by Midhun HP News | Oct 28, 2026 | Latest News, കേരളം
തൃശൂർ: മികച്ച ജോലിയും ഒപ്പം പുണ്യഭൂമിയിൽ സൗജന്യ ഉംറ നിർവ്വഹണവും വാഗ്ദാനം ചെയ്ത് ലഹരിക്കടത്ത് മാഫിയ ചതിയിൽപ്പെടുത്തിയ മലയാളി ഉൾപ്പെടെ എട്ട് ഇന്ത്യക്കാർ സൗദിയിൽ വധശിക്ഷാ ഭീഷണിയിൽ. തൃശ്ശൂർ വടക്കേക്കാട് കൊച്ചന്നൂർ സ്വദേശി ഉമർ ഷരീഫും പശ്ചിമ ബംഗാൾ സ്വദേശികളായ ഏഴ് യുവാക്കളുമാണ് ജിദ്ദ വിമാനത്താവളത്തിൽ ലഹരിമരുന്നുമായി പിടിയിലായി രണ്ടുമാസമായി ജയിലിൽ കഴിയുന്നത്.
കേസിൽ പ്രതികൾക്ക് പരമാവധി ശിക്ഷയായ വധശിക്ഷ നൽകണമെന്ന് സൗദി പബ്ലിക് പ്രോസിക്യൂഷൻ കോടതിയിൽ വാദിച്ചതോടെ ഉറ്റവരുടെ മോചനത്തിനായി എന്തുചെയ്യണമെന്നറിയാതെ തീരാക്കണ്ണീരിലാണ് ഈ നിർധന കുടുംബങ്ങൾ.
പലസ്തീനിലെയും സുഡാനിലെയും കുട്ടികൾക്ക് വിതരണം ചെയ്യാനുള്ള മധുരപലഹാരങ്ങളാണെന്ന് വിശ്വസിപ്പിച്ചാണ് തട്ടിപ്പ് സംഘം യുവാക്കളുടെ കൈവശം മയക്കുമരുന്ന് കാർഡ്ബോർഡ് പെട്ടികളിലാക്കി നൽകിയത്. തൃശ്ശൂർ കൊച്ചന്നൂർ സ്വദേശി ആഷിക് തങ്ങൾ, മലപ്പുറം സ്വദേശി അലി എന്നിവരാണ് ഈ അന്താരാഷ്ട്ര ലഹരിക്കടത്ത് റാക്കറ്റിന് പിന്നിലെന്ന് ചൂണ്ടിക്കാട്ടി ഉമർ ഷെരീഫിന്റെ ഭാര്യ ഹാജറ ആഭ്യന്തര വകുപ്പ് മന്ത്രി രമേശ് ചെന്നിത്തലയ്ക്ക് നിവേദനം നൽകി. വിദേശത്ത് മെച്ചപ്പെട്ട ജോലി വാഗ്ദാനം ചെയ്ത് തന്റെ ഭർത്താവിനെ വ്യാജ വാഗ്ദാനങ്ങളിൽ കുടുക്കി ചതിയിലൂടെ ലഹരിമരുന്ന് കാരിയറാക്കുകയായിരുന്നുവെന്നും, ഉമർ ഷെരീഫിന്റെയും ഒപ്പമുള്ള മറ്റ് നിരപരാധികളുടെയും മോചനത്തിനായി സംസ്ഥാന-കേന്ദ്ര സർക്കാരുകൾ നയതന്ത്രതലത്തിൽ ഇടപെടണമെന്നും കുടുംബം ആവശ്യപ്പെട്ടു.
രണ്ടുമാസം മുൻപാണ് സൗദി കസ്റ്റംസിന്റെയും നാർക്കോട്ടിക്സ് കൺട്രോൾ വിഭാഗത്തിന്റെയും പിടിയിലാവുന്നത്. പരിശോധനയിൽ അതീവ നിയന്ത്രിത ലഹരിമരുന്നായ പ്രെഗാബാലിൻ വൻതോതിൽ ഇവരുടെ പെട്ടികളിൽനിന്ന് കണ്ടെത്തുകയായിരുന്നു. കസ്റ്റംസ് ഉദ്യോഗസ്ഥർക്ക് മുന്നിലും അന്വേഷണ സംഘത്തിന് മുന്നിലും തങ്ങൾ നിരപരാധികളാണെന്ന് സംഘം ആവർത്തിച്ചു വ്യക്തമാക്കി.
ഇന്ത്യയിലുള്ള അലി എന്ന വ്യക്തി സൗജന്യമായി ഉംറ ചെയ്യാനുള്ള വിമാന ടിക്കറ്റും ചെലവുകളും വഹിക്കാമെന്ന് ഉറപ്പ് നൽകി ജിദ്ദയിലുള്ള മറ്റൊരാൾക്ക് കൈമാറാൻ തന്ന പെട്ടികളാണിതെന്നും, ഇതിൽ മയക്കുമരുന്നാണെന്ന് അറിയില്ലായിരുന്നുവെന്നുമാണ് ഇവർ മൊഴി നൽകിയത്. ജീവകാരുണ്യ പ്രവർത്തനങ്ങളുടെ ഭാഗമായി പലസ്തീനിലെ കുട്ടികൾക്ക് നൽകാനുള്ള മിഠായികളും മധുരപലഹാരങ്ങളുമാണെന്ന് പറഞ്ഞാണ് പെട്ടികൾ ഏൽപ്പിച്ചതെന്നും വിമാനത്താവളത്തിന് പുറത്ത് ഒരാൾ ഇത് കൈപ്പറ്റാൻ കാത്തുനിൽക്കുമെന്ന് അറിയിച്ചിരുന്നതായും ഇവർ മൊഴി നൽകി.
വസ്തുതാന്വേഷണ രേഖകൾ പ്രകാരം, കൊച്ചന്നൂർ സ്വദേശി ആഷിക് തങ്ങളാണ് അലിയുടെ നിർദ്ദേശപ്രകാരം യാത്രകൾ ക്രമീകരിച്ചത്. ഉമർ ഷരീഫിനൊപ്പം പശ്ചിമ ബംഗാളിലെ സൗത്ത് 24 പർഗാനാസ്, രാംജി ജിബോൺപൂർ തുടങ്ങിയ ഗ്രാമങ്ങളിലെത്തി മറ്റ് ഏഴ് യുവാക്കളെയും വലയിലാക്കുകയായിരുന്നു. പ്രദേശവാസിയായ ജാഹിർ ഉദ്ദീൻ എന്ന പ്രതി മുഖേനയാണ് സൗജന്യ ഭക്ഷണവും താമസവും അടക്കമുള്ള സൗജന്യ ഉംറ വാഗ്ദാനം മറ്റുള്ളവരിലേക്ക് എത്തിച്ചത്. തുടർന്ന് പാസ്‌പോർട്ടുകൾ കൈപ്പറ്റി അഞ്ച് ദിവസത്തിനകം എല്ലാവരുടെയും യാത്ര സംഘടിപ്പിക്കുകയായിരുന്നു.
സൗദി നാർക്കോട്ടിക് ആൻഡ് സൈക്കോട്രോപിക് സബ്സ്റ്റൻസസ് നിയമത്തിലെ ആർട്ടിക്കിൾ 37(1), ആർട്ടിക്കിൾ 62(2) എന്നിവ പ്രകാരം പ്രതികൾക്ക് വധശിക്ഷ (ഖത്‌ൽ തഅ്സീറൻ) വിധിക്കണമെന്നാണ് പബ്ലിക് പ്രോസിക്യൂട്ടർ കോടതിയിൽ ആവശ്യപ്പെട്ടിട്ടുള്ളത്. കൂടാതെ ലഹരിക്കടത്തിന് ഉപയോഗിച്ച ബാഗുകൾ കണ്ടുകെട്ടാനും കസ്റ്റംസ് നിയമപ്രകാരം പിടിച്ചെടുത്ത വസ്തുക്കളുടെ മൂന്നിരട്ടി തുക പിഴയായി ചുമത്താനും പ്രോസിക്യൂഷൻ ആവശ്യപ്പെട്ടു.
കേസിൽ ഉമർ ഷരീഫിന്റെ അഭിഭാഷകൻ നവാഫ് ബാ-ഖരീഷ് കുറ്റപത്രം വിശദമായി പരിശോധിച്ച് അടുത്ത സിറ്റിംഗിൽ എതിർ സത്യവാങ്മൂലം സമർപ്പിക്കാൻ സമയം തേടിയതിനെത്തുടർന്ന് കോടതി ഹർജി മാറ്റിവെച്ചു. ബംഗാളി ഭാഷ സംസാരിക്കുന്ന മറ്റ് പ്രതികൾക്കായി ഔദ്യോഗിക കോടതി പരിഭാഷകരെ നിയോഗിക്കാനും കോടതി ഉത്തരവിട്ടു. അറസ്റ്റ് ചെയ്ത ഉദ്യോഗസ്ഥരെയും സാക്ഷികളെയും അടുത്ത തവണ വിസ്തരിക്കുമെന്ന് പ്രോസിക്യൂട്ടർ അറിയിച്ചതോടെ വാദംകേൾക്കൽ മറ്റൊരു ദിവസത്തേക്ക് മാറ്റി.
by Midhun HP News | Oct 28, 2026 | Latest News, ദേശീയ വാർത്ത
ഡല്‍ഹി: ഏഷ്യന്‍ പാരാ ഗെയിംസ് സ്വര്‍ണ്ണ മെഡല്‍ ജേതാവായ നീരജ് യാദവ് ആത്മഹത്യ ചെയ്തു. തന്റെ വസതിയില്‍ വെച്ച് വിഷം കഴിച്ച് ജീവനൊടുക്കുകയായിരുന്നു എന്നാണ് റിപ്പോര്‍ട്ട്. ഇന്ത്യയിലെ മികച്ച പാരാ-അത്ലറ്റുകളില്‍ ഒരാളായ നീരജ് യാദവ്, ഏഷ്യന്‍ പാരാ ഗെയിംസില്‍ മൂന്ന് സ്വര്‍ണ്ണ മെഡലുകള്‍ നേടിയിട്ടുണ്ട്.
എ55 വിഭാഗത്തില്‍ മത്സരിച്ചിരുന്ന 42-കാരനായ യാദവ്, ഡോപ്പിങ് ആരോപണത്തെത്തുടര്‍ന്നുണ്ടായ വിലക്ക് കാരണം ഈ മാസം ആദ്യം ഐച്ചി-നഗോയയില്‍ നടന്ന ഏഷ്യന്‍ പാരാ ഗെയിംസില്‍ പങ്കെടുക്കാന്‍ സാധിച്ചിരുന്നില്ല. ഇതില്‍ താരം കടുത്ത മാനസിക സമ്മര്‍ദ്ദത്തിലായിരുന്നുവെന്ന് പറയപ്പെടുന്നു.
ഏഴാം വയസ്സില്‍ പോളിയോ ബാധിച്ചതിനെത്തുടര്‍ന്ന് ശരീരം തളര്‍ന്ന നീരജ് യാദവ്, ആദ്യം വീല്‍ചെയര്‍ ടെന്നീസാണ് പരിശീലിച്ചിരുന്നത്. പിന്നീട് പാരാ-അത്ലറ്റിക്‌സിലേക്ക് മാറി. ഷോട്ട് പുട്ട്, ഡിസ്‌കസ് ത്രോ, ജാവലിന്‍ ത്രോ തുടങ്ങിയ, ഇരുന്നുകൊണ്ട് മത്സരിക്കുന്ന ഫീല്‍ഡ് ഇനങ്ങളുള്‍പ്പെടുന്ന എ55 വിഭാഗത്തിലാണ് യാദവ് മത്സരിച്ചിരുന്നത്.
ഇന്ത്യയിലെ മികച്ച പാരാ-അത്ലറ്റുകളില്‍ ഒരാളായ യാദവ്, 2018-ല്‍ ജക്കാര്‍ത്തയില്‍ നടന്ന ഗെയിംസില്‍ ജാവലിന്‍ ത്രോയിലും, 2023-ല്‍ ഹാങ്ഷൂവില്‍ നടന്ന ഗെയിംസില്‍ ജാവലിന്‍ ത്രോയിലും ഡിസ്‌കസ് ത്രോയിലുമായിരുന്നു സ്വര്‍ണ്ണം നേടിയത്. നീരജിന്റെ മരണം ദൗര്‍ഭാഗയകരമെന്ന് ഇന്ത്യന്‍ പാരാ-അത്ലറ്റിക്‌സ് ടീം ഹെഡ് കോച്ച് എസ്. സത്യനാരായണന്‍ പറഞ്ഞു.
by Midhun HP News | Oct 28, 2026 | Latest News, കേരളം
കൊച്ചി: കോളിളക്കം സൃഷ്ടിച്ച അരിയിൽ ഷുക്കൂർ വധക്കേസിൽ വിധി നവംബർ 12 ന് പ്രസ്താവിക്കും. കൊച്ചിയിലെ പ്രത്യേക സിബിഐ കോടതിയാണ് വിധി പറയുന്നത്. സിപിഎം നേതാക്കളായ പി ജയരാജനും ടി വി രാജേഷും ഉൾപ്പെടെയുള്ളവരാണ് കേസിലെ പ്രതികൾ. കേസിന്റെ വിചാരണ നടപടികൾ പൂർത്തിയായി.
എം എസ്എഫ് പ്രവര്‍ത്തകനായിരുന്ന അരിയില്‍ അബ്ദുള്‍ ഷുക്കൂറിനെ 2012 ഫെബ്രുവരി 20 നായിരുന്നു കൊലപ്പെടുത്തിയത്. സംഭവസമയത്ത് സിപിഎം കണ്ണൂർ ജില്ലാ സെക്രട്ടറിയായിരുന്ന പി ജയരാജന് നേരെ നടന്ന ആക്രമണത്തിന്റെ പ്രതികാരമായാണ് കൊലപാതകം നടത്തിയതെന്നാണ് സിബിഐ ആരോപിക്കുന്നത്.
കണ്ണൂർ തളിപ്പറമ്പിലെ ചുള്ളിയോട് വയലിൽ വച്ച് എംഎസ്എഫ് പ്രവർത്തകനായ ഷുക്കൂറിനെ തടഞ്ഞുവച്ച് വിചാരണ ചെയ്ത് കൊലപ്പെടുത്തി എന്നാണ് കേസ്. നേതാക്കൾക്കെതിരേ ഗൂഢാലോചനക്കുറ്റമാണ് ചുമത്തിയിരിക്കുന്നത്. വിചാരണ കാലയളവിനിടെ രണ്ട് പ്രതികൾ മരണപ്പെട്ടു.
33 പ്രതികളുള്ള കേസില്‍ പി ജയരാജൻ 32-ാം പ്രതിയും, ടി വി രാജേഷ് 33-ാം പ്രതിയുമാണ്. സഹകരണ ആശുപത്രിയിൽ വെച്ച് പി ജയരാജനും ടി വി രാജേഷും അടക്കമുള്ള നേതാക്കൾ ഗൂഢാലോചന നടത്തിയാണ് കൊലപാതകം ആസൂത്രണം ചെയ്തതെന്ന് സിബിഐ കുറ്റപത്രത്തിൽ പറയുന്നു.
by Midhun HP News | Oct 28, 2026 | Latest News, ജില്ലാ വാർത്ത
തിരുവനന്തപുരം: പിഎസ് സി പരീക്ഷാ ക്രമക്കേടില്‍ ആദ്യ അറസ്റ്റ്. പി എസ് സി മുന്‍ ഉദ്യോഗസ്ഥന്‍ പി സതീഷിന്റെ അറസ്റ്റ് ആണ് ക്രൈംബ്രാഞ്ച് രേഖപ്പെടുത്തിയത്. ആസൂത്രണ ബോര്‍ഡ് പരീക്ഷാ ക്രമക്കേടില്‍ പിഎസ് സി ചെയര്‍മാന്‍ ഇന്ന് ചോദ്യം ചെയ്യലിന് ഹാജരാകാനിരിക്കേയാണ്, കേസുമായി ബന്ധപ്പെട്ട് മുന്‍ ഉദ്യോഗസ്ഥന്‍ അറസ്റ്റിലായത്.
പിഎസ് സി മുന്‍ ഡെപ്യൂട്ടി സെക്രട്ടറിയാണ് സതീഷ്. ആസൂത്രണ ബോര്‍ഡ് പരീക്ഷാ ക്രമക്കേടില്‍ രണ്ടുപേരെയാണ് പ്രതി ചേര്‍ത്തിരുന്നത്. ഇതില്‍ ഒരാളാണ് സതീഷ്. അഡീഷണല്‍ സെക്രട്ടറി ഹരിയാണ് കേസിലെ രണ്ടാമത്തെ പ്രതി. സതീഷിന്റെ വീട്ടിലെത്തിയ ക്രൈംബ്രാഞ്ചിന്റെ പ്രത്യേക സംഘം പ്രതിയെ കസ്റ്റഡിയിലെടുക്കുകയായിരുന്നു.
പരീക്ഷയില്‍ 54 മാര്‍ക്കിന്റെ ചോദ്യങ്ങള്‍ കൃത്യമായി മൂല്യനിര്‍ണയം നടത്താതെ, ഒരാള്‍ക്ക് നിയമനം ലഭിക്കുന്നതിന് വേണ്ടി നിയമവിരുദ്ധമായി പ്രവര്‍ത്തിച്ചു എന്നതാണ് കേസ്. ഇത്തരത്തില്‍ നിയമവിരുദ്ധ പ്രവര്‍ത്തനത്തിന് നേതൃത്വം നല്‍കിയ ഉദ്യോഗസ്ഥന്‍ എന്ന നിലയിലാണ് സതീഷിനെ കേസില്‍ പ്രതി ചേര്‍ത്തത്. ഇതിന് മുന്‍പ് രണ്ടു തവണ സതീഷിനെ വിളിച്ചുവരുത്തി ക്രൈംബ്രാഞ്ച് ചോദ്യം ചെയ്തിരുന്നു. ഇതിന് പിന്നാലെയാണ് അറസ്റ്റ് രേഖപ്പെടുത്തിയത്.
by Midhun HP News | Oct 28, 2026 | Latest News, ജില്ലാ വാർത്ത
അഞ്ചുതെങ്ങ് സ്വദേശി എഴുതിയ നോവൽ നവംബർ 1ന് രാജീവ് അഞ്ചൽ കായിക്കരയിൽ പ്രകാശനം ചെയ്യും. കായിക്കര കിഴക്കു വിളാകത്തു വീട്ടിൽ വേണുവിന്റെയും മിനിയുടേയും മകൻ വി. എം. വൈശാഖാണ് മഹാബലവാനായ ഭീമസേനന്റെ ജീവിതകഥ പ്രമേയമാക്കിയ ‘ഭീമായനം’ എന്ന പുസ്തകം എഴുതിയത്.
പുസ്തകത്തിന്റെ പ്രകാശനം കേരള പിറവി ദിനത്തിൽ കായിക്കര ആശാൻ സ്മാരകത്തിൽ വെച്ച് രാവിലെ 10:00 മണിക്ക് പ്രശസ്ത ചലച്ചിത്ര സംവിധായകൻ രാജീവ് അഞ്ചൽ നിർവ്വഹിക്കും. പാൻഡോറ ബുക്‌സ്.ഇൻ (Pandora Books.in) ആണ് പുസ്തകത്തിന്റെ പ്രസാധകർ. ചടങ്ങിൽ സാംസ്കാരിക – സാഹിത്യ രംഗത്തെ പ്രമുഖർ പങ്കെടുക്കും.
by Midhun HP News | Oct 28, 2026 | Latest News, കേരളം
കൊച്ചി: പ്രമുഖ ചലച്ചിത്ര താരം നിവിൻ പോളി, സംവിധായകൻ എബ്രിഡ് ഷൈൻ എന്നിവർക്കെതിരെയുള്ള സാമ്പത്തിക തട്ടിപ്പ് കേസ് കേരള ഹൈക്കോടതി റദ്ദാക്കി. 1.9 കോടി രൂപയുടെ തട്ടിപ്പ് ആരോപിച്ചു നിർമ്മാതാവ് പി.എസ്. ഷംനാസ് നൽകിയ പരാതിയിലാണ് തലയോലപ്പറമ്പ് പൊലീസ് താരത്തിനും സംവിധായകനുമെതിരെ ക്രിമിനൽ കേസ് രജിസ്റ്റർ ചെയ്തിരുന്നത്. ഇതിനൊപ്പം, നിവിൻ പോളിയുടെ ഒപ്പ് വ്യാജമായി നിർമ്മിച്ചുവെന്നാരോപിച്ച് ഷംനാസിനെതിരെ പാലാരിവട്ടം പൊലീസ് രജിസ്റ്റർ ചെയ്ത കേസിലെ തുടർനടപടികളും കോടതി റദ്ദാക്കിയിട്ടുണ്ട്.
ഇരുവിഭാഗവും തമ്മിലുള്ള തർക്കങ്ങൾ സൗഹാർദ്ദപരമായി ഒത്തുതീർപ്പിലെത്തിയതിനാലും, പരസ്പരം മറ്റ് പരാതികളോ തർക്കങ്ങളോ ഇല്ലാത്തതിനാലും കേസുകളുമായി മുന്നോട്ടുപോകുന്നതിൽ അർത്ഥമില്ലെന്ന് ജസ്റ്റിസ് പി.വി. ബാലകൃഷ്ണൻ ചൂണ്ടിക്കാട്ടി.
കേസിലെ വസ്തുതകളും കോടതിയിൽ സമർപ്പിച്ച രേഖകളും പരിശോധിച്ചതിൽനിന്ന് ഇരുകൂട്ടരും തമ്മിലുള്ള പ്രശ്നങ്ങൾ പരിഹരിച്ചതായി ബോധ്യപ്പെട്ടെന്ന് കോടതി വ്യക്തമാക്കി. പ്രതികൾക്കെതിരെ ചുമത്തപ്പെട്ട കുറ്റങ്ങൾ സമൂഹത്തെ മൊത്തത്തിൽ ബാധിക്കുന്ന ഗുരുതര സ്വഭാവമുള്ളതല്ല. മാത്രമല്ല, കേസ് തുടർന്നു കൊണ്ടുപോയാലും പ്രതികൾ ശിക്ഷിക്കപ്പെടാനുള്ള സാധ്യത തീർത്തും വിരളമാണെന്നിരിക്കെ വിചാരണ നടപടികളുമായി മുന്നോട്ടുപോകുന്നത് കോടതിയുടെ സമയം പാഴാക്കലാകുമെന്നും ഹൈക്കോടതി നിരീക്ഷിച്ചു.
‘ഇന്ത്യൻ മൂവി മേക്കേഴ്സ്’ ഉടമയായ പി.എസ്. ഷംനാസ് കോട്ടയം തലയോലപ്പറമ്പ് പൊലീസിൽ നൽകിയ പരാതിയുടെ അടിസ്ഥാനത്തിലാണ് നിവിൻ പോളിക്കും എബ്രിഡ് ഷൈനുമെതിരെ കേസെടുത്തിരുന്നത്. 3.5 കോടി മുതൽ 4 കോടി രൂപ വരെ മുടക്കി നിർമ്മിച്ച ‘മഹാവീര്യർ’ എന്ന ചിത്രം ബോക്സ് ഓഫീസിൽ പരാജയപ്പെട്ടതിനെ തുടർന്ന്, ഇരുവരും ചേർന്ന് ഷംനാസിന് ‘ആക്ഷൻ ഹീറോ ബിജു 2’ എന്ന പുതിയ ചിത്രത്തിൽ സഹനിർമ്മാതാവ് പദവിയും വിദേശ വിതരണാവകാശത്തിൽ നിന്നുള്ള ലാഭവിഹിതവും വാഗ്ദാനം ചെയ്തിരുന്നുവെന്നായിരുന്നു പരാതി.
എന്നാൽ പിന്നീട് ചിത്രത്തിന്റെ ടൈറ്റിൽ കൈമാറ്റം രഹസ്യമാക്കി വെക്കുകയും, കാലാവധി കഴിഞ്ഞ പഴയ കരാർ ഉപയോഗിച്ച് ദുബായ് ആസ്ഥാനമായുള്ള കമ്പനിക്ക് ചിത്രത്തിന്റെ വിദേശ വിതരണാവകാശങ്ങൾ അഞ്ച് കോടി രൂപയ്ക്ക് വിറ്റ് തനിക്ക് വൻ സാമ്പത്തിക നഷ്ടം വരുത്തിവെച്ചുവെന്നുമാണ് ഷംനാസ് ആരോപിച്ചിരുന്നത്.
Recent Comments