ഗോവ, കുടജാദ്രി തുടങ്ങി ഗവിയും വയനാടും വരെ, വേനലവധിക്ക് ‘ട്രിപ്പ് മൂഡു’മായി കെഎസ്ആര്‍ടിസി

by Midhun HP News | Mar 28, 2026 | Latest News, കേരളം

കണ്ണൂര്‍: വേനലവധി ആഘോഷമാക്കാന്‍ വ്യത്യസ്ത പാക്കേജുമായി കെഎസ്ആര്‍ടിസി ബജറ്റ് ടൂറിസം സെല്‍. കണ്ണൂരില്‍ നിന്ന് ഏപ്രില്‍ 10, 24 തീയതികളില്‍ വൈകീട്ട് ആറിന് കണ്ണൂരില്‍നിന്ന് പുറപ്പെട്ട് ഏപ്രില്‍ 13, 27 തീയതികളില്‍ രാവിലെ എട്ടിന് കണ്ണൂരില്‍ തിരിച്ചെത്തുന്നരീതിയിലാണ് പാക്കേജ് തയ്യാറാക്കിയിരിക്കുന്നത്.

11-ന് രാവിലെ ഗോവയില്‍ എത്തിച്ചേര്‍ന്നശേഷം പ്രാതല്‍ കഴിച്ച് അഗോഡ ഫോര്‍ട്ട്, കാലങ്ങുട്ട ബീച്ച്, അഞ്ചുനാ ബീച്ച്, വാഗതര്‍ ബീച്ച് എന്നിവ സന്ദര്‍ശിച്ച് അന്നേദിവസം ഗോവയില്‍ താമസിക്കും. രണ്ടാമത്തെ ദിവസം പഞ്ചിം സിറ്റി, മിരാമര്‍ ബീച്ച്, ഗോവന്‍ ചര്‍ച്ചസ്, ഡോണാ ബോള ജെട്ടി എന്നിവ സന്ദര്‍ശിച്ച് ഡിന്നറും കഴിഞ്ഞ് രാത്രി കണ്ണൂരിലേക്ക് തിരിക്കും.

കേരളത്തിലെ വിവിധ ഡിപ്പോകളില്‍ നിന്ന് കാസര്‍കോട് വരെ കെഎസ്ആര്‍ടിസി ബസിലും അവിടെ നിന്ന് ഗോവയിലേക്ക് അത്യാധുനിക ആഡംബര എസി ബസുകളിലുമാണ് യാത്ര.കേരളത്തിനകത്തെ ഭക്ഷണച്ചെലവ് യാത്രക്കാര്‍ വഹിക്കണം. എന്നാല്‍ കാസര്‍കോട് മുതല്‍ ഗോവ വരെയും തിരിച്ചുമുള്ള ഭക്ഷണച്ചെലവ് പാക്കേജിന്റെ ഭാഗമാണ്. യാത്രയില്‍ സുരക്ഷ ഉറപ്പാക്കുന്നതിനായി 1 മുതല്‍ 80 വയസ്സുവരെയുള്ളവര്‍ക്ക് 10 ലക്ഷം രൂപയുടെ ട്രാവല്‍ ഇന്‍ഷുറന്‍സ് കവറേജും കെഎസ്ആര്‍ടിസി വാഗ്ദാനം ചെയ്യുന്നു.

കണ്ണുനീർ കടലായി നിരണം; യാത്രയാക്കാൻ വന്ന മകനും പിതാവിനൊപ്പം മടങ്ങി

by Midhun HP News | Mar 28, 2026 | Latest News, കേരളം

തിരുവല്ല നിരണം സ്വദേശികൾക്ക് ഈ കാഴ്ച ഹൃദയഭേദകമാണ്. വാർധക്യസഹജമായ അസുഖങ്ങളാൽ മരണപ്പെട്ട പിതാവ് പി.ജി. ഡാനിയേലിനെ അവസാനമായി ഒരുനോക്ക് കാണാനും ആ അന്ത്യയാത്രയിൽ കൂട്ടുനിൽക്കാനുമാണ് മകൻ എബ്രഹാം ദുബായിൽ നിന്നും ഓടിയെത്തിയത്. എന്നാൽ ശനിയാഴ്ച പിതാവിന്റെ സംസ്കാരം നടക്കാനിരിക്കെ, ആരെയും സങ്കടക്കടലിലാഴ്ത്തിക്കൊണ്ട് വെള്ളിയാഴ്ച പുലർച്ചെ എബ്രഹാമും വിടവാങ്ങി.

കുടുംബാംഗങ്ങളോടൊപ്പം പ്രാർത്ഥനകളിൽ പങ്കുചേർന്ന് ഉറങ്ങാൻ കിടന്ന എബ്രഹാമിനെ ഹൃദയാഘാതത്തിന്റെ രൂപത്തിലാണ് മരണം തട്ടിയെടുത്തത്. പിതാവിന്റെ ചേതനയറ്റ ശരീരത്തിനരികിൽ മകനും എത്തുമ്പോൾ ആ വീടിനും നാടിനും അത് താങ്ങാവുന്നതിലും അധികമായി. ഒരേ വീട്ടുമുറ്റത്ത്, ഒരേ പന്തലിൽ വെച്ച് പിതാവിനും മകനും നാട് വിടചൊല്ലുകയാണ്.

‘മികച്ച പടം, സിനിമ ആണെങ്കിലും അല്ലെങ്കിലും അപ്പ ഈസ് മൈ ഹീറോ’; ‘പ്രതിഛായ’ കണ്ട് ചാണ്ടി ഉമ്മൻ

by Midhun HP News | Mar 28, 2026 | Latest News, കേരളം

‘പ്രതിഛായ’ മികച്ച സിനിമയാണെന്ന് പുതുപ്പള്ളിയിലെ യുഡിഎഫ് സ്ഥാനാർഥി ചാണ്ടി ഉമ്മൻ. നല്ലൊരു ഒറിജിനലാറ്റി ഈ സിനിമയ്ക്ക് ഉണ്ടെന്നും സിനിമയാണെങ്കിലും അല്ലെങ്കിലും അപ്പയാണ് തന്റെ ഹീറോയെന്നും ചാണ്ടി ഉമ്മൻ പറഞ്ഞു. പ്രതിഛായ സിനിമ കണ്ടിറങ്ങിയ ശേഷം ഓൺലൈൻ മാധ്യമങ്ങളോട് സംസാരിക്കുകയായിരുന്നു അദ്ദേഹം. “മികച്ച ഒരു പടം തന്നെയാണ്.

പൊളിറ്റിക്കൽ സംഭവങ്ങൾ പരാമർശിക്കുന്നുണ്ടെങ്കിലും, അതായത് നമ്മുടെ നാട്ടിൽ നടന്ന ചില സംഭവങ്ങളുടെ ഫിൽമി ക്രിയേഷൻ. ഇതൊരു ഫിക്ഷനും കൂടിയാണ്. അതിനെ അങ്ങനെ തന്നെ കാണാനാണ് ഞാൻ ആ​ഗ്രഹിക്കുന്നത്. ഫിക്ഷനായിട്ട് തന്നെയാണ് കഥ. പക്ഷേ ഒരു കാര്യം എനിക്ക് ഇഷ്ടപ്പെട്ടു. നല്ലൊരു ഒറിജിനാലിറ്റി ഈ സിനിമയ്ക്കുണ്ട്.

നല്ലൊരു എഫേർട്ട് ഈ സിനിമയ്ക്ക് വേണ്ടി എടുത്തിട്ടുണ്ട്. സംവിധായകനും ടീമിനും അഭിനന്ദനങ്ങൾ. സിനിമയാണെങ്കിലും അല്ലെങ്കിലും അപ്പ ഈസ് മൈ ഹീറോ. നിവിനൊക്കെ വളരെ റിയൽ ആക്ടിങ് ആയിരുന്നു”. – ചാണ്ടി ഉമ്മൻ പറഞ്ഞു.

നിവിൻ പോളി, ഷറഫുദ്ദീൻ, ബാലചന്ദ്ര മേനോൻ എന്നിവരെ മുഖ്യകഥാപാത്രങ്ങളാക്കി ബി ഉണ്ണികൃഷ്ണൻ രചനയും സംവിധാനവും നിർവഹിച്ച ചിത്രമാണ് ‘പ്രതിഛായ’. കേരള രാഷ്ട്രീയത്തെ പിടിച്ചുലച്ച പല സംഭവവികാസങ്ങളും സിനിമയിലുണ്ടെന്നാണ് സിനിമ കണ്ടിറങ്ങിയവർ പറയുന്നത്.

കേവലം രണ്ട് സീറ്റിന്റെ ഭൂരിപക്ഷത്തിൽ കേരളം ഭരിക്കുന്ന പാർട്ടിയുടെ മുഖ്യമന്ത്രി കെ എൻ വർഗീസിന്റെ ജീവിതമാണ് പ്രതിഛായ പറയുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനും ആർ ഡി ഇലുമിനേഷൻസ് എൽഎൽപിയുമാണ് ചിത്രം നിർമിക്കുന്നത്. വൻ താരനിരയാണ് ചിത്രത്തിൽ ഉള്ളത്. ഹരിശ്രീ അശോകൻ, മണിയൻപിള്ള രാജു, നീതു കൃഷ്ണ, ആൻ അഗസ്റ്റിൻ, സബിത ആനന്ദ്, വിഷ്ണു അഗസ്ത്യ, നിശാന്ത് സാഗർ, ആർജെ വിജിത, സായ് കുമാർ, വൈശാഖ് ശങ്കർ, മേഘ തോമസ്, ചിരാഗ് ജാനി അനീന, നന്ദിനി ഗോപാലകൃഷ്ണൻ, ചിലമ്പൻ ജോസ് തുടങ്ങിയവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.