by Midhun HP News | Oct 9, 2026 | Latest News, കേരളം
തിരുവനന്തപുരം: സംസ്ഥാനത്ത് ഇന്നും നാളെയും ശക്തമായ മഴയ്ക്ക് സാധ്യതയെന്ന് കേന്ദ്രകാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. വെള്ളിയാഴ്ച ഒന്‍പത് ജില്ലകളിലാണ് യെല്ലോ അലര്‍ട്ട്.
കൊല്ലം, പത്തനംതിട്ട, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലും ശനിയാഴ്ച പത്തനംതിട്ട, കോട്ടയം, എറണാകുളം, ഇടുക്കി ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്‍ത്ഥമാക്കുന്നത്.
ഈ ദിവസങ്ങളില്‍ മഴയ്ക്കൊപ്പം ഇടിമിന്നലിനും മണിക്കൂറില്‍ 40-50 കിലോമീറ്റര്‍ വരെ വേഗത്തില്‍ ശക്തമായ കാറ്റിനും സാധ്യതയുണ്ടെന്നും മുന്നറിയിപ്പില്‍ പറയുന്നു. തെക്കന്‍ കേരള തീരത്തിന് സമീപമുള്ള തെക്കുകിഴക്കന്‍ അറബിക്കടലില്‍, സമുദ്രനിരപ്പില്‍ നിന്ന് 5.8 കിലോമീറ്റര്‍ ഉയരത്തിലാണ് ചക്രവാതച്ചുഴി നിലനില്‍ക്കുന്നത്. വടക്കന്‍ തമിഴ്നാടിന് മുകളില്‍, സമുദ്രനിരപ്പില്‍ നിന്ന് 5.8 കി.മീ. ഉയരത്തില്‍ മറ്റൊരു ചക്രവാതച്ചുഴിയും തുടരുന്നുണ്ട്. മന്നാര്‍ കടലിടുക്കില്‍ നിന്ന് മധ്യ മഹാരാഷ്ട്രയിലേക്ക്, തമിഴ്നാടും കര്‍ണാടകയും വഴി കടന്നുപോകുന്ന, സമുദ്രനിരപ്പില്‍ നിന്ന് 0.9 കി.മീ. ഉയരത്തില്‍ ന്യൂനമര്‍ദ്ദപാത്തിയും സ്ഥിതി ചെയ്യുന്നതായും മുന്നറിയിപ്പില്‍ പറയുന്നു. ഇതിന്റെയെല്ലാം സ്വാധീനഫലമായാണ് സംസ്ഥാനത്ത് മഴ ലഭിക്കുന്നതെന്നും മുന്നറിയിപ്പില്‍ വ്യക്തമാക്കുന്നു.
കള്ളക്കടൽ ജാഗ്രത നിർദേശം
കള്ളക്കടൽ പ്രതിഭാസത്തിന്റെ ഭാഗമായി തിരുവനന്തപുരം (കാപ്പിൽ മുതൽ പൊഴിയൂർ വരെ) ജില്ലയിലെ തീരങ്ങളിൽ ഇന്ന് രാത്രി 11.30 വരെ 0.9 മുതൽ 1.1 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കള്ളക്കടൽ പ്രതിഭാസത്തിന്റെ ഭാഗമായി കന്യാകുമാരി തീരത്ത് ഇന്ന് രാത്രി 11.30 വരെ 0.9 മുതൽ 1.3 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
by Midhun HP News | Oct 8, 2026 | Latest News, കേരളം
കൊല്ലം: പുനലൂർ പോളിടെക്നിക്കിലെ അധ്യാപകരുടേയും വിദ്യാര്‍ത്ഥിനികളുടേയും ചിത്രങ്ങള്‍ മോര്‍ഫ് ചെയ്ത് അശ്ലീല സൈറ്റുകളില്‍ പ്രചരിപ്പിച്ച കേസിൽ വിദ്യാർത്ഥിക്കെതിരെ പൊലീസ് കേസെടുത്തു. കോളജിലെ അഞ്ചാം സെമസ്റ്റർ വിദ്യാർത്ഥി അച്യുതിനെതിരെയാണ് കേസെടുത്തത്.
പുനലൂർ പോളിടെക്നിക്കിലെ എബിവിപി യൂണിറ്റ് വൈസ് പ്രസിഡന്റാണ് അച്യുത്. അച്യുതിനെതിരെ സഹപാഠികൾ തന്നെയാണ് പ്രിൻസിപ്പലിന് പരാതി നൽകിയത്. പൊലീസിൽ പരാതി നൽകിയ കോളേജ് അധികൃതർ വിദ്യാര്‍ത്ഥിയെ കോളേജിൽ നിന്ന് സസ്പെൻഡ് ചെയ്തിരുന്നു.
അധ്യാപകരുടെയും വിദ്യാർത്ഥികളുടെയും മോർഫ് ചെയ്ത ചിത്രം അശ്ലീല സൈറ്റുകൾക്ക് വിറ്റ് അച്യുത് പണം നേടിയെന്നും ആരോപണമുണ്ട്. സംഭവത്തിൽ വിദ്യാർത്ഥിയുടെ മൊബൈൽ ഫോൺ വിശദ പരിശോധനയ്ക്ക് വിധേയമാക്കുമെന്ന് പൊലീസ് അറിയിച്ചു.
by Midhun HP News | Oct 8, 2026 | Latest News, കേരളം
കോഴിക്കോട്: പൊതുഗതാഗതം ശക്തിപ്പെടുത്തുന്നതിനായി എംഎല്‍എ ഫണ്ട് ഉപയോഗിച്ച് കെ.എസ്.ആര്.ടി.സി.യ്ക്ക് പുതിയ ബസ് വാങ്ങുന്നതിനുള്ള നടപടികള്‍ക്ക് തുടക്കമായി. കേരളത്തില്‍ ആദ്യമായി എംഎല്‍എ ഫണ്ടില്‍ നിന്ന് കെ.എസ്.ആര്.ടി.സി. ബസ് വാങ്ങുന്നതിനായി തുക അനുവദിച്ചത് കൊയിലാണ്ടി എംഎല്‍എ അഡ്വ. കെ. പ്രവീണ്‍ കുമാര്‍ ആണ്. പുതിയ ബസ് വാങ്ങുന്നതിനായി 40 ലക്ഷം രൂപയുടെ പ്രൊപ്പോസല്‍ എംഎല്‍എ കോഴിക്കോട് ജില്ലാ കലക്ടര്‍ എംഎസ് മാധവിക്കുട്ടിക്ക് കൈമാറി. കോഴിക്കോട് ജില്ലാ കലക്ടറുടെ ചേംബറില്‍ നടന്ന ചടങ്ങിലാണ് പദ്ധതിയുമായി ബന്ധപ്പെട്ട നടപടികള്‍ക്ക് തുടക്കമായത്.
എംഎല്‍എ ഫണ്ട് ഉപയോഗിച്ച് കെ.എസ്.ആര്.ടി.സി. ബസ് വാങ്ങുന്നതിനായി തുക നീക്കിവയ്ക്കുന്ന സംസ്ഥാനത്തെ ആദ്യ എംഎല്‍എ എന്ന നിലയില്‍ ഈ പദ്ധതി ശ്രദ്ധേയമാണ്. കൊയിലാണ്ടി നിയോജകമണ്ഡലത്തിലെ യാത്രാക്ലേശം പരിഹരിക്കുന്നതിനും പൊതുഗതാഗത സംവിധാനത്തെ കൂടുതല്‍ ശക്തിപ്പെടുത്തുന്നതിനുമാണ് പുതിയ ബസ് ലഭ്യമാക്കുന്നത്. ബസ് സര്‍വീസ് നടത്തേണ്ട റൂട്ട് ജനപ്രതിനിധികളുമായി ആലോചിച്ച് പിന്നീട് തീരുമാനിക്കുമെന്ന് എംഎല്‍എ അറിയിച്ചു.
തിരുവനന്തപുരം നിയോജകമണ്ഡലത്തിലെ എംഎല്‍എ കൂടിയായ ഗതാഗത വകുപ്പ് മന്ത്രി സി.പി.ജോണ്‍ ഉള്‍പ്പെടെയുള്ള നിരവധി എംഎല്‍എമാര്‍ കെഎസ്ആര്‍ടിസിക്ക് ബസ് വാങ്ങി നല്‍കുന്നതിനായി സന്നദ്ധത അറിയിച്ചിട്ടുണ്ട്. ജനങ്ങളുടെ യാത്രാസൗകര്യം മെച്ചപ്പെടുത്തുന്നതിനും കൂടുതല്‍ പ്രദേശങ്ങളിലേക്ക് കെ.എസ്.ആര്.ടി.സി. സേവനം വ്യാപിപ്പിക്കുന്നതിനുമുള്ള ഇത്തരം ജനകീയ ഇടപെടലുകള്‍ പൊതുഗതാഗത രംഗത്തിന് കൂടുതല്‍ കരുത്തേകും.
by Midhun HP News | Oct 8, 2026 | Latest News, കേരളം
ഇടുക്കി: ഒക്ടോബർ 16-ന് സിപിഎമ്മിൻരെ ആഭിമുഖ്യത്തിൽ ഇടുക്കി ജില്ലയിൽ ഹർത്താൽ ആചരിക്കും. പരിസ്ഥിതിലോല മേഖല നിർണയവുമായി ബന്ധപ്പെട്ട് കേന്ദ്ര സർക്കാരിന് നൽകിയ നിർദ്ദേശങ്ങളുടെ കഡസ്ട്രൽ മാപ്പ് പൊതുജനങ്ങൾക്കായി പുറത്തിറക്കുക, കാർഡമം ഹിൽ റിസർവ്പ്രദേശം വനഭൂമിയാക്കി മാറ്റുന്നതിനുള്ള ഗൂഢനീക്കങ്ങളിൽ നിന്ന് അധികൃതർ പിന്മാറുക, ജനവാസ മേഖലകളെ ബാധിക്കുന്ന പുതിയ ആനത്താരകൾ സൃഷ്ടിക്കുന്നതിനുള്ള നീക്കം ഉപേക്ഷിക്കുക തുടങ്ങിയ സുപ്രധാന ആവശ്യങ്ങൾ ഉന്നയിച്ചാണ് ഒക്ടോബർ 16-ന് ജില്ലയിൽ ഹർത്താൽ പ്രഖ്യാപിച്ചിരിക്കുന്നത്.
ഇഎസ്എ കരട് വിജ്ഞാപനവുമായി ബന്ധപ്പെട്ട് സംസ്ഥാന സർക്കാർ കേന്ദ്രത്തിന് കൈമാറിയ റിപ്പോർട്ടുകളിൽ വ്യക്തത വേണമെന്നും, കൃത്യമായ അതിർത്തികൾ രേഖപ്പെടുത്തിയ വില്ലേജ് തല കഡസ്ട്രൽ മാപ്പുകൾ പരസ്യപ്പെടുത്താൻ അധികൃതർ തയ്യാറാകണമെന്നുമാണ് പ്രധാന ആവശ്യം. ജനവാസ കേന്ദ്രങ്ങളും കർഷകരുടെ കൃഷിയിടങ്ങളും വനഭൂമിയുടെ പരിധിയിൽ അകപ്പെടുമോ എന്ന ഭീതിയിലാണ് മലയോര ജനത.
by Midhun HP News | Oct 8, 2026 | Latest News, ദേശീയ വാർത്ത
ബംഗളൂരു: എസ്‌ഐആര്‍, വോട്ടര്‍ പട്ടിക ക്രമക്കേടുകളില്‍ മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ രാജിവെക്കണമെന്ന് ആവശ്യപ്പെട്ട് ബംഗളൂരുവിൽ കോക്രോച്ച് ജനതാ പാർട്ടിയുടെ പ്രതിഷേധം. നടന്‍ പ്രകാശ് രാജ്, യൂട്യൂബര്‍ ധ്രുവ് റാഠി, സിജെപി സ്ഥാപകന്‍ അഭിജീത് ദിപ്കെ, ജെഎന്‍യു വിദ്യാര്‍ത്ഥി നേതാവ് ഐഷ ഘോഷ്, നേഹ ബോറ തുടങ്ങിയവര്‍ ഫ്രീഡം പാര്‍ക്കില്‍ നടക്കുന്ന പ്രതിഷേധത്തില്‍ പങ്കെടുക്കുന്നുണ്ട്.
സ്ത്രീകളും വിദ്യാര്‍ത്ഥികളും ഉള്‍പ്പെടെ നൂറുകണക്കിന് ആളുകളാണ് ഫ്രീഡം പാര്‍ക്കില്‍ തടിച്ചു കൂടിയത്. വോട്ടുകള്‍ സംരക്ഷിക്കൂ, ജനാധിപത്യത്തെ സംരക്ഷിക്കൂ എന്ന മുദ്രാവാക്യവുമായാണ് പ്രതിഷേധം സംഘടിപ്പിക്കുന്നത്. എസ്‌ഐആര്‍ കേവലമൊരു വോട്ട് മോഷണം മാത്രമല്ലെന്നും, ഇതിലൂടെ തെരഞ്ഞെടുപ്പ് കമ്മീഷന്‍ രാജ്യത്തെ മുഴുവന്‍ ജനങ്ങളെയും അപമാനിച്ചിരിക്കുകയാണെന്നും പ്രകാശ് രാജ് കുറ്റപ്പെടുത്തി.
രാജ്യത്ത് ആര് ഭരിക്കണമെന്ന് ജനങ്ങളാണ് തീരുമാനിച്ചിരുന്നത്. എന്നാല്‍ എസ്‌ഐആര്‍ വന്നതോടെ ആര് വോട്ട് ചെയ്യണമെന്ന് സര്‍ക്കാര്‍ തീരുമാനിക്കുന്ന സ്ഥിതിയായി. വോട്ടര്‍ പട്ടികയില്‍ നിന്ന് പേരുകള്‍ വെട്ടിമാറ്റുന്നത് വെറും സംഖ്യ മാത്രമായി കാണാനാവില്ല. ന്യൂനപക്ഷങ്ങള്‍, ആദിവാസികള്‍, മുസ്ലിംകള്‍ തുടങ്ങിയവരുടെ വോട്ടുകളാണ് പ്രധാനമായും നീക്കം ചെയ്യപ്പെടുന്നത് എന്നും പ്രകാശ് രാജ് പറഞ്ഞു.
എസ്ഐആർ നടപടികളിൽ തെരഞ്ഞെടുപ്പ് കമ്മീഷന്റെ ഭാഗത്തുനിന്ന് സുതാര്യതയോ ഉത്തരവാദിത്തമോ ഒട്ടും ഉണ്ടായിരുന്നില്ല എന്ന് ധ്രുവ് റാഠി ആരോപിച്ചു. ഭരണകൂടത്തെ മാറ്റാനല്ല ഞാൻ ഇവിടെ വന്നിരിക്കുന്നതെന്നും അദ്ദേഹം കൂട്ടിച്ചേർത്തു. എസ്ഐആറിലൂടെ വോട്ടുമോഷണമാണ് നടത്തിയതെന്നും, പ്രധാനമന്ത്രി നരേന്ദ്രമോദി ജനാധിപത്യത്തെ കൊലപ്പെടുത്തിയെന്നും സിജെപി സ്ഥാപകൻ അഭിജിത് ദിപ്കെ കുറ്റപ്പെടുത്തി. ഗ്യാനേഷ് കുമാർ രാജിവെക്കുന്നത് വരെ ഞങ്ങൾ തെരുവിലിറങ്ങുകയും, ജനാധിപത്യം വീണ്ടെടുക്കുകയും സമരം തുടരുകയും ചെയ്യുമെന്നും ദീപ്കെ പറഞ്ഞു.
കര്‍ണാടകയിലെ SIR നടപടികള്‍ മൂലം ദുരിതമനുഭവിക്കുന്നവര്‍ക്കായി ഒരു ‘ജനകീയ ട്രൈബ്യൂണല്‍’ (people’s tribunal) എന്ന നിലയിലാണ് പ്രതിഷേധം സംഘടിപ്പിച്ചത്. ‘Error 404 – Name Not Found’ (പേര് കണ്ടെത്താനായില്ല), ‘It’s done bro, resign sir , ‘Don’t erase us, hear su തുടങ്ങിയ മുദ്രാവാക്യങ്ങള്‍ എഴുതിയ പോസ്റ്ററുകള്‍ പ്രതിഷേധക്കാര്‍ ഉയര്‍ത്തി. ‘ഏകാധിപത്യം അനുവദിക്കില്ല’, ‘വോട്ട് മോഷണം’, ‘ഗ്യാനേഷ് കുമാര്‍ കസേര ഒഴിയൂ’ തുടങ്ങിയ മുദ്രാവാക്യങ്ങളും പ്രതിഷേധക്കാര്‍ ഉയര്‍ത്തി.
സ്വാതന്ത്ര്യസമര സേനാനികളായ ഭഗത് സിംഗ്, സുഭാഷ് ചന്ദ്ര ബോസ് എന്നിവരുടെ ചിത്രങ്ങളുള്ള പോസ്റ്ററുകളും, ‘Grand Theft Democracy’ എന്ന മുദ്രാവാക്യമുള്ള പോസ്റ്ററും പ്രദര്‍ശിപ്പിച്ചിരുന്നു. എസ്‌ഐആര്‍ റദ്ദാക്കണമെന്നും, ഗ്യാനേഷ് കുമാര്‍ സ്ഥാനമൊഴിയണമെന്നും പ്രതിഷേധക്കാര്‍ ആവശ്യപ്പെട്ടു. ജനകീയ വിചാരണ പ്രതിഷേധത്തിന് ശേഷം സ്ത്രീകള്‍ക്ക് ഐക്യദാര്‍ഢ്യം പ്രഖ്യാപിച്ചുകൊണ്ട് ‘ചെരുപ്പ് പ്രതിഷേധം’ നടത്തുമെന്നും സംഘാടകര്‍ അറിയിച്ചു.
പ്രതിഷേധ സ്ഥലത്ത് അനിഷ്ട സംഭവങ്ങള്‍ ഒഴിവാക്കാന്‍ കര്‍ശന സുരക്ഷാ ക്രമീകരണങ്ങള്‍ പൊലീസ് ഏര്‍പ്പെടുത്തിയിട്ടുണ്ട്. സിജെപി ഒക്ടോബര്‍ 10 ന് ഡല്‍ഹി ജന്തര്‍ മന്തറിലും പ്രതിഷേധ പരിപാടികള്‍ പ്രഖ്യാപിച്ചിട്ടുണ്ട്. വിദ്യാര്‍ത്ഥി സംഘടനകളും പ്രതിപക്ഷ പാര്‍ട്ടികളും പ്രതിഷേധത്തില്‍ അണി ചേരുമെന്ന് സിജെപി നേതാക്കള്‍ പറഞ്ഞു.
Recent Comments