by Midhun HP News | Jan 2, 2026 | Latest News, ജില്ലാ വാർത്ത
തിരുവനന്തപുരം: റെയിൽവേ ആപ്പായ യുടിഎസ് ഓൺ മൊബൈൽ ആപ്പിൽ (അൺ റിസർവ്ഡ് ടിക്കറ്റിങ് സിസ്റ്റം) ഇനി സീസൺ ടിക്കറ്റ് ലഭിക്കില്ല. റെയിൽവേയുടെ പുതിയ ആപ്പായ ‘റെയിൽ വൺ’ ആപ്പിലൂടെ സീസൺ ടിക്കറ്റ് എടുക്കാനും പുതുക്കാനും റെയിൽവേ നിർദേശിച്ചു.
എല്ലാ സേവന ആപ്പുകളെയും ഉൾപ്പെടുത്തി റെയിൽവേ ഏകീകരിച്ച ആപ്പാണ് റെയിൽ വൺ. സാധാരണ ടിക്കറ്റും പ്ലാറ്റ്ഫോം ടിക്കറ്റും യുടിഎസ് ആപ്പിൽ ലഭിക്കും. നിലവിൽ യുടിഎസ് വഴി സീസൺ ടിക്കറ്റ് എടുത്തവർക്ക് ‘ഷോ ടിക്കറ്റിൽ’ അത് നിലനിൽക്കും.
2026 ജനുവരി 14 മുതൽ ജൂലൈ 14 വരെ റെയിൽ വൺ ആപ്പ് വഴി റിസർവ് ചെയ്യാത്ത ടിക്കറ്റുകൾ വാങ്ങുമ്പോൾ മൂന്നുശതമാനം ഇളവ് ലഭിക്കും. ഏതെങ്കിലും ഡിജിറ്റൽ മോഡ് വഴി പണമടയ്ക്കണം. നിലവിൽ, RailOne ആപ്പിൽ R-wallet പേയ്മെൻ്റ് വഴി റിസർവ് ചെയ്യാത്ത ടിക്കറ്റുകൾ ബുക്ക് ചെയ്യുന്നതിന് 3 ശതമാനം ക്യാഷ്ബാക്ക് നൽകുന്നു.
by Midhun HP News | Jan 2, 2026 | Latest News, കേരളം
കൊച്ചി: സാന്വിച്ചില് ചിക്കന് കുറഞ്ഞെന്ന് പരാതി പറഞ്ഞ ഉപഭോക്താക്കളോട് സംഘര്ഷത്തിന് മുതിര്ന്ന മാനേജറെ പുറത്താക്കി ചിക്കിങ്. കൊച്ചി എം ജി റോഡിലെ ചിക്കിങ് ഔട്ട്ലറ്റിലെ മാനേജറായിരുന്ന ജോഷ്വയ്ക്ക് എതിരെയാണ് നടപടി. ഒരുകാരണവശാലും അക്രമം അനുവദിക്കില്ലെന്ന് വ്യക്തമാക്കിയാണ് കമ്പനി മാനേജ്മെന്റിന്റെ ഇടപെടല്.
സാന്ഡിവിച്ചില് ചിക്കന് കുറഞ്ഞത് പരാതിപ്പെട്ട വിദ്യാര്ഥികളുമായി ഉണ്ടായ തര്ക്കമാണ് നടപടിക്ക് ആധാരം. വിദ്യാര്ത്ഥികളോടെ കയര്ക്കുകയും പിന്നീടെത്തിയ ഇവരുടെ സുഹൃത്തുക്കള്ക്ക് നേരെ കത്തിവീശിയും ജോഷ്വ ഔട്ട്ലറ്റില് ഭീകരാന്തരീക്ഷം സൃഷ്ടിച്ചിരുന്നു. ഇതിന്റെ വിഡിയോ ദൃശ്യങ്ങള് ഉള്പ്പെടെ പുറത്തുവരികയും വലിയ തോതില് വിമര്ശനം ഉയരുകയും ചെയ്തിരുന്നു. ഈ സാഹചര്യത്തിലാണ് ചിക്കിങ് മാനേജ്മെന്റിന്റെ ഇടപെടല്. ജീവനക്കാര്ക്ക് നല്കുന്ന പരിശീലനത്തില് മാറ്റം വരുത്തുമെന്നും കമ്പനി പറഞ്ഞു.
സംഘര്ഷത്തില് പരിക്കേറ്റ ഫോര്ട്ട് കൊച്ചി സ്വദേശിയായ ജോഷ്വാ നിലവില് ചികിത്സയിലാണ്. സംഭവത്തില് ഇരു കൂട്ടരുടെയും പരാതിയില് കൊച്ചി സെന്ട്രല് പൊലീസ് കേസ് രജിസ്റ്റര് ചെയ്തിട്ടുണ്ട്. കൊച്ചിയില് സിബിഎസ്ഇ സ്കൂള് സംസ്ഥാന കായികമേളയ്ക്ക് എത്തിയ വിദ്യാര്ത്ഥികള് പരിപാടിക്കിടെ കൊച്ചി എംജി റോഡ് ചിക്കിങില് എത്തിയപ്പോഴായിരുന്നു സംഘര്ഷം. വിദ്യാര്ഥികളുമായുള്ള തര്ക്കത്തില് ബന്ധുക്കളായ സഹോദരന്മാര് ഇടപെട്ടതോടെയാണ് കയ്യാങ്കളിയിലേക്ക് സാഹചര്യം എത്തിയത്.
വിദ്യാര്ത്ഥികള്ക്ക് ഒപ്പം എത്തിയവര് തന്റെ മൊബൈല് തട്ടിപ്പറിച്ച് ഓടിയെന്നും ജീവന് രക്ഷിക്കാനാണ് കത്തി എടുക്കേണ്ടി വന്നതെന്നും മാനേജറുടെ മൊഴി. ചിക്കിംഗ് ജീവനക്കാരാണ് കയ്യേറ്റം തുടങ്ങിയതെന്നാണ് മറു പക്ഷത്തിന്റെ വാദം. ഇതിനിടെ അടുക്കളയില് നിന്നും കത്തിയുമായെത്തിയ ചിക്കിങ് മാനേജറെ എതിര് സംഘം കീഴ്പ്പെടുത്തുന്നതിന്റെ ദൃശ്യങ്ങള് ഉള്പ്പെടെയാണ് പുറത്ത് വന്നത്. പരിക്കുകളുമായി ഇരുകൂട്ടരും ആശുപത്രിയില് ചികിത്സ തേടി.
വിദ്യാര്ത്ഥികള്ക്ക് ഒപ്പം എത്തിയവര് തന്റെ മൊബൈല് തട്ടിപ്പറിച്ചെന്നും ജീവന് രക്ഷിക്കാനാണ് കത്തി എടുക്കേണ്ടി വന്നതെന്നും മാനേജറുടെ മൊഴി. ചിക്കിങ് ജീവനക്കാരാണ് കയ്യേറ്റം തുടങ്ങിയതെന്നാണ് മറു പക്ഷത്തിന്റെ വാദം.
by Midhun HP News | Jan 2, 2026 | Latest News, ജില്ലാ വാർത്ത
തിരുവനന്തപുരം: തദ്ദേശസ്വയംഭരണസ്ഥാപനങ്ങളിലേയ്ക്കുള്ള പൊതുതെരഞ്ഞെടുപ്പില് മത്സരിച്ച എല്ലാ സ്ഥാനാര്ഥികളും ജനുവരി 12 നകം തെരഞ്ഞെടുപ്പ് ചെലവ് കണക്ക് ഓണ്ലൈനായി സമര്പ്പിക്കണം. നിശ്ചിത സമയത്തിനകം കണക്ക് സമര്പ്പിക്കാത്തവരെ അംഗമായി തുടരുന്നതിനും, തദ്ദേശതെരഞ്ഞെടുപ്പില് മത്സരിക്കുന്നതിനും അയോഗ്യരാക്കുമെന്ന് സംസ്ഥാന തെരഞ്ഞെടുപ്പ് കമ്മീഷണര് എ ഷാജഹാന് അറിയിച്ചു. കമ്മീഷന്റെ ഉത്തരവ് തീയതി മുതല് 5 വര്ഷത്തേക്കായിരിക്കും അയോഗ്യത വരിക. 2025 ലെ പൊതുതെരഞ്ഞെടുപ്പില് ആകെ 1199 തദ്ദേശസ്ഥാപനങ്ങളിലെ 23573 വാര്ഡുകളിലായി ആകെ 75627 സ്ഥാനാര്ഥികളാണ് മത്സരിച്ചത്.
പത്രികാസമര്പ്പണം മുതല് വോട്ടെണ്ണല് വരെ നടത്തിയ ചെലവ് കണക്കാണ് നല്കേണ്ടത്. തെരഞ്ഞെടുപ്പ് ചെലവ് കണക്ക് അതത് തദ്ദേശസ്ഥാപനസെക്രട്ടറിമാര്ക്ക് നേരിട്ടും നല്കാം. നിശ്ചിത ഫാറത്തില് നല്കുന്ന ചെലവ് കണക്കിനൊപ്പം വൗച്ചറുകളുടെയും ബില്ലുകളുടെയും പകര്പ്പുകളും നല്കണം. മുന്വര്ഷങ്ങളില് ബന്ധപ്പെട്ട രേഖകളും ബില്ലുകളും സഹിതം യഥാസമയം ചെലവ് കണക്ക് നേരിട്ട് സമര്പ്പിച്ചിട്ടും തുടര്നടപടികളുണ്ടാകുന്നതില് വീഴ്ചയുണ്ടായെന്ന ചില സ്ഥാനാര്ഥികളുടെ പരാതികളെ തുടര്ന്നാണ് ഓണ്ലൈന് സംവിധാനം ഏര്പ്പെടുത്തിയതെന്ന് കമ്മീഷണര് അറിയിച്ചു.
by Midhun HP News | Jan 2, 2026 | Latest News, കേരളം
പാലക്കാട്: പാലക്കാട് ജില്ല ആശുപത്രിയിലെ ചികിത്സപിഴവ് മൂലം വലതുകൈ മുറിച്ചു മാറ്റേണ്ടി വന്ന 9 വയസുകാരിയ്ക്ക് സഹായവുമായി പ്രതിപക്ഷ നേതാവ് വി ഡി സതീശന്. കുട്ടിയ്ക്ക് കൃത്രിമ കൈ വച്ച് നല്കുന്നതിനുള്ള ചെലവ് പൂര്ണമായും ഏറ്റെടുക്കുമെന്നാണ് പ്രതിപക്ഷ നേതാവിന്റെ വാഗ്ദാനം. ഇക്കാര്യം വിനോദിനിയുടെ കുടുംബത്തെ ഫോണില് വിളിച്ച് പ്രതിപക്ഷ നേതാവ് അറിയിച്ചത്.
പ്രതിപക്ഷ നേതാവിന്റെ ഇടപെടലിന് നന്ദി അറിയിച്ച് കുടുംബം രംഗത്തെത്തി. ഏത് ആശുപത്രിയില് ആണെങ്കിലും കുട്ടിയുടെ ചികിത്സയ്ക്ക് വേണ്ട ഇടപടെല് നടത്താമെന്നാണ് പ്രതിപക്ഷ നേതാവ് ഫോണില് വിളിച്ച് പറഞ്ഞത് എന്ന് കുട്ടിയുടെ മാതാവ് മാധ്യമങ്ങളോട് പ്രതികരിച്ചു. വിനോദിനിയുടെ ചികിത്സയുമായി മുന്നോട്ട് പോകാന് ആത്മവിശ്വാസം നല്കുന്നതാണ് വി ഡി സതീശന്റെ ഇടപെടല് എന്നും കുടുംബം വ്യക്തമാക്കി. ചികിത്സാപിഴവ് മൂലം വലതുകൈ നഷ്ടപ്പെട്ട വിനോദിനി പുതുവര്ഷത്തിലും സ്കൂളില് പോകാനാവാതെ വീട്ടില് തന്നെ കഴിയുകയാണെന്ന മാധ്യമ വാര്ത്തകള് പുറത്തുവന്നതിന് പിന്നാലെയാണ് ഇടപെടല്.
കഴിഞ്ഞ സെപ്തംബര് 24ന് സഹോദരനൊപ്പം കളിക്കുന്നതിനിടെയായിരുന്നു ഒമ്പതു വയസുകാരി വിനോദിനി നിലത്തു വീണ് അപകടം സംഭവിച്ചത്. വലതു കൈയൊടിഞ്ഞതിനാല് അന്ന് തന്നെ ചിറ്റൂര് താലൂക്ക് ആശുപത്രിയിലും പാലക്കാട് ജില്ലാ ആശുപത്രിയിലും പ്രവേശിപ്പിച്ചു. ജില്ലാ ആശുപത്രിയില് നിന്നു കൈക്ക് പ്ലാസ്റ്ററിടുകയും ചെയ്തു. കൈവിരലുകളില് കുമിള പൊങ്ങിയതോടെ വീണ്ടും ആശുപത്രിയിലെത്തിയപ്പോഴേക്കും കൈ അഴുകിയ നിലയിലായിരുന്നു. പിന്നാലെ കോഴിക്കോട് മെഡിക്കല് കോളജ് ആശുപത്രിയിലേക്ക് മാറ്റിയെങ്കിലും കൈ മുറിച്ചു മാറ്റേണ്ടി വരികയായിരുന്നു. സംഭവത്തിന് പിന്നാലെ വിനോദിനിയുടെ കുടുംബത്തിന് മുഖ്യമന്ത്രിയുടെ ദുരിതാശ്വാസ നിധിയില് നിന്ന് രണ്ട് ലക്ഷം. കൃത്രിമ കൈ സംബന്ധിച്ച വാഗ്ദാനം പിന്നീട് പരിഗണിക്കപ്പെട്ടിരുന്നില്ല,
by Midhun HP News | Jan 2, 2026 | Latest News, ജില്ലാ വാർത്ത
തിരുവനന്തപുരം: സര്ക്കാര് – എയ്ഡഡ് സ്കൂളുകളിലെ അധ്യാപക നിയമനങ്ങള്ക്കും സ്ഥാനക്കയറ്റങ്ങള്ക്കും കെ-ടെറ്റ് നിര്ബന്ധമാക്കി സര്ക്കാര് ഉത്തരവ്. 2025 സെപ്റ്റംബര് ഒന്നിലെ സുപ്രിംകോടതി വിധിയുടെ പശ്ചാത്തലത്തിലാണ് നടപടി. മാര്ഗനിര്ദേശങ്ങള് പുതുക്കിയതോടെ നിലവിലുണ്ടായിരുന്ന പല ഇളവുകള് ഇല്ലാതായി.
സെറ്റ്, നെറ്റ്, എംഫില്, പിഎച്ച്ഡി, എംഎഡ് എന്നീ ഉയര്ന്ന യോഗ്യതകള് ഉള്ളവരെ കെ-ടെറ്റ് നേടുന്നതില് നിന്നും ഒഴിവാക്കിയതുള്പ്പെടെയാണ് പുതിയ ഉത്തരവോടെ റദ്ദാകുന്നത്. ഇതോടെ ഈ യോഗ്യതയുള്ളവരും ഇനി അധ്യാപക തസ്തികകളിലേക്കും സ്ഥാനക്കയറ്റത്തിനും കെ-ടെറ്റ് യോഗ്യത വേണ്ടിവരും. ഹൈസ്കൂള് അധ്യാപകര്ക്ക് പ്രധാന അധ്യാപകരാകാനോ, ഹയര് സെക്കന്ഡറി വിഭാഗത്തിലേക്ക് ബൈട്രാന്സ്ഫര് നിയമനം ലഭിക്കാനോ ഇനി കെ-ടെറ്റ് കാറ്റഗറി മൂന്ന് നിര്ബന്ധമാണ്.എല്പി, യുപി അധ്യാപക നിയമനങ്ങള്ക്ക് കെ-ടെറ്റ് കാറ്റഗറി ഒന്ന്, രണ്ട് എന്നിവയില് ഏതെങ്കിലും ഒന്ന് വിജയിച്ചവരെ പരിഗണിക്കും. എന്നാല് ഹൈസ്കൂള് നിയമനങ്ങള്ക്ക് കാറ്റഗറി മൂന്ന് തന്നെ വേണം. കേന്ദ്ര അധ്യാപക യോഗ്യതാ പരീക്ഷ സിടെറ്റ് വിജയിച്ചവര്ക്കുള്ള ഇളവ് തുടരും. സി-ടെറ്റ് പ്രൈമറി സ്റ്റേജ് വിജയിച്ചവരെ എല്പി നിയമനത്തിനും എലമെന്ററി സ്റ്റേജ് വിജയിച്ചവരെ യുപി നിയമനത്തിനും പരിഗണിക്കും. എച്ച്എസ്ടി/യുപിഎസ്ടി/എല്പിഎസ്ടി തസ്തികകളിലേക്കുള്ള ബൈട്രാന്സ്ഫര് നിയമനങ്ങള്ക്ക് അതാത് കാറ്റഗറിയിലെ കെ-ടെറ്റ് വിജയിച്ചര്ക്ക് മാത്രമായിരിക്കും പരിഗണന.
by Midhun HP News | Jan 2, 2026 | Latest News, ജില്ലാ വാർത്ത
ആറ്റിങ്ങൽ ചാത്തൻപാറ ഭാഗത്ത് ജോലി കഴിഞ്ഞ് വീട്ടിലേക്ക് മടങ്ങുന്ന വഴിയിൽ വെച്ച് യുവതിയെ ഉപദ്രവിക്കാൻ ശ്രമിച്ച കേസിലെ പ്രതിയായ ആലംകോട് തെഞ്ചേരിക്കോണം ഞാറവിള വീട്ടിൽ അസ്ഹറുദ്ദീനെയാണ് (19) ആറ്റിങ്ങൽ പോലീസ് അറസ്റ്റ് ചെയ്തത്.
വൈകിട്ട് 7.30 മണിയോടെ ജോലി കഴിഞ്ഞ് വീട്ടിലേക്ക് മടങ്ങുന്ന വഴി യുവതിയെ പ്രതി പിന്തുടർന്ന് ആളൊഴിഞ്ഞ ഭാഗത്ത് വച്ച് ഉപദ്രവിക്കുകയായിരുന്നു. സംഭവശേഷം പ്രതി ഓടി രക്ഷപ്പെട്ടു. തുടർന്ന് സ്റ്റേഷനിൽ പരാതി നൽകുകയും ആറ്റിങ്ങൽ ഡിവൈഎസ്പിയുടെ നിർദേശപ്രകാരം ആറ്റിങ്ങൽ എസ് എച്ച് ഒ അജയൻ ജെയുടെ നേതൃത്വത്തിൽ പ്രത്യേക സ്ക്വാഡ് രൂപീകരിച്ചിരുന്നു അന്വേഷണം.
സംഭവസ്ഥലത്തിന് സമീപമുള്ള 50-ലധികം സിസിടിവി ദൃശ്യങ്ങൾ പോലീസ് സൂക്ഷ്മമായി പരിശോധിച്ചു. സംശയാസ്പദമായ സാഹചര്യത്തിൽ കണ്ട 15 ലധികം വാഹനങ്ങളെയും 10 ഓളം വ്യക്തികളെയും കേന്ദ്രീകരിച്ചായിരുന്നു അന്വേഷണം. എസ് ഐ ജിഷ്ണു എം എസ്, എസ് ഐ സിതാര മോഹൻ, എസ് സി പി ഒ ഷജീർ, സി പി ഒ മാരായ ദീപു കൃഷ്ണൻ, അജിൻരാജ്, അനന്തു എന്നിവർ അടങ്ങുന്ന സംഘം ആണ് പ്രതിയെ പിടികൂടിയത്.
Recent Comments