സംസ്ഥാനത്ത് നാളെയും മറ്റന്നാളും തീവ്ര മഴയ്ക്ക് സാധ്യത; 11 ജില്ലകളിൽ ഓറഞ്ച് അലർട്ട്

by admin | Oct 19, 2021 | Latest News, ജില്ലാ വാർത്ത

തിരുവനന്തപുരം: സംസ്ഥാനത്ത് നാളെയും മറ്റന്നാളും തീവ്ര മഴയ്ക്ക് (Kerala Rains)സാധ്യതയെന്ന് കാലാവസ്ഥാ വകുപ്പിന്റെ മുന്നറിയിപ്പ്. നാളെ 11 ജില്ലകളിലും മറ്റന്നാൾ 12 ജില്ലകളിലും ഓറഞ്ച് അലർട്ടാണ്. തിരുവനന്തപുരം, പത്തനംതിട്ട, കോട്ടയം എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട് വയനാട്, കണ്ണൂർ ജില്ലകളിലാണ് നാളെ ഓറഞ്ച് അലർട്ട് പ്രഖ്യാപിച്ചിരിക്കുന്നത്.

ഇന്ന് മധ്യകേരളത്തിലും തെക്കൻ കേരളത്തിലും യെല്ലോ അലർട്ടാണ്. പാലക്കാട്, ഇടുക്കി, കോട്ടയം, ആലപ്പുഴ, പത്തനംതിട്ട, കൊല്ലം, തിരുവനന്തപുരം ജില്ലകളിലാണ് ഇന്ന് യെല്ലോ അലർട്ട്. ഈ ജില്ലകളിൽ ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പ്.

കനത്ത മഴയിൽ ജലനിരപ്പ് ഉയർന്നതോടെ സംസ്ഥാനത്തെ അണക്കെട്ടുകൾ തുറന്ന് തുടങ്ങി. ഇടുക്കി ചെറുതോണി അണക്കെട്ടും പമ്പ അണക്കെട്ടും ഇടമലയാറും ഇന്ന് തുറന്നു. മൂന്ന് വർഷത്തിന് ശേഷമാണ് ഇടുക്കി ഡാം തുറന്നത്. മൂന്ന് തവണ മുന്നറിയിപ്പ് സൈറണ്‍ മുഴക്കിയ ശേഷമാണ് മൂന്ന് ഷട്ടറുകളും തുറന്നത്. മൂന്നാമത്തെ ഷട്ടറാണ് ആദ്യം തുറന്നത്. പിന്നാലെ നീരൊഴുക്ക് പരിഗണിച്ച് ഒരുമണിക്കൂറോളം പിന്നിട്ട ശേഷം നാലാമത്തെ ഷട്ടര്‍ തുറന്നു. ഇതിനെ പിന്നാലെ രണ്ടാം നമ്പര്‍ ഷട്ടറും തുറന്നത്. ഒരു സെക്കന്‍റില്‍ ഒരുലക്ഷം ലിറ്റര്‍ വെള്ളം പുറന്തള്ളുന്ന രീതിയിലാണ് ക്രമീകരിച്ചിട്ടുള്ളത്. പെരിയാര്‍ തീരത്ത് അതീവ ജാഗ്രതാ നിര്‍ദ്ദേശമാണ് നല്‍കിയിരിക്കുന്നത്.

ഇടുക്കി ഡാം തുറക്കുന്നതിനു മുൻപ് മുൻകരുതലായാണ് ഇടമലയാർ ഡാം തുറന്നത്. ഡാമിന്റെ രണ്ടു ഷട്ടറുകൾ 80 സെൻ്റീമീറ്റർ വീതമാണ് ഉയർത്തിയത്. ആശങ്കയുടെ സാഹചര്യം ഇല്ലെങ്കിലും നദി തീരത്ത് താമസിക്കുന്നവരോട് ജാഗ്രത പാലിക്കാൻ നിർദ്ദേശം നൽകിയിട്ടുണ്ട്.

ആറ്റിങ്ങൽ നഗരസഭയുടെ ദുരിതാശ്വാസ ക്യാമ്പിൽ കഴിഞ്ഞവർക്ക് സൗജന്യ ഭക്ഷണം നൽകി കുടുംബശ്രീ യൂണിറ്റ്

by admin | Oct 19, 2021 | Latest News, ജില്ലാ വാർത്ത

ആറ്റിങ്ങൽ: വെള്ളപ്പൊക്കത്തെ തുടർന്ന് കഴിഞ്ഞ 2 ദിവസമായി നഗരസഭയുടെ ദുരിതാശ്വാസ ക്യാമ്പിൽ കഴിഞ്ഞ നൂറോളം പേർക്കാണ് കുടുംബശ്രീ യൂണിറ്റ് സൗജന്യ ഉച്ചഭക്ഷണം നൽകിയത്. നഗരസഭയിൽ പ്രവർത്തിക്കുന്ന ജനകീയ ഭക്ഷണശാലയിൽ നിന്ന് കുടുംബശ്രീ സിഡിഎസ് ചെയർപേഴ്സൺ എ.റീജയുടെ നേതൃത്വത്തിലുള്ള സംഘം പാചകം ചെയ്ത ഭക്ഷണം ക്യമ്പുകളിലെത്തി വിതരണം ചെയ്തു.

ദിവസങ്ങൾക്ക് മുമ്പ് ഒറ്റപ്പാലം എംഎൽഎ അഡ്വ.പ്രേംകുമാർ യാത്രാമധ്യേ ആറ്റിങ്ങലിലെ ജനകീയ ഹോട്ടലിൽ നിന്ന് ഭക്ഷണം കഴിച്ചിരുന്നത് ഏറെ മാധ്യമ ശ്രദ്ധ നേടിയിരുന്നു. കഴിഞ്ഞ പ്രളയകാലത്തും കൊവിഡ് പ്രതിസന്ധി ഘട്ടത്തിലും കുടുംബശ്രീയുടെ മാതൃകാപരമായ പ്രവർത്തനം പട്ടണത്തിൽ ഏറെ ആശ്വാസം പകർന്നിട്ടുണ്ട്. സൗജന്യ പൊതിച്ചോറ് വിതരണം, ഭക്ഷ്യ കിറ്റ് വിതരണം, വിവിധങ്ങളായ പലിശ രഹിത വായ്പാ സംവിധാനം, മുഖ്യമന്ത്രിയുടെയും നഗരസഭയുടെയും ദുരിതാശ്വാസ നിധിയിലേക്കുള്ള സംഭാവന, പ്രതിരോധ പ്രവർത്തനങ്ങളിൽ കുടുംബശ്രീ അംഗങ്ങളുടെ പങ്കാളിത്തം എന്നിവ വളരെ പ്രധാനപ്പെട്ടതാണ്. ഏതൊരു അടിയന്തിര സാഹചര്യത്തിലും നഗരസഭാ കുടുംബശ്രീയുടെ ജനോപകാരപ്രദമായ പ്രവർത്തനങ്ങൾ തുടർന്നും ഉണ്ടാകുമെന്ന് സിഡിഎസ് ചെയർപേഴ്സൺ എ.റീജ അറിയിച്ചു.