by Midhun HP News | Mar 7, 2026 | Latest News, ജില്ലാ വാർത്ത
തിരുവനന്തപുരം: ഒരാഴ്ചയ്ക്കകം 65,000 മുന്ഗണനാ റേഷന് കാര്ഡുകള് കൂടി സംസ്ഥാനത്ത് വിതരണം ചെയ്യും. ജനുവരിയില് 35,000ലേറെ കാര്ഡുകള് നല്കിയിരുന്നു. തുടര്ന്ന് ഫെബ്രുവരി 24 വരെ സമര്പ്പിച്ച ഓണ്ലൈന് അപേക്ഷകളിലാണ് ഭക്ഷ്യവകുപ്പ് വേഗത്തില് പരിശോധന പൂര്ത്തിയാക്കി കൂടുതല് കാര്ഡുകള് എത്തിക്കുന്നത്.
സ്വമേധയാ സറണ്ടര് ചെയ്യാന് അവസരം നല്കിയതിലൂടെയും ‘ഓപ്പറേഷന് യെല്ലോ’ എന്ന തീവ്രപരിശോധനയിലൂടെയും അനര്ഹര് കൈവശംവച്ച കാര്ഡുകള് മടക്കിവാങ്ങി അര്ഹര്ക്ക് വിതരണം ചെയ്യുന്നതിന്റെ ഭാഗമായാണ് നടപടി. 65,000 മുന്ഗണനാ റേഷന് കാര്ഡുകള് കൂടി വിതരണം ചെയ്യുന്നതോടെ രണ്ടാം എല്ഡിഎഫ് സര്ക്കാരിന്റെ കാലത്ത് തരംമാറ്റി വിതരണം ചെയ്ത മുന്ഗണനാ റേഷന് കാര്ഡുകളുടെ എണ്ണം ഏഴ് ലക്ഷമാകും.
കഴിഞ്ഞ മേയില് മസ്റ്ററിങ് പൂര്ത്തിയായപ്പോള് ഒരുലക്ഷത്തിലേറെ കാര്ഡുകള് മുന്ഗണനാ വിഭാഗത്തില് ഒഴിവ് വന്നിരുന്നു. അത്രയുംപേര്ക്ക് കാര്ഡുകള് തരംമാറ്റിനല്കാന് തീരുമാനിക്കുകയായിരുന്നു. ഇതുവരെ വിതരണം ചെയ്തതില് 6.35 ലക്ഷം കാര്ഡുകളില് 60,000 കാര്ഡുകള് എഎഐ കാര്ഡുകളാണ്(മഞ്ഞകാര്ഡുകള്). ബാക്കി പിഎച്ച്എച്ച് കാര്ഡുകളാണ് (പിങ്ക് കാര്ഡ്). 2013 ലെ എന്എഫ്എസ്എ നിയമംകാരണം സംസ്ഥാനത്തെ 57 ശതമാനംപേരും റേഷന് കവറേജിന് പുറത്താണ്. മഞ്ഞ, പിങ്ക് കാര്ഡുകളില് ഉള്പ്പെട്ട ഗുണഭോക്താക്കളുടെ പരമാവധി സംഖ്യ 1,54,80,040 ആയി കേന്ദ്രസര്ക്കാര് നിശ്ചയിച്ചിട്ടുണ്ട്.
മുന്ഗണനേതര വിഭാഗത്തെ നീല, വെള്ള കാര്ഡുകാരായി തിരിച്ച് ടൈഡ് ഓവര് വിഹിതത്തില് നിന്ന് ഭക്ഷ്യധാന്യം നല്കിവരികയാണ്.പ്രത്യേക താമസസ്ഥലം ഇല്ലാത്തവരും അലഞ്ഞ് തിരിയുന്നവരുമായ എല്ലാവരെയും അതിദാരിദ്ര്യ നിര്മാര്ജനത്തിന്റെ ഭാഗമായി തദ്ദേശവകുപ്പിന്റെ സര്വേയിലൂടെ കണ്ടെത്തി കാര്ഡുകള് നല്കിയിരുന്നു. മഞ്ഞ കാര്ഡിന് മാസത്തില് 30 കിലോ അരിയും പിങ്ക് കാര്ഡില് കുടുംബത്തിലെ ഓരോ അംഗത്തിനും നാലുകിലോ അരി വീതവും സൗജന്യമാണ്. അഞ്ചുകിലോ ഗോതമ്പും ലഭിക്കും.
by Midhun HP News | Mar 7, 2026 | Latest News, ദേശീയ വാർത്ത
ഡല്ഹി: പശ്ചിമേഷ്യയില് സംഘര്ഷം തുടരുന്നതിനിടെ ഗള്ഫ് മേഖലയെ ബന്ധിപ്പിച്ച് ഇന്ത്യയില് നിന്നും ഇന്ന് 58 വിമാന സര്വീസുകള്. സൗദി, ഒമാന് വ്യോമപാത തുറന്നതിന് പിന്നാലെയാണ് സര്വീസുകള്. ജിദ്ദയിലേക്കും മസ്കത്തിലേക്കും എയര് ഇന്ത്യ കഴിഞ്ഞ ദിവസം ഷെഡ്യൂള്ഡ് സര്വീസുകള് പുനരാരംഭിച്ചിരുന്നു. ഇന്ന് 24 ഷെഡ്യൂള്ഡ് സര്വീസുകളാണ് നിശ്ചയിച്ചിരിക്കുന്നത്. ഗള്ഫില് കുടുങ്ങിക്കിടക്കുന്നവരെ നാട്ടിലെത്തിക്കാനായി ഇന്ന് 34 നോണ്ഷെഡ്യൂള്ഡ് സര്വീസുകളും ഇന്ന് നടക്കും.
ഇന്ഡിഗോ, സ്പൈസ് ജെറ്റ് തുടങ്ങിയ കമ്പനികള് യുഎഇയില് നിന്ന് പ്രത്യേക സര്വീസുകള് നടത്തുക. അബുദാബി, മസ്കറ്റ് എന്നിവിടങ്ങളിലേക്ക് ഭാഗികമായി സര്വീസുകള് പുനരാരംഭിക്കാനും ശ്രമം നടത്തുന്നുണ്ട്. കേരളത്തിലെ കൊച്ചി, കോഴിക്കോട്, തിരുവനന്തപുരം വിമാനത്താവളങ്ങളില് നിന്നും മസ്കത്തിലേക്കും തിരിച്ചുമുള്ള ഷെഡ്യൂള്ഡ് സര്വീസ് ഇന്നുണ്ടായിരിക്കും. നോണ് ഷെഡ്യൂള്ഡ് വിഭാഗത്തില് കൊച്ചി-റാസല്ഖൈമ-കൊച്ചി സര്വീസും ഇന്നുണ്ടാകും.അതിനിടെ, തിരുവനന്തപുരം വിമാനത്താവളത്തില് നിന്ന് പുറപ്പെടുന്ന 12 വിമാനങ്ങളും തിരുവനന്തപുരത്തേയ്ക്കുള്ള 9 വിമാനങ്ങളും റദ്ദാക്കി. ശനിയാഴ്ച വിമാനത്താവളത്തില് തിരുവനന്തപുരത്ത് എത്തേണ്ട 9 സര്വീസുകളും വിവിധ ഗള്ഫ് രാജ്യങ്ങളിലേക്ക് പുറപ്പെടേണ്ട 12 സര്വീസുകളുമാണ് റദ്ദാക്കിയത്. യാത്രക്കാര് വിമാനത്താവളത്തിലേക്ക് പുറപ്പെടുന്നതിന് മുന്പായി അതാത് വിമാനക്കമ്പനികളുമായി ബന്ധപ്പെട്ട് സര്വീസുകളുടെ കൃത്യമായ വിവരം ഉറപ്പുവരുത്തണമെന്ന് അധികൃതര് നിര്ദേശിച്ചു.
by Midhun HP News | Mar 7, 2026 | Latest News, ദേശീയ വാർത്ത
ഡല്ഹി: രാജ്യത്ത് പാചക വാതക സിലിണ്ടര് ബുക്കിങ്ങിന് നിയന്ത്രണം. പശ്ചിമേഷ്യന് സംഘര്ഷങ്ങളുടെ പശ്ചാത്തലത്തില് എല്പിജി ക്ഷാമം നേരിട്ടേയ്ക്കുമെന്ന റിപ്പോര്ട്ടുകളെ തുടര്ന്ന് ബുക്കിങ്ങില് ഉണ്ടായ ഉയര്ച്ചയാണ് നിയന്ത്രണം ഏര്പ്പെടുത്തിയതിന് പിന്നില്. എല്പിജി റീഫില്ലുകള്ക്ക് എണ്ണ വിതരണ കമ്പനികൾ 21 ദിവസത്തെ ലോക്ക്-ഇന് പിരീഡ് ഏര്പ്പെടുത്തി. നിയന്ത്രണം വെള്ളിയാഴ്ച മുതല് പ്രാബല്യത്തില് വന്നു.
ഒരു സിലിണ്ടര് ബുക്ക് ചെയ്ത് 21 ദിവസങ്ങള്ക്ക് ശേഷം മാത്രമേ ഇനിമുതല് അടുത്ത സിലിണ്ടര് ബുക്ക് ചെയ്യാന് സാധിക്കുകയുള്ളു. വാണിജ്യ സിലിണ്ടര് ബുക്കിങ്ങിലും നിയന്ത്രണങ്ങള് ഏര്പ്പെടുത്തിയിട്ടുണ്ട്. ഹോട്ടലുകള് കാന്റീനുകള് തുടങ്ങിയ സ്ഥാപനങ്ങളെ നിയന്ത്രണം പ്രതികൂലമായി ബാധിച്ചേയ്ക്കുമെന്ന ആശങ്കയും ഉയരുന്നുണ്ട്.
അതിനിടെ, എല്പിജി ഉത്പാദനം പരമാവധിയാക്കാന് കേന്ദ്രം എണ്ണക്കമ്പനികള്ക്ക് നിര്ദ്ദേശം നല്കിയിട്ടുണ്ട്. 1955 ലെ അവശ്യസാധന നിയമപ്രകാരമാണ് സര്ക്കാര് നിര്ദേശം.
എണ്ണക്കമ്പനികളുടെ പക്കലുള്ള അധിക എല്പിജി പൊതുമേഖലയ്ക്ക് മാത്രം നല്കണമെന്നുള്പ്പെടെയാണ് നിര്ദേശം. എല്പിജി, പ്രൊപ്പെയ്ന്, ബ്യൂട്ടെയ്ന് എന്നിവ പൊതുമേഖലയിലെ എണ്ണകമ്പനികള്ക്ക് നല്കണം. ഇവ മറ്റാവശ്യങ്ങള്ക്ക് ഉപയോഗിക്കരുത്. എല്ലാ എണ്ണ ശുദ്ധീകരണ കമ്പനികളും തങ്ങളുടെ കൈവശമുള്ള പ്രൊപ്പെയ്ന്, ബ്യൂട്ടെയ്ന് എന്നിവ എല്പിജി ഉല്പാദനത്തിനായി പരമാവധി ഉപയോഗിക്കുന്നുവെന്ന് ഉറപ്പാക്കണമെന്നുമാണ് സര്ക്കാര് നിര്ദേശം.
പശ്ചിമേഷ്യന് സംഘര്ഷങ്ങളുടെ പശ്ചാത്തലത്തില് ഗാര്ഹിക – വാണിജ്യ സിലിണ്ടറുകളുടെ വിലയും വര്ധിപ്പിച്ചിട്ടുണ്ട്. 14.2 കിലോഗ്രാം ഗാര്ഹിക എല്.പി.ജി സിലിണ്ടറുകളുടെ വില 60 രൂപ കൂട്ടി. വാണിജ്യ ആവശ്യത്തിനുള്ള എല്പിജി സിലിണ്ടറിന്റെ വില 115 രൂപയും വര്ധിപ്പിച്ചു.
by Midhun HP News | Mar 6, 2026 | Latest News, കേരളം
കൊച്ചി: കെഎസ്ആര്ടിസിയുടെ ബിസിനസ് ക്ലാസ് ബസ് ഈ മാസം പതിനഞ്ചിന് എത്തുമെന്ന് ഗതാഗത മന്ത്രി കെബി ഗണേഷ് കുമാര്. പാന്ട്രി, ടോയ്ലറ്റ് ഉള്പ്പടെയുള്ള എല്ലാ സൗകര്യങ്ങളും ബസില് ഉണ്ടാകും. കൊച്ചിയില് നിന്ന് ഒരു ബസ് രാവിലെ തിരുവനന്തപുരത്തേക്കും തിരുവനന്തപുരത്ത് നിന്ന് ഒരു ബസ് കൊച്ചിയിലേക്കുമാണ് സര്വീസ് നടത്തുകയെന്ന് ഗണേഷ് കുമാര് പറഞ്ഞു. എറണാകുളം കാരയ്ക്കാമുറിയില് നിര്മ്മിക്കുന്ന ബസ് സ്റ്റാന്റിന്റെ നിര്മ്മാണ ഉദ്ഘാടനവും നവീകരിച്ച എറണാകുളം കെഎസ്ആര്ടിസി ഡിപ്പോയുടെ ഉദ്ഘാടനവും നിര്വഹിക്കുകയായിരുന്നു അദ്ദേഹം.
റോഡ് പണി കഴിഞ്ഞാല് സര്വീസ് തൃശൂര് വരെ ദീര്ഘിപ്പിക്കും. മൂന്നര മണിക്കൂര് കൊണ്ട് തിരുവനന്തപുരത്ത് എത്തും. ആലപ്പുഴ, കൊല്ലം തിരുവനന്തപുരം എന്നിവിടങ്ങളിലും സ്റ്റോപ്പ് ഉണ്ടാകും. ബുക്കിങ് മുഴുവന് തിരുവനന്തപുരത്തേക്ക് ആണെങ്കില് എവിടെയും സ്റ്റോപ്പ് ഉണ്ടാവില്ലെന്നും മന്ത്രി പറഞ്ഞു. ബസില് ടിക്കറ്റ് പരിശോധിക്കുക ഹോസ്റ്റസ് ആയിരിക്കും. അവരാണ് ഭക്ഷണവും നല്കുക. അതിനുള്ള ഹോസ്റ്റസിനെ തെരഞ്ഞെടുത്തതായും മന്ത്രി പറഞ്ഞു.
‘ബസ് വന്നാല് ഞാന് ഒന്ന് ഓടിച്ചുനോക്കൂം. അതുകഴിഞ്ഞാല് ഉദ്ഘാടനവും കഴിഞ്ഞു. തെരഞ്ഞെടുപ്പ് കമ്മീഷന്റെ പ്രഖ്യാപനത്തിന് മുന്പേ വണ്ടി ഉദ്ഘാടനം ചെയ്തിരിക്കുന്നു. അല്ലെങ്കില് ഉദ്ഘാടനം ചെയ്യേണ്ടെന്ന് പലരും പറയും. ഹോസ്റ്റസ് മലയാളിയാകണമെന്നില്ല. മലയാളിക്ക് ഒരു കുഴപ്പമുണ്ട്. നാലുദിവസം ട്രെയിനിങ് അനുസരിച്ച് കാര്യങ്ങള് ചെയ്യും. അഞ്ചാം ദിവസം അത് വൃത്തികേടാക്കും. പഠിപ്പിച്ചുകൊടുക്കുന്ന കാര്യങ്ങള് കൃത്യമായി ചെയ്യണമെന്നും ബസ് ഹോസ്റ്റസ് എന്നൊരു സങ്കല്പം ഉണ്ടാക്കുകയാണ് ലക്ഷ്യം’- കെബി ഗണേഷ് കുമാര് പറഞ്ഞു.
വോള്വോയുടെ രണ്ട് ബസുകളാണ് ബിസിനസ് ക്ലാസ് ബസായി എത്തുന്നത്. ഇതുവരെ ആരും കണ്ടിട്ടില്ലാത്ത അത്രയും സംവിധാനങ്ങളോടെയുള്ള അതിഗംഭീര ബസ് ആയിരിക്കും കെഎസ്ആര്ടിസിയുടെ ബിസിനസ് ക്ലാസ്. 35 സീറ്റുകളായിരിക്കും ഉണ്ടാകുക. എമിറേറ്റ്സ് വിമാനങ്ങളിലെ ബിസിനസ് ക്ലാസ് സീറ്റുകള്ക്ക് സമാനമായ സൗകര്യങ്ങളോടെയാകും പുതിയ ബസുകള് നിരത്തിലിറങ്ങുക.
by Midhun HP News | Mar 6, 2026 | Latest News, കേരളം
മലപ്പുറം: മുത്തച്ഛൻ ഓടിച്ച വാഹനത്തിനടിയിൽപ്പെട്ട് മൂന്ന് വയസുകാരന് ദാരുണാന്ത്യം. ചേലക്കോട് സ്വദേശി അഫീഫ് -ലബീബ ദമ്പതികളുടെ മകൻ മുഹമ്മദ് ഹനാൻ ആണ് മരിച്ചത്. മലപ്പുറം അരീക്കോട് വെള്ളേരിയിലാണ് സംഭവം.
പിക്കപ്പ് വാൻ പിറകോട്ട് എടുക്കുന്നതിനിടെ അബദ്ധത്തിൽ കുഞ്ഞ് വാഹനത്തിനടിയിൽ പെടുകയായിരുന്നു. ഉടൻതന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
by Midhun HP News | Mar 6, 2026 | Latest News, കേരളം
കാസര്കോട്: മോഷണക്കുറ്റം ആരോപിച്ച് അപമാനിക്കാൻ ശ്രമിച്ചതിനെത്തുടർന്ന് യുവതി ആത്മഹത്യ ചെയ്ത സംഭവത്തിൽ അയൽവാസി അറസ്റ്റിൽ. വ്യാജ പരാതി നൽകിയ പൊവ്വൽ സ്വദേശി ആയിഷയെയാണ് വിദ്യാനഗർ പൊലീസ് അറസ്റ്റ് ചെയ്തത്. ആത്മഹത്യാ പ്രേരണാക്കുറ്റം ചുമത്തിയാണ് അറസ്റ്റ്.
മോഷണക്കുറ്റം ആരോപിച്ചതിനെത്തുടർന്നുള്ള മനോവിഷമത്തിൽ നാലത്തടുക്ക സ്വദേശിനി ജസീല (24) ഫെബ്രുവരി 20 നാണ് വിഷം കഴിച്ച് മരിക്കുന്നത്. ജസീല ഒമ്പതു പവനോളം സ്വർണം മോഷ്ടിച്ചു എന്നായിരുന്നു ഭർത്താവിന്റെ വീട്ടിനടുത്തുള്ള അയൽവീട്ടുകാർ ആരോപിച്ചിരുന്നത്. ഇതേത്തുടർന്ന് ജസീല കടുത്ത മാനസിക വിഷമത്തിലായിരുന്നു.
സമൂഹമാധ്യമത്തിലൂടെ വീഡിയോ പങ്കുവെച്ചതിനുശേഷമാണ് ജസീല വിഷം കഴിച്ച് ജീവനൊടുക്കിയത്. ആത്മഹത്യ ചെയ്യാനുള്ള കാരണം മരണമൊഴിയായി ജസീല പൊലീസിന് നൽകിയിരുന്നു. തുടർന്ന് പൊലീസ് നടത്തിയ അന്വേഷണത്തിൽ മോഷണപരാതി വ്യാജമാണെന്ന് കണ്ടെത്തിയിരുന്നു.
Recent Comments