നെടുമ്പാശേരി മിനി കൂപ്പര്‍ അപകടം: സുഹൈൽ സജീവിന് ജാമ്യമില്ല; നാലു പ്രതികളുടേയും ജാമ്യാപേക്ഷ തള്ളി

by Midhun HP News | Oct 28, 2026 | Latest News, കേരളം

കൊച്ചി: നെടുമ്പാശേരി മിനി കൂപ്പര്‍ അപകടത്തില്‍ സുഹൈല്‍ സജീവ് ഉൾപ്പെടെ നാലു പ്രതികളുടേയും ജാമ്യാപേക്ഷ കോടതി തള്ളി. എറണാകുളം ജില്ലാ അഡീഷണൽ സെഷൻസ് കോടതിയാണ് വിധി പ്രസ്താവിച്ചത്. പ്രോസിക്യൂഷൻ ഉന്നയിച്ച വാദങ്ങളെല്ലാം കോടതി അം​ഗീകരിച്ചു. കേസില്‍ സുഹൈല്‍ സജീവ്, നിനവ്, അമീന്‍ എന്നിവരാണ് പ്രതികളായിട്ടുള്ളത്. പ്രതികൾ ബോസ്റ്റൽ സ്കൂളിൽ തുടരും.

റിമാന്‍ഡ് കാലാവധി 14 ദിവസം പിന്നിട്ട സാഹചര്യത്തിലാണ് പ്രതികൾ ജാമ്യാപേക്ഷ നല്‍കിയത്. അമിത വേ​ഗതയിൽ വാഹനം ഓടിക്കുന്നത് പ്രതിയുടെ സ്ഥിരം പതിവാണ്. അപകടം നടന്ന സമയത്ത് വാഹനം 163 കിലോമീറ്റർ വേ​ഗതയിലാണ് ഓടിച്ചിരുന്നതെന്നതിന് പൊലീസിന് തെളിവ് ലഭിച്ചുവെന്നും പ്രോസിക്യൂഷൻ കോടതിയെ അറിയിച്ചു. പ്രതികൾക്ക് ജാമ്യം നൽകുന്നത് സമൂഹത്തിന് തെറ്റായ സന്ദേശം നൽകുമെന്നും പ്രോസിക്യൂഷൻ‌ വാദിച്ചു.

മുഖ്യപ്രതിയായ 19 കാരന്‍ സുഹൈല്‍ സജീവിനെ വെട്ടിലാക്കി, കേസിലെ മൂന്നാം പ്രതി ജോയലിന്റെ ശബ്ദ സന്ദേശം ലഭിച്ചതും പൊലീസ് കോടതിയില്‍ സമര്‍പ്പിച്ചിരുന്നു. അപകടം നടന്നശേഷം രാവിലെ 9.25 ന് ജോയല്‍ സുഹൃത്തിന് അയച്ച ശബ്ദസന്ദേശമാണ് പുറത്തു വന്നത്. മദ്യപിച്ച് വാഹനം ഓടിച്ചത് വ്യക്തമാക്കുന്നതാണ് ശബ്ദസന്ദേശത്തിലെ ഉള്ളടക്കം.

‘ബാറില്‍ പോയി മദ്യപിച്ചു. നേരത്തെ മദ്യപിച്ചതിന് പുറത്താണ് കഴിച്ചത്. ഞാനും അടിച്ചു ഒരു ബിയര്‍. തിരിച്ചുവരുന്ന വഴി ഭയങ്കര സ്പീഡിനാണ് വണ്ടി ഓടിച്ചത്. സ്‌കൂട്ടറില്‍ ഇടിച്ചു, മൂന്നുപേരും തെറിച്ചുവീണു. നിനവ് ആണ് എന്നോടും അമീനോടും വിട്ടോളാന്‍ പറഞ്ഞത്. മൂന്നുപേരും സ്പോട്ടില്‍ തീര്‍ന്നു. ഓ.. ആ വിറയല്‍ മാറിയിട്ടില്ല. ആ സുഹൈല്‍ പറയുകയാണ് ബാപ്പ നോക്കിക്കോളുമെന്ന്. നാട്ടുകാര്‍ അതു കേട്ടിട്ട് ഇടി കൊടുത്തു. നിനവിനും കിട്ടി ഇടി’ എന്നാണ് ജോയല്‍ ശബ്ദസന്ദേശത്തില്‍ പറയുന്നത്.

ഒക്ടോബര്‍ 11 ന് പുലര്‍ച്ചെയാണ് നെടുമ്പാശേരി അത്താണി സിഗ്‌നലിനു സമീപം അപകടമുണ്ടായത്. കാറും ബൈക്കും കൂട്ടിയിടിച്ച് സ്‌കൂട്ടര്‍ യാത്രക്കാരായ രണ്ട് യുവതികളും യുവാവുമാണ് മരിച്ചത്. വയനാട് മടക്കിമല സന്തോഷ് ഭവനില്‍ ദേവിക (21), മംഗലാപുരം സുള്ള്യ കനകമഞ്ചല്‍ ഇബ്രാഹിമിന്റെ മകന്‍ ഇയാസ് (21), പാലക്കാട് കരിമ്പ ഇടക്കുറിശ്ശി മുള്ളന്‍കുഴി പ്രദീപ് കുമാറിന്റെ മകള്‍ ഗോപിക (21) എന്നിവരാണ് മരിച്ചത്.

സംസ്ഥാനത്ത് വീണ്ടും ലോഡ്‌ഷെഡിംഗ്; ഹിമാചലിൽ നിന്ന് വൈദ്യുതി വാങ്ങുന്നതിൽ തീരുമാനമായില്ല

by Midhun HP News | Oct 28, 2026 | Latest News, കേരളം

തിരുവനന്തപുരം: സംസ്ഥാനത്ത് നവംബർ മാസം മുതൽ വീണ്ടും ലോഡ്‌ഷെഡിംഗ് ഏ‌ർപ്പെടുത്തിയേക്കുമെന്ന് വിവരം. ഇതുസംബന്ധിച്ച് കെഎസ്‌ഇബി സർക്കാരിന്റെ അനുമതി തേടിയിരിക്കുകയാണ്. ഹിമാചൽ പ്രദേശിൽ നിന്ന് പീക്ക് അവർ ആവശ്യങ്ങൾക്കായി വൈദ്യുതി വാങ്ങുന്ന കാര്യത്തിൽ അന്തിമ തീരുമാനമാകാത്തതാണ് ഇതിന് പ്രധാന കാരണം.

ഹിമാചൽ പ്രദേശ് 846 മെഗാവാട്ട് മുതൽ 1280 മെഗാവാട്ട് വരെ വൈദ്യുതി നൽകാമെന്ന് അറിയിച്ചിട്ടുണ്ടെങ്കിലും യൂണിറ്റിന് 14.50 രൂപയാണ് അവർ ആവശ്യപ്പെടുന്നത്. എന്നാൽ, വില 12.50 രൂപയാക്കി കുറയ്‌ക്കാനാണ് കെഎസ്‌ഇബി ശ്രമിക്കുന്നത്. വൈദ്യുതി വാങ്ങുന്നതുമായി ബന്ധപ്പെട്ട് മുഖ്യമന്ത്രിയും വൈദ്യുതി മന്ത്രിയും ചർച്ചകൾ നടത്തിയെങ്കിലും അന്തിമ തീരുമാനമായിട്ടില്ല.

സർക്കാർ അനുമതി ലഭിച്ച ശേഷമേ കെഎസ്‌ഇബിക്ക് റെഗുലേറ്ററി കമ്മീഷനെ സമീപിക്കാൻ സാധിക്കൂ. കെഎസ്‌ഇബി പീക്ക് അവർ വൈദ്യുതിക്കായി ടെണ്ടറുകൾ വിളിച്ചെങ്കിലും കുറഞ്ഞ വിലയ്‌ക്ക് വൈദ്യുതി നൽകാൻ കരാറുകാർ ആരും മുന്നോട്ട് വരാത്തത് പ്രതിസന്ധി വർദ്ധിക്കാൻ കാരണമായി. സർക്കാർ തലത്തിൽ അടിയന്തര തീരുമാനം ആയിട്ടില്ലെങ്കിൽ നവംബർ മുതൽ സംസ്ഥാനത്ത് വീണ്ടും വൈദ്യുതി നിയന്ത്രണങ്ങൾ ഏർപ്പെടുത്തേണ്ടി വരും.

ഉദയഗിരിയിൽനിന്ന് കാണാതായ അമ്മയെയും ഏഴുമാസം പ്രായമുള്ള കുഞ്ഞിനെയും കോഴിക്കോട്ടുനിന്ന് കണ്ടെത്തി

by Midhun HP News | Oct 28, 2026 | Latest News, കേരളം

കണ്ണൂർ: മലയോര മേഖലയായ ഉദയഗിരിയിൽനിന്ന് ദുരൂഹസാഹചര്യത്തിൽ കാണാതായ യുവതിയെയും ഏഴുമാസം പ്രായമുള്ള പിഞ്ചുകുഞ്ഞിനെയും മണിക്കൂറുകൾക്കകം പൊലീസ് കണ്ടെത്തി. ഉദയഗിരി പുളിക്കക്കുന്നേൽ വീട്ടിൽ പി.എസ്. ദിൽന (26), മകൾ എബാറിൻ എന്നിവരെയാണ് കോഴിക്കോട് പന്തീരാങ്കാവിൽനിന്ന് പൊലീസ് സംഘം കണ്ടെത്തിയത്.

തിങ്കളാഴ്ച രാവിലെ ഒൻപതിനും ഉച്ചയ്ക്ക് പന്ത്രണ്ടിനും ഇടയിലുള്ള സമയത്താണ് വീട്ടിൽനിന്ന് ദിൽനയെയും കുഞ്ഞിനെയും കാണാതാകുന്നത്. വീട്ടിലും പരിസരങ്ങളിലും ബന്ധുവീടുകളിലും അന്വേഷിച്ചെങ്കിലും വിവരമൊന്നും ലഭിക്കാതെ വന്നതോടെ ദിൽനയുടെ പിതാവ് ഷാജി പൗലോസ് ആലക്കോട് പൊലീസ് സ്റ്റേഷനിൽ പരാതി നൽകുകയായിരുന്നു.

തുടർന്ന് നടത്തിയ അന്വേഷണത്തിൽ ഇരുവരും കോഴിക്കോട് പന്തീരാങ്കാവ് ഭാഗത്തുണ്ടെന്ന് വ്യക്തമായതിനെ തുടർന്ന് പൊലീസ് സംഘം നേരിട്ടെത്തി സുരക്ഷിതമായി കണ്ടെത്തുകയായിരുന്നു. ഇരുവരെയും നാട്ടിലെത്തിച്ച് വൈദ്യപരിശോധനയ്ക്കും തുടർനടപടികൾക്കും ശേഷം ബന്ധുക്കൾക്കൊപ്പം വിട്ടയക്കുമെന്ന് പൊലീസ് അറിയിച്ചു.

വിയ്യൂർ ജയിലിനു മുന്നിൽനിന്ന് പൊലീസിനെ വെട്ടിച്ച് കൈവിലങ്ങോടെ ചാടിപ്പോയ പ്രതി പിടിയിൽ

by Midhun HP News | Oct 28, 2026 | Latest News, കേരളം

തൃശൂർ: വിയ്യൂർ സെൻട്രൽ ജയിലിനു മുൻപിൽ വെച്ച് പൊലീസിനെ കബളിപ്പിച്ച് കൈവിലങ്ങോടെ ഇറങ്ങിയോടിയ റിമാൻഡ് പ്രതിയെ അതിസാഹസികമായി പൊലീസ് പിടികൂടി. കോലഴി സ്വദേശിയായ 22-കാരൻ ആഷിക് ആണ് മണിക്കൂറുകൾ നീണ്ട വ്യാപക തെരച്ചിലിനൊടുവിൽ വിയ്യൂർ ജയിലിന് സമീപമുള്ള പാടുകാട് ഭാഗത്തുനിന്ന് പിടിയിലായത്.

അടിപിടിക്കേസിൽ തൃശൂർ മെഡിക്കൽ കോളജ് പൊലീസ് ഇന്നലെയാണ് ആഷിക്കിനെ അറസ്റ്റ് ചെയ്തത്. തുടർന്ന് കോടതിയിൽ ഹാജരാക്കി റിമാൻഡ് ഉത്തരവ് വാങ്ങിയ പ്രതിയെ വിയ്യൂർ ജയിലിലേക്ക് കൊണ്ടുപോവുകയായിരുന്നു.

ഇന്നലെ വൈകിട്ടോടെ പ്രതിയുമായി പൊലീസ് സംഘം വിയ്യൂർ ജയിൽ കവാടത്തിന് മുന്നിലെത്തി. ജീപ്പിൽനിന്ന് താഴെയിറക്കി ജയിലിനുള്ളിലേക്ക് പ്രവേശിപ്പിക്കാൻ ഒരുങ്ങുന്നതിനിടെ, ഉദ്യോഗസ്ഥരെ അപ്രതീക്ഷിതമായി വെട്ടിച്ച് കൈവിലങ്ങോടെ ആഷിക് റോഡിലൂടെ ഓടുകയായിരുന്നു. ജീപ്പിലുണ്ടായിരുന്ന രണ്ട് പൊലീസ് ഉദ്യോഗസ്ഥർ ഉടൻതന്നെ പിന്നാലെ ഓടിയെങ്കിലും പ്രതി ഇടവഴികളിലൂടെ മറഞ്ഞ് അതിവേഗം രക്ഷപ്പെട്ടു. തുടർന്ന് പ്രതി ഓടിപ്പോയ വഴികളിൽ നടത്തിയ പ്രാഥമിക പരിശോധനയിൽ ഇയാൾ ഉപേക്ഷിച്ച നിലയിൽ കൈവിലങ്ങ് കണ്ടെത്തിയിരുന്നു.

റിമാൻഡ് പ്രതി ജയിൽ കവാടത്തിൽനിന്ന് തന്നെ കടന്നുകളഞ്ഞതോടെ ഉന്നത പൊലീസ് ഉദ്യോഗസ്ഥരുടെ നിർദ്ദേശപ്രകാരം വിയ്യൂരും പരിസരപ്രദേശങ്ങളും കേന്ദ്രീകരിച്ച് പൊലീസ് ശക്തമായ വലവിരിച്ചു. രാത്രി മുഴുവൻ നീണ്ട ഊർജ്ജിതമായ തെരച്ചിലിനൊടുവിൽ, ഒളിവിൽ കഴിയുകയായിരുന്ന ആഷിക്കിനെ പാടുകാട് ഭാഗത്തുവെച്ച് പൊലീസ് സംഘം കണ്ടെത്തുകയും ബലപ്രയോഗത്തിലൂടെ കസ്റ്റഡിയിലെടുക്കുകയുമായിരുന്നു. പൊലീസ് കസ്റ്റഡിയിൽനിന്ന് രക്ഷപ്പെട്ടതിന് ഇയാൾക്കെതിരെ കൂടുതൽ വകുപ്പുകൾ ചുമത്തി പുതിയ കേസെടുത്തിട്ടുണ്ട്. പ്രതിയെ വൈദ്യപരിശോധനയ്ക്ക് ശേഷം കോടതിയിൽ ഹാജരാക്കി ജയിലിലേക്ക് മാറ്റും.