by Midhun HP News | Oct 20, 2026 | Latest News, കേരളം
കൊല്ലം:കൊട്ടാരക്കരയില്‍ ശബരിമല ദര്‍ശനം കഴിഞ്ഞ് മടങ്ങുകയായിരുന്ന അയ്യപ്പ ഭക്തര്‍ക്ക് മദ്യപസംഘത്തിന്റെ ക്രൂര മര്‍ദനം. ഒന്നര വയസ്സുള്ള കുഞ്ഞിനും സ്ത്രീകള്‍ക്കുമുള്‍പ്പെടെ പരിക്കേറ്റു. ഇവരെ കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു. സംഭവത്തില്‍ കൊട്ടാരക്കര സ്വദേശികളായ പ്രണവ്, ഷിബിന്‍, ശരത്, പ്രവീണ്‍ എന്നിവരെ പൊലീസ് കസ്റ്റഡിയിലെടുത്തു.
ഇന്നലെ രാത്രിയിലായിരുന്നു സംഭവം. ഭക്തര്‍ സഞ്ചരിച്ച കാറില്‍ മദ്യപ സംഘത്തിന്റെ കാര്‍ തട്ടി. തുടര്‍ന്ന് ഇരുകൂട്ടരും തമ്മില്‍ വാക്കേറ്റമുണ്ടായി. പിന്നാലെ മദ്യലഹരിയിലായിരുന്ന നാലംഗ സംഘം വാഹനത്തിലുണ്ടായിരുന്ന കുടുംബത്തെ ആക്രമിക്കുകയായിരുന്നു. തുടര്‍ന്ന് സമീപവാസികള്‍ പൊലീസില്‍ വിവരം അറിയിക്കുകയായിരുന്നു.യുവാക്കള്‍ അമിതമായി മദ്യപിച്ചിരുന്നതായും ഇവര്‍ സഞ്ചരിച്ച വാഹനത്തില്‍ നിന്നും മദ്യ കുപ്പികള്‍ കണ്ടെടുത്തതായും പൊലീസ് പറഞ്ഞു.
by Midhun HP News | Oct 20, 2026 | Latest News, ദേശീയ വാർത്ത
ദുബൈ: ദുബൈ രാജ്യാന്തര വിമാനത്താവളത്തില്‍ ഭിന്നശേഷിക്കാര്‍ക്ക് സുഗമമായ യാത്രാനുഭവം ഉറപ്പാക്കാന്‍ നൂതന സാങ്കേതിക വിദ്യ പരീക്ഷണം. പ്രമുഖ വിമാനത്താവള സേവന ദാതാക്കളായ ഡനാറ്റയാണ് ടെര്‍മിനലിലൂടെ യാത്രക്കാര്‍ക്ക് എളുപ്പത്തില്‍ സഞ്ചരിക്കാന്‍ സഹായിക്കുന്ന സ്വയം നിയന്ത്രിത (ഓട്ടോണമസ്) സാങ്കേതികവിദ്യയാണ് പരീക്ഷിക്കുന്നത്.
വിമാനത്താവളത്തില്‍ യാത്രക്കാരുടെ എണ്ണം വര്‍ധിച്ചുവരുന്ന സാഹചര്യത്തില്‍ ജീവനക്കാര്‍ക്കുള്ള പരിശീലനം, കൃത്യമായ പ്ലാനിങ്, സേവന നിലവാരം എന്നിവയ്ക്ക് വലിയ പ്രാധാന്യം നല്‍കികൊണ്ടാണ് നീക്കം. വിവിധ വൈകല്യങ്ങളുള്ള യാത്രക്കാരെ സഹായിക്കുന്നതിനായി ജീവനക്കാര്‍ക്ക് പ്രത്യേക പരിശീലനം നല്‍കുന്നുണ്ട്. പ്രവര്‍ത്തന ഡാറ്റ നിരന്തരം പരിശോധിച്ച് ആവശ്യമുള്ള സ്ഥലങ്ങളില്‍ കൂടുതല്‍ സേവനവും ജീവനക്കാരെയും ലഭ്യമാക്കും. ദുബൈ എയര്‍പോര്‍ട്ടുമായി സഹകരിച്ചാണ് പ്രവര്‍ത്തനങ്ങള്‍ ഏകോപിപ്പിക്കുന്നത്.
ഇന്നലെ നടന്ന എക്‌സിബിഷനില്‍ ഡനാറ്റ ഇതിന്റെ വിവരങ്ങള്‍ പുറത്തുവിട്ടു. ഭിന്നശേഷിക്കാരായ യാത്രക്കാര്‍ക്ക് വിമാനത്താവളത്തിലെ യാത്ര കൂടുതല്‍ എളുപ്പമാക്കുന്നതിന് വിപ്ലവകരമായ മാറ്റങ്ങള്‍ കൊണ്ടുവരാനാണ് ശ്രമിക്കുന്നതെന്ന് ഡനാറ്റയിലെ ആക്‌സസിബിള്‍ ട്രാവല്‍ മാനേജര്‍ മോസ സലീദ് അല്‍ മാഹി വ്യക്തമാക്കി.
by Midhun HP News | Oct 20, 2026 | Latest News, കേരളം
പത്തനംതിട്ട: പത്തനംതിട്ടയിലെ പുളികീഴിൽ മൂന്ന് വര്‍ഷം മുമ്പ് കുട്ടിയുടെ മൃതദേഹം കണ്ടെത്തിയ സംഭവം കൊലപാതകമെന്ന് തെളിഞ്ഞു. തന്റെ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നു എന്ന് അമ്മ മൊഴി നൽകി. ചതുപ്പിൽ കുഴിച്ചിട്ട നിലയിലാണ് മൂന്നു വയസ്സുള്ള കുഞ്ഞിന്റെ മൃതദേഹം കണ്ടെത്തിയിരുന്നത്.
മൂന്നു വർഷങ്ങൾക്ക് ശേഷമാണ് കുട്ടിയുടെ അമ്മയായ നാടോടി സ്ത്രീയെ പൊലീസ് പിടികൂടുന്നത്. കഴിഞ്ഞയാഴ്ച പാലക്കാട് വെച്ച് നാടോടികളായ സ്ത്രീകള്‍ തമ്മിലുണ്ടായ വഴക്കിനിടെയാണ് കുട്ടിയുടെ മരണത്തെക്കുറിച്ച് അമ്മ വെളിപ്പെടുത്തുന്നത്. വിവരം അറിഞ്ഞ പൊതു പ്രവർത്തകൻ വിവരം പൊലീസിനെ അറിയിക്കുകയായിരുന്നു.
ചെങ്ങന്നൂരില്‍ വെച്ച് സുഹൃത്തുമായുള്ള ലൈംഗിക ബന്ധത്തിനിടെ കുഞ്ഞ് കരഞ്ഞതാണ് പ്രകോപനമായത്. ദേഷ്യത്തിൽ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നുവെന്ന് സ്ത്രീ പൊലീസിനോട് സമ്മതിച്ചു. തുടര്‍ന്ന് ആണ്‍സുഹൃത്തിന്റെ സഹായത്തോടെ മൃതദേഹം പുളിക്കീഴിലെ ചതുപ്പില്‍ കുഴിച്ചിടുകയായിരുന്നു. പ്രതിയായ ആൺസുഹൃത്തിനായി പൊലീസ് തിരച്ചിൽ ഊർജ്ജിതമാക്കി.
by Midhun HP News | Oct 20, 2026 | Latest News, ജില്ലാ വാർത്ത
തിരുവനന്തപുരം: ബംഗാള്‍ ഉള്‍ക്കടലില്‍ ഇരട്ട ന്യൂനമര്‍ദ്ദത്തിന് സാധ്യത. തെക്കുപടിഞ്ഞാറന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന തമിഴ്നാട് തീരത്തിനും മുകളിലായി സമുദ്രനിരപ്പില്‍ നിന്ന് 5.8 കിലോമീറ്റര്‍ വരെ ഉയരത്തില്‍ ചക്രവാതച്ചുഴി സ്ഥിതി ചെയ്യുന്നുണ്ട്. ഇതിന്റെ സ്വാധീനഫലമായി അടുത്ത 24 മണിക്കൂറിനുള്ളില്‍ ഇതേ മേഖലയില്‍ ന്യൂനമര്‍ദ്ദം രൂപപ്പെടാന്‍ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
തായ്ലന്‍ഡ് കടലിടുക്കിനും അതിനോട് ചേര്‍ന്ന തായ്ലന്‍ഡ്, മ്യാന്‍മര്‍ പ്രദേശത്തിനും മുകളിലായി മറ്റൊരു ചക്രവാതച്ചുഴിയും സ്ഥിതിചെയ്യുന്നുണ്ട്. ഈ ചക്രവാതച്ചുഴി ബുധനാഴ്ച രാവിലെയോടെ വടക്കന്‍ ആന്‍ഡമാന്‍ കടലിലേക്ക് പ്രവേശിക്കാന്‍ സാധ്യതയുണ്ട്. തുടര്‍ന്ന് പടിഞ്ഞാറ്-വടക്കുപടിഞ്ഞാറ് ദിശയിലേക്ക് നീങ്ങും. ഇതിന്റെ സ്വാധീനഫലമായി വെള്ളിയാഴ്ചയോടെ തെക്കുകിഴക്കന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന മധ്യ-കിഴക്കന്‍ ബംഗാള്‍ ഉള്‍ക്കടലിലും ന്യൂനമര്‍ദ്ദം രൂപപ്പെടാന്‍ സാധ്യതയെന്നും കാലാവസ്ഥ വകുപ്പ് അറിയിച്ചു.
തുടര്‍ന്ന് ഇത് വടക്കുപടിഞ്ഞാറന്‍ ദിശയിലേക്ക് നീങ്ങി കൂടുതല്‍ ശക്തിപ്രാപിക്കാനും സാധ്യതയുണ്ട്. ഇതിന്റെയെല്ലാം സ്വാധീനഫലമായി ശനിയാഴ്ച വരെയുള്ള ദിവസങ്ങളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്കും നേരിയതോ മിതമായതോ ആയ മഴയ്ക്കും സാധ്യതയുണ്ട്. ശക്തമായ മഴ കണക്കിലെടുത്ത് വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
യെല്ലോ അലര്‍ട്ട്:
20/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം
21/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം
22/10/2026: ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍
23/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍,
24/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട്
ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 30-40 കിമീ വരെ വേഗത്തില്‍ ശക്തമായ കാറ്റിനും സാധ്യതയെന്നും കാലാവസ്ഥ വകുപ്പ് അറിയിച്ചു.
by Midhun HP News | Oct 20, 2026 | Latest News, കേരളം
അത്യാധുനിക സൗകര്യങ്ങളോടുകൂടി വിദഗ്ധ ഡോക്ടർമാരുടെ മേൽനോട്ടത്തിൽ
Dr. SREERAJ’S SMILE LOUNGE എന്ന പേരിൽ ദന്തൽ ക്ലിനിക് ആരംഭിക്കുന്നു. ആറ്റിങ്ങൽ
കൊല്ലമ്പുഴ ഗവൺമെന്റ് വെറ്റിനറി ഹോസ്പിറ്റലിന് എതിർവശത്തായി നാളെ (ഒക്ടോബർ 21) മുതൽ പ്രവർത്തനം ആരംഭിക്കുന്നു. ആറ്റിങ്ങൽ എം എൽ എ ഒ എസ് അംബിക ഉദ്ഘാടനം നിർവഹിക്കും. ആറ്റിങ്ങൽ നഗരസഭ ചെയർപേഴ്സൺ എം പ്രദീപ്, വാർഡ് കൗൺസിലർ മുരളീധരൻ നായർ തുടങ്ങി മറ്റു പ്രമുഖരും ചടങ്ങിൽ സംബന്ധിക്കും.
റൂട്ട് കനാൽ, ടീത്ത് വൈറ്റനിങ്, ഓർത്തോഡോണ്ടിക്സ്, ഗം ഡിസീസ് തെറാപ്പി, ക്ലിയർ അലൈനേർസ് തുടങ്ങി നിരവധി ട്രീറ്റ്മെന്റ് കളും ലഭ്യമാണ്.
by Midhun HP News | Oct 20, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാന വഖഫ് ബോർഡ് പുനഃസംഘടനയുമായി ബന്ധപ്പെട്ട് ഉയർന്ന കടുത്ത അതൃപ്തികൾക്കൊടുവിൽ കാന്തപുരം എ.പി. വിഭാഗത്തിന് ബോർഡിൽ അർഹമായ പ്രാതിനിധ്യം നൽകാൻ ധാരണയായി. വഖഫ് വിഷയത്തിൽ സമവായത്തിലെത്തിയതായും നിലവിൽ പ്രഖ്യാപിച്ച ബോർഡിൽ ആവശ്യമായ മാറ്റങ്ങൾ വരുത്തുമെന്നും വഖഫ് മന്ത്രി എൻ. ഷംസുദ്ദീൻ വ്യക്തമാക്കി. എല്ലാവരെയും ചേർത്തുനിർത്തിക്കൊണ്ടായിരിക്കും മുന്നോട്ടുപോകുകയെന്നും അദ്ദേഹം മാധ്യമങ്ങളോട് പ്രതികരിച്ചു.
സമവായത്തിന്റെ ഭാഗമായി മന്ത്രി എൻ. ഷംസുദ്ദീൻ ഇന്ന് വൈകുന്നേരം കാരന്തൂർ മർക്കസിലെത്തി കാന്തപുരം എ.പി. അബൂബക്കർ മുസ്ലിയാരുമായി നേരിട്ട് കൂടിക്കാഴ്ച നടത്തും. സമവായ ഫോർമുല കാന്തപുരത്തെ മന്ത്രി നേരിട്ട് ധരിപ്പിക്കും. മുഖ്യമന്ത്രിയും മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടിയും നേരിട്ട് ഇടപെട്ടാണ് അനുരഞ്ജന ചർച്ചകൾക്ക് വഴിതുറന്നത്. പൊന്നാനി എംഎൽഎ നൗഷാദ് അലിയും സമവായ നീക്കങ്ങളിൽ നിർണ്ണായക പങ്കുവഹിച്ചു.
പുതിയ സമവായ ഫോർമുല പ്രകാരം കാന്തപുരം വിഭാഗം നിർദ്ദേശിക്കുന്ന പ്രതിനിധിക്ക് വഖഫ് ബോർഡിൽ അംഗത്വം നൽകും. ഇതിനായി നിലവിലെ ബോർഡ് അംഗമായ തൊടിയൂർ മുഹമ്മദ് കുഞ്ഞി മൗലവി വഖഫ് ബോർഡ് അംഗത്വം രാജിവെച്ചേക്കും. ഇതിന് പകരമായി, നിലവിൽ കാന്തപുരം വിഭാഗത്തിന്റെ കൈവശമുള്ള സംസ്ഥാന ഹജ്ജ് കമ്മിറ്റി ചെയർമാൻ സ്ഥാനം അവർ ഒഴിയും. നിലവിലെ ഹജ്ജ് കമ്മിറ്റി ചെയർമാൻ ഹുസൈൻ സഖാഫി ചുള്ളിക്കോട് രാജി സമർപ്പിച്ച ശേഷം, തൊടിയൂർ മുഹമ്മദ് കുഞ്ഞി മൗലവിയെ ഹജ്ജ് കമ്മിറ്റി ചെയർമാനായി നിയമിക്കാനാണ് ധാരണയായിരിക്കുന്നത്.
വഖഫ് ബോർഡ് പുനഃസംഘടിപ്പിച്ചപ്പോൾ കർശനമായ കാറ്റഗറി മാനദണ്ഡങ്ങൾ പാലിക്കേണ്ടിവന്നതിനാലാണ് ചില സംഘടനകളെ ഉൾപ്പെടുത്താൻ സാധിക്കാതിരുന്നതെന്നും ആരെയും മനഃപൂർവ്വം ഒഴിവാക്കാൻ ശ്രമിച്ചിട്ടില്ലെന്നും മന്ത്രി ഷംസുദ്ദീൻ വിശദീകരിച്ചു. കാന്തപുരം വിഭാഗത്തിന്റെ പരാതി ന്യായമാണെന്നും പ്രശ്നം ചർച്ചകളിലൂടെ രമ്യമായി പരിഹരിക്കുമെന്നും മന്ത്രി പി.കെ. കുഞ്ഞാലിക്കുട്ടിയും നേരത്തെ വ്യക്തമാക്കിയിരുന്നു.
സർക്കാർ തലത്തിൽ സമവായ ധാരണ രൂപപ്പെട്ടതോടെ, ബോർഡിൽ പ്രാതിനിധ്യം ലഭിക്കാത്തതിൽ പ്രതിഷേധിച്ച് ഈ മാസം 22-ന് നടത്താനിരുന്ന ജില്ലാ കലക്ടറേറ്റ് മാർച്ച് കാന്തപുരം വിഭാഗം പിൻവലിച്ചേക്കും. വിഷയത്തിൽ അന്തിമ നിലപാട് സ്വീകരിക്കുന്നതിനായി എ.പി. വിഭാഗം നേതാക്കൾ കോഴിക്കോട്ട് പ്രത്യേകം യോഗം ചേരുന്നുണ്ട്. മന്ത്രിയുമായുള്ള കൂടിക്കാഴ്ചയ്ക്ക് ശേഷം ഔദ്യോഗിക പ്രഖ്യാപനം ഉണ്ടാകും.
Recent Comments