by Midhun HP News | Oct 15, 2026 | Latest News, കേരളം
ഇടുക്കി: നാളെ ഇടുക്കി ജില്ലയിൽ ആഹ്വാനം ചെയ്തിട്ടുള്ള ഹർത്താലിൽ നിന്നും നെടുങ്കണ്ടത്ത് നടക്കുന്ന ഇടുക്കി ജില്ലാ സ്കൂൾ കായിക മേളയെ പൂർണ്ണമായും ഒഴിവാക്കിയതായി സിപിഎം ജില്ലാ സെക്രട്ടറി സി.വി. വർഗീസ് അറിയിച്ചു.
ഇ.എസ് എ ഉൾപ്പെടെ രൂക്ഷമായ ഭൂപ്രശ്നങ്ങൾക്ക് പരിഹാരം കാണാൻ സർക്കാർ തയ്യാറാവുന്നില്ലന്നാരോപിച്ചാണ് സി പി എം ഹർത്താൽ നടത്തുന്നത്. കഡസ്ട്രൽ മാപ്പിലെ അപാകതകൾ പരിഹരിച്ച് ജനങ്ങൾക്ക് എളുപ്പം മനസ്സിലാക്കാൻ കഴിയുന്ന തരത്തിൽ പ്രസിദ്ധീകരിക്കുക, ഇടുക്കിയിലെ ഏലമലക്കാടുകൾ വനഭൂമിയാക്കാനുള്ള നീക്കം ഉപേക്ഷിക്കുക, വനം ഉൾപ്പെടുന്ന ഭാഗം മാത്രം ഇ എസ് എ പരുധിയിൽ ഉൾപ്പെടുത്താൻ വേണ്ടുന്ന വിധം സർക്കാർ റിപ്പോർട്ട് നൽകുക, ജില്ലാ കളക്ടർ പുറപ്പെടുവിക്കുന്ന കർഷകവിരുദ്ധ ഉത്തരവുകൾ പിൻവലിക്കുകതുടങ്ങിയ ആവശ്യങ്ങൾ ഉന്നയിച്ചാണ് ഹർത്താൽ നടത്തുന്നത്. രാവിലെ ആറു മുതൽ വൈകിട്ട് 6 വരെയാണ് ഹർത്താൽ.
കായിക മേളയിൽ പങ്കെടുക്കുന്നതിനായി നെടുങ്കണ്ടത്തേക്ക് കായിക താരങ്ങളും ഒഫീഷ്യലുകളും സഞ്ചരിക്കുന്ന വാഹനങ്ങൾ തടയില്ലെന്നും സുഗമമായ യാത്ര ഉറപ്പാക്കുമെന്നും അദ്ദേഹം വ്യക്തമാക്കി. കൂടാതെ കായികമേളയുമായി ബന്ധപ്പെട്ട് പ്രവർത്തിക്കുന്ന അനുബന്ധ സ്ഥാപനങ്ങൾ തുറന്നുപ്രവർത്തിക്കുന്നതിനും മേള സുഗമമായി നടത്തുന്നതിനും ആവശ്യമായ എല്ലാവിധ സാഹചര്യങ്ങളും ഒരുക്കുമെന്നും ജില്ലാ സെക്രട്ടറി അറിയിച്ചു.
by Midhun HP News | Oct 15, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തിനു വലിയ ബാധ്യത വരുത്തിവച്ച സ്വതന്ത്ര സാമ്രാജ്യമായാണ് കിഫ്ബി പ്രവര്‍ത്തിച്ചതെന്ന് മുഖ്യമന്ത്രി വിഡി സതീശന്‍. സര്‍ക്കാരിന്റെയും ധനവകുപ്പിന്റെയും നിയന്ത്രണങ്ങള്‍ മറികടന്നും ധനവകുപ്പിനെ നോക്കുകുത്തിയാക്കിയുമാണ് കിഫ്ബി പ്രവര്‍ത്തിച്ചതെന്നും മുഖ്യമന്ത്രി പറഞ്ഞു. വാർത്താസമ്മേളനത്തിൽ കിഫ്ബി സംബന്ധിച്ച വിദഗ്ധ സമിതി റിപ്പോര്‍ട്ടിനെക്കുറിച്ച് സംസാരിക്കുകയായിരുന്നു മുഖ്യമന്ത്രി. മുഖ്യമന്ത്രിയുടെ ദുരിതാശ്വാസനിധിയില്‍ നിന്നു സഹായം ലഭിക്കാനുള്ള വാര്‍ഷിക വരുമാന പരിധി മൂന്ന് ലക്ഷമാക്കി ഉയര്‍ത്തിയെന്നും അദ്ദേഹം മാധ്യമങ്ങളോടു വ്യക്തമാക്കി.
കണ്‍സള്‍ട്ടന്‍സികള്‍ക്കു പണം നല്‍കിയതിലും ഭൂമി ഏറ്റെടുക്കലിലും വ്യക്തമായ ക്രമക്കേട് കണ്ടെത്തി. സംസ്ഥാനത്തിന്റെ കടമെടുക്കാനുള്ള പരിധിയില്‍ നിന്നു വലിയ തോതില്‍ കേന്ദ്രം വെട്ടിക്കുറച്ചത് തിരിച്ചടിയായെന്നും മുഖ്യമന്ത്രി പറഞ്ഞു.
ധനവകുപ്പിനെ കിഫ്ബി നോക്കുകുത്തിയാക്കി. ഗ്യാരന്റി നല്‍കേണ്ടതില്ലെന്ന ധനവകുപ്പിന്റെ തീരുമാനം മുഖ്യമന്ത്രി അധ്യക്ഷനായ യോഗം അട്ടിമറിച്ചു. ഇത് റൂള്‍സ് ഓഫ് ബിസിനസിന്റെ ലംഘനമാണ്. ധനവകുപ്പിന്റെ തീരുമാനം മറികടക്കാനുള്ള അധികാരം മന്ത്രിസഭയ്ക്കു മാത്രമാണുള്ളത്. കൂടുതല്‍ പലിശയ്ക്കു കടമെടുത്തതിനാല്‍ 396 കോടി അധിക ബാധ്യതയുണ്ടായി. മസാല ബോണ്ട് വഴി 181 കോടി നഷ്ടമുണ്ടായി. പദ്ധതി നടത്തിപ്പില്‍ 13,103 കോടി രൂപയുടെ അധിക ചെലവുണ്ടായെന്നും മുഖ്യമന്ത്രി കുറ്റപ്പെടുത്തി.
കണ്ണൂരില്‍ 1000 ഏക്കര്‍ ഭൂമി ഏറ്റെടുത്തതില്‍ 50 ഏക്കര്‍ മാത്രമാണ് ഉപയോഗിച്ചത്. ബാക്കി വെറുതേ ഇട്ടിരിക്കുകയാണ്. അഞ്ചിരട്ടി തുകയ്ക്കാണ് ഭൂമി ഏറ്റെടുത്തിരിക്കുന്നത്. വീണ്ടും 4000 ഏക്കര്‍ ഏറ്റെടുക്കാന്‍ വിജ്ഞാപനം പുറപ്പടുവിച്ചു. എന്തിനാണ് ഇത്രയും ഭൂമി വലിയ വില നില്‍കി കണ്ണൂരില്‍ ഏറ്റെടുത്തതെന്ന് ആര്‍ക്കും അറിയില്ല. കിഫ്ബി പരസ്യത്തിനു കണക്കില്‍ കാണിച്ചത് 21.16 കോടിയും യഥാര്‍ഥത്തില്‍ 203 കോടിയിലേറെ ചെലവഴിച്ചു. വലിയ പലിശയ്ക്കു കടമെടുത്ത തുകയാണ് ഇതിനായി ചെലവഴിച്ചതെന്നും ഇതില്‍ വന്‍ ക്രമക്കേടുണ്ട്.
കിഫ്ബി വഴി തുടങ്ങിവച്ച പദ്ധതികള്‍ പൂര്‍ത്തിയാക്കും. ഈ സംവിധാനം ഒരു സുപ്രഭാതത്തില്‍ അവസാനിപ്പിക്കാന്‍ കഴിയില്ല. എല്ലാത്തിനും സര്‍ക്കാരാണ് ഗ്യാരന്റി നല്‍കിയിരിക്കുന്നത്. കിഫ്ബി ആരംഭിച്ച കാലം തൊട്ടു പ്രതിപക്ഷം പറഞ്ഞ കാര്യങ്ങള്‍ ശരിവയ്ക്കുന്ന നിരീക്ഷണങ്ങളാണ് വിദഗ്ധ സമിതി നടത്തിയിരിക്കുന്നത്. മൂന്ന് മാസം കൊണ്ട് വിപുലമായ പരിശോധന നടത്തി രേഖകള്‍ വിലയിരുത്തിയാണ് റിപ്പോര്‍ട്ട് തയാറാക്കിയിരിക്കുന്നത്. ക്രമക്കേടുകള്‍ സംബന്ധിച്ച് ഏതു തരത്തില്‍ അന്വേഷണം നടത്തണമെന്ന് സര്‍ക്കാര്‍ ആലോചിക്കും. കിഫ്ബി സംബന്ധിച്ച സിഎജി റിപ്പോര്‍ട്ട് കഴിഞ്ഞ സര്‍ക്കാര്‍ സഭയില്‍ തള്ളിയതു വിചിത്ര നടപടിയാണെന്നും മുഖ്യമന്ത്രി വ്യക്തമാക്കി.
by Midhun HP News | Oct 15, 2026 | Latest News, ജില്ലാ വാർത്ത
ആറ്റിങ്ങൽ: 12 വയസ്സുകാരിയെ പീഡിപ്പിക്കാൻ ശ്രമിച്ച കേസിൽ പ്രതിയായ ബംഗാൾ സ്വദേശിക്ക് 7 വർഷം തടവും 1ലക്ഷം രൂപ പിഴയും വിധിച്ച് ആറ്റിങ്ങൽ അതിവേഗ കോടതി. പിഴയൊടുക്കിയില്ലെങ്കിൽ 4 മാസം അധിക തടവ് അനുഭവിക്കണമെന്നും കോടതി വിധിച്ചു.
വെസ്റ്റ് ബംഗാൾ സംസ്ഥാനത്ത് ജൽപയ്ഗുരി,ജബൽ പുരി ടക്കിമാരി നമ്പർ1ൽ താമസം പ്രിയ ലാൽ ദാസ് മകൻ ഹരിപദ ദാസ് (36)നെയാണ് കോടതി കുറ്റക്കാരനെന്ന് കണ്ടെത്തി ശിക്ഷിച്ചത്. ആറ്റിങ്ങൽ അതിവേഗ കോടതി ജഡ്ജി സി. ആർ. ബിജുകുമാറാണ് ശിക്ഷ വിധിച്ചത്. അതിജീവിത താമസിക്കുന്ന വീട്ടിൽ കയറി പ്രതി ബലമായി കുട്ടിയെ പീഡിപ്പിക്കാൻ ശ്രമിക്കുകയായിരുന്നു.
പോത്തൻകോട് പോലീസ് 2024 മെയ്‌ മാസം 24 -ന് രജിസ്റ്റർ ചെയ്ത കേസിലാണ് ഇപ്പോൾ വിധി വന്നിട്ടുള്ളത്. കേസിൽ പ്രോസിക്യൂഷൻ 16 സാക്ഷികളെ വിസ്തരിക്കുകയും 19
രേഖകൾ തെളിവായി ഹാജരാക്കുകയും ചെയ്തു.
പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ യു. സലിംഷയും അഭിഭാഷക നീലിമ ആർ. കൃഷ്ണനും ഹാജരായി. പോത്തൻകോട് ISHO രാജേന്ദ്രൻ നായർ, പ്രശാന്ത് സി. പി എന്നിവരാണ് കേസിൽ അന്വേഷണം നടത്തി കുറ്റപത്രം സമർപ്പിച്ചത്.
by Midhun HP News | Oct 15, 2026 | Latest News, കേരളം
ന്യൂഡല്‍ഹി: ഭക്ഷോല്‍പ്പന്ന മേഖലയില്‍ കളംപിടിച്ച റിലയന്‍സ് ഇന്‍ഡസ്ട്രീസ് പാല്‍ വിപണി പിടിക്കാനുള്ള നീക്കവുമായി രംഗത്ത്. റിലയന്‍സ് ഇന്‍ഡസ്ട്രീസിന്റെ എഫ്എംസിജി വിഭാഗമായ റിലയന്‍സ് കണ്‍സ്യൂമര്‍ പ്രോഡക്ട്‌സ് ലിമിറ്റിഡ് ജോയ് ലാന്‍ഡ് എന്ന പേരില്‍ ഫ്ളേവേഡ് മില്‍ക്ക് അവതരിപ്പിച്ചു. റെഡി ടു ഡ്രിങ്ക് ഡയറി വിപണിയിലേക്ക് പ്രവേശനം പ്രഖ്യാപിച്ച് തമിഴ്‌നാട്ടിലാണ് പുതിയ ഉല്‍പ്പന്നം വിപണിയില്‍ എത്തിച്ചത്.
20 രൂപ വിലയുള്ള ജോയ് ലാന്‍ഡ് തുടക്കത്തില്‍ തമിഴ്‌നാട്ടില്‍ സ്‌ട്രോബെറി, വാനില രുചികളിലാണ് വിപണിയിലെത്തുന്നത്. ലോകോത്തര നിലവാരമുള്ള ഉല്‍പ്പന്നങ്ങള്‍ സാധാരണക്കാരുടെ ബജറ്റില്‍ ലഭ്യമാക്കാനാണ് കമ്പനി ലക്ഷ്യമിടുന്നത്. തമിഴ്‌നാട്ടിലെ ലോഞ്ചിന് ശേഷം ഘട്ടംഘട്ടമായി കേരളം ഉള്‍പ്പെടെ ഇന്ത്യയിലുടനീളം ഉല്‍പ്പന്നം വിപണിയില്‍ ലഭ്യമാക്കുകയാണ് കമ്പനിയുടെ പദ്ധതി. വരുംദിവസങ്ങളില്‍ കൂടുതല്‍ രുചികളോടെ പുതിയ ഡയറി ഉല്‍പ്പന്നങ്ങള്‍ വിപണിയില്‍ അവതരിപ്പിക്കാനും കമ്പനി ലക്ഷ്യമിടുന്നുണ്ട്. കുറഞ്ഞ വിലയില്‍ കാംബ കോള വിപണിയിലിറക്കി പെപ്‌സി, കൊക്കകോള പോലുള്ള വമ്പന്മാരെ നേരിട്ട ശൈലി തന്നെയാണ് ഡയറി മേഖലയിലും കമ്പനി സ്വീകരിക്കുക.
അമൂല്‍, മില്‍മ, മദര്‍ ഡെയറി, നന്ദിനി തുടങ്ങിയ പ്രമുഖ ബ്രാന്‍ഡുകള്‍ക്ക് ഇതിനകം സാന്നിധ്യമുള്ള വിഭാഗത്തിലേക്കാണ് റിലയന്‍സിന്റെ പ്രവേശനം. കുറഞ്ഞ വിലയും റിലയന്‍സിന്റെ വിപുലമായ വിതരണ ശൃംഖലയും ജോയ്‌ലാന്‍ഡിന് മത്സരത്തില്‍ നേട്ടമാകുമെന്നാണ് വിലയിരുത്തല്‍. റെഡി-ടു-ഡ്രിങ്ക് ഡയറി വിപണിയിലേക്ക് റിലയന്‍സ് വരുന്നത് കേരളത്തിലെ ഡയറി വിപണിയിലും പുതിയ മത്സരത്തിന് കാരണമായേക്കാം. കേരളത്തില്‍ ഫ്ളേവേഡ് മില്‍ക്ക് വിപണിയില്‍ ദേശീയ, പ്രാദേശിക ബ്രാന്‍ഡുകള്‍ തമ്മിലുള്ള മത്സരം ഇതിനകം ശക്തമാണ്. കുറഞ്ഞ വിലയും വിപുലമായ വിതരണശൃംഖലയുമുള്ള റിലയന്‍സ് കേരളത്തിലെത്തിയാല്‍ ഈ വിഭാഗത്തിലെ മത്സരം കൂടുതല്‍ കടുക്കാനാണ് സാധ്യത. റിലയന്‍സിന്റെ ഓണ്‍ലൈന്‍-ഓഫ്ലൈന്‍ സാന്നിധ്യം മില്‍മ ഉള്‍പ്പെടെയുള്ള കേരള കമ്പനികള്‍ക്ക് വെല്ലുവിളിയാകും.
ജോയ്‌ലാന്‍ഡിന്റെ വരവ് മില്‍മയുടെ പ്രധാന വരുമാന മാര്‍ഗമായ പാല്‍ ബിസിനസിന് ഉടന്‍ വലിയ ഭീഷണിയായേക്കില്ല. എന്നാല്‍ റെഡി-ടു-ഡ്രിങ്ക് പാനീയങ്ങള്‍, ഫ്ളേവേഡ് മില്‍ക്ക് തുടങ്ങിയ മൂല്യവര്‍ധിത ഉല്‍പ്പന്നങ്ങളുടെ വിപണിയിലേക്കുള്ള റിലയന്‍സിന്റെ കടന്നുവരവ് മേഖലയില്‍ വലിയ മത്സരത്തിന് കളമൊരുക്കും.
by Midhun HP News | Oct 15, 2026 | Latest News, സിനിമ
നടൻ രജനികാന്തിന്റെ കടുത്ത ആരാധകരിലൊരാളാണ് ധനുഷ്. പലപ്പോഴും രജനികാന്തിനോടുള്ള തന്റെ ആരാധനയെക്കുറിച്ച് ധനുഷ് തുറന്നു പറഞ്ഞിട്ടുമുണ്ട്. തന്റെ തങ്കപ്പയ്യൻ ആണ് ധനുഷെന്ന് രജനികാന്തും പൊതുവേദിയിൽ പറഞ്ഞിട്ടുണ്ട്. രജനികാന്തിന്റെ ‘ജയിലർ 2’ വിന്റെ എഫ്ഡിഎഫ്എസ് കാണാനെത്തിയ ധനുഷിന്റെ വിഡിയോയാണ് വൈറലാകുന്നത്.
ചെന്നൈയിലെ രോഹിണി തിയറ്ററിലാണ് ധനുഷ് എത്തിയത്. എന്നാൽ മാധ്യമങ്ങളോട് പ്രതികരിക്കാൻ നടൻ തയ്യാറായില്ല. രജനികാന്തിന്റെ മകളും ധനുഷിന്റെ മുൻഭാര്യയുമായ ഐശ്വര്യയും ജയിലർ 2 കാണാനെത്തിയിരുന്നു. ഇവരുടെ മക്കളായ യാത്രയും ലിംഗയും ഐശ്വര്യയ്ക്ക് ഒപ്പമുണ്ടായിരുന്നു. അതേസമയം ഇരുവരും വീണ്ടും ഒന്നിക്കട്ടെ എന്ന് ആശംസിക്കുകയാണ് ആരാധകർ. ‘തീർച്ചയായും കണ്ടിരിക്കേണ്ട സിനിമയാണ് ജയിലർ 2. ബ്ലോക്ബസ്റ്റർ. ഓരോ ‘തലൈവർ’ ആരാധകനും ഇതൊരു വിരുന്നാണ്’.- എന്നാണ് ചിത്രം കണ്ടതിന് പിന്നാലെ ധനുഷ് എക്സിൽ കുറിച്ചത്.
2022 ലാണ് ധനുഷും ഐശ്വര്യയും വിവാഹമോചിതരാകുന്നുവെന്ന് പ്രഖ്യാപിച്ചത്. 18 വർഷത്തെ ദാമ്പത്യ ജീവിതത്തിന് ശേഷമാണ് ഇരുവരും വേർപിരി‍ഞ്ഞത്. 6 മാസം നീണ്ട പ്രണയത്തിനൊടുവിൽ 2004 നവംബർ 18 നായിരുന്നു ധനുഷ് – ഐശ്വര്യ വിവാഹം.
വിവാഹിതനാകുമ്പോൾ ധനുഷിന് 21 വയസ്സും ഐശ്വര്യയ്ക്ക് 23 വയസ്സുമായിരുന്നു പ്രായം. വേർപിരിഞ്ഞതിന് ശേഷവും മക്കളുടെ കാര്യങ്ങൾക്ക് ഇരുവരും ഒന്നിച്ചെത്താറുണ്ട്. അതേസമയം ആദ്യ ഷോയ്ക്ക് പിന്നാലെ മികച്ച അഭിപ്രായമാണ് ജയിലർ 2 വിന് ലഭിച്ചു കൊണ്ടിരിക്കുന്നത്. ടൈഗർ മുത്തുവേൽ പാണ്ഡ്യനായി രജനി തകർത്തു എന്നാണ് സിനിമ കണ്ട ഭൂരിഭാഗം പേരും പറയുന്നത്.
by Midhun HP News | Oct 15, 2026 | Latest News, ദേശീയ വാർത്ത
ഡല്‍ഹി: ഫോണില്‍ അജ്ഞാത നമ്പറില്‍ നിന്നുള്ള കോള്‍ കണ്ട് ഇത് ആരുടേതാണ് എന്ന കണ്‍ഫ്യൂഷന്‍ ഇനി വേണ്ട. സുരക്ഷ കണക്കിലെടുത്ത് ഉപയോക്താക്കള്‍ക്ക് കോളര്‍ ഐഡി കേന്ദ്രസര്‍ക്കാര്‍ നിര്‍ബന്ധമാക്കി. നവംബര്‍ ഒന്നുമുതല്‍ കോള്‍ വിളിക്കുന്ന ആളിന്റെ പേര് പ്രദര്‍ശിപ്പിക്കുന്ന കോളിങ് നെയിം പ്രസന്റേഷന്‍ നടപ്പിലാക്കാന്‍ ടെലികോം സേവന ദാതാക്കളോട് ടെലികോം വകുപ്പ് നിര്‍ദേശം നല്‍കി.
ഫോര്‍ജിയും അതിന് മുകളിലുള്ള മൊബൈല്‍ നെറ്റ് വര്‍ക്കുകളിലും ( ഉദാഹരണത്തിന് ഫൈവ്ജി) എല്ലാ ഉപയോക്താക്കളുടെയും ഫോണില്‍ കോളിങ് നെയിം പ്രസന്റേഷന്‍ സ്ഥിരമായി പ്രവര്‍ത്തനക്ഷമമായിരിക്കണമെന്ന് ഡിപ്പാര്‍ട്ട്‌മെന്റ് ഓഫ് ടെലികോമ്മിന്റെ ഉത്തരവില്‍ പറയുന്നു. ഒരു കോള്‍ വരുമ്പോള്‍ ഫോണില്‍ വിളിക്കുന്നയാളുടെ പേരും നമ്പറും തെളിയുന്ന തരത്തിലാണ് പുതിയ സംവിധാനം. 2ജി, 3ജി നെറ്റ് വര്‍ക്കുകളിലും പബ്ലിക് സ്വിച്ച്ഡ് ടെലിഫോണ്‍ നെറ്റ് വര്‍ക്കുകളിലും ഇത് നടപ്പിലാക്കുന്നത് പിന്നീട് പരിഗണിക്കുമെന്നും ഉത്തരവില്‍ ചൂണ്ടിക്കാണിക്കുന്നു.
കോളര്‍ ഐഡി എങ്ങനെയാണ് പ്രവര്‍ത്തിക്കുക?
കോള്‍ വരുമ്പോള്‍ സ്‌ക്രീനിലെ ആദ്യ ഭാഗത്ത് വിളിക്കുന്നയാളുടെ നമ്പര്‍ കാണിക്കും. രണ്ടാമത്തെ ഭാഗത്ത് ഉപയോക്താവിന്റെ കോണ്‍ടാക്ടുകളില്‍ സേവ് ചെയ്തിട്ടുള്ള പേര് കാണിക്കും. നമ്പര്‍ സേവ് ചെയ്തിട്ടില്ലെങ്കില്‍ ആഭ്യന്തര കോളുകള്‍ക്കായി ഒറിജിനേറ്റിങ് ടെലികോം ഓപ്പറേറ്ററുടെ സബ്‌സ്‌ക്രൈബര്‍ ഡാറ്റാബേസില്‍ രേഖപ്പെടുത്തിയിരിക്കുന്ന വിളിക്കുന്നയാളുടെ പേര് പ്രദര്‍ശിപ്പിക്കും. അന്തരാഷ്ട്ര കോളുകള്‍ക്ക്, സ്‌ക്രീനില്‍ ഇന്റര്‍നാഷണല്‍ കോള്‍ എന്ന് പ്രദര്‍ശിപ്പിക്കും.
ഓരോ ടെലികോം സേവന ദാതാവും വരിക്കാരുടെ പേരുകള്‍ അവരുടെ നമ്പറുകളുമായി മാപ്പ് ചെയ്യുന്ന ഡാറ്റാ ബേസ് സ്ഥാപിക്കുകയും പരിപാലിക്കുകയും വേണമെന്നാണ് വ്യവസ്ഥ. കോള്‍ സ്വീകരിക്കുന്ന ഓപ്പറേറ്റര്‍ ഈ ഡാറ്റാ ബേസില്‍ നിന്ന് പേര് വീണ്ടെടുത്ത് വിളിക്കപ്പെട്ട ഉപയോക്താവിന് മുന്നില്‍ പ്രദര്‍ശിപ്പിക്കുന്ന തരത്തിലാണ് ക്രമീകരണം.
Recent Comments