് അപകടത്തിന് പിന്നാലെ ഷാമില് ഖാന് റിപ്പോര്ട്ടറിനോട് പ്രതികരിച്ചത്.
അതേസമയം സംഭവത്തില് കാറോടിച്ച വിദ്യാര്ത്ഥിയെ പ്രതിയാക്കി ആലപ്പുഴ സൗത്ത് പൊലീസ് കോടതിയില് റിപ്പോര്ട്ട് നല്കി. സിസിടിവി ദൃശ്യങ്ങളുടെയും ദൃക്സാക്ഷി മൊഴികളുടെയും അടിസ്ഥാനത്തിലാണ് റിപ്പോര്ട്ട്. വാഹനം ഓടിച്ച വിദ്യാര്ത്ഥിയുടെ വീഴ്ചയാണ് അപകടത്തിന് ഇടയാക്കിയതെന്നാണ് റിപ്പോര്ട്ട്. അശ്രദ്ധമായി വാഹനം ഓടിച്ച് അപകടം വരുത്തിയതിന് ഭാരതീയ ന്യായസംഹിത 106 പ്രകാരമാണ് കേസ്. കഴിഞ്ഞ തിങ്കളാഴ്ച്ചയാണ് വിദ്യാര്ത്ഥികള് സഞ്ചരിച്ച ടവേര കാര് കെഎസ്ആര്ടിസി ബസുമായി കൂട്ടിയിടിച്ചത്. അപകടത്തില് വിദ്യാര്ത്ഥികള് സഞ്ചരിച്ചിരുന്ന കാര് പൂര്ണമായും തകര്ന്നു. പതിനൊന്ന് പേരാണ് കാറിലുണ്ടായിരുന്നത്. രണ്ട് പേര് ബൈക്കിലും ഇവര്ക്കൊപ്പം എത്തിയിരുന്നു. സിനിമയ്ക്ക് പോകാന് വേണ്ടിയായിരുന്നു ഇവര് കാറുമായി ഹോസ്റ്റലില് നിന്നിറങ്ങിയത്. ഇതിനിടെയായിരുന്നു അപകടം.
Recent Comments