സിഎംആര്‍എല്‍ അഴിമതി: വിജിലന്‍സ് കേസെടുത്തു, രണ്ട് എഫ്ഐആര്‍, പിണറായി വിജയന്‍ ഒന്നാംപ്രതി

by Midhun HP News | Oct 12, 2026 | Latest News, ജില്ലാ വാർത്ത

കൊച്ചി: സിഎംആര്‍എല്‍-എക്‌സാലോജിക് മാസപ്പടി കേസില്‍ വിജിലന്‍സ് എഫ്‌ഐആര്‍ രജിസ്റ്റര്‍ ചെയ്തു. രണ്ട് എഫ്ഐആറുകളാണ് വിജിലന്‍സ് രജിസ്റ്റര്‍ ചെയ്തിരിക്കുന്നത്. ഒന്നാമത്തെ കേസിൽ പിണറായി വിജയനാണ് ഒന്നാം പ്രതി. വിജിലന്‍സ് സ്പെഷല്‍ ഇന്‍വെസ്റ്റിഗേഷന്‍ യൂണിറ്റ് -1 ആണ് രണ്ട് എഫ്ഐറുകളും രജിസ്റ്റര്‍ ചെയ്തിരിക്കുന്നത്. രണ്ട് എഫ്ഐആറുകളും ഇന്നുതന്നെ തിരുവനന്തപുരം വിജിലന്‍സ് കോടതിയില്‍ നല്‍കും.

നിയമോപദേശത്തിന്‍റെ അടിസ്ഥാനത്തിലാണ് രണ്ട് എഫ്ഐആറുകള്‍ രജിസ്റ്റര്‍ ചെയ്യാന്‍ വിജിലന്‍സ് ഡയറക്ടര്‍ നിര്‍ദേശം നല്‍കിയത്. ആദ്യ കേസ് അഴിമതി നിരോധന നിയമപ്രകാരവും, രണ്ടാമത്തേത് കുഴല്‍പ്പണ ഇടപാട് കേസുമാണ്. രണ്ടു കേസിലും വീണ പ്രതിയാണ്. രണ്ടാമത്തെ കേസിലാണ് വീണയുടെ ഭര്‍ത്താവ് മുഹമ്മദ് റിയാസ് പ്രതിയായിട്ടുള്ളത്. ഈ കേസിൽ റിയാസ് ഒന്നാം പ്രതിയാണ്. ഹൈക്കോടതി ഉത്തരവിന്റെ അടിസ്ഥാനത്തിലാണ് വിജിലന്‍സ് കേസെടുത്തത്.

സിഎംആര്‍എല്ലും പിണറായി വിജയന്റെ മകള്‍ വീണയുടെ സ്ഥാപനമായ എക്‌സാലോജിക്കുമായുള്ള സാമ്പത്തിക ഇടപാടുമായി ബന്ധപ്പെട്ട് ഇ ഡി നല്‍കിയ രേഖകളുടെ അടിസ്ഥാനത്തില്‍ എഫ്‌ഐആര്‍ റജിസ്റ്റര്‍ ചെയ്യാനാണ് ജസ്റ്റിസ് എ ബദറുദീന്റെ ബെഞ്ച് ഉത്തരവിട്ടത്. ഇ ഡി ഡിജിപിക്ക് നല്‍കിയ നല്‍കിയ രേഖകളുടെ അടിസ്ഥാനത്തില്‍ സംസ്ഥാന സര്‍ക്കാര്‍ നേരത്തെ പ്രാഥമികാന്വേഷണം പ്രഖ്യാപിച്ചിരുന്നു.

ക്രൈംബ്രാഞ്ച് എഡിജിപി എച്ച് വെങ്കിടേഷിന്റെ നേതൃത്വത്തിലുള്ള എസ്‌ഐടിയാണ് സര്‍ക്കാര്‍ രൂപീകരിച്ചത്. എന്നാല്‍ എസ്‌ഐടിയുടെ പ്രാഥമികാന്വേഷണമല്ല, എഫ്‌ഐആര്‍ രജിസ്റ്റര്‍ ചെയ്ത് തന്നെ അന്വേഷിക്കാനാണ് കോടതി നിര്‍ദേശിച്ചത്. വിജിലന്‍സ് അന്വേഷണം ആവശ്യപ്പെട്ട് അഡ്വ. കെ എം ഷാജഹാന്‍ നല്‍കിയ ഹര്‍ജിയിലാണ് കോടതി ഉത്തരവ്. ഇ.ഡി നല്‍കിയ റിപ്പോര്‍ട്ടില്‍ എഫ്‌ഐആര്‍ റജിസ്റ്റര്‍ ചെയ്യാതെ സര്‍ക്കാര്‍ വീഴ്ച വരുത്തിയെന്ന് ഹര്‍ജിക്കാരന്‍ ആരോപിച്ചിരുന്നു.

സിഎംആര്‍എല്‍ കമ്പനിയില്‍നിന്ന് 3.28 കോടി രൂപ വഴിവിട്ട് കൈപ്പറ്റിയെന്നും വീണയ്ക്ക് 20 കോടിയോളം രൂപയുടെ അനധികൃത വരുമാനമുണ്ടെന്നും ഹവാല ഇടപാടുകള്‍ നടന്നെന്നും ചൂണ്ടിക്കാട്ടിയാണ് സംസ്ഥാന പൊലീസിന് ഇ ഡി വിവരങ്ങള്‍ നല്‍കിയത്. അഴിമതി നിരോധന നിയമത്തിലെ സെക്‌ഷൻ 13(1)(ബി) പ്രകാരം 10 വർഷം വരെ തടവുശിക്ഷ ലഭിക്കാവുന്ന കുറ്റകൃത്യങ്ങൾ ഇ.ഡി കണ്ടെത്തിയിട്ടും ബിഎൻഎസ്എസ് നിയമത്തിലെ വ്യവസ്ഥകൾ ലംഘിച്ചാണ് സർക്കാർ പ്രാഥമിക അന്വേഷണത്തിനു മാത്രം ഉത്തരവിട്ടതെന്ന് ഹർജിയിൽ ആരോപിച്ചിരുന്നു.

കഥാസമാഹാരം ‘ശ്രീമയി’യുടെ പുസ്തക പ്രകാശനം നടന്നു

by Midhun HP News | Oct 11, 2026 | Latest News, ജില്ലാ വാർത്ത

ആറ്റിങ്ങൽ: സാഹിത്യ പബ്ലിക്കേഷൻസ് പ്രസിദ്ധീകരിച്ച രതിമോൾ ജിനിയുടെ കഥാസമാഹാരം ‘ശ്രീമയി’യുടെ പുസ്തക പ്രകാശനം ആറ്റിങ്ങൽ വീരളം ദ്വാരക ഓഡിറ്റോറിയത്തിൽ നടന്നു. സാഹിത്യകാരനും സാംസ്കാരിക പ്രവർത്തകനുമായ ഉണ്ണി ആറ്റിങ്ങൽ പുസ്തക പ്രകാശനം നിർവഹിച്ചു. കവിയും നാടകപ്രവർത്തകനും സാംസ്കാരിക പ്രവർത്തകനുമായ രാധാകൃഷ്ണൻ കുന്നുംപുറം പുസ്തകം ഏറ്റുവാങ്ങി.

സാഹിത്യ പബ്ലിക്കേഷൻസ് മാനേജിംഗ് എഡിറ്റർ സുദീപ് തെക്കേപ്പാട്ട് അധ്യക്ഷത വഹിച്ചു.. പ്രേം മധുസൂദനൻ പുസ്തക പരിചയം നടത്തി.

ലോഹിദാസ് എസ്, ശാന്തകുമാരിഅമ്മ, രശ്മി മൂത്തേടത്ത് , മണികണ്ഠൻ.ജി.എസ്., ദിലിപ്രസാദ് സുരേന്ദ്രൻ, ദിനശ്രീ സുചിത്തൻ, കൃഷ്ണ ടി.എസ്,എം.ജി. മനോജ്, അക്ഷര രാജ്
തുടങ്ങിയവർ ആശംസകൾ അർപ്പിച്ചു സംസാരിച്ചു.

ടൂറിസം കുതിപ്പിന് അനുകൂല എക്സൈസ് നയം ഉടൻ; പ്രഖ്യാപനവുമായി മുഖ്യമന്ത്രി

by Midhun HP News | Oct 11, 2026 | Latest News, ജില്ലാ വാർത്ത

തിരുവനന്തപുരം: സംസ്ഥാനത്തെ വിനോദസഞ്ചാര മേഖലയുടെ സമഗ്ര വളർച്ചയ്ക്കായി ടൂറിസം സൗഹൃദപരമായ പുതിയ എക്സൈസ് നയം സർക്കാർ ഉടൻ നടപ്പിലാക്കുമെന്ന് മുഖ്യമന്ത്രി വിഡി സതീശൻ . വിനോദസഞ്ചാരത്തിന് എതിരുനിൽക്കുന്ന യാതൊരു തീരുമാനവും സർക്കാരിന്റെ ഭാഗത്തുനിന്നുണ്ടാകില്ലെന്നും ഇതിനായുള്ള പുതിയ നയരൂപീകരണം പുരോഗമിക്കുകയാണെന്നും അദ്ദേഹം പറഞ്ഞു.

ദി ന്യൂ ഇന്ത്യൻ എക്സ്പ്രസ് എഡിറ്റോറിയൽ ഡയറക്ടർ പ്രഭു ചൗള അവതാരകനായ ‘ക്യു ആൻഡ് എ വിത്ത് ദി ചീഫ് മിനിസ്റ്റർ’ എന്ന പരിപാടിയിൽ പങ്കെടുക്കവെയാണ് മുഖ്യമന്ത്രി ഇക്കാര്യം വ്യക്തമാക്കിയത്. വിദേശ രാജ്യങ്ങളിൽ പോയാൽ ആസ്വദിക്കാൻ പബ്ബുകളും മറ്റ് സൗകര്യങ്ങളുമുണ്ട്, എന്നാൽ കേരളത്തിൽ നിലവാരമുള്ള മദ്യം പോലും കിട്ടാൻ പ്രയാസമാണെന്ന് കേൾക്കുന്നുണ്ട്, അതിനാൽ എക്സൈസ് നയം ടൂറിസം സൗഹൃദമാക്കാൻ ഉദ്ദേശിക്കുന്നുണ്ടോ എന്ന പ്രഭു ചൗളയുടെ ചോദ്യത്തിന് മറുപടി നൽകുകയായിരുന്നു അദ്ദേഹം.

രണ്ട് വർഷത്തിനകം കേരളത്തിലെത്തുന്ന ആഭ്യന്തര-വിദേശ വിനോദസഞ്ചാരികളുടെ എണ്ണം മൂന്നിരട്ടിയാക്കുകയാണ് സർക്കാരിന്റെ പ്രധാന ലക്ഷ്യമെന്ന് മുഖ്യമന്ത്രി പറഞ്ഞു. ഇതിന്റെ ഭാഗമായി പ്രമുഖ ആഗോള, ദേശീയ ഹോട്ടൽ ശൃംഖലകളുടെ പങ്കാളിത്തത്തോടെ 25 പുതിയ ഫൈവ് സ്റ്റാർ ഹോട്ടലുകൾ സംസ്ഥാനത്ത് ആരംഭിക്കാൻ ധാരണയായിട്ടുണ്ട്. പ്ലാന്റേഷൻ ടൂറിസത്തിന് അനുമതി നൽകുന്ന നിർണ്ണായക നിയമ ഭേദഗതി ഈ മാസം തന്നെ പൂർത്തിയാക്കും. ആധുനിക ഓഷ്യനേറിയം, അന്താരാഷ്ട്ര മാരിടൈം മ്യൂസിയം, ആയുർവേദ-വെൽനസ് കേന്ദ്രങ്ങൾ, വിദ്യാഭ്യാസ കേന്ദ്രങ്ങളായ നോളജ് വാലികൾ എന്നിവ വികസിപ്പിക്കും. യൂറോപ്യൻ മാതൃകയിൽ 44 നദികളെ പരസ്പരം ബന്ധിപ്പിച്ച് റിവർ ക്രൂയിസുകളും കൊച്ചി, കോഴിക്കോട് കേന്ദ്രീകരിച്ച് ക്രൂയിസ് ടെർമിനലുകളും സജ്ജമാക്കും. നാല് അന്താരാഷ്ട്ര വിമാനത്താവളങ്ങളെ കേന്ദ്രീകരിച്ച് പൈലറ്റ് പരിശീലനം, ഹെലികോപ്റ്റർ ട്രെയിനിങ്, എം.ആർ.ഒ സംവിധാനങ്ങൾ എന്നിവയടങ്ങുന്ന ഏവിയേഷൻ ഹബ്ബായി കേരളത്തെ മാറ്റുമെന്നും അദ്ദേഹം കൂട്ടിച്ചേർത്തു.

സംസ്ഥാനത്ത് അഞ്ചുലക്ഷം കോടിയോളം രൂപയുടെ കടബാധ്യതയുണ്ടെങ്കിലും അഞ്ചുവർഷത്തെ ഭരണകാലയളവിൽ നികുതി വർദ്ധിപ്പിക്കൽ ഒരു പരിഹാരമായി കാണുന്നില്ലെന്ന് മുഖ്യമന്ത്രി വ്യക്തമാക്കി. കേരളം ഒരു ഉപഭോഗ സംസ്ഥാനമായതിനാൽ നികുതി കൂട്ടുമ്പോൾ അത് വെട്ടിക്കാനുള്ള പ്രവണതയാണ് ഉണ്ടാവുക. ന്യായമായ നിരക്കുകൾ നിലനിർത്തിക്കൊണ്ട് പുതിയ സാമ്പത്തിക പ്രവർത്തനങ്ങൾക്ക് വഴിയൊരുക്കുകയാണ് വേണ്ടത്. വനഭൂമിയും ഉയർന്ന ജനസാന്ദ്രതയും കാരണം ഭൂലഭ്യത കുറവുള്ള സംസ്ഥാനത്ത് വലിയ നിക്ഷേപ സാധ്യതകളാണ് തുറമുഖങ്ങൾ തുറന്നിടുന്നത്.

വിഴിഞ്ഞം ഉൾപ്പെടെയുള്ള രണ്ട് അന്താരാഷ്ട്ര തുറമുഖങ്ങളെയും 18 ചെറുകിട തുറമുഖങ്ങളെയും സംയോജിപ്പിച്ച് കേരളത്തിന്റെ 600 കിലോമീറ്റർ തീരപ്രദേശത്തെ ഒരു സമ്പൂർണ്ണ ‘പോർട്ട് സിറ്റി’യായി വികസിപ്പിക്കും. കൊച്ചി അന്താരാഷ്ട്ര വിമാനത്താവളം മാതൃകയിലുള്ള പൊതു-സ്വകാര്യ പങ്കാളിത്തത്തിലൂടെ സർക്കാർ ഭൂമി ഓഹരിയായി നൽകി പ്രവാസികൾക്ക് 1 ലക്ഷം മുതൽ 5 ലക്ഷം രൂപ വരെ നിക്ഷേപിക്കാൻ സൗകര്യമൊരുക്കുന്ന സാമ്പത്തിക മാതൃകകൾ ഉടൻ അവതരിപ്പിക്കും.

കേരളത്തിൽ സിപിഎമ്മിന്റെ സംഘടനാപരമായ തകർച്ചയിൽ തങ്ങൾ സന്തോഷിക്കുന്നില്ലെന്ന് വ്യക്തമാക്കിയ മുഖ്യമന്ത്രി, പാർട്ടിയുടെ നിലപാടുകളെ രൂക്ഷമായി വിമർശിച്ചു. ബംഗാളിൽ സിപിഎമ്മിന് സംഭവിച്ച തകർച്ചയും തുടർന്ന് അണികൾ ബിജെപിയിലേക്ക് ഒഴുകിയതും അദ്ദേഹം ചൂണ്ടിക്കാട്ടി.

കേരളത്തിൽ കടുത്ത കോൺഗ്രസ് വിരുദ്ധ നിലപാടാണ് സിപിഎം സ്വീകരിക്കുന്നത്. ചില ഘട്ടങ്ങളിലൊക്കെ അവർ ബിജെപിയുമായി രഹസ്യധാരണയുണ്ടാക്കാൻ പോലും മടിക്കുന്നില്ല. പഴയ ചിന്താഗതികളിൽ കുടുങ്ങിക്കിടക്കുന്ന സിപിഎമ്മിന് യുവതലമുറയുടെയും പൊതുജനങ്ങളുടെയും വികാരങ്ങൾ ഉൾക്കൊള്ളാൻ സാധിക്കുന്നില്ലെന്നും കോൺഗ്രസിന്റെ പ്രധാന രാഷ്ട്രീയ-ആശയപരമായ ശത്രു എന്നും ബിജെപി തന്നെയാണെന്നും അദ്ദേഹം ആവർത്തിച്ചു.

മുസ്ലിം ലീഗിന് ഭരണത്തിൽ അമിത പ്രാധാന്യം നൽകുന്നുവെന്ന പ്രചാരണം രാഷ്ട്രീയ ദുരുദ്ദേശ്യത്തോടെയുള്ളതാണെന്ന് മുഖ്യമന്ത്രി കുറ്റപ്പെടുത്തി. കഴിഞ്ഞ ആറ് പതിറ്റാണ്ടായി യു.ഡി.എഫ് സർക്കാരുകളിൽ വിദ്യാഭ്യാസ വകുപ്പ് പൂർണ്ണമായും ലീഗിന്റെ കൈവശമായിരുന്ന സ്ഥാനത്ത്, ഇത്തവണ ചരിത്രത്തിലാദ്യമായി വകുപ്പ് വിഭജിച്ച് ഉന്നതവിദ്യാഭ്യാസ വകുപ്പ് കോൺഗ്രസ് നേരിട്ട് ഏറ്റെടുത്തു. ലീഗ് മതേതര സ്വഭാവമുള്ള ജനാധിപത്യ പാർട്ടിയാണ്. മുനമ്പം ഭൂമി പ്രശ്നം ഉയർന്നപ്പോൾ പാണക്കാട് സാദിഖലി ശിഹാബ് തങ്ങൾ നേരിട്ട് ഇടപെട്ടാണ് പ്രശ്നം രമ്യമായി പരിഹരിച്ചത്. ന്യൂനപക്ഷങ്ങൾക്കിടയിലെ മിതവാദ ശബ്ദമായ മുസ്ലിം ലീഗ് ദുർബലമായാൽ ആ വിടവ് മുതലെടുക്കുന്നത് തീവ്രവാദ സംഘടനകളായിരിക്കുമെന്നും അദ്ദേഹം ഓർമ്മിപ്പിച്ചു.