‘തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് എനിക്ക്? സർവ്വമംഗളാനീ ഭവന്തു’: മറുപടിയുമായി കെപി ശശികല

by Midhun HP News | Oct 13, 2026 | Latest News, കേരളം

കൊച്ചി: നെടുമ്പാശ്ശേരിയിൽ അമിതവേഗത്തിലെത്തിയ മിനി കൂപ്പർ കാറിടിച്ച് മരിച്ച ഗോപികയ്ക്കെതിരെ സമൂഹ മാധ്യമങ്ങളിൽ നടക്കുന്ന അപവാദ പ്രചാരണങ്ങളെച്ചൊല്ലി ഹിന്ദു ഐക്യവേദി നേതാവ് കെ.പി. ശശികലയും പെൺകുട്ടിയുടെ കുടുംബവും തമ്മിൽ രൂക്ഷമായ വാക്പോര്. അപകടത്തിൽ മരിച്ച പെൺകുട്ടിയെ അധിക്ഷേപിക്കുന്ന തരത്തിലുള്ള പ്രചാരണങ്ങൾക്കെതിരെ വാർത്താസമ്മേളനം നടത്തിയ കുടുംബത്തിനെതിരെ ‘തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് എനിക്ക്??? സർവ്വമംഗളാനീ ഭവന്തു’ എന്ന പ്രതികരണവുമായി ശശികല ടീച്ചർ രംഗത്തെത്തി. തനിക്കെതിരെ ആരോപണം ഉന്നയിച്ച കുടുംബത്തിന്റെ വാർത്താസമ്മേളനം കണ്ട ശേഷമാണ് ശശികല ടീച്ചർ ഫെയ്സ്ബുക്കിലൂടെ മറുപടി കുറിച്ചത്.

നെടുമ്പാശ്ശേരിയിൽ മിനി കൂപ്പർ കാറിടിച്ച് ഗോപിക മരിച്ചതിന് പിന്നാലെ സമൂഹ മാധ്യമങ്ങളിൽ വലിയ രീതിയിലുള്ള അപവാദ പ്രചരണങ്ങൾ നടന്നിരുന്നു. ഇതിനു പിന്നിൽ കാറോടിച്ച പ്രതിയുടെ കുടുംബമാണെന്ന് ചൂണ്ടിക്കാട്ടി ഗോപികയുടെ പിതാവും കുടുംബവും വാർത്താസമ്മേളനം നടത്തിയിരുന്നു. മകൾക്കെതിരെ ഹിന്ദു ഐക്യവേദി നേതാവ് ശശികല ഉൾപ്പെടെയുള്ളവർ സമൂഹ മാധ്യമങ്ങളിലൂടെ വൃത്തികേട് പ്രചരിപ്പിക്കുന്നുവെന്ന് കുടുംബം വാർത്താസമ്മേളനത്തിൽ കുറ്റപ്പെടുത്തിയിരുന്നു.

വാർത്താസമ്മേളനത്തിൽ ‘വിഷകല’ എന്ന പ്രയോഗം നടത്തിയതിനെ പരിഹസിച്ച ശശികല ടീച്ചർ, പെൺമക്കളുടെ എല്ലാ രക്ഷിതാക്കളോടും താൻ മാപ്പ് ചോദിക്കുന്നുവെന്ന് വ്യക്തമാക്കി. നമ്മൾ പൊതുവായി ചില കാര്യങ്ങളിൽ ചർച്ച നടത്തണമെന്ന് പറഞ്ഞതിനാണ് മാപ്പ് പറയുന്നതെന്നും, അതുകൊണ്ട് കഴിയുമെങ്കിൽ മക്കളെ പാതിരാക്ക് ചായ കുടിക്കാൻ വിടണമെന്നും രാത്രി പകലാക്കാമെന്നും നൈറ്റ് വാക്കുകളും നൈറ്റ് ലൈഫുകളും സജീവമാകട്ടെയെന്നും അവർ ഫെയ്സ്ബുക്ക് കുറിപ്പിൽ പരിഹസിച്ചു. തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് തനിക്കെന്നും, ആ ചങ്ങായി പറഞ്ഞ ഹിന്ദു-മുസ്ലിം എവിടെ നിന്നാണ് കിട്ടിയതെന്നും അത് വെച്ചാലല്ലേ ഒരു ഗുമ്മുണ്ടാവൂ എന്നും ശശികല ടീച്ചർ ചോദിച്ചു.

തന്നെ ഫോണിൽ വിളിച്ച് മാനനഷ്ടക്കേസ് കൊടുക്കുമെന്ന് ശശികല ടീച്ചർ ഭീഷണിപ്പെടുത്തിയതായി ഗോപികയുടെ അച്ഛന്റെ സഹോദരൻ എംആർ അനിൽകുമാർ ഫെയ്സ്ബുക്കിലൂടെ വ്യക്തമാക്കിയിരുന്നു. ശശികല ടീച്ചറുടെ പേരിൽ സമൂഹ മാധ്യമങ്ങളിൽ വ്യാപകമായി പ്രചരിക്കുന്ന സ്ക്രീൻഷോട്ടുകളുടെ അടിസ്ഥാനത്തിലാണ് ആരോപണം ഉന്നയിച്ചതെന്നും, അത് വ്യാജമാണെങ്കിൽ അത്തരം പ്രചരണങ്ങൾ അവസാനിപ്പിക്കാനായി അവർ ആദ്യം ഡിജിപിക്ക് പരാതി നൽകി പ്രസ്താവന പരസ്യമായി നിഷേധിക്കുകയാണ് വേണ്ടതെന്നും അദ്ദേഹം പറഞ്ഞു.

സന്തപ്ത കുടുംബത്തിനെതിരെ മാനനഷ്ടക്കേസ് എന്ന ഉമ്മാക്കി കാണിച്ച് തറ രാഷ്ട്രീയ കുതന്ത്രം ഇറക്കി പേടിപ്പിക്കേണ്ടതില്ലെന്നും അത്തരം പേടിയുള്ള കുടുംബമല്ല തങ്ങളുടേതെന്നും അനിൽകുമാർ വ്യക്തമാക്കി. ചെയ്യാത്ത കാര്യത്തിന്റെ പേരിലാണ് കുറ്റപ്പെടുത്തിയതെങ്കിൽ അക്കാര്യം തീർച്ചയായും പിൻവലിക്കാൻ തയ്യാറാണെന്നും, എന്നാൽ മരിച്ച കുട്ടിയോടും കുടുംബത്തോടും മര്യാദ പാലിക്കാൻ ആദ്യം പഠിക്കണമെന്നും സ്വന്തം പേരിൽ പ്രചരിക്കുന്ന പോസ്റ്റുകൾ പിൻവലിക്കാൻ ഡിജിപിക്ക് പരാതി നൽകിയിട്ട് ഭീഷണിയുമായി വരുന്നതാണ് മനുഷ്യത്വമെന്നും അനിൽകുമാർ കുറിച്ചു.

കോഴിക്കോട് – പാലക്കാട് ദേശീയപാത 966-ല്‍ ഗതാഗത നിയന്ത്രണം

by Midhun HP News | Oct 13, 2026 | Latest News, കേരളം

പാലക്കാട്: കോഴിക്കോട് – പാലക്കാട് ദേശീയപാത 966-ല്‍ കല്‍മണ്ഡപം പാലത്തില്‍ അറ്റകുറ്റപ്പണികള്‍ നടക്കുന്നതിനാല്‍ ഒക്ടോബര്‍ 13 മുതല്‍ പ്രവൃത്തി പൂര്‍ത്തിയാകുന്നത് വരെ ഈ റോഡില്‍ ഭാഗികമായി ഗതാഗത നിയന്ത്രണം ഉണ്ടായിരിക്കുമെന്ന് അസിസ്റ്റന്റ് എന്‍ജിനീയര്‍ അറിയിച്ചു.

മകള്‍ക്ക് നീതി കിട്ടില്ലെന്ന് ഭയമെന്ന് പൊട്ടിക്കരഞ്ഞ് ഗോപികയുടെ അമ്മ

by Midhun HP News | Oct 13, 2026 | Latest News, കേരളം

പാലക്കാട്: നെടുമ്പാശ്ശേരി മൂന്നുപേരുടെ മരണത്തിനിടയാക്കി മിനി കൂപ്പര്‍ അപകട കേസ് അട്ടിമറിക്കാന്‍ നീക്കമെന്ന് മരിച്ച ഗോപികയുടെ മാതാപിതാക്കള്‍. ഇത്രയും ഗുരുതരമായ കുറ്റം ചെയ്ത പ്രതി സുഹൈല്‍ സജീവിനെ ജുവനൈല്‍ ഹോമിലേക്കാണ് അയച്ചത്. അതുകൊണ്ടുതന്നെ നീതി ലഭിക്കുമോയെന്ന് സംശയമുണ്ടെന്ന് ഗോപികയുടെ അച്ഛന്‍ പ്രദീപ് മാധ്യമങ്ങളോട് പറഞ്ഞു. മകള്‍ക്ക് നീതി നിഷേധിക്കപ്പെടുമെന്ന് ഭയമുണ്ടെന്ന് പൊട്ടിക്കരഞ്ഞുകൊണ്ട് ഗോപികയുടെ അമ്മയും പറഞ്ഞു.

പൊലീസിന്റെ ഭാഗത്തു നിന്നും വീഴ്ചയുണ്ട്. മുകളില്‍ നിന്നും അവര്‍ക്ക് സമ്മര്‍ദ്ദം നേരിടുന്നു എന്നു പറയപ്പെടുന്നുണ്ട്. അതൊക്കെ നീതി ലഭിക്കുന്നതിന് തടസ്സമാകുന്നുണ്ടെന്നാണ് കരുതുന്നത്. ആഭ്യന്തരമന്ത്രിയുടെ മണ്ഡലത്തില്‍പ്പെടുന്ന ആളുകളാണ് പ്രതിയും പ്രതിയുടെ കുടുംബവും എന്നാണ് താന്‍ മനസ്സിലാക്കുന്നത്. അത്തരത്തിലുള്ള എല്ലാ സ്വാധീനവും ഇവര്‍ ഉപയോഗിച്ചേക്കാം. അതുകൊണ്ടായിരിക്കാം അപകടശേഷവും എല്ലാം ബാപ്പ നോക്കിക്കോളുമെന്ന് സുഹൈല്‍ സജീവ് പറഞ്ഞതെന്നും ഗോപികയുടെ അച്ഛന്‍ പറയുന്നു.

സമൂഹമാധ്യമങ്ങളിലൂടെ ഗോപികയേയും ഞങ്ങളേയും താറടിച്ചുകൊണ്ടുള്ള പ്രചാരണം നടക്കുന്നുണ്ട്. കെഎംഎം കോളജില്‍ വൈസ് ചെയര്‍പേഴ്‌സണായിരുന്നു ഗോപിക. അഞ്ചുവര്‍ഷത്തോളം എന്‍എസ്എസ് വളണ്ടിയര്‍ ആയിരുന്നു. സാമൂഹികപ്രവര്‍ത്തനത്തില്‍ ഏര്‍പ്പെട്ടിരുന്നവരാണ്. ഞങ്ങളുടെ കുടംബത്തെപ്പറ്റി ഏതെങ്കിലും തരത്തിലുള്ള അപവാദം ഉണ്ടോയെന്ന് നാട്ടില്‍ വിളിച്ചു ചോദിച്ചു നോക്കൂ. ഞങ്ങളെ താറടിക്കാനാണ് സോഷ്യല്‍ മീഡിയയില്‍ ശ്രമമെന്നും ഗോപികയുടെ അച്ഛന്‍ പറഞ്ഞു.

സോഷ്യല്‍ മീഡിയയിലെ ഇത്തരം അപവാദപ്രചാരണങ്ങള്‍ക്ക് പിന്നില്‍ നേതാക്കളാണുള്ളത്. ഇതെല്ലാം നീതി ലഭിക്കുന്നതിന് തടസ്സമാണ്. നേതാക്കൾ മാന്യത കാണിക്കണമെന്നും ​ഗോപികയുടെ പിതാവ് ആവശ്യപ്പെട്ടു. കേസില്‍ സുഹൈല്‍ സജീവ് മദ്യപിച്ചതായി എഫ്‌ഐആറില്‍ രേഖപ്പെടുത്തിയിട്ടില്ല എന്നാണ് അറിയാന്‍ കഴിഞ്ഞത്.

അമിതമായി മദ്യപിച്ച് മൂന്നുപേരെ വാഹനം ഇടിപ്പിച്ച് കൊന്നുകളഞ്ഞ സംഭവത്തില്‍, മദ്യപിച്ചിരുന്നു എന്ന് ആദ്യ എഫ്‌ഐആറില്‍ കൊടുത്തിട്ടില്ല. എന്ത് അടിസ്ഥാനത്തിലാണ് പ്രതിയെ ജൂവനൈൽ ഹോമില്‍ പാര്‍പ്പിച്ചത്?. രാവിലെ ആറേമുക്കാലിന് നെടുമ്പാശേരി പൊലീസ് സ്റ്റേഷനില്‍ ചെല്ലുമ്പോള്‍ പ്രതി സുഹൈല്‍ സജീവ് ലോക്കപ്പില്‍ മലര്‍ന്ന് കിടക്കുകയായിരുന്നു. സിഐ വിളിച്ച് എഴുന്നേല്‍പ്പിക്കുമ്പോള്‍ പോലും നല്ല പൂസാണെന്ന് സിഐ പറയുന്നത് തന്റെ ബന്ധുക്കള്‍ കേട്ടതാണെന്നും ഗോപികയുടെ അച്ഛന്‍ വെളിപ്പെടുത്തി.

ഓട്ടോറിക്ഷ ഓടിച്ചാണ് താന്‍ കുടുംബം പോറ്റുന്നത്. അമ്മയാകട്ടെ ഒരു റബര്‍ കടയില്‍ ജോലിക്ക് പോകുന്നുണ്ട്. പ്രതിയുടെ കുടുംബം കോടീശ്വരന്മാരാണെന്നും, വലിയ സ്വാധീനമുള്ളവരായതിനാല്‍ നീതി ലഭിക്കുമോയെന്ന് സംശയമുണ്ടെന്നും ഗോപികയുടെ അച്ഛന്‍ പറഞ്ഞു.

പോസ്റ്റ്‌മോര്‍ട്ടത്തിന് ശേഷം വീണ്ടും തുന്നിക്കെട്ടല്‍ അഴിച്ച് രക്തസാംപിള്‍ ശേഖരിച്ചതില്‍ സംശയമുണ്ടെന്നും അച്ഛന്‍ ആരോപിച്ചു. ഞങ്ങളുടെ പൊന്നുമോളുടെ തല കാണാന്‍ പോലും ഉണ്ടായിരുന്നില്ലെന്ന് ഗോപികയുടെ അമ്മ പൊട്ടിക്കരഞ്ഞു. അവളില്ലാതെ ഞങ്ങള്‍ ഇനി എന്തിന് ജീവിക്കണം. അവരൊക്കെ വലിയ ആളുകളാണ്. നീതി കിട്ടുമോയെന്ന് പേടിയുണ്ടെന്നും ഗോപികയുടെ അമ്മ കണ്ണീരോടെ പറഞ്ഞു.

എന്താണ് സുഹൈലിനെ പാര്‍പ്പിച്ച ബോര്‍സ്റ്റല്‍ സ്‌കൂള്‍? ജയിലുമായുള്ള വ്യത്യാസം എന്ത്?

by Midhun HP News | Oct 13, 2026 | Latest News, കേരളം

കൊച്ചി: നെടുമ്പാശേരിയില്‍ മദ്യപിച്ച് അമിത വേഗത്തില്‍ കറോടിച്ച് മൂന്നു പേരുടെ ജീവനെടുത്ത സുഹൈല്‍ സജീവിനെ ബോര്‍സ്റ്റല്‍ സ്‌കൂളിലേക്കു മാറ്റിയത് വലിയ ചര്‍ച്ചയാണ് സാമൂഹ്യ മാധ്യമങ്ങളില്‍ ഉയര്‍ത്തിവിട്ടത്. സുഹൈലിനെ ജുവനൈല്‍ ഹോമിലേക്കു മാറ്റിയെന്നായിരുന്നു, ചര്‍ച്ചകളുടെ കാതല്‍. എന്നാല്‍ സുഹൈലിനെ പാര്‍പ്പിച്ച ബോര്‍സ്റ്റല്‍ സ്കൂള്‍ ജുവനൈല്‍ ഹോം അല്ല എന്നതാണ് യാഥാര്‍ഥ്യം. എന്നാല്‍ അതു കൊടും കുറ്റവാളികളെ പാര്‍പ്പിക്കുന്ന തടവറയുമല്ല.

നിയമപരമായി 21 വയസില്‍ താഴെയുള്ള കുറ്റവാളികളെ പാര്‍പ്പിക്കുന്ന ഇടമാണ് ബോര്‍സ്റ്റല്‍ സ്കൂള്‍. കാക്കനാട് ജില്ലാജയിലിനോട് ചേര്‍ന്നുള്ള, ഇപ്പോള്‍ സുഹൈലിനെ പാര്‍പ്പിച്ചിരിക്കുന്നതാണ് സംസ്ഥാനത്തെ ഏക ബോര്‍സ്റ്റല്‍ സ്കൂള്‍.

ഇന്ത്യയിലെ നിയമമനുസരിച്ച് ആറു വയസിന് മുകളില്‍ പ്രായമുള്ള ആര് തെറ്റ് ചെയ്താലും അത് ശിക്ഷ അര്‍ഹിക്കുന്ന കുറ്റമാണ്. ആറിനും 18 നും ഇടയില്‍ പ്രായമുള്ള പ്രതികളെ ദുര്‍ഗുണ പരിഹാര പാഠശാല എന്ന് വിളിക്കുന്ന ജുവനൈല്‍ ജസ്റ്റിസ് ഹോമിലേക്കും 18നും 21നും ഇടയില്‍ പ്രായമുള്ളവരെ ബോര്‍സ്റ്റല്‍ സ്‌കൂളിലേക്കും മാറ്റണമെന്നാണ് നിയമം.

ദുര്‍ഗുണ പരിഹാര പാഠശാല സാമൂഹ്യ നീതി വകുപ്പിന്റെ നിയന്ത്രണത്തിലുള്ള സംരക്ഷണ കേന്ദ്രമാണ്. ഏതാണ്ട് ഒരു ഹോസ്റ്റലിന്‍റെ മാതൃകയിലായിരിക്കും അവിടത്തെ ജീവിതം. ബോര്‍സ്റ്റല്‍ സ്‌കൂള്‍ ആവട്ടെ, ജയില്‍ വകുപ്പിന്റെ നിയന്ത്രണത്തിലുള്ളതാണ്. സൂപ്രണ്ട് അടക്കം ജയില്‍ ഉദ്യോഗസ്ഥരാണ് അവിടെ അന്തേവാസികളെ നോക്കുന്നത്. ജയില്‍ നിയമങ്ങള്‍ എല്ലാം ഇവിടെ ബാധമാണ്.

കാക്കനാട്ടെ ബോര്‍സ്റ്റല്‍ സ്കൂള്‍ തുടക്കത്തില്‍ കണ്ണൂരിലാണ് സ്ഥാപിച്ചത്. ഇത് 1995-ല്‍ ഇങ്ങോട്ടു മാറ്റുകയായിരുന്നു. രാജ്യത്തെ മറ്റ് പല സംസ്ഥാനങ്ങളിലും ഇത്തരം സ്ഥാപനങ്ങള്‍ അടച്ചുപൂട്ടിയപ്പോള്‍ കേരളത്തിലെ ബോര്‍സ്റ്റല്‍ സ്‌കൂള്‍ ശിക്ഷയേക്കാള്‍ കൂടുതല്‍ അവരെ നല്ല മനുഷ്യരാക്കി ജീവിതത്തിലേക്ക് തിരിച്ചുകൊണ്ടുവരുകയെന്ന ലക്ഷ്യത്തോടെ പ്രവര്‍ത്തിച്ചുവരുന്നതെന്ന് സൂപ്രണ്ട് അജു ആര്‍ വി പറഞ്ഞു.

ഇവിടെ കൊടുംകുറ്റവാളികളോ ഭയാനകമായ അന്തരീക്ഷമോ ഇല്ല. പകരം, കുറ്റവാളികള്‍ക്ക് ജീവിതം കെട്ടിപ്പടുക്കാന്‍ സഹായിക്കുന്ന കഴിവുകള്‍ ഇവിടെ നിന്ന് നേടിയെടുക്കാം. മാനസികമായ വളര്‍ച്ചയ്ക്ക് ഉപകരിക്കുന്ന കൃഷി, ബാഡ്മിന്റണ്‍ തുടങ്ങിയ കായിക വിനോദങ്ങള്‍ക്ക് അവസരം നല്‍കും. ശാരീരിക വ്യായാമത്തോടെയാണ് ദിവസം ആരംഭിക്കുന്നത്. തുടര്‍ന്ന് പല വിധത്തിലുള്ള ക്ലാസുകളിലും പങ്കെടുപ്പിക്കുന്നു. ചില അന്തേവാസികള്‍ പാചകത്തില്‍ സഹായിക്കുമ്പോള്‍, മറ്റുചില ജോലികളില്‍ ഏര്‍പ്പെടുന്നു. ചെടികള്‍ പരിപാലിക്കുക, മത്സ്യങ്ങള്‍ക്ക് ആഹാരം കൊടുക്കുക എന്നിവയും ചെയ്യുന്നു.

66 അന്തേവാസികളെ ഉള്‍ക്കൊള്ളാന്‍ പാകത്തില്‍ 16 സെല്ലുകളായാണ് ആദ്യം ബോര്‍സ്റ്റര്‍ സ്‌കൂളില്‍ ഉണ്ടായിരുന്നത്. ഇന്ന് ഇവിടെ ഏകദേശം 80 പേരുണ്ട്. നേരത്തെ അന്തേവാസികളുടെ എണ്ണം 140 വരെ എത്തിയിരുന്നു. ഒരു റസിഡന്‍ഷ്യല്‍ വിദ്യാഭ്യാസ സ്ഥാപനത്തിന്റേതിന് സമാനമായ അന്തരീക്ഷമാണ് ഇവിടെയുള്ളത്.

പരിശീലന പരിപാടികള്‍

വിവിധ സംഘടനകളുടെയും സന്നദ്ധപ്രവര്‍ത്തകരുടെയും സഹകരണത്തോടെ സര്‍ട്ടിഫിക്കറ്റ്, പരിശീലന പരിപാടികള്‍ ഈ സ്ഥാപനം നല്‍കുന്നുണ്ട്. സാംസ്‌കാരിക വകുപ്പിന്റെയും തൃക്കാക്കര മുനിസിപ്പാലിറ്റിയുടെയും സഹകരണത്തോടെ നാടന്‍പാട്ട്, നാടകം, മറ്റ് സര്‍ഗ്ഗാത്മക കലകള്‍ എന്നിവയില്‍ അന്തേവാസികള്‍ക്ക് പരിശീലനം നല്‍കുന്നു. കുറ്റകൃത്യങ്ങളില്‍ ഏര്‍പ്പെട്ട യുവാക്കളില്‍ ആത്മവിശ്വാസം വളര്‍ത്താനും സ്വയം വളരാനുള്ള പ്രോത്സാഹനം നല്‍കാനും ലക്ഷ്യമിട്ടാണ് ഈ പരിപാടികള്‍ ആസൂത്രണം ചെയ്തിരിക്കുന്നത്. നേരത്തെ മരപ്പണി, നെയ്ത്ത്, ഫിറ്റ്‌നെസ് എഡ്യൂക്കേഷന്‍ എന്നിവയില്‍ പ്രത്യേക പരിശീലനം ഇവിടെ ഉണ്ടായിരുന്നു.

എന്നാല്‍ ഇന്ന്, മുഴുവന്‍ അന്തേവാസികള്‍ക്കുമായി രണ്ട് അധ്യാപകരും ഒരു നെയ്ത്ത് പരിശീലകനും മാത്രമാണ് ഇവിടെയുള്ളത്. ഏകദേശം 30-40 ശതമാനം പേരും പോക്‌സോ നിയമപ്രകാരമുള്ള കേസുകളില്‍ ഉള്‍പ്പെട്ടവരാണ്. 20 ശതമാനം പേര്‍ ഇതര സംസ്ഥാന തൊഴിലാളികളാണ്. ഇവരില്‍ പലരും ലഹരിമരുന്ന് കേസുകളില്‍ ഉള്‍പ്പെട്ടവരാണ്. മോഷണം മുതല്‍ ചെറിയ കുറ്റകൃത്യങ്ങള്‍ ചെയ്തവരും ഇക്കൂട്ടത്തിലുണ്ട്.

സ്വര്‍ണവില താഴോട്ട്; രണ്ടുദിവസത്തിനിടെ 1560 രൂപയുടെ ഇടിവ്, 1,10,000ല്‍ താഴെ തന്നെ

by Midhun HP News | Oct 13, 2026 | Latest News, കേരളം

കൊച്ചി: സംസ്ഥാനത്ത് സ്വര്‍ണവില കുറഞ്ഞു. പവന് 280 രൂപയാണ് കുറഞ്ഞത്. 1,09,480 രൂപയാണ് ഒരു പവന്‍ സ്വര്‍ണത്തിന്റെ വില. ഗ്രാമിന് ആനുപാതികമായി 35 രൂപയാണ് കുറഞ്ഞത്. 13,685 രൂപയാണ് ഒരു ഗ്രാം സ്വര്‍ണത്തിന്റെ വില. രണ്ടുദിവസത്തിനിടെ 1560 രൂപയാണ് കുറഞ്ഞത്. ഇന്നലെ മാത്രം രണ്ടുതവണയായി 1280 രൂപയാണ് കുറഞ്ഞത്.

ആഗോള വിപണിയില്‍ എണ്ണവില കുറഞ്ഞത് അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വിലയില്‍ ബാരലിന് 1.21 ശതമാനത്തിന്റെ ഇടിവാണ് രേഖപ്പെടുത്തിയത്. 105.4 ഡോളറാണ് ഒരു ബാരല്‍ എണ്ണയുടെ നിലവിലെ വില. ഇതിന് പുറമേ പുറത്തുവരാനിരിക്കുന്ന അമേരിക്കയുടെ പണപ്പെരുപ്പ കണക്കുകളും വിപണിയെ സ്വാധീനിക്കും. പണപ്പെരുപ്പ നിരക്ക് കൂടുകയാണെങ്കില്‍ പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് നിര്‍ബന്ധിതമാകും. ഇത് സ്വര്‍ണത്തിന്റെ ആകര്‍ഷണം കുറയ്ക്കാമെന്നാണ് വിപണി വിദഗ്ധര്‍ പറയുന്നത്.

ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന്‍ വില ആദ്യമായി ഒരു ലക്ഷം കടന്നത്.